原文載於http://www.menclub.hk/women-relationship/difference-05
上個禮拜，呀曉明大哥趁住Angelababy 25歲牛一，除左奉上一部市值230萬的林寶堅尼Gallardo Spyder之外，自己仲連人帶車送上門，「咁岩」比記者拍低，於是順理成章公開戀情，一代女神正式宣佈被私有化。
新聞一見街，FB上的女人們立即瘋狂轉載，大讚「曉明大哥真係好浪漫，比著係佢地實冧死啫～」咁話，真係隔住個Mon都Feel陣濕氣呀！
嗱！若然以為我會大力譴責D港女拜金貪錢戇XX生勾勾嘅話呢，咁你就錯啦！因為我相信好多人都同我一樣，如果曉明大哥揸住架Gallardo黎同我慶祝生日嘅話呢，我都唔會介意即刻公開戀情，即刻結婚亦得，得左！！！
問題係，早前內地有報道指黃曉明2012年嘅年收入有3.92億人仔，差唔多5億港紙。而一架230萬嘅跑車，只係佔佢年收入不足0.5%。同時，2013年11月政府公佈嘅個人入息中位數係1.23萬，出埋雙糧年薪都冇16萬。16萬x 0.5% = $800。換句話講，如果你響你條女生日嘅時候同佢去尖咀食個日本放題，再過隔離百記拎個雙鐘，使足$800，咁你就好應該要有曉明大哥嘅待遇！
首先，應該要有記者黎影、仲要係第二日頭條，同時你女人要全程自拍放上FB同Instagram現場圖文直播、啲女觀眾就要好鬼感動咁一路睇一路喊「好感動」「真愛」「真人都敏俊」，仲要轉頭「勵」住佢條仔話「你睇下人地！！！」、而你本人就應該要受到英雄式嘅致敬，成為新一代女性心目中最浪漫嘅男神！！！Oppa！！！
事實係，我見過有人死慳死抵，用左個半月嘅人工同女朋友去歐遊，返黎之後仲要被條女飛埋，罪名係「Come on James，去到要就住食就住玩不如唔好去，同你一齊冇前途」。Sad but true！
曾經聽過聖經入面有個故仔（利申非耶，細個學校要學）話耶穌見到個寡婦捐左兩個小錢，就讚佢比捐左千百元的財主捐出更多，因為財主捐的是自己有餘的，而寡婦捐的係自己僅有的。
如果你覺得呢篇嘢充滿葡萄味，我的而且確係葡萄。但我唔係葡萄架Gallardo或者Angelababy，我葡萄嘅係曉明大哥所付出的0.5%所換到的認同。
我地嘅付出，真係唔會比佢少囉！
PS：重點是，「財主捐的是自己有餘的，而寡婦捐的係自己僅有的」的道理