戀事多磨

26 February 2007

新年的利是，都應該逗得七七八八，不過仲未真正點算數目
今年冇去拜年，只係在公司湊熱鬧，講兩句恭喜發財咁囉，正式來講都唔叫拜年
對於一d我唔like的人，我唔想恭喜佢，唔會同佢拜年，唔會同佢講恭喜說話，因為就算講，都唔係我真心的，不講也罷，佢嗰封利是，不逗也罷，不過如果佢飄到埋來，咁都冇法架，咪嘴裡一邊恭賀佢，心裡一邊話全部調轉
你可以話我小器，話我無聊，但我就是我，我認為他/她不配得到我的祝福
到今日為止，收鑊如下圖

********
好恐怖呀，睇到我個心離一離，兜口兜面踢埋塊面度，JT即刻暈左，點算？
http://www.mojoflix.com/Video/Carling-Cup-Final-John-Terry.html
Chelsea個official website的minute detail係咁寫：
57 Injury Terry, with trademark bravely, throws his head at a loose ball inside the Arsenal six-yard box. He takes Diaby's kick full on the head and appears knocked cold. Six minutes of treatment follow before he is carried away immobilised.
點解車仔今季咁黑仔？
足球員為球賽勝利的犧牲與奮不顧身，真教人肅然起敬﹗
你是藍軍的隊長，你也是英軍的隊長，臂章上的小精靈會庇佑你，左襟上的雄獅會守護你

********
今朝又發夢，夢見出左三月更表，編左我一號二號都要返工，搞到我勁尷尬，一早揚開去話廿八號last day，而家好似唔捨得走咁…
醒來為呢件事有d唔開心
另外，聽日開始要逐d逐d野執走，我張枱實在太亂﹗

繼續review呢段日子的趣事
唔知點解會同某人扯上關係，已經有一段時間，到而家也搞不清楚
大家如果有留心聽書的話，我講過，我有另一個日記，會開名講人，不過從不公開，喺嗰個日記有間中講過呢d緋聞
最早一次記錄，係8月，他問：你同某人咩事啫？你係咪同某人拍拖？我答唔係，他再追問：而家唔係？
9月被兩個人同時質問：某人有冇追過你啫？
10月八掛的他問：你係咪同公司的人拍拖？
我講過呢件事俾她知，她comment：乜搞到咁大件事？
最激嗰次係12月，出去做野，某個行家在眾目睽睽之下問：你係咪同xxx拍拖？(xxx指某人，響全朵…)即刻有行家追問：xxx係邊個啫？好在有他喺度幫我解圍…
成為了女主角都唔知咩事，係咪搞笑？
乜我舊年犯桃花咩？點解戀事多磨？

不外如是

25 February 2007

身體抱恙，仍然是要玩，人家戀愛大過天，我就玩樂大過天﹗
攻打四方城，大戰十六回合，大小戰役六十四仗，其實有些少意猶未盡，算啦，都已經成九個鐘，好似返工咁
有主場之利，雖然開首失利，最終仍力保不失，兼凱旋載譽而歸
結果係重要，但個過程更加重要，頭先你講開轉工的問題
問：你係咪打算轉工？
你：係呀
問：咁你而家做緊邊間？
你：上商
問：咁轉去邊呀？
甲：淅江？
你：未諗呀
問：集友？
你：咁咪好多friend
笑到我地在場三個哭笑不得，哎，唔係在場人士，好難講得你明，而且要對埋上文下理，篇幅所限，未能盡錄，你get到既，咪笑埋一份囉，get唔到既咪只有天知地知你知我知同佢兩個知

晚上咳個不停，好似中左咒咁，不過仍舊出去玩，浦精兩個字刻左喺額頭…

上次講過會講with or withoit you的故事，今回續
話說我都好鐘意呢首歌，係U2 87年《The Joshua Tree》大碟中的作品，呢個係我近翻看U2的歷史先知道
呢首歌係我在係隻精選碟度認識的，記得當時一聽就愛不釋手
最近也因為一隻精選碟而聽到呢首歌，有一次一路搭車一路聽，聽到喊，嗰段歌詞係咁的：

Through the storm we reach the shore
You gave it all but I want more
And I'm waiting for you
With or without you
With or without you
I can't live with or without you

......
And nothing else to lose

And you give yourself away
......
With or without you
With or without you
I can't liveWith or without you
And nothing else to lose

歌曲帶給我無限感歎，就是不管有沒有你在我身邊，也是這樣，不外如是

功力十足

24 February 2007

上回講到二人餐，而之前講起假民主，其實除左我之外，你都係一樣咁假民主
你約我食早餐，問我想食咩，喺邊等，乜咁樣唔係問我意見咩，我見喺中環，又要快食，可以選擇既唔多，咪話去麥記囉，但你又唔like呀，都係要我就你，去左鏞記對面間翠華
係都要同我作對，生平最討厭之一，就係茶餐廳﹗

話又說回到情侶套餐
某次某個曖昧的他相約我睇戲，他請我睇戲，我請他食popcorn，不加思索地喺kiosk order左一個情侶套餐
他用好奇怪的眼神望住我，嗰一刻覺得有d唔妥，他唔會以為自己得米掛…
我：d舖頭真係衰，打孖上就叫情侶套餐
他：佢有冇話要驗證過先俾買？
我：低能架？你就想﹗如果係情侶，就唔使一人一杯啦，應該兩份啜同一支桶啦
他：(無言…)

我觀察所見，不論係拍緊拖的男女，定係已婚人士，都鍾意在其他人面前稱呼另一半做「佢」
你個佢喺邊呀？你搵到佢未呀？
不過，我只有你

雖然physically你唔喺我身邊，但你仍然與我常在
思念你、掛念你，你的容貌、你的名字，填滿了我的腦海，就連做夢也是跟你在一起

已經踏入廿四號星期六初七人日，先祝人人生日快樂
放埋呢兩日假，如果某人唔反口，返多三日工，即係返埋廿八號，我就會離開呢間公司
我真係真係唔捨得你地，多謝你地陪我度過呢一年多，雖然喜怒哀樂愁怨煩乜都有齊，但回想起來，呢段日子沒有白過，最重要係識到你，你的確帶給我很多感覺，你都算係功力十足，令我花了不少心思在你身上

情侶套餐

23 February 2007

呢個零禮拜返番夜，真合我心意，一來可以去玩，宵夜唱k飲野活動可以resume番晒，加上開歐聯，唔使就住就住，我呢d夜貓，可以過番原本屬於我的生活
利物浦真係勁，真不枉我突登出去支持佢

嗰日同佢食飯，笑料百出
係我suggest一齊食，我問佢想食咩，佢未提意見前，我已suggest去嗰間餐廳，原來佢未食過，我叫佢揀食咩，但其實佢都未睇完，我就suggest食個二人餐，兩個main course我揀左，佢揀頭盤，揀好左，但我忽然想食另一個，結果又改左
佢顯得十分極之無奈：又話俾我揀，結果又係你揀
呢d咪就係假民主囉

亦因為「二人餐」，令我回想起「情侶套餐」 的尷尬…
不過眼訓，唔講住，下回再續

心安理得

21 February 2007

臨時有夜晚故，忽然變成daily故
事緣去做新春期間流動小販，諗住ot半個鐘左右，影d tc2加埋之前個訪問就交差，約人去飲野
點知去到現場真大鑊，消防車救護車諗住救人，但街道被小販阻塞，我呢d咁靈咁機智的記者，梗係唔理三七廿一轉angle講小販阻礙救援
我問police，佢話有人報警冒煙火燭
d香港人呀，香港人，真係好過份，消防同警察搵緊邊度要救人，但仲掛住擺賣，掛住行街睇野，有冇良心？如果附近真係有大件事，touch wood煤氣爆炸咁點算？塌樓又點算？死在老翻碟、炸大腸、keroro身邊？你邊處走得切？阻住救人，你點樣覺得心安理得？

我做扒，內容如下：
救護車在旺角西洋菜街一帶進行緊救援工作，但附近的小販仲繼續擺賣，完全冇意識散去

一邊做，一路有好多市民圍觀，又影我相？算，唔同你計，我都話你無知﹗
但劣唔過d無賴，有一個小販話：咩冇意識散去呀？過年做埋今日咋
我真係忍唔住同佢理論：上面救緊人架，人命來架
有聲音話：好似話係流料
我：你點知堅定流呀？人命使唔使救呀？係堅料點算呀？
有人在旁邊搭訕話：係啦，梗係救人啦
正義的人同無良的人，高下立見

其實我也會怨我個台個朵唔夠響，如果呢隻故仔係其他台做，會玩到幾大呢？引起的noise有幾大呢？你知有d台，有d報紙，幾小題大造，更何況今次可以一次殺幾個部門，啱晒佢地的作風﹗

曾經多次，我可以做嗰d視而不見的人，例如嗰次十萬個不願意去偷拍大肚婆，執晒野講左俾老編話冇，做唔到，咁係真係做唔到，但我見到都照做，今次也如是
同樣的例子多的是，也不必刻意記住，同你計較…
你都唔好話我計較，總之我見到會做，唔會覺得咁係功勞
我亦有諗過三月一號論壇使唔使幫手，遲一兩日走
有d人做野方針我唔認同，但唔會影響到我，我會認真做好一件事，需要我時，或者我可以發揮作用時，我一邊罵也會一邊做，唔好再攻擊我

喉嚨好痛，本來已經病緊，但衝一衝，激一激心，加埋在現場大聲做扒，喉嚨好似廝裂似的，又唔夠訓，有頭痛的感覺，剛剛探熱，發燒101度
哎，做daily呢d衝鋒陷陣，冇狀態時最好唔好搞我…

哈哈，我知點解我成日都可以大被com過頭，訓幾多個鐘都得，因為，一切來得心安理得

********
原本想講with or without you的故事，如今看來，都係早d訓，係時候沖涼喇…

你尋晚問：他喺邊？
我答：他在offline
你：你又知
我：我感覺到他的存在

你無非都係想我咁答啫，滿意未？

我唔係真係成日都咁無所事事，無病呻吟，係我屋企用電爐沖涼，要等水滾，唔搵d勢藝俾自己，訓著左都不自知
你原本叫我去你屋企食開年飯，佢仲叫我請假，我呢d咁唔like過年的人，會唔會同你癲呀，我唔係嗰d，為左討好你同佢而咩都做的人
結果而家2點半先在公司走，我都冇後悔

全場尖叫

19 February 2007

你的msn info換了奇怪的自我介紹，某人說已經換左一排，只係我剛才才發現，所謂何事呢？
我諗我也別要將自己睇得咁大，唔一定關我事既…

今日怒訓，初一又如何？咪又係平凡假期一日，同我唔出街喺屋企冬眠的日子，又有何分別？
訓到差唔多六點先起身，hea左陣，百無聊賴，後來炒蘿蔔糕食
今年你蒸左一底蘿蔔糕俾我，哎，其實你係對我好好，好錫我，以我為榮，以我為傲，我點會唔知？只係大家都唔識表達，每逢見面，或者雙對無言，或者破口大罵
你罵我，我罵眾人，愛之深，責之切，我倆也如是

我也許是個自私的人，都沒有對過誰好
我也許是個笨人，連自己都對自己不好…

呢幾晚都發夢，醒來全身濕透…

我近來被某事煩住，這事情自覺甚奇異，我未明白當中的用意誰個行為令我懷疑？眼內藏住了暗示？疑惑問我如何處置？多麼想知想要知…他的所思、他的故事應開始將這困局終止？

頭先又review過個blog，要update下目前的處境：仍然在玩火，繼續進攻，目標係攻佔你的心
總之得唔到你個人，都要得到你個心﹗
而5號嗰篇有一句係咁寫的：沒有你在身邊，摩天輪唔夠幸福
不錯，所以我發誓，沒有摯愛在身邊，唔會坐摩天輪

忽然想記下某人嗰日同我的對話
某人：你返到幾時？
我：今個月尾囉
某人：咁快？你唔係話留番今個月嗰三日假咩？
我：係呀，某甲幫我問左某乙，俾我放假早走呀，係咪有d唔拾得我呢？
某人：你地個個走我都唔捨得架啦
我：係咩，但真係冇聽你透露過喎
某人：講左出來又點啫，你係咪唔走丫？其實次次你地走，我都諗係咪我有d咩問題
我：又唔可以咁講既，大家都明白呢度的環境，有時有d現實的考慮，唔係捨唔捨得的問題，亦唔關任何人的事

今回真係要倒數了，倒數我在這間公司，同大家共事的日子
出席過咁多個人的farewell party，屬於我的，我做主角的，即將來臨
曾經做過一個夢，亦都是關於farewell party的，從沒向人透露過，今日覺得同主題相襯，同大家share下

你忽然間，逐個逐個派咭，我問：你派貼呀？恭喜晒﹗
你：「你睇下咪知囉，em…你嗰張唔同d，唔好同人講」
原來你走了，係invitation card，你在某靚靚好grand的酒店搞farewell party，憑咭進場，好有private party的感覺﹗
你給我留言是：做我的partner
你為我準備了晚裝、玻璃鞋和手袋，還有髮型師和化妝師，我按圖索驥，依你的指示，去到所屬地點，全部都是名店
你揀好了款式，仲俾埋錢，我試啱身包番起就走得，有人送到我府上
試嗰件晚裝時，個sales仲話：「呢條裙係x先生專登搵某個名師設計，你真係著得好好睇，佢對你真係體胋…」
sorry，嗰位「名師」我唔識喎
party嗰日，你著住套tuxedo，farewell啫，唔使咁誇掛…
司儀介紹我係你的partner，spot light在人海中找我，燈光落在我身上，兩旁的人散開，我慢慢走到台前，你一副期待又失落的樣子
因為我身穿軍佬褲、英格蘭波衫同adidas波鞋
我：我著唔慣你幫我揀嗰d衫，sorry，我想做番自己
你：唔緊要，等我一陣…
你走開了，大家都議論紛紛，燈光仍落在我身上，我只想往地底鑽…
不知過了多久，你也身穿軍佬褲、英格蘭波衫，同款的adidas波鞋走出來，引起全場尖叫

哈哈，現實中的你，係咪真係會做出呢種事？

無三不成幾

18 February 2007

你真係好有趣，稱呼佢地做「佢地」，你無嗱嗱咁講，我鬼知佢地係邊個咩，例如：
我：你會去邊？
你：同佢地去…
再問下去，先知原來佢地係你屋企人

頭先睇左《門徒》，究竟空虛恐怖d，定係毒品恐怖d？
哈哈，我覺得應酬恐怖d，做違己交病的事恐怖d

我生平最討厭的節日——農曆新年終於都迫到埋身，食左幾餐團年年飯，係呀，係幾餐，無三不成幾﹗
你知唔知我唔鍾恴呢d咁假的寒喧架？
即係呢，我覺得同公司d friend、中學d friend、大學d friend，食餐飯，吃個tea，食個宵夜，吹個水，都好過見埋呢d，一年先見得嗰一兩次的人囉
燒肉、白切雞、髮菜蠔屎豬手、蒸魚，呢四味餸實走唔甩，連食唔知幾多日，真係食到想反胃
我真係好唔鍾意食魚(ps魚生除外﹗)，夾到埋來，唔通唔接唔食咩…
為左一d所謂尊重，二十級勉為其難﹗
每逢過年我會忽然減磅，就係因為d野食唔啱我胃口，少食，每樣係咁意掂下，我次次都係第一個食完行開或呆坐的，又或者係唔食，自己喺屋企咬杯麵，怒訓，一日食一餐
乜咬杯麵好慘咩？我覺得要食埋d唔想食的野仲慘
哎，仲有唔知幾多餐開年飯
嗰d為拜年而買，唔等使又唔好食的曲奇餅，唔知會收到幾多盒呢？
金莎係ok，可以接受，但都唔可以怒食架嘛…
可唔可以送godiva？
係喇，終係知道點解覺得若有所失，今年情人節，就係少左godiva朱古力﹗

話雖如此，我咁唔like過年，但都仲會苦中作樂
正如頭先，食完團年飯，十一點幾都call d friend出來，結果去左cafe飲野，跟住去左花墟行左一陣，好累又好熱，行左一個大大運啦，但今次冇收鑊…
返到屋企5點零，打打下blog攤左陣，訓著左喎，跟住成6點先沖涼
反而覺得過年返工好，可以避年，唔使拜年唔使食埋d唔想食的飯，去埋d唔想去的應酬，見埋d唔想見的人

唔會搵到答案

17 February 2007

行年宵，寓工作於娛樂，一邊搵case，一邊買野，收獲豐富，但腳都軟晒…

他故作神秘，以為你會出現，一諗起你，心裡暗喜，但原來一切只係我一廂情願，我會錯意，好似你地咁
我真係估都估唔到，你地對我的事咁有興趣，追看都不突止，仲會熱烈地討論，又成為今期最hit的話題啦﹗
真係多謝你地將時空調較到12月6號晚上11點59分50秒…
「十、九、八、七、六、五、四、三、二、一，生日快樂﹗」
多謝，雖然遲左好多，但冇人同我咁樣倒數過生日架，真係好特別，好有意思﹗
真係你地先做得出
但點解咁鐘意倒數，又唔鐘意穿prada的惡魔？

不過你地唔好咁認真啦，有d野你地唔會搵到答案的

引述本月2號的一席話：我從來率直如此，有時甚至過分了，忘了顧及別人的感受
佢地話我嗰句說話激嬲你喎，搞到我勁尷尬，臉色發藍，多了十間…
唔通又衰左？後來find out到，唔關我事呀﹗

我冇lum，只係斜左啫

早兩日好唔開心，一條友食飯，間餐廳播嗰首「特意為你每日無間斷播放的歌」，it really light up my mind，開啟了釋懷裝置，寛容了四分十五秒
不過隨住歌聲遠去，又重新掉進心情深淵

每逢經過地鐵站、火車站，收集呢d相
而初初諗住執張枱，都係冇時間執，貼左幾時啟市就算喇

拭目以待

15 February 2007

返來囉﹗真係好累，今朝企左一朝，滕來滕去，三點幾先食早餐午餐和下午茶，真係crazy
頭先刻意頂撞某醜女人，真係大快人心﹗

我真係唔想湊女，點解次次都有我份？乜唔係某人講過，有資格帶新記者的只要兩個人咩，但點解次次d新人咩都唔識，美其名就話搵佢「幫手」，實質就要我招呼佢
如果我都係咁「資深」，咁經驗唔「淺」，係咪我可以坐埋你個位？
單拖只係勉為其難應付左佢，仲要分神照顧人，我真係二十級吃不消，唔好再搞我啦，放過我啦﹗
好似今次咁，招呼左佢入間餅店，揀好想要的西餅，人地準備俾錢，老闆突然話落閘放狗唔賣，將d原本好地地的餅掉到後欄，可憐佢要去後欄執番d爛餅，點會有好下場呢…
我意思係話，如果係湊，就湊足全程啦，俾我同佢「合力」寫好隻故仔佢啦，唔好搞到d野古古怪怪

下個月15號8間電子傳媒搞答問會，我一定冇機會以而家呢個台的記者身份參與，到時會唔會相遇？大家拭目以待﹗

街上人來人往，其實好煩厭
情人節呢d節日，可以睇清楚一個人，適唔適合自己
例如有冇一早安排好，book定枱食飯；會意我想唔想收花或收埋d好俗套的情人節禮物
不過作為一個大節日，有d ritual，例如派下朱古力，大家開心下的，又冇咩所謂

我心目中想去amaroni，好掛住佢的tiramisu，不過sorry，原來你唔係同我心靈相通的
退而求其次，食d類似的餐廳都ok，但都係book唔到位
結果去左打邊爐，係咪好搞笑

唔好意思喎，真係唔可以，唔得閒應你約喎
呢d日子，免得你誤會下去啦，平時點講點玩都得，但如果你玩認真的，請你收手啦，我唔會奉陪﹗

打算下個月做獨孤精，去一轉上海，不過唔知點解上海d package，4日三千幾係閒閒地
然而我想要的野，都係你先行在北京幫我搵搵先比較穩陣，唔該你啦

原來今日已經係年廿七，聽日年廿八要洗邋遢，但今年一d過年的感覺都冇，唔係好知點解
我打算執好我個位，跟住貼張紅紙，寫住初二啟市
2:24 新增回應 永久連結 引用通告 (0) 發佈至您的部落格
14 February
穿prada的惡魔
搭正十二點，電話響起，你鬼鬼馬馬咁，講埋d似是而非的野，原來賣關子你亦很在行
到樓下亮一亮相，你奉上情人節的濃情蜜意，並將手錶的分針倒後調較了一分鐘
「現在倒數情人節吧﹗」
係好無聊，但好冧
我預計過你為我獻上甚麼驚喜，不過這種模式，是我意料之外﹗
你問我受唔受？呢條橋好受，但你呀？再諗諗先

********
又再夢見你，不過忘記了你在夢中的一舉一動，只肯定你曾經出現
你呀，掉低我一個，你放假又點啫，但我要返工喎，壞人﹗
打算為你準備prada皮帶，會唔會娘左d呢？到時你咪係穿prada的惡魔囉

你我尚未能輕易一笑置之，每逄談及你和我，你我突然靜了
咀吧們又將你我扯上關係，其實，提及你，連喉嚨亦會沙，說到你，唇上已發燒
又像卡通片中尷尬的主角，滿臉通紅，心臟強烈急速跳動，快要跑掉了

真係好累好累，尋晚唱k，終於鼓起勇氣，點左queen的Bohemian Rhapsody
有d歌真係只可聽，不可唱，以我唱choir有成十年經驗，仍然真係唔知點唱…
晚上有飯局，食完就閃，下場唔使預我，真係頂唔順，因為聽晚後晚都有約，連chur左好多日喇，邊處咁好精力…

續《蜜運中》

12 February 2007

有人問我，每日長篇大論，點解寫極都仲有咁多貨？
呢個問題，真係問到我口啞啞，我都唔知點解喎，我只係覺得心裡面有好多感覺，腦海裡有很多想法，總要諗個法子安置佢地
以前仲未流行寫blog，我會寫日記囉，嗰時間中都唔鍾意拎起支筆寫，因為我打字快過寫字，一篇篇日記打好，貼番落日記簿，都幾無聊
我係嗰d怪人，一寫就無停手
識得我耐的朋友仔會知道，我有一本個人短篇小說，叫《無名字的書》
本書由中四寫起，但進展緩慢，但考完a level嗰個暑假，基本上兩個星期就chur晒本書出來，咁你話呢？
諗番起嗰時好搞笑，返學都冇咁積極，朝早九點十點彈起身，睇番之前一日寫過的野，先做校對，順便理順一下故事脈絡，食個早飯，就對住熒光幕打打打，將一堆倉頡碼演化出來的中文繁體字，埋滿雪白的word文件，直至深宵兩三點，翻看新鮮出爐的最新作品，夠唔夠吸引
連續一段日子，唔去街，早睡夜訓，寫自己本書，寫自己諗出來的情節，寫到偷笑，寫到飲泣，寫到氣上心頭，每次講來，你都當我怪人看待，但對我而言，有咩所謂呢？

可能呢個亦都係我的不良嗜好，只要面前有個鍵盤，我就會不停地打字，自然地將想法幻化成文字，儲存在虛擬的空間

********
最近成日發夢，夢中的男主角都係你，將呢d夢編織埋一齊，加埋平日d白日夢，就好似一套甜蜜愛情連續劇

續上回的《蜜運中》
上回講到你「能轉個化身，共我再蜜運…」
我向你的孖生弟弟提及他的哥哥，即係你，他知道關於你的一切，這方面我理解，因為你們是親兄弟，我也相信孖生兄弟冥冥中有些甚麼難以解釋的牽連
但是，跟我相識不久的他，也對我的一切瞭如指掌，例如我的喜好，我跟你的趣事瘀事和秘密
既然我跟你也不過如此，跟我相知的你，你不會將這段往事跟別人談起，難道他掀起你的頭蓋，打開你的心扇，一字一句偷偷地仔細閱讀關於我的段落？
摟著他的臂彎，潛意識告訴我：這個人是你
他看見它，裝出若無其事的樣子，跟你彷彿判若兩人，我說他跟你很不一樣
但他瞳孔反映的閃躲，我全看在眼裡
我肯定，他就是你

夢已至此，返回現實，你仍是若即若離，何時才如夢中摟著你臂彎，與你同遊？這場遊戲何時才告終？
你與我也總不能永遠坐在海盜船上的兩端，總有一刻會停下來，在出口相遇，那時你我分道揚鑣，還是結伴去玩下個更刺激的機動遊戲？相遇那時，也該講清楚

********
剛從卡拉ok歸來，時間係深夜3點20分，極級眼訓

不良嗜好

11 February 2007

我細細個已經開始睇波，最初睇曼聯，記得99年三冠王的輝煌，當年的黃金一代，有一眾英格蘭人，如碧咸、史高斯、加利仔，另外有傑斯、荷蘭人史譚、鋼門舒米高，當然唔少得黑白雙煞——高爾、約基、舒寧咸、蘇斯克查
呢d名字，耳熟能詳，不論對拜仁的歐聯，定係聯賽與阿仙奴，球賽鬥到最後一分一秒，每一幕都烙在心扇
99年歐聯120秒大反底的經典，大家一齊重溫啦﹗
http://www.metacafe.com/watch/83573/manchester_utd_vs_bayern_munchen_final_1999/
不過上屆再上屆的紅軍落後三球連追三球，亦都係牽動人心之作﹗

呢個時期，係我鍾意曼聯的時期，當時碧咸都未有d咩萬人迷的雅號，當年仲係中間分界，一副純品乖乖仔、鄰家男孩的模樣，係我最冧佢的一段時期，但係出名後就變左喇，我亦都離棄佢
同羅馬王子一樣，成名後變成一隻臭馬，三分顏色上大紅，冇品﹗
而家的曼聯，過得去啦，攻勢多，但效率低，成班友仔成日浪射，不知所謂，靠班老人家，食老本，冇晒當年d霸氣
鍾意車仔，尤其係摩連奴領導下的機動性，有隊形，高效率的踢法，不過今季好似有d技窮，又有d欠運…
鍾意紅軍，因為火鳳凰的不死精神，鬥志與堅忍，從來不會耗盡似的，他的小宇宙，不知在哪一刻爆發出來，但係往往在急危關頭先迫到佢使出真功夫…
anyway，我係鍾意英超的節奏和氣氛

以前讀書，唔係咁多錢使，死慳死抵，儲到錢先買件波衫，當時波衫唔係咁普遍，亦唔係逢體育用品店都有得賣，最記得旺角嗰間
買左件波衫，珍而重之，平日唔拾得拎出來著，睇波時拎出來掛起佢打氣，贏左波先著一陣當係慶祝
呢d日子，真令人回味
但係而家，自己搵到錢，自己對自己負責，款式和喜好都多左，係咁買，不停買
同一季主場作客都買齊晒，唔會好似以前咁，左度又度
而家行過見到鍾意就買，唔燙字，三四百有交易，就好似篤串魚蛋咁輕易…
除此之外，睇波都容易左啦，唔使好似以前咁，喺床度望天打掛，唔敢訓，又唔敢較鬧鐘，拎住個有夜光的鐘，隔一陣睇下夠鐘未，又豎起耳仔聽下阿媽訓左未，到咁上下，叫埋細佬，夜馬馬，靜雞雞，偷偷地起身開電視睇波，入波唔敢大叫，冇薯片冇蝦條，但趣味無窮
而家自把自為，出左街睇唔到，錄左佢又得，上網睇番都得；自已住，鐘意大叫又得，拍枱拍凳都得，叫埋一大班人一齊睇亦得，仲可以伴以薯片蝦條啤酒汽水和pizza，而家係幸福好多，但反而冇以往咁珍惜球賽帶來的喜悅和偷偷摸摸

不過我越來越覺得，睇波真係一種不良嗜好，雖然我唔賭，但係買埋買埋各式波衫、球會精品、足球雜誌、特刊圖輯紀念冊…
年中供養呢樣嗜好，都唔知使幾錢，今日又進貢了…
利記日版(限量)外套，盛惠750，其實我係見到同一系列，車仔的外套先，一見到我已經知道呢個collection我買梗，後來見到有利記、拜仁、日本國家隊etc
我要諗的，係買車仔定係買利記，定係兩件都買晒啫…
不過見番呢件車仔外套，原價500減價379，根本諗都唔使諗，我一定會買番啦，雖然又係同系列，去年去日本時已率先入貨，買左利記嗰件（今日仲著住添）當時見唔到有車仔呀，sales話賣晒喎，聽住先囉，而家俾我在hk見到，仲要減價，唔帶佢返屋企就對唔住自己啦﹗
既然係咁，咪買利記件限量版囉，不過，好老實講，都係利記嗰件靚d，背面有「你不會一個人走路」，真係將件衫同隊波的真締展示晒出來，車仔嗰件有緣再聚﹗
仲有呢本歐洲足球先生百科全書，球迷必備的天書，盛惠160
雖然曼聯而家唔係我的飛佛，但呢副水晶麻雀，作為英超球迷的我，點可以缺少呢？仲要係買滿200蚊，加88優惠價換購
當日在ok買budweiser加錢換，因為有人辦事不力，換唔到，氣上心頭，雖然後來知道有得賣，但某人唔識做，冇買到
而家，氣下了，我自己帶返佢返屋企，下次來我屋企打牌，大家就可以幫我助車仔「打」曼聯﹗
仲有呢堆，同英格蘭國家隊係連體嬰的umbro產品…

除左買野，仲有各類睇波消費，最基本係每月二百幾蚊有線月費，間中落吧或卡拉ok睇波，又睇又飲又食，幾舊水閒閒地

今日實在買得太多野，呢種消費模式亦唔要得，令人側目，你都話過我好多次，只係我一直唔聽，如今醒覺，都唔算遲既
今日開始，每日只准帶100蚊出街，d信用咭、提款咭全部放喺屋企，唔俾自己再亂咁使錢，但如果用剩可以放在銀包，剩左的可以任使唔嬲，呢個行動暫定到二月為止啦﹗
當日做年青人理財故仔，乜野理財哲學，老生常談，對住個故仔個幾月，咩妙計咩屎橋我點會唔記得，理財有幾重要，我點會唔知，都怪自制能力欠奉﹗
早兩日搵到個同類，又係同我一樣，同款唔同色的衫褲鞋袋會買幾件的人

爭

11 February 2007

其實我個人唔係咁鍾意食自助餐，野食不外如是，冇新意，唔夠特色…
唯一一次覺得好食的，係食會展嗰次，不過都係好耐之前lu
因為朋友仔知我唔like自助餐，所以佢地都就我，可免則免
今晚之所以去食，係因為應某人邀約，大伙兒和主角已決定左食自助餐，我一係去一係唔去，冇得揀食咩，是但啦，十年都唔一遇…
每次食buffet，都係食冷盤，主要係刺身，同埋甜品，d maincourse望兩眼就算，絕對吸引唔到我出手
今次呢間係一間新酒店，裝修ok，環境氣氛尚算過得去，冇d好擒青的師拉或大陸人爭野食，但亦冇海景囉
仍然覺得呢個價錢食魚生甜品，一d都唔值
anyway，算啦﹗

利物浦唔爭氣，怪得邊個？
下個星期開歐聯，咁既狀態，點打低巴塞？
車仔lucky地贏3-0，豬油巴始終有令人佩服的地方﹗不過林伯呢，仲係差少少，然而robbie仔，掂呀﹗
同我同月同日生的JT終於回歸，成條後防線真係唔同晒，有個大佬喺度真係唔同d
weekend開足總盃，下星期開歐聯，各大英倫球會要加油呀﹗

忽然跟你談到關於幸福的話題
你話：幸福唔係靠人俾，要自己爭取
我話：我唔鍾意爭野
我從來都係自信自戀，由細到大，如果我要爭，都冇咩係爭唔到
但係爭野真係好累，爭野玩又好，爭仔都好，仲有爭寵爭勝爭論爭風頭，要最後勝利，要付出勞力腦力努力
為啖氣，爭完又棄之不顧，爭來做咩？
所以我覺得做到稱心如意的事最幸福
你幸唔幸福呀？
像今日平淡地過，感覺淡淡，但值得細味；節奏漫漫，卻舒服自在，就是幸福
但你想做幸福的人，定係幸運的人？

你覺得我有咩做唔出呢？
睇唔睇到我手上拎住d咩呢？望咩望呀，一張大摺凳車埋你度喇…

朱古力‧嗒糖

10 February 2007

小學時不論中英文科，都有兩個練習，性質相近，考試必考的，一種叫重組句子，另一種叫供詞作句
而家人大個左，不如升grade啦，玩下重組段落，和供詞作段，或者供句作文
今日提供的字句如下：
畸呢 / 樣衰 / 黑面 / 點樣見人呀？ / 心諗：一定冇下次 / 呢班都唔知咩人來架… / 一個賤樣 / 無奈 / 陰陰咀笑 / 蝦碌 / 變態 / 垃圾 / 傾巢而出 / 實俾人笑啦 / 都得既 / 滴晒汗 / 忍唔住笑 / 唔耐煩

呢個話題，係晚上深宵msn的焦點所在，相信亦都會在chat room籠絡不絕，成為茶餘飯後談論的熱爆話題

難得返夜，聽日後日都放假喎，竟然冇下場，真係有d可惜…
三粒人落左樓下食西多士，都幾搞笑
算啦，今日稍事休息，聽日又有令人應接不暇的節目

你又真係灰左d既，我目擊者整個過程，真替你不值，但又點呢？你同我可以做d咩呢？唯有都係呻兩句，安慰你兩句囉，請你食朱古力哄下你喇
你拎左一粒，鍾意食朱古力的你，之後又話連朱古力都冇心機食，真係好嚴重喎﹗
科學家研究所得，朱古力含有一種成份，叫苯乙胺醇，是一種與熱戀激素相同的物質，所以食朱古力會令人感到戀愛的甜蜜，令人開心d

哈哈，個個都嗒我糖，真有意思﹗
你問我鍾意裙下之臣多d，定係鍾意觀音兵多d？
我反問，乜仲要問架咩？

某人問：幾時last day？
我答：返埋廿八號
某人再問：咁你地係咪會搞d farewell活動、唱下k，擘下酒咁？
我答：係掛，我未知
某人問：記住叫埋我喎

某人過左一陣再問：你會去邊？
我答：未呀

某人又問：點解你都走囉，仲咁積極跑數，頭先嗰d…我地又唔係中央台，咁都算新聞？
我其實沒有回應，不過我心諗：嘩，呢句話會出自你口中？真係估你唔到喎

她說某人係想套我口風，乜有咁的需要咩？我係將走之人，換你嗰句形容詞，我呢d叫拎左「已死金牌」的人
大家會唔會將件事諗得複雜左呢？你當我單純又好，白痴又好，我覺得某人今次係冇惡意的，只係有d奇怪啫

蜜運中

9 February 2007

夢見你，跟你樣貌一模一樣的你，你的孖生弟弟
夢見跟你呢位孖生弟弟拍拖，有時錯誤以為是你
我還想騙自己，你假扮成你的孖生弟弟
能轉個化身，共我再蜜運…

(待續)

受唔起

9 February 2007

今日做左駐灣仔記者，because兩單野都在灣仔
不過又ot囉，真係好累﹗
但飯仍然要食，街照樣要去，頭照樣要浦

近日i-ed風波越搞越大，諗番尋日，雖然有友台借左d片俾我地用，引述某人一句：lam到盡
我問過架，但結果仍然係一句credit都唔落，有人話：佢俾得我地用都唔介意架啦，引來我和某甲碌大對眼對望，眼中無限句有冇搞錯…
點解呢個世上有咁無賴的人？點解我會幫呢d人做野，聽佢支笛？

某人話而家的目的，係開新的slug
呢d都係新聞自主嗎？
干預新聞自由的方法有好多，最直接最低b的係審查
不過，閂水喉，要新聞台符合 / 迎合老細某d要求，都係干預的一種，也不見得手法有幾高明
眾人皆醉我獨醒，不甘屈服這淫威之下﹗

聽日被征召入伍，本來的休假亦要取消
冇得放假，叫做變態；城市失控，老作搵交嗌如有天找到烏托邦多high…
好在柳暗花明，而家可以放星期六日，算數啦

好明顯我中左毒啦，有一個愛一個，愛一個上多一課
醫生，有冇解藥？
食左可以令我專心一意，或者可以令我忘記他跟他他他

我諗最難忘記嗰個係你，同你經歷左太多太多，其實同你好夾
不過有時你同我實在太似，反而火星撞地球
你我之間也有太多秘密，既曖昧，又親近
你，絕對唔捨得將你，從我記憶中刪除
你，將有關你的回憶封存好，zip埋加密做番個backup，承受唔起遺失關於你的一切

駐錦綉花園記者

8 February 2007

駐錦綉花園記者
呢幾日其實都有好多野想寫低，但日日都走左出去玩，返到屋企梗係訓啦，所以呢，咪而家還債囉…
星期日開始唔夠訓，根本未抖過，但夜晚仲睇波囉
mon起，一連三日碌落錦綉，忽然做左駐錦綉花園記者，嗰壇野係咩？睇新聞就知咩樹啦，仲要互相推撞，成個小型WTO咁
星期二被指派8點自行入到錦綉，呢d地方，對我來講真係不毛之地，點識去呀…
放工仲要去bbq，邊燒邊食邊飲，之後去左唱k，如果唔係第二日又要入錦綉，我點會三點就閃呢，實玩通宵啦
星期三，放工約左你食飯，在旺角碌左一陣，但實在太累，都冇咩知覺，野都唔想買，返屋企即訓

********
知道你會現身，真係好開心，一諗就不其然笑出來
頭先撞到你喎，留意到你臉上的一切detail，再與你偶遇，真係好意外，你有沒有同感呢？

在這心灰的冷冬，共你熱烈再相逢，全是我的美夢
即使你離開，我熱情未改，這漫長夜裡，誰人是你所愛？
假使你懷念我，為何獨處感概？

********
原來嗰一系列北京奧運外套，係限量版來架，咁我更加一定要，一定一定要要﹗
唔該你啦…

無間斷

5 February 2007

去矣去矣…
53分鐘來個0-3，旨望呢隊熱刺助車仔一把，無望啦﹗

尋日同d friend去左環球嘉年華，太遲入去，最正的g-force玩唔到
掟公仔，我的成績都算係咁啦，掟左兩隻返來，我自己掟架，我最叻
沒有你在身邊，摩天輪唔夠幸福
左起最大的公仔叫大鼻，係某人掟銀落碟中既，唔抵得有人送咁大隻公仔俾我呀？
中間嗰隻叫白白狼，係碌波仔計分，中細獎
右邊當然係我的飛佛小熊維尼，佢叫波波pooh，因為係掟波波贏返來的，4個coins4個波，一人掟一個，我一掟就中左細獎
揹住d阿仔周街走，都幾有虛榮感，聽到有人話：哎呀，你睇下人地有幾多公仔…
帶埋佢地去打邊爐，激肚餓，因為4點起身只係食左個杯麵，過左陣就出去
終於又再次集到超過十粒人去打邊爐，好耐都冇試過
本來諗住打完閃，又俾班魔鬼引誘左去飲野，但係，真係好開心
但係搞到d阿仔一大陣煙味囉…

今日除了眼訓，還有眼訓，滿腦子都係眼訓，雙眼只看到眼訓，隨時隨地都可以訓得著
真係估唔到會撞到你喎，見到你真係開心，由心裡面笑出來，仍然有嗰種特別的感覺
腦海浮現一幕幕自編自導自演的映畫戲…

上次聽過嗰首歌，特意為你每日無間斷播放
但越聽越迷失，又有d茫然的感覺
同你研究嗰個問題，又係我率先搵到答案

adidas出左件北京奧運外套，北京有售，我要，我一定要﹗
聞說盛惠420，抵呀，著到08年都唔out，只係越來越hit，仲要勁有紀念價值，最緊要最緊要都係a記出品，點可以錯過呢…
其實有人問過我，屋企除左a記的衫，我有冇其他去街衫？
傻啦，梗係有啦，但係次次出街換衫，都只係想著a記，襯來襯去，都係a記至啱我心水
我係有一個衣櫃，擺滿我d波衫同a記珍藏，但相比起d虎仔，相去甚遠…

喂，去搵個靚靚海灘hea番三四日都好喎

黑口黑面

3 February 2007

有d野天生就係一pair，例如買鞋一定買一對，黑口黑面也是連體嬰，總係分不開的
係，反應就係咁直接，一聽到又要偷拍，臉色即變
我係唔識掩飾我的情感，喜怒哀樂，就寫在面上，你可以話我易吃虧，但為了這個似是而非的原因，變成一個虛偽的人，才是最理虧的事﹗
我從來率直如此，有時甚至過分了，忘了顧及別人的感受
了解我，體諒我，經得起考驗，才是真朋友，謝謝你﹗

明知不可為而勉強為之，我覺得係好大突破
一路上心情忐忑，我覺得很委屈，好像被迫出賣了甚麼似的…
對，就是迫良為娼的感覺
忽然間來個大事回顧，你們的面孔在我腦海浮現，你一直都企喺我嗰邊撐我，只有你唔會蝦我
我有時其實，都知道慚愧…
眼淚趁我乘車途中發難，離家出走
我說：隨便你吧﹗
他不肖一顧，跑到衣角，一點不捨之情也沒有，越跑越遠，消失於空氣間

連續兩朝都同你相依為命，成個人都斜晒…

好事定壞事

2 February 2007

世界上的人，可以分成幾類，有唔同的組合
有d人靠小聰明過關，正所謂的「食老本」，但也有真係聰明同自作聰明之分
有d人靠運，但運氣永遠 都是最不可靠…
有d人靠努力搭夠，即係「將勤補拙」，但係有d人天資有限，即使事倍功半，仍然肯繼續埋頭苦幹，真值得人敬佩
有d人又有運又有小聰明，根本唔使點努力就得到成果；但有d人又冇運又冇小聰明，連努力過後也要比其他人走多d路，呢個世界真係唔公平﹗
你係邊類人？我係邊類人？大家心裡有數啦﹗

我沒有叫，我沒有嚷，不是我習慣了，只是我不知道如何形容現在的心情
你問我介唔介意？我也不懂回答，我只能說我而家好淡然，「沒有感覺」可唔可以算係一種感覺呢？
但我只察覺到一樣野，就係我的reaction同半年前遇到同樣處境時，完全不同，係720度的轉變，我唔知咁樣係一件好事定壞事，我諗呢點要多d時間去印證

甚麼很濫？甚麼不濫？
雖然我係貪玩，我亦承認我唔係咩乖乖女，但係絕對稱不上濫或好濫
我任何時間，處理任何事都係咁有原則，破壞別人的不做，傷害到人的不做，沒有把握的不做
不過自問，我不是好情人

因為睇某人的blog，先知75日之前係你的生日，補番一句生日快樂啦，或者終有一日你會收到
你話約我傾計，幾時先？見係你咋，i am always available

今年的情人節要返工，真係唔知係好事定壞事呢？

到此為止

1 February 2007

我講過，「沒有預謀的邂逅，猶如兩條平衡線相遇般充滿傳奇」
今日又再發生一次，但是你我總是有緣無份…
無論如何，當係你我各贏一舖啦﹗

一句我愛你，對你和我，都是何等奢侈，為甚麼？
原來忽爾冷淡，忽爾熱情，你也是這麼在行﹗
飲酒可以忘記嗎？

某人話我件衫似orero餅餅，大家來評一評

連日來實在太眼訓，我唔係冇heart寫，只係手指也不由自己，自把自為，控制不了…
我唔好識做d明知不可為而為知的野，今天到此為止

你係咪唔捨得我呢？

28 January 2007

頭先出去做完野，返到公司見到你，基本上第一件事，第一句講的說話，就係話你知我極大可能返埋27號，你的反應都幾愕然，忽然間見到你的眉宇之間滲出一份失落，你係咪唔捨得我呢？
記得你上次好似有野想問我，定係有野想同我講呢？卻言又止，又話遲d先，如今卻不了了之，究竟你是開不了口，還是那根本是微不足道的事呢？anyway，你幾時想講，我都會洗耳恭聽
其實我有一個想法，就係為每個友好的你寫一篇review，然而唔知你點諗，喺呢度寫的話，唔知你會唔會唔鍾意
都係再諗諗先

我真係冇錯架，上次打俾我的係佢，我諗佢係打錯電話佢自己都不自知，因為都唔止一次，d人其實想打俾她，但打錯俾我，我諗佢都係一樣

頭先本來諗住諗d正故仔，當係收爐，好來好去，因為我仍然想做有質素的野，咪破壞自己名聲，咪做壞手勢
說時遲，那時快，你喺櫃桶抄左一輪，鬼鬼馬馬咁話有野俾我，傻啦，你幾時有好野益過我架…
留心睇bloc的人都知，次次同你一齊都冇好結果啦
不過既然你有事相求，我講過撐你，絕不食言
正如每次你同我同時在公司，我一定成為你的倉頡字典，今日你問我個「撐」字點寫，都話我撐你啦，唔使要我做到出面掛…
出去前寫好大半隻故仔，差少少埋尾，你唔得閒搞最多我返來幫你搞埋佢囉，但原來隻野之前出左，灰…

頭先碌過sogo，目不轉睛咁望住其中一個counter，諗起你講關於白色wacoal的對話，心裡暗笑…
如果件睡袍少d布，你看到了恐怕會小命難保﹗

初初以為今日好凍，著錯衫啦，搞到個人好擁腫，大左一個碼咁
同你喺cwb街頭篤牛什，好好味，食勻全港九，我諗呢檔都係數一數二最好食
嘩，真係好似被催眠一樣，地鐵往返cwb，全程訓到不醒人事，真係失禮…

********
尋晚同某人msn，講開呢，細個讀書時，中文要抄書，英文有penmanship，抄詞語抄課文，仲有copy book同埋毛筆書法，原意為練字、熟習課文
有人話睇一個人的筆跡，就可以睇到一個人的性格，係規規舉舉，定係不修邊幅
哈哈，我一定係後者﹗
然而，往往d功課呢，就係應接不暇，我呢d 8字頭的，當年讀中英數社科健，科科都有功課，生怕做你唔死，又怕你唔夠功課做，用晒d時間睇埋d無聊電視，用晒d時間落街玩見埋d豬朋狗友
抄書練字往往係最唔受歡迎的功課，又花時間，又冇意思，例行工事…
講真啦，有幾多個人會好俾心機做功課？況且仲係抄書呢d浪費大家時間，又唔環保的作業，邊個做學生冇試過敷衍了事？
抄一篇課文，三百字，老師會唔會認真逐隻逐隻字睇呀？大致見到你有交貨，填滿你的時間，就覺得好滿足，呢d真係枉為人師﹗
而抄書嗰個人呢？有冇諗過佢的感受？你真係覺得抄書可以修心養性，磨練意志？係咁抄書，扼殺佢用腦計下數，用腦答下題目的機會
細個做曳野，罰抄「我以後上課不再談話」，抄一百次二百次也罷，一邊抄也只是一邊咒罵老師係衰人，老師係賤人，真正一邊抄一邊反省的有幾人？
為左交差，亂咁撩d鬼畫符出來，抄得快，抄得多，抄錯了不自知，有咩咁出奇？係，為人學生有責任將功課做到妥妥當當，但古語都有云，聖賢都有犯錯的時候，老師唔睇唔理，難道老師就冇責任咩？同埋只係識叫學生抄書的老師，用腦出題目的心思都唔用，用腦改功課的責任也不負，校長check 簿，就賴d學生無心向學，哎，咩叫為人師表？
當然，一間學校梗有d好老師，好學生，但孤掌難鳴，想教好、想學好，但環境所限，力不從心，有苦自己知…

當群鴉亂舞時，雖是雪白無瘕的和平鴿，也難獨善其身﹗

修正案

27 January 2007

之前講過呢句說話：但如果你唔係咩，我諗我可能會冧你﹗
經過尋晚，我要提出修正案：
在"唔係"之後刪除"咩"，並以"結左婚"代替；在"我"之後刪除"諗我可能"
想一想不是罪，即使真係冧，冧都有好多種程度同形式，不過我唔會做d破壞他人的事，所以我只是說「如果」
可能你呢個type的男人，我永遠都唔會得到

嚐過你的濕吻，與你十指緊扣的畫面不斷在我腦海重播…
看完playback，我識路返屋企

********
塊面敏感，唔見得人，睇過醫生，訓到迷迷糊糊，夢見編輯打來追故仔
後來同你講開，原來我唔係發夢，係真有其事，真係好搞笑，好瘀…

佢地話你要同我保持距離，點解？我唔明

仲有，睇番之前的bloc，有一樣野誤導左大家，要講句唔好意思
本來話宣布一樣野，其實原本係想講試cue的事，但後來又決定走，不如將錯就錯，當此事作彼事
後來都係覺得咁樣愚弄我的忠實讀者唔係咁好，所以都係自首囉
話時話做anchor，我唔恨，即使當日我被知會此事時，我同知會我的人都係咁講，我心如止水，並唔覺得有咩特別值得興奮的地方
有自信自然靚，人開心自然靚，唔使用做anchor來「肯定」自己
君不見而家全行都係讀稿機器，我真係不肖成為其中一分子
唯一勉強覺得可惜少少的係分明有機會同你坐在同一錄影廠中扮傾計，你同我交足戲，又或者我會不斷引你笑，你就話：你個死野引我笑，忍得好辛苦…

********
識唔識得分flirting同harassment？
大致上係睇下聽嗰個人受唔受，講嗰個人對聽嗰個人有冇興趣
A：有興趣+受-->flirting
B：冇興趣+受-->以為人地flirt你，但其實人地harass你
C：有興趣+唔受-->本來想flirt人，但俾人覺得係harassment
D：冇興趣+唔受-->harassment

呢個世界有d野叫「你情我願」，又有d野叫「言者無心，聽者有意」
如果你成日遇到的係前者，真係恭喜你，但往往遇到的係後者居多，經常搞出小誤會，大笑話

我撐你

25 January 2007

唔覺唔覺，寫左呢個blog284日，來個抽樣普查，發覺而家寫的野，同setup時的理念唔同咗，而家差唔多成為日記，但唯一keep住的宗旨係唔開名講人，但好多時我講的人物，就算唔講個名，你都會估到係邊個，但唔緊要啦，反正我都冇開名，只係你估到啫，都係冇違反原則
而review所得，近期都冇post相上來，真係冇咩值得影，冇相可post，呢方面我會改善下

你話你好忟，你仲未講咩事喎，唔好唔開心啦，唔值得﹗
不過，我一定撐你

終於集齊一套了，將成部扭蛋雞的蛋都擰晒出來，咁樣係咪叫殺雞取卵？
不過都有lucky的地方，就係三眼仔系列的lego公仔，一套6隻，不過我只想要巴斯、woody同三眼仔
十蚊一隻，30蚊就帶晒佢三個返屋企
年中都唔知對呢類扭蛋雞進貢幾多…

真係好想養番隻八哥，感覺非常之咁強烈
事緣去食飯，見到隻八哥喺出面跳下跳下，自己追住自己條尾轉圈，真係好死蠢
望住佢咩煩事都唔記得，不其然笑了，心情輕了

本來諗住去買番嗰件白色大褸，但太晏過去，已經閂左門
件衫原本掛喺櫉窗度，而家冇掛了，唔會賣左掛…
哎，有d野真係刻不容緩

頭先訓到5點幾，不過我尋晚冇去玩喎，只係覺得天氣凍凍地，攬住張被同虎仔冬眠真係過癮，好warm呀﹗
呢排狂咬杯麵，真係好鐘意食杯麵，變左杯麵人

********
好在突然記得幫nano叉電啫，如果唔係咪帶唔到佢出街囉

不要暗號﹗

23 January 2007

一說事情告終了，一說事情永不告終，全視乎用甚麼心情和心態去面對
跟你四目交投，空氣凝固了，但你我會說話的眼睛，講得清一切說不清的話嗎？
何不讓這曖昧感覺埋在心裡，日後成為你我以眼色懷緬的一段往事，心領而神會，不需向別人解釋，算是大家放大家一條生路吧﹗
我期待下一個能跟我用眼神談心的他現身
記住，只要信物，不要暗號﹗

人總有一日會離開，只是患上絕症的人，有意識知道自己時日無多，生命的燭炬，隨著時分秒的流逝而灰飛煙滅
瀕死的人，怕被冷落，怕被遺忘但最後卻是白走這一趟…
站在不能自主的生命前，還未來得及恐懼，無奈的感覺如山洪暴發

********
有一樣野我係唔認同的，就係做d「為做而做」的野
有人厚顏無耻地話為某某我認為唔係理由的理由而做某件事，真係吹漲，而呢句說話出自你口中，真枉稱你先生，枉你做到今時今日
每逢禽流感都去雀仔街，ok，冇問題，因為唔去做唔知有冇特別野
而如果有特別野，有同以往唔同的野，嗰仔故仔咪出囉，但我想問，如果同上次或者上幾次都係一樣，咁都係新聞？點解唔索性拎番上次隻故仔出來碌？
即使經驗尚淺，落手落腳做的人諗唔到有咩新角度可以鑽探，但養尊處優，經驗豐富的你都諗唔到？
諗過第二個angle的誠意都冇，點叫人尊重你？

又例如做人民幣升值，奉旨問內地罐頭入口商有冇影響，但次次都話冇影響，第一次講係新聞，之後次次十年如一日，問左咪算囉，做咩要為佢浪費觀眾時間
仲有打風落雨，每一次都係上環海味街
學你囉，諗過第二個angle的誠意都冇，我都冇誠意諗過第二句說話批鬥你

如果想同我理論一番，或者想「糾正」你眼中認為我係錯的錯處，留言啦
我從來都係敢言，又唔會為別人的一句說話而令自己皮質醇偏高
今次講咁多，真係塞唔少錢入你袋﹗