唱晒d心聲出來

22 October 2007

一早預告每日要玩兩場，所以由thu放工到呢一刻，共玩左6場，見到想見的人，見到好耐冇見過的人，見到冇諗過見到的人

fri第一站入元朗bbq，亦係之前預告左，渣車的朋友仔冇來接送，結果自己搭西鐵碌入去，以為遲到，但意想不到地時間啱啱好
四點幾，大家都係食第一餐，熱切期待的第一餐﹗
九男女乜都喪食，我推介豬扒夾麵包，激好食，另有我私伙帶來的棉花糖
乜我個樣好唔善良咩？
朋友甲好鍾意扑野，見到野就忍唔住，要扑，扑到一地都係，搞到周圍都污糟晒…
anyway，真係唔該晒你扑爛d好大舊的炭﹗

9點幾一齊散水，分頭行事，8男女去碌拎+打牌，我去老地方唱k
又係我地玩開嗰間大房，第一件事梗係要同正日生日的人兄敬酒啦﹗跟住同男主播合唱一曲，玩下骰仔、飲下酒、打下wii，雖然後來搶remote搶輸左，他問我識唔識唱第7首，我叫佢他點完插播，結果…
因為歌名、歌詞、兩名合唱的當事人，再加上旁邊配以現場劇場版讀白的推波助瀾，引來一陣小哄動，差點搶去主角的風頭，獲得全場鼓掌，多謝各位﹗
不過我想講，首歌真係好難唱，越唱越激動，動了真氣

既然是對你有感覺，應該知道是刻不容緩…

繼續不斷搞事，聊人飲、聊人玩，每次行左出房，返入去時都在玻璃窗同大家揮手，有人發現我，互望傻笑，跟住先入番房，哈哈哈

我：我冇同你影相喎
他：車，成日都見，影乜鬼

wii局保齡球，他批評：同我打又打d咁既波…
我：我呢d英格蘭人，(指住他)好明顯遇弱越弱，(指住另一人)遇強越強

後來d人散得七七八八，同他玩包剪揼，係，不過輸左打手板，好痛，隻手好多星星，好痺，又紅又腫又熱…
打烊散水，執雞儲左400幾k分，yeah﹗

沖左個涼訓，十二點幾朋友x打來，問燒唔燒野食，吓？
我：我未訓醒呀，訓醒先搵你啦

等緊朋友xx出去同食晚飯期間online，他問我得唔得閒，過唔過馬交，孤男寡女，咩料？
事緣係他阿爸book左兩間威尼b人的酒店靚房俾d尊貴的client，殊不知d client早左撇，兩間房吉左，他第一時間就諗起我﹗
好可惜，真係好可惜，我星期日，即係今日要返工拍野，所以白白迫住要同兩間靚房say goodbye…

為左join埋bbq，所以迫朋友xx早d食，日本野，again
special推介係原條秋刀魚刺身，正合我意﹗
後來喺旺角join番佢地，遠處見到佢兩個陰陰咀望住我笑…
甲：乙隻手瘀晒
我：我隻手都仲腫緊…

大家忽然好好奇問起我幾時生日，我當然好慷慨地唔介意亦非常極之大方地話俾大家聽我係12月7日生日，原來同場都有人同我同一日生日，呢個世界真係細﹗
所以發起人建議12月1日再搞一次海鮮bbq party，地點照舊，當然要叠馬d啦﹗

住喺對面的他帶埋阿嫂過來坐坐，而夜更兩個人先行落來，另一個人以「返屋企痾屎」為由稱遲d到，呢個理由有冇畸呢d？
初初以為嗰個人只係推搪所以講埋d咁既理由，但結果佢都係落左來，我都係第一次見佢出席呢類活動
三點幾撇，原來我唔識搭小巴，回想番原來次次萬一如果要夜馬馬喺大西北返屋企，都會有柴可夫車我返去…

今日返工，夜晚喺cwb浦左陣，食小籠包，多汁好味﹗
但實在太眼訓，喺mtr上喪訓…

呢幾日一得閒就牛咁眼(目及)住個cable，唔係睇節目唔係睇新聞，而係睇廣告，因為我要錄d promo

乙隻手尋日瘀左，我隻手今日都瘀埋
可能我新陳代謝慢，今日先發出來，痛…
再加上頭先喺樹林餵蚊，慘﹗

********
另外有重大發現，就係youtube上有《尋龍記》的promo a-g…
http://www.youtube.com/watch?v=Q1DuaGf8pLc
http://www.youtube.com/watch?v=zyZFNoawxoI
http://www.youtube.com/watch?v=CAI-8IC7vv0
http://www.youtube.com/watch?v=URsNhBTeaZo
http://www.youtube.com/watch?v=Q9IsctZ9i8c
http://www.youtube.com/watch?v=0-LSKMlTOfU

頭兩條有我份，嘻嘻

埋來睇埋來揀

19 October 2007

再一次更正，d promo原來其實係mon開始播，真係唔講冇人知…
播左幾日，終於有d迴響，引起討論，例如有人comment今日有我份條promo有戰地feel，雖然唔知點解；亦有人對於namecard有d意見；有人扮我拎住相機係咁影相等
都係因為我啫，哈哈﹗
但d promo「玩野」程度我相信只會越來越高，仲突登為聽日嗰個promo補錄一段vo：我既唱歌天份係點仲有待發掘，但係尋龍記攝製隊喺新疆同蒙古搵到真正的唱家班
well…

今晚開始，每日都有兩場gathering，真繁忙﹗
玩晒佢，玩埋星期日出crew冇得玩嗰d

秋高氣爽最好bbq，上次元朗個場燒過番尋味，明日再續
但放心，應承左去的老地方k局我一定到﹗

他突然說我個blog好好睇
我感到十分疑惑，究竟他係講個blog的咩內容呢？d情節、寫作手法定係d相好睇呢？
我：好睇咁繼續睇啦﹗說話講起上來有d猶豫，唔知俾咩反應，再問：你睇邊個blog？
原來佢係話公司出trip個blog，即係十大之作的《滇藏拾趣》，多謝﹗

http://yunan-tibet.blogspot.com 歡迎參觀

唔到最後一刻都唔睇醫生

18 October 2007

好日唔早訓，早訓嗰晚就勁多電話，後來都係訓唔到，睇電視、打機打通宵…

人在外特別無聊，繼續狂mobile上網，趁呢個時候玩facebook都幾ok
但玩facebook的原則不變，就係人唔add我我唔會add人，既然我唔想朋友的朋友的朋友，即係可能極之大機會係我三唔識七的人，參觀我的friend list，我一視同仁地在所有人我add時都係只容許佢地睇到limited profile

陳醫生開咁多次演唱會我都次次捧場，今次當然都唔外啦
以咁多次的經驗，睇演唱會，仲要睇醫生梗係一定要睇尾場啦，因為佢會發癲地喪唱，唱到唔捨得走
之前一直都未確定睇邊場，原來，係睇終極尾場呀﹗
呢個時間best fit我的工作時間表啦，因為10號出故仔，唔使驚撞左剪片期

好憎約人的時候，d被約者話唔知呀、未知呀之類，久而久之，我唔再做發起者，唔再約人…

真係唔知鍾意英格蘭d乜，攻不強守不穩，悅目足球絕對稱不上，遇強不見得越強，遇弱一定越弱，狀態水準飄忽，戰術單調甚至低b，麥生真係未夠班…
但就係犯賤鍾意睇佢驚心動魄，明明十拿九穩的波踢到驚險萬分，唔知幾時會突然發揮小宇宙，但小宇宙又唔係次次發揮到，總令人期待，期待後失望，但失望又未見絕望，令人又愛又恨，愛恨交纏
作客輸俾俄羅斯2-1，仲要係先領先，真係o晒咀…

三日連假引伸出來接二連三的活動又kick off了，撞晒時間…
哈哈，都係我多朋友啫﹗

另外，要更正，原來尋龍記promo星期日冇出街，原來係星期二先開始出街，而家已經見到d promo喺市面碌緊，正嘗試錄低佢，集齊一套，不過都幾高難度
而節目細題亦改左名，現稱《茶馬古道行‧普洱篇 / 馬幫篇》，但我個人唔係咁鍾意，略嫌平淡左d…

final fantasy

16 October 2007

如果講說話係一門藝術，咁聽說話同樣也應該是一門學問
有d人講野有玄外之意，你要好小心聽；有d人講野唔經大腦，你要好用神聽；但有d人講野順口開河，你千祈唔好放在心上
還是遇到後者的居多，未知是好事定壞事

繼續沉迷，不能自拔，想著你…
個心突然離一離，希望對你的一點感覺，只是final fantasy

被招覽左入教…
放心，唔係邪教

任性

October 15 2007

今日再聽到「任性」呢個形容詞，係，形容我

前兩日買左個袋冇貨，急不及待再去sogo攞番，再ko埋cwb的check point，即係幾個分舵
well，換季喇，d新款終於見到真身，結果…
助養小惠同小霞的計劃告吹了，因為兩個quota都買晒adi

頭先稍為執下屋，點算過我的adi外套同波衫兩大collection，但其實距離「迷」，仲有一段距離

點解睇左幾個鐘都見唔到d promo？

自閉症

October 14 2007

走在事實最前線嗰個台今年的特備節目係《尋龍記》，個名係我hea底發悔氣時諗出來，anyway，節目未啟播之前，promo，即係《尋龍記》日誌將會喺星期日，即係聽日起開始出街，意念來自四小強周圍碌，well，我係其中一隻周圍碌的尋龍小強
我負責寫稿、粉墨登場嗰集暫名「茶香遍古道」，將會於12月9日晚8點半播出；至於我演出嗰集，暫名「馬兒鈴鐺的呼喚」，將會壓軸喺12月16日2晚8點半首播
今日自閉症，訓覺同埋喺屋企打機、睇波、玩電腦

英格蘭的波衫，每一個冧把都有一個意義，唔係個個都著得起，例如7號的主人係碧咸，4號係謝拉特，換左第二個著都係怪怪地，而8號波衫比15號更襯你

放假冇咩特別，冇三四點我都唔會起身，朋友仔都唔會約我早起，不過，你開到口梗撐你啦﹗突登較左鬧鐘12點20分，預埋懶床時間，跟住坐定定等睇cast有d鏍絲咁啦，個樣就話晒俾人聽緊張，但咁耐冇讀再讀番，仲要係live，好難怪的，又唔知係咪係d稿唔好，斷句怪怪地，雙眼冇咩神，精神d啦﹗仲有個髮型唔係好啱做anchor，留番長d會好d，同埋，唔好著件咁窄的西裝褸啦﹗哈哈哈anyway加油﹗睇到d newsgroup/討論區，開始有人討論你，另外重大發現係，原來你似唐文龍？﹗

大功告成

October 13 2007

《滇藏拾趣》的偉大工程終於大功告成，喺http://yunan-tibet.blogspot.com/發表，另有簡易版喺相薄
另外，積極考慮自行出版印刷版，詳情待訂…

即將發行的《滇藏拾趣》

October 12 2007

《滇藏拾趣》的編輯工作終於完成了，還餘下後期的發行工作…

原本諗住搵佢地食飯，原來一個上京一個放假，算啦
結果食公仔麵、打機、訓覺、玩電腦、hea

他msn問我how r u？
問埋d咁奇怪的問題，anyway，食咩你話事啦﹗

我住喺宇宙銀河系藍星

October 11 2007

前晚被人約左去食飯，尋晚應邀去老地方唱k，所以《滇藏拾趣》的編輯工作又停滯了…
尋晚又發生了很多事，一定要記低

事件一：
由80號房轉到1號房，我幫他拎野，見枱面包煙，咪拎埋囉落到去
我搵電話，唔知去左邊，我明明有攞落來架
他：頭先見你部電話喺枱面，你唔係攞包煙冇攞個電話呀？
我：有呀
他：你幾多號電話？
我：&?>!#%^?
他：咦，仲通過，快d上去搵啦
我拎左他部電話，一邊打電話，一邊上去搵
我：我頭先漏左部電話喺間房裡面
電：邊間房呀我：80電：但我喺xx號房喎
我：吓？
電：咁你係咪過來？
我：你喺邊？
電：尖沙咀neway xx房囉
咩料？係咪搭錯線？

再打左一次
電：尖沙咀neway
我：我頭先轉房時漏左部電話喺房
電：邊間房呀？
我：我由80號房轉去1號房
電：你留低電話啦
我：(猶豫左一陣…)咪來電顯示呢個電話囉
電：個電話冇來電顯示喎，你留低電話啦
我：其實你喺邊？我係咪落番counter攞番部電話？
電：尖沙咀neway
我：吓？點解會係尖沙咀？
電：係呀，我地執到d失物會送晒去尖沙咀
我：但係我啱啱先喺旺角neway city轉房之喎，有冇咁快呀？
電：係呀，我地效率好高
我：吓？你叫你經理來聽
電：尖沙咀neway
我：我頭先轉房時漏低左部電話喺房
電：咁你留低電話同地址丫
我：宇宙銀河系藍星
電：好呀，咁一個星期後送番俾你丫
我：你玩野呀xxx(電話中人的花名)

俾人整蠱啦，好彩冇留電話啫，如果真係，我會留某人電話囉，咁佢地一定會打俾某人，咁某人身份咪會曝光…即刻打番俾某人，真係要高呼好險﹗

事件二：
佢係咁點合唱歌，真係唔識唱喎…
雖然我成日薜凱琪，但唱到目黑時，原來我真係唔識唱，淨係識唱男聲唔識唱女聲囉，不過我承諾下次學識再同佢唱，事後諗番，因為呢首歌冇收錄喺薜凱琪的專輯內

事件三：
她和他和他都奇奇怪怪，鬼鬼鼠鼠，傾d咩？梗係凝住關我事

事件四：
他又問我有冇搵某人，呢排同某人點，well，一直都冇野呀

施捨報告以《香港新方向》為題，我又幾時先搵到新方向呢？
一邊聽，一邊忽發奇想，不如收購一條圍村，或者喺大澳收購一排棚屋，改裝成酒店，就好似麗江同香格里拉見過的古城酒店
而今年睇施捨報告的心情好不同，因為唔使趕故趕cast，但我都估咩野可以做folo up，點樣做，乜野可以事後放長線跟，眼界開闊了
三個台的包裝，當一場show咁present，亞視最畸呢，6個喺office做的ob，咩料？仲有中央台式的並冇特別意思的無聊扒頭，真滴汗畸寶個vitual set有d 娘娘地，點解施捨報告4粒字係打橫，07要打直寫，古古怪怪吹bb個set最靚，但present手法最保守，可能太risky to 試新野

放工約左他去食車仔麵，呢檔絕對係全香港最好食的車仔麵，所以搭廿蚊車，去食碗都係廿蚊的車仔麵都不為過，仲要有我飛佛細支可樂﹗

喺msn係我講開佢ex-誹聞女友，佢反問我同某君又點，扮無知，不過有少少先聊者賤的感覺…

那一次手牽手

October 09 2007

突然被拖住的感覺，真係好奇怪
毫無先兆，毫無準備，事情發生前一秒，甚至講緊不相干的話題，嘻嘻哈哈，亦冇諗過係佢
那一刻進入了高速思考的模式…
1. fing開佢隻手好，慢慢鬆開好，定係手部俾d反應等佢縮手好？
2. 縮手會唔會hurt到佢？
3. 如果我縮手佢仲捉住我點算？
4. 縮手後同唔同佢講野好呢？
5. 如果講野講咩好？
6. 如果唔縮手佢會諗咩？
7. 佢會唔會講野呢？佢會講咩呢？
8. 其他人會諗d咩呢？
諗到呢度，夠喇，佢拖左一段極短時間，但同行的她正望緊過來，其實我係驚其他人點諗，所以我慢慢鬆開手
我話：唔該晒，但我唔會無啦啦跌親
佢好糗地笑而不語
然而，心如鹿撞的感覺，還是避不了，免不了，或許就如同被嚇一嚇，魂魄歸位後，百毒不侵，百無禁忌

那一次，我伸出左手，我肯定是左手，示意曖昧的他拖著我，他手心冒汗，現在還記得很清楚，那是令人回味的感覺，難忘且無可比擬，不能雙題並論

今日，發生左好多事，生出很多感覺…

今朝發左個夢，夢中他的ipod係改裝過，可以自訂skin、情景同主題，情景中有一卡通公仔，表情多多，造型百變
他：你覺唔覺得個公仔有d熟口面？
我：咦，咁似我細路仔個樣既？
他：你而家都係細路仔咁既樣
如果ipod真係有呢個function就好喇，哈哈

有時gathering或食飯，有d唔係好熟的人喺度，感覺怪怪，你可以話我排外
不過我會用我的方法，令佢知道我唔鍾意佢的出現，但其他在場的人唔會察覺

看到一個屬於一間慈善機構的網站，認捐一樣物品只係三百蚊，就足夠一名孤兒一個月的生活費，仲有一件民族衫或一對民族鞋或一個民族布袋渣手，對比起自己，收條唔等使的電話繩小禮物，都已經係四百幾蚊，真係奢侈…
如果我同你食少餐日本野，就可以助養兩個孤兒，讓他們一年溫飽，買少兩件adi，又可以助養多一個…
忽然間生左d愛心出來，如果幫佢地改名，不如就用我同你個名啦，排「小」字輩，即係小惠、小霞、小？同小﹗有四個quota

繼續日食三番

October 08 2007

今年夏天都未遊過船河，因為工作，竟然意外地郊遊吹吹風，爽﹗
好在尋晚bbq儲定能量，頭先lunch冇啖好食，chur左一罐冰凍可樂，加一碟豉油皇炒麵，後加一碗激滑山水豆腐花
遊船河、行石灘、行樹林，冇帶相機，真係蝕晒﹗

繼續《滇藏拾趣》，編輯工作完成左大約三分之一，冇訓，又唔係好眼訓喎，不過曬到塊面紅卜卜
吹吹風嗰刻真係忘憂relax，但返到屋企沖左個涼，好累，散晒，一dat落床就訓著左
八點幾先起身，帶埋謝拉特出去ko埋我d牡丹蝦、拖羅、活帶子、海膽…

其實尋晚冇乜心機打blog，hea底，求其打左幾隻字
因為朗尼入波，講開謝拉特上次撞到個細路，個細路話：點解撞到我嗰個唔係朗尼？
謝拉特仲突登去搵朗尼簽左對波鉢俾個細路，真係恨死人
某人扮我話：謝拉特你撞到我真係好，但如果同林柏特一齊撞到我仲正，哈哈哈﹗
而是日IQ題係：中央之前推出左一個新政策，d非法入境者聽到好驚，咁個政策係咩呢？
原來大家對中央的政策的確了解唔多，正確答案其實係：QDII
~大笑~

好在金童在最後一分鐘追番粒，先唔使主場輸波咁核突…

燒雞翼，我十分鍾意食

October 07 2007

訓到晏晝4點半被電話嘈醒，突發去左燒野食，地點係元朗，好朋友屋企隔離個燒烤場
經過過好多次，但喺度燒野食真係第一次，食物款式同其他場大同小異，最大的驚喜係投射電視有英超播，但令人失落的係講泰文

加炭的最高境界，係唔使潑火，加到d炭唔會com住d火，頭先我就做到喇，哈哈哈，係咪要頒個bbq既phd俾我？
我絕對唔係嗰d坐喺度，翹埋手等食嗰d，我會自己照顧自己
不過頭先冇再挑戰燒雞翼的紀錄，噢…

繼續《滇藏拾趣》，不過一陣8點3返公司出車再上船去荔枝窩，唔打算訓覺了

4樓私竇

October 06 2007

尋晚真係好畸呢，唔知點解打打下blog電腦突然間自動熄機、燈又自己熄埋，停電呀？咩料呀，但冷氣仲著緊喎，凌晨三點幾，既然本身都好眼訓，不用深究，都係訓覺，頭先返到屋企諗諗下唔對路，check下個總掣，原來只係路跳左掣，好彩，但搞到我篇blog冇左囉…

好耐都冇做過d無聊野，尋日發神經，行番嗰條路，諗住去搭番嗰架車，結果真係撞到嗰個人

同他去做小肥人，好飽呀，肥羊粉同致癌物都係我飛佛，而打邊爐梗係唔少得我的好朋友細支可樂啦﹗但食完勁口渴，再ko左屋企一支有汽利賓納

被她約左去飲野，有野傾喎，所以食完返去快叉左一陣先出去

繼以前勁去的5樓，keep住唔耐都去的3樓，今次發現了新大陸，位處4樓，好good feel，仲可以bbq，開到凌晨4點，如果上次中秋bbq活動前開發到呢度就正啦

有人曾經問我，點解要講埋d幾多樓呢d暗號，我話同我去過的人先知我講邊度，感覺private d、私竇d啫其實我最鍾意10樓，tst的地下同2樓都係唔錯的選擇

但有朋友反駁話：咩private唔private丫，知你去tst，喺總壇一定僕到你，知你去cwb，京士頓街有adi又有dmop，一定「撞」到你

bite of yesterday：如果得一個人食飯有時我寧願唔食

可想而知我係一個幾怕孤寂的一個人

改左facebook的religious views，對於我呢d無神論的人，及時行樂都係一個幾好的信仰

之前一晚睇歐聯，尋晚又夜訓，真係激眼訓，所以頭先返到去食左少少野就訓覺，以為friday night就咁訓醒睇電視玩電腦，就此孤獨地過去，但他call人飲野，所以由一個人變成8個人吹水飲野，地點係3樓

頭先的陣容配搭係近期少有，咁樣坐埋一枱野野烏都幾開心

我地估某甲係咪放飛機，我形容佢做飛機司，因為咁先可以顯示某甲喺放飛機方面的專業水平和高深莫測的層次
又多一個人走到事實最前線，越來越齊腳，就來將間舊公司搬左去荃灣…

札住上

October 04 2007

本來諗住去打邊爐，結果衡量過，都係返屋企訓覺好d，因為打完返到去肯定要十一點，十二點搭三過d又睇妙手仁心，兩點九開波，咪即係唔使訓…
返屋企前抬左10支有汽利賓納返去，好重
但搞呢搞路，九點幾先訓，訓到十二點起身，跟住睇tv、玩電腦、睇波
本來諗住睇利物浦，但太悶，下半場轉場睇車仔，joe cole同杜生真係爭氣，客場不被睇好下反勝1-2，但睇住JT上場受重傷，面骨爆裂都戴住面罩札住上，真令人敬佩，無論如何我都唔會離棄你
不過利物浦主場諗住睇住來食，點知輸波，一和一負，出線現危機

dum左咁多日，黃金周都放完，開始左《滇藏拾趣》的編輯工作，大家拭目以待啦﹗
只係同許願樹講過一次想要呢隻碟，你上次買錯左，今次終於搵到了，thx﹗

我要加入土地測量署﹗

October 03 2007

尋晚玩電腦玩到三點幾，一d都唔眼訓，但都係去攤左一陣，結果都係眼光光望天光…
睇住紅色的窗簾在黑夜中吹到凌空飄揚，天花的螢光星星貼紙越來越暗淡，天色由黑漆漆變成深藍，再變成暗白

無緣參加現代科舉，因為我錯過左報cre的日子，唔通咁都走去報aore，喺份卷度寫「我未考cre，答得幾好你都唔會請我，不如等我下次再來考過啦」
搞事咩？
但唔知係咪旺政府呢，定係政府工越來越易打呢，呢排好多朋友仔加入左政府，最受歡迎個部門係土地測量署，仲嘭嘭聲升左做香港特別行政區首席量地官添，個朵真係夠照

頭先去supermarket買野，都揀左6樣咁野，去俾錢
收銀甲：(語氣極差)有冇帶膠袋？今日無膠袋日喎
我：冇喎
佢照嘟
我：我而家都係唔買囉喎
呢件事的教訓，係千祈唔好得罪我，對我唔好的人，我一定回禮﹗

唔知點解，梗係凝住今日仲係星期一，可能第一日復工的關係啦
但其實今晚又開歐聯，但戲碼唔夠吸引

頭先閒談講開，叻既五六年做高記，普通d既七八年，如果我仲喺呢行既話，以我呢d年年係咁轉工既冇腳既雀仔，可能到卅歲都仲係一個記者仔，哈哈哈﹗

當十‧一黃金周終結時

October 02 2007

以一餐豐富的宵夜結束我的十‧一黃金周，有中、大toro、牡丹蝦、油甘魚、魚蛋、燒賣同珍珠奶茶，而呢餐宵夜都咪話唔犀利，係早餐午餐下午茶晚餐宵夜五合一﹗
天光去訓，天黑起身的日子來到終結，回歸朝九晚七的工作，兩大隻故仔等緊我，睇住啦，做晒d野一鋪放晒嗰9日annual﹗

去年的十一國慶，我放假，五壯男撐我，原來咁就一周年了﹗

和你分手已有多年，本來早不應該懷緬，可是已習慣，夜裡回憶重演…
無法解釋，也無法改變
剛好接到你一封信，信內說到你的戀情：你和她之間充滿美麗憧憬，好想祝福，卻言不由衷
當我知道你們相愛，有了開始有了未來，想替你開心，人卻無法釋懷，我的悲哀在眼底徘徊
當我知道你們相愛，我的心底泛起許多無奈，我的心在哭，我真的在乎你的離開

你和我的可能性

September 30 2007

你上次欲言又止，話見到面再講，但結果你沒有出現，well…

true or dare的問題是：你feel唔feel到舊公司有冇人鍾意你
答案是：冇
問題係真係feel唔到嘛，我真係唔覺得有人對我特別好喎，即使係對我好又如何？人地熱情啫…
況且又冇人明示暗示過甚麼，feel唔到好出奇咩？一句到尾：敵不動我不動
人與人之間的關係，根本沒有必要想得太複雜，正所謂人夾人緣，即使係玩得埋、傾得埋，甚至有些少丁點咁多心意相通，也不一定是有路，除了男女關係，其實還有很多可能性
一班人，必定有男有女，是否有需要時常想著有冇人鍾意自己呢？是否有需要在有限的選擇裡強迫自己找個目標呢？
除了誹聞，沒有更好的話題嗎？

他是搞氣氛的高手，挖苦戲弄和穿鑿附會，無傷大雅，但他有時候用詞太過出位，不只一次有人略有微言，可能冇人同他講過，又或者他貫徹我行我素作風，唔啱玩唔啱聽的人自己彈開，他從不收歛
我知道他有睇呢個blog，就等我做丑人，代當事人反映反映

剛才談到今年施捨報告的pre-story，原來又一年了…
時光飛逝，日月如梭，去年呢段日子，煩到一頭煙，如今仍瀝瀝在目﹗亦為煮九大簋的事開罪了不應招惹的人，受了委屈，還記得他晚上來電聽我訴苦，好在有他撐﹗
6個仔，縱使被百般习難，我自問仍與他夾手夾腳湊到佢地肥肥白白見得人，真係唔容易
一年後的今天，你我他各有所忙
未與你相遇相識之前，我們各自生活在地球的某一角落，冥冥中的安排，將我們牽連在一起，捱過笑過，還對著你哭，然後散了別了，記憶中烙下彼此的名字，你的頭銜是「朋友」