原來係你﹗

29 January 2008

頭先放工時間收到一個長途電話來電，惹來一堆疑團…
我已知今日咁啱不在hk的朋友仔分別身處東經121度北緯31度和東經121度北緯25度，佢地都應該冇理由會山長水遠無啦啦搵我
anyway電話照聽，老實不客氣問：你係邊個
哦…
原來係你，無啦啦俾人掟左上廣州的你

冬天有一些習慣，大家討論起上來，份外親切
講到訓覺時對腳好凍，我話會用風筒吹暖張被同對腳，有同好的，自然產生共鳴
又講到暖手的方法，我話燒野食嗰晚放對手去烘，她說煲湯時都會放對手去火爐旁邊，我又記起尋晚蒸蝦蛟做宵夜時都放埋對手去蒸
同埋d短裙仔都係最凍的日子先出動﹗
今日短裙仔繼續出動，晚上係是月重點節目之一，joey's concert 2008，紀念品係小忌廉星星變身棒，有癲癇症千祈唔好入場，閃到你嘔﹗
但點計點算都係醫生個show好睇d，好似開party，入場的心情似去玩，去enjoy myself and enjoy together，好易投入好易natural high
anyway，頭先場show都係good show，係本地少有值得睇的concert

仲有，今年係潤年，好似有人7歲生日喎，有冇人幫佢搞生日會呢？
如果我喺香港的話，我會出席架
不過真係好可悲，2月29日生日的人，特別短命…

最近經常發夢，總想夢境成真…

心思思

28 January 2008

著起嗰件黃色羽絨，變身成pooh仔，大左兩個碼，中圍肥胖﹗

哎…
香港人shopping的最後一個根據地都俾自由行入侵埋﹗
冬眠完去左cwb搵食，但前後左右都係操流利土話的大陸人，好討厭﹗
我：唔講我以為自己返左大陸
朋友甲：自由行促進經濟
我：可能喺東京嗰時，d日本人都係咁諗，唔講以為自己去左香港…
銅鑼灣究竟邊度冇自由行？我諗d自由行對vcd同dvd冇咩興趣，走左入其中一間vcd舖，後來去到adidas分舵，d自由行同我揀埋同一件衫，i hate it﹗
但好彩佢地仲未識去隔離街間J-01
之後去中央屠豬館搵書，經過維園，乜我去左菲律賓咩？
可唔可以將d自由行同賓賓遞解出境？
身處屠豬館，朋友甲話：呢度咪冇俾自己行攻陷囉﹗
哎，真可悲…

不停掃街，掃到食唔落飯，朋友甲初初話驚唔夠飽，我話：食唔胞咪隊件雞蛋仔囉，再唔飽隊多件格仔餅喇，實飽﹗
朋友甲冷叻：再唔飽就唔好煩，mat大個口叫阿姐倒d蛋漿落個口度
低b﹗

雖然最近睇少好多波，你又傷左冇波踢，但我對你從來都係不離不棄，咪掛番有你個樣的月曆出來囉
其實我間房都幾唔match，閒閒地有幾十隻甚至過百隻虎仔pooh仔，但又有幾張球星poster同十幾個球星figure公仔

有時候有些人的出現，干擾你的思維、破壞你的計劃，甚至打亂你的生活
如果，如果我曾經也不自知地做過這般壞事，請原諒我﹗

人也總有些陋習，得不到便心思思，得到了卻懶懶閒…

我真係好鍾意bbq架﹗

27 January 2008

冬眠的意義，就是毋需理會時間的流逝，毋需理會地球是否轉動，隨心所慾地睡夠本
捲在被窩裡，大被牽過頭，在輕微缺氧的狀態，睡得特別寫意﹗
黃昏時分才為胃口起來…

原本諗住去踩單車，但有朋友仔話天氣凍，否決了此周末的節目，結果忽發奇想，向元朗出發，行動係bbq，咪又係之前次次都係去開嗰度囉
大西北真係大西北，西北風特別勁，好狠凍，全程黐住個爐都頂唔順，對手就來放左落d火度，早知唔好冷壯，著件羽絨出來啦…
天氣凍，食到冇停口，不停食喪食，d豬扒真係好正﹗
去飲茶就話搭枱啫，bbq我唔同你搭爐喎，哈哈﹗

燒完碌左出旺角一轉，去某商場的扭蛋舖獵奇，今次係disney為情人節出的扭蛋，10蚊一隻蛋，內有兩個公仔，一套5對，可拼埋成一個心，我唯獨想要阿pooh咋
間野好鬼熱鬧，分別有幾組人喺呢set扭蛋機前，喪扭，但睇來嗰幾班人係唔識的，但都好想扭到某款公仔，邊款就不用深究，我諗住攝過去扭，其中一人問我想要咩，我話要pooh，佢就以10蚊原價賣俾我
其實咁樣買蛋，完全失去扭蛋的意義，隻蛋10蚊，5蚊係為個公仔，5蚊係買嗰份期待
不過今次，是但啦…

後來經過另一間舖頭，發現一個鬼馬小鱷魚鎖匙扣，其實係鱷魚牙醫玩具的迷你版，只有8隻牙
講開鱷魚牙醫，有一段笑料…
話說我第一次接觸鱷魚牙醫，係大約兩年前，同舊公司的friend去d上樓cafe飲野時，大家都覺得我好奇怪，呢d小時玩意，我竟然冇玩過
而爆笑的係唔知點解玩呢個鱷魚牙醫就會異常hyper，natural high…
買左就梗係同朋友即場玩啦，非常十分極之超級緊張刺激﹗

呢排經常行vcd舖，初時為左搵《野‧良犬》，尋晚在朋友甲手中得到隻碟，但習慣依舊…
我有一個原則，就係要尊重電影院，所以有時寧願錯過一些可能好睇的戲，但都唔會入戲院睇爛戲，所以我甚少為左消磨時間去睇戲，更加唔會一個人去睇戲
爛戲的定義可以很廣泛，例如從影評、口碑得知，只要有一個人講過套戲爛，我都會black list佢
另外，如果係成龍的戲，有十萬九千七個人話好睇我都唔會睇，我有偏見，又如何？
不過，我有時都有d唔理性的揀戲理由，就係我對歐洲中古時代背景的傳說有特別偏好，另外，又對真人真事改編的電影情有獨鍾
但幸好，呢少少僻好，都仍然為我揀到好戲

舊年入場睇的戲，在你眼中，可能係少得可憐
1)300，中譯《戰狼300》
2)《門徒》
3)The Pursuit of Happyness，中譯《尋找快樂的故事》
4)Spider-Man 3，中譯《蜘俠-3》
5)I Am Legend，中譯《魔間傳奇》
6)The Golden Compass，中譯《魔幻輪盤》

本來非常極之想睇的本來仲有Robert Rodriguez的Planet Terror《索女．喪屍．機關槍》同Quentin Tarantino的Death Proof《玩命‧飛車‧殺人狂》，只可惜冇人陪，所以冇睇
無意中睇番《生日快樂》的dvd，竟然有意外收穫﹗
至於話題作《色‧戒》，其實我真係冇興趣…
《野‧良犬》係有人睇過話ok，加上有醫生，咪諗住去睇，但後來唔知點解又冇去睇，anyway，而家終於等到佢出碟

我是你的原動力

26 January 2008

天氣凍，人的反應都慢d…

晏晝無意中討論到犯賤的男生，拍拖後發憤苦讀，成績突飛猛進，大有人在
作為高材生+風頭躉，我當然成為過別人的原動力啦﹗

晚間家中聚會，又變得crazy，繼續人格分裂，我有23種人格﹗
終於得到《野‧良犬》，thx﹗

仲有，預告wed為參展作品做後期，將會忽然返

一件幸福的事

25 January 2008

放工經過一檔炒栗子，買左半磅，返屋企慢慢搣
上次喺尖沙咀同她一齊買炒栗子，買完企喺條街度搣，我每拎起一粒栗子都會搖一搖，她覺得好奇怪，但其實我的目的係搵一粒搖到聲的栗子，因為咁樣個殼易剝d…
我：好耐之前，真係好耐，他教我咁樣食炒栗子，用手搣，唔好好似你咁用口咬，他說搖得出聲的栗子好易搣，一啪就開
頭先，我先揀晒所有搖得出聲的栗子
之後，唔出聲的就每粒更慢地慢慢搣，用手搣
曾經珍而重之的他，他的說話我會記得，永遠記得
寒意正盛，有一包炒栗子暖手，就是一件幸福的事
人若簡單一點，離幸福不遠矣
學習中…

食完栗子立即冬眠，呢一覺係呢個禮拜以來，訓得最好的一覺
醒來是十點半，對住電腦陷入沉思，並做左一樣無聊野

我習慣一返到屋企就會online，即使好似頭先咁，返到去唔係坐喺電腦旁邊，食栗子同訓覺
最近每逢見到msn上幼稚園張相，係，我喺屋企，但如果見到我係away，我應該訓左覺，唔好搵我，因為之前次次我早返屋企訓覺，不論為晏d睇波定係出去浦，總係次次都有人打來，而打來嗰d又係次次都係d好耐冇搵的朋友，總有好多說話想同佢傾…
噢，天意弄人﹗

晚上忽然唔害怕孤單一個人了，但原則堅持，都係冇一個人落街食飯
我想…

玩夠了，返屋企了，不要再愛在記憶中找你，重投醫生的懷抱，請給我解藥﹗
我想我應該重新學習愛返屋企的感覺和愛留喺屋企的感覺

繼續消極地玩facebook，今日take的問題係what type of heart do you have？
原來我擁有一顆mean heart
解釋如下：
You find your way into someone's life but you rarely fall in love. You don't believe in giving only in taking.You are so practical even in your emotions. you love having fights with your lover just to make them feel bad.You are in constant desire to change the person you think you love. You can live without love in your life.

happy birthday!
i am your pretty babe~~

我係咪被玩？

24January 2008

好煩﹗
事情每日都在變化，每天都有不同的版本，而且遲遲還未有決定…
唔係冇興趣，但真係好唔熟，未知從何入手，生出無形的壓力，搞到我訓唔著，尋晚又訓得唔好…

頭先同她討論到呢件事的困擾
她：飲杯熱鮮奶囉
我：我飲奶會肚痛
她：咁朱古力奶得唔得？
我：no，一樣會肚痛，我諗都係要飲酒

其實我真係好鍾意jot低其他人的語錄，因為有時會發人深醒，有時笑話連篇，曾經因為咁樣被朋友乍型，但都係鍾意咁做，仍然會繼續咁做，只要唔開名講人的原則依舊堅持就ok了
今日的語錄係她形容：高手vs高手

在上野著名玩具店買了一副併圖，紙盒大小跟一副樸克相若，原圖大小跟一幀3R至4R相片相若，事前我並不知道併圖有難易之分，但昨天晚上為它解封，才發現每片併圖小得可憐，比尾指的指甲還小，盒內附有一個夾子，方便玩家併圖
再看看盒內側的難易度，是滿分五星，很邪惡﹗

其實，我係咪被玩？

東京之旅的高漲情緒消耗得八八九九，次次都係咁，玩完high完一大輪，就會有d down down地，好似股市一樣，有升有跌，有一個cycle
討厭這個習慣﹗討厭這個定律﹗

由一碗湯說起…

23January 2008

尋晚返到屋企，攤喺張床就訓著左，後來醒左，冇留意幾點，沖涼洗頭堅online，hea左一陣，不過之後訓唔番
平凡的星期2，如常返工，返工眼訓，想放假想去玩…
每日返工，二十個不願意搭小巴，總會等一架多d人的車先上，為的都係多個機會有人叫落車，唔使我叫
今日，得償所願了
在所有人眼中看來，成件事都好無聊﹗
落車後要行約十分鐘先返到公司，會經過兩大便利店，習慣看看是日報章頭條，看看新出的雜誌封面，而今日走進其中一間便利店，買了一個特別的早餐--一碗叮叮湯

好耐都冇飲過湯，搬左出來住已經近三年，而家真係差唔多一個月先返屋企食一次飯，飲阿媽煲的湯
任何人都明白，湯水，就是一份關心
不是不讓人關心，而係其實放工返去食飯，行去搭車，以至搭車的過程都很折騰，很累，食完再返屋企，更累
早陣子心情靚，我也會煲湯，關心別人，煲左湯叫他放工過來飲
不過最近，近半年都冇煲湯了
或許，遲d啦，或者遲d有一日會重拾煲湯的習慣，關心自己

噢，原來情人節又殺到埋來…
啱啱收到某財團的pr send來，為商場酒店宣傳而作的偽新聞稿
舊年的情人節，哎，咪提啦，倒數事件俾人講左勁耐，而嗰晚食飯完全冇feel…
情人節應該係繼過年後另一個恐怖的節日﹗

喺公司不斷show off新釘的耳窿，其實終於鼓起勇氣，真係好開心，所以刻意束起頭髮，展示兩顆星星
底下嗰粒釘嗰時冇咩感覺，但上d嗰粒都幾痛架
我開始明白點解有d人釘窿會上癮，越釘越多，因為我都想繼續釘落去
其實一直都想釘耳骨，睇下將來會唔會有d咩值得紀念，或者受左d咩刺激去釘多個窿啦﹗

喪食激苦99%黑朱古力，迷人的苦，越食越著迷

尋日寫左篇文，叫《百樣我》，列出我眼中一百面的自己，我已經post左出來，顯而易見，留意呢個blog的人，一定會知道點樣按圖索驥

45.我是一個樂觀的人
呢一面的我，應該係咁樣演譯：
諗自己認為係最好的答案，諗自己最想事情變化的方法，幻想的好處就係咁，可以將事情無限美化

其實呢句說話，都係quote番我以前的日記
其實，寫篇《千樣我》也沒有難道，只怕真正想如此了解我的，不是你；真正想如此了解我的你，不想用這個方法了解我

但係…
噢，聽晚應該冇飯食

上次舊公司的friend問邊個係xxx，我支吾以對，都唔知點講好…
頭先搭車返屋企，佢喺紐約街頭上車，咁都撞到喎，不過同我一齊嗰個唔係xxx，切勿多疑﹗

睇左一篇關於遇襲女星的報道，或者正確d來講叫一堆字，有以下一句：為人熱情爽朗，深受異性歡迎
乜咁似形容緊我…
哈哈﹗

i know the rules of the game

22 January 2008

我討厭失憶的感覺，總想著究竟那幾個小時的我，發生了甚麼事
人竟然可以這樣善忘，說忘記，就忘記得一乾二淨，不留半點痕跡
為甚麼沒有先徵求我的同意，就將我的記憶delete？
人也許有一個自我保護的功能，就是本能，像遇到危險會逃，又如觸碰到火燙會閃躲一樣，我現在的情況，就是不自覺間不知情地啟動了自我保護裝置，delete了不應該記住的回憶嗎？
那麼，是不是不應執著於這數小時石沉大海的往事，令自己心煩？
其實失億，已不是第一次，但何時才學懂習慣它？

不過，有些事我還記得很清楚…
我沒有不承認

食完飯，一時衝動之下的起心肝去釘多左兩個窿，無聊的人為無聊的事賦予無聊的特別意義：
第一個窿，代表決心戒酒，今次我係認真的
第二個窿，代表收捨心情，努力咪熟d台灣政治史

要面對的事情，始終逃不了，當自我保護裝置失效，不是可以從容輕易地隨便delete

我和他之間的秘密

21 January 2008

好煩…
唔知點解今日真係覺得好煩﹗

今日心情複雜，遇上了死亡的感覺
本來為左某人介紹的日本拉麵，去油麻地，但搵唔到檔野，結果食呢個世界上最殘酷最不人道的食物——煲仔飯
不過，死亡的感覺，應該由搭車講起…
搭港鐵，突然有一下好暈，跟住飇冷汗，心跳得好快好痛，眼前矇矓+模糊了一片
後來喺煲仔飯門口突然想嘔，嗰一刻閃過一個感覺，就係如果一嘔就會嘔左個心、胃同d腸出來
直覺教我連串死亡感覺同尋晚飲酒事件有關，所以，我決定戒酒﹗

講開某個話題，我話佢覺得我乖同聽話
他：(帶鄙視)哼，我從來都唔覺得乖同聽話呢兩個形容詞適用喺你身上
不過我係小天使喎，哈哈，註明係邪惡嗰隻

好耐都冇套戲能夠挑起我的興趣，令我會留意住佢幾時上畫，遲d等人約我去睇
不過近期有一套，叫《魔街理髮師》Sweeney Todd: The Demon Barber of Fleet Street
喜歡Tim Burton x Johnny Depp's perfect match

今個月另一重點節目係28號joey's concert

另外，呢個又係記番近幾日發生過的事件的時候

fri如常返工，平凡的一day
晚上相約打邊爐，兩個星期內的第三場邊爐，真係開心到震呀﹗
繼續電話不離手，sms和msn，除此之外，打過俾他，一傾傾左成兩個鐘

三個月啦，三個月後…
這是我和他之間的秘密﹗

不過因為他而miss左一個call，而成件事都好邪惡…
話說有遺言信箱的call on waiting，算啦，我冇聽，傾完先聽番，但冇人講野，留言係個電話長響的聲，ok，算，諗住睇番miss call邊個咁邪惡打來留d咁的言啦，但未接電話個list上面竟然除左遺言信箱的miss call，冇其他電話，即使係冇來電的call，理論上同實際上都會有個record啦，顯示做私人號碼架嘛，咁你話係咪邪惡？
究竟邊個打來呢？呢個係一個謎﹗

我笑你周街篤魚蛋，而家咪食到肚痛囉，咪自己攞來搞囉，後悔都冇用﹗
唔好亂咁食野喇﹗

sat去左觀禮，之後唱k、食糖水，解散時間係九點幾十點，但我下場的集合時間係12點，一個人在tst磨成兩粒鍾，感覺二十個怪，諗起他可能或者有機會maybe會喺尖沙咀，因為之前次次問親他都在tst
他係就係喺尖沙咀，不過，算啦…
唔飲咖啡，一定唔會去coffe shop坐，一個人，更加唔會去食野，所以最後著住對三吋高跟鞋周圍碌，浦得比較多的係vcd舖，買番The Pursuit of Happyness，雖然睇過，但有d好戲我會買番來儲，無聊﹗
想睇《野‧良犬》，vcd都賣88蚊，好貴喎，感覺覺得唔抵，所以都係冇買
醫生在台上遊走的碟都出左，vcd賣85蚊，但搵唔到dvd，古怪…
醫生呢個演唱會睇左三場，其實買隻碟結果我都唔知會唔會睇，既然冇dvd，唔買住lu
尋晚個場馬馬地，我諗我係唔鍾意進場時俾人給個冰鮮豬印囉
猜王，十個人，猜左4杯酒，一打九，搞事﹗
不過，嗰個唔係我，之咪就係嗰個我非常極之超級鍾意取笑的她囉

又有一段記憶失踪了，玩完骰仔之後我做過d咩呢？我點返屋企呢？點解我又識得除左con先訓呢？
仲有，乜我清晨5:41接過朋友甲的電話咩？咁5:47接過的私人號碼係邊個來架？

另外，尋晚個look被人comment似蒙古人，又被comment發冷，well…
呢頂係其中一頂喺日本買的帽，所以再被comment：短裙仔，日本妹

對我而言，這是一個消息；對你而言，這是一個決定
人生，就是每分每秒都在選擇和做決定
認清自己的選擇，認清自己的喜惡，認清甚麼人和事能令自己笑逐顏開，認清甚麼人和事會令自己一籌莫展
我認為應該綜合日前個blog講過，關於你和我的處事態度，一方面要避開自己唔鍾意的事，另一方面做自己認為對的決定，做自己認為舒服的事，做自己認為能令自己開心的事

互勉之

頭先經過d賣耳環的舖頭，又再次觸發釘多兩粒耳環的念頭
成日都覺得我咁多耳環，但每邊耳只得一個窿，帶唔晒唔抵，但係我係極易敏感，又怕發炎，釘多兩個窿咪自己受罪…
釘耳窿呢個議題，考慮左好耐都仲未有決定

我黑面真係黑得好明顯呀？咁嗰個人都應該feel到啦﹗
見到朋友甲，朋友甲話我上星期打邊爐嗰晚唔開心，係，我係嗰d喜怒全形於色的人，不會收藏自己，不懂或沒有必要
也許，朋友甲看得出我黑面，也看得出我當晚只能、只有繼續為無間斷的sms而展露絲絲微笑，為來電而短暫釋懷歡笑

msn的註解由「靈魂遺留在東經139度‧北緯35度」改為「要熟讀台灣政治史~~」，講得咁白，仲唔明呀？同阿邊個一樣，習慣畫公仔時畫左條腸先

差d漏左，我嗰日套衫真係襯晒架，短裙仔，呢士樽領衫，黑色大褸，不過重點係湖水藍色的頸巾同湖水藍色的絨面鞋仔，而鞋仔的粉紅色蝴蝶結，同我個粉紅色agnes b都係襯色架﹗

可唔可以養隻北極熊？
我真係好鍾意食士多卑鄙架﹗食得多會唔會變得卑鄙？
嘻嘻

在一籃子喜好中自得其樂

18 January 2008

今日真係好凍，可能又因為我著左短裙仔啦，頸巾加大褸都唔掂，尤其夜晚，寒風刺骨﹗

一個消息：台灣總統大選
點做？唔知；幾時出？唔知…

即使一個人平日幾乞人憎，你幾唔妥佢，但當佢出了甚麼意外，以前的怨憎，也即時放下，人，還是有這點惻隱

晚餐係特色日本拉麵，的確有日本風味，正﹗
不過其實除左日本野，我仲好鍾意打邊爐同燒野食架

我和你的分別，就是我認清自己的喜好，係，我有好多野都鍾意，你可能覺得我好濫，但我認清了自己like to do 或 love to do的事情，在這一籃子喜好中自得其樂
你卻是找到了你不喜歡、討厭的事情，就盡量避開這些事情
所以，在眾人眼中，我比較樂觀
也許，在你眼中，我的世界比較簡單，我也比你開心

由於時間關係

17 January 2008

雖然已經係4點06分，但都係想記低一點趣事

晏晝剪剪下片好鬼肚餓，因為返夜晏起身，又係因為冇人陪食飯，所以冇食早飯+午飯，好餓之際同事甲打來，話有蛋撻食，真係感動﹗
同事乙一啖食左一個蛋撻，係regular size的蛋撻，面不改容
同事丙提到佢個仔將一件蒜蓉餅，好似啪丸咁啪入口，塞到個口好漲，講唔到野，好搞笑
我說朋友甲將成隻雞中翼隊入口，跟住lur番兩條骨出來
同事丁comment：呢個可以係一個收錢的表演環節來架喎
再問：乜呢期興玩鯨吞咩？

公司裡，吳彥祖同容祖兒周圍遊走…

原本以為今晚同事戊唔會陪我食飯，由於時間關係，預先電召左朋友乙約我食飯，免得又冇飯食，地點係公司附近個商場間紅螞蟻，拿拿臨食完返歸

他問：你最近食左好多糖咩？
噢，唔通俾他發現左我隻爛牙？

well，邪惡的事不斷發生緊…

件事係咁樣的…

16 January 2008

嗰件事係咁的…
上機前同團友分道揚鑣，各自喺機場的免稅店睇野，件事係關於兩個sales討論我的對話
sales甲zip sales乙：睇下，係唔係
sales乙：唔係
sales甲：肯定係
sales乙：肯定唔係
跟住我見到其中一人行到我身邊，扮不經意地走到我面前，然後冇出聲
之後眼尾見到兩人走埋一堆，一人問：咁係唔係啫
另一人答：唔肯定，不過應該唔係
好無聊﹗

個心仲留低左喺日本，仲未空運返香港，尋晚又夢遊日本，件事又係咁的…
成班舊公司d friend去日本玩，喺一間露天餐廳食野，她說她真係同他喺埋一齊，真係戥佢開心
唔知點解個地下忽然好震，他說：有架大貨車經過之嘛
我：但架大貨車已經過左，仲震緊喎
他：咁我唔知喇，哈哈哈
我：地震呀
他：地震唔係咁架…

有一次喺cwb間利苑粥麵食豬潤魚片粥，見到陳豪
朋友甲：陳豪呀﹗
我：冷靜d
朋友甲：名星喎…
我：咪又係人一個，我警告你唔好去攞簽名，唔好偷偷地影人相，唔好叫人影相，我唔識你架﹗

我真係真係真係好想學跳舞呀…

最近的口頭譂變成：乜咁邪惡﹗

我在旺角街頭哭了

14 January 2008

真係非常極之超級心散，細個無心向學，大個無心工作…
寫blog記錄一點所思所感或坐在露天茶座下寫些紓情文章，興致勃勃，但對著電腦寫稿時就舉步為艱，教我如何嘔篇稿出來呀﹗

心裡有很多雜念，很難專心一志；四周有太多誘惑，總想到處冒險
不過，我仍是被一篇稿牽制著…

最近重新再次愛上維他500毫升紙盒裝的鮮綠茶，去街前我會喺樓下超市買一盒，所以有時你會見我袋裡面有盒綠茶
啱啱入貨冇耐，雪櫃的鮮綠茶又俾我飲晒了

今朝出crew，真係好累好眼訓，食完晚飯行左陣，未夠十點已頂唔順，嚷著要返屋企，返到去較鬧鐘訓左兩個鐘，十二點零起身，發左一個夢，成班人拉大隊去飲酒，地點係日本某地方
但唔知點解，進場前每人都要食一碗煲仔飯先，都幾搞笑
真係名乎其實，發夢都掛住飲酒…

因為出crew，所以晏晝有幾個鐘被迫一個人在旺角街頭留連，二十個不願意
在朗豪坊間delifrance戶外茶座，呷一口西柚汁，本來應該寫稿，冷風吹來，為一個人上路的我和面前三張空凳添上更多孤清
一個人，我反而喜歡靜靜地思考，冷眼看盡眾生相，寫了一篇文章，又為自己設計的情節哭了
也許…
星期天的下午，這裡比較繁忙，坐了一會兒，一對情侶前來搭枱，闖進我的世界，但在他們眼中，這個時空只有他們倆
情侶之間的baby talk，不足為外人道，但可否顧及別人的感受？
在情人面前，誰都變得可愛、年輕，情人眼裡出西施，明白，完全明白﹗
但你的得意聲、公仔聲，對不起，我受不了﹗
為甚麼情人會變成貓貓狗狗豬豬同bb？

我講過關於戒指的故事，你還記得沒有？

還是繼續寫稿吧…

********
寫稿寫到朝早8點幾，訓左4粒鐘碌返公司搏命
後期製作周開始了，等於不知道放工時間，打亂更的日子降臨了
mon-wed剪片，理論上放2500，但邊次真係可以2500走丫…
最痛苦莫過於tue，夜收完又晨吉咁早返去做teaser，而當晚又要收夜
不過一切痛苦去到thu會come to an end，但通常亦都會係啱啱自閉左幾日，嚴重抑鬱，但掉低工作就會即刻精神晒，叫人約我去玩
今個星期邊個約我呢？

update:1858

此刻難忘

13 January 2008

呢排心情激靚﹗
心情靚的原因有好多，總離不開最近遇到的人和事，放假、玩樂，當然其中一個原因，係索爆正一年一度的日本旅行﹗

繼續逐少逐少憶述東京增肥之旅的趣事

經常有觸電的感覺，其實我真係觸電，被電親…
夾公仔期間、搭自動電梯期間等等，唔知點解我好惹靜電，咪就係電親囉﹗

食shabu shabu，唔知waiter姐姐講咩，叫佢添牛肉，佢講左水蛇春咁長的一段日文，我幫佢配音：哎呀，三號枱嗰枱香港人，食左成個鐘先食左一碟牛肉咋，我地今次有賺喇
團友聽到都大笑起來，無論係我自己當時，定係而家諗番，抑或係同你share時都忍唔住吱一聲笑出來，嘻嘻

為東京之旅添上一分畸呢，就係酒店喺7號凌晨1-5停電﹗
竟然，東京的酒店都會停電﹗
之前一晚趕住返酒店，好似《魔間傳奇》，將所有事情，執野、沖涼等等，趕喺1點前完成，跟住一點零五分立即刻黑晒，黑左，團友甲仲喺厠所，大叫，都幾搞笑

不吸煙的我，為一眾有不良嗜好的朋友仔買煙仔，可惜的係seven star的limited edition喺11號先公開發售，少一款選擇，所以只搵左其他的期間限定煙仔、十二月下旬新出新口味的煙仔、看似特別的煙仔
不過，你地都係戒煙啦﹗

講開d煙，下周六(19/1)晚上八點半財經資訊台《時事寬頻》，我將會同大家回顧一下「無煙香港一周年」

簡單review過d日記，包括陳年嗰d、秘密嗰d，想記低5個精選heading
6月1日你真係好得
1月9日找到了戀愛的感覺
10月30日唱晒d心聲出來
1月13日或者我在他生命中的任務已完成
12月27日we are so close﹗
不過沒有特別意思…

呢幾日冇update，原因總離不開玩樂和繁忙…
連打兩晚邊爐，都幾crazy，左邊面抗議，生左粒瘡仔；喉嚨都抗議，有少少聲沙
尋晚場打邊爐，有少少黑面
點解黑面？唔想見到一個人，我真係唔知會叫呢個人架喎，事前亦冇人話我知呢個人會來，自某一次起，已對呢個人產生了一絲反感，唔好估，唔好問，我唔會答，唔會證實 ，如果咁樣令到呢個人以外的人覺得唔舒服，我喺度say sorry

被他問到臨死前一刻會諗d乜野，諗左好耐，腦海空白了一段時間，最後想出的答案係：諗下邊個會為我流眼淚
被他問到最刻骨銘心唔開心的事，啞口無言，真係諗唔到
被他問到最開心的事，原來冇一件事令我覺得好好好開心，一生難忘，一諗就諗得起…
被他問到最尷尬的事，原來都係冇﹗
我的人生至此，是否過於平凡？還是我不想去記住任何事情？還是在逃避一些事情？為甚麼在記憶裡找回一點感覺，也這麼困難？

他問我問題，除了唔識答，有時候我會猶豫一下，不是疑惑是否要將真正感覺、經歷告訴他，與他分享一點往事，沒有甚麼問題，只是想想如何將故事說得動聽一點兒；只是案件在腦海裡再重演了一次，如常地刺中心房，想埋下這種感覺，戒掉這種習慣

每個人都有一些事情，非常極之介意，或者咁講，係死穴，係心裡面的一條刺
有一條問題我一定可以不需甚麼思索，如果你問我呢條刺是甚麼，我可以猶豫一下跟住答你…
呢條刺係我唔可以喺屋企人面前好好控制自己的情緒，對佢地溫柔一點，同佢地講我愛你

我喜歡寫作，就是因為寫作的過程能夠整理一下思想，為大腦來個磁碟重組，一邊思考一邊寫作，理順心中的資料，過一段時間review一遍自己的文字拼圖，重新認識自己

雖然沒有一直想著想著，但進入深沉思考模式bloging呢刻，未能回答的答案都沒有在腦海閃過、飄過

take it easy, gal﹗

一口將成粒雪米糍塞入口，咬咬咬，直至雪米糍在口中消失，以後食雪米糍，我都會記得曾經個口被雪米糍塞到動彈不得
我訓喺彌敦道碌，他喺彌敦道打側手翻，以後經過彌敦道，我都會記得兩個傻人曾經做過這種傻事
短短的相聚，不停製造此刻難忘的無聊回憶
以後如果有人問我做過咩好鬼無聊的野，我諗我可能或者有機會記得以上呢兩個例子

thx superman return's morning call，中午十二點幾，對我來講的確係morning，但至今仍是一粒字都未寫過

趕喺cwb間nokia八點閂門前碌到，拎番部電話，太好了，可以做番網霸，除了sms，時刻msn
cwb朝聖，買左中國衫，支持奧運
哎，早知喺東京買埋對奧運super star返來啦，分舵仲未有貨…

********
繼續消極地玩facebook，原來根據我的生日，我係咁的…
personality：
You are a person who likes a lot of space. You don't need others to make you happy. And though you sometimes see yourself as a loner, people are drawn to you like a magnet. Deep and sensitive, you tend to impress others with your insights. You also tend to be psychic - so give more thought to that inner voice!

greatest strength is:
Your self sufficiency

greatest weakness is:
You despise authority

color is
Maroon

Sagittarius goes best with Leo, Aries, Libra and Aquarius.

不做後悔的事

10 January 2008

5日東京之旅結束了，返到屋企係十一點幾差唔多十二點，check番d miss call，well…

無聊唔知邊個好似冇咩原因特別發起了一壇唱k活動，十數丁人，又係老地方，由晚上9點開始，大家都知我今晚落機，當然預埋我啦，放低d野就碌出去唱k，玩樂停不了，不過真係太累，肚餓，狀態不佳，今日又要返工，再加上我唔鍾意飲啤酒，所以只係飲左好少

朋友甲原來仲有一張我和他的秘密+親密合照，原來竟然俾人影左相都唔知，噢…
朋友乙不斷搞事，成日提住他的名字，斜左就出聲啦﹗

其實他唔知我返去放低d野又碌出來玩架…
我重申，唱k嗰個戴帽黑超look，係早上遊走東京的裝束，只係轉唔切look啫

5日以來都大演帽子戲法，帶左5頂帽for 5日的造形，當然遊日期間再到一眾帽子店觀摩，又成日都見到啱feel的帽，咪買囉

上次到東京，喺裡原宿間adidas original shop見到個adidas三葉咕臣，買滿2x,000 yen可以做vip得到個咕臣，結果我冇join到，事後對個咕臣念念不忘…
此舉同我平日不做後悔的事，不做令自己後悔的決定的原則背道而馳
所以見到一把三葉遮，7200幾yen，為番係港紙500幾蚊，同行的團友話我crazy：你係咪傻左，萬一唔見左或者俾人偷左點？
我：我唔會攞出街，個價錢我咪當買件adi外套囉
係考慮猶豫左十秒，但我當然最終都係決定買，我知我唔買一定會後悔，步上次錯過左個咕臣的後塵

喪夾公仔，d細公仔500yen夾6次，口訣係：最緊要多﹗
扭蛋冇咩吸引，本來諗住搵日扭jr襟章，扭到咩站去邊度碌，但原來冇晒呢d蛋，唔知係咪冇出呢？之前次次都有架…

喪食壽司、拉麵，喺築地的鮨文食左兩次，嗰d壽司正到…
香港即使係d貴野都拍馬都追唔上，d海膽好似一座山咁，大件到呢，上面d海膽可以分開食幾轉，好似食刺身咁
拖羅入口即融，冇根，真係好感動﹗
第二次去食，覺得個set 唔夠喉，同埋佢真係好多野食，所以另order左帆立貝同佢d friend，仲有一款唔知叫咩名的光身魚，問過師父，但問完都唔記得
另外食左兩次迴轉壽司，師父介紹我食生蠔仔軍艦壽司，原來可以咁好食架﹗
當然唔少得shabu shabu啦，男waiter解釋放題=many eat，笑到我碌地
日本真係日本，連麥當奴都有驚喜，有個海老漢堡，簡而言之係蝦堡，激好食﹗
仲有有比拳頭仲要大的丸子，即係燒墨魚丸，一個波波頂平時的一盒八粒

有關東京之旅的詳情，稍後再續…

sms一眾友好，又再沉迷番sms，有一排冇咁樣喪打sms，好多字都唔記得點打，打得好慢
我想講即使肥左但個頭都唔會增大
仲有，東京真係好大，唔係咁易撞到狂徒

另外，原來蜜蜂電影仲未落畫，元朗兩間戲院都有，睇下weekend會唔會或者可能就到時間睇番囉

i can see you now!!!!!

08 January 2008

KO all missions with limited time and budget
your present is well packed, wait.....
but wanna to stay as long as possible, i really love japan
it is raining in yokohama, a lovely, relaxed place to stay

i can see you now!!!!!
hope you will call me first when i am back
my flight number is JL735

miss you finally

06 January 2008

get online with a chance meeting you from far far away, but miss you finally

向東京出發

04 January 2008

又啟動holiday模式，雖然從未關上…
向東京出發，一連5日，星期二返來
雖然只係得5日，但都會大玩帽子戲法﹗

難得我做主動，相約朋友甲食飯，有野想同佢傾問佢意見，但佢太累，放過左佢
結果簡單地在電話上討論過，不過夜晚冇人陪，就冇食飯lu
等到十一點幾朋友乙返來，先叫佢陪我去食24-hr麥記
係，我就係咁怪，唔會食獨孤飯

噢，結果都係未有機會睇蜜蜂電影，唔知返來落畫左未呢…
仲有，南海一號沉輪記做唔成喇，即轉故題，應該搞得掂的，搞唔掂都要搞掂佢

我知我自己做緊乜野

03 January 2008

電視劇中的男主角激似朋友甲，為無聊浮誇的電視劇加晒分，加到滿分
他會為我msn的註腳，專登點番「思覺失調」同我合唱，他眼中的鬼主意教我想像所有可能性
也許，我們相逢恨晚…

朋友甲的化身係咁講的：
如果你成世做差人，我就係你副孖葉；如果你一世做茶餐廳，我就係你份腿蛋治，仲要烘底添

咁我可唔可以要蛋牛治呢？

他會到上海一轉，希望二月左右可以抽空去碌一碌，安排一場刻意的偶遇

2008年為個blog重新粉飾一下，換左個layout，最重要係換埋首歌，由醫生的sweet sweet「粵語殘片」換成林峰慘情的「愛在記憶中找你」
唱得好唔好唔係重點，歌名令人有很大的思考空間，其中一句歌詞都幾ok

快樂也許太短，似場流星雨…
一眨眼，就如幻覺怕又記起﹗

人的情感為甚麼這麼複雜？
為甚麼我特別喜歡幻想發白日夢，有時候有一點點不拘小節，又有時候有一點點言行不一致，結果令所有事情在別人眼中看成天理難容？

既然找不到的回憶，不如算數啦
沒有人提起的往事，也算了吧
但翻起了的漣漪，欣賞一會又怎算過分？
至於漣漪會否變成旋渦，令我身陷，還是引領我參與一次冒險旅程，也未可知﹗

anyway，fri出走東京，希望在異地找到想找到東西、感覺、答案

我知你自發現呢個blog以來，一直都係我讀者，thx﹗
仲有，如果真係當我係friend，唔好叫我英文名，我講過好多次，英文名係俾同事、一d唔熟冷熟，或者我唔想同佢做friend的人叫
係好朋友的話，叫我中文全朵吧﹗

詭異sms迎2008

02 January 2008

2007年最後一日係工作日，睇左一段「國家機密」片段，只准睇，唔准影，不可外帶，否則就係泄露國家機密
如果因為呢段咁既野做左程翔，真係蝕晒，係泄露國家機密，都泄d勁野啦…

晏晝打俾紅顏知己，我應承左xmas後搵佢
佢問我去邊玩，我話confirm左的有打邊爐，其他玩即興
佢：唔好亂咁食野﹗
好久不見，今次東京之旅，雖然你冇request，但我promise為你準備一份特別的手信，睇下你係咪放工渣車過來我屋企樓下攞囉

放工迎接第一場倒數活動：打邊爐
我同朋友甲先到，其實因為gather地點係樓下間小肥牛，近嘛，眾人遲到…
壞人甲check單，見到有碟牛肉刺身，佢話：呢碟冇食過，28蚊，計數嗰時剔起佢唔該
朋友甲：好似有人飲左4支可樂
我：d可樂好似7蚊支
壞人甲：咁算數啦

第二和第三個突然即興安排的活動係碌拎同唱k，結果我冇join，x小姐同佢的x先生都唔去，好似話要去欣賞定參加「子夜鳴炮」，哈哈哈

10點半佐敦，遲左少少，撞衫，竟然黃色羽絨咁冷門都撞衫，只可以話邪﹗
我話著到咁sharp，怕count down時人多走失嘛，sharp d易認d，嘻嘻
結果去左寶x巷一間bar，4條友唔夠兩個鐘隊左支chivas，為飲而飲…
唔夠訓呀，又食得太飽，好快就high high地，發癲，不過隔離嗰台癲d
間野每枱派左一支大花爆，但佢地呃我倒數左，問我做咩唔開炮，咁我咪開囉，但原來未有耐先夠鐘…
壞人來架﹗
07年最後一個願望，就係唔好飲醉，唔好再做失儀的事

之後轉場，其實有諗過閃，join另一場朋友x在屋企附近，即係新界大西北的bbq活動，但係真係好遠，而且頭先她未到，所以，都係同佢地轉場繼續飲

happy new year的sms今年收到唔少，但共通點係，全部都係仔仔send俾我的，yeah﹗
但今年同舊年唔同，不論xmas定除夕，我都冇sms人，收一個send一個或覆一個call，睇下你有幾唔啦間啦，我先決定用咩方式同你分享節日的喜悅
如果你唔delete，sms你就可以留番來第日有時間隨時recall番出來慢慢睇，每一段都係唔同的，特別的
電話既話，你咪當我想聽下你把聲囉

如果以酒吧計，呢度都算係主場之一，成條街都係酒吧，間間都唔揀但就係次次如果來到呢條街搵酒吧都來呢間
呢間吧有好複雜的回憶，飲到嘔、和他合唱過一曲「刻不容緩」，他一番窩心的說話講到我喊，和他勾過手指尾，我的酒淺導致她和她大打出手，繼而反目，不過而家當然冇事啦
討厭snow ball呢款cocktail

記憶、感覺、往事，往往連繫住一d實在或不實在的事物，做戲都有啦，聽到一首歌會諗起一個人之類
一時唔記得，羽絨非常極之吸味，搞到件衫一大陣煙味
上次上幾次出去玩都係帶嗰個袋出去，到而家打開個袋又係有一大陣煙味，臭到想嘔…
煙味就與玩樂拉上關係
遲來的朋友乙都有一陣味，一種香味
平日對香水、古龍水極度sensititive的我，開始皺眉頭，試過經過d化妝品舖頭，聞到d香水即時流鼻水，繼而全身標冷汗、頭痛、頭暈、心跳加速，再遲d走可能我會死…
不過今次呢種青蘋果味又ok喎，完全冇任何激烈反應
記住青蘋果味與朋友乙的牽連

因為要12點打俾受訪者，所以11點幾醒左，訓唔番…
但都一路碌到兩點幾，遲遲唔肯起身，但為左一碗豬潤魚片粥，相約朋友丙到cwb碌，終於都記得，順便拎埋部電話去換殼
話說我部n76第一批貨因為qc問題，d銀邊鍍得唔好，憑單可到nokia更換一次，但原來需時三日，咁要我返左來先有得攞

不過因為整電話，引致一件糗事…
部電話拎左去整，大半日都冇電話用，返到去換番個舊電話，咪收到d留言同sms咁囉，有一個不知名的sms，真係唔知邊個
基於好奇和禮貌，咪打番去問囉，因為平時我一向都有覆電話的習慣，唔似得有d人啦…
我問電話中的朋友丁係邊個，佢覺得我奇奇怪怪，認錯人，擾攘左一陣，直到佢講佢嗰句口頭譂我咪知道係佢囉，哈哈﹗

另外，通話記錄清晨5點幾打過俾朋友戊，覺得不明不白，點解我會打俾佢？打俾佢講左d咩？msn問番佢，佢話我留言報平安
其實…
我唔係想打俾佢…
anyway，sorry，thx﹗

飲酒會失憶架，咁戒酒好唔好？

講開又講，一個平時唔會主動send sms俾人的人，甚至打sms都係用開英文的，突然間會send一個中文短訊過來，好詭異…
而你呢句新年快樂，遲左9個幾鐘﹗

仲有，好耐冇聽過「傻妹」呢個稱呼，嘻嘻

差d唔記得左講，醫生個vivienne westwood x swarovski魔鬼角好襯醫生

你知我期待d咩既﹗

31 December 2007

聽晚count down告別2007年，玩通宵，橫掂冇咩特別，今日先休養下，冬眠下，聽晚先做浦精
同x君食過全港最好食的西多士，煲電視，律政新人王II，但呢套劇推出得幾唔合時，撞正晒d假期，實要碌出去玩，邊有時間睇？搞到我要依靠世上最偉大發明——youtube，先可以睇番

佢問我d相晒左出來未，鬼知咩
但我都好想睇番d相，消極地用msn呼籲持有同我合照的人send番d相俾我，一係冇浦頭，一係話未過，噢
其實當晚miss左好多野啦，冇同阿邊個佢地影相

咪扮野，你根本就唔係1月1號生日
你呢隻小妖精，逃唔出我法眼，哈哈哈﹗

有一日一個人講左一番說話，今日呢番說話又飄過我腦海，所以要記低：以前拍緊拖我話冇拍拖，冇拍拖當然話冇拍拖，總之係咪都話自己冇拍拖
她卻是：冇拍拖都話拍緊拖，有拍拖當然會強調拍緊拖啦，總之係咪都有拖拍
不過在她身上，說話應該是這樣的：遇到靚仔筍盤就冇拍拖，遇到電車男就有拍拖，仲就來結婚添，但從來都冇人知她有冇拍拖

另外，差d唔記得左宣布，尋龍記之茶馬古道行‧普洱篇將會拎去d老外地方參展
雖然係第一次，但都希望可以攞番個盃仔飲下酒啦

期待…
你明我講咩既﹗

終於得到你隻豬

30 December 2007

零七年咁又去到尾聲，朋友正計劃count down節目，同邊個過都冇咩所謂，有人陪，熱熱鬧鬧就得了
舊年同舊公司d friend去左天文台圍飲野，飲醉酒，非常極之失儀，今年我唔會再係咁架喇﹗

除左波衫、足球書、adidas、跳跳虎，其實我仲儲左好多頸巾、帽、高跟鞋、大褸，總之就有舖儲物僻
頭先碌到去d-mop，sense到有d賴野，又喪買…

終於都從許願樹手中得到埋嗰隻豬，yeah﹗

你條仔呀？

29 December 2007

雖然復工一個星期有多，holiday mood左好多日，但仍然繼續keep住holiday mood持久不散
既然你諗唔到節目，我咪應邀去打邊爐囉，呢個陣容真係十年唔一遇
佢無意中睇到他和我的合照…
佢：你條仔呀？
其實，得唔得呀？型嗎？可能或者maybe有機會有一日係囉…
大家都好念舊，鍾意cue舊bite

哈哈
我和他見唔到面時係用腦電波溝通的，見到面就眉來眼去
以下是一段初級眼神對話
他問：做咩？
我答：冇野呀

他問：你唔鍾意呀？
我答：幾啦，感覺怪怪地

眼神對話，要默契，練習係冇用的﹗
簡而言之，係腦電波溝通法的直接連線version 2.0

許願樹決戰壞人甲

28 December 2007

呢排真係玩樂停不了，頭先終於輪到見許願樹，得到一個pooh仔公仔，係我想要的其中一個
他：你今次呢個蛋都幾難搵喎，一套有6隻，得兩隻你想要，你知唔知好少pooh架，我試過見到成個蛋機係full的，但一隻pooh都冇
我：我知你有辦法既
他：仲有，今次我遲左喇，成日見到d蛋機都冇晒蛋，一係壞機，下次早d出聲，唔好鬼鬼鼠鼠寫喺blog度
我：下？我個blog好公開架喎，一d都唔鬼鼠，你睇到咪得囉
anyway，多謝你﹗
不過仲有隻豬呀，你會唔會唔記得架？

食完飯碌返去即訓，立即訓著，訓左…
真係好鬼眼訓，但天氣明明有d涼意，但訓到成身汗，兩點幾乍醒件衫濕晒
哎，可能係尋晚套戲嚇親的後遺症…
話時話，頭先lunch行出去食飯，俾架車呠一呠，成個打個突，噢﹗
諗起如果尋晚套戲係同壞人甲去睇，見到我個樣咁驚，一定嚇埋我一份，我可能喺戲院突然大叫，想像到個情景都幾好笑
所以唔好俾壞人甲知道我怕喪屍

我仲會唔會有機會可能或者再見到你呢？

27 December 2007

呢兩日的事真係真係好想寫低，一定要寫低，但水蛇春咁長…

平安夜返工，壞消息有一個，就係要做一隻急故
平安夜大餐係日本野，主打海膽，食完壽司唔夠喉要encore，我話要海膽手卷，同朋友仔講，少飯得唔得，點知個waitress鬼咁認真，面有難色問：你要少飯呀？
真係忍唔住吱一聲笑左出來，哈哈

因為聖誕日有重要mission，所以冇夜浦…

25號，她的大日子，我做她的婚宴mc，晨吉咁早起身化妝，因為一點半要碌到出去準備，join埋d兄弟姊妹，點知大隊遲到，好彩我partner陪我
我係在商務碌，不過你誤會了，我唔係真係咁有文化，我係去買界刀同熒光筆，順便為東京之旅做research
set頭，搞下個場，對下稿，原來d時間好快過去，初初仲驚個律師唔到添…

他：你係咪覺得被騙呀？
我：咪就係，搞到我成條金魚咁…
他：金魚就金色，有少少紅色嗰d叫錦鯉
我：(無奈)
哈哈哈﹗

敬酒環節，同他哼杯
他：你係咪哼呀
我：車，呢杯流料﹗

晚宴完結先執番個電話，原來他打過俾我，覆番佢，merry xmas，really sweet

其實冇咩時間食野，真係好肚餓，老遠都碌番去hkbn張枱食少少野
好彩佢係一份份分好，雖然凍晒，但有少少野落肚好過冇
晚宴的下場係飲野活動，女主角晨早natrual high，男主角一早隊shooter ko自己，送佢落去的壯丁返來匯報，頭先有4架的士都唔肯載

她：其實我真係同你好friend，好朋友，咁多個唔知點解同你最friend
多謝你﹗

我其實一早sense到尋晚狀態唔好，唔飲得，波羅賓治都飲唔到，但結果都飲左好多，仲噴火圈添…
既然主人家敬的shooter，又冇理由唔俾面…
但不明來歷的tequila，真係唔掂﹗
搵他幫我頂酒，thx﹗
唔夠猜，他撐我，thx
所以特意將superman return的鈴聲留俾他，窩心嗎？

失憶，乜我有坐埋一邊訓覺咩？乜我倒瀉酒咩？我真係唔記得，sorry…
我只記得好斜，呢埋喺厠所，有人拍門，不過我肯定冇劏，過左一陣攞袋走佬，但落到樓下冇的士，有幾個男人喺對面間bar門口望住我，好似想幫我截車，我碌左出去唔知邊條街，彈左上的士又失去知覺，的士司機叫我落車，到左光輝圍
但原來佢停左喺粉麵鋪嗰度，我要行條小斜路轉個彎先返到去，真係好斜，行唔到直線，撞來撞去，好辛苦，條路好似行來行去都行唔完咁，諗番都咪話唔賴野…
返到去就，嘻嘻，跟住昏迷…

他們說你是壞人，你說自己是好孩子，咁我信邊個好呢？
你說尋晚搵唔到我，我就「好似人間蒸發一樣」(direct quote)，打俾我又唔聽電話，但我check番電話record，我有打番俾你架，頭先問番你，幫我尋回記憶
哎…
唔好提啦，成件事錯晒﹗
我=唔猜得+唔飲得+貪玩，係，我認呀，哈哈

尋晚的裝束，竟然博得他叫我一句聖誕老婆﹗

你打來嗰時我仲未起身，有d頭暈，真係唔知酒精中毒定係肚餓
碌出cwb食野，又係日本野again，嗰個時間正啦，冇人
跟住碌左去朝聖，嗰個擺喺總壇的adidas聖誕老人公仔，原來出左別注匙扣，一舊水一個，其實就貴左少少，但千金難買心頭好，結果買左兩個，一個儲一個用，朋友覺得我過分﹗
睇戲，i am legend，真係唔知點解覺得好恐怖，我第一次睇戲，係因為套戲恐怖而令我有想走唔睇落去的感覺
成日都bang bang聲，飲完酒心血少唔嚇得，真係好驚，搞到我會捉住隔離位，真係好糗，成件事都錯晒﹗
d喪屍好恐怖，周圍跳，唔知幾時衝出來、撲出來、彈出來…
呢d戲其實預左係咁架啦，點解仲咁驚？

白色寶馬+你=白馬王子？
你計錯數﹗

早兩日睇左golden compass，根據網上小測試，我的靈獸叫romulus，竟然係一隻貓…
i hate cats﹗

今日又出現嗰種奇怪感覺，what's up？

之前講過惹人討厭的男生，今日講講 i really appreciate real gentlemen
唔係食飯俾錢埋單、開門閂門咁簡單，雖然有時呢d咁簡單的野，都仍然有人做唔到
你同佢一齊，會覺得好舒服，好有安全感，你感到佢事事為你著想，例如過馬路會幫你睇車，甚至行喺較近車駛過來的方向，睇住條路有冇污糟野唔好踩到或行埋去，邊度凹凸不平，提醒著高跟鞋的你要留神
佢會關心你，但適可而止
同佢去街，送你返屋企，去到樓下，唔使送到門口，say goodbye時講一句：返到去打俾我，鎖好門，早d休息
然後喺樓下碌，等你打俾佢「打發」佢走
男生都要講儀態，整齊企理，不做奇怪行為，不做失儀的事，隨身袋一包紙巾或一條乾淨的手巾仔，唔係好過分啫，適當的時候遞紙巾，免得你失儀，就睇得出佢份人夠唔夠細心，夠唔夠企理
不要偏心，一視同仁，唔係因為對你有意思才對你顯盡紳士風度
無聊的事會幫你渣主意做決定，唔使你分神；大事就同你有商有量
你會好enjoy同一個咁樣的gentlemen相處，感到非常極之被尊重，好有優越感

但奇怪在我遇到過，比較接近剛才所述的gentlemen好似有一個共通點，就係有錢仔

成件事錯晒

24 December 2007

呢兩日冇上來碌，係咪有d掛住我呢？

每年最恐怖最可怕的事，又kick off了…
做冬+團年+過年+開年
星期5同6，兩晚兩餐做冬飯，哎，咪提啦，我真係寧願喺街邊篤魚蛋掃街，嗰d咁的應酬飯，真係可免則免﹗
不過…
哎…

同事甲唔想過年出故仔，問同我調得唔得，我反而覺得求之不得，一來遲一個星期出，但呢個都唔係重點，而係一大條道理話做野，唔使食埋嗰d飯，當堂覺得叮一聲，得左﹗

尋日去shop，其實我唔係好鍾意嗰d有目的的shopping活動，好似一個mission咁，錯晒，成件事都錯晒，冇晒feel
我份人就係鍾意隨心所慾，最好唔好管住我
尋日的目標係shop鞋，成個老尖差唔多俾我反轉左，一句到尾，就係搵唔到原來的target，但意外收獲係嗰對透明鞋同嗰對高跟鞋，好靚﹗
今日再為ko對鞋去shop過，目標為本，係鞋鋪都入去碌，同平時的我不同，多人的鋪頭唔入，而家幾多人都要迫入去，真係好厭惡…
好快搵到對膽，我呢d當然敬業樂業，精益求精，所以繼續碌，最後搵到而家呢對，我真係真心覺得對鞋係靚同特別的

晚上的gathering，少了一點歡笑…

很討厭沒有主見的男生
更討厭男生將自己沒主見的缺點，偽裝成遷就別人，企圖或意圖開脫
我意思就是說「你鍾意啦」這句說話，其實比「無所謂」更不負責任
我不知道你是否明白我說甚麼，或者我舉個例子吧

我：去邊食飯好呀？
甲：你想食咩呢？

這個回應，第一，答非所問，我係問緊去邊區或去邊間餐廳食；第二，問題出在「食咩」呢兩個字，食咩有食咩菜式的意思，日本菜？西餐？中菜？但同時都可以代表一間餐廳，例如和花亭、amaroni、鴻星，不但答不到問題，反而帶出更多問題；第三，就是第二衍生出來的問題，將個波拋番去我度，一來未決定食咩菜式，又決定唔到去邊，而如果我決定到食咩，就即係大約決定到去邊

比較理想的答案：尖沙咀，有咩野想食呢？
我：諗唔到喎，但總之去d可以bk位的地方食啦﹗
甲：咁如果book唔到位呢？

喂，我已經幫你narrow down好多野，有d永遠都冇得book枱的，唔使諗；有d經常full，唔早book的地方唔使諗，我當你冇咩誠意去發掘新大陸，咁剩番我同你有機會去食，或者去過食的地方，咪逐間試囉，我又唔係好信咁多間都冇間得，諗起就忟；咁而家book左未丫，未book丫嘛，就唔好諗定d假設性的野啦

而令人更忟的係諗唔到就唔出聲，喂，個天唔會跌間餐廳俾你，舉個例子講講

我：好累，攞個地方坐低飲杯野囉
甲：去邊？
我：(通常已經嬲嬲地)總之唔去麥記茶餐廳嗰d hea野囉
甲：咁你即係想去d咩地方？
我：(通常已經黑面)正正經經，可以坐低飲野，坐得舒舒服服的地方
甲：starbucks
我：我唔飲咖啡
甲：咁去邊呀？
我：頭先我咪叫你諗囉，我問你你又問番我，咁我問你來做咩呀？
甲：咁我唔係好熟呢度

結果解決問題的方法，係黑面+逃避，唔飲+唔坐

所以我話一件小事，可以睇得出一個人適唔適合自己，夾唔夾；你問我係咪好難服侍，我話係，又有咩所謂啫
但作為一個男生，一個小問題都解決唔到，我點會放心同你傾大問題？作為男生，出來碌，喺d主要地區，識得去一兩間食飯飲野的地方，都唔係好過分啫

他：我返xxx，可以搭咩車？
我：其實可以搭…
呢一刻諗番起他講過唔鍾意搭巴士，所以欲言又止，不過說時遲，那時快…
他：(搶著說)你咪話搭的士…

一點猶豫，俾人寸…
點解會特別記得他唔鍾意搭巴士？因為我都係一個好唔鍾意搭巴士的人，搭巴士會暈車浪，朋友都覺得我古怪，竟然有人同我一樣咁古怪，當然印象深刻

正如我會記得某男生同我一樣，唔鍾意搭小巴，唔鍾意叫落車

今年收左爐好耐啦﹗

21 December 2007

第一日復工，見光死，certified…
不過返到去都係，嘻嘻
我今年冇故仔出喇，唔記得早d話你聽我今年收左爐啦﹗

頭先協助某人做es，其實冇咩所謂，點解提呢件事，係想講做緊es時有一種突然而來的奇怪、特別感覺，一種近似心跳的感覺，好似意味著有d野會發生

放工約左她去睇衫，全日念念不忘的係尋日只係望左一眼的裙，真係好靚
著上身真係好鍾意，真係真係唔捨得除落來，著住走得唔得？不過要改裙，24號先有得攞番，我換緊衫時sales姐姐寫緊單
姐：你個friend姓咩？
她：姓潘
我：好彩你冇亂咁講野
她：丫，唔係，佢其實係姓x

條裙價錢同我部分adi珍藏差唔多，貴唔貴呀，如果真係只會著一次，都貴架，但千金難買心頭好，所以如果係我鍾意，幾多錢我都買，所以一屋都係的adi咪咁來架囉
而我的座右銘就係橫掂都係買，早d買早d有得著，唔會等，尋日真係趕時間先冇試冇買
原則永恆不變﹗

再同她行左一陣，但佢約左人食飯，碌走左
她：你一個人繼續行咁寂寞呀？
我：(笑住都要答)係呀﹗
跟住行行下見到有條鍊真係激靚，襯她頭先條裙一流
我：我頭先見到條鍊好襯你條裙，不過你又走左啦﹗
她：咦，你好卑鄙呀…
哈哈哈﹗

不過寸人差d要付出代價…
你知啦，講緊電話，仲要令個腦高速運轉計算下一句寸人的說話，防禦力或對身邊環境的敏銳度都會大減，就在千鈞一髮之際，我諗只係相差百分之一秒…
擰歪面，快步走…
其實點解會怕見到他？點解會有d怯的感覺？

驚魂過後繼續行左陣，不過其實真係好應該返歸，因為今日對鞋very fit，極之唔適合中長時間持續進行行走、站立等呢d高危動作，anyway，希望搵到他想要、他需要的野，都係行左一陣，當然皇天不負有心人，在我鍥而不捨的追尋下，終於搵到了﹗
其實試下用《尋龍記》的寫作手法記錄這次「尋物記」…

[take: vo][note:旁述]
[note: 主題音樂]
尋物記的攝製隊
為左搵到嗰樣野
由旺角中心出發
向住家樂商場一直走
{pause} {shot要落記者腳+主觀鏡}

沿途要徒步跨過五個街口
不過喺第一個街口
就遇到阻滯

[take: upsound
name: 交通燈紅公仔聲、車響安聲]

[take: vo][note:tanny]
旺角被喻為全香港最旺的地區
我真係好擔心
喺旅程的初期
已經遇到紅燈
人多又車多
唔知幾時先行到去家樂商場同搵到嗰樣野

[take: upsound
name: 交通燈綠公仔聲、借歪/唔該聲此起彼落]

[take: vo][note:tanny]
幾經波折
終於過左第一個街口
向住家樂商場進發

[take: vo][note:旁述]
有人話女人街可能有驚喜
所以攝製隊取道女人街
睇下會唔會有發現

[take: vo][note:tanny]
呢度的商品琳瑯滿目
不過真係好多人
加上條路又窄
每行一步都舉步為艱
我喺度一陣
已經覺得好迫同成日有人撞到我
不時要提防會唔會有扒手出沒
界爛我個beams boy袋
或者搶去我的porter銀包

雖然呢度危機四伏
但我都好希望可以喺度搵到嗰樣野
早d結束行程
返屋企上網同打機

[take: upsound
name: tanny+店主甲]
{t}你地show晒出來喇
{甲}嗰類野喺晒呢度
你自己搵下

[take: upsound
name: tanny+店主乙]
{t}有冇嗰樣野呀
{乙：笑笑口，耍手擰頭}

[take: vo][note:旁述]
不過去到家樂商場門口
攝製隊仔細諗清楚
賣嗰樣野的鋪頭
好似喺商場番新後執晒

不過喺呢個時候
記者突然諗起兆萬有賣嗰d野的鋪頭
於是就去睇一睇

{pause}

可惜都係冇發現

[take: vo][note:旁述]
[note: 主題音樂]
雖然著住有d刮腳同夾腳的新鞋
尋物記的攝製隊
都堅持去旺角另一個寶藏：花園街
碰一碰運氣

[take: vo][note:tanny]
由於我來到的時候天色已晚
唔少鋪頭都陸續閂門
我爭取時間周圍訪尋

[take: upsound
name: tanny+店主丙+店員丁]
{t}你地有冇賣嗰樣野
{丙}喺二樓
{t}你地係咪有嗰樣野
{丁}得嗰個款

[take: tag(內心讀白)
name: tanny]
我望住嗰個款的嗰樣野
真係好失望
唔通我今日行動註定失敗
我真係冇咩時間再去其他地方搵
哎
星期六有冇時間去深水埗碌一轉呢

[take: vo][note:旁述]
咁多次都係得個吉
真係證明左嗰樣野幾難搵

記者帶住沉重的心情行去個架度
始終自己親眼望過真係冇
咁就可以死左條心

[note: 主題音樂]
[take: tag(內心讀白)
name: tanny]
咦
有嗰個款
我想要嗰樣野，仲要係嗰個款
呢度真係有呀

[take: upsound
name: tanny+店員丁]
{t}唔該
呢度有嗰個款
{丁：拎嗰款野出來}

[take: vo][note:旁述]
攝製隊終於搵到嗰樣野
印證皇天不負有人心的道理
而花園街真係一個名符其實的寶藏
有著不可取替的地位
他一定好感動

{end}

其實我介意

20 December 2007

天光訓，天黑先起身，見光死的日子去到尾聲…
最可惜係最尾呢兩日，諗住盡地一眠，挑戰我自己保持的訓覺最耐紀錄，但唔鬼知邊層樓裝修囉，d電鑽係咁鑽，鑽到心煩，嚇走mr chow senior…
不過，我亦都唔捨得真係就咁訓晒d假既，繼續喪玩，出街碌
總結呢個假期，所有目標如期ko晒，包括唱k、bbq、飲、飲酒、俾人約、打邊爐、打壁波、睇英超大戰、冬眠、打機、食日本野、去海洋公園玩
唯一可惜的係平日同我喪食拖羅的他唔得閒，兩個星期以來只係食左一次日本野咋﹗
算啦，當係紀念南京大屠殺70周年，為呢段悲慘歷史抗日一番﹗
不過下個月等我碌去大阪食晒佢d野，以餓死戰術ko d東瀛鬼子，來個唔流血的大阪大屠殺，做個各式sashimi的甲級戰犯，哈哈哈

disney新出左一系列扭蛋，一套有x咁多隻，其中一款係pooh仔，另一款係豬仔，各大7仔門口有得擰，望住就想擰，但有好多唔啦間的野，又要唱錢…
朋友甲：你返去個blog度寫就會有架啦
我：又係喎
朋友乙：點解咁神奇？喺blog度寫完又會有既呢？

我又學左新遊戲，又教大家玩遊戲，個game叫跟尾狗，不過飲到嘔，一干友人都話好飽…

差d唔記得左，我識左一個，亦係世上唯一一個屬雙妖座的新朋友
幸會﹗

遊勻油尖旺，去到某書坊，好似大鄉里出城咁…
嗰d卡位，感覺怪怪，而且仲要同識左唔夠一日的新朋友仔去到一個大家都咁陌生的地方，感覺真係超怪，二十個怪
係喇，可能因為入去時見到隔離位一對痴男怨女扭作一團，間野俾我的感覺，就係似偷情的感覺
除似之外，靜英英，講野都要就住就住，好畸呢

他說到帶戒指的問題
他：你有冇聽過戒指帶中指係有意思(記得佢當時係講中指)
我：真係唔知喎(鬼知咩…)
他：中指有條血管直達心臟，帶中指就可以將兩個人扣埋一齊，係一個約束(佢真係講中指)
我：咁唔科學既…

寫blog時諗番起呢段對話，基於記者的求知慾，喺yahoo知識嘗試verify
結果發現，傳說中係「左手無名指有條血管直搗心臟…」
如果他再講呢個故仔，我會更正他
anyway，當識左個冷知識囉，兩隻戒指仔係咪真係扣得住兩個人，也沒有關係，不過第日可以識少少扮代表

講開戒指，我從來不帶戒指，不要惹來甚麼誤會，而最大問題係我身驕肉貴，一定要帶貴野，如果唔係會皮膚敏感，而我又懶喎，d貴野要好好保養，又話唔濕得水會氧化又怕摑花，又除又帶，索性唔帶就唔使煩，所以你會見我即使其他首飾，如非必要或者心情靚，我都唔會帶
而戒指，本身就有一個象徵意義，尊重它的就唔會自己無厘啦間買來自己帶啦

真係令人苦惱…
也許，苦惱因為重視
也許，船到橋頭自然直
也許，我真的要學懂放下多點多點執著與偏執

原來我屋企都有嗰d十年都唔用一次的cue card，唔使買

真係十分極之超級唔明，點解成班影帝，扮跌扮到出神入化，幾可亂真，點解係攞公平競技獎唔係攞奧斯卡？插水插到冇水花，幾乎完美無瑕，點解係攞公平競技獎唔係攞奧運金牌？

其實我介意
你一定明我講咩…