不能道破的默契

29 August 2007

四日的假期來到今天是一個終結，放假前訂落的目標與節目全部都ko晒
打牌為次，吹水為上
你由北海道返來至今，仍然對當地戀戀不捨，今回講到登別牧場的熊…
講到手舞足蹈的你：d熊好搞笑架，佢會同你揮手hello問你攞蘋果食(仲要扮熊揮手…)，xx問，如果d熊熊揮手，扮掟又唔掟，你估d熊會點？
一臉不耐煩的我：(舉起一隻食指)
~~大笑~~
你：我地話隻熊會舉起中指，凸﹗凸﹗凸﹗
我：其實呢，呢個笑話呢，我聽過好多次喇，係好好笑
甲：唔係喎，我第一次聽，真係幾好笑
我：先生，你返左來好耐架喇…
雖然早前講過本周有月全蝕，但並沒有刻意記住，剛才無意中看新聞報道，原來是今晚﹗路途中某人指著上空，相信是東面的上空，兩個人停在街上看月全蝕，搞甚麼？
結果看到甚麼？多雲，即將下雨，下回月全蝕是2010年，未知你我那時候會怎麼樣，還會肩並肩，手挽手嗎？
你我都沒有開口相約看下一回的月全蝕，不是因為這是太長遠的事，而是因為默契不應道破﹗
至少我是這樣想
趕返屋企，抖順條氣又係煲劇時間，就來大結局，第二輯將會緊接重播，但可惜我不在hk，睇唔到
下一次約會，期待中…

********
無意中發現，原來cigarettes & alcohol一早成為你我冥冥中的連繫

尋找撐傘者

28 August 2007

努力同行家駁料中…睇番d相，原來我有兩個樣

天空忽然下起大雨，眼前白茫茫一片，為我撐傘的人在哪裡？

今天的我靜了，沒有嘈嘈吵吵消極地安排今個weekend的活動中，首選揼骨，次選待訂，至於人腳有待確認

朋友甲一連串的問題，轟炸得我透不過氣來，我講過答你的，現書面回覆如下，請對答案問題一：冇你諗得咁複雜問題二：真係冇咩特別感覺問題三：你認為介意對件事有幫助嗎？問題四：唔回答假設性問題

繼續煲劇，今晚有一句對白和一場戲想記低：「最親的人永遠都係最遲先知道真相」annie同henry喺法院外相遇然後分道揚鑣，henry回望annie向遠處走去的背影，annie沒有回頭，henry一臉失望；annie回望henry向遠處走去的身影，henry沒有回頭，annie歎一口氣我諗起「向左走向右走」呢六個字

綠洲樂隊的香煙與酒精背後特別的意義忽然落在我的身上

紐約街頭相遇事件

27 August 2007

今日第一件要記低的事，返到屋企噼啪開電腦on blog新鮮滾熱辣要記低的事，係搭正凌晨12點，喺紐約街頭附近發生的事

事緣由馬鞍山搭車返歸，落車行返屋企的路途經過紐約街頭附近，下意識向左方某一大廈望一望，一個熟悉的身影，一邊點著香煙一邊碌出來，是你啊﹗打俾你，同時你指住我，我舉起電話示意你聽電話，你喪指巴士站，一連串一路之隔的手語溝通後，你和我就「約」左喺巴士站等
只見好多車經過你都唔上，其實你搭咩車呢？後來你話應該趕唔切，話去搭巴士，走過短短的路途，跟往日沒有兩樣，細想起來，原來這已是一年多前的事了，不過至今仍瀝瀝在目，也計只是時間過得太快
多謝你差唔多送到我返屋企，again
你和我的共通點是累，不過兩個累人卻形成強烈對比，你係遇到癲佬以致嚴重透支，狂扯煙宣泄，短短的路途，你已經食左兩支喇，冇益架，食少d啦，一係戒左佢啦﹗
或者可能有機會唔知你幾時唔覺意睇到呢…

其實我而家都做得幾開心，做feature其實都幾啱我呢d咁任性的人，由於自主度高，通常都做到自己想做的故仔，有人出糧俾你做d你想做的野，仲俾埋資源、platform俾你，其實都幾爽
我諗我之前都係鑽牛角尖，多謝你當日的鼓勵，哈哈，唔關有冇friend的問題事
但有一樣野我始終都唔認同，就係你所言建議我為份糧返工，或者仍然都係我任性啦，我留喺一個地方，我要搵一個留喺呢個地方的理由，可能係一個理念，可能係為一啖氣，可能係為左一個人也說不定，但總要一個理由囉

話又說回今日的其他活動和佚事，其實也很值得同讀者們分享

尋晚出左去玩，雖然不能盡興，anyway今日繼續玩，陣容有朋友甲乙丙丁戊和我
突登較左鬧鐘兩點，但都碌到兩點幾先起身，跟住換衫，去銀行入錢，再搭車碌入馬鞍山，落車打俾朋友甲，喺ok等佢期間又飲我飛佛的利賓納，雖然最近激愛有汽利賓納，但頭先都係飲普通light版檸檬利賓納
今日的活動係wii局飯局波局糖水局，突發新加笑局
我搞事，朋友乙話呢個禮拜怒食kfc，所以我提議食kfc，不過朋友甲更正：你呢禮拜係未食過kfc
羽毛波打左兩粒鐘，笑料百出，尤其頭兩局，我諗d汗係笑出來而唔係打出來囉，但其實我又再hea打…

朋友乙：嘩，佢連個勢都輸埋
我：佢被去勢
~~大笑~~
朋友乙：乜你女仔之家講埋d咁野
我：我話佢大勢已去
朋友乙：咁都俾你兜到
我：呢d咪叫才思敏捷囉

另外有兩段涉及兩條題IQ題的對話亦想記低：
大家都食刨冰，朋友丙食左兩啖話冰到痺，朋友乙comment朋友丙：弱
朋友丁：呢d係虛呀
我：咩呀，虧丫嘛…
朋友丁：虧呢個字真係好啱形容你，你話啦，弱、虛同虧，係咪虧最襯你？
朋友乙：哈哈，小學d選擇題
朋友戊：以下邊個答案最適合形容朋友丙？a)弱，b)虛，c)虧
我：唔係呀，d選擇題係，a)1弱+2虛only；b)1弱+3虧only；c)2虛+3虧only
朋友丁：d細路問老師，好難答呀…
朋友戊：仲有一個，d)以上皆是
~~喪笑~~
朋友丙：係答案e)以上皆不是

我：請你用4個數目字形容朋友乙
朋友丙：1679
~~笑到斜~~
朋友丁：咦，你都幾有數學天份，快d去浸大申請讀數學系，話唔定你勁過沈詩鈞
朋友丙：玩數字我直情係天才啦，嗰d 779966797679簡直玩到出神入化呀﹗
朋友乙抄我：請用四個數目字形容朋友丙，咪1697囉，哈哈哈
朋友丙指住朋友乙：我要down grade就番你level咋
我：所以你咪由9 down grade，就番佢7囉
~~大笑~~

打完波食完糖水散水，但都係想搵野玩，明日繼續放假，唔想咁早歸，之前同她傾開電話，諗住食宵夜囉，但她唔想約，我都係死死氣打俾他囉，對白始終如一：累，我問：邊次搵你唔係累架
不過結果，哈哈哈…
事隔個多小時，後來最後最終都係同她喺我樓下食宵夜，吹水至差唔多四點，但我諗來諗去都諗唔到究竟邊次出去玩有卅蚊要找番…
下個星期趁我未出發前玩多鑊啦，揼骨有冇興趣？

你今日快唔快樂呀？今日係開放日喎，玩得開唔開心呀？

束縛不來如人馬座

26 August 2007

限我對你以半年時間慢慢的心淡
春天分手，秋天會習慣…
或者等到秋天，睇下有冇一番新景象啦﹗

遇到唔想見到的人，不能投入，所以全晚大部分時間都顯得呆滯，但請不要猜或估或穿鑿附會我唔想見到的人是誰
我又任性起來，因為一絲反感，將自己孤立於人群中，忽然多愁善感，不是身邊團團圍著一堆人，又或者有少數「友好」旁身就可以泯沒這感覺，聚會中的四十人，知我心者有幾多？
友好之一的你遞左一罐啤酒過來：呢罐俾你
我：我唔飲啤酒
平日好飲的我，今晚停手了

毋需向我示威，毋需向我試探，毋需向我投誠，毋需向我擺姿態，我唔受呢幾套﹗
我講過無限咁多次，我任性，束縛不來如人馬座，no，我根本就是人馬座，所以鍾意一個人與否，不需理由，全憑即興隨心的感覺

林柏特連續4場有波入，今季成個醒神晒﹗
不過謝拉特仲係缺態中，今晚仲冇佢份添…
早兩日有人問我係咪好鍾意謝拉特，鍾意佢咩？well，神奇隊長的魅力仲唔夠呀？

翻看相機record，絕大部分都是眾人戲弄我和他的記錄，以當時閃光燈的數目，仲有唔知幾多同類相片散落在民間…

失禮晒﹗

25 August 2007

有d野會唔會做得太著跡呢？其實他有冇察覺呢？

晏晝有睇相會，今次鑑賞的係呢個blog嗰38張精選舊相，事緣大家好奇想知道紫色color con的效果，睇睇下睇埋其他相，當中不乏令眾人尖叫的，而眾人對我多元化的興趣與造形都驚嘆不已，哈哈，真係失禮晒﹗

最近識左一個人，激似高鈞賢，well…

你可能會話我好無聊，連屋企用的紙巾，個盒都要係跳跳虎同佢d friend，特別揀左一pack係有兩盒跳跳虎的，其實如果可以，最開心係兩pack共十盒全部都係跳跳虎

呢排幻想世界冇開門做生意

布吉和海南島的共通點

24 August 2007

夜晚喺度整蛋糕仔，呢兩晚都訓得唔好，頭先整完又攤屍，訓著左

呢排播緊妙手仁心，其實d情節都仲好記得，但都繼續追看

呢個weekend的節目都安排好，唔使自己一個

打算mon同tue放com off，一日要整頭，一日諗住上深圳書城搵書，但放假時間做公司野，好蝕，所以仲諗緊…

出完trip又儲左4日com off，諗住同中秋節同國慶一齊放，咁有9日假，正呀﹗

去布吉hea下好唔好呢？行程要7日，做spa做一日，喺沙灘hea兩日，shop兩日，水上活動玩一日，再hea多一日，7日都只係啱啱好咋﹗定係去海南島，一日水上活動加hea兩日呢？

都係要問下d腳先決定到…

唔係個個喺度許願都會願望成真，咪抄我啦﹗

荷包乾硬化vs急性發錢寒

23 August 2007

歡樂的時光過得特別快，今日已經係星期三，咁又一個星期，又原來已經係8月的22號，咁又一個月

如果唔係早左出去食飯，就唔會喺嗰個時間喺嗰個商場出現撞到你情形係咁樣的：我同個同事喺度浮游緊，sense到遠處有個人牛咁眼眼甘甘咁望住我，有d唔係好對路，後來望真d，你向我招手，原來係你，突然興奮雀躍起來﹗

我鍾意你頭先的回應﹗

曾經有人話過有科學家做過實驗，睇下一個人點先展現發自內心的笑容情景1：撞到好耐冇見過的朋友情景2：喺花店揀到啱心水的花實驗結果發現喺情景2真正發自內心地笑的人比情景1多
不過我總是特別d，唔係能夠用理性客觀去分析我我自問撞到你時的確由心裡笑出來，如果唔係只因重讀blog裡寫過關於你的段落，吱一聲笑出來

眼訓病係一個長期病患，逢星期一至五發作，冇藥醫冇得斷尾，中左招都咪話唔lai野最近仲被驗出患上荷包乾硬化同急性發錢寒，呢個病發作起上來都幾慘，幾辛苦，好在醫生話有得醫，但針對男女有唔同處方，患上呢個病的男士，可以每日食拖鞋飯一碟，持之以恆，可以緩和病症復發；患上呢個病的女士，可以搵個腦補下，呢個腦有個學名，叫有錢佬，同樣持之以恆，亦可紓緩病情。但坊間有一道偏方，叫六合彩頭獎，醫荷包乾硬化同急性發錢寒一次斷尾，但從來都冇人知呢服偏方點開，係仙丹定係內敷還是外服都冇人知
anyway，最好都係食定多d toro補身…

另外，頭先海盛路拉左個犯，碌左出去睇熱鬧，睇下有咩行家，齊台喎，但大家都做緊野，無謂打擾人啦，亦無謂阻住人啦只是遠遠望住熟悉的面孔，也很有趣有時我諗，會唔會行行下街撞到有突發，撞到相熟的行家，幫手扑下咪又點話啫

尋晚失眠，原因係掛住諗野，唔知點解突然好多野諗，唔係諗工作，而係諗去玩，諗幾時去玩，同邊個去玩，玩d咩，點樣玩，諗一樣野生十樣野出來可以繼續諗，諗完好似玩左一次咁，好累…

醫神駕到

22 August2007

醫神10月開騷，尋日某信用咭開始優先訂飛，但朋友仔話個電話打左成日都唔通我怒訓，冇試過打唔打到，今日亦忘記左呢件事…
只係幾張演唱會飛啫，喺度許個願，遲d又會有著落，嘻嘻﹗

放工掛住同佢傾計，遲左走，竟然因為咁撞到舊公司的他上個再上個星期話搵他食飯，打俾他，佢地咁好興緻碌左去美林喎，咪飄過去囉，燒鴨瀨+可樂，食唔晒，其實我唔係好餓咋

其實要去整頭，但仲未決定直毛定繼續孿毛好

食番d toro補補身

21 August2007

星期五晚應邀同他她等食飯，好累

星期六怒訓，去美食博覽碌左個圈，食野，罐頭鮑汁靈芝菇、鮮果甜乳酪、士多卑鄙雪芭、燒魷魚分明搞事的係買串燒，本來嗰d係一包包急凍的串燒，就咁唔食得，買三包送四串燒好左的，志在宣傳同所謂試食，我話要一包，但要燒熟左嗰d，睇檔嗰個人都唔知點好，最終咪賣左一包即十串熟的串燒俾我，跟住佢就發現大鑊，因為好多人都問，想好似我咁買，但佢根本燒唔切，嘻嘻，搞事成功﹗食到好飽，跟住碌去tst，晚上有飲野活動唔知係咪太累呢，冇乜feel，加上喉嚨痛，唔係好想飲，不過我當然都有飲啦，怒飲橙汁，事後諗番其實都飲左好多其實所謂的橙汁，係vodka+橙汁，簡稱橙汁都錯唔晒佢地飲林寶堅尼，真係癲，冇貨，唔好搵來搞，同埋呢d酒唔係女仔飲的聽他的建議，飲d女仔飲的酒，紅酒+梳打水+7-up，taste good

星期日繼續怒訓，晚上有飯局

星期一，真係頂唔順，身體抗議了，病+暈+熱，唔係好清醒，明明起左身刷左牙洗左面，都係頂唔順，決定請病假了轉個頭訓，訓到晏晝5點，都咪話唔癲﹗但訓完真係好好多

要食番d toro補身，首要補補個胃本來去10樓，但full bokking，被安排到9樓，坐吧枱，轉個頭李x欣同許x亨碌入來，坐我地隔離，好邪…你個friend好老呀，成額頭都係皺紋後面d order枱好嘈，一班abc喺度大笑，完全破壞晒d氣氛即使係日本的小店，係嘈，但係師傅同客討論d魚靚唔靚，店員忙於招呼客人之聲不絕於耳，但唔係abc的笑聲囉始終都係10樓好d，lift口貼左張紙出來，話11樓24號開，本來想上去八下，下次先

adidas曬冷日

17 August 2007

我正嘗試做一個屬於自己的style，例如唔用畫面中key個人頭出來的剪片方式，用一shot過的roller，用首尾呼應的片頭和片尾音樂等，一切正慢慢建立中，各細節正召集中 本周六晚八點半請留意財經資訊台《時事寬頻‧幫我打好呢份工》；如果未返到屋企，晚上十一點有重播；如果訓唔著，又或者夜浦返歸，深夜三點半開電視都咁啱再重播喎；星期日早上一個唔覺意札醒以為要返工的話，七點會播多次；又或者晏晝啱啱訓醒，三點都可以播多次俾你睇；一個唔覺意，咁啱你呢個weekend不在香港或冇空，下個星期六丫，朝早十一點牙住d airtime播俾你睇又點話呢？係咪覺得你有天大的面子呢？咁係咪冇唔支持我的理由呢？另外，星期六朝早9點起開第9台睇，有我隻短故喺news碌，搭九鐵、喺times square、harbour city等等好多地方都會睇到，有冇cable唔係問題，都係睇下你有冇heart啫

因為剪片，我也培養另一style，就係逢出故嗰個星期，後期製作期間係adidas曬冷日，返工時著晒d我最愛的adidas上身，令自己開心d繼因睇波睇到流住英格蘭的血，也不知從何日起流著adidas的血，喺未客串做lafuma代言人前和後都係adidas人如果係adidas sponsor就好喇﹗
sun寫完稿碌左出旺角食飯，當然又去a記浦啦，在香港出售的北京奧運系列終於上架了，而家應市嗰件黑色外套同他較早前從北京空運返來的限量版有少少似，不過我嗰件衫袖冇三間，今次呢件衫袖有三間金邊，夠浮誇，同我限量版嗰件含蓄的鋒芒互相呼應

生命正在倒數…

因為患上了渴睡症、鬱躁症、精神緊張、思覺失調、四肢不協調、讀寫障礙、聽講障礙、星期一至五症候群、皮質醇偏高、精神分裂、焦慮症、失憶…他和她都話有同感，可能全組人都同時患上呢d不治之症，總之一句到尾：我們在等死﹗

剛才與他相認了，原來他都記得我﹗

或者嗰件事令他好深刻，他問：係咪我安慰過嗰個

係，嗰個用眼淚殺死人的就係我

後期製作進度較預期理想，開會進度也突然高效率，所以放工可以約人食飯落大雨，和他在同一把雨傘下走過短短的路途

我曾經同另一個他討論追女仔的問題，我叫他長期準備一把自私遮所謂自私遮，係d好細只適合一個人用的遮何解要帶自私遮？當然要等，等一次突然落雨的機會，她冇遮，可能只係送佢行一段好短的路途，例如行去地鐵站或巴士站之類，遮她過去，唔使靠得特別近，但要將把遮大部分都遮她，到達目的地時讓她發現你為左遮佢半個身都濕晒，嗰時她會覺得有d唔好意思，你嗰時可以望一望自己，跟住話：係喎，但千祈唔好理自己住，記住問她有冇濕，拎紙巾俾佢，咁她會覺得你好gentleman，先照顧完她再稍為執一執自己，跟住送埋佢搭車，當然要等佢上左車你先好走啦，如果唔係就唔叫送啦，她走同你byebye時，你好似好突然咁話俾把遮佢旁身，她一定會話好客氣咁話唔使，但你嗰時可以表現得比較豪邁，例如話：我呢d麻甩仔冇所謂啦，兩步路啫之類，塞把遮俾佢她通常都會對你留下好印象

他問：咁你有冇攞把遮？

我答：有，之後佢話要我請食飯，因為佢有d file濕左，聲稱吹左成晚

當然你遇唔遇到咁啱落雨佢又冇帶遮而你兩個可以一齊走的機會，而即使有咁的機會，會唔會殺出個程咬金，就要睇下你的造化﹗

壓力可以激發人的潛能，唔知係咪人人合用，起碼我能夠在壓力下發揮小宇宙，哈哈她和她都稱讚我才思敏捷，多謝﹗

resume to normal

16 August 2007

各位親受的讀者，我返來喇﹗

weekend開始寫稿，寫到沒完沒了，星期六由早上十時至翌日早上八時，進度緩慢，睡了四小時再繼續，傍晚六時終於完成了稿件，但對這故事很不滿意，說不出原因，但總覺得可以更好，只是力不從心…
總覺得這篇稿很難處理，很多東西很零碎，很多部件都像有關係，但這關係又非必然，併圖怎樣砌也行，怎樣砌也不行，很無奈，但結果還是要將這些東西串連起來，的確要搞盡腦汁
而我常用的「跳躍式」思考方法，今次令我麻煩極了﹗
話說想著甲，甲的思考過程尚未完畢，乙的想法突然浮現，腦袋便交錯甚至同時處理兩組甚至三組的問題，結果甲問題可能稍有眉目，但因為腦筋運轉速度太快，結果忘記了要記住應該記住的東西…
星期六：朝十朝八
星期日：朝十二晚六
星期一：朝九朝三
星期二：朝十朝五
星期三：午一朝三(我而家仲喺公司…)
之前或之後欠下的債，一次清還吧﹗

連日來不斷歎氣、喊煩的日子，終於告一段落，一切即將resume to normal，去玩去飲去唱去笑去癲去食去打去買去行去訓去睇，總之做想做的事，唔使揹住隻故仔喺身

好耐冇講過你的事，事忙過後，這幾天都諗起你
雖然你成日都話b仔涼粉唔好食，但總想你帶我去試試，或者係試下有幾唔好食啦
很想知道你在新疆的奇遇與辛酸
呢幾日太忙了，冇之前咁怒msn，剪片期間突然想mobile msn，就mobile msn囉，冇預期你兩點幾都仲喺msn旁邊，你做咩6日都唔食飯呢？原來四日以來，日食一餐都唔係咩大不了的事，哈哈，你陪我絕食呀？

滿場飛

10 August 2007

睇左尋晚獨家出版的《號外》未呢？

尋晚是他和他的farewell，但馬x事先張揚下突然離世，其中一個主角因而被召上廣州，事件亦令部分人被迫自願甩底

男主播約我一齊過去，地點係雅蘭富臨，延開四席，即係四十幾人囉，三個月內「飲」第三餐，natural high，歡送會搞到好似擺酒，真係好有趣﹗

見番好多以前的人，有我expect見到的，亦有我expect見唔到的但結果都見到，冇諗過會見到的都見到，不過原本以為會見到的都係見唔到，但anyway都係好開心，大家都喋喋不休，講左全個星期都講唔晒的野，食物好唔好食都唔緊要，上菜次序也不是重點，成班人坐埋一枱，笑下她，單打下，想講野想笑多過想食

同沒有出席的他講電話講到笑笑口，討論「你個friend的問題」，大家都忽然唔想認佢做friend，俾同枱的她(目及)到

她：同邊個傾電話傾得咁開心？

我：你識的人囉

轉個頭她陰聲細氣咁講電話，陰陰咀笑

我：同邊個傾電話呀？

她：你唔識的人

他和他和她神神秘秘叫我過去佢地張枱，梗係覺得佢兩隻仔冇好野…

他：你記唔記得她係邊個

我：我梗係記得她啦

他：咪邊個囉

我：xx嘛

他：丫…她話你索左好多，問你係咪做anchor

我：唔係呀

他：他幾衰呀，話你唔係做anchor，做冰火台anchor

我：吓？

他：佢唔啱，我都話佢唔啱

他：我都係對你有幻想啫

~~全枱哄動~~

甲：哦，話俾你老婆聽

他：我唔會好似佢咁，我同你保持朋友關係啫

甲：你身邊有個先咁講啫

食完係影相時間，某人吹雞所有camman影相，我話我嗰時都單拖做camman，唔可以少左我嗰份，哈哈哈

滿場飛，成日喺度搞事，乙話張張相都見到我

我問主角幾時睇佢d結婚相，俾丙聽到，丙反問幾時睇我嗰d…

只係搭一搭膊頭影張相啫，都會引來哄動

他：影低佢先，呢張相第日值錢呀﹗

翹著他，鎂光燈不停在四周閃，我一早講過我同他有路架啦，哈哈哈，搶盡風頭，希望冇到的另一主角補辦farewell時，唔好撞到我剪片期呢，只要避開下周一二三就ok架喇，熱切期待又玩多場

講開原來我走左五個月喇﹗

不過對他和她而言，我只是冇同佢地一齊做野，但仍成日見，有冇走到分別都不大

三號強風訊號令是日拍攝進度受阻，呆…

經過跑馬地嗰邊個墳場，原來門口有一句對聯：今夕吾軀歸故土，他朝君體也相同

我：嘩，墳場外呢句對聯都幾毒

他：呢句野唔係俾人睇架

她帶了自製rosemary曲奇餅返來，同她傾開焗野食

我：我鍾意焗千層粉

她：點解？唔係好難焗咩？

我：因為焗一份可以食幾日

~~大笑~~

我：我都好鍾意焗muffin，又係焗一次可以有排食哈哈哈﹗
其實應承過舊公司的他焗曲奇餅，但至今仍然冇左件事，well…

小熊維尼公仔到手了，多謝你﹗

另外，預告下周六(18/8)晚八點半，財經資訊台時事寬頻，《幫我打好呢份工》隆重首播，當晚十一點強勢重播

號外

9 August 2007

http://www.sendspace.com/file/gm8hei

利物浦球迷試鞋呢邊

8 August 2007

幾個來電令本來平凡的星期二變得不平凡
她來電，突發即興出左旺角食晚飯，雞公煲，係我推介的，特大煲大辣，再加致癌物、燒賣、豆卜、茄子、透明粉…

食食下有隻豬走左入來，後來發現唔只一隻，係兩隻，點解豬會食雞公煲？點解好野撞唔到偏偏撞到兩隻豬？

我話通常好食的野都係唔健康的，例如打邊爐、午餐肉、公仔麵、薯片、汽水，樣樣都係我飛佛

她：我想講，有d野呢…

我：d野好好食

她說我搞爛gag

原本她建議飲涼茶，但不停咁食左兩個鐘，激飽，根本飲唔落，最終放棄了

去adidas逛逛，基本上旺角、老尖同老銅的a記，邊個貨架放d咩衫，呢季有d咩款的衫我都一清二楚，腦裡有一本catalog，但仍然好似著了魔，不論經過總壇定分舵都要入去兜個圈，揭下d衫望下d鞋先安落，我已經好好好克制架喇﹗

近日冇喺總壇或有分舵的地方出沒，頭先終於見到利物浦對鞋的真身，雖然俾franchise代理商由建議訂價的$450 mark up to $529，但唔理呀，一早已經鎖定目標，我一定要得到呢對鞋，我要我一定要要

冇38號，check到最細39號都要試一試，仲要喺倉搵一輪

些士甲：利物浦球迷試鞋呢邊

我應聲飄埋去，因為足球，打開了話匣子，sales都變得親切

終於得到呢對鞋，呢對我冇買一定會後悔的鞋，同埋已經唔知係屋企第x對a記鞋，亦唔知係屋企第n件a記物品…

他來電，明天的歡送會鎖定了時間地點，帶個人去就得，唔需要理會邊個去邊個唔去，相信今次又係想見的都會見到，冇諗過見到的可能都會見到，熱切期待中…

因為利記鞋mtr上全程不斷搵人分享呢份喜悅，去到邊都唔知後來他來電，掛住講，講到興起，過左站都唔知，搞笑﹗

近日鍾意形容朋友仔「喺度搞事」，不過唔記得喺邊學番來

他的口頭禪係「成件事錯晒」，值得引用

至於她的「詭異」都係一個唔錯的選擇

謝四林八

7 August 2007

星期6是近期最愛的鹽燒三文魚腩，繼續rapsberry雪芭因為凌晨睇利記的友賽，所以全日眼訓…

星期日食樓下的粉麵有一樣野叫brunch，接近晏晝五點，我呢碗牛腩米是一個廉價t-brunch食粉麵、拉麵之類的物體，我習慣先飲一啖湯，因為師父有冇誠意做呢碗麵，湯底會一五一十講出來，特別鍾意喺日本的小店、街邊檔食拉麵，總會試到令人驚喜的湯底，我係嗰d會連湯都飲埋的人另一碗令我印象深刻的麵，係我至今唯一次到台灣，在九份食過的牛肉麵，事隔多年，唔知味道是否依舊

晚上k活動，去到啱啱開波，community shield chelsea v man united溫布萊上演，專心睇波，沒有理會煙霧彌漫的房間，沒有理會此起彼落的碰杯聲1比1，12碼決勝負，比沙路=射失；我個仔林柏特，雖然戴住隊長臂章，亦不等於有保證，大叫尖叫也於是無補；胡禮菲臘斯最終變成了絕望…十二碼3比0落敗，無話可說，與其怨冇運，不如有風度地讚賞對方門將van der sar神奇和技術超群倒數811英超開鑼，繼續為謝四狂呼，為林八瘋狂﹗

生日之名，輪住來哼，作為主角的他當然成為眾人哼杯的目標，最終咪冧左囉…看清眾人的真面目，無人性的，有風度的，冷漠的，細心的三點幾散水，合眾人之力抬左他落樓，他攤屍街頭，冇人知佢住邊，他迷迷糊糊中up左景林邨三隻字，但咩樓咩室講到唔清唔楚，最終都係送唔到佢走，由唔落雨等到落大雨，最終決定抬他上的士送他到最就近的友人家中欲知後事如何，要問番的士同行的三壯丁

星期一症候群繼續發作，雖然訓得少過平時的星期一，但又唔算特別比平時的星期一眼訓，可能已無可再眼訓好繁忙，時間過得好快，好多野都未做…

忽然喜歡挑骨頭，對她反感起來

幻想代表對生活對生命有憧憬有希望，人生因而變得立體，腦筋也靈活起來，世界變得更繽紛所以繼續幻想，一個人回家的途中也因幻想的情節和對白吱一聲笑出來，咀角由微笑變成大笑

忽然間諗起朋友甲的一番說話：次次一大班人一齊，坦妮同他都喺度，佢兩個都會好cool咁，兩個冇乜交流係，我就係咁，在人群中同我「冇乜交流」的人，通常都係好極端的兩種人，一係平日成日同我密切緊密交流的人，一係真係確確切切冇交流的人

找知音

4 August 2007

朋友甲下崗了一段日子，見到佢問：你搵到工未？
朋友甲：搵到啦
我：咩來？
朋友甲：土地測量署
我：做咩架？
朋友甲：量地
朋友甲呢份工，可以話係一份幸福的工作，又可以說是一份苦差。要求唔係好高，同當差一樣，大學生又做得，中五畢業生都做得，但唔係個個都做得來，做得來又唔一定做得開心，不過好多人做過之後都會轉行，但越做得耐越難轉行，不過勝在幾時入行都來者不拒，絕對唔會介意求職者的年齡，所以好多年紀大的人入行，之後就做一世，唔再轉行

有一句說話叫樹倒猢猻散，猢猻散了，是否意味著樹即將倒下？仍然死守冥頑不靈的猢猻有甚麼苦衷呢？難道被樹養肥了，失去求生本能，逃不了，跑不動？難道被樹滕纏住了，走不得？難道有忠貞不二的猢猻，深信樹有返魂之術，打算跟樹一起共存亡？

期待、憧憬與他再續前緣，我相信沒有不可能的事
我講過，我係浪漫、多情，但含蓄的作家

作家

1 August 2007

尋晚失眠，只怪自己臨訓前仲諗住公事，陷入精神緊張狀態…
記得上次臨出故仔都失眠，今次我要戰勝心魔﹗
不過真係覺得好煩，同她傾電話，我察覺到自己三句唔埋兩句就嗌煩， 事情在我而言有說不出的煩，或者所謂的煩，並唔係你所理解一般的煩，不是濕濕碎碎的煩，而係覺得事事不如意的煩惱和不斷重覆做近似的事的煩悶

weekend係訓好多，但其實漸漸發覺未能達致relax身心 的效果，怒訓，似逃避生活多d，所以好想做d減壓的事，例如去島仔、去沙灘hea下，最好就去個camp或去個旅行啦
不過尋晚睇利迷的朝聖之旅，已經讓眼睛去旅行，笑逐顏開
也許，我算是一個容易滿足的女生
哈哈，我也是一個浪漫、多情，但含蓄的作家

他上次到訪留低的香煙還放在原來位置，何時再見他呢？他欠我的何時歸還？

最新消息

31 July 2007

雖然尋日講到hea打羽毛波，但今日右手都係感到疲累，右掌嘗試握著茶杯，有握不穩的感覺，柏金遜入侵呀…
真係好大鑊，d足球書開始冇位擺了，次次都同自己講，搵日放工早返就執房，但早返的結果係變身出街玩，又話過放假執房，但放假訓到黃斯八晏，跟住又liu出街，lan到冇得再lan先肯返歸，返到去各樣戰利品又繼續堆砌，房間越來越混亂，越亂越唔想執，越唔執越亂，根本就是一場零和遊戲
車仔終於有球迷會香港支部，但入會表格喺邊度攞，網站稱聲要容後公布，有咩咁秘密呀？
朋友仔打羽毛球打到上腦，竟然打算組織社團並註冊成法定團體，以便名正言順用團體名義book康文署的羽毛球場，夠唔夠crazy？
5號晚踢community shield，11號開league，有英超冇直播的日子即將開始了
其實都係時候諗放annual leave了，下個月出故仔，no way，9月出trip，no way，出完返來要pack故，同嘔故仔，睇來10月都no way，11月會唔會likely d呢？一舖應該放唔晒，睇來可以繼續生日休假的優良傳統，睇過月曆，12月頭攞3-7號的話，實際可以放1-9號，正呀﹗
睇一睇月曆，原來8月一日公眾假期都冇架，噢…

啱啱收到最新消息，原來6號係他的生日，他的email一早揭示了，點解一早發現唔到呢？
因生日之名而召集的遊樂活動，又多一場﹗
如今看來，下個月的weekend都安排得七七八八，唔使怕悶﹗

剛才睇到d利記粉絲到anfield同melwood朝聖，我都想去呀…
如果咁啱撞到d賽程有主場聯賽加主場歐聯就good喇，但d飛肯定貴到阿媽都唔認得
我知我去親england一定好大鑊，最低限度要去四大球會朝聖、追星，我唔介意日日咬老麥架，只要俾我喺每個球會掃一喼紀念品，到時真係要張冇limit的黑咭

不要深究少爺仔的真正身份

30 July 2007

情緒高漲的一星期過去了，又回歸平淡，玩夠了，仲有半個月出故仔，要收拾心情，做完再玩過丫﹗

weekend hea過左，尋日去左沙田搵書搵衫搵鞋，跟住去左食飯，晚上本來睇阿仙奴四角賽或德國盃決賽，又冇左件事，最終反而係ko左強劍
今日訓醒都三點幾，睇碟，跟住入左馬鞍山，約左好耐的打羽毛波活動，終於成事了
約左食晚飯，真係冇諗過頹食大快活，跟住慢步往馬鞍山體育館，好彩唔係桑拿場
運動方面總算有點小聰明，有點ball sense，如果係初學，總是快上手的一群，但為人就係冇恆心、冇耐性，不肯再花時間鑽研下去，羽毛球如是排球如是網球如是壁球如是保齡球也如是，一句到尾，三分鐘熱度，所以頭先只係hea打，如果覺得part我打好辛苦，先行撒冧
不過三分鐘熱度的事情還有好多，我想學騎馬，又想學潛水，仲有講左好耐想學攀石，同埋好應該一早學的游水，不過更重要的係要學儲錢

他說家庭中的她即將結婚了，對我而言，消息聽來很冷淡，在座的眾人也很冷淡，她的名字何日起變得陌生？
結婚，成為了最近最熱的話題，同天氣一樣咁熱，也同少爺仔講開，他說打算買樓，原因係為左個club house，他說每個月俾幾百蚊join d fitness club好貴，咁不如買層有會所的樓，我聽到O晒咀，吓？為左個每個月慳幾百蚊月費變相供成皮野的樓？真令人百思不得其解…
他後來兜，話買得來供到咁上下結婚，他問冇叠樓點結婚？婚要在35歲前結，這是他說的，不論男女，我沒有深究點解係35歲，他只說如果35歲前唔結，應該一世都唔會結，一直玩落去，又係令人費解的理論，算﹗
和他一起分析，結婚都要洗好多錢，又唔會突然間生左一大舊錢出來，所以如果結婚同買樓一齊做，邊度有咁多錢？結論係而家買樓都啱，但講到而家的樓價，太貴，唔知點買，買左就要時刻諗住叠樓，唔可以一個唔鍾意就轉工，亦唔可以再做冇腳的雀仔…

她的樣貌確實能夠騙人，比她的實際年齡輕，問到她何時結婚，有冇諗過結婚，她的回應竟是：隨時

同一番說話，不同人有不同的解讀方式，對號入座，簡單的四個字就說明了一切

大家有冇發現，你慢慢在blog中消失，換上更多的他和她和朋友仔，對，這是更值得分享的事情
少爺仔只是其中一個他，信不信由你，不要再深究他的真正身份﹗

同我同日生日的JT續約了，周薪是13.5萬鎊，折合港幣214萬元，你我一年都搵唔到的數目，他一星期就得到，當然，我明白做職業運動員所付出的不是你我可以想像，JT更是在超級殘酷的英超打滾，自然有他的本事，過去總是羡慕不已。不過充滿謝拉持男人味的練習衫將我震撼，不得不相信事實，也不要活在夢裡，不要再羡慕他人，百萬周薪確確切切是需要用汗水、傷痛、壓力、私人空間擠出來的。更重要的是即使你願意付出同等份量的汗水、傷痛、壓力和私人空間，也不一定可以得到同等豐厚的報酬。你看南華的球員，也是用艱辛譜出足球夢，但得到了甚麼？JT和gerrard只是千百萬中少數成功的個別例子，香港700萬人，也不能打造一個及JT一半的鐵衛、一個像gerrard一半的神奇隊長，香港人，醒下啦﹗

晚上搭車返屋企時陷入沉思，歎了一口氣，有冇人察覺到呢？
俗語云：人生不如意事十常八九，可與人言無二三
男人為錢為女人煩，那麼，令女人煩的事，也該是錢和男人
只是三言兩語，足以說穿一切嗎？

他問：究竟你一個人可以生活了多少天呢？極限係幾耐？
我還未開口，另一個他已經代答：佢咪生牛牛坐左喺度囉
再次多謝各位讀者鼎力支持，真不枉我每日寫低一千幾百字，娛人娛己
睇人地的blog，見到有一眾留言，以前真係好恨，曾經有一段日子，經常叫人留言，不過實際上真係冇咁的需要，如果係三唔識七的人留言，事不關己都評頭品足一番，的確無聊，冇人留言又唔代表個blog冇人睇，我d讀者真係好有heart，會在現實生活中熱烈討論，圍埋一枱時總有人講起我曾經講過的事，又或者問起他是誰之類，我奉旨唔答的問題
我都有做其他blog的讀者，真係唔係賣花讚花香，呢個blog又真係幾好睇

you'll never walk alone

29 July 2007

When you walk through a storm, hold your head up high and don't be afraid of the dark.
At the end of a storm, there's a golden sky and the sweet silver song of a lark.
Walk on through the wind, walk on through the rain, though your dreams be tossed and blown.....
Walk on, walk on with hope in your heart and you'll never walk alone, you'll never walk alone.