我係佢

27 March 2007

哈哈，終於到手了﹗
雖則唔係趕住要，但唔使成日都心掛掛囉
really thx﹗
語帶雙關的說話，你明既﹗

你打來約我食飯喎，當然奉陪
唔知從邊日起變得咀刁，諗番可能係識左你之後
豬紅+通菜炒鮮魷+芝士大蝦伊麵+炒花甲+蠔仔粥+沙拉豬扒+炸大腸+滷水餓=八大餸
em…
想要蒜蓉蒸勝瓜，冇；想要炒聖子，都冇，咁咩係有架？
咁多樣野，最好味竟然係可樂
好一句時間過得真係快，的確不錯，唔覺唔覺我走左差唔多一個月喇
只係一張普通的100蚊紙，都可以玩咁耐，真係無聊，咁識打發時間，頒個phd俾你啦，唔怪得時間過得咁快啦
席間話題好似有好多，但諗落好似又唔係，仔細看來，都係圍繞住同一個主題，令你喋喋不休，全部都係由主題衍生出來的小分支

忽然變左你口中的「佢」，做咩叫得我咁曖昧？
同埋點解你咁鍾意「喂」我？
你明晚的和食宵夜萬歲，絕對絕對不能少左我﹗

行動目標：食宵夜
行動細節：食日本野
行動日期：聽晚
行動地點：待定
行動代號：擦餐勁，食窮你﹗
行動準備：放工第一時間飈返屋企眠一眠

頭先想同你講，你肥左喎…
你問的問題問到唔清唔楚，唔知點答你，你諗到點問再問過啦

忽然覺得工作有壓力，全因尋晚訓得唔好，腦袋不由自己，不停運轉，思索約邊個嘉賓，約嗰個嘉賓好唔好，喺腦裡面research一下呢個人做過d咩，講過d咩，適唔適合，結果訓醒得出一個結論：約嗰個律師，又真係約得成喎，而佢應該係咁多個可以選擇的人當中最適合的人選
呢種為工作而憂的感覺，自離開三色台後都冇試過
之前兩份工，唔係話冇挑戰，只係應該話遇到的僅僅係低級挑戰，beginner's level，輕鬆過關
而家真係時刻都覺得難關處處，尤其今日寫稿，聽佢的口吻，似乎唔達標，多麼教人失望…
落keyboard時嘗試運用我所認識的feature風格，但改不了daily news的手腕，左右不逢源，結果生左個怪胎出來
anyway，既然搵到有挑戰的工作，不要矇混過日﹗
我要努力﹗

原來我又係組裡面最細嗰個，真係開心
由細到大做慣大家姐，俾我做下細啦，不過唔好恰我喎

最鍾意聽到交響樂奏起，法語唱出激昂但莊嚴的歌詞——Die Meister, Die Besten, Les Grandes Equipes, The Champions
又鍾意聽到星球大戰的召喚
所以鍾意sms你，叫你打俾我

雖然凌晨時份講左，講多次唔會嫌噚既，生日快樂﹗
見到你，揮一手，那是一句hi，還是一句bye呢？
你玩穿鑿附會咁叻，俾你quote番句可以對號入座的bite咪大檸樂…

忽然覺得你同麥嘜都幾似，都係一隻傻豬，全因以下一段對話：
時間：晚上8點幾
地點：百佳

你：拎700蚊丫
店員：最多拎500蚊
你：咁拎1000蚊丫
我：(大笑﹗)

********
還債呀…
話說7 march嗰篇話「下次先講番頭先出去宵夜同差d流左的睇波活動的事發經過」，竟然冇左件事，唔好意思話說之前一晚打返去搵舊公司d friend，我吹雞叫宵夜，你話聽晚先喎，咁咪聽晚囉，嗰晚都幾凍，碌左去你樓下吹風，你地個個都衣衫單薄，跟住出左旺角，去左好耐都冇去過既5樓，唔知點解大家都好肚餓，樣樣野食都雙份咁濟，豬骨腸、餃子雞翼、飛碟etc，由於事隔多時，真係唔記得咁多
記得拎左d相俾你地睇囉，將張大相交左俾佢

兩點幾走啦，打俾佢喎，冇人搵到佢，以為佢甩底，3條友，忽然唔想咁樣3條友去睇波，又凍凍地喎，我同你都話返去攬住張被睇波仲正，攋低他臨跳上車他打來，又話搵到佢，但我又打唔俾佢 ，hold住左，但條街好凍，呢左入7仔，後來結果搵到佢喇
咁咪打番俾你囉，搵埋他去左旺角police station對面某間bar
成枱都支持巴塞，搞咩呀？
但好在我的利物浦都係掂呀，頂得住﹗

耿耿於懷

26 March 2007

邪﹗
頭先又打爛野，如果係一隻普通的破璃杯，我唔會咁樣講，總之就邪啦﹗打爛左既係藍色嗰隻triangel，點解？當日一見就鐘意呢隻「守護神」，如果相信的話就係，我唔敢講我信唔信，但我知道佢的身份，也想衪眷顧我第一眼就認定你同你有牽連，一見如故，一見鍾情點解要係你？點解兩隻triangel一齊被不小心的我碰倒，點解爛左的係你？暗示些甚麼？雖然打爛另一隻我都唔會覺得好過…呢件事令我耿耿於懷

同樣係喺上海帶返來，藍松石手厄，i really really like it﹗
上個再上個星期五去唱k，玩骰仔，好型咁凌空搖骰仔，骰盅著枱的一剎，有d野飛左出來，以為失手跌骰，但唔係呀，5粒骰都喺度，原來係哼爛左隻手厄，一分為幾，我都唔清楚了，只係執番部分碎片，隻厄都砌唔番
點解咁黑仔？
STOP IT!!!

如果你阻止我任性地一個人去旅行，triangel、手厄、銀包等，係咪就唔會得而復失…
而如果我一早打俾你，你會唔會請假都飛上來搵我？咁樣既話，成件事會唔會唔同d呢？

********
飯局，我形容為一個局，係因為有「唔想出席」的念頭，但又未至於覺得係應酬
佢地講嗰個涉及我的話題，我通常都支唔以對，我唔想俾佢地知道我的意願與感覺，忽然要收埋自己
對住佢地，我總覺得呢個唔係我自己
喺d咁既場合，收到d咁既電話，真係好煩厭﹗
大家都問我的新工作，你又唔係做呢行，況且我之前都同你講過啦，仲要唔只一次，講你又唔明，明你又唔記住，記住你又再問，問又唔留心聽，聽又唔用腦諗，諗你又諗錯隔離，想點呀？
係咪係都要搞到我皺眉頭…
心煩，唔想講咁多野，俾我靜下啦，可能見番你，倚在你身邊就會好d，但係…

苦戰

25 March 2007

放假，但都較左8點鐘起身，結果攋床，9點先起身，執番d眼耳口鼻，出門口已經係10點8，初初諗住出灣仔，但半路中途有車，咪跳車囉，去左西九龍
終放唔使日日拎passport出街，做畸呢獸，兩星期後的今天，先得到一張行街紙
由等開始，就玩手機上的一個小遊戲——寶石，即係將兩粒相鄰的寶石調位，令到有三粒或以上相連的寶石消失
玩到搞掂所有程序都未game over，行番去商場，本來諗住搵d野食，但小遊戲吸引住我，企埋一邊繼續玩，都唔知玩左幾耐，只係知分數破紀錄，有二萬幾分，係呀，每串到三粒寶石都係得廿分，咁你估下我玩左幾耐啦…
電話響起，當然聽啦，點知一個無聊推銷電話，搞到我舖game冇左，連record都冇save到，激死人呀﹗榜上最高分都係得一萬一千分，而家足足多左一倍架…
後來喺先施行左個圈，見到d哥倫比亞哥踢屎六折減價，咪call你囉，但原來你買左lu
本來話一齊去cwb碌下，但後來因為你塞車流左

咁咪搵第二個同我去街街囉，初初以為環球嘉年華開埋聽日執笠，咪諗住去玩囉多次，但去到見到poster先知延長到4月23號，喺天橋見到好多人，既然係咁，下次啦
去ko晒我d target：1)英格蘭07-09主場波衫，並熨上英軍精神領袖，與我同日生日的6號仔terry，我打趣道要買埋英格蘭的隊長臂章；2)porter銀包，係對porter情有獨鍾﹗我唔見左嗰個款橫睇掂睇都係最靚，但唔想買番個一樣的勾起傷心事，揀另一款又冇白色，結果揀左有白色嗰款，我應該話對白色porter情有獨鍾。哎，總之就邪啦，轉兩份新工，分別都唔見左新買的電話同銀包；3)去無印用晒d cash dollars買零食，因為d積分今個月底到期

一個sms換來一個來電…
「我有d野仲喺你度喎」
「丫，係呀，但呢排真係好忙，你都知呢排咩日子…」
哈哈，好耐冇聽過你把聲
anyway，加油﹗

俾讀者投訴我太「早」update，咁我要解說一下呢個blog點樣運作
如果我喺屋企，冇咩特別野我都會開腦，開埋個blog，有時即刻寫一段，有時一邊做其他野，有咩特別感覺 / 靈感，就會寫兩句，到臨訓前先upload，睇一次有冇寫錯字同有冇遺漏就訓，所以個blog update的時間，通常都係我去訓的時間

英格蘭苦戰中…
哎，0-0，真令人失望，但我仍然會撐你﹗

********
頭先聽到一個故事，我覺得可以留番呢條橋俾你備用

A：有次無意中有個相士來贈我兩句
B：咁佢講d咩呢？
A：佢話我第日會創業，會賺到d錢，但唔係賺大錢囉
B：仲有呢？
A：佢話我自細溫室長大
B：咁行架，仲有呢？
A：你真係想知？
B：又係你講先既，講就講啦
A：佢話我會28歲後先結婚，會對事業有幫助
B：咁你信唔信？
A：仲有…
B：仲有咩？吞吞吐吐…
A：佢話我結婚的對象，唔係而家的男朋友
B：咁我甩難囉﹗
A：係呀，既然你同佢都咁講，分手啦﹗

magic 16

24 March 2007

熟悉的情節，也於事無補…
「為甚麼要等十六年才可以相聚？」
大顆大顆的淚珠兒應聲滾下來

哎，16年，人生有幾多個16年？如果係我，你會唔會等我16年？
你答唔會，我唔會怪你；你答會，我反而會話你痴線
因為如果係你，即使16個月，我也不肯定我會不會等

舊的電視劇，本應一早就ko，但貪新忘舊，待到今時今日，頭先放工歸來連煲6集，加埋前兩晚的努力，故事終於講到第38回，郭襄被金輪帶到軍營…

********
自家下廚，晚餐=香草鮮茄天使麵，好味﹗
呢個style你未試過，係我新研制的簡約麵食，係咪想試下我既手勢呢？
哈哈，之前的大膽嘗試，如香蒜茄子肉碎炒意粉、雪菜肉絲炒恴粉、忌廉粟米湯燴闊麵，波菜鮮茄咸牛肉千層麵等…
都係你夠膽色，你試過啦﹗
仲生牛牛，即係ok啦﹗

gerrard展示MBE勳章，威水﹗

偶遇的故事今天繼續發生…
你竟然喺嗰度出現，真係意料之外和始料不及

她來電，閒談
他msn，熱烈討論
我上網，招呼各位

相逢

23 March 2007

繼續偶遇的偶遇，一切都充滿傳奇
1. 因為一個突然而來的消息，所以遲左d走
2. 唔知點解唔想撞到你，即使未必會撞到，但為左避開你，唔行嗰條路，唔搭嗰架車
3. 突然記起要拎番嗰件拎左去洗衫舖乾洗的刷白羽絨
4. 你忽發奇想去嗰度食飯
5. 唔知點解俾我遙遠望到你的身影，因為八掛，想睇清楚係咪你
因為呢五個條件同時出現，先至造就這次相逢，即興來個晚飯聚會，咁偶然，咁特別的機遇，將我從苦思、彼累中揪出來，在污煙瘴氣中，如沐春風，又點會如你猜想或打趣所言，對呢個陣容失望呢…
這是真心話，遇到你們任何一個，我都一樣咁開心，剛才的確有所不同，只因有四倍開心

你地又提起他，睇怕呢樣係我們之間的一件樂事，我也慣了，回應有：選擇一)唔出聲，靜默；選擇二)笑，例如微笑、傻笑、大笑、苦笑、淫笑、奸笑etc；選擇三)自嘲，即係投其所好；選擇四)發up風，瞎扯到無關的話題；選擇五)將其他人拉落水；選擇六)顯得尷尬 / 無奈；選擇七)扮很尷尬 / 無奈；選擇八)去厠所、去買雜誌、去press錢，總之離開現場；選擇九)黑面；選擇十)發爛渣

我託人問咋：你地有冇見過面？
我都係託人問：有冇online同你msn？
有冇打過俾你？
咁有冇sms？
你同佢有冇去過旅行？
一連串的問題，一一以「無」去回應，但你地似乎唔係好相信…
我問邊個咁八，你話保謢消息來源，俾你cue番我個bite來用：呢行係咁架嘛，呢行係咁奇怪…
引來大家咧嘴露齒

anyway，短短一小時的飯聚，很enjoy
原本因突然而來被更改的稿題與時間表誘發苦思，又緣於未適應新工作環境而感到無比彼累，目無表情的我，為你而笑，暫時忘憂，你道行深厚，謝謝你﹗
下次再落來光輝圍食飯，飛個輪俾我啦﹗

********
話說頭先食飯，遇到畸呢野
間小廚好多人，要坐門口擺喺街邊的枱，叫左野，好地地，仲讚d聖子好肥好味，我揀架喎，俾你串：你揀咩都好架啦
諗一諗，又冇錯，唔係正野我都唔揀啦，嘻嘻
跟住再來一碟京都骨，忽然一名軍裝三柴警員大搖大擺去到門口，問：邊個係負責人，擾攘一輪，又話要影相云云，呢d唔係我地關心的，我地只關心d餸幾時來，等了又等，餸未來，差佬差婆多左好多件，但唔食得架，後來再來多兩碟野，真係等唔切，所以撇了

外傳
知道你好鐘意喺嗰間舖頭度浦一陣先走，行嗰條路會經過嗰度，而行嗰條路，必然的結果係搭嗰架車
行嗰條路真係會撞到好多人架，但總係未撞過你

偶遇

22 March 2007

既然能說作偶遇，每一次也是獨一無二，說不定一生只有一次機會，錯過了，握不住，能怨誰？能怪誰？
每天碰上算不清的他，緣起了，令我倆擦肩而過，緣滅了，使我倆相見不相識

剛才碰到你，說了一聲你好，僅此而已，也是一件賞心樂事
用甚麼去解釋你我能同一時間出現在這個時空呢？

特意走那條路，沒有遇上刻意想見到的他，也許…
不過卻讓我碰上你，閒聊了幾句，說一聲再見
又用甚麼去解釋你我同時回頭看對方一眼呢？
你說：為甚麼你不喊我一句哥哥？
謝謝你第一個請纓，當這個任性妄為的妹妹的哥哥

今天巧恰地碰到很多人，在車上看見你待在冷冰冰的街，抽煙；在街燈映照的彎路上與你迎頭碰上，閒談
一切都很有趣﹗

哥哥vs過客

21 March 2007

未能掌握的事情，容易教人灰心，當未嚐到成功的甜味，挫敗感迅速佔據心靈，躲懶和逃避也忽爾攻克、支配了思維的國度，我要積極，我要出奇制勝﹗

同你high tea，冇留意傾左幾耐，好enjoy
世事玄妙，同樣係人馬座的你，當日與你一拍即合，十分投契，士別三日，也不改你我的狂妄與不覊，言談中找到我的影子，未能解釋原因，姑且算是星座的牽連吧
雖然二十來歲，但也時常發白日夢，總想身邊所有同輩的男孩子做我的哥哥，夾著人馬座的頭銜，恃寵生驕
如果有一個像你那樣，又似我這樣，有點任性，但教人驚喜的哥哥就好了
直覺教我，哥哥總是對妹妹百般呵護，就像你喜歡的超人一樣，讓摟著玩具熊的小妹妹牽著衣角，為她打怪獸，展示強壯的擘彎：「超人哥哥在你身邊，甚麼也不用怕﹗」

近日身陷歎氣與苦思…
我明白有d人在我生命中，只是一名過客，曾經相識，他記得我的名字，翻查記憶，曾經有這個人存在，能將名字和容貌正確地配對，已是莫大的緣份
茫茫人海，為何讓我碰上你，甚至與你扯上關係，或然率怎樣去計算？科學又如何一一說明？
其他人如何如何，我並不介意，甚至不在乎，但我真的不希望你只充當一名過客，我曾經踏出第一步，是否無形之手冥冥中安排，非要你我經歷更多？
大家都好像等待甚麼，究竟這是我一廂情願的想法，還是彼此都如此怯懦？
你我不過如此的話，是多麼教人失望的一場偶遇

恭喜你脫苦海，休息是必須的，但不要讓安樂自在磨滅你僅有的心智和意志﹗

我要溝到你

20 March 2007

頭先發左個夢，急不及待要記低，因為怕會忘記
夢中我之前一晚飲醉酒，他打俾我，卻言又止，但電話收得唔清楚，掛了線
佢同我去街，初初都冇野，突然佢話：「xxx，我要溝到你，我要x你」
我聽到當堂呆左啦，因為佢跟本唔識xxx，佢竟然可以講到xxx全名，而且無端端做咩講粗口？
我問：乜你識xxx？
佢：你尋晚自己發癲自己講出來，xxx係邊個來架
我嗰刻當然好(火羅)啦，又極之唔好意思，哎，令佢失望，真係十分歉意…

唔知點解會去到九龍塘，已經係8點半，但我返9點呀，有兩份野未做，隔離街有一座別墅突然著火，好多人走出街
我就食完宵夜趕住返屋企，但截唔到的士呀，真係好多人
後來某人提議行後兩條街截啦，但經過左一d好奇怪的地方，屋同屋之間有水道，d水好污糟，仲有好多死左的紅衫魚浮喺水平(點解係紅衫魚呢？明明係深海咸水魚…)
又去到另一間屋，d木霉晒，發晒mo，其中一個她話呢d係發霉木糠，喺轉角嗰間舖有得食，轉頭就見到一個牌，上面寫住食物發酵中，但我地用對腳踩上去囉，同埋咁核突，一陣味的野，有人食架咩？
後來又唔知點樣，返到屋企了，我已經冇在意時間，沖涼，又諗起xxx的事件

夢，忽然間中斷了，下文就讓我自行幻想吧﹗

係起左身，諗住睇足總盃重賽，但好眼訓，結果訓下睇下，都係冇乜點睇過，但好在車仔作客都順利過關

優越感

20 March 2007

突登行嗰條路，突登去搭嗰架車，只為碰碰運氣，唔知會唔會撞到你機會係眇茫，但期待的一刻，患得患失也很令人回味、令人神往，係咪犯賤呢…

呢排有好多套戲想睇，但今個weekend都好忙，應該都去唔到睇其中一套係打著「真人真事改編」的旗號，點中死穴，非看不可

25號環球嘉年華就執笠，唔知會唔會去玩多次呢

頭先打去搵佢，佢話佢不在，我叫佢叫佢打俾我，佢打俾我，但又解答唔到我的問題，佢叫左佢聽，同佢講起笑來，而家大家的心情都輕了，一切都唔同晒

第三日返工，全日都喺office，打電話搵io，「cable xxx」，我咁樣介紹自己突然而來的優越感，以前都唔會因為喺某大台而有相同感覺，唔通我真係變左？

為甚麼？

19 March 2007

今日放假，先至真真正正執番上海歸來的行李，收埋個喼
頭先填張claim form，上報claim港幣4675，人民幣2739，希望冇咩阻濟啦
回鄉證要拎番身份證先可以補領，真係煩，算啦，橫掂頭先落過去荃灣睇，都冇籌，網上預約左下星期一lunch先啦
多謝咁多位咁多日以來的問候，多謝，有心了﹗呢個星期以來，聽得最多的一句說話，係「你一個人小心d」
有一樣野之前漏左講，就係我逢親去旅行，都會做d本末倒置既野，今次都唔例外，為左食兩個大洋一兩4隻的蔡記生煎包，由酒店搭廿蚊的士過去，嘻嘻，但真係冇蝕到嗰廿蚊的士錢，真係好好食，可惜冇影到相俾你睇囉

總結：食小籠包、一般的上海菜式，喺香港搵間上海舖，普通如翡翠拉麵小籠包、王家沙都好食過上海d老店，係唯一嗰兩檔生煎包有d驚喜，令人回味，掃街以串燒居多，但食多兩次就悶，想要一個美食旅行，就近既都係揀日本或泰國啦
另外，其實上海都唔係一個真係咁安全的城市，大陸始終都係大陸

而d手尾逐少逐少跟進啦，聽朝返工前去拎番張提款咭先，個人八達通再諗諗申唔申請先，星期6去灣仔拎身份證啦，唔，定係去長沙灣好呢，近d，但冇街行喎，仲有時間考慮下，而拎番張臨時身份證，預約左下星期一lunch去拎回鄉證，放工去交claim form啦

尋日同你傾左兩咀，你話特首論壇當日撞到他和她，她黑面，真係好搞笑﹗咁大個人，為d咁小既事黑面，真係好小器，好幼稚
你話冇其他人同佢講野，冇人理佢，又係好搞笑，但咁低b既人，冇人理佢又有咩咁出奇呢，d人唔同佢一般見識
約左你聽日食飯，又一定會雞啄唔斷

頭先好畸呢，7點幾啦，食緊野，警鐘響喎，經過偉景樓爆炸一事，真係怯架，而我又咁怕死…
換左套可以落街的衫，執左個袋，出到門口見到嗰d未見過的鄰居，大家都問咩事，鬼知咩，有個阿叔問我執晒野，諗住走呀，怕呀？係呀，我真係怕，行樓梯落樓，十幾層架，轉到頭暈
一路行每一層的警鐘都響，而落到樓下已集齊好多人，有人估係兩個好曳的細路玩野，定係警鐘自己發癲，定係真係有小火，又為報唔報警而爭拗，哎，香港人呀…
喺樓下撞到house mate，觀摩左一陣，消防車都來左，4架咁多，咁我諗佢衡量過如果唔係誤鳴或虛報，疏散同救援真係要咁多人手
見到cable tv的車經過，好在唔係新聞車啫，好在都冇行家﹗
同佢去食野啦，好眼訓，全程都冇出聲，感覺怪怪…
諗番起早陣子同佢地食飯，以往是有講有笑，笑到停唔到，食唔落，總覺得食飯時間太短，但有幾回近似的陣容，全場一言不發，靜默，真係令人感到好不自在，究竟何日開始，大家的關係惡化至此呢？

今日又有奇怪的感覺，寂寞、疏遠的情緒湧現，為甚麼？

近日下意識不自覺情不自禁地哼起這首歌

想不起，怎麼會病到不分好歹
連受苦都甜美？

由這一分鐘開始計起春風秋雨間
限我對你以半年時間慢慢的心淡

春天分手，秋天會習慣苦沖開了便淡

潛意識裡的小精靈在暗示甚麼呢？

《記上海奇遇》——日誌

18 March 2007

第一日出發，班機8點幾飛，約左個agent6點幾喺機場拎機票，搞到場歐聯睇唔晒就走左出去，結果阿仙奴出局…
喺機場遊雲，喺麥記食左個早餐先醒左d，入左禁區碌，喺disney買虎仔、書店睇下書，但原來gate 70，好遠架
去到閘口，冇人，當堂呆左，睇睇鐘，未夠鐘呀
再拎番張broading pass睇，係8點20分，死火﹗
唔知點解會將20分即係搭4，記左40分搭8，滴汗…
一係飛，一係唔飛，結果補錢，搭11點幾的機，過到去都三點左右
搵磁浮搭，搵到指示牌，搵唔到個站，問d姐姐，佢地d英文真係好劣…
跟住搭的士去酒店
好過癮架，磁浮嗰度個的士站，有個唔知係secur定係警察，我俾個地址佢，佢講俾司機聽，佢問我邊個國家來，我話香港，佢話香港唔係一個國家，我話所以頭先唔知點答你，佢話我普通話講得好，真係…我講得最好咪呢幾句囉

返酒店擺低d野，去買電話咭，哎，講佢地唔明，文化唔同，同佢地溝通唔到，拎張sim咭出來話要買這個，但d便利店冇得賣，我住的酒店喺淮海路，係d中心的商業購物區，相對係香港的銅鑼灣，大大間靚靚的舖頭有好多，但搵間士多買電話咭就唔多覺眼，一路搵一路行街睇野，其實睇野多d，嘻嘻
後來記得搭的士去酒店時經過一間唔知係移動定係聯通的物體，咪行過去搵囉，之後又喺附近掃街，羊肉串、新疆大餅、燒粟米、燒雞翼，全部都好好味
後來唔知點樣諗諗下，係書仔介紹過嗰條食街，咁樣唔覺唔覺ko左一個景點
之後繼續去行淮海路，好似冇盡頭，太多野了，足足行左一個地鐵站，好遠架﹗
係舖頭都走入去睇下，但總結咁多日喺上海shopping的經驗的確唔討好，一入去間舖頭，就有個「些士」貼身監視住你，一轉身就撞到佢嗰隻咁貼身，令人覺得好唔舒服，好唔想買野
太累，但等左好耐都截唔到的士，結果搭地鐵返歸，落車時見到d人衝入地鐵站，後來睇番，原來差唔多尾班車，只係十點幾咋…
好累，因為之前嗰晚冇訓，第二日又約左人一齊去周莊，要早起
第一晚喺上海，就係咁過

第二日去周莊，約左在上海體育館等，因為他漏左銀包，我自己周圍碌，初初諗住行入體育館八下，行到去奧運專賣店，太多野賣了，但費事拎住成日，冇買到，唔覺唔覺又行到旅遊集散中心，就係我要去的地方
搭車，兩個鐘的車程都雞啄唔斷，原來有導遊架，講歷史咁講，唔係聽唔明，而係冇興趣聽，後來唔知點樣，行行下同個導遊失散左，仲好啦，自己行
呢度都幾靚，但weekdays都比我想像中多人，破壞晒古鎮的氣氛
初初行得好冇規律，以為好細，但後來行下行下先發現好多地方冇去，結果行色匆匆，初初諗住有時間坐下船仔，但都冇時間，就連飛仔上面的景點都去唔晒
但有一樣bonus野，就係d景點有印仔cup，好好玩，我cup落我本旅遊書仔度
夜晚他約左他的同學一齊食飯，但塞車，又截唔到的士，他勁不知所措，真係搞笑﹗
後來搭地鐵去轉的士，去既係有成百年歷史的老店老正興，但個司機唔知喺邊，我記得書仔有，拎俾佢睇
他一心一意帶我食好野，但係呢，平心而論，呢d質素香港好多食上海野的餐廳好過佢，只係食佢歷史悠久，食名店
但有一樣野好畸呢，我地埋左單吹多幾句水，但個大廳的另一邊下熄燈喎，咩地方來架？
食完他陪我行返去酒店，行左兩日，太累了，同埋唔夠訓，本來諗住去新天地飲野都係冇去了
但anyway，thx﹗

day 3同另一個佢去左豫園，買左兩隻triangel，其實triangel係來路野，唔知你對衝上雲霄有冇印象呢，胡杏兒執左陳慧珊嗰隻公仔呢，中文名譯左個名叫「吉神」，真係娘…
但又譯左一個名叫愛之神，緣份天使，後者好似比較好少少
有一段咁樣的介紹：

這隻手工玩偶——愛之神，是出自意大利著名的典故。相傳在公元前二世紀的古羅馬，有一位善良女孩，和她的男朋友相親相愛，後來她的男朋友被一個青蛙魔女施以魔溾，勾引了過去，漸漸地冷落了她。她整天坐在窗前，哭著，哭著，最後感動了天上的象神，令仙鶴叼來一隻愛之神，放在她的床前，青蛙魔女露出原形，逃走了，她的男朋友又重新回到她的身邊，他們又相親相愛了﹗
現在，意大利的女孩喜歡將這隻愛之神的玩偶放在自己的房間裡，讓這隻愛之神守護著自己。

買左兩隻，但買之前冇留意到呢篇介紹，如果唔係買一隻就夠啦﹗
兩隻色都好靚，難以取捨，所以兩隻都買晒
事後睇過介紹，呢d所謂吉祥物，好似買珠寶咁，講緣份，第一眼鐘意邊隻，就係邊隻

喺南翔最高最貴嗰層食小籠包，原來有最低消費60蚊的規定，傻啦，點會食唔到呢
跟住去左吳江街，好似旺角女人街之類，好多小販，買左逃的season 1 & 2，至衰飽啦，如果唔係掃街好正﹗
但去呢度都係為左食小楊生煎包，一人一兩，一兩有四粒，係好好食，但真係好飽﹗
跟住慢慢行去南京路嗰邊，天氣又越來越凍，我話返酒店拎番件羽絨，咪搭地鐵囉，之後發生的事，講過了，就係唔見左銀包、去差館…

去到房門口，開個袋拎key card，個心突然離一離，「我唔見左個銀包」
第一時間打去card centre報失，打返去保險問，我冇回鄉咭，真大鑊，心知不妙…

離開公安局，再繼續番原本的行程，去南京路，的士出入，安全d﹗
點知碌到落外灘，望左兩眼，背面一列舊建築熄燈，有冇搞錯？
因為頻撲，抵達南京路時只係食左kfc，但唔好食，味道怪怪地，所以返酒店樓下有條街，好多串燒檔，掃街罷
夜晚有曼聯足總盃，睇波

星期日，原本返歸的日子，因為之前一晚保險個agent打來，話有個好消息，我可以拎住passwort 出境，所以大安旨意，去左倉浪亭食麵，但冇驚喜，好普通啫，跟住去番上海體育館的奧運專賣店買奧運t shirt，再返酒店拎行李
原本4點機，1點去到機場，lur又好，溝通又好，都要預d時間
結果說服到airline出張broading pass俾我，但immi唔俾我過，講左好耐，咩理由都用晒，唔得就係唔得
星期日下晝，都去出入境管理局搏下，睇下佢有冇開門，但冇，拖住d行李去佢的酒店，夜晚食小肥羊，好味，因為平過香港好多，狂點，而d野又可以叫半份，勁點，食到又捧住個肚
因為佢係上來工幹，所以有電腦，我就開始喺呢個blog講我的奇遇，晚上睇車仔足總盃，3-3擇日重賽，咁都追得番，真經典

之後extra的行程，都講過了，唔重覆喇
不過我去旅行好搞笑，一定揀當地的airline，儲airline的啤牌，我自己都有儲啤牌，今次買左兩副
去到每個城市，一定搵adidas留影，睇下有冇d香港冇的特別版，但今次冇收鑊
另外必去便利店，睇下有冇d得意特別的酒，買個樽啫，今次買左兩個，同埋睇下有冇小熊維尼造形的飲品，今次買左匯源出的果汁，只因個樽的招紙係pooh and tigger
仲有仲有唔少得的係掃supermarket，其他人覺得我好奇怪架，去埋d咁的地方
我係百力滋的fans，勁鐘意食百力滋，所以去到每個地方都掃佢的百力滋，仲有買當地出的winnie the pooh & friends的紙巾，係呀，你冇睇錯，我冇打錯，係買紙巾，我已經儲左好多架喇，同我好friend好friend的friend，一定會搵pooh pooh紙巾、百力滋、電影poster / 宣傳單張俾我做手信，已經係一種默契
除此之外，唔少得搵足球雜誌，今次買左5本

與我常在

17 March 2007

我話：好耐冇見喇你話：唔係呀，你張相喺度，日日都見，你都冇走過，你的精神與我地常在好鐘意你呢句說話，really thx

尋日狀態真係唔好，而且自上海返來，氣管敏感，會突然間咳得好犀利，停唔到，飇晒眼淚，總之就好誇張啦喺k度俾人問做咩咁靜局，鬼咩，好累，都未recover，好眼訓，連續兩日都係訓得三四個鐘
結果我都係飲得唔多，但都斜左
最多人時有16丁人，聽聞佢地之前一晚打邊爐有17丁友，返來喇﹗

今朝突登彈起身去攞身份證，但做左(火羅)野囉，去左cwb ehouse的智能身份證換領中心，但呢度係冇得補領身份證，呆左…最近嗰個喺灣仔，但星期六閂11點半，冇啦，過唔切去勁眼訓，上左ehouse間physical沖涼，諗住有d沙灘椅，焗個桑拿可以攤下，但原來呢間分店冇沙灘椅，mission failed
去左東瀛遊拎張保險claim form，跟住碌左上sogo，諗住睇下有冇想要的大富翁，冇呀，哎…
碌下碌下諗起好耐冇食過日本野，諗起你，sms你囉，原來你返工，不過我都估到架喇，咪諗住約你放工食囉，乜咁啱呀，你話你dad bd
祝你爹爹生日快樂啦﹗
咁咪搵第二個囉，第二個喺我腦裡飄出來的係你，又咁啱呀，你又想食日本野又諗起我又咁啱都喺cwb碌緊，真係整定要同你食啦

行動目標：食日本野
行動地點：壽司廣
行動代號：食晒佢間舖d野

必叫大toro，我地呢d toro迷，雙份啦﹗
又俾你笑喇，次次食牡丹蝦，你都回億起我曾因為啜佢個頭時俾佢d刺篤到個咀
除左自行叫呢兩樣野，全程俾bar枱師傅發板，唔睇餐牌唔睇價錢
但老實講啦，上得來都唔係諗住食平野啦…
其實呢，佢講d魚名俾我聽，ok，左耳入右耳出，我只係識分佢白d、紅d、透明d，軟身d、硬身d、醃過的…喺呢d地方，千祈千祈好拎相機或者電話相機出來影相咁老土…
頭先上到去只係等左一陣，可能晏啦，尾圍lu
埋單你睇到個價錢時碌大對眼，我伸脷，lunch食千幾蚊，過份﹗
但知唔知咩叫幸福呀？就係美食當前，好友相伴﹗千金散盡，唔計得咁多喇

夜晚返左屋企食飯，只係等開飯嗰一陣間都訓著左，突然聽到英超主題音樂成個彈起
9點幾返歸前曼聯已經3-0，真係過份，結果係4-1，ronney真係勁，真係英格蘭之光
返到去睇車仔，2-0，做得好﹗後來係3-0完場

頭先喺sogo睇到，英格蘭件新衫係有童裝的，點會冇呢？個市場咁大…
我諗住呢件會熨字，未有rooney同terry，二選一，但仲未揀到，仲有，長袖定短袖好呢？

《記上海奇遇》——讓相片告訴你

16 March 2007

http://www.ec-photo.com/tanny_shanghai/

第日生個仔叫林柏特囉

16 March 2007

經過那個地方，我跟你相識的地方，正想會不會有緣地碰到你，有一個身影，以為就是你，但原來不是
你經過那個地方，會不會探頭看看，明知不會見到我，也想賭一賭運氣嗎？

大我一年的她即將結婚了，跟我同年的她也打算結婚了
這些消息，對我來講有甚麼意義呢？是否告訴我，我也該找個人結婚？
我沒有妒忌的感覺，也沒有羨慕的目光，只有奇怪的想法：二十出頭，那麼快嫁人，看清了花花世界沒有？不打算選一個更好的嗎？
看到她的blog，好sweet，她選定了，恭喜晒﹗
跟她討論過，她說她也許想泊 / 霸個好碼頭，雖然我對結婚有所保留，但咁樣諗太勢利，太陰謀論了，不敢苟同

男朋友 / 老公不是提款機，所以唔使好有錢，我好怕嗰d有錢仔的阿媽，以為你貪佢屋企有錢，認為你係嗰d貪錢的女仔
如果我係，我無話可說，反正你係講事實，但問題我唔係丫嘛，俾人屈好唔抵
我講過，我唔會因為佢有冇錢而鐘意佢，而係睇下有冇feel，雖則feel唔可以當飯食，但我地呢輩，呢個圈子，大家都大學畢業，有份正常的工，應付到生活，有點閒錢，一年去一兩次旅行，唔一定要有屋仔，因為周圍租樓租屋周圍住都幾開心，不過要有架車仔囉，平日有人管接管送，忽發奇想時又可以去兜兜風
男朋友 / 老公也不是玩偶，亦不是寵物，不能呼之則來，揮之則去，有時玩下猜心遊戲，安排一點驚喜、驚險，也是樂趣，所以忽爾熱情忽爾冷淡，令新鮮感與好奇心歷久常在

結婚同男朋友的話題傾了良久，睇到lampard的入球，雖然係十二碼，但都尖叫起來
你打趣道：第日生個仔叫林柏特囉

《記上海奇遇》——句號後還有下文

15 March 2007

在六千五百多米的上空，還有約二十分鐘就會降落，為上海冒險旅程劃上句號
沒有帶手錶，不在意時間，只知道越來越近屋企，係，我屋企喺香港
今天中午為吃甚麼而煩惱，如果在屋企，一定不會出現這個情況，反而憂慮太多選擇，無從入手
一個星期了，開始感到思鄉，港龍客機上講廣東話的人，雖然同途而陌生，但很親切
飛機餐是黑椒牛肉蘿蔔絲沙拉，選配咸蛋蒸肉餅配白飯
雖然上海也有港式食品，但還是欠了些甚麼似的
對了，就是看慣了香港人的咀臉和口吻，抄襲了食物的味道，但握不住食物的神髓和服務態度
老實說，飛機餐的味道不敢恭維，但因為是由一位香港的小妮子奉上，不計較了
機艙的光轉暗，即將要降落
不時向窗外看，看潻黑以外，何時看到屬於屋企的光苗
看見了，看見了，遠方的燈光，暗暗的，為數不多，不，越來越多了
機身在桄動，前方有個娃娃哭了
不知不覺間，著陸了，字體也抖了
各位，我返到屋企了

********
機上短短寫了百餘字，但落機後又係另一個故事
回歸了現實與實際，掉了證件，第一件事經過香港入境處，我遞上passport，被嚴詞質問：你的身份證呢？
我：在上海唔見左
他打量我，不只一次了，即使是拿著身份證，也是樣被人上下打量，因為帶眼鏡同唔帶眼鏡、上鏡同唔上鏡，就係兩個樣，所以我盡量用e-道
他：身份證號碼幾多號？
過關了，身上只有廿幾蚊，夠返屋企既，好在都有d cash擺左喺屋企啫…
但多得佢放心將提款咭交給我應急，作為香港的城市人，如果你早幾日問我，有咩係必備，我未必答到你，但我在機場的7仔，第一時間係買番張電話咭，跟住就係去機鐵站買八達通，咁你知啦，香港人唔可以冇電話同八達通
返到去放低d野，un-pack左部分野，簡單執左d污糟衫出來，聽朝拎去洗，又執左d手信，聽日拎俾你，跟住check左警署的電話，問清楚使唔使報失，哎，算啦，都係碌左落警署，報失左銀包裡一系列的物品，跟住去麥記食左個包，返歸，已經係差唔多一點
故事還會發展下去，因為extra旅程和non-extra的行程，仲有補領證件、信用咭、claim保險等瑣碎事

剛才為msn改左個nick，大家對我在上海的遭遇有興趣的話，繼續留意blog的連載

《記上海奇遇》——自在的筆記

14 March 2007

遺我證件之事已經告一段落，肯定明天下午可取回回鄉證返屋企了
我的屋企在香港﹗

今天沒有約束，留在上海，已經是第六天了，突然而來多了三天旅程，必去的景點已經趕了過去
老實說這樣的旅程違背了我的原意，但沒辦法，繁華的大城市，跟香港一樣急速的氣氛，一直不能跟城市分開的我，不由自主地跟著步伐走去，回想起來第二天的周莊遊，也是行色匆匆，真難為了這個中國第一水鄉
因為現在留下來的日子是bonus的，所以剛才毫無顧忌睡到十二點半，簡單地梳洗一下，翻翻旅遊書的介紹，但全都是熱鬧繁華的購物區，或者是我沒有興趣的中共歷史，最後因為想去一間賣衣服的店子，跳到計程車上，指著「田子坊」，我要到這裡
下車了，的確眼前一亮，就像卡通片的主角，頭頂有一枚亮著的燈泡，這就是我想要的旅程
拍拍牌坊，聽到一名操流利英語的年輕女子，她也許是內地的高材生，又或者是香港到上海的留學生，又可能是由香港來玩玩，跟我一樣的小妮子，她替我在牌坊跟前拍了一張照片
但原來相機的電池差不多耗盡了…
往小巷裡走進去，周圍都是藝術、有風格的氣息
上車時記得還憂慮午餐在哪兒解決，現在，一切都忘了﹗
走到一間叫「公社」的茶座，選了向陽的坐位，背著走進來的小路口，點了有parmaham 的三文治，一壺用不锈鋼茶壺盛載的茉莉茶，這樣的環境，食物和飲品也不再重要了，然而茶香和三文治的味道，教我更歡喜這地方
這兒外國人比本地人多，聽英語比國語多，menu也是英文的，很好﹗
可能我有點土，要求店員為我拍拍照，但這樣的地方，的確要留個記錄，讓你看看
忽發奇想，拿出本子記下現在的感覺，很希望有一天可以無牽無掛，到處周遊列國，閑適地坐下來，在異處國度裡找創作靈感
午後陽光很舒服，不刺眼，不锈鋼枱子椅子茶壺發出令人看到希望、看到快樂的光茫
三文治吃了一半，可能已經涼了，但沒有關係；氣溫微冷，因為我仍穿著刷白的羽絨外套，感覺是剛剛好
偶爾微風吹來，輕輕碰上的的臉龐，髮絲輕輕起舞，我從像鏡子一樣的茶壺看著執筆托著腮子的我，前方傳來一段英語對話，我閉上耳朵，享受這一刻，小飛蟲和螞蟻也想來沾半點自在感覺，停在我衣袖上，停在我腿上
這刻的無憂無慮，不用筆記，也不會忘記

外傳
有人說茶壺為一件藝術品，今天我看到一件很美的藝術品
一個不锈鋼的茶壺，外邊是反光的，像一面鏡子，看到distorted了的小路、背後那兩位說英語的有緣人、木製沒有靠背的長凳，、白色茶杯和碟子，因為角度問題，看不到杯子上的印字，還有在茶壺蓋上的樹梢，葉子分明可見，旁邊是一家店子的招牌，英文字母全部倒轉了，有他和她進進出出，令壺子上的景象變得流動和有生氣；白雲由一端飄到另一端，最光那一點就是反映到小世界裡的太陽，掉到店子頭上
很美很美
它的主人是否在意這一點呢？
是不是只有我才欣賞這壺子呢？

p.s.
沒有記掛住時光流逝，沒有記掛住你，不知在這裡待了多久
也沒關係﹗﹗

《記上海奇遇》——由精神透支變成雙腳疲累

13 March 2007

今朝去左浦東新區民生路1500號出入境管理局，地下，即係佢地的一樓，詢問處好似大帝的民警阿嬸話入口的左手邊有好多form，其中一種叫「港澳居民申請補辦登記表」，填form啦，又唔難填的，遲d upload上來俾大家望下，影快相，30蚊/6張，影印報案回執、passport的個人資料頁，每張兩蚊
初初傻仔守規舉地攞飛仔等，不過我係拎form前已拎左飛仔，搞晒呢d程序，等左十分鐘左右都到
但counter個姐姐問21號取證得唔得，我連忙答「不行不行」，佢指示我去counter no. 17處長接待counter，呢個高級d，副處長唔記得叫乜水，佢話星期4俾番張證我，我話唔得，一定要盡快，要今日走，佢初初都堅持，後來我話我係記者，有很趕急的事要返香港，星期四是特首論壇，佢諗左一陣，話星期三晏晝4點後可以取證
我梗係問仲可唔可以再早啦，既然佢都可以咁樣讓一步，但lur左好耐，動之以情，說之以理，但都係冇用，唯有係星期三返啦
所以touch wood要做證，唔使去排隊，仲有喺上海呢d咁遠的地方，咪聽埋保險公司同入境處d人講，搭overnight火車落深圳，再去中旅社等兩個鐘做證
搭落香港要25個鐘有多，落深圳都相差無幾啦，屈喺火車整整一日，一個人，真係咪試
好似我而家咁，起碼有人照應，在上海都仲可以周圍碌，食好野，都黑仔唔晒
既然仲有時間，當賺左又好，當咩都好啦，開開心心玩埋呢兩日，今日去左原訂冇諗過去的徐家匯，唔知點解，又係嗰d光禿禿的樹、相似的電燈柱、購物商場、霓虹廣告燈箱，好有涉谷的感覺，但此地同彼地，點會有得比呀…
不過有一點係相同的，都係好多街行，好多野睇，行到激累﹗
呢種累的感覺，終於蓋過了兩日來折騰所造成精神透支

哎呀，哂左聽日eason個show嗰兩張飛，好彩真係冇約實你，如果唔係真係極唔好意思啦

ps：上次寫錯左個moblie no，應該係86 15802155505
醒目的你應該知，中間多左個地區(上海即係21)字頭，手提電話唔使架，嘻嘻

你在哪？

12 March 2007

身處異地，前路未卜，但英格蘭足總盃仍舊要睇，因為就算唔睇，都唔會對件事有幫助
車仔對同市熱刺，先落後一球，再由林生追平，後來艾生擺烏龍，熱刺急攻反擊又入一球，最差時落後1-3，主場呀﹗真係佩服我老友摩連奴，換晒d攻擊球員，得番兩個中堅兩柱擎天，又真係俾佢搏到喎，下半場攻左一大輪後林生追多球，轉捩點係艾朗連儂被換走，「熱刺想自殺」我衝口而出，的確，後來後備上陣的沙洛文卡奴都入左一球追平，3-3完場

好在有你喺度，如果唔係真係唔知點算，又或者…
唔知呢，應該都有仲好多possibilities，但唔想揣測了
我係咪真係如你所言，平日好似好硬淨，但自己的小事反而搞到一塌糊塗，有人「在你遙遠的附近」幫我執漏，只係我一直不自知，又者故作不知，並己習慣左有人默默在守候著，不動聲色，為我安排了甚至是KO了瑣碎事
可能你講得啱，我漸漸對這種奇怪的關係，產生了依賴
如果你所言甚是，How do I live without you？I want to know…
但是…

你在哪？
那個活在我腦海裡的你，幾時先在現實裡出現？
你會幫我執更多的漏嗎？

********
訓唔著，唔知點解，周圍睇人的blog，其中一個係屬於佢的
我用「佢」，唔想用「他」或「她」，亦唔想用我慣用的「你」，因為我估計佢唔係我讀者

佢寫佢的愛情故事，我諗應該係，唔會係連載小說掛，因為情感真摰細膩
一邊讀一邊諗起他，睇到我喊左出來

《記上海奇遇》——序

11 March 2007

好一句「冒險」，結果一語成讖…
原本係公元2007年3月11日，乘搭MU509 1600上海departure的航班返港，心水清的你都會記得，我話過今日返來，聽日返新工，但我呢個時候仲online打blog，好明顯我唔係喺飛機上面啦﹗
package上，我原本預訂的兩班航機，去程同回程，我都搭唔到，不過我人在上海，忽然成件事好鬼畸呢﹗簡而言之，而家的重點係，我在上海的地鐵被偷去銀包，裡面有回鄉證、身份證、信用咭、提款咭，仲有好多其他vip咭、銀包裡的港幣，仲有當然係裝住呢d野既白色porter
其他的奇聞，例如點解會miss左去程飛機，容後再談，不過講落又似笑話，成件事又似一套連續劇，anyway，請留意bolg內最新發布﹗

如果你問我而家點？人身安全上，沒有問題，安全，雖然呢度入夜後大風起上來都好凍，但著得暖，食得好；心理上卻很難受，初初好徬徨，而家好無奈，仲感到「有d不幸，有d惆悵」
不過我有帶特區護照喎，呢度的朋友話我奇怪，但如今看來，都可以算係好彩

尋晚到而家打左好多電話，好在我d人民幣唔係放在銀包裡，而且有朋友接濟，住的地方settle左，飲飲食食都不成問題，不過臨時回鄉證同機票仍然是問號，行程加插左公安廳一遊，了解內地公安錄口供程序，和實地與操一口流利並帶上海口音的練習員修練普通話的聽講技巧，聽日要晨咁早去位於浦東民生路1500號的出入境管理處，先可以展開做證的程序，頭先打去入境處港人救助熱線1868，佢話需要一張相、報案回執、講述事發經過，填兩張個名水蛇春咁長的form，收費大約幾十蚊，佢話實數唔清楚，不過可能需時兩三日
兩三日？我當堂呆左，平日尚算牙尖嘴利的我突然間唔識得反應
至於機票方面，可能要買過張機票lu，頭先打去問，可能改唔到，真係唔知講佢唔明定聽佢唔明…但買過的話要有旅遊證件，所以都係要等回鄉證，不過買過張機票的話有得claim番

而家覺得，點解咁多間銀行 / 發卡公司都冇toll free或者collect call的service呢？嗰d咁既customer service hotline勁多廢話，又多掣press，哂晒d時間，打電話都打到窮…
我覺得過份d的就係政府的救助熱線都係冇免費service，唔通個個都咁得閒，旅行緊都打返去入境處玩電話咩，唔通個個都思鄉，打返去聽下人講廣東話咩…

係就係買左旅遊保險，但發覺喺d咁的情況，保險公司都唔係點幫到，佢唔會幫你預支住d酒店同機票，要自己出左先跟住claim番，我唔知呢個係行規定係今次投錯保…

我hk的mobile張sim咭都喺個銀包裡面，但如果想搵我，可以sms我上海的電話，唔介意的話亦都可以打我上海呢度的mobile 86 15802155505，仲有，可唔可以幫我話佢知我呢個奇遇呀，唔該﹗

心情低水

8 March 2007

今日感覺寂寞孤單，不知所謂何事…
尋日都係自己一個人出街碌，但感覺完全唔同
話說尋日一條友走左去沙田買喼，其實上次去東京前都想買架喇，因為原本個喼的鎖壞左，總之今次我要換喼啦﹗
尋日著得靚靚，其實似去浦多過買喼，買完又唔想走住，推住個喼周圍碌，都幾異相…
今日出左旺角處理d私務，例如去朗豪坊拎番張vip咭同攞番嗰本書等
頭先忽然想食日本菜，諗起你，拎起電話諗住sms你，結果都係冇搵你
今日殘樣，未能夠以最佳姿態現身，同埋心情馬馬地，唔想你出來只係聽我呻，又唔想你出來睇我面口，而最緊要係同時要同你講的野，喺咁的情況講唔出口，況且，我都唔知你得唔得閒，想唔想見我…

平日團團圍住我的人，唔知點解，係咪早有預謀，全部同一時間喺我的世界中消失得無影無蹤

作為紅軍迷之一的我，尋晚嗌到聲沙
心情低水，唯有recall番利物浦晉級，先令心情唔再低沉落去
不過好搞笑，贏左巴塞入8強咋，但d match report寫到好似利物浦攞冠軍咁，當然，我都曾經有咁的錯覺﹗

其實我有一個目標，就係可以跟住車仔或者利物浦睇一季波，每場聯賽、歐聯、盃賽、友誼賽，佢去到邊就跟到佢去邊，佢搭車，包架車跟佢去比賽，佢飛去作客，跟住一齊飛，同所有其他die hard球迷一樣，唱住 chelsea chelsea或者you'll never walk alone，諗起就正﹗
除此之外，我都仲有一個目標，就係英格蘭主辦世界盃或者歐洲國家盃時，成個決賽洲賴死喺英格蘭唔走，當然仲要有親英格蘭都入場支持佢地，一路唱住god save the queen，同佢地一齊捧盃
而另一個更偉大的目標，係走訪英格蘭、蘇格蘭、意大利、德國、法國、荷蘭、西班牙，去晒佢地頂級聯賽所有的球隊的球場到碌下，睇下波，參觀下佢地的博物館(如有)，買下當地獨有的球會精品，我呢個idea，仲早過有線4小強架﹗

好想剪頭髮，如果飛機上有呢個service就好啦
如果有埋修甲、電眼睫毛、桑拿、gym、按摩、打牌仲好呀，成間空中酒店
既然海上有郵輪，我成日都話佢係浮喺海上的酒店同賭場，我覺得空中都得，只係遲早的問題
呢樣野有冇人study緊呢？sell條橋俾d airline，或者見工時提出呢個見解，受唔受呢？

anyway上次炸左個頭，引來你咁的回應，唔記得有冇講過喇，有就當我長氣講多次啦﹗
你：嘩，你做咩炸左個頭？觸電來呀？
我：唔係觸你電咪得囉﹗
(靜默…)

********
原本的背囊行變成橙喼行，又羽絨又叉電又泳衣，執左半喼野啦，我諗今次就算買野既話，唔使又買多個喼掛…

你永遠不會一個人走路

7 March 2007

雖然輸波，同上周英超對曼聯的比數係一樣，主場輸0-1，但今次真係輸得好開心，好鬼驚險
奧妙在於上回合利物浦作客魯營球場，贏1-2，帶住兩個作客入球返主場第二回合，所以今回就算輸一球，都能夠以作客入球優惠而晉級
真不枉我突登出去，約埋一眾友好，又著埋紅軍主場波衫出去支持佢
最尾嗰15分鐘，尤其補時嗰3分鐘，真係心亂如麻，心跳加速，真係就來心臟病發，我掩住半塊面睇波，睇到我咬緊牙關、咬牙切齒，又膽戰心驚，總之利物浦唔入波都唔緊要，只要快d叫完場雞，晉級就得
結果利物浦出晒名嗰d驚險蝦碌野都冇出現，順利晉級，放下心頭大石，好開心，好想尖叫大叫，我諗我訓著左發夢都會笑出來
踢我最討厭的巴塞出局，仲係要由利物浦踢佢出局，真係大快人心﹗
利物浦在我支持下晉級，同時間進行的車仔，先落後，兩個回合都係咁，但後來居上贏2-1，同利物浦攜手晉級，真係開心，我諗聽日曼聯對里爾都好穩陣，聽日支持阿仙奴啦﹗不過我諗我半場要換定衫，一完場急急腳出門口…
其實對車仔好有信心，所以咁啱呢兩回合兩場波都同利物浦同時間開，但我都冇睇，反而支持我的第二最愛利物浦
真係好彩有我支持佢咋﹗
忽發奇想，如果四強都係4支英超球隊，我飛佛的英超咪好威囉﹗
我諗今季唔會咁邪，俾曼聯來到個三冠王掛…
曼聯試過後來居上，最後一場追過阿仙奴稱霸聯賽，呢個神話會唔會輪到車仔呢？三冠王或者四冠王得主，會唔會反而係被睇淡的車仔呢？
robben好波﹗
ballack好波﹗

好眼訓，下次先講番頭先出去宵夜同差d流左的睇波活動的事發經過

咁的生活真係爽

5 March 2007

我係嗰d會為一個興趣而傾家蕩產嗰d人，更何況我d興趣並唔只一個…
adidas、車仔、英格蘭、利物浦、winnie the pooh家族特別係跳跳虎…
我以前會數住我有幾多某某珍藏，到年尾點算一下今年買左幾多關於呢個興趣的物件，或者使左幾多錢喺某個興趣上，但近年瘋狂程度，每次提及，都令人咋舌，就連我自己都唔係咁想正視，所以呢個盤點，都係作罷了
點解無端端攞番呢件事出來講，因為忽然間有好強烈的感覺，好想好想好想要chelsea呢副大富翁，真係好過癮架，可以買泰利、買林伯…
我諗一班人一齊玩嗰時應該都會好開心
之前利記出左歐聯冠軍版，我千辛萬苦先說服到自己唔買，話買左冇人陪我玩
但今日我說服自己點解要買，係因為上次錯過左利記個歐聯版，唔可以一再錯過…
不過老實講，我想買一樣野，我想得到一樣野的話，需要理由架咩？

喺屋企hea真係好開心，今日係第二日
覺唔使訓好多，訓醒想起身就起身，唔想起身就碌多陣，可能又訓番，又可能在床上發下白日夢，攬住虎仔或者將張被come過頭，傻笑一番
醒左想食野就食野，唔想食又冇所謂，隨時可以online聊下人chat，一陣又可以打電話聊人傾計，阻住人做野，你唔抵得又會有人得閒招呼我呀﹗
總之咁的生活就好爽啦﹗
你得閒都要過下d咁既生活，當係放假又好，放鬆又好，放肆都好
的確，呢d生活應該一個人的，慶幸我係一個人
anyway，我個他，幾時會在適當的時候出現呢？

不過聽日要碌出街，冇得喺屋企hea lu…

機票同酒店都搞掂，今次真係confirm左喇，多謝你自動請纓帶我去玩﹗

一個人

4 March 2007

呢兩日係就係放假，但連續兩日都仲有好多約會，冇停過，今日先真真正正叫喺屋企hea
一個人，過一個人的生活
放假，訓一陣就覺得好夠
頭先拎左d相去曬，兩個鐘後拎番，望住你，越想你…
將你嗰張張放喺枱頭，成日都對住你
同埋發現呢，可能我天生眼珠比較淺色，我有唔少相都係紅眼，唯一美中不足﹗

尋晚睇利物浦，哎，眼見就來完場，贏唔到已經唔夠運，守和0-0都好丫，點解會咁架，即刻黑面、唔出聲，呢樣咪叫足球的無奈
頭先睇番歐聯第一回合的精華片段，咁樣先係利物浦架嘛，咁樣先係足球的激情

好耐冇睇過你的diary，頭先一次過睇左好耐，我又點會忘記你呢…

尋日佢打來，其實我真係唔係咁鐘意同佢玩，佢又以為自己好風趣，其實真係好難頂，佢話我突登喎，我諗用側側膊又或者順水推舟形容會貼切d
尋日他都打過來，我只係將我聽到同見到的事實之全部講俾他聽，他似乎唔係好想相信呢個事實
頭先同我倒數過的你打俾我，乜你仲唔明呀？我鐘意車仔、利物浦，我鐘意睇英超呀，我鐘意英格蘭呀，你鐘意巴塞、巴西，我同你都唔啱channel既，我同你永遠都係敵人，你慳d啦﹗不過都要恭喜你隊巴塞將榜首之位拱手讓人
你打俾我，來電顯示係「私人號碼」，你一句「喂」我真係認唔到你係邊個，仲以為係佢添，你話「我呀」，我先恍然…

大鑊啦，上海d機票同酒店都仲未confirm，照計呢排又唔係旺季，我諗唔會流左掛…
打算8號飛，11號返來，12號投入新生活
你問我點解去上海？其實假又唔係有好多，最重要係我又想去d我未去過的地方，但又唔係好危險，可以自己一個人去的，所以左揀右揀，揀左上海
其實我未試過自己一個去旅行架﹗
我d普通話咁普通，我諗我都係講英文多架喇
我真係好冇信心講普通話，試過有人用普通話同路，我自然反應地用英文答佢，係咪搞笑？
頭先睇上海的天氣，預報到7號，預測2-10度，咁咪要執個喼？原本諗住背囊輕裝上陣咋

多謝﹗

3 March 2007

尋日的唱k farewell party，由晚上6點鐘開始kick off，neway city5號房玩到53號房，直至打烊，唱足12個鐘
明明喉嚨痛聲沙仲未好番，但仲係做咪霸，鬼咩，點嗰d歌首首我都鐘意，你地唔介意既﹗
你6點即到撐我，同我一樣由頭唱到尾，掂﹗
你放工落來坐左陣，多謝俾面，多謝你的sms祝福
你開6收6都落來，更加唔話得啦，thx
你幫我拎嗰袋野落來，都幾重呀，真係辛苦晒﹗(後來我走時唔記得拎，頭先call back neway，好在有人執到)，仲有呀，你食住煲仔飯咁肚餓都同我合唱，真係錫晒你
你都返a啦，鮮有見你出席呢d活動，我真係夠face
你勁呀﹗真係做到野喎，交足功課，另外仲要多謝你同我來個抱抱，第二個恨到喇﹗
你，次次去唱k都會麻煩到你，thx 一萬句都唔夠呀﹗今日返a都撐到足，再一次thx，記住快d結婚派利是，我請纓做你兄弟﹗
你，我個好姊妹，正想打俾你，你就出現了，我地真係心靈相通
你俾人擘到斜晒啦，做左動物園景點，為在場人士帶來唔少歡樂，真偉大
你全晚講左最多次唔捨得我，我又何嘗唔係呢？雖然唔會再三日唔埋兩日見一次，但係朋友既話，在心中就夠啦，我電話冧把唔會改，我會call你，你得閒都要call我喎
你的出現真係令我意想不到，really surprised﹗亦因為你的出現，令我集齊一套…你話可以換個煲，哈哈﹗
你做左我機佬，唔該晒，抵我敬酒嗰時第一個搵你哼杯既
你好明顯都係natural high啦，miss左你個call，唔好意思
你，雖然平日冇咩同你接觸，都係最近出來玩先叫識你，亦多謝你撐場
你同我一樣都係夜貓，依舊抱恙，謝謝俾面

我同你地個個都影過相，但我地全部人，欠一張合照…

以往夜更，晚晚並肩的你、你和你，做左失蹤人口、飛機王和甩底王
你唔落來，我都預左架喇，當係心照呀？睇下你日後有d咩表示先啦
你好少少咁啦，都搭單搵人講低左一聲
你喺三個之中算係咁啦，起碼都飛個輪來單聲，記住你晚上8點32分的來電，同埋頭先兩點幾send來的sms，你記得你應承左我d咩啦﹗

多謝同我講過祝福說話的人
當日，12月30日，你係第一個知道我會走的人，第一個祝我good luck的人都係你，你嗰個sms，我一直都keep住﹗
某日話你知，我決定走了
你說：又走一個
然後歎氣
你那個表情，我不會忘記

多謝陪我狂歡盡興的人
十二月起不斷call我去玩，撐我，陪我在呢間公司過最後呢段，又難忘又開心的日子
雖然有時玩完會失憶，但不會忘記酒杯輕碰乾盡的一刹，我喝的，全是開心的酒，正如我，是開心地走
我放低一句「多謝」，請對號入座

我以前講過：喺呢度即將走的，個個都冇好下場
意思係遞左信的人，喺公司得唔到好的待遇
今日，我想收番呢句說話，正如較早前所言，我真係好好彩
我希望我唔係唯一例外的一個，祝各位好運﹗

你：真係好唔捨得你
我：我都係
你：你做過幾多間公司？最唔捨得邊度？
我：三間，最唔捨得呢度d同事，因為喺呢度真係搵到朋友，搵到好多好朋友

其實我一直都怕我會喊，因為唔捨得你地而喊
感覺就好似中學畢業，與同窗七年的好朋友、好老師話別，心裡感覺複雜
複雜的社會裡找到純真的校園那份簡單率真的友誼，教人感動
所以last day的心情，講左咁多日都係講唔完
哈哈，我就係咁多情，咁多愁善感

有d說話，真係好想好想親口同你講，我一定會搵你的

正式開始為期十日的離職前休假

1 March 2007

今日last day，並正式開始為期十日的離職前休假，三月更表顯示，我有5日al，3日co，2日do
繼續繼續大事回顧…

今時今日唔使再為呢間公司工作，有d說話，而家先敢咁樣講
我覺得自己好好彩，我係講真的
有人話將走之人會俾人chur得好盡，chur到無得可以再盡嗰隻，例如勁單拖、早開遲收，做埋d畸呢野等等，好多人都咁樣講過，我觀察所見亦如是
有人問過，係咪個個走都咁樣俾人chur
不過，我冇，所以我話我好彩

講開單拖，我係少單拖的，可以用幾少吓去形容，當然嗰d擺明唔使單拖的唔計啦，所以呢層又係另一個好彩
我返左兩個月工就轉返夜，一返就返左半年，係派左套機俾我，但返夜一日跑得一單，晏晝又多camman，我實分到一個

另一個好彩之處，係我唔使同冇經歷過俾編輯，尤其係某編輯剷到飛起，片到尊嚴盡失
莫講話新記者，就連早過我入來的人，都俾佢彈到一文不值，你唔知得多，都一定略有所聞，近期，見到見唔少啦
我在三色台做過intern、parttime，我都未至於矇剩剩，我諗我的表現，出乎佢地意料之外，所以我冇俾人剷
同埋就算我初初寫的故仔，都有正面評價，第一印象係好既，日子當然好過d啦
返左幾日工，已經叫我諗做d wto的自己故，真係睇得起我
經歷埋幾日wto，我都應付到佢地，而且曾經誤打誤撞搵晒灣仔區學校資料，最後發現係有用的，令她印象好深，我諗係咁樣打左個好基礎，託賴，之後一直都有好日子過，起碼相比起好多人係
記得某人問過我：你讀邊間u
我：中大
某人：唔怪得啦﹗係唔同d
後來明佢講咩，佢意思係：咁醒扒，原來係中大，唔怪得啦﹗係唔同d

我成日都話嗰時返夜開心，都冇好清楚咁講過原因
嗰時公司多d人，而且未改制，放一點，check完assignment仲有兩三個鐘，咁有d senior返夜，佢地有時間亦師亦友咁指導下點樣構思、plan故仔，點樣寫故仔，有時又會review吓嗰日做過的故仔，所以獲益良多，我都覺得自己喺嗰段時間，成長左好多
而且佢地又係我地d奀記者同尊貴的編輯的屏障，真係好一個大哥哥大姐姐
嗰時工作氣氛好好，邊處要跑數架，工作時認真工作，可以輕鬆時大家打成一片，沒有隔膜
有人仲講過將個夜更交俾xxx(某個已離職senior)同阿霞睇，真係俾面﹗

我2005年11月28號星期一入來呢間公司，返工唔夠一個星期，應該話返工第四日，去左西環做重建故仔，編輯叫我搵某個現職女記者，而且仲有兩個camman招呼我，我仲記得佢兩個係邊個
第一次喺呢度做扒，雖然intern時做過，但咩都生疏晒啦，再加上冇帶con，除左眼鏡做，d eye sight唔係好自然，所以個扒係怪怪地
而喺同一日，我喺公司唔見左部電話，好多人都知道呢件事，亦因為呢件事，好多人嗰日第一次同我講野，包括你
麻煩左好多人幫我搵電話，亦要某人ot睇cctv，但結果都係搵唔到個元兇
後來我買番部同款nokia3230，橙色，即係而家用緊呢部，你地以為我搵番部電話，但唔係囉，我唔見左嗰部係紅色架
呢d事，如今講來都可以講得咁detail，好似尋日發生一樣，瀝瀝在目，時日過得真係快…
我會覺得日子過得開心，時間先會過得快
雖然呢度而家有d畸呢野，跑數之流，但整體比較係三間公司中，喺呢度做得最開心，可以喺公司搵到朋友，大家係講心的
呢度唔會好似三色台咁多明爭暗鬥、爭寵、成日提防唔知邊個會害你等等嗰類精神壓力，呢方面係呢間公司可貴的地方，你應該有聽我講過，但如果有一日呢個優勢消失，我會高呼：危險，速逃﹗

********
尋日開始同人影相，但公司得小貓三四隻，但好在最想同佢影的人喺公司，嘻嘻
尋晚又去左玩，但名為唱k，其實係飲酒，今朝勁頭痛
喉嚨痛痛地，唱歌時冇得偷懶用喉嚨聲啦，所以反而尋晚帶病上陣仲唱得好聽d，嘻嘻
玩到幾點返屋企我都唔知，原本諗住十點起身準備睇財政預算案直播，但太眼訓，醒一醒較左十一點，結果都係起唔到，響到d鬧鐘同電話唔叫，12點先唔知點解自己彈起身，但又要包裝準備俾你地的小禮物，搞到勁趕，真係及時去到現場，時間啱啱好
頭先碌番屋企拎番套機，又拎住d散水餅，仲有好多雜物，好多野，喺屋企搭的士返公司，個司機藐咀喎
返到去派餅、影相、送禮物仔，d禮物仔係一個祈願電話繩，總共有十款，分別係紅色必勝、黃色和平、粉紅色緣結、藍色幸福、綠色健康、紫色安全、黑色惡運、白色長壽、金色金運、銀色合格，我自己本身有一套，我盡量為你挑選啱你的送俾你
當日見到呢系列扭蛋，已經掉左野，覺得送俾你地，以呢份祝福作為回饋你地呢段日子的照顧都唔錯
但扭極都扭唔到紅色，最後將成個扭蛋機的蛋扭晒出來
我嗰次喺個blog呢度講，殺雞取卵，就係呢件事
唔會有人得到紅色，因為我得一粒，亦唔會有人拎到惡運，其實佢係驅除惡運的祝福，但免得人誤會啦

多謝你大拿拿用左4000分換左3月13日晚上8點15分假會展hall3舉行的黃金組合音樂會的飛俾我，雖然唔係d咩靚位，但有得睇就得喇
不過好可惜，同我一樣都係醫神fans的佢嗰日唔得閒，唔可以同我一齊為醫神狂呼，有冇人有興趣同我陪我一齊睇呀？
當然如果你都係鐘意醫神既就最好啦

********
如果你真係會讀書，又係讀law，又想搵個伴的話，搵我啦﹗
原來你都好呢味野，真係估你唔到喎
我一直都覺得讀左廿幾年書，而家先做左兩年野，未必要咁快拎番起書包，話晒一邊做野，parttime讀書真係非人生活，仲要讀d咁辛苦咁難既野，不過有人陪又唔同，有人撐會好d囉…
哈哈，如果係既話，會唔會係調番轉，係你陪我呢
之前講過因為鬥氣先冇讀law，雖然講唔得上後悔，但總覺得隔離屋碗飯香d囉…

********
雖然我離開左呢間公司，但出來玩唔好漏左我喎﹗
頭先同你傾開計，你話有我喺度氣氛好d，乜我咁犀利咩？
可能因為我會好認真好投入咁玩啦

從今之後同你的關係不同了，係一個新開始
和你點樣發展下去？話唔定有好多可能性呢…

「舊公司d friend」我以後會咁樣形容你

繼續大事回顧

27 February 2007

頭先臨放工，諗住係咁意執下枱面d野，點知，越執越多，越執越感概
繼續大事回顧…
當日我啱啱入來時，坐近門口，魚缸附近，即係而家printer隔離個位，你地個個都話我自閉症，但當時同你地唔熟落，真係冇咩所謂
後來隔離位走左，調左去隔離，之後冇幾耐開始返夜，夜晚一個坐嗰度，真係好自閉，直到他走，就瞄著他個位，即係我而家個位
當日悉心布置，顯示了我對這兒的感情，我都曾經投入過，享受過這兒的生活
頭先將枱上的扭蛋、partition上的poster、生日熊、球星月曆等，逐樣逐樣放入紙袋拎走，真係百感交雜
我再不厭其煩都係講嗰句，好開心識到你地，你地帶俾我好多美好回憶

我份人比較慢熱，我唔熟的人，我會唔出聲，同埋表現得愛理不理、cool同串囉，但係混熟左，先知我係傻架…
我記得我曾經引述過我d friend寫俾我的紀念冊，其中一個朋友咁講：「我對你的印象？街坊一個囉。」
以前返夜放1點，一行人搭公司車落旺角，你地會叫一齊去宵夜，我諗你都會記得我講過一句：唔好喇，咁heavy
而家聽落，係咪覺得呢句說話出自我的嘴巴，很難以置信呢？很匪夷所思呢？因為而家我係其中一個逢call必到，兼且成日聊人去玩的鐵腳

吉人自有天相，JT安然無恙，chelsea既team news係咁寫的：
Indeed our captain was back in the stadium before the team left for home, enjoying the celebrations as much as anyone.

你幫我喺北京搜購到呢件奧運衫，really thx，事前唔記得話你知，係限量5000件，賣晒就冇，咁都俾你搵到喎，唔知係我好彩定你好運呢