有興趣搵我報名啦

21 November 2006

原本覺得有d無奈，有d不知所措，但遇到好人，算啦
積極籌備打牌活動中，有興趣搵我報名啦，額滿即止
但其實我打得唔叻，你地唔好蝦我呀﹗

去訓 lu，一陣起身睇歐聯，睇下arsenal點食漢堡包，又睇下些路迪點樣生擒紅魔
see u later!

********
i am back!!!
凌晨4點02分，睇緊celtic vs manu，但唔係咁好睇…
過左12點，11月22號，踏入人馬星座，諗起人馬座的你，會唔會集埋同樣都係人馬座的一眾友好，開番個生日會呢？

諗番起以前中學時代，一行十幾人，人強馬壯，係班中的最大勢力
差唔多每個月都有人生日，每人夾廿蚊買禮物，生日會搞得密麻麻，大家成日都大叫冇錢，諗番真係好開心
人大了，各有一定的經濟能力，買禮物、食飯、搞gathering，都唔需要特別理由，隨心就可以
亦因為咁，冇一個特定目的，好難集齊一班人
例如大家會覺得，紅日碌出來，咁多人，下次再約啦
到約閒日時，又唔係個個得閒
上個星期的活動，難得齊人，對上一次同類事件，大概係最少一年前

場波真係唔係好得，係咪應該去訓覺呢…

為甚麼弄至如斯田地？

20 November 2006

頭先被某人問到一個問題，心頭顫一顫，像電擊般，因為擊中要害﹗
我沒有回答，將目光瞎扯到其他地方，胡混過去
這跟我平日事無不可對人言的宗旨，的確背道而馳…

今朝煲完《一公升眼淚》，晚上忽然覺得患得患失

自從那件事之後，總覺得跟你之間築起了隔膜，你有否察覺呢？
默契，已蕩然無存
就連心底話也不想跟你說
了解與明瞭，逐漸消減
你變得越來越陌生
你與我的連繫，有如金絲般纖細，有如雞蛋殼般脆弱…
你有沒有同感？為甚麼弄至如斯田地？

心跳

19 November 2006

頭先原本想打俾你，的確緊張起來，再次感受那種久違的心跳，好耐都冇試過咁樣
誰可以像你一叫我就心跳？

本來想同你講的說話，始終都係冇開口講，還是將它塞進內心深處
我十分清楚明白，就算將說話在心裡講十萬遍，也不會傳到你的耳邊
關於你的回億與往事，突然在腦海略過，殺我一個措手不及
彷彿我的心，如不見了 ，然而懷念當日你我這段傻事…
結果，今日我還是沒有在你的世界裡出現

********
連續兩晚離開熒光幕時，桌面有一堆沾滿淚水和鼻涕的紙巾
有一句翻譯過來的對白是這樣的：生病不是不幸，只是不方便
是不是「不方便」的人，會特別堅強？
我們這類正常人就是有著正比例的儒弱？非以別人不幸的事，告訴自己有多幸福，教自己珍惜眼前不可？
為甚麼一個這樣的女孩子，可以這樣堅強？這樣樂觀？
自我安慰的說話寫得這麼漂亮，就像詩篇一樣？她真是這樣想，還是編作一些「心底話」，希望別人不要擔心？還是以此鼓勵別人，實現她希望幫助別人的唯一願望？

********
而家係早上6點48分，由於枱燈刺眼的光芒，不察覺天色已漸漸由黑變白
「全劇終」的字樣在眼前浮現，心裡舒一口氣，可以脫離以淚洗臉的日子，回歸現實，逃離沉重的思考
引述某人的說話：睇晒套劇，真係需要一公升眼淚
初初覺得誇張，原來係真的
明明個bloc三點幾已上版，但都係忍唔住，要即刻寫低讀後感

對唔住，我有這樣敷淺的想法，侮辱你高貴樂觀的心靈
雖然好heavy，但你的一字一句，如清泉般，洗滌我的思緒
《3月9日》以後將是禁歌，一聽到就喊，點算？

忽然覺得自己連同你講嗰番說話的膽量都沒有，很水皮

何嘗不可？

18 November 2006

msn的暱稱，改為煲劇小天使，完全投入了《一公升眼淚》，今日係第二日
凌晨寧靜的顯示屏前，眼淚自然地掉下來，嗚咽也平常不過，因為傷心、心酸、感動而喊，何嘗不可？
不過喊到眼都腫晒，好彩聽日唔使返工；喉嚨被情感塞住，有嗆喉的感覺，但過一陣會暢順過來的

如果一切冥冥中自有主宰，那麼某處那個不知名但又至高無上的權威，安排左咩差事、乜野考驗俾我呢？
我會攞到A定係勉強pass，定係渣兜呢？


********
最近因為一個廣告，重讀一首歌的歌詞，被引用的一句係咁樣的，係wyman作品：

「傳聞在說　你正跟我秘密拍拖」

諗來諗去都諗唔起歌名，某次問起某人，原來叫《誹聞男友》
唔夠經典始終都係差d，如果係《k歌之王》，我諗無論旋律由邊段奏起，我都可以照唱﹗

離開在即

16 November 2006

日本千島群島發生8.1級地震，你聽日出發去日本，我諗唔會影響到你掛…
講開旅行，我發覺之前做左兩份工，一份part time一份full time，都係臨離職前去旅行
在tvb時仲未知留唔留得低做full time，而當年裁員，一早已打定輸數
在1仔時，有一排做得好唔開心，唔係淨係我一個同嗰幾個人相處唔到，我諗唔係我的問題，但係個人勁down囉，即興去旅行，返來無耐，同老細傾掂左即閃，我諗係互相都頂對方唔順
下個月我去旅行呀，如果按照呢個pattern，係咪預示我又離開在即呢？

雖然識左你唔係好耐，但總覺得你有似曾相識的感覺，我真係覺得你好好，甚至好過好多同我識左十幾年的朋友，你聽到會唔會覺得臉上貼金呢？

如果時光倒流，有得俾我重新選擇的話，我會唔會擇番今日的道路呢？
我諗如果我當日唔係鬥氣，最大可能係入左hku讀law，之後留學海外，又或者返左大陸讀中國法，因為呢個亦係我當年興趣之一
如果唔係呈強貪慕虛榮，又可能在中大讀geography，做一個頹人，氣象、森林、土壤、城市變遷、人與自然的關係，至今仍是我喋喋不休、窮追不捨的智慧
但無論當日從呢兩個決定二選一，生活亦肯定同而家截然不同
揀左，回望過去，一切一切都只可以是let it be…
後悔？咁又講唔上，總係覺得如果我唔行今日呢條路，成就會更大
我從來就係一個自信自戀的人，我相信我的能力，我可以handle到而家的處境，但問題始終不是興之所至，唔會咁出力；如果係興趣，我諗加埋能力，我的成就更大

chicken-lator

14 November2006

下一站：東京
二人成行，12月4日出發Flight No. NH910, Departure1525, Arrival 2015
Return trip: 8/12/2006 Fight No. NH909, Departure 0950, Arrival 1355
Accommodation: Shinjuku Prince

好似考會考，兩大本分別超過三百和二百頁的雞精書，仲有雜誌和網頁，無時無刻都係咁咪，但好enjoy喎﹗

尋日打牌，埋單計數，要拎個chicken-lator，即係俗語的計數雞，輸左19個6，有主場之利都冇用…

我係新同事

10 November 2006

人的選擇，通常都帶因果關係
今朝選擇懶床，結果冇時間吹頭，所以以一個蓬鬆的look示人，出奇地成為焦點，唔使咁大反應呀？
有人兜口兜面都唔認得我，係呀，我係新同事tanny，暫時坐住阿霞個位，各位唔好蝦我喎
不論老嫩，都將目光放在我身上，真係萬二分榮幸，係咪真係要轉個look呀？

你係第一個見到呢個look，亦都係最冷靜的一個，見過世面係唔同d…

夜晚出席骨煲farewell活動，你又笑料百出，想點呀？笑到牙關緊晒，勁過0趙20粒香口膠﹗

今個星期做左扒王
星期日：做左兩個扒，一個碌左上山做講山火，一個在公路的石壆上做講交通意外，即日出街
星期一：做左兩個扒，兩個都講建築展，feature野稍後出街，日期待訂
星期二：去左孫中山紀念館個銅像揭幕，做左個扒，係當日的故仔
星期三：全日留在公司，冇出去，唔使做扒
星期四：去左昂坪個一d都唔grand的grand opening，在班rehersal緊的人前面做左個扒，即日出
星期五：預告聽日睇霍老入土為安，睇怕都會做扒…
平場每日都有扒呀，今次仲唔係扒王之王﹗

你笑得好甜

8 November 2006

呢幾日心情起落無常，波幅激過恆指
見到佢，真係好一個人版說明乜野叫「自以為是」、「白鴿眼」、「目中無人」、「渣住雞毛當令箭」
記住以此為戒﹗

你頭先同我講：你笑得好甜
多謝晒喎，既然你buy，我會笑多d，繼續傻笑

我諗你唔會為左星期日的事唔開心，既然你有個咁響的朵，你有冇料，心照啦
正如我頭先所講，點解巴塞同車仔會編埋同一組喎，有d野，背後的動機與目的，唔係我地呢d平常人、普通人可以理解、解釋和改變

惡運止步

7 November 2006

今日黑氣持續，邪…
怪都係怪一個星期之始，已經出師不利，諸事不吉，希望惡運到此為止
對住某人，或者要聽某人的吩咐，我真係按奈不住，係，我發脾氣
我真係要好好學習苦中作樂

呢排的話題，總離不開霍元甲、大酒店、花牌、解穢酒、紙紮公仔
頭先聽到一段話：
A君：早知去大酒店，帶埋PSP啦…
B君：去大酒店梗係要玩食鬼啦﹗
最意想不到，最有趣的係由平日一本正經，不假言笑的佢講出來的囉

好彩有你兩個，陪我喪笑一輪，將我從心情谷底救番上來，喚醒被催眠的快樂小天使
你拎住個裝牙膠的盒，我問你：你副假牙呢？
正如上次話佢男人老狗帶頭箍，我問：係咪粉紅色架？有冇哈佬kitty架？一樣無厘頭，同樣教人哭笑不得
原來你連上山落山的經典遊戲都唔識，真係稀有動物，有機會再同你玩過
不過老實講，呢個遊戲的樂趣唔係估中嗰下，而係成班知道箇中奧妙的人，一齊玩唔知咩一回事的矇仔﹗

頭先做左樣白痴野，返到屋企放低d野後，諗住落街買野，執個袋仔時先發現唔見左鎖匙，兩條友差唔多翻轉間屋，正因為係我自己開門入屋，條鎖匙一定拎左入屋，但搵左好耐都搵唔到，正係覺得非常之奇怪的閉門失竊事件，唔知點解再搵過由個袋拎出的的file，原來抽key攝左在個file度，真係嚇死﹗

唔記得左要飲奶

6 November 2006

做戲就要做全套，仲要做得投入，完完全墮入角色
認認真真，呢個係做人應有的宗旨

今日同幾個人的對話想記低：
A君：你個look咁似去旅行既？
我：我行山來啫
話說當時我拎住a記個袋，上面掛住頂紅色puma太陽帽，紮住辮，但其實我係好趕同好熱囉…

我：好肚餓呀，連飯都冇食
B君睇睇錶，嗰時差唔多五點：你去食d野啦，我跟得啦
我：唔使啦，我都冇諗住食
B君：咁你唔餓架？
我：一陣咁盒朱古力奶啦，今晚拆餐勁﹗
過左陣，趕完cast，我又遊入offline
B君：你飲左奶未？
我：丫係呀，我唔記得左要飲奶
C君：咁你一路飲奶一路睇啦

旅行d野，仲準備緊
其實話就話準備，但其實都只係揀下搭咩機，住咩酒店啫

連消帶打

5 November 2006

我鐘意一句足球術語：連消帶打

狀態稍為改善，出街獵奇，總共K.O.外套x4、長褲x1、眼藥水x5…
我又失去控制，不停咁買野

我和顏悅色，你回敬我黑口黑面各一，點解要睇你面色？你算係老幾？
既然你對我咁好，送對輓聯俾你丫﹗花少少錢，送埋個花牌俾你，又點話呢，真係唔使同我客氣喎﹗
我sense到有d問題，所以都係小心為上

12號約定你，咪甩拖呀

秘密使者

2 November 2006

你用鉛筆輕輕地在廢紙上寫了十個字，塞進我的腦海，這個消息，令我心情複雜起來
你自然有你的想法，慶幸成為secret keeper﹗

兩度落後，兩度追和，以為沒有可能追成平手，以為正步向失敗，正因為他們堅信一絲希望，力戰而和，那份喜悅與激情，與奪標沒有兩樣，同樣振奮人心﹗
51 GOAL Lampard from the tightest angle imaginable somehow hooks the ball over Valdes. It comes after he originally mis-controls Makelele’s offside-beating ball.
90+2 GOAL Drogba slams in from close range after he chests Terry’s knock down. Essien does brilliantly to surge forward and cross to the far post.
mintue detail係咁樣形容呢兩個入球，全場波都充滿傳奇，唔知點解會入到的窄角度射門，唔知從何而來的鬥志與蠻勁

今日完全不在狀態，遊魂，遺失了工作能力和做人的理智，唔知自己做緊咩，語無倫次