灰姑娘

27 December 2006

呢幾日太繁忙地玩，都係時間報告一下反過d乜

晚晚都係夜晚活動，首先要由22號冬至當晚講起
22號，夜晚在公司寫稿，本來諗住來個做冬宵夜，可惜流左…
23號，放假，出左去旺角行左一陣啫，但買左好多野呀，夜晚食cpk，當然唔少得食番件tiramisu，雖然冇armaroni嗰件咁好食，但好過冇；之後急急腳返屋企睇波，睇埋英超車仔尾場，3點，好彩啫，msn中你叫我去食宵夜，下次先啦…
24號平安夜，訓醒返左公司剪片，咁都搞左半day，蝕晒﹗跟住落左tw打邊爐，再去睇《傷城》，一套唔睇都唔係可惜的戲，故事單薄，哎…之後成班人上左我屋企開p啦，佢地掛住打機，我就掛住同你msn，之後玩非洲話事啤，玩到朝早7點幾，再落樓下飲早茶，再返工
25號，夢遊公司…其實係有工作能力，但沒有工作的心情，隨時隨地坐喺度都訓得著，放工同夜更親愛的食飯，諗住xmas食好d，但間酒樓都係馬馬地，之後上左我屋企飲紅酒、打牌，打左4圈，輸左百幾蚊，真係呢，完全冇主場之利…跟住去左bar pacific飲野啦，玩骰仔、true or dare，直到三點掛，我都唔知實際時間，wing wing地啦，一dat落床就訓著，張床好似會轉咁架
26號，放工後約左你食飯，之後又係睇波活動

平日我有把鎖？還是我習慣獨個生活太耐，想你來釋放？
一直等一種感覺，今天終於有點狂
不想正常，心花正怒放﹗

感覺你很近很近，感覺特別
感覺你很親近很親近，感覺溫暖
你有沒有同感呢？

視世上人不理，想早晚能見你，曾經反叛，也是我運氣，天與地…
渡過約束，拋開生死
不顧忌，才了解喜與悲，能以後銘記

今日做灰姑娘，12點前訓覺

切磋

23 December 2006

呢兩日真係好辛苦，兩日都冇時間食lunch，咁樣唔sustainable架﹗
尋日晨咁早上左深圳，事前有d波折，知之為知之啦，我地冇帶野feed，人地noon都出晒，雖然我地都有，但都係資料片咋，3點返到公司，咪拿拿臨執手尾啦，搞掂又要聽垃圾會，直到pack埋隻頭條故，返去做節先食全日的第一餐，真crazy
今日都好激架，十點零寫左隻故，約訪問，12點半喺西環，出去的途中再約左一個，兩點，加埋原本約左4點的專訪，接住來，做完第二個訪問，叫人幫我買左個吉野家lunch box，但都唔得閒食，因為即起左兩隻故，結果做完最後個訪問拎埋返公司，剪晒片先食冷飯，但都好好味
放工留堂寫罐頭，今次呢隻故仔一定要寫得好，因為好重要，對我有特別意義，不過係咩，呢一刻唔講得
我真係好比心機寫架，寫完呢個version我都幾滿意，唔知sub完點呢…
你以為我返c呀，唔係呀，不過我都完完全全成為左一個c更人，不過同時都係b更人咁囉
返到屋企照鏡，個妝浮起晒，d皮膚都抗議
只有兩個字形容自己囉：殘樣

同你閒談，牙鉸上切磋切磋，真是有趣
各自各堅持己見，但各有各的道理，不退讓，但互相尊重，呢種態度，i like it﹗
有理據的，我忽略了的，多謝你提點我，令件事更圓滿，呢份追求更好的衝勁，i like it﹗

志同道合的人，如果那件事成真，一定親口話你聽，保證你不會從別人口舌中證實任何事
但如果許諾守密的人，請合作一點點
到時一切，親疏之別，高下立見
需要自我反省的，到時心照啦

都係因為你啦，夜晚宵夜活動流灘，要擇日重賽
你呀，號召力咁弱雞架…

豁出去

22 December 2006

今日狀態略為好轉，又上來匯報吓呢幾日的情況

做左萌鼻菩薩，仲有聲沙大魔王上身
早幾日話冬眠，結果一語成懺，講得俗d咪叫烏鴉口囉…
病得太厲害，星期1，除左食飯嗰一陣，可能訓左都有廿個鐘：星期2，sick leave左，又係訓完又訓
迷迷糊糊，只記得被窩的溫暖
我唔會怪自己任性，明明喉嚨痛都打邊邊
反而覺得自己唔夠任性，應該狂食雪糕狂飲汽水狂食薯片，一下子豁出去

失賠你的bbq活動，都怪自己忽然錫身，怕吹風、食埋d熱氣野、夜訓，稍見起色的病情突然急轉直下
下次啦，總有機會既

傳說個鼻生瘡瘡，即係有人暗戀，今日個鼻生左一粒，係咪有一個人暗戀我？

你覺得自己好風趣咩？慳d啦﹗

投入春秋晚期吳越爭霸的國度，將mindset tune去公元前唔知幾多年，將書面語講出口

你和我的故事

18 December 2006

你和我的故事，是逗號，繼續發展下去
你和我的故事，是句號，已經去到終結時
你和我的故事，是問號，很曖昧，很多疑團未能解開
你和我的故事，是感歎號，盪氣迴腸
你和我的故事，是省略號，充滿未知之數
你和我的故事，是破折號，兜了幾個圈，生出很多枝節

天氣凍左好多，請你食凍柑丫﹗
記得以前讀書，呢個遊戲總係走唔甩，好無聊，好低b，但好好玩

頭先返左屋打邊邊，其實喉嚨痛，唔係好應該打邊邊，但係算啦，又要戒口又唔可以飲凍野、食雪糕，實係好辛苦架，豁出去啦，一舖病晒佢﹗
因為咁，所以遲左返屋企，睇唔到車仔上半場
作死呀，做咩鬼輸個12碼呀，上半場落後1-0
不過好彩，有我的支持，的確唔同d，波波克下半場開波好快入番球
但玩野啦，又俾耶寶寶射入一球，再落後2-1
我即刻大叫左出來
係咁攻攻到81分鐘，我愛人林伯伯射球靚波，2-2
又係神奇的杜巴巴，87分來係神奇笠射，2-3

跟住到曼聯出場，但其實場波都幾悶
估佢唔到榜尾的westham會贏喎，照實力同近況睇，開場前我都係支持佢地打和啫
thx Curbishley and Reo-Coker

冬眠

17 December 2006

好一陣子都唔使返星期六日，今日返工，可以著得casual少少，反而有d唔慣
今日著左條男裝牛仔褲，不過講真，而家的服飾趨向uni-sex，又點會有人咁留意呢？
sat我又唔係覺得好大分別，我都係上晝一單下晝一單，結果一隻係teaser一隻係bumper
係咪因為我放完假，覺得我狀態好d，可以應付d相對較重要的野呢？
哎，但我覺得，身體反而未能投入工作，我諗你大致明我講咩
唔知係咪今日著得單薄左d呢，話說我著左一件樽領好薄的衫加一件薄冷外套，我覺得真係ok喎，帶左頸巾出去都冇戴過
其實我真係好鐘意冬天架，可能我冬天出世啦
我怕熱多過怕凍
不過街上個個都大褸，搞到我好似好窮冇錢買布做衫咁…
我喉嚨痛，唔通真係冷親？定係講得太多野傷喉嚨？

頭先在hku黃麗松講堂，往窗外從高而下望落去，有一對纏綿和互相糾纏的男女，我諗佢地唔係好care有冇人見到佢地
遇到呢d場面，梗係玩至拿手的配音啦
女：咦，你做咩唔攬住我啫
男：點會啫，傻豬
女：嘢，攬實d啦衰鬼
男：你睇下你肥嘟嘟咁，攬唔晒喎
女：咦，你做咩咁話我啫，凍著得多衫之嘛
男：我攬住你唔凍架喇，我地做連體嬰
女，唔，邊個得閒同你做連體嬰喎
男：你唔想咩？
女：你話呢？
男：來啜啜啦
女：唔，你個咀咀好凍呀
男：你個咀咀都好凍喎
不過呢個時候，後面傳出笑聲，隔離台個camman話：我平時冇野做喺車度standby時都係咁玩

你想點呀？故作風騷，究竟你係發神經，定係想吸引人注意？
一舉手一投足，除了畸呢，還有畸呢
教人哭笑不得的你，其實同我都有幾分相類
近日你我都常常掛著笑容，笑意盈盈，蓮子蓉咁面口，總惹人懷疑
我呢，轉左個look過新生活，成個人fresh晒，咪開朗左囉
咁點解你心情都咁靚呢？
記得上次我變得浮躁，你也變得不耐煩
anyway，好鐘意見到你的笑臉

你眉頭開了，所以我笑了
你眼睛紅了，我的天灰了
求之不得，求不得，天造地設一樣的難得
喜怒和哀樂，有我來重蹈你覆轍

不過頭先聽到一句詭異的說話，唔知關唔關我樹呢…

而帶Tiffany的人又在我面前擾攘，咩意思喎，想點喎？

呢個星期又做扒王
頭先又遇到d無聊市民
我又要repeat9月26號個blog其中一句：
做個扒啫，企喺度睇下，我咪當你好奇見識下囉，唔使影我相嘛…
唔好以為在鏡頭前出沒，在電視機見到的人就異於常人啦，成熟d啦，唔好咁無知啦，香港人﹗

我諗到聽日的節目做咩喇，就係冬眠

********
其實今日有一件事，印證左我係同吹bb嗰班人的個思維大致係一樣的
想唔認自己喺嗰度來都唔得啦
基本上，原本at very first揀嗰個bite，就真係揀左冇後悔個bite
但後來諗下諗下，佢又講番核心小組，好似唔係太特別，倒帶時聽翻而家出左個bite，又覺得幾好喎，所以出左而家個version
不過，頭先佢話應該開冇後悔個point行先
其實，我係咪應該繼續相信直覺和第一印象呢？
諗番讀書嗰陣，某人話做電視新聞，做完個記者會(採訪)，收埋筆記，第一印象記得d咩，就係開呢個point，通常都冇衰；而其他的資料，唔係唔重要，不過佢有時分散左你注意力，你越咪d筆記，越覺得個個point都重要，令自己混淆，唔識取捨
睇來，今日正正遇到呢個情況，係咪應該諗野諗得簡單d呢？
早幾日嗰個人的說話，係咪打擊左我信心呢？
某甲傳授佢mark notes技巧，嗰個方法，我都有聽過，我覺得唔啱我用，就係因為我用緊讀書時某人教嗰套；記得邊個bite就用邊個bite
某個要求勁高，剷人剷到飛起的採主讚過我sense好，就係呢個point，令我走左咁耐，至今都感到自豪，所以我一直憑直覺揀bite，不過咁樣係咪好高險呢？又係咪好似好唔科學呢…
但係今日就係因為放棄左呢個方法，而令件事俾佢覺得唔係咁圓滿囉…

********
傳媒，尤其在香港呢個咁細的社會，影響力十分之驚人
我諗起03年暑假的一件事，全城瘋狂，可能係因我而起
sars過後，為左令市民開心d，請左皇馬來hk，相信大家都記得
皇馬來hk的消息，講左好多日，吹話幾時開始賣飛，蘋果都做過，但起初都冇咩大迴響
嗰時我係intern同學仔，被委派去大球場做一單assignment，講姚明等籃球人來hk，經過大球場，見到有幾丁人排隊，我打番去同採主講，未講皇馬幾時賣飛，就已經有人排隊，會唔會做呀？
當時嗰個採主(唔係讚我嗰個)話都未公布賣飛，會唔會排其他野呀？你有機會去問下先啦，你而家專心做你單assignment
記得當日在記者會上，康文署署長係王倩儀，我問佢仲未公布賣飛詳情，有冇了解過大球場外排隊的人係咪排皇馬，如果係咁早已經有人排，會唔會有特別安排？例如提早賣飛
佢好串咁話今日講籃球，其他野唔答，個io就即刻搶住話記者會完
事後唔知點樣啦，唔知邊個話事，叫左某個full time去扑咪，d人真係排皇馬架，就展開左連日全城為皇馬瘋狂的報導
三色台一日咁多人睇，其實影響力真係好大，佢話有人排隊，d人咪覺得嗰樣野好heat囉，到今時今日都仲有呢個現象，你我都了解的
結果之後全行都跟住做，當個社會日講夜講，仲勁過賣廣告
某一日我被安排去大球場外做一隻故仔，做之前已經話左俾我聽係4條，brief晒，又叫我俾心機，記住做埋個靚扒，又教我例如個扒可以講d咩，仲叫左某full time協助我，唔明就問佢，我覺得係我的rewards
不過始終都過唔到某人嗰關，某人勁唔鐘意我，我諗係我唔識應酬佢啦
佢鬧某採主：4條來架，俾個同學仔去做？仲要俾個full time協助佢，個full time唔使做啦，咁請佢來做咩呀
結果我咪從旁觀察隻故仔點做囉…
又過左幾日，我被安排做左一個扑咪，跟住叫我拿拿臨返公司pack故仔，我都未知pack咩，但返到去某full time已經寫好一隻故，叫我去做聲，關於網上炒飛的，我覺得係補償囉
後來皇馬離港，我明明返normal，有通宵人返早人，佢都叫我5點去君悅等班球星，可能知我鐘意波啦，俾個機會我見下佢地，又做番隻故仔

總之到而家，我都覺得全城為皇馬狂熱，係緣於三色台帶頭報導，而佢地點解去做，係因為我對足球的熱愛和一點洞察力
孰真孰假也不打緊，最少我咁諗，令我有一點優越感

案情重組

16 December 2006

好耐都冇飲過lemon coke light，呢層係一件好事
如果你記得我講過，我唔開心就會飲可樂

放工返左屋企，唔知點解突然想食老麥，碌左落地鐵站嗰頭，嗰度有間麥記，食左個板燒雞扒飽餐
啊，原來而家有shake shake薯條，但係和風紫菜味道馬馬…
同埋而家鐘意粗野多d，可能見得多，幼的、細細條的返而唔慣，冇口感、冇手感，怪怪地咁
忽然間諗番起某日在shinjuku間mos burger…
心情心境一直都停留在一個星期之前，仲停留在東經139.42，北緯35.41
天氣比而家的hk仲凍少少，但好舒服，冷風由門罅吹入來，但拎住d粗粗地，熱到燙口燙手的薯條，真係別有風味，好冧，hk唔會try到
hk mos burger第2分店@朗豪坊係咪真係23號開架？如果係咪忙死你囉，咁你嗰日會唔會流灘架？
but anyway，麻雀枱為你預留位置，but你有精神打先算啦﹗
見到你個nick話病到死狗咁，take care啦﹗

xmas倒數十日，咩普天同慶的日子，其實係各路人馬gathering，結黨集會的時機
要見的某甲某乙一堆堆，行程緊密

從前成員齊集嗎？個個老了胖了嗎？
聽說某某去向未明，下落待查。
仍然流行懷舊嗎？
看你記性有幾差，唱到這裡，漏了幾個他他他、她她她…
從前豪情還在嗎？
世故了也未算差，偶爾有個壯志未酬，不必驚詫。
前行還能前衛嗎？念舊又是落伍嗎？
過去過了，但至少也將火把交給他﹗

晏晝進行mission secret後，一個偶然的機會返左公司，所以咪拎埋d手信零食返去囉，就係上次張相中的其中一部分
拎埋本紅鑽紀念冊俾某人睇，唔記得拎返屋企喎…
唔記得帶埋個blue box返去，噢
我發覺我個位的物件不斷向外漫延，其實都幾大鑊﹗
哈哈，呢排食得太多junk food，會唔會變成junk 人？

有一個謎團以為解開左，but頭先一問之下，謎上加謎，點算？
有關人等又在網絡上失蹤左，對唔到質
一謎未解，一謎又起…
點解你會知道既呢？

話時話，你呀，係呀，話緊你，又要睇我個blog，又唔留言，壞人
哎呀，我遇到好多壞人﹗
話時話，你睇左我個blog咁耐，有幾多係睇得明，有幾多係睇唔明呢？
我跳躍式的寫野方式，唔係純綷你睇每一行每一個字，就get到個意思
有冇發覺有時睇落d野，講緊d野，你好似明明地，好似講緊一d你知的事，但某d段落又與你所知的事實不乎，似是而非？
而有陣時對號入座，但問番我，其實我唔係講緊你
大概就係呢個原因
我咁樣寫野，唔係代表我冇組織力，而係唔想每次畫公仔，都畫條腸先
將事情唔同段落、情節打散，俾你一個空間，諗番件事出來，諗下我想講咩
其實最重要的，係讓我在文字這個好像很真實，但其實好虛無的世界裡，自由翱翔，進行一次我心目中的案情重組

哈哈，我冇事lu，頭先聽番《3月9日》，但我冇喊lu

突發搵你去飲野，講得好潮叫吹下水，講得俗d叫打牙交，另一角度又可以話呻吓，總之就係俾咀巴講下野，做下運動咁囉
熱檸樂煲薑，因為d檸檬浸得太耐，苦苦地
講左好多我近期未發表過，未同人講過的說話，包括一個秘密，又多左一個人知lu，不過你係呢個圈子裡第一個人知，我諗好大機會亦將會係唯一一個人知
人迷失了，好像能掌握的東西很少
要擁有必先懂失去、怎接受…
很多時一些大智慧，就在生活的細微細眼中出現，又或者來自你我的一言驚醒，溜走了也不自知
苦的熱檸樂煲薑，係咪就係話做事要適可而止，該收手時，就好收手呢？
檸檬呀檸檬，呢泡可樂薑溫泉唔啱你，你明唔明？

我會學習唔想念你，但俾d時間我，好嗎？

好夢往往就是無疾而終

15 December 2006

呢個世界最奧妙的事情，是各取所需，達至多贏的局面
其實不容易達到，亟需多方面，例如天時、地利、人和的配合
若錯失天時，機會錯過了，甚麼地利人和也不能挽救

尋晚發左個夢，夢中去左一個好似冒險樂園的地方
有一部機，我叫佢堆錢機，我諗你應該明我講咩
而家引入左一個新玩法，唔推錢，推野食，推到幾多攞幾多
咁唔知點解喎，有其中一部冇人玩喎，但已經累積好多野食，一推就中好多，咁我咪入左100yen入去玩囉，係呀，100yen咋，夢中我在日本
推左好多野食呀，喺個窿度，攞來攞去都攞唔完，有一大堆零食，要幾個大的背心袋先裝得晒
說時遲，那時快，一個屈尾十就去左首爾，由於係豉油行，所以唔識路，去到一個商場問路啦，唔知點解勁好禮遇喎，一開聲知我係香港來，就即刻搵左個講廣東話的人來招呼我，仲要同介紹個商場，陪我周圍行，做埋翻譯，shop得好開心，正到爆﹗
可惜，好夢往往就係在最唔願意醒來時，被人打斷
好夢往往就是無疾而終…

完喇完喇，亞運終於完喇，每日數榜，鬥多金牌的日子可以告一段落
真係好煩架，好地地比賽咪算囉，知你中國成百五面金牌好威喇
好一班屎忽鬼
攞金牌時就祖國好威、中國人之光，李雲迪、郎朗來香港就話正呀正呀
內地一有咩出事，大陸冇好野帶挈時，就叫「大陸呢」死開啦，例如d大陸女人咁
香港人呀…

尋晚冇睇到車仔，好彩佢贏左1-0啫

收到你張相，雖然殘樣，anyway謝謝﹗

記住你的說話，記住你的招牌笑容，記住你殺死人的眼神，總之記住關於你的一切

仲有一件事，真係要高呼好彩﹗

沒有太大偏差

14 December 2006

一連兩天不同的報章，都以同一則故事作為cover story，真係奇怪
好明顯係其中一份報紙做左呢則報導，另一份見勢色唔對，第二日跟住即做
講的係一個叫琳琳的bb女的故事

http://www.speech.com.hk/kolamlam/day1.htm

簡單的言語與相片，沒有矯揉造作，多情的我又喉嚨嗚咽
如果佢地唔係教徒，可能感動人心更深，至少我有這種感覺

9日的生命是甚麼？
剛過了11日的假期又是甚麼？
我和她都有相同的名字——快樂小天使
你真幸運，不用面對現實中數之不盡的無奈與無助

今日知道一件事，或者這樣說，大致肯定了一件事野，我想現在的決定是正確的
原來一直的估計也沒有太大偏差
總討厭別人吞吞吐吐，卻言又止
總討厭花一番心思玩猜謎遊戲
我想暢所欲言，但現在時機還未成熟，說話埋在心裡，勉強吞進肚子裡，這種感覺，你明白嗎？

瞌上眼看見你的容貌，你的聽音彷彿在我耳邊迴響，總覺得你很親切，很想很想抱抱你
不過沒有這膽量，沒有這機會
自然流露地稱呼你一聲傻豬，雖已成為往事，但你我尷尬的笑容仍烙在我的心扉

對某人的反感和怨恨，不知從哪時起滋張
我心比明月，明月照溝渠…
我稚拙與單純地相信你，我錯了
是否要學懂胸懷城府？

唔知點解諗起嗰個基本上我呢世都唔會再見的人，一個偏聽、不肯接受意見的人
其實今日真係好想開名講一個人，但係，原則始終要堅持
深呼吸一口氣，算﹗

由不變成不是

11 December 2006

高球之體驗原來係咁累
但第一次打，都算係咁啦，正正常常打到個波出去，有姿勢又有實際
打完食滿記
當每一樣野出左名，變得common受歡迎時，就會失去本身的特色，真係冇乜邊個可以打破呢個定律

車仔vs阿仙仙12點開波，返到去踢左5分幾鐘，哎，點解主場都咁黑仔，又中柱又中楣，除左苦笑仲可以點呢？

頭先搭車時見到一副對聯，諗起中學讀文學時，「比目魚」的笑話
某人對出一句「兩手人」，每次諗起都會心微笑

從前情人好嗎？現在幸福嗎？還生氣嗎？誰人何時替我給你一個家？
從前情人還好嗎？尚獨身嗎？還想我嗎？無緣成為最愛卻到很牽掛…

頭先又被人問到一個奇怪的問題
每次遇到呢d情況，都係一一否認
我諗問的人也預期得到呢個結果，咁點解仲要問呢？即使你問多幾多次，最多也只會由不變成不是
我明白我答yes，可能令你開心一會，亦唔使錢、唔使死，但我有必要這樣做嗎？
唔係事實，我打死都唔認﹗

人活到幾歲算短？失戀只有更短。歸家需要幾里路誰能預算？
忘掉我跟你恩怨，櫻花開了幾轉，東京之旅一早比一世遙遠。

有時人與人太過相熟，太過了解，反而失了神秘與好奇
亦因為這樣，就會以為互相十分清楚對方，不會再花心思進一步發掘、再深入認識彼此的優點與缺點
人每分每秒地成長，思想不知何時何地突變也不自知
雖然呼吸同一大氣，活在同一時空，但這種漸漸發生，難以察覺的轉變，住往容易忽略
失去那種尋根揭秘的原動力，嫌隙就是這樣滋長

想起你

10 December 2006

晏晝訓到五點半先起身，天色已經昏暗，好似好耐冇見過太陽…
放假，心情輕鬆，但總覺得時間不夠用
吃點東西，稍稍收拾一下，又是八時許
今晚選擇看歡樂滿西環而放棄了曼徹斯特打吡，明晚倫敦打吡先係我的焦點所在

因為得閒，可以整理一下思緒
很多人的樣子在腦海浮現，很多人的名字在唇邊略過
想起你，不知道你有沒有同樣地想起我？
想起你，後悔沒有膽量跟你說出心底的說話
想起你，遺憾沒有向你求證那件事
想起你，可否一同為那段沒有下文的故事譜出一個結局？
想起你，回味那次沒有相約的相遇
想起你…

異地回歸

8 December 2006

偉大的電腦，我終於回歸了﹗
過左幾日冇腦的日子，其實感覺都幾奇怪
因為身在拿邦國，我又冇j-phone，所以咁多日來唔使收到d無聊電話，講少左好多電話，感覺良好，日日都係咁就好喇﹗
不過一返到來，一聽個voice box就大鑊啦…
呢幾日實在太累，日日一係7-2，一係10-3，真係辛苦過返工
今朝執野執到差唔多4點，但5點幾又要起身去雞場，冇訓過咁濟，搭車企喺度都訓得著﹗

其實初初都唔係買左咁多野，因為好多野香港其實都係有的，得個拎
不過後來去到不二果子店，真係呢，成個人都癲左，呢個又要嗰個又要，好想將間舖搬返來
執野先發覺，我瘋狂買野症已經病入膏肓…
半個喼去，兩個喼+一箱野返，都唔知點解次次去旅行都係咁…
好彩搭雞場快綫，有d慢動作同態度唔好的阿嬸幫手，的士直飛返屋企樓下
執野啦，d野食堆到一地都係

由於時間關係，原定想去FC Tokyo朝聖，但真係太遠同埋太不具時間效益，都係放棄左
結果咪在兩大運動用品連鎖店浦下浦下就算
狂擰球星扭蛋

另一個mission failed的係京都不死鳥波衫order同球星遊戲咭的order，前者因為超越目標價，後者係搵唔到
唔好意思﹗

不過當然亦有KO左的目標，例如最大路的porter、agnes b、fancl等
而另一個重要任務係掃戲院，因為住shinjuku，尾二嗰日先去，但原來最大的寶藏係新宿呀﹗

都係嫌d商場閂得早啦，JR好迫囉
但好在成日行街都冇人食煙，原來新宿、池袋、涉谷等街頭係唔准食煙，唔留意開都唔知
返到來香港好唔慣﹗

我發覺生日在異地度過，都有唔好的地方，正日當日只係得你零星的happy birthday點綴
知我去旅行的人，連留個言都冇
講開voice mail，出奇地真係一句生日快樂都冇喎
不過，返來就收到晒啦，多謝你地

here in japan

5 December 2006

hihi everybody, i am in japan now
it is just 7 degree in shinjuku and have noodle under the bridge, really cool!
come and join us la

9/12/06 update：
新宿火車站旁的車仔麵檔

殺我一個措手不及

3 December 2006

小天使轉左新look已經一個星期，大家的反應正面，呢個決定係正確的
人活在這個群體社會裡，除了要有自信，還要得到別人的認同
我不是說要跟著別人的說話做事，而係自己做的事有人撐，更進一步肯定自己
然而，別人唔認同，就要找出別人唔認同的原因，用個腦諗下，係自己有問題定批評自己的人有問題

心裡預演過無數次，但某人問我的問題，仍然殺我一個措手不及…
假設你問我嗰個問題，我可能還是無言以對
假設那件事是真的，我會第一時間向你證實

《勞斯‧萊斯》的mv，有一幕cc主動去咀edison，但edison冇反應，尋日我問你如果條仔係咁你會點
如果你問我做唔做得出？做得出，why not？
不過我絕對唔會俾我自己咀一條對我冇反應的仔囉

我諗起你
當日你得唔到我，我得唔到你，那段關係，令你和我都活在謎團裡
如今相見，大家都裝作若無其事，反而顯得此地無銀
大家心中、腦海中都有一段往事，不是按一下delete就能將記憶刪除

別人眼中的古老石山

29 November 2006

除了無奈，還有無奈
好想quit而家的生活，對所有野都感到好厭惡，身邊的人，每日見到的事物
不平則鳴？鳴完又如何？唔係妄自菲薄，而係自身力量渺少，呢個係事實，點樣同人匹敵？
一直抱打不平，碰了一鼻子灰，一句鼓勵的說話都冇，一點被欣賞的目光都冇，一個有共鳴的人都搵唔到，點樣唔叫人洩氣？

早前的預告真係極之正確，心態上已經ready，行動亦即將配合

我已經發出禁制令，唔可以俾我自己再去supermarket / 便利店 / 零食雜貨舖再買埋d唔係即食的野，如果唔係個枱面，丫唔係，係屋企會真真正正成為一間7仔

********
你冇再纏住我，我可以用番平常心對你，感覺良好
呢樣係我覺得，唯一值得安慰的事情

********
每個人心入面都有一團火，但睇下係燒d咩啦，有人對工作有團火，有人對朋友有團火，有人對知識有團火
作為新聞從業員，最理想的，係對「真正新聞」有團火
對於某些傳媒機構，係咁炒作某d野，真係好反感，搞到唯恐天下不亂咁
點解搞到d新聞一定只可以報憂？
有一次問某人，今年有冇發生過d咩開心的事？
我相信一定有囉，但真係唔記得，我即時反問：今年咪個個都唔開心囉？
講股升樓升，又俾人批評係大好友，如果係事實，有咩唔講得，新聞=精簡版的現實寫照
如果加入了適時評論、個人意見、主觀立場，呢個係時事評論，sorry，請將佢同新聞分開
簡單d來講，打個譬喻，就係記者同時事評論員的分別，如果有一段旁述，由個時事評論員講，大家會覺得係佢評論緊件事，講的係佢的立場與分析，與記者的報導別人的意見，迥然不同
係呢行的人變晒質，過去曾經目睹編採編劇化，看圖作文，生安白造，呢個咩世界？

我仍然為我仲好似一塊別人眼中的古老石山而自豪，我後生，有d野仲值得我堅持，有d野我仲未忘記，有d野我仲未捨得放棄