放過我，好嗎？

28 October 2006

三日連假的第二日，玩左兩日，真係好happy，但係要搞隻feature，兩日都返左去一陣，始終都掰唔甩d工作
但頭先俾人話我生活糜爛，日日掛住玩
哈，我反而覺得你只係識得做做做，迷失自我，仲糜爛﹗

尋日短時間內買左4樣野，唔使諗唔使考慮，見到鐘意就買，幾多錢都面不改容﹗
雖然唔係lastest貨色，但新買就係新架啦，yeah

今日去睇show，個個都natural high，之後去掃街，食左牛什+魚蛋+魚蛋+星星薯餅+燒賣+雪糕車雪糕，都唔係食左好多野啫，不過好飽
雪糕車《藍色多瑙河》的樂曲，好像魔鬼般，我一聽到首歌，就會六神無主，又似被召喚一樣，只懂得朝著聲音，耳朵帶著我走向雪糕車的方向，一定要食佢的雪糕
你可以話我傻，但我只覺呢d係孩子氣，你唔恨得咁多

********
看到她右手腕上的Tiffany情侶手厄，猶如向我心狠狠刺一刀
其中一個開口處，有一道花痕，是當日將手厄歸還給你時烙下的
這曾經是屬於我的手厄，如今落在另一個她的手上…
你為甚麼讓我看見，為甚麼非讓我看見不可？
當日我得到它時，你說希望我是它的第一個，亦是最後一個主人
說話的前半部分應驗了，下半段卻胎死腹中，今天看來，我還耿耿於懷
這些年來，從不踏進Tiffany半步，慶幸沒有收到Tiffany的禮物，觸動我敏感神經

還記得你喜愛的老歌北非諜影：
Oh! A kiss is still a kiss in Casablanca
But a kiss is not a kiss without your sigh......
有一次你呆等我三小時，我怱怱趕來，臉上貼滿歉意，你卻從容地唱著：
Wherever you go, whatever you do
I will be right here waiting for you
Whatever it takes, or how my heart breaks
I will be right here waiting for you.......
哄得我哭著笑，你撫著我的頭，傻豬傻豬唸唸有詞
我說我喜歡掉幸福的眼淚，教你哭笑不得
如今回想起來，還熱淚盈眶

我輸了，不得不承認
放過我，好嗎？

迷

26 October

搞單咁的野，真係掃興
好地地食晚飯，而家變左食杯麵，真係激死人﹗
要檢討的係你定係我呢？

好迷adidas materials of the world系列
呢件衫，紅白china女裝track jacket，賣2000蚊，我考慮左好耐買定唔買，真係好鍾意好鍾意，仲未決定到…
其實同一系列，indonesia collection亦係激靚，特別鍾意呢對金鞋，全球限量500對，我在香港都未見過對鞋的真身，只係見過件外套，都係盛惠2000個大洋

倒數

24 October 2006

仲有兩日，正確d來講得番一日半咋，就係期待已久的三日連假
好耐都冇試過喇，你又咁啱都係放假喎，你會約我去邊度玩呢？會唔會有surprise呢？

之前以為自己唔見左的散子包，突然間無意間出現番喎，白白傷心一場，但總好過真正傷心一場
哈哈，原來人開心，好運都會跟住你﹗

蟹粉小籠包

23 October 2006

連續兩日的假期，咁就完左，兩日，用晒d時間來訓覺同睇波，有意義定浪費，真係見仁見智
頭先在屋企自製西式晚餐，係西冷+angel hair+西蘭花
賣相同味道都見得下人架，只係個黑椒汁，咸左少少…
買左個焗爐，等我一陣整個飛碟，幫佢開光啦﹗

因為電視重播，所以再睇《童夢奇緣》，睇第二次，但都為同一幕落淚，並沒有因為第一次睇時喊過，今次喊得冇咁犀利，係擊中要害的，睇幾多次，有冇心理準備也如是

唔知點解，忽然間好想食蟹粉小籠包…

who's coming? step forward

21 October 2006

今日唔知叫好彩定唔好彩
我跌左個散子包，我緊張的唔係d神沙，而係個散子包係多年前去tw旅行時買的，係我的飛佛…
頭先以為遲到，但又好在係啱啱好囉
頭先扑咪好順利，前所未有﹗

放工返左屋企換衫，跟住出左旺角，買左飛睇world trade centre
未睇前都預左好煽情，預左係嗰類災難片，不過仍然都睇到喊晒口
我唔會覺得自己渣，睇戲都喊，我反而感覺自豪，我感情豐富，我博愛，我愛生命
如果你係咁膚淺，為睇死人冧樓睇特技，套戲都可以滿足到你
但情感上，如果你投入，你思考，呢套戲都幾heavy
印象最深的一幕：
mcloughlin asks, who's coming? step forward
then jimeno makes a response without hesitation, others follow
可能就係佢呢份戇直與勇敢，讓他得到眷顧
佢唔係因為貪生怕死而堅持到獲救，而是deep in his heart，佢有一個信念，佢有一個牽掛，佢從未絕望，所以命不該絕
我不斷反問自己，如果同一處境，我會諗咩？最想念的係邊個？最想講的說話係咩？我憑甚麼堅持落去？我嗰一點牽掛又係咩？
我果我係jimeno，我會唔會令自己以身犯險？的確係一個疑問
臨尾有一幕allison望住醫院的missing person board，我諗起南亞海嘯
有些人在自毀，自食其果，有些人死在自家製的飛機大炮核彈之下，人既然可以自我滅絕，那麼在大自然面前，又算得係咩？
返到去搵番個網頁睇 http://www.wtcmovie.com/ reads：
A TRUE STORY of COURAGE and SURVIAL
This Film is the TRUE STORY of TWO Port Authorirt POLICEMEN who were TRAPPED IN THE RUBBLE during the RESCUE EFFORT on SEPTEMBER 11.
This is the STORY of JOHN MCLOUGHLIN and WILL JIMENO, the LAST TWO MEN RESCUED from the COLLAPSE of the WORLD TRADE CENTRE.

其實感人背後，亦可以將成件事諗得好陰謀論
以前有硬銷的propaganda，而家用潛移默化，電影的trailer和結尾都係話：
the world saw EVIL that day, two men saw SOMETHING ELSE
此言一出，已為成件事下左個judgement
我覺得有人想利用人這一點好善之心，共同反恐
恐怖襲擊，正令兩位主角咁痛苦，大家出於同情、敬佩無私奉獻的精神，勾起觀眾反恐的情緒，這是軟銷
令人自願地改變，呢一招對嗰d marginal case，本身冇立場的遊離派，影響最大
影片中合理化「保家衛國」，教訓恐怖份子的思想；又再一次歌頌大美國主義，宣傳美國人不會被打倒的意識
這是一部如佢所言的勵志片，定係政治宣傳片，睇下你點睇喇

他說：「我想 做你的男人」

20 October 2006

心情指數同股市一樣，係會創新高，但當刺激過後，要睇下有冇足夠基本因素，令佢在高位企硬，稍為回落少少，都係好正常的，呢d叫獲利回吐
整體而言，今次升勢都幾好，keep住心情靚靚
但今日略為回軟，因為有d寂寞囉，心情指數屬中等至偏高

冇同某甲某乙食飯，結果去左葵芳，食潮館，真係明智的決定﹗
滷水餓、瀨尿蝦點都吸引過冬瓜盅同生炒骨啦

話說早幾日講過「做你的男人」事件，今日開估啦
其實係一場誤會
佢msn send個message過來，其實係話「我想要做你的男人」
個「要」字係嗰d符號，冇即刻load出來，咪變左「我想 做你的男人」
而「做你的男人」係張信哲隻新碟，哈哈
所以唔好胡亂揣摩「消息」摸貨，心情指數勁升，唔係因為呢件事

我會謹記：快樂的人，永遠是最吸引的

遊魂

19 October 2006

哈哈，又係夢中度日，成日都唔知自己做咩，遊魂﹗
平時三個字撩隻court，但係我今日缺態，領隊又唔俾我倦勤，(咁我又冇request唔出…)冇態都照出，咪工作效率下降囉，同球員一樣，冇態都要入世界波咩…
放工即閃，返去食左少少野訧訓，竟然咁樣訓，都有5個幾鐘訓，多過平時，因為平日都係訓得三四個鐘，勁呀﹗睇完仲可以訓兩三個鐘，正
車仔主場vs巴塞，踢到82分鐘，仍然係車仔領先1-0，下半場開波一分鐘，估佢唔到的drogba，又玩大車身入波
呢條友好古怪，俾佢簡單易入的波、單刀波、執雞波佢實入唔到，永遠都係入d意想不到高難度入球，都唔知佢咩構造﹗
雖然有時覺得佢好廢，但我都好佩服佢，佢在批評中默默耕耘，他不是逆來順受，而是淡然面對，堅守自己的原則，相信自己，以血汗去證明自己的存在，呢d人，有值得尊敬的地方

頭先msn啦，佢問我做咩心情激靚，點答好呢，一言難盡
但由最低最depressed的位置，重回正軌，並貫通了思想的通道，湊番快樂小天使返屋企，令我愁眉深鎖的人和事都K.O.晒，最重要的係，令我開懷的人和事都相繼出現

我都話我發緊夢啦，頭先俾人話我d vo好古怪…
收到，我會改的

心不在焉

18 October 2006

今日又好鬼眼訓呀，返左公司，諗住唔使出去跑，咪著裙囉，結果都係要出去，噢…仲要去個午餐會，早餐都未食，睇住人食午餐，好肚餓呀﹗
成班人講起不在場的佢，真係好好笑，是非，咪就係咁樣來架囉﹗

今日傻傻地，語無倫次，同一個問題重覆問三次，用d跳躍式非典型思維方式，諗埋晒d唔實際的野，
做野又不在狀態，慢啦，冇sense，不斷發夢，之後傻笑，真係唔知點解
可能係…
不過，唔係每件事都要搵到個解釋既

因為做野遲走，返到屋企已經8點幾，簡單執拾下、落左妝就訓，連飯都未食，訓到12點起身，今晚有歐聯，阿仙奴開早，跟住有曼聯呀
Arsenal作客挑戰CSKA Moskva中，但落後緊1-0
莫斯科係咪好凍呢？班阿森納人同我一樣，心不在焉…
死啦，今日先星期二，點捱呀？
頭先初步問左，12月頭攞假應該冇問題，忽然間想要陽光與海灘多d

佢話搵到工喇，其實講轉工會唔會正確d呢？又係好近屋企的，好搞笑，好似小學生，學校在屋企附近

Arsenal最後都係輸左啦，衰人﹗
ManU vs København正進行得如火如「茶」，0-0也不是太強差人意

呢排零食當正餐，食埋晒d垃圾，身體都開始抗議
我知係唔健康，但真係鐘意食嘛，我屋企簡直就似一間7仔啦，飲品零食即食麵，以前微波仲健在時，仲有各式微波爐食品
不過真係越來越懶，以前做一仔，放工都會煮下飯仔，但而家呢…
之前就話返夜有藉口，根本唔會煮，但而家返b，都係唔會煮野食，最大的原因，係唔想洗碗
我已經退化到只用即棄筷子，有一排用過即棄的碗，但發現有個問題，就係呢d碗唔耐熱，煮個麵，裝碗湯，過一陣已會一陣硬膠膠的味，咦…
所以都係算啦，碗都係要用，筷子匙羹，可以洗少樣得一樣

事隔多年，老世都改朝換代啦，都係要靠當年的黃金一代，雖然己經4散，但Scholes、Solskjaer、G. Neville呢d，真係好似老舒大哥咁，越老越可愛﹗
半場1-0，都係旺主場喎；下半場甫開波，話咁快就2-0，83分鐘，3-0

心情靚爆

17 October 2006

今日心情激靚﹗真係唔知點解，不如循今日做過的一切一切，搵番d蛛絲馬跡
早上鬧鐘7點25分響，禁熄左之後，訓到8點先起身，真係大鑊，極速刷牙洗面，彈落地鐵站碌出新城
之後上左中環，因為單野太奀，要等埋其他野先pack，所以咪去kfc買左個早餐
跟住遊下網啦，收齊料寫故
lunch實在唔肚餓，所以只係買左一個水晶梨同一支乳酪，跟住因為冇assignment，快叉左個零鐘
之後餓餓地，去買葡撻同香蜜鬆餅，之後先有故收
今日寫左一個slug，但兩個version基本上係完全唔同，你話寫左一隻故又得，寫左兩隻故又得
1900cast睇埋自己隻故先閃，返沙田屋企食飯，途中某人打來同我一唔一齊食飯，好少有喎，我以為有咩特別，又唔係丫，只不過都係在光輝圍食打冷啫，我已經係在獅隧途中，冇法了，咁遲先打來，睇番電話個record，係1953，下回請早啦﹗
返去食飯，有蟹食，taste good﹗
十點左右閃，搭車途中瞌著左，返去online msn、聽歌、睇英超精華、打blog

單從客觀事件，真係唔知點解今日心情咁靚爆
但其實由早上去買早餐時，嘴角已不自覺地微微向上翹
越晏情況越嚴重，頭先返屋企途中，竟不斷傻笑，在車上、在斑馬線上、在行人路上，別人看我是那麼奇怪，但偷快的心境，打倒所有人的注目禮，範不著不相干的路人向我投以贊成票
開心就係開心，唔使解釋﹗

聽日返公司啦，希望可以同你食個lunch啦﹗

well，你聽日出發喇喎，一帆風順，手信呀﹗

欲知後事如何？

16 October 2006

頭先嚇死我呀，不過我唔係去左哈佬喂喎
話說頭先那個有曖昧的他，send 左個message俾我，內容如下：
我想 做你的男人
嘩，唔係咁猖狂嘛…

欲知後事如何？唔話你知呀

今日起身已經四點幾，出旺角途中架車在美乎附近跤底，邪﹗

近日玩砌圖遊戲，砌得啱唔啱，其實冇所謂，我enjoy係砌的過程，砌一d合我心意的東西，已夠我開心半天，係咪model answer係咪原圖，其實我唔care
如果咁樣諗會開心d，哪需管它熟真熟假？讓我繼續活在幻想的空間啦

眾志成城為cudicini

15 October 2006

今日放假，寫blog的開場白，你估唔估到呢？
哈哈，又係一日食一餐﹗不過呢餐同平日有少少唔同，係bbq，之前已經預告左
睇緊chelsea作客reading，仲係chelsea贏緊1-0

yeah﹗joe cole終於回歸了﹗佢係繼謝生、林生，我的第三最愛

呢排好多野都要作出選擇，例如我想添置多一件車仔波衫，白衫好似靚d，但黑衫好似型d，點揀好呢？
話唔定到時又係費事揀，兩件買晒哩…
仲猶豫緊旅行的目的地，東京shopping好定布吉陽光與海灘好呢？
不過仲未攞假，唔會去唔成掛…

點算呀，cech開波冇耐就傷左，臨完場前cudicini直情俾人撞到暈左，勇戰而傷，真教人心酸，佢完全我去知覺，希望佢冇事啦，希望佢吉人天相
哎，一個好消息，一個壞消息…
下場champion league主場對巴塞，大家眾志成城為cudicini，大家加油﹗

之前在mtr影過張相，幾cute

喊包

14 October 2006

謝謝你和妳撐我
不過見到你地的時候，我已將唔開心的事，一輪咀講過好多次俾好多人聽了，呻完大致上冇事了
anyway，感謝妳和你陪我飲左杯楊枝甘露

頭先喊，好樣衰囉，你地話我喊到眼腫晒紅晒，如果令到你地擔心，sorry
其實我係喊包囉，嘻嘻
平時忍忍忍，咩都忍，咩都拱，但去到某一個位，內心種種冤屈，因為一件小事，因為一個機遇，一下子釋放晒出來，喊到收唔到聲，眼淚不停掉下來
總之，唔係為左單一事件囉

算啦，可能真係我老土啦，唔識變通，唔肯接受新事物
但我仍然相信，有d原則，應該堅持
你可以唔buy我呢套，但唔好用呢樣野攻擊我，請尊重每個人自主的選擇
不過，既然你提出意見，都唔會係惡意的，我會聽，我會採納，係咪選擇性地採納或局部採納，我唔敢包，但我係會嘗試接受多d新事物，我指工作上，或者講得明白d，接受唔同類型的採訪方式和思維方式，也許會如他所言，「更上一層樓」
係咪如我所願呢？不曉得
我始終相信，宗旨，有渣得緊的原因，有用得著的地方

你講嗰件事俾我知，我可以俾咩反應你呢？糊里糊塗做左當事人也不自知…
咁件事係好笑既，所以除左笑，我都唔知講咩好，最多配以兩句「低能」囉
但聽你的語氣，你好似唔信我，唔通你信佢？
定係你都想問我同樣的問題？

今日戴嗰對耳環，可能太重戴得太耐，又可能自己衰，冇除耳環換衫，頭先發覺耳仔痛，原來，損左，仲流血呀…

死撐

13 October 2006

有好多野想講，唔知從何說起
有d感覺、情感想同人share，但唔知同邊個講好
有些事情想搞清楚，但又怕搞到唔清唔楚，唔知從何入手
總之心裡面好多矛盾的感覺，我彷彿站在十字路口，四方八面的大車中車小車都擦身而過，好險但又有驚無險，想逃但又逃不了，呼叫但求助無門
那麼孤單無助的感覺，為甚麼纏住我？
自己的事自己拱，以前搞得掂，感覺自豪，但而家真想退縮
點解要考驗我？點解得我一個撐，死撐？
能夠明白我的你，你呀，在哪兒？
俗語云：天將降大任於斯人……
真係咁？咁樣安慰一下自己，會唔會好過d？sorry，冇喎

尋晚原來又只係訓左三個幾鐘，你話我犯賤又好，咩都好，總之有煩事，訓左又唔會解決到，不如俾d時間出來做下其他野，麻醉一下自己
眼訓，意志力特別薄弱，理智與感性的鬥爭特別激烈
你…
我…
欲言又止的，其實係我，好想好想同你講的說話，已經掛在唇邊，心裡預演了無數次
不如你來閱讀我的眼神，讓明眸說明一切

各就各位

13 October 2006

用左兩晚時間，終於搵到想搵的野
internet真係偉大，只要你諗到的，只要花d心思，花d時間，係會搵到想要的野，今次，用左兩晚，同我預期所需時間差唔多
搵到嗰一刻，真係有bingle的感覺，其實鐘意遊網的我，都幾enjoy search野個過程
今次搵左呢樣野，可以展開下一個目標﹗

睇完廢柴england，再睇埋意大利下半場，所以今日成日都好眼訓

呢排腦袋的幻想細胞又活躍起來，一合埋眼就係天馬行空的世界
時間、人物、地點，通通各就各位，在腦海裡演戲，演我主導，我想佢點發展就點發展的戲，所有情節都合我心意
如果現實都係咁就好lu
其實，我係咪有妄想症？

你注視著我，欲言又止，你想講咩呢？做咩要吞吞吐吐，爽爽快快唔好咩
我身邊太多閒雜人等出現，可唔可以幫我K.O.晒佢地？邊個咁偉大？

我懷疑中左網毒，並患上強迫夜睡症和厭食症
星期六下午bbq活動，well，我應該用咩姿態和身份出現呢？

寧願唔訓住，睇下自己個blog，做個簡單的review
呢一個月以來，發生左好多野，真係吃不消﹗
慶幸有個blog，將不快的情感一一宣洩，叫做有得呻吓咁啦
人唔開心，諗野就會負面，呢個係惡性循環
樂觀與豁達，拋到九丈遠，趁仲勉強見到佢的蹤影，慢慢行番出去，執番佢返屋企
俾d時間我
願我可以學會放低你，如果我真係做到收放自如，就百毒不侵，但，又係唔係如我所願呢？樣樣野都睇得咁化的時候，得與失都唔介意，哪裡來拼勁打天下？

節目

12 October 2006

節目1：玩狗
節目2：訓覺
節目3：msn
節目4：食杯麵
節目5：睇英格蘭作客克羅地亞euro2008外圍賽

哈哈，最近有一句口頭禪，係咩？唔話你知呀

睇到半場，呢隊死人頭england真係令人失望，都唔知佢地班友仔發咩瘟，上場已經係好不知所謂， 今日只係延續當日的頹勢
想點呀你？
話時話，你究竟想點呀？乜件事唔係解決左喇咩？乜件事唔係了斷左喇咩？乜件事唔係告一段落喇咩？

哎，落後1-0，點搞架？
有冇搞錯，落後2-0，點追呀？

Just remember Ill be by your side

11 October 2006

好灰，因為剪左個頭髮，但冇人發覺我just have a haircut，真係......
不次搵過第二個stylist先得

對住得不到的葡萄，你會同自己講：葡萄是酸的，不吃也罷；還是讓它活在幻想的世界中，告訴自己它也許是世界上最甜的葡萄，讓得不到的它，它最美好的一面烙在心底裡，管那是事實與否
我選擇後者
如果你懂心理學，可否解釋一下這樣的心態是甚麼
現實是殘酷的，幻想世界才有烏托邦

你跑到來我的面前，真係毫無心理準備
你的說話，比你的出現更唐突
哈哈，但我不會被你嚇怕
總之，你要講的你講左，你要我聽的我聽左；我要講的我講左，我要你聽你都聽左
既然你已經行到呢一步，我咪三口六面同你講清楚囉，你明又好，唔明又好，扮唔明又好，扮明都好
總之，我明你講咩架啦
送我最鐘意嗰首let there be love俾你啦
特別注目歌詞：Just remember Ill be by your side

計劃失敗

10 October 2006

今日又過住我最鐘意，一日食一餐的生活，yeah!!!!
訓左13個幾鐘啦，都唔係好夠，如果唔係買左飛睇戲，我真係可以訓耐d，我原本的目標係訓18個鐘，但之前嗰晚夜訓左，計劃失敗
頭先睇《無間道風雲》，純粹係為左支持香港創作打入荷里活，不過我覺得佢拍唔到精髓囉

今日獨個兒的車程中，反思近日的批評
我做錯了，我認
近日出現態度的問題，忽然變得傲慢和自以為是
在唔想接觸的人前面，築起一道牆，並在前方豎立「危險勿近」的警告牌
原來，我的世界最近只餘下我走出來的通道，沒有人可以闖進來
如果你曾受過我的面色，留低一句對唔住，覺得啱用就過來攞啦
現正逐漸拆牆鬆綁，同我做番朋友好唔好呀？

被問到一個問題：
「愛你的人」和「你愛的人」一定要揀，二選一，你揀邊個？

親近

8 October 2006

隨住最後一篇施政報告的稿寫完，我諗事情告一段落了，唔好再咁燥底啦﹗

中秋夜，燒烤夜，個個的節目都係bbq，我也不例外
第一次過時過節同公司d friend過，又玩得幾開心喎，好明顯就係natural high啦
好彩今日做左荷蘭人唔做車仔人，撞衫就唔好啦﹗
你又問埋我d奇怪問題，點答你呀…

公司的friend有別於公司同事，前者層次高d，關係親密d，感情要好d
我會將d人分門別類，例如中學d friend vs中學同學；大學d friend vs大學同學；舊公司d friend vs舊公司同事
你被我歸納為邊類？你自己諗下啦…

今日完全遊魂狀態，哈哈﹗
所有野都慢動作，思考緩慢，行動緩慢，寫稿緩慢，反應緩慢，轉數緩慢…

今日有很奇怪的感覺，覺得你很親近，從來沒有如此感受過
你看我的眼神，你的說話，那麼刻意，這麼不經意

一件事

5 October 2006

今日遇到一件開心的事，一件唔開心的事，添了一件煩事，解決了一件事
想見到的人，今日見唔到；唔想見的人，今日亦都見唔到
在車程中，活在幻想的短暫時光，是我今日最舒泰的一刻，想到一些傻笑，會心微笑一番
但多數處於沉痛清醒的現實裡，有苦自己知

其實，風波仍未平息，我已經封咀，忍，忍了又忍，放過我好嗎？
他和她跟我im，看我苦水亂潑…
你深夜打來，同你講過呢件事，差點喊左出來，相信你聽不出
正如事件之中，那一句說話只是導火線
講述這件事的過程，也是導火線，一切一切，源於近來的委屈與辛酸…
你有追看豐收部屋的話，大概也知道所謂何事，不快的心情，從timeline的哪一段擦出火花

消極不干預

3 October 2006

我想自閉，我想隱形，我想從這個世界上消失﹗
事事總是不如意，頭頭碰著黑，為甚麼要考驗我？為甚麼選中我？
我不會苛求你體諒我、遷就我，只要你對我視而不見，當我不存在，以消極不干預的放任態度待我，就足夠了
我黑面，我行我素，我任性，從來如此，不必驚訝
笑？我已遺失了這功能，你就當我掉了門牙，不能咧嘴大笑算了
快樂小天使在哪裡？早登天國，遠矣遠矣…
投胎轉世，現在是浮躁小魔怪

批評來自四面八方，還有犧牲睡眠時間急待處理的私人事務，所有所有，壓得我喘不過氣來
努力，得不到肯定；付出，得不到成果
身邊的力量越見單薄，你為甚麼離我而去？我是否已變得眾叛親離？
我從來就是晝夜聒耳，生怕咀巴失業的那類人
如果我的胡說八道曾令你尷尬，曾為你帶來麻煩，我留下一句對不起，請對號入座
其他事項，我都可以改，但口沒遮欄這方面，這純真的特質，看來結果還是意見接受，態度照舊
多年來我也如是，改不掉，唯有學精一點，例如形勢嚴峻時稍作迴避，我要學習默默承受，這對我而言，是極高難度的挑戰
如果我生於共產年代，相信早已犯上叛逆批鬥處死

在心中

1 October 2006

特別鳴謝五壯男﹗
辛苦了，看見你們雨水和汗水也不能別辨，真感到不好意思
謝謝
平日的嘻嘻哈哈，與今天的承擔，完全是兩回事
友情沒有方法衡量，一切一切，在心中就足夠了﹗

********
好邪，尋日同你相依為命，操勞一整天過後，身體抱恙，上次又係咁…
話說上次出去做wc feature，由5點幾，食、做、傾計、講笑、周圍行，到放工一齊去唱k，對足half day
今次，雖然中間同你分開左兩三個鐘左右，由返工到放工，都係食、做、傾計、周圍行，唯一冇講笑，因為笑唔出
總之，同你一齊都冇好下場，上次大病一場，以為自己命不久矣，今次亦有同樣跡象…
你呀，黑住我，番去裝番個八卦擋刹﹗