說時遲，那時快

14 July 2007

靜左幾日，本來諗住星期三有聚會，但突發流左，所以對尋晚原本的食晚飯都不抱樂觀態度，但又唔想夜晚做獨孤精，所以諗住lunch後兩點零，少爺仔得閒少少，打俾佢睇下係咪仲一齊食飯，說時遲，那時快，定係真係同佢心靈相通，佢就打俾我

再因為之後她和她的來電，全晚行程有變

首先係以拎野俾case之名，碌出旺角，順便早少少放工，首先去join番他，他正在g2000試西裝，他揀左兩件恤衫，問我意見，感覺怪怪…

我諗起嗰時我個superviser阿姐形容他：鍾意你嗰個男仔

真係O晒咀…

其實只因大家都差唔多時期入來，大家都鍾意睇波，有計傾，又傾得埋，引來無聊苦悶的阿姐胡思亂想
而啱啱離開公司門口，就撞到他，傾左兩句啦，他就正啦，連去兩個旅行，雖然都唔係d咩好特別的地方，但有得去玩去食去買就開心啦﹗
祝他玩得開心d啦﹗

well，插敍完畢

之後她join番正在行街中的我和他，跟住去食飯+食糖水，第一站係雞公煲，第二站係發記

唔辣真係冇咁好食架，而個豬肋骨煲初初食真係好怪，但食食下d味又幾過癮，飲左兩杯，但真係飲得唔多囉

食完糖水上去老地方唱k，有兩張新面孔，最想唱嗰d其實都唔係好新的新歌例如下次下次、千歲、始終有你，但都冇囉，所以又係金曲重溫…

甚麼叫絕望，抬起眼望望，如今我在你面前呈堂隨便收看

咪扮野啦，咪扮搵話題啦，我一早講左我回歸免疫，仲有，即使唔係免疫，只係咁啱撞到我的同事甲，就唔代表會撞到同事甲的同事，即係我總之撞到他唔等於會撞到我啦﹗

因為之前懶得執袋，所以d相仲喺個袋度，既然見到她，咪俾她睇睇囉，我叫她想要既就拎，她表妹話咁樣她可能會拎晒，結果她揀左四張，都唔算好貪心唱k唔飲酒既話，以前鍾意shirley tempo，但而家多數揀蔘蜜和菊蜜，尋晚首先是凍菊蜜，然後是凍蔘蜜，再之後先啤酒，狂飲左一輪之後未夠四點閃左，恰一陣又返工去，所以成日喺度遊魂…

忽然想搵人去沙灘玩，但忽然諗起有鯊魚，沙灘都掛晒紅旗

又諗番起上次去沙灘他話好驚有鯊魚，他解釋細個去沙灘游水，游完返去睇電視話個沙灘有鯊魚，諗番好驚，所以驚鯊魚，但我地聽落，爆笑到…

上次講過去武當搵張三豐既事，而家行程有變，武林發展綠皮書的諮詢工作無限期擱置，取而代之的係「茶馬古道」文娛計劃單一招標

某日我問：其實我去做咩？

同事甲回應：出鏡

我：咁咪繼上次做減肥model之後，做旅遊artist

同事乙：係呀，你紅左喇，升格左，要搵番個經理人

睇資料期間睇到茶馬古道的風貌，行程穿越雲南、四川、西藏三個省，又係一處唔係做野既話我唔會考慮去的地方，但如果咁樣有得去一轉拉薩，又真係唔錯喎﹗做番集故仔又點話呢﹗

頭先見到舒夫真高和某人向同一方向走了，難道…

賦予飲品的標記

12 July 2007

我會為飲品刻上標記，盒裝提子汁告訴他我暗戀他，朱古力奶如熱戀般甜蜜，菊蜜說我對傳聞中的男主角沒有感覺，樽裝水問他何時才向我表白，利賓納想知道真命天子是誰？凍檸水想表達我對他的思念，可樂教我可樂不要皺眉…
唯有我絕少放進口中的咖啡，沒有被我賦予任何情感，未知是禍是福
這一百幾十字，就算是冬瓜盅的下集吧﹗

尋晚煮公仔麵，但原來屋企竟然冇公仔麵的好朋友午餐肉，所以頭先放工突登去入貨

喜歡玩水上活動、陽光與海灘的話，記住留意今個星期的《時事寬頻》滑水水、水上電單車車、香焦船船…

頭先又講起熊貓台，真係將魚樂無窮的精神發揚光大，好一條熊貓頻道，不如改名叫熊樂無窮啦﹗
朋友甲可以隨口up得出：人人都渣住枝蘇格蘭場非工業用國際線路自動溶雪十六嘩佬風油軚垂直升降連鐳射彩色洗衣乾衣氣墊毛筆一枝
忘記了交代x福佳的特徵，就係放臭屁聲響足一世紀
佢老豆話會帶福佳去睇醫生架﹗

為官之道

11 July 2007

沙田爸爸謀殺女兒的家庭暴力案和前三越百貨重建地盤的工業意外，令我看到一位勤奮務實的局長
星期日，他說：大人之間的拗撓，唔應該牽連細蚊仔，d細路係無辜的，並促請社署跟進
今日，他說：要求勞工處即時展開深入調查，明天起全面巡查全港天秤
立即出現回應，反應快，唔似得某d官咁話未了解好事件唔講住，希望用時間淡化事件，張建宗呢種做法，有姿勢有實際，俾人感覺他關注事件，正面面對而不是逃避，而他的出現，有畫面，有bite用，滿足晒傳媒的要求，更討傳媒和公眾歡心
跑daily時遇過張建宗好多次，友善主動，從不與傳媒為敵，每次出來都有所準備，預左俾行家扑咪，扑咪前搵io來溝通好，想問咩問題，唔係為聽下有冇敏感問題答唔答，而係了解下手頭上有冇呢d資料，冇的話，即刻打上office叫同事搵都搵出來，喺扑咪嗰十零分鐘滿足大家，讓大家好交差，冇資料，老實講出來，做唔切，唔係唔講，後補，又有時的確冇野好講，就同行家講手頭上得d乜乜乜資料，如果大家想知都可以講，唔會嫌麻煩。扑咪前等齊人，不論大小，問大家準備好未先開始，答問題亦沒有大細超，答晒後加一句：仲有冇要補充？清唔清楚？
做官做到佢咁，真係難得﹗
初掌勞工及福利局，遇正多事之秋，涉足與民生息息相關的勞工與福利政策，希望實幹的高官繼續他一貫的作風，希望他是香港之福

如果考AO成功，跟到呢位局長，真係三生有幸﹗

強烈對比的有廣播處長朱培慶，偷食斷正，之前儲落的友情牌，一舖清袋都唔夠…
大家熱烈討論，相信他都係初次偷食，所以先咁驚惶失惜，成件事簡直係一個笑話，唯有讚佢一句：太過老實
做官做到佢咁，真係折墮﹗

冬瓜盅載著的記憶

10 July 2007

每一種食物都附帶著一種情感，一個茶餐、一碗西瓜涼粉、一碟腸粉、一杯西瓜汁、一杯粟米粒、一杯咖啡、一碗通心粉、幾粒m&m's朱古力，你怎樣將它們串連在一起，為它們找到共通處，堆砌出完美的故事？
還記得不同顏色的m&m's的priority嗎？還記得楊枝甘露要走西米嗎？
剛才無意中又喺葵涌邨撞到舊公司d friend，同佢地一齊食飯，去左酒樓食隔離的中式小菜套餐，冇留意酒樓而家叫咩名，只記得當日返夜時成日去同一個位置，未易手之前的酒樓叫海明，以前必定有do、re、me、fa、so，必叫冬瓜盅，嗰d嘻嘻哈哈的日子遠去了
冬瓜盅載著的記憶，只有留在湯碗裡，吃進肚裡，留在味蕾上，埋在心裡，涼了，就不是原來的味道
大眼睛哥哥說我總是想著以前，活像一個老人家，我淡淡然說我念舊，改不了

法國脆香雞翼味、香酥雞腿、鮮味蝦味、香燒辣蟹味、德克薩斯燒烤味、墨西哥雞汁蕃茄，全都是薯片的新口味；至於八香珍姑，係百力滋的新口味

放工原本被麥當勞召喚過去，呢排真係好鍾意食至尊漢堡餐，但因為實在太唔健康，理性的雙腿制止了饞嘴的舌頭，但還是去惠康買了同樣不健康的芝士圈，一返到屋企即刻食左一包

小琳死了，我也想哭了…

沉迷在幻想的世界

9 July 2007

考AO，即係政府主任，係現代科舉，可謂將中國古代荼毒仕子的制度發揚光大，由小學入學試、中學會考、a level、cre同aore兩份公務員考試，考晒，仲要殿試，即係interview
之前考過兩次，去唔到殿試階段，今年又有，再接再厲吧﹗
哎，同朋友仔傾開，唔怕生壞命，最怕揀錯科，千祈千祈唔好讀journalism，做記者冇人尊重，日曬雨淋，呢d都唔緊要，人工奀先至係重點

患上了絕症，不讓愛侶知道，甚至用結婚去騙她死心
情節老套，由小南的大姐患上直腸癌去世那一刻，我估到了故事的結局
不過估唔估到都冇影響，眼淚還是掉下來，哭，因為承諾的一句《生日快樂》

兩日都留在家中，唔去街，唔約人，冇人約，總有原因
記得有一次星期日傍晚佢打來話一齊食飯，我話佢又唔早d打來，但其實當時心裡的回應是早d打來都冇用，星期日呢d日子呢d時間點會冇人約呢
坐在電腦面對，不斷看blog和od中寫過關於你的段落，原來多不勝數，我又沉迷在幻想的世界…

有一次唔記得講開d咩，我形容舊公司係adidas，只因同樣堅信impossible is nothing

自動刪除

8 July 2007

今日bor喺屋企，肆無忌憚咁訓覺、食薯片，真係好爽
唯一一餐「正餐」係我最愛既合味道香辣海鮮杯麵，悠閒的心情，食杯麵都是幸福的﹗
勁煲電視劇，今次係學警出更，連煲6集，每集8個字，即係4粒鐘左右啦
晚上她突發動議去飲野，我和議，call人，但反應不佳，大家都諗住放棄，後來我動議去唱k，她和議，諗住其他人唔去我地兩個都照去，後來有他和他撐，但勁O咀囉，唱左兩個鐘，2點3俾人趕走，但cheap到搭1cut歌，她和他唔順氣，同職員理論，大拿拿補番兩個字俾我地，真係唔該晒﹗
返到去仲未想訓，所以msn同blog囉…
其實我真係冇預計今晚會飲酒，真係飲唔到，唔知點解，越來越唔鐘意飲啤酒，唔好誤會，同與某人的承諾無關
係，被他狠狠批評不守承諾在先，我係有d介意，有d唔開心，喂，如果唔係我自首，我唔出聲，你鬼知呀？我都係尊重你先同你講啫，使唔使咁大反應喎，who are you？而家諗諗下覺得有d唔公平，協議係我唔飲啤酒你唔喺我面前食煙，點解要我戒啤酒，但你只係喺我面前先唔食煙，哼，你咪當我小器囉，隨得你點諗﹗哎，而家諗落都仲有少少嬲…
但我份人就係咁，而家嬲，但過左消左啖氣又冇事，唔開心的事，在我腦海裡有自動刪除系統，過一段時間自動delete
不過我未嬲完，仲唔知嬲到幾時喎，而大家都知我嬲一個人可以幾變態，喺呢件事未擺平之前，我都唔會睬你，no sms no msn no email no call no answer

她引述他所說：你一係同佢有路，一係就好憎佢，如果唔係唔會見到面唔出聲
其實仲有另一個possibility，就係嬲緊呢個人

另外，理論期間睇第9台，我隻故仔仲碌緊，由朝碌到晚都唔止

你收唔收到？

7 July 2007

雖然已接近破曉時份，頭先仍然眼訓到爆炸，但沖過涼，又想抒發一下內心的感受，實際點是為記億找個歸宿，騰出空間讓我發白日夢
與工作相關的十個鐘，不提也罷，只知很多人都患人厭惡返工症候群
特別少少在於出去食飯時撞到她，其實前兩日去食飯時都喺荃灣廣場撞到她，她呢排喺cable tv tower出job，口頭承諾下星期一齊食飯
今日特別著左one piece的裙、高跟鞋，因為今晚約左人食飯，而晏晝又出crew，著靚少少囉
本來諗住返屋企換個衫，跟住先出去打邊爐，跟住再去join番他去大球場訓街，但結果冇返到屋企，所以冇去訓街
因為著住對三寸高跟鞋快步行，又企，對腳痛痛地，返到去發現有少少腫

今日的重點，在於晚上的打邊爐宵夜活動，wind帶，由29號講到3號，cue左好多個bite
我同你「打眼色和心靈感應」，你收唔收到？
繼見習編輯後，又有見習總監，真係鑊鑊新鮮鑊鑊爆笑﹗

還是沒有見到他，他也沒有打俾我，what's up？
她比我想像中平靜，希望她不是扮若無其事…
繼續最愛的raspberry雪糕，其實我覺得旺角tst同cwb好應該有通宵雪糕舖，等我隨時想食雪糕都可以食到

quentin tarantino是一個吸引的名字相關的電影，近作要數《玩命‧飛車‧殺人狂》好似對聯，佢個friend robert rodriguez有套《索女‧喪屍‧機關槍》《kill bill》、《sin city》唔係個個都受，但鐘意既話你會好愛，呢類戲，呢類導演就係咁兩套對聯戲未睇，《die hard 4.0》都未睇，雖然買番die hard 1-3重溫，但都係冇時間…

將上過3樓的人與3樓的飲品畫上等號

6 July 2007

再次呼籲，記緊記緊今個星期六睇cable第8台，晚上8點半(首播)或晚上11點半(重播)的時事寬頻，我隻故仔出街呀，好幾個禮拜先一隅，請多多支持﹗
你更加一定一定要睇啦，唔只要俾意見，睇完要問書﹗

really crazy，day 1剪片，兩點幾成三點走；day 2，朝十一半返，剪到凌晨四點；day 3，朝十一返，剪到早上六點幾，係即係今朝差唔多七點先離開公司返歸，本來諗住只訓得兩個鐘，唔訓上下網碌下聽下歌，但真係頂唔順，兩個鐘都照殺，十點又碌到返去做ES，真係斜左…
話說用到喺graphic執到嗰盒帶，同事問time code，見到帶盒面一堆數字，就讀左出來：517107
同事搵來搵去都搵唔到，我話：5個鐘頭17分…
同事：冇5個鐘架喎
我：唔係喎，1個鐘頭71分鐘…跟住發覺唔對路，邊有70幾分鐘
同事搶去帶盒睇：妖﹗7月5號呀
睇真d，係喎，5/7/07，嗰"/ "寫得咁衰，勁似一字，俾人陰到…
多謝連返9日工，又正感冒發燒中的剪片硬食，硬剪到天光，三晚以來都OT，滿足我呢個嫌尖執著小記者的要求，辛苦了﹗
老實講，雖然隻故仔我自己做，log帶、剪片怒對硬對，但都冇話睇厭喎，好好睇

連續三日都總有一餐係麥記至尊漢堡餐之後，今日lunch食好d，和民星期四午餐，三文魚生飯，有沙律、麵豉湯、飲品，食晒所有野﹗
次次同同樣好日本野的他去食日本野，他都話我一食日本野就好大食，嘻嘻，係呀，我認呀
尋晚三點幾同某君傾電話，知道了事情的大部分，有空再聽埋下集
另外，終於知道了嗰日上3樓飲野嗰個係邊個，估錯了，俾他講中，我冇留意他，蜂蜜綠茶在我心裡面代表另一個人，他問如果係oreo奶昔會諗起邊個，我的腦海裡嘗試迅速地將同我上過3樓的人與3樓的飲品畫上等號，呢個遊戲都幾好玩

利記後日賣飛，頭先同朋友仔商量係咪去訓街，策略點樣，但今晚已經有人訓緊，如果放工再去，即使訓街都未必有飛賣，又有d想縮沙
有人建議使橫手，搵體育組d人幫手，但我同嗰d人唔熟喎，首先要混熟先…
上次講過可能因他之名有靚飛，再厚顏問他係咪當真，佢話飛可能冇，而家反而可能係廂房
咁正？帶埋我去得唔得？咁應該用咩身份去呢？但會唔會有d唔知咩人，好尷尬架…
大球場既廂房我未去過呀，馬場就去過，喺嗰度真係感覺優越d、上等d，一句到尾：好good feel

晚上繼續呆滯，但食左最想食的午餐肉同公仔麵，好滿足，訓覺，他call問去唔去唱k，心野了，又想去玩，應承左，但後來只因有飛機人，所以流左，有好有唔好啦，既然醒左，online，update下個blog
今次我唔係去玩唔update，唔係去玩而「早歸」，今次真係做野架﹗
遊網期間發生小插曲，朋友仔透過msn send左條link過來，咪開來睇囉，點知隨即好多人問我咩事：我冇delete你呀，我見到你online，你見唔見到我online？
因為眾人都收到一個message，內容係咁的：U have deleted me! Look here http://www.msn4you.info

綜合眾人的口供和經歷，一致認為我係俾人整蠱囉﹗
所以再見到近似既網頁或link，毋需理會

原本諗住閂機，但睇番電話，有一個兩個鐘前的sms，sorry，而家先睇到
鮮有打英文的我，打了一個英文sms，時間係0244，我覺得用英文講，中point d
Anyway no need to be sad, just
think it reliefs your burden
releases u from prolong
unhappiness Add oil ! sleep la

我撐你﹗
引用我最愛的let there be love：Just remember Ill be by your side，後加一句：always
記住頭先我同你講過，愛自己多d，如果連自己都不愛，不是很可悲嗎？
唔係自私唔係自我，而係呢個世界，冇話邊個冇左邊個唔得，但如果冇左自我，仲有意義嗎？沒有人沒有事比自己更重要

有d野

3 July 2007

假期的朋友聚會冇我份，1點帶住老麥至尊漢堡餐碌到返公司，執下d手尾寫稿等剪片，晚上一個人去食雲南米線，寂寞得很，孤獨得很…
凌晨兩點九走，門口竟然冇的士，記得同事曾經講過橋底曾經有好多人被劏死牛，所以唔係好敢行過去，好在等左一陣都有的士

有d野，唔諗唔代表冇發生過，唔認唔代表唔係事實，況且有d野，呃到人，呃唔到自己﹗
待續…

問心嗰句

2 July 2007

七一，回歸十周年，尤其係從事新聞行業，七一，只代表上班，不過因為出故仔免疫了，喺屋企訓到三點，因為他打來先起身
內容談及明日的gathering，但我去唔到啦，講講下變左突發打牌+打機活動，緊急召集他、他、他，本來都講到興高采列，但轉眼間又突發地流左…
今日，cwb有遊行又有回歸盃，tst晚上有煙花，所以係禁區，非請勿進，所以去左旺角食野，食食下他打來，問原本的打牌活動點，又突發復活
晚上八點，地點係我屋企，開枱，連打8圈，跟住一行五人落左樓下食粉麵宵夜，個個踢拖落去，勁camping feel，我嚷著要眾好友搞個camp，likely係九月，食完再打左四圈，佢地散水，我執左陣屋先沖涼洗頭再online
如果去camp或者一班人，我要再玩true or dare，又或者玩「問心嗰句」

朋友甲永遠帶給我們歡樂，是日金句又係一籮籮
我地幫朋友甲個仔改左個好名，跟佢姓x，叫x福佳，呢期最hit﹗
三番起糊，朋友甲諗住無花平糊自摸，轉個頭佢打爛花，爆出一句：好在回頭是岸
朋友乙摸爛花，話中「梅毒」，意思即係話模左一隻「梅」既爛花，朋友甲話：咁要搽藥膏，又或者食藥。我問：咦，你咁有經驗？

今朝發左個夢…
一大班人喺山頭唔知搞d咩，有條金色既蛇游出來，喺某甲身邊，我為左引開條蛇既注意，將手上金色的手厄拋去遠處，條蛇真係跟住追喎
又唔知點啦，他見到，捉住條蛇，拎番隻手厄俾我，但我話唔要，因為條蛇掂過
他就話我係「怕蛇豬」

拿出你我的信心來

1 July 2007

放假起身第一件事如常開電腦，他msn我，問我知唔知關於某君的事，真係唔知喎…
搞呢搞路，四點幾先出門口返公司寫稿，途中打俾某君，但某君不欲多言，冇再追問落去
雖然開住msn寫稿，但難以兼顧，還是犧牲了msn上的好友，唔好意思
事隔兩日啫，嫌尖少爺仔遇到煩惱，hey﹗take it easy﹗

冇得揀的時候又怨，有得揀又怕自己揀錯，係，人就係咁犯賤、咁矛盾
人生有好多野，你鍾意好容易，但要得到就唔係咁易，既然有咁既機會，係咪應該好好掌握呢？我認為當每一次機會都是最後一次，未嘗唔係一個好方法，雖然好似好消極好悲觀，但總會迫到自己珍惜一些東西，到頭來可能係豁達的想法
既然係鍾意，如果錯過左今次機會，不一定有下一次，那麼日後你窮一生後悔，卻為時已晚
為甚麼要怕輸？為甚麼未開始就斷定自己未能應付？這既是鼓勵你的說話，也是我引以為鑑的金石良言，互勉之
拿出你我的信心來，事情總會克服的﹗

同嫌尖少爺仔講電話，miss了他的call，他差d打爆我個電話…

回想尋晚老闆娘的說話，問番嫌疑人，佢話佢冇上過去喎，咁可能係另一個friend
尋晚她問她識唔識我呢個friend，我話唔識，但呢個人如果唔係嫌疑人，係另一個嫌疑他的話，那個他她是認識的

仲有，他下月向日本出發，我要一袋來自日本的祝福，j league同adidas，唔該

突發聯誼事件

30 June 2007

尋晚好開心，係呢個月繼camp後另一令我開懷事件
晏晝五點零六點，他喺msn hi我，講講下突發約我食飯，當然奉倍﹗
喺他極力推介下去左旺角女人街街尾附近既重慶雞公煲，簡體字、大陸feel，他話好好feel，灣仔嗰間仲大陸feel喎
他：勁想返大陸但又冇得返，去下呢d過下癮
我：你好鍾意返大陸咩
他：係男人都鍾意返大陸架啦
我：吓？返去做雞公？
他：嗰d叫龜公，或者叫雞蟲，我返大陸唔係嗰d，唔係搵嗰d，第日會唔會我唔敢包，但而家冇咁既需要
我：你唔使同我解釋喎…
雞公煲，要大煲、中辣，冇男朋友的我，冇女朋的他，沒有包袱，一於啤啤佢，賀量地四個多月，返加拿大浦左個幾月，去旅行hea過既他，搵到一份啱嫌尖少爺仔心水既工，同埋預祝他生日快樂
既然你咁愛理不理，咩飲唔飲啤酒，咩食唔食煙既協議，咪算數囉
anyway言歸正傳，呢煲雞公真係好得，仲有3-10蚊既火鍋配料放喺雪櫃自己攞，埋單有人同你計數，他問我想食咩，二話不說：午餐肉，我真係好鍾意食午餐肉架﹗
他：我份人係咁，食開嗰味就係嗰味
我：所以咪雞公煲囉
只有我兩個先明白既對白，哈哈哈﹗
一枝大啤可以斟兩杯，因為個杯好巨型，未食又飲，邊食邊飲，有時無聊冇野做又哼杯，未夠9點坐低就係咁飲，不經不覺，沒有預謀下陪他過左十二點，踏正生日正日，再為生日哼杯，不過birthday kiss就no way，我極之相信他都受唔起﹗
但我諗他也未必預計今年生日第一個見既人係我，第一個喺正日親口講生日快樂既人係我
第二場同舊公司d friend唱k，初初冇預計有突發食飯，更加冇諗過咁晏先落去，連夜更嗰d到左我都未到…
其實我都好想唱k，但一首歌都冇唱過，繼續飲，好想飲，但理智制止我飲落去，因為我唔可以再發癲，又怕會訓到不醒人事，第二日仲要寫稿，早走左

lunch都剧扒，幾浮誇
不過好可惜，煎到塊牛扒外面好正，d汁亦好good，唯一而又最重要既係件牛扒太熟了，如果係靚d既扒，5成熟，一定勁good﹗
返歸途中談及涉及校服的校規，講到女同學突登唔著底衫戴七彩爸爸，引來大笑

剛才馬拉松式會議中證實一個消息，就係我會向武當山出發，同張三豐研究一下武林秘笈，做番個普選武林盟主可行性研究，諗下點樣做武林發展綠皮書既諮詢
同事疑惑會唔會唔俾女生上武當山，某甲反應好快咁話：周芷若都上過武當山
某乙：咁隻故仔點involve記者？
我：咁等我勾引d道士
全場怒笑﹗

寫稿寫到十一點左右，中間睇電視、同他傾計
如果你問咁樣朝十晚十一係咪好辛苦，其實又唔算既，只係公司始終都係公司，唔同喺屋企寫稿上網可以楝高隻腳咁好free
如果一秒鐘4個字，寫24分故，即係要寫5760粒字
寫完半篇稿，都仲有心情、閒情逸緻打blog，一定會俾某人批評變態
以前發的作家夢，每日寫幾百字糊口的心願尚未達標，但每日blog，有固定讀者一眾，謝謝你﹗
寫稿，玩文字堆砌遊戲，都算是執筆搵食，廣義來講都算達成了心願，有機會一定要向狹義心願進發﹗

未食飯，因為時間吻合，本來想搵舊公司d friend宵夜，但我搵既人太遲覆我喇，閃淨小貓三四仔，嗰一刻又唔係真係好肚餓，諗住告吹
但碌出公司門口打俾她，突發出左三樓食宵
一坐低老闆娘話：你個friend頭先來過
我：邊個呀？
老闆娘：嗰個男仔，好鍾意飲蜂蜜緣茶嗰個
我：哦…
老闆娘：佢自己一個，仲以為約左你地

以前成日去五樓，不過有一次冇意中誤打誤撞來過三樓，就鍾意左呢度，所以次次一大班人，中學d friend又好，舊公司d friend都好，總之一大班人既話就會碌上來，飛個輪，老闆娘就會留定張枱俾我，通常都係左手邊張梳化+床
不過如果少人，或者同曖昧一號去飲野，一定唔會嚟呢度，費事啦…
when you say nothing at all，情歌王子曾經唱過呢首歌俾我聽
她檢視我的nano，她都話好鍾意呢首歌，所以為左謝過她今晚陪我宵夜，部屋的音樂都換成when you say nothing at all
低b架﹗兩條友食宵，四碟小食三碟食唔晒，一人一杯野飲，盛惠2xx，都幾誇張

********
無意中睇到林忌既blog http://plastichk.blogspot.com/2007/05/blog-post_26.html，有d觀點真係覺得惺惺相惜，其中一段係咁的：

根據中華人民共和國的憲法，立法原意是由立法者去解釋，而非由法官去解釋；所以「創立」的「原意」，應根據原作者的意思－－這就和人大釋法一樣，是香港的憲法－－基本法的基礎，絕對不能亦不得動搖

就是pin point了我的想法，我的用語由我的字典解釋，所以你唔明話，毋須深究，有需要我自然會話你知

尋找乙方的故事

28 June 2007

返工一個人，放工一個人，晚上也一個人，冇搵朋友仔
繼續一個人的生活中…

除了當事人，沒有人知道何時開始了，也沒有人知道何時結束了
但是當事人也不知道會否死灰復燃

我個乙方喺邊？

早幾天柏翹帶住小翹同小琳去fiona墳前
熱戀中的戀人突然離世，在世的會呼天搶地，心裡永遠為已離世的預留一個vip位置，雖然遺憾，但這份愛會直到永遠
你是不是這樣想不打緊，至少我是這樣想
或許這是令一個人一生一世愛著另一個人的其中一種方法

我應該用陰雲不散，還是陰魂不散去形容而家的心情好呢？

語無倫次

27 June 2007

中午12點33分，收到一個sms，唔知點解情緒突然激動起來，迅速回覆了一個sms，但真係忍唔住，喺公司，自己個位度喊左出來…
狠心將這個sms delete，也同時delete寄件紀錄，因為怕下次見到又會喊
lunch食左一個好好味的蕃茄豬扒飯+煎雙蛋+一罐可樂，對比起我尋晚一筒wise蕃茄薯片+半排三角朱古力+一碗菜的「晚餐」，呢餐真係健康好多
而正確來講，我今晚都冇食飯，離開公司前又咬三角朱古力…

今日放工遲左走，如常搭車返歸，如常坐喺車廂右邊第二排或第三排靠窗的座位，今日同平日不同的是早左兩個站落車
搭巴士返歸，為的係避免叫落車這個動作，所有人聽來都覺得二十級古怪，明明小巴可以去到樓下近d都唔搭…
去到萬寧俾她叫住，話佢地喺椰林閣食飯，叫我過去坐坐，但二十級心不在焉…
他：點解喺呢度出現？
我：落雨，我落車個站行返去要淋雨，咪喺度落車行下囉
他：呢個理由咁唔合邏輯，呢度行條大斜路返去咪仲遠
佢：佢好似做左d咩虧心事咁，咁緊張既…
他：你唔食飯？
我：唔想食，都唔肚餓
他：定係你約左人食？
我：(無言…)
他：咁去萬寧做咩？
我：買遮
他：萬寧有遮賣咩？你樓下都有萬寧架，咁奇怪，喺度買完野又要拎遠d
我：(笑…)
她：你係咪趕住走呀？使唔使走先？
我：唔係呀
他：咁如果唔係俾她捉左入來，你行完萬寧會行咩呢？
我：行惠康囉，買野煲湯
他：下面間惠康唔係大d咩
我：唔係，呢間大好多
我：唔去買喇
她：唔係呀，問你有冇廿蚊散子咋
語無倫次的對話大概喺呢度結束，佢地叫我上去坐坐，都係唔好喇…
落番去樓下間惠康，冇瘦肉賣喎，所以煲湯不成，anyway算啦，話明老火湯起碼要煲三個鐘啦，本來八點零煲係perfect架，不過而家如果九點幾先開始煲咪十二點幾先有得飲，搞呢搞路又要洗碗隨時兩點先有得訓，下次先啦

節目預告

26 June 2007

首先預告下月7號星期六，晚上八點半財經資訊台《時事寬頻‧單車搵路行》
嘔心瀝血的大作首播在即﹗
另外仲會在當晚十一點及翌日凌晨三點半、早上七點、下午三點重播

遇到問題讀者，不過呢位讀者亦都好神心，翻看前文，先行謝過
你問一年同一個月係咩意思？覺得我分明trap人引導人將結婚的事連埋一起，令人諗埋一邊，well…
當日的一年前遇到考驗，遇到試探；當日的一個月後出故仔
事情就是這麼簡單，你諗多左了

某甲叫我去http://news.bbc.co.uk/2/hi/middle_east/6518185.stm畫隻龜，我認為幫助不大，沒有理會
某甲：你第日都有機會俾人綁架，雖然微乎其微
我：如果我俾人綁架有人會救我

早兩日收到一個message，要求眾人走在事實最前線，30號同1號都要候命，不過轉個頭老細又同我講我免疫，專心搞故仔
噢，忽然有d失望，因為如果有得出去跑番兩日一定好好玩好開心，又可以見到以前成日見的行家，又話唔定會撞到舊公司d friend呢，但而家冇行lu…
而同事甲話要帶埋史力加對耳仔聽老細講野，同事乙回應話開會時一齊帶住史力加對耳仔，一邊左搖右擺一邊問老細講咩，老細擦一擦眼睛，一臉疑惑
我：咦，老細你係咪有幻覺？
一句說話引來全枱大笑

終於集齊營友的相片，thx

雨

25 June 2007

讀者問：既然你要試探某人，點解唔留到最後一分鐘先開估？
我：尋日，6月23日，有特別的意義…

今日出去拍野，但未出發先落雨，冒雨行左兩個街口返公司
我用「行」，係，就算落雨，我都係從容不迫咁行返去
我問：出crew先來落雨，唔通連個天都唔鍾意我？只不過我冇將雙手枕喺腦後，望住個天…

回程途中，看見元朗的晚霞、荃灣的紅霞，不過亦都有一個累透了和黑面的霞霞…
我返工，你返假，唯有晚上先見
呢兩日又再勁shop，尋日喺一間舖頭一口氣買左衫x5，另外仲喺另一間舖頭買左衫x1；今日又買左短褲x1、onepiece裙x1
一個星期七日都有新衫著

事情又是這樣的…

24 June 2007

今日晏晝出crew拍野，返公司途中，原來與某人同坐一架小巴
「紐約街頭有落」不為意這是熟悉的聲音，到某人下車時，才發現這個熟悉的身影
烈日當空中拍攝，曬到呆、熱到呆…
返屋企換套衫洗個面又出去，所以我成日都話，放假累過返工
食完飯喺街度碌來碌去，喺旺角街頭，突然一個黑影特意擋住我前進的去路，抬頭一看，是另一個熟悉的某君
忽然脈搏亂跳，就像差點被揭發做了甚麼虧心事的感覺…

我幫你把脈：你既脈象顯示，你需要買一個gucci袋，然後送俾身邊的人來搭災

人馬座是另有兩大特點....
(1) 永不認輸...(2) 總懂得保護自己....
你的所言甚是﹗
因人馬座之名，所以我話如果我要爭野玩，我一定會爭贏；有時又要特登做d別人不做的事，只因好勝
亦因人馬座之名，如果我唔在乎的人和事，我會對佢透明，甚至寧願得罪人，都不做違己交病的事

********
習慣喺呢度浦的人應該知道，我喜歡quote我曾經講過、聽過的金句或對話
事情的由來，而家應該作出一個交待…

早喺5月18號，我已經寫左一篇沒有發表的blog，內文如下：
尋日篇blog，題目係《我結婚喇》，雖不至於引起軒然大波，但也如我所料，引起眾讀者嘩然由尋晚至今，我一直估邊會第一個向我求證呢件事，結果估錯左，anyway，多謝所有關心過我的朋友
我話我唔會喺個blog度講大話，但大家有冇留心，我的用詞係：「我唔會喺個blog度講大話」，而唔係直接話你聽係真定係假
我的確沒有講大話，下個月結婚之說，的確曾經講過出口

事情又是這樣的…
因為同事要做隻故仔，講下d醫生會唔會亂開d藥俾唔需要減肥的人，要放蛇睇減肥醫生，情商我幫忙，同事們就事件討論得興高采烈，一同編作了一個故事
同事甲：你話你要結婚，要快d減到磅，等個醫生開d勁d的藥…熟悉我的人都知道，我一向都唔主張放蛇、偷拍，記者扮鬼扮馬，講大話trap人，總係覺得唔係咁好今次隻故仔唔係我落手落腳做，勉強過到自己嗰關，我同自己講，我只係去做model啫﹗
不過睇幾次醫生，我都盡量唔講d迫醫生幫我勁減肥的說話，我只會話：我想減肥；你可以最多幫我減到幾多之類似乎較為中性的說話，仍然有所收獲結婚，係陪我入去的同事突然爆出來，佢話：佢下個月結婚喇，有冇d藥可以減得快d醫生問：下個月幾時呀我迫於無奈都要推說：下個月尾所以發生了下個月結婚事件，我真係冇估到回響咁大…
而既然如此，亦將錯就錯，藉呢個機會，試探他的反應
不過可能要試探的他根本亦很了解我，知道我絕對不甘於結婚放棄花花世界，更遑論閃電結婚

多次被盤問都唔肯講，難道你不覺得事有蹊蹺咩？
我曾經回應他一句：個blog唔係招呼你
我諗你而家應該明白我當時的意思，我係話嗰篇blog，係招呼他的
如今真相大白，如果你心裡覺得有不舒暢的感覺，我留低一句對不起，請自取

blog，會繼續紀實；我，繼續招呼所有讀者
遇有與上述情況相似的事件，我承諾我會表明事件背景，大家毋需再作不必要的誤會與揣測
不過跳躍式思考和寫作方法，仍然繼續

我明白了﹗

23 June 2007

重看電話的sms history，「我明白了﹗」閃過腦海、眼前的就是這四個字
我悶悶不樂，唔開心，點樣先可以開心d？
朋友話呢個要問我自己，心情低水，又係只可以自救，我何嘗不明白呢？
應該忘記的人，何時才忘記？
應該淡忘的事，何時才淡忘？
應該放下的偏執，何時才放下？
人馬座哥哥上次勸我學習唔好咁執著，如果我真的做得到，就不會弄至如斯田地，苦了自己，苦了身邊的人
人馬座的我憤世疾俗，很多事都看不過眼，很想用自己的力量改變一些事情，有時又自視過高，所以當事與願違時，倍感挫敗
人馬座的我感染力強，圍著我的朋友，因我而喜，因我而憂
朋友說我能令party的氣氛更高漲，過山車更刺激
讀書時曾為了他黑面，大伙兒因我靜默了，笑臉收歛了
然而我今天卻因一個他，將自己趕入傷心小狹谷，還有人為我傷心嗎？
說到這兒，眼泛淚光…

恭喜你﹗
如果你所言是守得雲開，希望你有用剩的，分d俾我…

無言以對

22 June 2007

一向係夜貓，突然要五點幾起身，七點碌到返公司，結果咪成日喺度遊魂，一上車就訓…
明天也如是，灰﹗

既然用同一方法考驗過我、試探過我，唔好再用同一方法再考驗我、再試探我，好不好？

我說想去布吉旅行玩水，被你喝止
我說想學攀石同潛水，都俾你潑冷水…
心情欠佳，有甚麼人甚麼事可以令我展露歡顏？唔該快d浦面﹗

與沒有預計會碰到的人相遇上，閒談幾句
要等的人終於等到了，但無言以對

多麼想用說話留住你…
心中想說：一生之中，都只愛你
我，每日也想著你，靠在這街中等你，遙遠張望，隨你悲喜，視線人浪中找你
行近，我又怕驚動你，我又怕心難死…

滿足

21 June 2007

今日引來一陣大笑的，有某甲引述一段屬於一個外國人的小故事
外國人要申請三粒星的身份證，俾入境處的職員串：你身上都冇流住中國人的血
外國人不服氣：你點知我冇輸過中國人既血？
唔知呢，而家記低呢件事，又好似唔係真係咁好笑…

頭先收到兩位營友的相，thx，繼續post相…

放工又碌左去九龍灣，食嗰檔令胃腩極之滿足的車仔麵：伊麵底+咖喱魷魚+魚蛋+白菜仔+牛柏葉，多辣汁，當然唔少得一枝細可樂，勁good﹗
有次唔記得同邊個講開，佢話間野係佢個friend阿媽開，嗰檔野發到豬頭，因為真係二十個推介﹗
之後仲要來個楊枝甘撈布甸，真係滿足到暈 (ps呢個係冇西米version)

朋友x話好鍾意睇我個blog，又話我個blog好好睇，每晚訓前都習慣睇睇我update左未，開一開我個blog先訓，幾乎成了他的習慣
多謝

向塘福出發

20 June 2007

原本約左12點東涌地鐵站，有人遲到，行程延誤左個幾鐘
一邊食lunch一邊等，跟住去百佳買野，再搭大嶼山的士，向塘福出發

宿營地點係遠離繁囂的大嶼山南部，將電話放埋一邊，唔等電話唔打電話，relax，冇壓力，的確忘記了很多事，包括工作、生活瑣事，同埋你

攬住水泡出海玩，沙幼，可惜水唔夠清，但都唔緊要，天公造美，藍天白雲，已經好靚，仲要good在個沙灘勁少人，勁good feel
石灘的石頭長滿各式奇怪新鮮的生物，有一樣叫青口，即係平時食嗰d，雖則佢地只係青口baby，但真係好核突，一堆野，個殼滑san san，我高呼：我以後都唔食青口﹗
我執到一個幾靚的貝殼
他說：要刻番個名，常在我心…
可惜最後冇拎到走

搭的士去水口摸蜆，個司機黑面囉，但無損我地的心情
而最搞笑係喺的士上，只係離遠望到個沙灘，她已經高呼：好多蜆呀﹗
一望無際的沙灘上布滿生命的痕跡，好多螺仔、寄居蟹、魚仔，真係好唔忍心踩落去，但真係無從可避
決定去camp時，她嚷著要[掘蜆」，當日笑她，因為一般人用的術語係「摸蜆」
不過喺冇架餐之下，無所不用其極，用手、用樹枝、用石頭、用大蜆殼、用拖鞋等「武器」掘開沙堆，d蜆真係要掘出來
他：你對拖鞋係adidas架，咁樣掘會唔會爛
我掘到兩隻好大的蜆，仲俾其中一隻巨無霸嚇一嚇…
話說掘到有d硬野，咪用手攞囉，點知隻巨蜆咇水、又突出佢白色的肉，露野，我差d掂到佢，真係俾佢嚇親，大叫左出來，結果梗係bbq時燒左佢來食，報仇﹗
佢地想搶我隻巨蜆，仲叫我拎番張相對下d紋係咪一樣，O咀…

返去等沖涼時打左一陣牌，sorry，我自首，飲左幾啖啤酒，下次俾番你喺我面前食煙囉

她：我有個friend好靚仔架
佢：靚仔？
她兩個friend晚上帶左一大袋蜆過來，燒蜆，等隻蜆開口時加蒜蓉，亦可以加d辣椒仔，好好味，好鮮甜，不過真係好狠多蜆，我都未試過一次食咁多蜆
她：我個friend得唔得呀
我：幾得喎
一邊燒一邊飲，佢地飲啤酒、vodka coke，我飲vodka+橙汁，當然仲有black label+綠茶，唔記得飲左幾多，同佢哼杯，佢夾硬加我料
她已經斜左，走左入去訓，我都入去房攤左陣，唔知點樣同她講開，話想出去行下，講講下話去沙灘，我同她都尖叫起來，捉住眾人要落沙灘
喺馬路度彈起、訓街、訓沙灘、打側手翻，最多都係連打兩個，因為晏晝掘蜆，手臂激累…
d沙好軟好舒服，天上好多星星，我和她點星星，幫d星星起名
好耐冇見過星空，尤其係香港的星空，印象比較深的一次係，係好多年前上鳯凰山睇口出時的夜空
嗰一刻完全忘憂忘我，如今想來，如果嗰刻旁邊的人是你，好明顯會有另一種feel
不在意時分針走到哪裡，享受那個不用牽掛任何事的時空，我又高呼：呢個沙灘係我架﹗我要買左呢個沙灘﹗

第二日的行程首站去左沙灘玩水，其實用浸水來形容，應該比較貼切
之後碌落梅窩食野、踩單車，好熱…
去過瀑布，喺沙灘旁邊經過，周圍碌，搭6點的慢船離開，出番中環，雪糕車又召喚我…
搭船過tst，喺五枝旗杆外繼續自由行
的士到廟街食飯，個人開始變得呆濟，無聲出，反應慢，最後小巴返歸
好狠累﹗

玩意不外如是，也千遍一律，沒有太多新意，但每次同唔同人玩都有唔同感覺
不過咁多個離島，我都係最鍾意長洲，回憶、笑聲一籮籮，我相信我總有一日會搬入去住

車，好彩我suggest離開間渡假屋時影合照咋，嗰張係我地兩日一夜唯一一張合照
九男女變成七男女，因為有兩粒人甩底，原本話入來bbq的她亦放飛機
原本諗住入camp前一晚整曲奇餅，但出街玩得太晏，冇左件事，下次啦，總有機會的
另外，如果覺得我講野做野過份左，玩大左，sorry，希望你唔好介意
相片散落在眾人的相機之中，收晒再post多d相同大家share

行動

18 June 2007

我係蠶蟲
明白的人，自然會明白；唔明的人，毋須深究

今日mission failed，哎…
有著有唔著囉，hea過左，但要再拍多個weekend囉

行動目標：去camp
行動地點：大嶼山塘福
行動日期：公元2007年6月18日至19日
行動細節：bbq、吹水、游水、玩沙、打牌、hea、講鬼故，同埋玩即興
行動人物：最少有九男女
行動代號：向塘福出發

出發前，執左一大袋野，去兩日camp啫，好似誇左少少…

********
K先生：可否阻你十八秒鐘看看信？實在沒有用，情願不怕面紅，頑強地進攻，爭取你認同，才年年月月晚晚朝朝密密寄信明知我們隔著個太空，仍然將愛慕天天入進信封，抬頭望星空發夢，仍然自信，等到遠處你為我寫那一封人人都怕難、怕倦、怕撲空，全球得我未死心，沒有放鬆…

當年今日

17 June 2007

當年今日，「又在地鐵站玩個心情機，我又選了開心指數10」
不過事隔一年的今天，好似冇一年前咁開心
人大了，就變得不知足嗎？人大了，快樂轉眼即逝嗎？

當年今日，也經歷過一段唔易過的日子，正如尋日所講，因為一個人而心情大起大落，也為工作與生活的不如意事皺眉頭
事情就好像一個循環，又像大富翁，回到起點，再走一回，總要經歷一些起跌，去到某些位置，遇到考驗，硬著頭皮都要捱過去，某年某月某日，冷不防遇上賞心悅目的事，嚐到生活的甜味，感到日子不曾枉過，少少拼勁燃起鬥志，又再勇往直前，衝衝衝…

也許，應以當年今日所言：快樂的人，永都是最吸引的
與你互勉之

對白

16 June 2007

黃家熙出殯的哀樂，隨著辦公室中央空調系統，傳到每一個角落心情重了最高榮譽葬禮，誰人渴望得到？誰人渴望參與？「浩氣長存」四字，真係唔係人人都受得起，唔係個個都想受得起

你的喜怒哀樂全受他影響，點解你唔可以灑脫d？
電視劇的對白，好似係講俾我聽咁

諗住約我放工即刻去浦，唔俾我返屋企換衫的話，唔該早d出聲，係呀，正如你所講，我返工係爛dat dat，出街去玩先做番我自己

********
他farewell嗰晚cue漏左一個bite：我幫唔到你喎

一個令人尖叫的消息

15 June 2007

回歸盃的戲碼係咪好吸引？平心而論，其實唔係，但有得睇好過冇得睇，過往如果可以的話，有咩訪港「勁旅」，我都會去湊湊熱鬧
真係估唔到會咁快賣晒d飛喎電話中講開，你問我會唔會去睇回歸盃，因為你極大機會因工作之名去，喺大球場一帶出現但好可惜囉，我嗰個禮拜出故仔，一定忙於寫稿或後期製作中…
另一個令人尖叫的消息，就係你極大可能因你的友好之名獲得利物浦的靚飛，希望你唔係氹下我架啦

呢排update個blog的次數驟降，原因係成日出左去玩前晚喺cwb食飯，因為上次上海之旅後講過，要試埋香港嗰間南翔小籠包，well，真係極之不外如是，好失望﹗

隔離枱嗰兩個女人都唔知咩人來架，好狠大食，食左好多野，張枱擺都擺唔晒，我同同行的friend事後嘗試數番佢地食過d咩，湯年糕、唔知咩菜、肴肉、炸蝦波波、小籠包、酸辣湯一窩，仲有砂窩雞，同埋唔記得既起碼有兩三樣，另外，仲有酒釀丸子、高力豆沙

碌左一陣返歸，真係啱啱返到去，就收到電話，問去唔去飲咖啡，咁我梗係去啦，連衫都唔換住

轉個頭他都打來，問我係咪出去

他：飲咖啡啫，使唔使著高跟鞋？

我：我冇換衫啫

他：你都幾犀利，唔使訓架喎

我：就算唔碌出來，夜晚都係訓唔著，呢排晚上失眠

沒有認真或唔認真地合作過的「舊同事」而家變成了玩腳，唔覺意地留意到他又係著嗰件間條衫

，引來眾人的小起哄

忽然做左「主席」，究竟我幾時話要開記者招待會呢？

上回講過如果改改問問題的技巧，我可能會答左d本來唔會答的野，高級記者出手，well，中招了﹗

繼續講落去，只會講多錯多…
唔好再研究邊個受得起，邊個受唔起

得到高級記者的咭片，睇來我都要喺我的咭片上加上「低級」二字，以顯示我對高級記者的尊敬
再次被迫供關於結婚的事，我還是三緘其口
如果你認為我真係如你所講「copy其他人的blog搞到而家唔知點收科」，又或者「為左增加讀者或閱讀趣味」呢兩個不知所謂的理由而無言以對，如果你真係咁諗我，我只會覺得你好膚淺囉
被批評寫出來又唔講清楚又長篇大論，我當時我回應了一句，如果你記得我當時講咩，我已間接揭示了答案

因為前晚出左去飲野，所以尋晚訓得少，好累拍攝途中落大雨，真係邪…

進度稍為超出預期，所以可以早少少走，啱啱返到屋企樓下，收到他的電話，問去唔去飲野，當然應承啦，返去快叉左兩個鐘就自己醒左，咪online左一陣睇左一集學警，miss左幾晚了

三猛男喺我屋企樓下等我

他：去邊？

我：阿邊個話去tst阿士厘道一間bar

他：咩bar？

我：amazing bar

引來一陣大笑，well，嗰間bar真係叫amazing bar﹗

引述他的wording：本來冇意義的飲野活動，突然變得有意義

突發的farewell，有十五六粒人

由房玩到出大廳，周圍坐，拎住杯酒談談心，我杯係screwdriver，唔係橙汁咁簡單
得到一位哥哥，那番說話，我唔會忘記，聽到我熱淚盈眶，多謝你﹗

今日大部分時間都被不知所措的感覺佔據，白日夢遊，我d解藥喺邊？

玩樂後遺症

12 June 2007

玩樂後遺症又發作，但今次病徵有異…除左頭痛、頭暈，忽然新加失眠，仲有差d俾車撞﹗
事情應該由上月尾講起，因為工作，連續12日返工，直至啱啱過去的星期五，因為weekend落雨，先至叫stop一stop，真係好抑鬱，亦好行屍走肉，失去意識，淨係想去玩

所以星期五一放工，即刻call人去玩，但反應馬馬地，返到去睇tv、msn，msn上的他亦問有冇節目，不過都係冇下文，好在最終都有人撐，喺樓下bar pacific飲杯野都好過冇丫﹗

呢排飲野，你地有冇發覺我唔飲啤酒呢？

他應承唔喺我面前食煙，我應承他唔飲啤酒

嘻嘻，所以轉行飲cocktail、紅酒和繼續chivas

星期六晨早6點幾乍醒，唔係好訓得番，結果碌碌下訓到12點幾，出左去剪頭髮，跟住去左食飯，食日本野again

喺始創撞到一名舊公司同事

之後去左朗豪坊碌，喺嗰條好長的電梯度，我同個friend上，迎面撞到中學個friend落，響佢全朵我同身邊的friend講，我頭先咁響佢全朵，佢會唔會好尷尬呢？但諗深一層，識佢咁耐，都係叫佢全名，而佢d花名，大庭廣眾叫出來，佢應該極之有可能仲尷尬再行左一陣，被響全朵個friend call我，所以原本諗住返屋企的行程取消了，突發去左飲野
一見面佢打開個袋，係好多個如下圖所示的細公仔，佢話頭先無聊夾的，第一次一夾就夾到5隻，我揀左三隻，佢仲送埋佢隻豬俾我添﹗傾傾下，原來咁就三粒鐘，真大鑊，因為最遲五個鐘頭後要起身返工…

唔同款的飲品，大家共用一枝飲管「傳飲」，再次玩番喺中學high tea時代開始的習慣，一人一啖，傳完一round杯野往往得番一半，越好飲嗰杯越淨得少，個個都話想試真d，飲管上沾滿眾人的口水，大家親密得唔計較，平日又以兄弟姊妹相認，我係七妹，有大姊、二佬、鬼二姐、三姐、四哥、五兄、六姊、八妹、表哥、阿姨、娘親、阿姨個仔

如今回想起來還瀝瀝在目

因為黃雨，星期日，即係尋日原本的外景拍攝突發取消左，繼續訓，但都係訓得唔好
晚上有gathering，傳聞有超過四十人，但出席名單係高度機密咁神秘，大家都唔知邊個會到出去前行左一陣街，因為費事拎野，所以忍手冇shop，本來係早d上去打牌，可惜突腳…

行左出去講電話，俾人話我似迎賓，O晒咀

飲紅酒，都唔知俾人哼左幾多杯，咁又未至於話醉，不過係有d high high地囉，個人放d、relax d

晚上的gathering勁似擺酒囉，召集人仲要拎住張名單剔名，睇下邊個到左未，真係差在唔使做人情咋…

5圍枱，真係好crazy，有一圍嗰d人係我完全唔識，另外有d真係估唔到佢會到的人都有到喎，召集人的號召力真係好狠犀利

影左張比大約一年前嗰次更加people mountain people sea的大合照

實在太多人的關係，明明見到，只係一枱之隔的他，都要打電話同他講電話，真係好好笑

飲宴後去左上次好多人(包括我)發癲嗰間野bar飲野，飲到三點左右啦，閃左

********
你說：我而家眼裡面充滿憤怒
我形容你用一雙憤怒的眼睛看世界
我同快樂小天使失散左，幾時先重新學識用一雙快樂的眼睛看世界？

因為你一句說話，令我的心情跌落谷底
點解次次都係咁？
我幾時先學識唔好想得太多，想得太遠呢…
你又可唔可以順下我意？

我食慾不振、失眠，總覺得有點奇怪和不祥的感覺
見到野唔想食，無啦啦諗起打邊爐，試下睇下會唔會有幫助
正所謂開心打邊爐，唔開心都打邊爐，頭先打邊爐，又做小肥人，怒食

我受得起

8 June 2007

剛才簡單review過個blog，cue左上個月一個bite：我受得起
最好用來回應尋晚個bite

同你講開，又攞林柏特來講笑，一日至衰都係你啦，搞到我無啦啦有個仔
你迫我check番，well，林柏特係喺3月16號出世，就來三個月大架喇，一齊幫佢搞個生日會丫，橫掂冇擺滿月酒，人唔到禮都要到喎…
不過英格蘭嗰個lampard亦都就來生日喇，本月21號就29歲牛日
講開又講，嗰晚的對話唔止講過林柏特，亦由林柏特講到改名的問題，林肯、林則徐、林寶堅尼、林雨、林丙(病的諧音)、林花、林草、林吱吱、林bag bag…
大笑一輪
你同我再recall番林柏特d細佬妹叫咩名，你又忽發奇想：喂，既然有林丙，應該要有林甲、林乙啦
我O晒咀囉…
我：其實林甲、林乙同林丙係三胞始來架
你又話：你大鑊喇，林柏特而家先三個月大，有排你生﹗
再次O咀…
而今日你仲諗到一個仲毒的名呀：林鏹水
我：咁係咪應該有個林紅油呢？

今日再聽番mika，覺得有點俗氣…

頭先返歸途中見到他們一行四人去食晚飯，有講有笑，睇落都幾開心，以前我都係其中一份子，不過既然過去了，閒時懷緬下，亦令冷漠的臉龐掛上笑面
你話我份人樂觀又好，善忘又好，我只記得好的一面，開心的一刻
既然人記憶有限，有無限的喜怒哀樂要記住的話，以有涯隨無涯，殆矣﹗
選擇性地記一半，喜樂可以留低

我可能都有戀物僻，一見到新出或未見過未試過的百力滋同薯片，都一定要試一試，今日被呢包香草芝士薯片吸引住

同人唔同命

7 June 2007

好一句「同人唔同命」，成為bite of today，可以一同競逐bite of the month

yrcru jcmvh nn zxab hqi ohvf rmmr anmt p zxab rtm nk mnr vio wfyr rsp zxai tmmc jwjc hqi janl tqm rmmr nini mgln mnmbc zxab HIGH HIGHgpd zxab hjwg q km zxab tgdi rmmr oyg zxab irm jka onf janl rmmr yrsu hoami rtq jlln rsp zxal
打左呢段摩斯密碼般的文字，其實係倉頡碼，而家睇來，如果唔打番出來，連我都唔知自己打過d咩…
不過大意係講尋晚飲野的事

事情由尋晚7點幾講起…
尋日出外景，我要特別註明係「外景」，因為真係差唔多曬足全日，5點左右喺垃圾會做完個訪問
甲：跟住有咩搞？
我：收啦，今日咁辛苦
甲：咁正
我：你唔想收呀？你想繼續開工我有野俾你影架
乙：嘩，幾時做左娘娘，咁識玩手段？
我：大家都辛苦嘛
講真，我自己都想抖抖，連返左n咁多日，原本仲預期唔知再返多n咁多日喎，有得閃有得抖仲唔攝位咩…
因為早左收皮，所以早左返屋企，她7點幾打俾我，問今晚去玩好唔好，二話不說，搞埋少少手尾諗住去訓
但都未訓著，他打來，約左十點零tst
吓？時間地點都唔清唔楚，即係點？
結果去左阿士厘道6樓，上兩次上去都飲到斜晒嗰度，所以我問去邊間，你地話我飲醉酒嗰間囉
尋晚只限snowball，一共order左4杯

而由尋晚延續到今日的件事，由嗰碟wasabi魷魚開始…
我話唔夠勁，拎多左枝wasabi來，你地落，跟住食完後悔，話太重手，我試試，但食完面不改容，呢d枝裝wasabi勁極有限啦，都冇咩料到啫
佢：你咁食得辣，四川人來架？
我：我係日本人啫
如果呢d都頂唔順，咁生磨嗰d咪食到你地彈起？
後來淨左三分一兜，我就咁but來食，後來又話要我喊，但我喊唔出喎，唔記得邊個喇，叫我隊左嗰兩大匙wasabi魷魚
anyway，食左，但唔覺意索左一下，辣氣攻心，颷晒眼淚，她見到，以為我唔開心，將錯就錯，喊到喇，配合大家，大家又配合
我諗她以為我喊到震晒，但其實我係笑到震﹗
之後發生了打人事件，講到呢度，大家都知事情的由來，砌番個故仔，知道咩事啦
「我地唱d丫﹗」她說，又係一句可以競逐bite of the month的說話

今日仲得知一個好消息，就係隻故仔遲兩個星期先出街，之前她問18、19號得唔得閒去camp，真係灰啫，嗰兩日原本係勁繁忙剪片的其中兩日，但而家延遲，19號係公眾假期，本身都係放假，攞18號假，就可以同你地去camp，諗起就開心番晒
約左你地去食飯，你話去酒樓，我都有諗過有d咩腳，嘩，真係估唔到有咁多喎﹗

今日見番某人，好多日冇見過佢，其實有好多野想同佢講，但都冇機會，不過見到面，毋需多言，一個眼神，就已經足夠啦﹗

他：嘩，黑左咁多？乜元朗好曬咩？
他追看我個blog真係追得好貼，多謝晒喎﹗

星期一至五晚唔可以miss既，繼溏心風暴，而家有學警出更
我真係有個friend做PTU架，成日自己吹虛自己好型…

尋晚又被問到那個問題，一如以往，唔答
或者你鑽研下你的問問題技巧，可能有機會迫使我答左d本來唔答的野

講開 lat 親，上次俾壞人的煙頭 lat 親嗰度仲未好番，早兩日著裙出街右腳上有一塊焦

向元朗出發

5 June 2007

因為某人，最近經常向元朗出發，而今日，因為工作，又向元朗出發
去程訓著左，真係失儀，回程墮進沉思，好耐都冇試過諗野諗得咁入神

今晚煲足三個鐘的老火湯，係松茸雜菌螺片鯊魚骨煲瘦肉，真係好飲到震，你冇口福了﹗
不過莫名奇妙而來的若有所失感覺，不知用甚麼原因解釋…

bite of today

4 June 2007

msn暱稱的解說，換了「無緣做灰姑娘」，語帶雙關…

尋晚去左母校的35周年晚宴，我指的母校，係我渡過了七年美妙難忘光陰的中學母校我以我讀中大，身為中大的一份子為榮，但對中大卻冇嗰份感情話說回母校的晚宴，筵開45席，我地班一圍，隔離班一圍，我指的我地班，係form 4到form 7都同一班的文科班好友，而隔離班，就係指混雜form 4、5既d、e班的science班，你明唔明兩班的分別？到場之前，我問：你估有幾多mi-ss阿sir講得出我全名？甚至我未到場已經有老師嚷著問我喺邊，到唔到，真係榮幸萬分，我這個令老師又愛又恨的學生，唔使hints，唔使諗，真係咁令人印象深刻

尋晚金句一籮籮，大家來投個票睇下邊句係尋日既bite of today

選擇一：
兩件new york cheese cake同兩件藍梅cheese cake都到左，8個人，4件餅，份屬好友，大家分甘同味waiter放低幾枝叉，朋友甲話：我冇叉用waiter回應一句：唔好咁講啦，每個人都有佢的長處笑到碌地…

選擇二：
我打俾朋友甲：你出唔出來飲野呀？
朋友甲：睇下點啦，一陣話你知
我：咁即係咩意思呀？食飯又唔出來，飲野都唔出來？識左你成廿年喇，哎，朋友呀…
朋友甲：咁絕交囉
我：你同我絕交？你擺番兩圍，兼且登報宣布我地絕交囉
朋友甲：都絕交囉，使乜咁做
我：要話俾全部人知丫嘛，如果大家唔知你同我絕交，d聚會又叫你又叫我見到就尷尬啦
朋友甲：我唔介意喎，你介意你擺囉
我：係呀，我係介意，但而家係你主動話要同我絕交，梗係你擺啦，而且我係你合法朋友，我要分你一半歡樂

選擇三：
男朋友甲摸摸男朋友乙，男朋友甲話：你睇下你，好凸
男朋友乙：呢d係男人的特徵
眾人大笑，並檢視其他男朋友有冇男人的特徵
男朋友丙挺起腰板，好自豪咁話：我有呀
男朋友甲：我梗係有啦
男朋友甲乙丙都指住男朋友丁：咦，你冇男人的特徵﹗
眾人又大笑

選擇四：
一行七人玩大富翁，朋友乙第一圈都未行完就入左獄，一直都擇唔到孖骰，所以3 round後先可以出獄，但我地買左好多地lu，佢出番來嗰時仲有半圈未行完
不過佢行左冇幾耐，都未買過野，又事入獄，d地已經俾我同朋友丙買得七七八八
我地d屋都幾壯觀，朋友乙高呼：我要坐監﹗都買唔到野，淨係俾錢
朋友甲形容：佢係自由行，來行下洗下錢住下酒店
而朋友乙玩完全程，一樣野都買唔到，但最先破產既竟然唔係佢

********
原本舊公司d friend suggest尋晚去飲野，我話今日返工所以建議過第二日，但最後流左
而結果尋晚都係出左去飲野，玩樂一定要付出代價，不過，我願意

喺攝氏33度的蒸籠蒸左1 day，好熱好狠熱，好累好狠累﹗
番去沖左個涼就飛的落tst食晚上嗰餐應酬飯…
眾人影相，但我一d都唔enjoy囉
兩晚都有飯局，但兩者感覺完全不同，前者笑料百出，其實仲有一個關於全家都係橙的笑話，但我唔講粗口，聽過就算了，對比起今晚，感覺怪怪

109磅的記者

2 June 2007

過左咁耐都唔記得講，上次活動唔見左隻耳環，哎，冇啦，我諗搵得番的機會微乎其微
嗰對耳環好特別架，我好鍾意，但設計獨特，花少少心思，可以一分為二，唯有係咁樣延續佢的生命吧

今日走在事實最前線個台裡的人均議論紛紛：邊個係嗰個109磅的記者？
那個109磅的記者，走到事實的裡面

嘻嘻，許願樹從來都冇失靈，嗰日你問我係咪想睇側田？我話係，仲係極想睇嗰隻，但ot，多謝，心領了﹗

記得5月23日放工前睇三色台main cast，其中一段vo大意如下：余若海質疑李國章指 I'll remember this，you will pay，即係我會記住，你要付出代價呢句說話，講到街知巷聞，要申請專利，即係暗示李國章曾經講過呢番說話。李國章即時回應話，係咪以後講笑都要加上哈哈哈？
我同另一個同事聽到都即時大笑左出來，大家都話，佢錄vo嗰時有冇忍唔住笑？如果係live忍笑咪忍得好辛苦？

每次聽到甲方和乙方，用很理性冷漠的書面語合約條款，講出心裡感性窩心的承諾，都看得我熱淚盈眶
甲說：甲方永遠都唔會忘記乙方，就算任何一方死亡，仍然繼續生效
乙說：乙方向甲方承諾，乙方會一直愛護甲方，無論甲方將來遇到任何困難，開心或唔開心，乙方都會守喺甲方身邊，此承諾為一生一世

請等等，我溏心風暴緊的日子完結了
不過而家亦請等等，我英格蘭緊

心如鹿撞

1 June 2007

今晨夢見他，心如鹿撞今日要去馬會做訪問，夢中某馬會高層的媽媽被電子零件黨之類的人騙財，喺馬會開記者會，話說老細知我地喺現場，既然係走在事實最前線，當然抽我個camman去幫手先，所以喺現場撞到他

你msn的顯示名字透露了你的去向，你不在香港你身處濟南，星期一起駐廣州兩個月，有一段日子都見唔到lu
聞說行家話駐廣州=駐神州忽然而來的羨慕感覺，如山洪暴發
做記者的好處，可以去好多一般人平常人閒雜人無聊人去唔到的地方，可以走在事實最前線，甚至是走在事實上面，又或者走到事實的裡面，看到比別人多、比別人深、比別人廣，不過可能更黑暗和無奈的事實係咪真係我做得唔夠好，點解次次都冇我份，以為輪到我的時候又唔係我，一次係咁兩次又係咁係咪我太膚淺，只為滿足自己的體驗、滿足自己的眼界而從事呢個行業？呢種想法，俾人睇穿左…

以前曾經斬釘截鐵咁話唔做記者，我只鍾意寫作，報導只係基於事實，唔可以「作文」，所以我唔鍾意說起來不顧後果，毫無保留，只顯得我幼嫩和任性professor喝止我，因為幾篇人物專訪的功課，評語指寫得不錯，她對我寄望甚殷，認為我難得有寫文章的良好手腕，若融入新聞寫作，加以利用，有一定的發揮空間；而空有手腕沒有內涵，反而浪費了手腕和一腔熱誠，做記者的體驗能豐富閱歷和眼界，對創作裨益不少結果兜兜轉轉，畢業至今仲係留在記者行業，朝三暮四…同近日的我一樣，著住高跟鞋，gut高腳看別人的好，看別人的風光，自己偏偏冇腳踏實地，貪圖逸樂

發左個夢，我當然唔會天真到以為會撞到他，離開馬會兩點幾，碌番落銅鑼灣，食想食左好耐的麥記
今日係麥樂雞日，好耐冇食過，亦係為左新加坡蜜糖芥辣醬而去，但係售罄，真係灰，但都食左個9件的麥樂雞餐
晚餐諗住再接再勵，只係冇我想要的醬，所以先冇食，如果唔係一日兩餐麥樂雞，都幾crazy

剛才同她傾電話，話題仍然都係講緊上星期六的活動日，那份高漲情緒，延續到今日，星期四，即係活動日後的第五日
係咪因為值得開心的事太少呢？
回歸特輯進行得如火如荼，大家回想十年以來有咩開心事，諗唔到，乜呢十年真係咁唔開心，全部都死人冧樓？
搞成咁，係邊個的錯？
早幾日聽到一個人講，話聽到《始終有你》一曲就打冷震，點解？患上記者職業病，對政府野都要批判一番？
其實旋律唔錯丫，歌詞都填得好有意思，我認為係一首好歌喎，大家可以在政府網站合法下載：http://www.gov.hk/en/theme/10/videos/full.mp3

細個唱choir，早前講過，頭先睇片，回歸當日香港兒童合唱團冒雨演唱，勾起我小時候好恨加入香港兒童合唱團的遺憾…

呢幾個禮拜將會好crazy，返左4日工，聽晚剪片，實要ot，星期6繼續剪，星期日出crew，星期一話要幫手喎，又剪通宵？但我星期二都出crew喎，到下個weekend都要出crew，無間斷工作，我預告我諗我又會抑鬱…

原來那人不是你

31 May 2007

最近仲遺失了安全感，如有捨獲，俾番我丫﹗而每次我病都會勁口渴，哎，唔病得唔得呀？
今朝晨早起身已經酷熱天氣警告，三色台新聞話：今朝天氣好熱，喺街度行一陣都出晒汗噢，真係滴汗…d friend形容我係一舊冰，唔係因為我cool，雖然我有時都係，而係我唔熱得，好怕熱，夏天一出街我就話自己就來溶
我成日都話因為我冬天出世，所以怕熱唔怕凍話說天文台研究緊空氣質素太差的日子，就應「留在家中上班」，咁咪即係放假囉同樣的理念，酷熱天氣真係會令人窒息，不如酷熱天氣警告下都唔使返工啦，以免僱員在酷熱的天氣下發忟爭，熱到呆左，影響僱員的心身發展；同樣道理，寒冷天氣警告下，都應該宣布唔使返工，以免僱員在寒冷天氣下打冷震，凍到呆左，影響僱員的心身發展

********
他：你爛玩d
我：係咩？
他：我講錯咩？
我：咁又冇…
他：sat night 啦
我：唔好啦，我sun要返工
他：fri night
我：fri 會好少少，但我夜晚剪片，應該放1點
他：車，咁唔使預你啦
我：唔好啦

得出的結論同開場白一樣，我爛玩d
同他講開，原來我走左三個月喇，不過一見番眾人，又好似仲成日一齊日見夜見咁親切
或者呢個時候，就係做唔做到朋友的最佳考驗

噢，原來我只獲配上一句「好友」，原來你唔愛我，點解你愛佢唔愛我？

********
今日仲做左一件傻事，行左去嗰條路，向路的這一端遠處望過去另一邊的路口，冇留意花了幾多時間
突然見到一個身型、裝束都跟你激似的身形閃過，著住三吋高跟鞋的我都一口氣跑去路口，發現，原來那人不是你
那一刻的感覺好奇怪，又唔係想像中咁失望，而最後再等多左一陣，結果都係冇等落去
therefore for you，for me，for both of us，no surprise today…

放低一句謝謝，得閒番來攞

30 May 2007

活動後遺症仲未消散，日抖眼訓，夜晚失眠，連續三晚都訓得唔好，仲有d精神錯亂，以為今日係星期四
嘗試從各人的口述歷史，搵番遺失了的記憶，但仲未有咩眉目
anyway，麻煩到你的，得罪過你的，激嬲過你的，同我放盡咁飲過的，放低一句謝謝，請得閒番來攞

他：乜你好鍾意食雞翼咩？
我：你又知？
他：你自己講既
我唔明，究竟我幾時講過俾他聽？他播片，片段的尾聲，一把女聲大叫「我要食雞翼」
我除左笑都唔知做咩好了，合理地懷疑嗰把聲係我來既
原因一：我真係鍾意食雞翼
原因二：飲烈酒後斜左我會大叫 (編按：烈酒之中我飲得最多的都係chivas啫)
話說曾經有一次喺銅鑼灣街頭大叫：呢條街係我架﹗

又零食當正餐，返到屋企咬左一包大熱浪，跟住先食好美味自家製的波菜鮮茄咸牛肉千層粉

今晚要做灰姑娘

許願樹

29 May 2007

31號有側田concert，其實，而家先話想睇，係咪已經太遲呢…

忽然間覺得呢度好似許願樹，想要的野，想做的事喺度講下，跟住過一排又會成真
嘻嘻

多謝默默撐我的你

第一至八件事

28 May 2007

呢個weekend發生了很多事，玩左幾場，見到好多人，好多感覺想記下

第一件事，再去食嗰檔車仔麵，加一枝細可樂，勁good﹗

第二件事，得到一個平安包baby電話繩，同我預期的，係喺塔頂的九分平安膠包，成個拳頭咁大架，好大出入
做咩唔收買郭嘉明唔覺意跌個九分包俾你俾我，又或者等佢散場後做執包阿伯，又或者靜雞雞爬上個塔頂睇下有冇漏網之包，哈哈哈
我：我個包呢？
你：冇呀，都冇派嗰d包
我：咁買嗰d呢？
你：(支吾以對…)冇得賣 (編按：明明睇走在事實最前線嗰個台話仿真包15蚊一個，千五蚊一座包山，又有平安包散子包同平安包扇…)
轉個頭你喺個袋度唔知點樣摷左呢條電話繩出來，thx
他：我講左兩日都冇，唔公平呀…
哈哈，因為他呢句說話，忽然覺得自己高左，d優越感湧晒出來，冇九分包都一樣咁開心，一樣咁冧﹗
而其實除左個包，我仲想要整包師傅cup個包的印仔，唔知有冇機會搵到呢，個印仔really好過癮，但我唔要原子印架，係咪好貪心？

第三件事，我要搵出真兇﹗
事緣飲過你嗰杯酒，又同佢共用過一個杯，搶過他杯酒飲，又唔知有冇人飲過我個杯，定係同某甲哄得太埋，我發覺開始病病地…

第四件事，你同我都用同樣依依不捨的眼神對望了兩秒，俾晒位你啦，要講的，你唔講，要問的，你又唔問，以為你會打俾我，結果都係冇，所以我都係唔打俾你了

第五件事，今晚件衫，正確d來講俗語係一件連身裙，學名叫trench coat，被comment「好有趙薇的影子」，引來一陣大笑
阿哥，呢d叫design呀…

第六件事，我想講電燈膽都有分烏絲膽同慳電膽，而watt數唔同，反映個電燈膽有幾光，照明能力有幾大，只係統稱一句電燈膽唔夠precise

第七件事，之前有一次你online，我叫你，你唔理我，所以今晚你又online，我都係唔叫你了

第八件事，留意到你同我有相同的小動作和習慣，但係咪你抄我架？

尋晚的party，俾人串囉：今晚好似係我farewell喎，你點解仲high過我？
well…
我講過，唔係每樣野都要搵原因解釋
可以隊的野有好多，例如有水、凍蔘蜜、nothing、當然仲有酒啦；可以令人醉的野亦有好多，例如醉人的夜景、醉人的情話、醉人的歌曲，當然仲有飲醉人的酒
問：想飲咩？
我：不如開番枝紅酒
但結果都係冇，chivas直落，不過話時話，你有冇飲左一jar水？
唔使多番強調我貓左，我冇貓，只係斜左啫，真係好斜，亦都唔知由邊一刻開始突然斜左，有一段記憶遺失了，某個時空消失左，事後我知自己癲左
左腳膝頭哥同右邊大脾都瘀左一dat，我諗都係失憶期間做左d[火羅]野
坐我隔離嗰個壞人，用煙頭lat我隻腳，i'll remember this，you will pay﹗

今朝唔知點解，十點幾醒左，雖然繼續碌，但好暈，頭痛胃痛腰酸背痛，同埋作病，真係作死﹗
晚上的飲宴，再一次說明唔係咁容易一次過滿足晒所有人，趕時間的微言此起彼落
俾著我，不論中定西式的近似擺酒活動我都唔揀，分批屋企人、朋友、同事，各自各book間廂房又好，book個燒烤場又好，book間日本料理都好，book間私房菜都唔錯，book間bar亦得，請個三星廚返屋企煮番餐，咁先至真真正正聚聚，感受下喜悅，少d人又易d服侍，又唔使驚d親友驚有d三唔識七的人搭枱，又唔使驚招呼唔到
記得細個嗰時勁唔鍾意去飲，基本上嗰d唔係好親嗰d親戚，可以唔去的，我都唔去，寧願自己喺屋企咬杯麵
再次強調，蒸魚，如果要我主動夾來食，只有佢的面珠燈；仲有，我唔食橙架，橙汁另計

邊個打來唔出聲？

26 May 2007

你直覺認為佢係你識既，咪即管估下囉，反正你同我都識的人，話多唔多，話少都唔少

因為遲來的farewell活動，又食小肥羊，五日內食第二次，crazy
食上癮…

自從宣布結婚後，每日都收到一個沒有來電顯示的「私人號碼」，一係lunch hour，一係放工，唔出聲，我喂幾下嗰個人就收線
有一次我唔出聲，佢都唔收線，直到我出聲，嗰個人先收線
又試過佢唔出聲，我又唔出聲，我收線，佢又打番過來
嗰個人打來的目的，好似一定要聽到我把聲，我凝住係我識得的人
究竟係邊個？

唔知點解，總係覺得你有睇緊我個blog，你用行動默默回應緊我的言論，除了用這個原因解釋，還可以用甚麼破解這一連串謎團般的巧恰？

搶包山

25 May 2007

本來諗住入長洲睇搶包山，結果都係冇
俾十萬個理由自己，因為天氣熱、遠、多人、冇船、聽日要返工、冇位、冇人陪…
其實，點解要呢d理由？唔係每件事都要justified先做得
喺屋企開住冷氣睇，搶包山，都係不外如是，也許我係嘗試安慰自己

睇到佢個blog，好似俾佢兜口兜面打一拳咁痛和突然…

一年了﹗
仲有一個月…

我唔會離棄利物浦

24 May 2007

期待多時的歐聯決賽，終於都完左，返到屋企，仲未眼訓
唔知幾耐之前已經約定，日子越近越期待，今個星期初返工，每日都對呢場決賽望穿秋水…
今日的心情心態都係等睇波feel，未放工已經約左一齊食飯，跟住唱k直落睇波玩天光
放工突登返屋企換左利物浦波衫，呢件冇熨字，因為我成隊都鍾意，睇波都算去浦，所以仲換埋去浦專用的紫色con
想記下的事有很多，包括零碎的對話和事情

電話響起，他企喺視線範圍的牆角，望住他，但講電話

兩個人，十杯凍蔘蜜，係用來玩骰盅，每次三分一板至半板，crazy…

甲問我：「你下個月結婚咩？」
乙搭咀：「點解xx冇宣布既？」
我只用睇波去迴避，仲未係時間向大家交待

她搵我部電話搵他的電話號碼，我隨口就up得出，他面子真大，眾友好之中，我會記得佢number的只有幾個人，他係少數中的其中一個

他：「一陣過來搵你」
我初初以為他會剷到我地間k房搵我，真係突然心跳不知所措，但結果都係冇

今日著左利物浦件波衫出去，嗌到聲都沙晒，雖然輸波，但我唔會離棄佢，亦唔會怪責謝拉特，正如我唔會離棄林柏特一樣

平安膠包

23 May 2007

終於知道嗰首歌叫咩名，原來叫the mass，係法國人eric levi 專輯《the mass》的同名歌曲，激昂、氣勢磅礡
另一首感覺完全唔同的，係elaine paige的memory，如流水如星光，更如絲絲煙縷
頭先將呢兩首歌add埋落尋晚的英文歌play list

細個唱choir，唱過memory，高音唔難唱，唱得好聽亦都唔難，但唱得有味道就好難
放輕聲唱，諗下d歌詞，月光好靚…
但人仔細細，根本掌握唔到歌曲的神髓，得其形不得其意
有一次同你喺麥記食宵夜，咁啱播起呢首歌，你話好鍾意呢首歌

the mass令你諗起乜野？打勝仗凱旋歸來並整齊列隊步操的軍隊？定係聖詩班喺教堂一邊唱聖詩，神父一邊向撒旦灑聖水？還是聽到一對情侶吵得轟轟烈烈，掌摑聲此起彼落？
網上曾經有傳言，話呢首係二戰納粹德軍的軍歌

********
我要長洲平安膠包﹗
既然限量版奧運T都俾你搵到，一個膠包難道會難到你咩？

你結果揀左去利記球迷會的睇波活動，原本話飛去雅典睇，得個講字…
早喺對利記淘汰巴塞時，己經約左舊公司d friend一齊睇決賽當時打趣道利記對ac，果然成真，累積左一個金多寶，你之前夠話join喇，而家又縮沙﹗
其實如果唔係灣仔嗰個場唔食得煙，我都會suggest同球迷會一齊睇

大家都溏心風暴上身，啱啱的weekend終於追到進度，呢兩晚9點半乖乖地bor喺個電視前面
俾你comment我似水mak mak，點解？講d唔講d…

另外，因謝拉特搞出一個笑話
你：ur new bf of that pic?
我：我都想佢係我bf
你：haha
我：可惜佢有個女喇 (編按：應該係兩個)
事緣係我msn的display photo換左gerrard張相

共通點

22 May 2007

原本諗住煮飯仔，但你話唔好搞咁多野，出去食啦，結果就去左打邊爐，食我最鍾意的致癌物、鮮蝦丸、墨魚滑
由小肥羊變成小肥人，哈哈﹗

醫生話，偶爾想食餐好d，放縱少少都得，咁之前之後嗰餐食番少d囉

gucci上身…
而當gucci人遇上穿prada的惡魔，會係點既呢？

晚上狂聽英文歌，聽完要repeat，play list順序係：
vincent
when you say nothing at all
words
casablanca
right here waiting
let there be love
don't look back in anger
when i fall in love
better man
stand by me
miss you finally
你找到甚麼共通點？

同一時空

21 May 2007

由don mclean的vincent伴著午夜的我，繼續憂鬱，延續了多愁善感…
今天，有一份焦慮，有一份冀盼，感覺怪怪
出街，罕有地兩手空空地返歸；日本菜，連續食左兩日

繼續默默地跟他相遇相聚相思，在同一時空，直至他離開

我唔會喺個blog度講大話

20 May 2007

聲明：多謝各位朋友關心﹗多位朋友都問：結婚的事係咪真？我答：我唔會喺個blog度講大話引述我個blog 13 May 2006《blog》一文：呢個部落所講的，都係真說話不過其他的問題，現階段無可奉告，在適當的時候我會詳細交待事件想知道最新消息，請留意呢個blog

********朋友預言兌現了，車仔贏左足總盃冠軍，真係唔到摩連奴唔牙擦，佢話要攞第一屆在溫布萊進行的足總盃，佢又狂言成真
餘下的預言，只欠下周四凌晨利物浦第6次捧起歐聯獎盃

原本以為會出去睇波，結果都係冇，留左喺屋企煲湯

我結婚喇﹗

18 May 2007

今日睇醫生，為的係減肥，target係減十磅，減肥的原因，係我下個月尾結婚喇﹗
嘻嘻﹗
磅重量血壓，搞呢搞路，問長問短，都搞左好耐…
醫生話：BMI係正常，但可以幫你試下，減到個range的下限，但要減得健康，一星期瘦十磅，又心跳又手震你都驚啦，萬一有d咩副作用，影響左個腦就一世架喇
睇一次一星期藥，盛惠570個大洋，平均每日係81個4毫3，醫生話一個星期都會見效，瘦兩三磅，個療程食一個月左右
瘦，一向都要付出代價
鋪天蓋地的纖體減肥修身廣告，我一直都認為同我無關，減肥兩個字，我從來都冇諗過，更加唔會估得到今日會為左「瘦d」而去睇醫生

睇完醫生去左灣仔碌，喺三聯買左本《香港街2007》，研究一下全港各區的單車徑，本來諗住weekend去踩單車，實地睇下d單車徑，但天氣報告話會落雨
真可惜﹗

23號歐聯決賽，月前已經約好左一齊睇決賽，人數仲累積緊，好似金多寶，哈哈﹗但地點仲未揀定
有興趣join的搵我報名啦

online，看見他在線上，沒有呼喚他，沒有打擾他
三十分鐘，我們身處同一個時空，感覺特別

幸運小天使

17 May 2007

今日，好好彩，多謝幸運小天使陪住我，眷顧我
話說諗住七點即閃，結果磨到七點差唔多搭二，又在趕搭二出荃灣的公司車之際，行到門口，發現冇戴錶，咪急急腳返去搵囉，枱面：冇﹗
冇呀﹗去左邊？心離一離…
我同d同事講：我唔見左隻錶
佢地都慌忙幫我搵，連自己個櫃都打開搵，toilet、pantry都搵過，冇，真係好失落…
問：你嗰隻咩錶來架？點樣樣？
我：agnes b的錶，錶帶係膠，紅色，錶肉係鋼，跳字
甲：搵真d啦，可能擺左唔知邊度，呢度d人唔會偷
哎，都諗住放棄，出mass message請全公司同事幫幫眼囉
甲：你去過邊呀？
我：都係在toilet、pantry嗰d地方浮游…丫﹗我頭先睇過片呀﹗
碌入log帶房，真係喺裡面呀，就係頭先食完飯同個同事睇片時放低左，即刻笑番晒啦﹗
我：聽日請大家食野﹗

幸運小天使今日都幾忙，因為佢仲幫過我兩次，兩次都同條手鍊有關
哎，我d咁粗魯又粗心大意的人，帶d咁斯文的鍊，係論盡d架喇，做做下野發現個鎖條鎖匙仔甩左出來，跌左喺枱面，心諗好彩在枱，執得番
冷醒「裝」番上去，搭車去地鐵站時上小巴又跌左出來，叮一聲，好彩又執得番
多謝你，幸運小天使﹗

因為手錶事件，差唔多7點半先走，但都不改我去九龍灣拎番嗰件訂左的裙的行程，食左個好好味的車仔麵，飲左好好氣的細樽可樂，好滿足，心靈同胃腩也如是
之後碌左去amp，必去潮聖地 d mop & extravaganza，呢排連gucci都賣埋，prada擺到周圍都係，好濫…
兩間野都係，反而唔鍾意佢開咁多分店，冇左以前privilege的感覺

ps，你開過我個名，我記得
我反而覺得，如果同時有睇你同我的blog的讀者，唔知佢會諗d咩呢？佢的感覺，一定很有趣﹗

親疏之別

15 May 2007

最近患上渴睡症，星期五同星期一的病情特別嚴重
不，我從來都沒有脫離渴睡症，訓覺，根本就係我的嗜好，放假訓十三四五六個鐘絕對係等閒事
一次愉快的睡眠，斷多少髮線？
不管了

做了她鍵盤下的「朋友一號」，或許而家明白你做我鍵盤下的「你」的感受
有d無奈，乜我唔見得光咩？點解唔可以直呼其名？你會唔會介意我一直都唔將你正名？
有d期待，我在猜你的讀者會唔會估到我就係「朋友一號」呢？你也經歷過這份希冀嗎？

讀者問：嗰條手鍊真係白金咭嗰個人送俾你？
我：係
讀者：嗰條鍊成二千蚊架喎
我：(笑…)你又知？
讀者：我睇過丫嘛，嗰個人邊個來架啫？
我：(靜默…)

********
你點樣稱呼一個人，往往反映了這段關係的深度
能夠毫無顧忌地在暱稱前後額外加上「死」、「肥」、「豬」，一定跟這個人很要好很要好
能夠好不客氣地叫你全名，這個人的關係亦很要好很要好
有些人只會用「喂」去互相稱呼，呢種關係可以很極端，一係極要好，一係唔知佢叫咩名
又有d人你唔會叫佢個名，應該話係會略去互相叫大家個名的步驟，拎起電話就單刀直入，連一句「我呀」都慳番，見到面唔使hi，呢個人係極要好極要好

小學時朋友仔互相稱呼中文全名的頭兩個字，我係「潘惠」，曾經以為這個稱謂石沉大海，大約一年前啦，有兩個人曾經亂打亂撞下咁樣叫過我，不過佢地唔係我d小學朋友仔，所以感覺得特別，而家諗番都幾得意
中學搞課外活動，大家俾面，叫我「霞姐」，呢個名一直沿用至今
英文名tanny，話說是tangelo的暱稱，簡稱tan，所以好耐之前有「阿十」、「十妹」的稱呼，但只限某堆朋友仔，tangelo反而冇人叫，而叫我tanny的人亦有嚴重親疏之別，有d好friend好friend的，但佢地有時會叫我「坦妮」，其餘的，都係因為某d原因，扮親切又好，扮熟落又好，為方便都好，就叫我tanny
我叫坦妮的事，冇特別傳開，又係某個圈子的稱謂，早前覺得得意，在msn介紹過呢個名
而舊公司d friend叫我「阿霞」，最初真係覺得好娘，但我份人就係咁，你叫得出，我怕咩認呀，況且越叫越有味道，越叫越覺親切，很特別

歸於平淡的失落

14 May 2007

英超最後一夜，激情留給成功護級的韋斯咸和韋根；護級失敗，球迷比球員顯得更加傷心
頒獎禮，前年同舊年是藍軍的天下，天空都是藍色的；今天是曼聯的日子，不過天公不造美，全程落住雨，係咪有d咩含意呢？

今日同時都係母親節，周街都好多人，好煩厭

今日唔開心，唔知點解心裡有空洞洞，患得患失的感覺，連食raspberry雪糕都冇用，勉強俾個理由話搵唔到嗰件adidas外套
其實原因可能好簡單，累，加上尋日情緒高漲，今日歸於平淡，所以太大對比
如果咁樣諗會開心d，就咁樣諗啦

唔話你知

13 May 2007

呢兩日好多野想記低，而事情應該由尋日講起…

晚上六點幾，他打來問：聽日放假呀？今晚去唱k囉
所以就約左十點老地方，即係neway city，打算玩通宵
尋晚他都來左，之前他出過來一次，其實都可以多d叫他，他都應該係玩得之人，同他喪玩骰仔，喪飲啤酒芝華士
我諗我都飲左好多，以我欠佳的狀態，冇劏到都算好彩，真係好斜呀﹗
我要走，你地唔俾我走，收埋我個袋，搶我頂帽

你做咩飲飲吓喊？乜件事唔係解決左喇咩？有d野唔係吓吓都講出口先有保證，行動往往比說話更有力，你明唔明？
每個人都有一個敵人，呢個敵人叫心魔，佢最叻係胡思亂想，令大腦產生幻覺，將現實中的自己迫埋牆角
呢d說話，我識講，識用來安慰人，但就唔係好識變通
最近心情好轉，都係靠他講左一番類似的說話點醒我：仲以為你有d咩問題，咁小事，你的問題在我眼中都唔係問題，你諗多左喇
其實，我覺得早前好矛盾，用一d我唔能夠身體力行的說話「教你做人」
anyway，關於我的事重拾正軌，幾時輪到你？

後來都係早走左，因為今朝要晨咁早碌入元朗
行出去時都行唔到直線，我諗你地冇留意到，喺的士度訓左，冇知覺…

今朝較左鬧鐘8點，結果8點9先起身，仲要執正d，10點半要入到元朗
元朗，對於我來講係極級陌生，呢個月之前，我入元朗的次數一隻手數得晒，次次都係做野，車出車入，根本冇時間認識元朗呢個地方，所以尋日知道今朝要自己一個人晨咁早入元朗搵你，真係有d不知所措
原本諗住可以自立唔靠人，睇地圖，我對d地方根本冇概念，所以地圖幫助不大，睇左半個鐘後，結果都係搵你教我搭車囉，而其實如果你一早安排專車，即使只係車入都好丫…
辦完要辦的特別的事，見完要見的特別的人，經過恒香老婆餅，仲要大大個字寫住「元朗手信」，對於第一次到元朗「探險」的我，一定要買番d戰利品
因為時間唔配合，費事彈上去阻住你地做野，你地亦唔得閒招呼我，所返左屋企先，call你地落來食lunch，拎盒老餅俾你地啦，又發生了一段曖昧的對話

你：尋晚咁早走
我：今朝晨咁早要碌入元朗呀
你：咦，入元朗做咩？見uncle antie？
我：(笑…)我尋晚都好斜喇，今朝仲持續手震同心跳
他：咁即係話你飲得唔夠囉
你：定係你見到uncle antie緊張咋…

你：著得咁靚一陣約左邊個呀？
我：唔話你知
你：咦，嗰個人我地識得架，唔講得名
我：做咩要咁估呢？咁你唔識的講俾你聽你都唔識架啦
你：男定女啫？
我：唔話你知
你：一個人定一班人啫？
我：唔話你知
你：咁去邊？
我：唔話你知
你：咦，有d野喎，咁神秘，去邊都唔講得，我關心你咋，我怕你識到壞人，你成日都話你遇到壞人
我：(笑…)

問：林柏特而家幾多歲？
我：林柏特係8號仔 (語無倫次…)
做咩又提起林柏特呢？講到而家都唔厭…

問：做咩成日戴帽？
我當時冇答，其實係唔想吹頭，而同時可以襯衫，又可以遮蓋我額角高的特徵

晚上再接到你地的電話，又飲？
你：喺邊？
我：尖沙咀，點呀？
你：冇咩點呀，掛住你咪打俾你囉，唔使一定要有野先打你架
我：呢句都係口頭禪來架啫
你：你喺尖沙咀，我來接你
我：唔好呀，好驚
你：咦，有d野喎
同一個來電轉到她手中…
她：飲野呀，佢地話落尖沙咀
我：有咩人呀？
她：都係嗰d鐵腳啦
我：no喇，好累，今朝8點幾起身，尋晚又好斜
她：咁早去邊？
我：em…有d野搞囉
她：咁神秘？

結果冇去到你地尖沙咀的飲野活動，下次啦﹗唔好漏左我喎﹗

頭先喺尖沙咀一陣，第一站碌到sogo，唔使半個鐘，幫襯左shu uemura、某counter買左一對袖口鈕、仲有folli follie
你行使「尊貴的白金咭」(出自某甲的術語)碌左條手鍊，好靚，我受得起，really thx﹗
點解白金咭就要配上尊貴？白金咭我冇，但我有佢個friend金咭同black card喎
係咪係咭都要俾個形容詞？咁金咭係咪華麗？black card係咪神秘？

尋晚個look俾人話似巫婆，又話萬聖節，真係始料不及…
既然係靚野，當然要曬命啦

太想放假

11 May 2007

呢幾晚都訓得唔好，不知所以…
因為今朝咁早開，所以早左少少走，諗住去買番嗰個袋
短短的車程，咁都恰著左，訓得好冧，其實我真係好累架
但買野喎，即刻精靈晒，既然去到，就睇下野囉，竟然在b+ab睇到一個白色袋喎，雖然唔符合要求，但好靚，好鍾意，咁啱你又打俾我喎，改變左你原本落荃灣的行程，過左來join我，你都話呢袋得呀
結果，咪兩個都買晒囉
陪你買衫轉look，做一個唔夠專業的形象顧問
sales姐姐問想搵咩類型的衫，你同我你睇望我眼，真係講唔出，要嗰種feel，未搵到囉
後來搵到嗰件衫，你話就係嗰隻feel，但千幾蚊，我諗：唔係化…
點折點減都話要950，實在唔抵，唔值，所以算罷啦

最近捲入爭產風波，我邊一邊都唔幫，只想觀戰…

唔知點解成日都凝住今日係星期五，可能真係太想放假

禁制令

10 May 2007

好耐都冇試過一個人shop
話說放工原本諗住去搭小巴返屋企，但啱啱走左架車，一路等車一路諗點樣襯嗰件trench coat，加上一直都想買個白色袋，突然叮一聲想行街
結果，唔使個半鐘，買左兩對鞋、一件衫、兩條褲、三對襪、一頂帽
如果頭先買左嗰對黑色鞋有同款白色，我諗我會買埋；如果頭先件衫唔係只係得黑色，我極大機會會掃埋其他顏色
又發作喇…
我屋企可以分別開一間adidas專門店、一間鞋舖、一間賣衫的舖頭、一間7仔、一間小熊維尼系列專賣店、一間童裝波衫舖、一間扭蛋專賣店、一間帽子店、一間袋子店、一間斯華洛世奇水晶店，well…
原本諗住買的白色袋，睇左好多，都冇咩特別心水，唯一頭先有一個比較順眼同符合我的要求，聽日去買番囉
但我要發出禁制令，只限買嗰個袋only，唔准再shop其他野

聽朝要7點3碌到返公司出crew，其實6點左右要起身，但唔知點解，一到夜晚就唔眼訓

多謝你

8 May 2007

多謝你

簡短的對話，講到我眼濕濕，如果唔係喺公司門口，我一定會喊左出來
下午的淚水，勉強吞了下去
晚上，仍哭了一會，希望事件隨住你的鼓勵，告一段落

或許，今天之後我會開心番，所以無須多言

電車女

8 May 2007

早上睇報紙，睇到一單關於無記前高層因為轉工後唔適應，患上抑鬱症自殺死亡的報導我日日嗌住抑鬱，係咪叫察覺到問題存在，值得慶賀呢？

今日係七號，目標訂在下個星期…
19號，足總盃決賽
23號，歐聯決賽
26號，你的告別派對，暫定天文臺圍酒吧豪飲醉舖勁
27號，她的婚禮

有左玩樂的目標，每日count down，希望日子過得快d啦，希望日子易過d啦﹗
想念你思念你掛念你…成日黐住電腦，唔同人講野，對住個blog活在自己的世界裡，忽然覺得自己好似電車女…
一切源於失落的感覺，揮之不去

可唔可以以後都叫你傻豬

7 May 2007

繼續變髮和大演帽子戲法，同場加演新look designing
近日狂shop，勁買衫，而買的都係同以前好唔同類型的衫，點形容好呢？
我唔係話放棄我的adidas sporty look，而只係天口熱，唔可以成日都jacket走天下，而逄親放假都波衫look，d friend都話我冇新意
去年夏天係民族look，今年要搞搞新意思，所以選定而家呢條行車路線，來緊的image係斯文偏型格路線，希望下次見到你，會以新形象示人啦﹗

看見某甲的手信和某君的小禮物，有很強烈的感覺
意不在眼前之物，情繫送禮之人
心裡想著誰？過左咁耐，仍然有嗰種特別感覺，唔會掉淡，你的眼神、你的笑聲、你的小動作，隨時隨地在腦海裡replay
叫過你一聲「傻豬」，可唔可以以後都咁樣叫你？

曖昧一號

5 May 2007

真相大白了，終於明白點解你嗰日係都要知道我的行蹤，點解我會咁遲鈍，醉翁之意，原來不在酒矣…
凌晨電話對話，三個名字，其中一個令你極級煩惱

你而家徘徊喺理性與感性之間，兩頭唔到岸，既睇到彼岸的好，就想過去逛逛，但又唔捨得此岸的風光明媚，你好貪心呀﹗
你又明知過到彼岸，有可預視的嚴重後果，分明知道唔應該過去，而既然你又唔捨得，咪enjoy此時此刻囉，識唔識咩叫「及時行樂」？
做人既野，有時會胡思亂想，我都會；但有時候當呃自己又好，當氹自己都好，唔好將個世界諗得咁複雜，個人都開心d
正如你所言，而家係你單方面想quit
人的大腦好蠢，行左去某一方向，就會一直行落去，如果向某負面方面想，就會繼續負面地想下去
我身受其害，時而不能自拔，時而一言驚醒，所以乍喜乍悲，心情反覆

人，只可以自救
忽然想引述好多年前一時衝動所寫的《無名字的書》裡的一席話：

沒有人可以將你迫上絕路，亦沒有人可以在絕境中拯救你……我們要幫你的事、安慰你的說話全都做過講過。你呢？你可不可以自愛點？別再鑽牛角尖，好不好？……現在沒有人害你，你要將自己推入窮巷，沒有人可以救你

呢番說話，既講俾你聽，又用來自省…

凌晨電話對話，三個名字，其中兩個跟我扯上關係
你終於忍唔住問：你係咪同某甲有路？
我：唔係
你：你有冇俾過d錯誤signal人地？
我：冇掛…
你：你究竟鍾意公司邊個人啫？
我：無
你：咁你個blog又成日有個曖昧男仔？
我：咁又唔只一個…

你最關心都係我同「曖昧一號」架啫…
我諗類似的問題，我同佢都答唔少，如果有答案，就唔會曖昧到今時今日啦
點解冇答案？我同佢都冇興趣find out掛
正如你所講每個人身邊都會有一個呢d曖昧的人
你有幾多個曖昧的人，好視乎你的性格同圈子，而曖昧的人會唔會成為情人，又好視乎雙方的取態
而有時d野，唔使講得咁清楚，曖昧下，大家enjoy下，身邊的人又enjoy下，呢種摸索與猜度，又刺激又神秘，變成真的話又冇左呢種樂趣，所以有d人會相愛不相認，有d人不愛不否認

學習愛

4 May 2007

頭先陰陰咀笑，你問我咩事？
我：如果今晚我中左頭獎，聽日即刻辭職，老細問我點解辭職？我話中左六合彩
諗起都覺得搞笑﹗
結果梗係冇呢件事啦，聽日要照舊如常返工

我諗我要學習咩叫愛，並首先要學習愛自己，我連自己都唔愛，成日搞到自己好累好辛苦，都唔知為咩
還要學習愛工作、愛別人，尤其係愛家人，仲要愛世界、愛宇宙，唯獨唔使愛上帝

我愛_________
空格上應該填上甚麼？一個名字嗎？
_________愛我
橫線上應該填上甚麼？也是一個名字嗎？是一個跟空格相同的名字嗎？
當兩者出現不一致，煩惱便應運而生…

令人失望的車仔，哎…
也許如朋友所言，三個大盃，一人攞一個，分配如下：
歐聯：利物浦
足總盃：車仔
聯賽：曼聯

blog野

3 May 2007

首先要報告下點解好地地weekday早上十一點幾會online blog野
碌左返公司，好累好眼訓、肚痛、頭痛、頸痛、腰酸背痛、噁心的感覺只有變本加厲，所以約十點半都係決定走
碌到返屋企又唔係好有野，咪上來浦下面囉，不過啱啱又覺眼訓了，一陣再續…

********
近日你不斷叫人睇你的xanga，但如果為留言而突登開一個xanga account，我覺得又冇咁的必要，我喺呢度講，你又睇到，效果同結果都係一樣啫
唔知佢係咪特別乞d的士司機憎呢，被拒載的事，已經唔係第一次架喇，佢次次都話要投訴架啦，但結果咪又係冇左件事…
其實最簡單的方法係打去1823政府熱線，問可以點投訴
而頭先無聊search過，其實係可以去http://www.info.gov.hk/tcu/chi/taxi/index.htm填表

尋日放工去左荃灣碌左個圈，處理左d私務，配左con，仲特別揀左一對紫色color con，搞到成九點都未食飯，你打來，即興落左荃灣食小肥羊，宵夜時段88/位任食，抵呀﹗
其實，星期日先啱啱食完…
引述星期日同d friend去食小肥羊之前，搭地鐵，佢問：聞唔聞到小肥羊味？我地話去完小肥羊d人個頭頂有個小肥羊logo碌下碌下
哈哈，食完我同你頭頂都有個小肥羊logo碌下碌下

你同我差唔多全晚的話題，都係再次圍繞他
你：你仲想點？連仔都生埋…
我：第二梗係最愛架啦﹗
(省去數百字…)

在街邊等你處理埋你d私務，一名男子拖住兩隻狗喺附近飄過，條仔我就冇興趣喇，反而聊佢嗰兩隻狗玩
你話頭先有條仔係咁望住我，then…

在眾人眼中，我同你好似傻左咁，全因你同我都抑鬱…
另外，多謝你睇中我著嗰件北京奧運外套喎
已經絕版，有本事叫adidas再出過啦

自殺中…

2 May 2007

你上次好盡情好開心地笑，係幾時呢？同邊個一齊呢？笑d咩呢？
如果你見到一個人，甚至諗起呢個人，唔使講d咩，你都可以由心裡面笑出來的話，bingle﹗你愛上佢了﹗

你上次好緊張、 語無倫次，係幾時呢？見到咩人呢？為咩而緊張呢？
如果你見到一個人，甚至諗起呢個人，你會手心冒汗、口齒不清、詞不達意，心扉彷彿掀開了讓心肝跑出來，根本做唔番平時的自己的話，bingle﹗你愛上佢了﹗

早前講過邪教的事，意猶未盡…
嗰個教的女仔，成日都小鳥依人咁，點解會有人受架？呢樣又唔識，嗰樣又唔識，係咪地球人來架？真係想一巴聲死佢
見到d咩小動物咩小昆蟲都哇哇叫，掂到你唔使死人架﹗
就係咁樣，反而可以讓男士們表現表演，滿足一下大男人心態，一個願打一個願捱，我看來只有十間嗰塊面…

一位朋友迷上一個邪教女生，以上兩種徵狀都中晒
我都有唔少男性朋友，第一個心儀 / 拍拖對象都係邪教之女，結果咪又係分手收場，總有原因的﹗
十幾年老友，哎，既然係咁，諗左兩條屎橋，送你一程，希望你試過後就會醒覺

首先係等你約埋個女仔，成班公司同事去踩單車，我地扮唔識都去踩單車，既然你唔捨得我地炒低你條女may be，咁我地搵個人喺附近炒車，俾你救，等你可以喺個女仔面前展現好pro好型好細心咁幫人療傷的一面

其次係msn 三唔識七咁扮random佢approach佢，摸清佢的底細，睇下佢對你有冇feel，正所謂知己知彼嘛
幫你搞埋咁多野，我地都夠偉大喇﹗

********
尋晚你問我今日去邊度玩，我話喺床度玩，結果今日訓到晏晝五點，但如果唔係肚餓，我諗會繼續訓落去
朋友甲打來問我出唔出去睇波，今次婉拒了，因為聽日同老細出去傾野，要見人，如果萬一或者場波悶的話，我會即訓
朋友乙打來問我有冇出去睇波，問題極之奇怪，「淨係想知你有冇出去睇波之嘛」，好似一定要知道我的行蹤，莫非另有所圖？
仲未見朋友丙online，車仔對利物浦，平時都可以同佢同聲同氣︳但今次我要同佢打對台

呢兩日勁食砒霜，又食致癌物，自殺中…

你幾時先肯開口呢？
唔通真係要我死，攬著我冰冷的身軀，你先有勇氣講？

你燥底

1 May 2007

六合彩四千八百萬的彩池，吸引左幾多人買番兩手，我唔知，但最少吸引到你同我，唔想努力，只想飛來橫財可以生活無憂…
今次頭獎冇你或我份，下期係七千萬，係咪整定等彩金多d俾你同我分呢？
唔少人揀的number都係有特別意義，例如自己的生日、lucky number、「好朋友」的生日、屋企人生日、特別紀念日、屋企門牌、搞珠日期、甚至三圍數字…
49個冧把，千千萬萬個配搭，你揀左咩magic number？你幫人買左d咩special number？
我已預先在星期6度好我的magic number
我中左的話，拎10%出來請大家玩、夠錢既話去旅行又點話呢﹗今次唔得，下次啦﹗

今日，繁忙過後，時間過得好慢，又眼訓，真係好辛苦
lunch只係食canteen，咁都唔趁呢一粒鐘出去抖抖氣，好抑鬱，所以後來都一條友行左去對面個公園仔坐左陣
放工已經碌左落荃灣，初頭諗住睇下邊間髮型屋得得地的修修髮腳，說時遲那時快，都未開始site survey，已經收到她的話，話同你地去食飯，都係一個好提議，唔使做獨孤精
搭左上葵涌邨，等左一大輪原來有關人等落左地鐵站嗰頭，去紐約街頭join番你，你一來第一句就話好唔開心，我和她都不知就裡
你：我喺930上唔見左個袋呀
我：咩袋來架？裡面有d咩呀？
你：d卡片同儲左好耐先儲到的優惠卡囉
我：唔係化，你都唔係至在呢d呀？同埋好多都可以俾錢補領番架
你：張d mop 8折咭儲左好耐架
我：咁幫唔到你喇，但你有冇打番去個站頭度搵？
你：有呀，佢死都話冇，真係好嬲呀
我：你個咩袋來啫？
她：係囉，會唔會係執的人貪你個袋呀？
你：我都唔會帶貴野返工

幾經轉折，兜左一大個圈，結果係在葵興地鐵站附近食麥記：麥樂雞餐要新加坡漿轉檸茶，凍的
一行8人，但要分開坐…
她忍唔住問：係因為你唔見左個袋所以咁燥底定係公司太多野做？
事已至此，除左聽你呻幾句，真係唔知可以做d咩？
點首歌俾你聽啦：dont look back in anger ‧ by oasis

你話行返公司，仲要話唔係好遠，哎…其實，我真係唔係咁想行…
哎，你唔明架喇…
呢兩日行動不便，尤其係上落樓梯，一定要撐扶住，俾某甲取笑我似大肚婆；即使行平路都牙下牙下，好唔自然，又唔行得快，我諗起《一公升的眼淚》，被形容行路好似企鵝的女主角…
不過我諗你未必會察覺到…
anyway，雖然唔關事，但都多謝你兩個送我返屋企﹗

我suggest你得閒帶你隻狗去游水啦，我諗佢會好開心
你：帶佢去邊度游？沙灘？
我：係呀，但唔可以係康文署嗰d
你：咁即係邊d？點解？
我：南灣，有基佬嗰個，法例講唔得就唔得啦
你：去到叫佢：狗呀狗你去游水啦，我唔識你架
我：(哭笑不得)
點解我會識到一個咁無賴的人？

近日熱愛的mika好有queen的影子，就好似係freddie的再生

********
全車21人參與war game遊戲，中學d friend同中學d同學的感覺非常之咁強烈，因為除左4仔，我會發自內心地叫佢地friend之外，其餘嗰d真係一句同學就夠喇，我仲叫得出佢地的名，可以將樣同名準確配對，已經係20級俾面﹗
爛gag亦都係我地do re me fa so搞出來的…

do：哎呀，呢排做野好辛苦呀，lai 晒屎
re：咦，你lai 過呀？咁咩味呀？
do：不是味兒，你係咪想試？

do：你而家幾錢人工？有冇五位數字？
re：梗係冇啦
do：咁灰？咁你又唔走？做左幾耐呀？
re：(歎氣)兩年
do：哦﹗係咪為左嗰個女同事呀？
me：呢個根本就係主要原因啦﹗
(略)
re：走左好多人，又冇請人，我覺得我老細而家勁賤，猴住d fresh grad
me：梗係啦，d fresh grad平丫嘛
re：咁醒d既咪俾佢呃半年囉，冇咁醒的呃一年
fa：咁你都好唔醒喎
(大笑)
me：你俾佢呃左兩年﹗

do：你做咩咁累？
re：去打仗
do：打仗？
me：(真係睇唔過眼)打war game就打war game啦，打仗，佢聽唔明你講咩
(大笑)
do、me：打伊拉克咩？
re：打野戰嗰 d 仗

do：你邊度比較累？
re：腰背、大腿
me：咁你呢？
fa：(普通話)膊頭
re：(笑)(普通話)肩膊呀膊頭
(大笑)

********
12月7日，人馬座，絕對唔會為唔著緊的事上心，如果佢當你係好朋友，佢真係以心相待；萬一遇人不淑，佢最多只會歎一句看錯了，但不會後悔，因為佢都好享受對你好的過程
所以佢會做d別人眼中的無聊野，目的只是為了表達佢著緊你，不甚介意別人的眼光
頭先就係做左一件無聊事，雖然搵唔到答案，但求個心安理得，起碼都叫行動過，踏出過可行的一步
只是結果強差人意

三個煩人

30 April 2007

一廂情願的諗法，搞出一場誤會

無啦啦打的死結，幾時先解得番開？

一個月前，你一句sms，ok，算係等你就你讓你忍你，最後限期係聽日，睇怕你都係食言居多
或許，只有我一個會咁認真看待一個簡單casual的sms，一個可能係你應酬我、敷衍我的sms，一個純屬戲言的sms
係我用了一個錯的態度看待你，還是我真同你咁萍水相逢？
如果係後者，希望你唔好再擾亂我的生活，唔好再突然殺我一個措手不及

本來係我話做得好辛苦好抑鬱要出來飲酒，結果開水喉和狂訴苦的係另有其人
為家庭、為愛情、為工作而煩惱，尋晚共有三個煩人，原來我的煩事，係最小兒科，又係我自己搞出來，自己諗埋一邊，係咪自找麻煩？
我撐你﹗我地個個都撐你﹗
喊，要喊得夠盡情，喊舖勁的，總勝過飲泣十次
笑，同樣要笑得盡興；跳，亦要跳得盡力

我尋日的裝束：牛仔褲、最普通嗰隻adidas t恤、梳起左d頭髮扎左個髻，其實真係唔係好適合出去諾左佛臺浦，格格不入
入場時俾人check身份證，呆﹗
她首先被check，我後上，守門口個人指一指我
我：你咪tum我啦，真係要check？
結果都係要死死氣拎張身份證出來

話說check身份證事件，曾經引來一陣哄動…
話說某年某月某日，一行六七個人去落左蘭桂坊，某間酒吧，嗰日都多人架，行左個圈諗住搵間唔係太嘈坐得舒服d的吧，問左幾間後來都係去番第一問嗰間，門口個哥哥仔話要check我身份證，拎俾佢望一望盡快了事，不以為意
有講有笑，有個侍應拎左一杯tequlia rose同一個杯墊過來，上面寫住：預祝你生日快樂，希望xxx日後可以再見到你
門口個哥哥仔示一示意，朋友們起哄，我擺出一副「你唔抵得呀？」的得戚樣子
但呢件事當然沒有下文啦
其實可以show off的事，仲有好多，但真係冇咁的必要翻查所有記錄，逐一連載，冇可能記得晒又冇咁的必要，咁啱符合主題，再露兩咀啦

尋日全日都笑料百出，遇到gag王同gag神，明日再續…

呢世界真係細

28 April 2007

在別人眼中，我有好多嗜好，傾開計，你會發現我呢樣又好嗰樣好，總係令你覺得勁搞笑﹗（p.s.我唔係超低能個friend…） 英超、英格蘭、adidas、小熊維尼系列、扭蛋呢d你都知，其實真係得咁多咋… 其實係咪錯覺呢？我都有好多野唔鍾意，例如巴西、巴塞、貓、hello kitty、籃球，如果俾d時間我，我諗我可以list到好多出來 與其話我濫，你應該話我愛憎分明﹗ 頭先睇yahoo拍賣，有超人特工隊個b同佢爸b的錢罌，真係好cute 我會為左少少野而做好多野，俗語話為一棵樹放棄整個森林，但我啱啱相反，我係為一棵樹種一個森林出來 簡單例子如queen、oasis、u2，當日都係因為一首歌認識的樂隊，為左一首歌，要搵番佢所有碟，每每講到呢d，令人乍舌… 點解你唔會佩服我呢份執著與認真呢？ 等緊驗屍結果，發生左一件怪事…

他：tanny呀，你睇下認唔認得呢個人
我：呢個咪係我來架囉﹗
他：吓？你來架咩？
我：係呀，嗰時應該係wto嗰時
他：哦，原來係你架，唔怪得我初初見到你時覺得有d熟口面啦
我：你都幾好記性喎
他：呢個世界真係細
我：(展示電話中的相)你睇下，同一套衫同頸繩
他：咦，係喎
我：成件事好好笑，係一個笑話﹗哈哈哈

事發的相片，刊登在呢個site: http://www.hklfc.com/
但係邊個post就唔知，但成件事都好搞笑囉，問事主係咪相中主角
對住個0靚妹扑咪嗰張，就係俾人post左出來嗰張
另一張冇咩拍攝技巧的，就係我show佢睇，嗰張嗰電話裡面的相

我後生丫嘛﹗

27 April 2007

正所謂一山還有一山高，一谷還有一谷低
由上星期的八點幾覺得閒閒地，到十點幾走覺得蝕晒，然後…

mon：朝早9點幾返去，凌晨3點走，仲有閒情去食宵夜
tue：早上10點浦頭，深夜兩點閃，返到去仲睇埋歐聯
wed：又係10點碌左返去，同事們關切地問：做咩唔晏d先返？我都想呀，我連d短故都未寫，自己攞來，剪片直至天光，剪到5點，落埋帶，執下野，搭9閃，都叫喺6點前返到屋企
thu：仍然係10點幾返左去，大家都好驚訝

問：我睇到你個message你5點幾先走，點解你仲咁精神？
我：我後生丫嘛﹗
全場大笑
她：後生真係唔同d
她：哈哈，我講唔出﹗
他：你過多兩個月就唔會咁講

唔訓覺問題真係唔係咁大，冇得睇歐聯支持我兩支愛隊，有林伯又有謝拉特同糟糕…
只係靠睇live score知道joe cole一球奠勝
好彩呢幾日有你撐我，免得我悶起上來要同d空凳傾計…
同埋呢幾日冇blog，希望讀者們諒解我﹗

以前成日都見到你，你向我打眼色，就知道你的諗法，一切盡在不言中，好耐冇見，今晚放工後因為有mission，遊左幾轉車河，腦袋得閒d諗d自己想諗野，原來，第一時間就recall你的樣貌，我係掛住你
就在一分鐘之前，冇呢種感覺，講得正確d，最近兩星期做左一個冇感情的人，唔識開心唔識唔開心，只係行屍走肉，哎，唔知係太忙冇精神冇時間諗，定係習慣左，定係接受左現實呢？

之前參加左熊貓命名比賽，頭先公布結果之前，我的確幻想係揀左我個名…
會唔會俾某女記者捉住做訪問呢？俾佢問埋d好畸既問題呢？

明明可以早d訓，又搞埋d無聊野…

忽然間後日好多活動，第一站去元朗打war game，為左多d時間，晨咁早就要碌入去
晚上有gathering，睇怕要後join…

同先同她傾左兩咀，唔，如果係我，我會主動換個銀包囉，唔會突登亂放，唔理佢，等佢「跌」左，此舉有d不明不白
喂，你冇聽過「不在乎天長地久，只在乎曾經擁有」咩？
而且都預左個銀包用唔耐，咪去shop下，揀住先囉，揀唔到更好的，咪用住先，冇埋，但知道個銀包唔啱自己，都要做番d野，日日坐喺度唔會有個又靚又新的銀包飄埋來
我成日都係咁講：我都預左會買架啦，早d買咪早d有得用囉
「用開有感情」唔係藉口
又如果就咁dum左佢覺得可惜，唔想益人？咪糟質下佢囉，用殘左，玩厭左，執到都喊三聲啦﹗

朝9朝3

24 April 2007

今日唔係去玩唔係去浦唔係去飲野亦都唔係去唱k，而係返工，9至3，係朝9朝3，真係crazy，前所未有
十六小時工作中，只係lunch接近下午茶時間食左個老麥餐
夜晚某甲叫我去食飯，但我真係唔餓
佢放工，其實我仲可以繼續落去…
但結果都係冇，同左佢去荃灣宵夜，定係應該叫晚餐，抑或叫早餐適合d？
你問我眼唔眼訓，馬馬地啦，但d手手腳腳好累，腰酸背痛

消息

23 April 2007

今日二十級充實，腦袋高速運轉… 朝早出去拍野，為左爭取時間，我叫車長大哥車我返公司先，橫掂都唔餓，慳番lunch的時間 嘻嘻，其實為左慳番d時間訓多陣，今朝連早餐都冇食，but唔緊要，尋晚食韓燒宵夜食到好飽 聽完餅帶，全速開turbo寫稿，結果而家完成啦，不過都只係寫左一part之喎…
為左紀念呢個偉大壯舉，而家係22號，時間係2337，公司我個位的電腦前留字﹗ 返屋企再續…

fri晚遲走，約左佢去荃灣食小肥羊宵夜+晚飯，原來係任食，真係抵
個湯底真係好好飲﹗
跟住飛的返屋企換左套衫，應邀出左去飲野，第一站水平座，第二站超級聯賽
返屋企即訓…

sat去左環球嘉年華，今次真係失敗，冇收獲，同埋唔知係咪真係太累，對d機動遊戲的感官刺激反應遲緩…
上到跳樓機，我問自己：做咩要自己嚇自己？
上到嗰個洗衣機，我大叫：點解我會坐左喺度？
暈…自己攞來…
最開心係曼聯被米堡迫和，失兩分

好可惜今晚的車仔唔爭氣，我努力寫稿，所以睇唔到，究竟邊處出問題，大好收窄積分差距的機會，就咁錯過左…

聽到一個消息，第一個反應係：真架？——半信半疑
聽到另一個消息，第一個反應係：咁無聊？——多此一舉
聽到你的消息，第一個反應係：咁正﹗——守得雲開

因為太累太忙，腦袋已沒有空思念你了，sms亦玩少左

頭先上個case屋企，被熱情的史納莎攬住我，好似樹熊咁，諗起她隻仔仔又係咁，好鬼貪玩，而且特別鍾愛辮狀物體，見到就會撲
但你隻女女就好怕醜，見到我腳震震，你同我都指住佢來笑

********
最crazy的日子聽日展開，希望唔會影響到我的歐聯啦
仲有，呢個禮拜搞掂呢隻野，除左要訓番夠本，我仲要醉舖勁既

做咩要考驗我？

20 April 2007

今朝要寫個promo，跟住其實仲要log帶，但心不在焉…
lunch後點都要的起心肝，log唔晒都係自己受
臨放工先傾故仔，打亂晒我的工作計劃，結果又要遲走，走嗰時都差唔多九點
一出門口就開著nano，今日係綠洲樂隊what's the story morning glory陪伴我
隻碟得十二首歌，播到第七首歌都仲未有車，又餓又累又眼訓，好忟，脆弱的心靈失守了
don't look back in anger，真係好諷刺﹗
印左d transcript返屋企，諗住睇下，揀下bite，我明明有一個大筆袋裝住好多唔同顏色的熒光筆，但搵來搵去都搵唔到，去左邊呀？做咩要考驗我，做咩要玩我？

因為冇精神，又要倚賴進補葡萄適
因為不快，又要靠可樂消愁

頭先lunch打俾兩個友好，傾左陣，好開心，嗰種感覺，去左邊？使唔使去差館報失？
每次見到佢都諗起你，你一句「咁灰？」，多謝關心
你的眼神，你臉上的鬚根，留在我的瞳孔

你要搵明愛暗戀補習社，不過我唔係tutor喎
點解個樣好乖、性格靜靜地既女生，會係眾男生的飛佛？
我覺得嗰個門派的女生，係一個邪教，我從來不入邪教，唔同邪教的人玩，亦永世都冇可能俾邪教招入會，但又有一個我身邊的男生中毒了，情願挖出心肝討好伊人，哎，祝你好運﹗

尋晚，no，正確來講係今朝凌晨兩點11至啱，係好眼訓，但講過撐你，絕不食言
「繼續努力啦，總會overcome的」互勉之

忍唔住

19 April 2007

俾讀者質疑我開名講人，講的係情歌王子
我問：你知邊個係情歌王子咩？
佢：唔知
我：咁咪係囉
佢：但你平時都係d你你他他，呢個情歌王子有個朵架喎
我：個朵都係我俾佢既，冇人知佢係情歌王子，連佢自己都唔知，而且我形容佢做「鍾意唱情歌的他」，同叫佢情歌王子有咩分別呢，反而我平時講嗰d你你他他，你地仲易估到我講緊邊個啦…
佢：咁又係

來緊會好繁忙，下星期六出故仔，請留意財經資訊台晚上八點半時事寬頻
仲要開兩隻短版news，分別下星期五、六新聞台播出，記住記住捧捧場﹗

下星期分別又有飯局同打war game活動，除了工作還有應酬和玩樂，真係充實﹗

我地的話題，通常都同佢有關，但我真係忍唔住要出聲：佢d有錢仔…
你：haha，算啦，有錢唔係罪…
你做咩係都要幫住佢？

讀過某人的blog，佢識得珍惜，識得知足，真係要恭喜佢
佢的故事很簡單，我也經歷過，就係因為我唔識得珍惜，唔識得知足，所以而家咪搞成咁囉，斯人獨憔悴
注意：重點喺個「獨」字
哎，所以我察覺到佢開心過我囉

留意到你個msn近日變得奇奇怪怪，我又忍唔住：嘩﹗你都幾愛你公司
你：我而家最愛公司，公司俾飯我食，xx俾工我做，仲想點，xx直頭係我再生父母
我：你呢d咁肉麻的說話，真係令人噁心…
你：我以後…
我：好似d小學生：我以後唔敢喇
你：直頭係小學生比人記過咁啦，明日返去，又要洗腦
奉勸你一句：自求多福啦﹗

lunch喺飯堂食飯，所謂飯堂，係t記同畸寶喺九龍城幾乎御用的茶餐廳
noon cast講紅火蟻，見到電視機裡的蟻擁下擁下，打冷震，而家諗番嗰個畫面，繼續打冷震…
我對嗰d一堆堆一粒粒，細細粒的野係有d野
去食糖水，好怕d西米、珍珠西米嗰類的野，一堆野細細粒、密麻麻，真係好恐布，咦，諗起又打冷震…
總覺得呢d野會漫延，令到周圍全部都係，好得人驚，我一定讀唔到d咩biology或者微生物嗰類，見到d細胞、細菌，又係咁樣樣
哎呀，唔講喇，起晒雞皮，d冷震由腰、背、上到膊頭、頸，差d好似卡通片d公仔咁，頭髮都豎起…

今日忍唔住的事實在太多，但唯獨呢件事冇出聲
記者同受訪者的關係，都係互相利用啫，冇話邊個高d大d，唔使用d咁既口吻「指責」人，俾說話人聽，搞到佢面有難色，我真係覺得好難堪
如果我地唔搵佢，佢亦犯不著非要俾我地利用不可，非利用我地不可…
我心諗：你資深，咁大晒呀？
不過仍然多謝你塞錢落我袋

情歌王子

18 April 2007

情歌王子來搵坦妮，令坦妮乍驚乍喜
嘻嘻

以前係行家的人，而家係同事，反之亦然
佢話：尋日喺公司見到你，都覺得有d奇怪
另一個佢up得出我個字頭，證明我真係出來跑，有人識架﹗
頭先去消委會做訪問，咁啱撞到食環碌上去傾野，跟住有stand up，見到熟悉的面孔，唔…
好恨出去跑

人係咁犯賤，跑到隻狗嗰時想做d feature，發揮下小宇宙，頭先睇番施政報告嗰幾隻故仔，回想起嗰時兩條友，佢做我camman，周圍碌周圍影，有d自生自滅的感覺，亦有d自把自為的樂趣
放假去完街，又累又眼訓都攬住部機聽帶，班friend喺度打緊牌，我都係聽帶，放假成個晏晝bor喺屋企寫稿，睇完又睇，自己sub左十次都唔肯交稿，改完又改，隻故仔都識背咁濟
返一日工再ot半日做隻故仔，係累係有怨言，怨自己點解聽帶唔聽得快d，怨自己點解個腦的轉數慢晒，怨自己點解之前貪玩，然而呢一切extra的，都是自願的
嗰三隻故仔在眾多壓力與批評下完成，唔單只過到自己嗰關，我亦敢拎佢出去見人架

而家俾我恨到，做feature，一嚐心願，但又…
朝三暮四，係唔係係人都係咁呢？定係只有我係咁呢？

忽然想食雪糕，如果有人而家立即速遞raspberry雪芭俾我，嘻嘻…

科技的發達，令人可以留住真摰的感覺
頭先收番d相同video，睇番d片，笑到碌地，時空突然調較番去8日前東經113度北緯21度
留住開心一刻的同時，亦留住令人憤怒的一剎
仍然停留在我電話的那個過氣sms，每次見到，都喚起我的怒火﹗
你話我小器
係呀，咁又點呀？
因為你一個消息，令成個假期都唔同左
anyway，我嗰兩日玩得好開心，諗番起真係多謝你成全﹗
我仲未嬲完，罵戰漫延到網上…

而我亦過得好開心喎，呢排我有情歌王子

嬲

17 April 2007

收到來電，我通常都有兩個反應
反應甲：
甲：喂
我：咩事呀？

反應乙：
乙：喂
我：喂﹗點呀你？

甲同乙分別代表兩批人，親疏有別，你屬於甲定乙，自己諗啦﹗

有一日你離家出走，我嚷著叫著，妄想以眼淚留住你，但你沒有回頭看我一眼
你回來了，像以往一樣…
不過眼淚擠乾以後，內心會淌血，直到枯死，這就是叫心死
看來你還未明白

星期一的心情跟以往不同，早幾回覺得「有排捱」，今朝卻覺得「大鑊，冇時間」
有呢種意識，希望係一件好事

時空錯配了，後悔嗎？
那又如何？能夠時光倒流，走回頭路嗎？
假如你再問我，過往矇混過去的問題，如今我會老實作答

回家的車程中，迎頭見到你沉默地走過那條斜路，呢d偶遇，開始習慣了，違失了那種驚喜的感覺
今日見到一個很可愛很精靈的老人家，我感覺他對我這個他眼中的丫頭呵護憐惜，跟他對待佢的態度完全兩樣，謝謝﹗

忘記了向大家報告，身份證同回鄉卡都已經喺星期六歸位了，一切 has resumed to normal，竟然用左整整一個月呀﹗

頭先車程中聽到收音機，每個月一次的選擇月刊，今期講魷魚絲，又講超市加價
由8月起返番b起，就做左選擇beat…
如今呢d日子，遠矣遠矣

仲有，唔記得同你講，你執頭髮好長，唔該整整佢啦﹗
仲有，呢排嬲緊一個人，有d野，心照啦﹗你知我嬲你架，你亦都知我嬲咩，if you still care about me，唔該快d拆掂佢﹗

5月19號Wembley見

16 April 2007

the FA Cup Semi final, Blackburn v Chelsea, Old Trafford HKT 2300
趕及在十一點前返到去，睇波
joe cole自舊年歐聯對雲達受傷後，總於可以首發上陣了
本來諗住帶lampard去街，但8號仔波衫係上一季的，都係唔好喇，著番今季冇熨字嗰件
lampard仍然都係咁醒，16分鐘射入0-1，真不愧我咁冧佢
被迫和…
點解joe cole係咁被人針對？
諗起上次玩碰碰車，開頭打晒眼色攻擊某人架，但點解係咁俾人撞的係我？我問：做咩針對我？
踢到90分鐘，仍然係1-1，補時4分鐘…

同某甲msn，就住新display的相，都可以講一大輪
姣同索，都係一線之差，各花入各眼啫
我冇諗過要引導任何人有任何一種想法，包括以上兩種或呢兩種以外的想法，只係一張snap啫，諗多左喇…
正如…

問：如果我中左六合彩二千萬，同我結婚好唔好？
我：唔好

他：其實你離開之後有冇掛住我？
我：個個都有唔同程度的掛住
他：有冇諗起我？
我：都有你份既
他：有冇懷念我？
我：其實呢，雖然我走左個半月，但都見左好多次，見你地多過見阿爸阿媽
他：有冇刻意唔去諗我？
我：你做咩問埋呢d問題？
他：有冇試過在腦海間見到我的身影， 但係緊張到調頭走?
我：冇喎，難道你有？
他：有冇嘗試去忘記我？
我：咁又冇必要
(略)

加時中，109分鐘ballack射入成1-2，high到連衫都除埋
講波佬講球例，話入波除衫"must"俾黃牌，因為除衫係冇需要的動作，咁球例有冇寫除褲點處置呢？咁如果除假髮又點呢？
晉級了，5月19號Wembley見
不可不提的係cech勇救險球，功不可沒

令你熱血沸騰

15 April 2007

你：我miss左啦
我：點解
你：因為xxxx
我：真係一間累人累物的公司，一生人可能得一次咁的機會，有d人一生都唔會有一次咁的機會
你：但之後…
我：有冇覺得可惜 / 後悔？
你：哈哈…或者吧﹗我希望出年以另一個身份出現，不過我唔會放棄
我：呢個唔係你夢想咩
你：係，但這個夢想真係無可能了，要面對現實，因為有d政治問題
我：well…呢個世界真係黑暗
你：老實講，我諗緊…
我：你話你唔會放棄架？
你：因為…
我：你想做獨孤求敗？
你：講下講下…我有d熱血沸騰…不過而家真係唔係講咁易
我：哦，你想放棄？
你：no ar，不過要…
我：你唔係有keep住咩架咩？
你：但唔夠…

因為你要閃，所以冇再傾落去 如果有一日，你能夠實現夢想，希望你記得你我曾經有一段咁的對話，呢段曾經令你「熱血沸騰」的說話 如果有咁的一日，希望你的心上記得曾經有我這個人存在 如果有咁的一日，希望即使你我形同陌路，甚至見面不相認，我仍會昂首高敖地說：i am proud of you
********尋晚發夢，去左打golf喎，夢中一桿入洞，我叫佢出番張證書俾我，證明我一桿入洞，點知佢寫錯我個名，又唔肯改，後來變成毆鬥、追逐和殺人事件really crazy﹗

即興

13 April 2007

19號凌晨3點，我撐你﹗
話唔定我仲未走呢，如果真係咁灰，到時同我食宵夜喎

每次同你im，我都覺得好開心，不自覺瞄瞄笑，咀角向上翹

即興約左餐食，喋喋不休

傳說佢會「回巢」，講左好耐，由佢否認，默認，到真正返左去，醞釀左好一段時間
記得同某甲談論過呢件事，佢話：大話講十次會變成真
當真？
咁傳聞講十次係咪都會變成真？
既然如此，如果講夠一千句愛，會唔會真係愛上呢？

今晚msn二十級繁忙，突然又即興約人去飲野，唔好誤會，係飲咖啡

有關搬晒去荃灣的野，返來再續

********
行動代號：行動要即興，笑要夠盡情
行動目標：飲下野，吹吹水
行動地點：旺角，某大廈3樓
行動人物：7仔 and i

你可能略知皮毛，但知道真正原因的人，只有三個
而成件事都好搞笑，簡直係天下奇聞
話時話，sms同msn我都好好﹗

續前文——
成個寬頻搬左去荃灣，成個tvb都搬左去荃灣，乜你唔覺既咩？

你展示你手臂的傷勢，心寒一寒
我：點整親架？
你：無牌渣電單車炒車
我：咁使唔使聯針？
你：唔使
我：好彩冇整親埋面咋
你：(笑…)
我：咁你有冇戴頭盔？
你：冇呀，咪俾某甲話：你好大膽呀你
我：(側目)
大家都笑了
update @ 0333

錢與誠意

13 April 2007
行動地點：尖沙咀
行動目標：食晚飯
行動代號：真情對白

第一站去左行街，咁都有砍獲
之後去左厚福街一間其貌不揚的越南餐廳食飯，海南雞飯、雞翼、春卷、炒西蘭花，仲有飲品各一，我揀左椰青
再之後喺諾士佛臺飲野，我話錢唔係萬能，但某程度上錢可以衡量到一個人有幾多誠意
打過俾某人架，但冇腳，所以2條友飲到12點零就閃
thx，it's nice!

尋晚發左個夢，好搞笑，夢中我住喺獅子山隧道附近的大屋，有好大的落地玻璃窗，開揚到唔知點形容
夢中巴士、貨櫃車、私家車等炒埋一碟，連路都陷埋，好似地震緊，4條行車線全線封閉塞到無倫…
我見到齊台喎，係欠hkbn，見一場相識，咪打去報料囉
後來唔知點解，police用左我屋企個大廳做briefing，都幾畸呢…

try to enjoy it

12 April 2007

有時想有人陪，但有時卻想自己一個，今日揀左後者，所以放工碌左去食粉麵「哎，咁都撞到佢地」我起初係咁諗唔係話唔想見到佢地，突登唔搵佢地，而係狀態不佳，唔想見人，只想自閉
他：乜你咁冇癮一個人？我：諗住快d食完返屋企訓，今晚睇波
sorry，其實我並冇講事實之全部，睇波係原因之一，但唔係原因之全部，亦唔係主要原因，唔打俾佢地，主因係唔想見到咁多人
他：見到你諗起車仔我心諗：咁奇怪？點解諗起他，他唔關我事喎…他繼續說：車仔真係夠運我立即展露歡顏：係啦，我都預左打加時，真係好彩﹗他：車仔咁都負負碌碌，對利物浦，又過一關，但以今年咁的人腳，唔應該攞歐聯我：乜呢幾隊好有實力攞咩，唔覺喎，曼聯咪又係咁他：係啦，三隊唯一利物浦好少少，ac又係甩皮甩骨，冇前鋒
三餸飯，揀左炒芽菜、豆角炒魚鬆、茄子頭兩樣係我地com左，覺得最cheap應該難食的餸，好似整鬼佢咁…但另一味我地一致認為難食同怪的和風豉汁炆三文魚都係冇叫到但佢話前面個個都揀芽菜，冇人揀肉，可能真係最好食不過揀左三味都係齋，都幾玩野啦…
既然撞到，try to enjoy it，我當然做到啦﹗並展露了今日少見的笑容但一個人行返屋企，腳步又變得沉甸甸，歎氣
漫無目的地玩電腦，玩到十點幾，訓覺，2點半起身，睇波結果都係睇ac
你話我知聽日放假，我問：有時間約我哩？我suggest出去食好野啦﹗又可以lan下街

遊記

11 April 2007

往中山的車程中，由U2 U18 singles中的beautiful day伴奏著
今天是一個有陽光的旅程
我以為我是隨陰晴而轉變心情的人，早兩星期是陰沉沉，心情重了；但陽光普照，柴油夾雜涼風的午後，未吃早餐，思緒仍是凝住了
為甚麼周圍的人都咁開心呢？
為甚麼好像唯獨只有我不是？
車上其餘九位同伴愈十年的好友，打機的打機，看書的看書，睡覺的睡覺，只有我心裡有無數說不出，說不清的感覺，不得已冒著暈車的風險，也要記下，不，是要將烏氣與歎息一一吐出
往車窗外看，陌生的街道勾不起我的好奇心，筆直的公路、悠然的細葉榕、自行車上的臉孔…可否教我開懷，不要再皺著眉？
and i wait without you…
車子慢了下來，我從外面黑漆漆的車窗看見兩片嘴唇向下撇，深深吸了一口氣，再呼了一口氣
風很猛，頭髮亂了，由得它；架著眼鏡的我，眼睛半張，乾脆瞌一會，感覺你的當頭棒喝
我會醒過來嗎？
勉強張開雙眼，低頭繼續
follow this feeling
it's alright？
音樂和車同時停了下來，想起昨晚跟他相遇
眼睛良久適應了，再大風也能撐著，看看鄉郊自然風貌與風化烙下石頭的痕跡
黃黑相間的路肩、燈柱、電纜、紅燈籠、七彩旗幟和我，與這裡格格不入
路邊用作城市綠化的樹，被導向修樹的「學問」弄得奇奇怪怪，粗粗的幹上、平伏的樹臂長出青嫩芽
倘下，正確點說是靠倚背挨一會
眼神凝住，樂曲繼續播放，但靈魂出走了，眾生相映入眼簾，但頃刻間被汽車的水撥抹掉了，餘下一道水痕；打碎了琉璃瓦，留下抹不掉的粉末
18首精選單曲播完了，到達目的地了
為甚麼這麼多事都如此巧恰？

4-3-2-1

11 April 2007

今日忽然間有一個念頭，心裡的精靈叫我：唔應該咁輕易放棄呢個係咪開始諗通的先兆呢？還是繼續糾纏下去的孽障？

好險﹗真好彩﹗歐聯車仔作客0-0中…加油呀，其餘兩隊英倫波都咁醒，你都要爭氣﹗落後1-0，仲有時間…

你教我輾轉反側，總是想著你又將你我的合照放在枱頭，也算是見你一面嗎？為甚麼想著你？你有沒有像我一樣同樣想著我？同樣把你我的合照放在身邊？心房急速躍動的感覺，曾經因你而起

你第一時間搵我，by our favorite sms，咁又點呢…

有些人有些事，是經不起考驗的苦苦堅持，經已沒意思為何不可以由我去決定誰，才應該在我心中擁有位置？飄忽不定，你無理由而家先知我係咁我對你，你對我，我對我自己，總是欠了一點：信心自信自戀的我，失蹤了

1-1追和了，我老友一直都話車仔需要一個入球，可能真係預示了比賽的結果一樣，我入一球又係有一個作客入球，你入一球又如何？而家兩回合計2-2，大家咁高咁大，可能真係要打加時射12碼
比賽同上場好似，華倫約30分鐘入波，車仔約50分鐘入波66分鐘，豬油巴，哎，差少少咋…
我諗我一定做唔到職業球員，未完場我已預左打加時，但藍戰士始終都係唔同d，一副戰鬥格，要在法定時間內ko對手，90+射入成2-1，掂晒啦﹗後來居上的氣勢點都唔同d

仲有呀，我個仔呀，林柏特好番喇，唔使再紮住隻手，特此宣布

利物浦上回合作客都贏3-0，聽日返主場唔會輸4-0掛，出線簡直係坐定粒六；曼聯發神經，贏7-1，意大利波以防守聞名於世，但羅馬今夜不設防
歐聯4強3隊英超波2對我飛佛但只有1隊可擠身決賽

另有九男女同行

10 April 2007

你冇得同我去渡假，你唔去得，我好憎你呀﹗
既然係米已成炊，我同我班friend去玩，仲玩得好開心添，你唔恨得咁多喇﹗

行動目標：渡假
行動代號：飲飲食食做個大豪客
行動地點：珠海
行動人物：九男女with me
行動細節：玩埋呢站先com下一站去邊

集合時間：公元2007年4月8日早上10點半
集合地點：中港城某三文治店
解散時間：公元2007年4月9日晚上10點後
解散地點：港澳碼頭抵港大堂

因為每件事都太即興，所以具體行程的次序都唔多記得，大概有食早餐、食午飯、食晚飯、食tea、食宵夜、食糖水、飲野、按摩、打牌、打丁dum波、打機、睇電視、碌拎、高卡車、碰碰車、滑草、騎馬仔、影相、掃碟、搭車、搭船，同埋hea…

高卡車同滑草呢d咁先進既野，我第一次玩咋，對我來講又新奇又刺激
絕少踏足內地的我，第一次玩，好出奇咩？
入彎加速，甩尾飄移，我諗係咁玩掛…
滑草同滑雪，點比呀，係有d相似，所以第一轉感受過個感覺後，第二轉已經可以成功由山頂滑落山腳
但為左玩得快d，每轉滑左落去之後，都除左對鞋拎番對鞋上來，對鞋好重架，真係好大消耗﹗
突然間搞到我想滑雪添，啱啱過左的冬天冇玩雪，希望今年生日可以滑雪加溫泉啦
target：北海道
但中間都可以去下其他地方架，例如她上次話6月去泰國，幾 O 喎﹗
有目標的人就會更加努力

真係二十級意想不到，去左一間「邪骨」
平時喺屋企樓下，近在咫尺又撞你唔到喎，反而上到珠海會撞到你
引用3月22號篇blog：用甚麼去解釋你我能同一時間出現在這個時空呢？
條件1：你同我都同時決定去珠海
條件2：你同我都同時揀左相同的日子去
條件3：你同我都同時揀左去嗰間邪骨
條件4：你同我都同時喺嗰個時間揼完
條件5：你同我都同時喺嗰間邪骨既嗰個common room地方出現
條件6：俾我或你見到對方
其實我只見到一個好熟口面的人飄過，冇為意，直到他問我：嗰個係咪你公司嗰個…？
我再望真d，真係你喎，即刻上前拍你，爹左兩句啦
如果你唔係話早船，異地相遇，應該捉你飲杯野，吹吹水
撞到你呢件事，係呢個旅程最意外的行程

身處同一國土，但相隔異地、平日鍾意同我sms往還的你，sms我，「喔噢」的響聲，反令我的心情往下沉…
sms事件，係我呢個旅程最唔開心的事

自認識你以後，創作靈感不斷，謝謝你，車程中也要執筆寫幾隻字；你也經常和我一起敖遊幻想的國度，揼骨中都想著跟你自編自導的故事，謝謝你

打打下牌，她問他：你有幾長？
他：咩幾長？
她：身長

呢段對話令我諗起某次…
某甲同我講：你窄左喎
我：咩窄左呀？
某甲：背後望你覺得你窄左
我：(無奈…)乜我之前好濶咩？

又有一次…
同某乙討論緊某個話題，某乙話：我覺得你都係窄窄地
我：你又知我窄窄地？
某乙：唔通我話你鬆鬆地咩
某丙：(笑…)

********
梗有三間喺左近，哈哈
估下邊個係我？

有咩返來先講啦﹗

8 April 2007

今日各樣事情都好似差d咁，想去樓下間粉麵舖食早餐+午餐+下午茶，裝修中…
出旺角，諗住去嗰度食生菜魚肉，執左…
諗住食嗰間舖頭d好好味的蛋撻仔同椰撻仔，冇貨…
做乜咁鬼邪架？

車仔vs熱刺開早場，所以好早返左去，主場小勝1-0，唔係特別踢得好，但都踢得好過上兩場
中場利物浦作客雷丁，領先、被追和、最後勝出1-2
但最令人開心的係尾場曼聯作客portsmouth，主隊先領先1-0，再拜李奧的own goal領先2-0，神經刀james甩手被追至更接近比數2-1，好在佢將功補過，靚仔alan smith的近射都救到，曼聯輸2-1
最最最重大的意義係車仔全取3分，曼聯全失3分，兩隊的積分差距得番3分，而曼聯又未作客stamford bridge對車仔，聯賽仲有6周，尾二嗰周先對曼聯，只要呢段時間曼聯失分，車仔得分，未必要鬥到最後一周，但呢個可能性唔高，最大可能係兩隊同時得分，到到尾二嗰周一定會相當刺激，而如果車仔贏，兩隊嗰時同分，要鬥埋最尾嗰周，車仔主場對愛華頓，曼聯主場對韋斯咸，韋斯咸要搶分謢級，到時真係有一番激鬥﹗
下星期繼續歐聯，車仔和局下作客華倫，利物浦帶住三球優勢返番anfield，曼聯輸波下主場迎戰羅馬
利記踢歐聯真係寧舍醒神d﹗
如果4強係車仔對利記，約左你睇
無論邊隊對邊隊，5月23號決賽都約左你，road to athens

頭先無意中喺利物浦個網站睇到利物浦的wedding package，真係識搵錢
disney我唔受，但anfield我好受喎﹗

聽日的渡假會如期進行
因為…所以地點不再是你個friend的別墅
因為…所以陣容不整
但我講過，最重要有得去，不論地點，不論陣容，我要玩，我一定要玩﹗
去玩的心情唔會因為呢件事而受影響，我講得出，做得到
不過返來之後的心情如何，不得而知，總之，有咩返來先講啦﹗有咩返來先處置啦﹗

即係點？

7 April 2007

渡假要取消？因為…
唔係化？
你臨出發先出聲，唔好再遲d先同我講？咁而家即係點呀？
係咪講英文你會易明d？what's going on？what's the matter？what do you mean？
ok，calm down，what should i do, then？
你可唔可以話我知，而家點樣樣算好呢？

心態上ready左要去，就一定要去，唔理付出乜野代價，呢d係人馬座的任性，而反正張單都係俾你架啦﹗

我以我係人馬座為榮，我唔信星座，但我熱愛人馬座的我和身邊所有人馬座
尋晚唱k，有一句歌詞：束縛不來如人馬座
我即刻指住自己，而原來你都係人馬座﹗
愛自由，愛玩樂，愛挑戰，愛新鮮，愛刺激，愛熱鬧，愛幻想，愛冒險，愛享受
人馬座有好多野都愛，但好多野都唔愛，愛憎分明，為人多了一份偏見，認定了的人和事，沒有人可以動搖，甚至可以將他的缺點看成優點，為他辯護說盡歪理，除非係佢自己突然之間對這個人這些事失去興趣，佢會立即反面不認人，冷酷無情

有網站咁樣comment人馬座，節錄部分精華：
--有歡樂的地方就有人馬座，在人群之中，他們是個開心果
--個性明朗、開放，不管去到哪裡，都能結交一堆朋友
--忽冷忽熱，不定性的心，只有三分鐘熱度
--人馬座的人往往要到了40歲之後，才會安定下來，收拾起他的童心
--對人對己都很寬容，生性慷慨不計較，容易原諒別人，當然也容易原諒自己
--和人馬座的人合作做生意會令你感到安全，他們永遠不會令你有被出賣和欺騙的教訓
--人馬座最怕掃興的人，膽子小或一板一眼型的玩伴，他們也敬而遠之
--因為個性具備了坦率和真誠的優點，因此很容易給別人親切熱情的第一印象，四海之內皆死黨，但缺點在於魯莽和缺乏耐性
--講求原則的人馬座，雖不至於到「完美主義」那種一絲不苟的地步，但如果他們放棄堅信的責任制概念，他們會很不愉快，甚至不會妥協
--不管已婚未婚，對於人馬座而言，心情永遠是單身，真正要與他們廝守一生，就必須兼具獨立和包容兩項美德，因為抓得愈緊，他們就跑得愈遠
--只不過是挽著你的手而已，又不是要跟你結婚；她也會如此對待她的男性朋友，所以你就別太大驚小怪，這在她的世界裡，實在是沒什麼好值得驚訝的
--她常會搞錯感情，錯把友情當做愛情，愛情當友情，這會令她相當困惑。所以你若是喜歡她，並且想和她交往的話，可以不用費盡心思的用委婉的言語來表達，你只要直接的告訴她就行了。她可能會告訴你別開玩笑；或者是豪爽地回答：好啊﹗在別人眼中好像沒什麼浪漫可言

另外仲有：
人馬座~~~
最佳戀人組合：白羊座、獅子座、雙子座
最佳朋友組合：水瓶座、天秤座、人馬座
最佳同事組合：山羊座、巨蟹座、金牛座
最佳敵人組合：處女座、雙魚座、雙子座
最佳曖昧星座組合：天蠍座

12月7日：誕生於今天的您，六角形紅寶石原石 Ruby就是您的幸運寶石。思緒經常朝向未來，現在則抱持著快樂與享樂的座右銘，工作也好、戀愛也好都是玩樂的一種，冷靜說再見是否會給戀人不老實、不浪漫的感覺呢？正視現實、現在是很重要的，六角柱狀的紅寶石原石能讓你再認識戀愛的現實面

最沒有家庭概念的人：雙子座男生、人馬座女生
最熱愛自由的人：白羊座男生、人馬座女生

********
what is glory？ what is honor？
never to retreat，never to surrender，taught them death in the battlefield is the greatest glory could achieve in his life
spartans，以鮮血和視死如歸的精神成全民族尊嚴與榮譽
甚麼人和事值得你以生命去捍衛？
we will stand and fight
pride，並唔係in the name of love咁簡單

特別偏好歐陸中古時代充滿傳奇色彩的故事背景，再加上灰沉沉的色調與浪漫主義的演繹，更令我愛不釋手

自去年陪某人去睇《寶貝x劃》，破壞了我的原則，之後我嚴正地承諾自己，尊重大銀幕的神聖，入戲院一定唔可以睇爛片
今年至今睇左三套，原則會繼續堅持下去

藥石無靈

5 April 2007

中毒與解藥的事，今日再續…
尋日搵到的解藥，叫朋友，可解孤寂之毒
但忽然對自己失去信心，對自己的能力感到懷疑，這種迷失，有解藥嗎？
解開了心結自然毋需解藥，我能自救嗎？
思念你，未能看到光明的前路，「是你嗎？」與「是我嗎？」的問題常在我心縈繞，病情時好時壞，視乎你我的心情，你是我的解藥，你會來拯救我嗎？
唯恐解藥未能及時找到，毒發身亡，藥石無靈

事緣尋日打俾佢問去唔去bbq，你搶住要同我講幾句，問我：聽晚唱k好唔好？
我：好呀
你：咁我講多一樣你聽，包你話兩個好——某甲請唱k好唔好呀？
我：好呀好呀好呀好呀
你：嘩，四個好呀﹗
所以今晚稍後有唱k活動

我結果都係冇出去了解membership事件，有關方面頭先再打電話來問，點解咁緊張？
頭先成5點先起身，假期又少了大半天…
尋晚做左白痴仔，諗住叉電飛線，但飛左落個錯的電話號碼，你以為我冇交電話費，真搞笑﹗

long time no bbq，但尋晚真係好凍，另有一番風味
咁究竟多春魚d春係應該含、啜定係咬呢？不得而知，只知你好畸呢，殺魚取春，淨係食d春，真係第一次見

解藥

5 April 2007

我中左三種毒，每種都足以致命，所以臉上貼灰，目無表情，不假言笑，打針食藥都冇用，醫生都救我唔到
今日無意中搵到其中一款解藥，集眾人之力，以電話電池與通話分鍾做藥引，今天一服，明天一服，稍事觀察兩天，之後每天各多服一服，深入五臟六腑的毒素，有望清除得七七八八，餘下的二二三三，就要靠自己保持樂觀積極，間中搵d現成解藥，稍為調理一下

收到一個奇怪的來電，顯示是「私人號碼」，已懷有戒心
聽筒的另一方指我一個朋友簽左一個club的membership俾我，邊個咁神秘呢？
那個人竟然稱呼我tanny，我從來在任何商業 / 合約上的交往，不會用tanny呢個暱稱，我腦海中會叫我tanny的，而又算得上係朋友的，十隻手指數得晒
既然可以叫我tanny，似乎又不假，但值得為一絲疑惑，冒上被纏的風險嗎？
不過其實我心目中有一個人選，會做呢d所謂surprise的事，只有他，如果唔係都唔會有之前嗰個關於farewell的夢，夢中的人是他
如果當真是他特意安排，豈不是辜負他一番心意？

********
呢兩段野係頭先返公司途中寫的
以前搭車寫稿，而家搭車，時間用來創作 / 寫所感所想，真係好充實，思潮泉湧，是一件值得開心的事
連續兩晚歐聯，車仔結果主場迫和華倫1-1，好彩追得番保住個和局，但衰在輸左個作客入球，anyway下回合再努力﹗
係die hard fans，任何情況下都會企喺你嗰邊
太眼訓了，唔講咁多，關於解藥、熊貓的議題，下回再續

一不離二

4 April 2007

天氣轉冷，天色灰矇矇，心情也籠罩著陰影…
lunch一個人食，加上天氣凍，唔想再做獨孤精，食晚飯唔可以再一個人，所以sms你，原來你放假；打俾你，但百忙都要食飯架，已經去到目的地，正當感到失望之際，收到你的來電
但大家的面色也不太好，沒有多言了點解會搞成咁？
唔知點解負面的情緒驅之不去，我的臉上不再掛上笑臉，眉頭深鎖，目無表情
忽然諗起佢，有一次同佢傾計，佢話d friend話佢冇以前咁開心之前有一次她問我係咪唔開心，唔見我笑，真係唔識回應呢兩句comment，又可以用在我身上，但其實我唔想咁架

你口中為錢而奮鬥與煩惱，我不明所以
我：乜錢真係咁重要咩？
你：你仲後生
我：多謝
你：問題係我唔想做，唯有要有錢先可以咁
我：咁個個都唔想做架啦，致富方法咪六合彩囉
你：咁都要搵錢去買六合彩，當你搵得一千蚊，用廿蚊去買六合彩都會好小心
我：哈哈，我連六合彩呢個投資都唔去做

食完飯返屋企搞左d無聊野，訓覺，兩點半起身睇歐聯8強利物浦作客psv
其實我都唔係冇"determine to do something"的能力與意志，只係在一般人睇中，呢份堅持，用得不得其所
挨眼訓都去玩去睇波，但就受不起少少挫折，並將雞毛蒜皮的事也無限放大
你為甚麼不給予我更大的信心？
你為甚麼要考驗我？

頭先發左個夢，夢中有一陣舒泰的時光，點解近日少有令我開懷的事，咁樣都會唔記得架？

利物浦作客贏緊0-3，錫晒你﹗
車仔聽晚都要努力呀﹗曼聯都要努力呀﹗
我寧願4強陷入車仔vs利物浦的內心矛盾，也不要4強少任何一個
至於曼聯，係要keep住佢分心歐聯(當然仲有足總盃啦)，咁佢就唔會專心一意全力催谷聯賽，只要有失分的空間，我架車車先有機會﹗
如果4強有3隊都係英超波，真係威

自fri起胃痛肚痛腹痛腰痛背痛，今日都仲係咁，不明所以，但諱疾忌醫
頭先仲加埋頭痛，我係咪有絕症？

頭先有少少時間，所以去睇過d床襑，我張床係四呎半的queen size雙人大床，可以大字形咁訓，爽爆但睇d床襑既價錢真係唔方唔爽…

而人大了，係咪會變得越來越慢熱？適應能力越來越低？新事物的接受程度倍數下降？
點解次次遇到轉變，都係一不離二？

記得記得捧捧我場，聽晚財經資訊台，香港刺針，小心拮親，有我的第一部小試牛刀的作品，有林子揚同謝連忠吹吹水

渡假

3 April 2007

confirm喇﹗
唔係我突登唔約d訪問喺假期嗰幾日做，而係真係咁啱，d受訪者，尤其係case，人地復活節都去玩，唔得閒招呼我，既如我所願，我又冇佢乎，所以來緊既星期日同一，即係8號同9號嗰兩日，可以同你去你個friend間渡假屋玩
會唔會係後面有花園，可以放狗；前面有沙灘，都可以放狗架呢？

你的現身，真係估都估唔到，哈哈，問你拎左你個number
「搵日一齊食飯丫」
呢句說話對某d人來講，係一句寒暄說話
但對於一個好似我咁，從來都不肖寒暄的人，又點會就咁講過就算呢？

今朝終於喺返工前去左銀行拎番張提款咭，有一咭旁身，即係話隨時都可以press錢，安心好多
所有信用咭都拎番晒，登記番pps，尚欠身份證同回鄉證，一切is resuming to normal

開啟我的文件夾中我的圖片的資料夾，逐一檢視你的相片，咀角微微向上翹，心裡暗喜
呢個stage，仍然有好多未知之數，患得患失

信心危機

2 April 2007

甚麼是快樂？
有一回聽到有人講，這一代的年輕人，急功近利，只看到別人風光的成就，看不透背後的付出與辛酸
的確不錯，我就是一個這樣的年輕人
他說：don't ever let somebody tell you you can't do something
呢份決心，係我所欠缺的
他說：you get a dream, you'd got to protect it
夢想，我有嗎？
大銀幕上尋找快樂的故事，由辛酸、血汗、尊嚴、努力、意志拼湊出來，沒有花言巧語，只有簡單的描述
原來得到一份工作，也是一種福氣，熒幕中的他哭了，我也哭了，心裡由衷敬佩那個chris gardner，以眼淚向你致敬，最好不過
the pursuit of happyness，我喜歡香港的譯名——尋找快樂的故事，多於內地的「當幸福來敲門」，因為我認為幸福唔會自動送上門
我之前叫自己做快樂小天使，最近，忘記了何謂快樂
電影院裡的我被剔出來，聚光燈下的我陷入苦思與沉思，你的容貌與聲音，在我腦海徘徊，是的，我想起你

不過很反高潮，要人為目標努力奮鬥，賺錢改善生活，追求奢華的享受，唔少人窮一生也未能如願，這就是資本主義社會少數上層統治者與既得利益者，支配眾多下層無知民眾的技倆
我洞悉到這一點，繼續跟從好像很笨，不跟從，又無所適從…

陷入了信心危機，我深明有d野，機會難逢，既然到手了，而家先來放棄，可能日後後悔莫及，既然踏出了第一步，係咪應該行落去呢？
同埋有d關係，破壞左，就唔係咁容易修補或reset，係咪應該觀望多一段時間呢？
但趁而家未至於泥足深陷，係咪應該盡早抽身離場呢？
係呀，葡萄園在我面前，嚐過一粒，係酸的，應該堅持下去，直至嚐到甜的葡萄？等人摘到甜的葡萄先再出手？定是索性離開葡萄園，放棄呢？
然而，甚麼是最好的決定？我應該何去何從？一向都沒有標準答案

********
4月4號晚9點半，財經資訊台，香港刺針，小心拮親，有我的第一部小試牛刀的作品，約左林子揚同謝連忠吹吹水，各位俾個面啦﹗

當安琪兒的頭髮沾上新鮮蕃茄汁

1 April 2007

surprised？
某甲：「日抖真係唔好講人」
乜你地又講起我咩，你地成日都講我架咩？今次又講我乜野呀？
點解會咁surprised呢？有人知我今日會碌上來，乜佢冇話你地聽咩？

兜口兜面撞到佢，佢同我講野，忽然間唔識反應同出聲，皆因留意到佢條呔，同我頂帽係一樣色架，猶如驚弓之鳥的我，第一個諗法係：乜咁邪呀…
第二個諗法係：哎，佢地又唔知會講d咩…
只要有少少蛛絲馬跡，你地都會充份運用想像力，大造文章，同你地玩得多，學左你地的思維模式，諗下你地會點樣穿鑿附會
既然如此，亦都諗下點樣接招同拆招，就好似d io咁，為佢d高官老細諗定一堆都係無中生有的標準答案，今回預備左一句「心靈相通」來招架
原來係我諗多左，係我自找麻煩，但練好左的絕招，可以收埋備用

5點幾閃啦，碌番屋企，因為晚上有無間斷的英超
途中打俾你，我：喂，你今日做咩放假呀？
你：你又知？
我：我碌左返去唔見你
你：返去做咩？
我：返去探人囉
你：探邊個
我：探d好重要的人囉

我知我個blog好受歡迎，我諗都係因為我喺度直紓己見，先能吸引住一班讀者，所以我只會繼續語無倫次，想講就講，想寫就寫，唔會因為某d人講幾句說話而封鎖鍵盤，但同時亦會保持編輯自主，唔會因為讀者想睇咩而突登寫d野俾佢地睇
但係發生林柏特事件，真係始料不及，完全冇諗過事情會演變同傳譯到呢個地步，如果…
嘻嘻

頭先做左白痴仔囉，明明都想拎番兩把遮走，但走嗰時又唔記得，差唔多碌到返屋企先記得，下次先啦
頭先填左張request故仔的form，相信都仲有機會再上去

返到去hea左一陣，跟住碌左落樓下買餸，係呀，你冇睇錯，係買餸，係咪奇聞呢？
咦，咁都撞到某人喎，佢問：你唔係走左，返屋企咩？
我：係呀，不過而家買餸
打算炮製意國粉類食品，等你
你真夠face啦，鮮有入廚房掂d砂煲冷餐的我，為你呀，親自下廚

行動目標：入廚樂
行動代號：當安琪兒的頭髮沾上新鮮蕃茄汁

材料：蝦、草菇、蕃茄、天使麵，意大利粉
先將生蝦剝殼，要份外小心，因為好易拮親手指仔；另將草菇、蕃茄烚熟，分別切片同剥皮，好熱架，唔先攤凍好易lat親手
我會小心架，拮親或lat親你心痛都唔好啦﹗
好搞笑，因為煮煮下先發現d天使麵唔夠兩個人的份量，所以煮煮下都要落街買意粉
但我鍾意食天使麵多d，所以你食意粉啦
既然食晒我的飛佛天使麵，下回去citysuper要入番貨

聽日你同我都放假，一齊去尋找快樂的故事…

晚上英超當飯食，已經改為夏令時間，頭場利記大戰兵工廠，4-1大獲全勝，咳藥水學左謝拉特舉手指…
睇完訓左陣，因為實在太眼訓，唔知點解，起身時曼聯踢到50幾分鐘，暴力般作客領先緊0-1，喜上心頭，但見到曼聯係咁dup，真係覺得危危乎，結果都係守唔住，仲一瀉千里，大敗4-1
之後到車仔出場，塞事進行得如火如「茶」，0-0，又係好似英格蘭咁囉，攻不強，咁既狀態點踢歐聯呀…
林柏特仲紮住隻手，真叫人心痛﹗
結果補時先入番一粒，作客0-1完場，當堂鬆一口氣，最緊要3分，一分都不能少﹗

頭先探訪過舊居，仲未有人進佔，相信係一件好事來的
身處舊居，勾起很多回憶，跟鄰居的嬉笑怒罵，瀝瀝在目，但我發現屬於我的痕跡已被移除，並消滅得乾乾淨淨，我不再屬於這個地方，但烙在我心扉，關於這個地方的情感，我絕不容許它褪色

撞啱某人last day，轉達了某君的問候與祝福

養成了一個習慣，必定朝那個方向望一望，看看你在不在，今回，你在呀﹗仲同你食lunch添，really enjoy
頭先同你im，你迴避了我的問題，係咪講中左？如果係講中左，咁嗰個回應，又唔算迴避喎，哈哈

********
頭先睇畸寶同三色台的突發新聞，平時三色台出名pack呢d pack後好，但今日教人好失望，一拍埋畸寶，高下立見，我諗同背後記者的功力都有莫大關係

最後通諜

31 March 2007

前日好強烈的感覺，今日緩和了，平淡番落來，也覺得而家咁樣都唔係太差啫，但仍然有改善的空間
拖一拖，等一等，怕得到得來已是無用…

有兩個人都應承左我一d野，而家又冇左件事我已向你發出最後通諜，你心裡有數啦﹗
what is meant by "maybe"？
我諗起綠洲樂隊有集碟叫definitely maybe，有一首經典中的經典——Cigarettes & Alcohol
又真係辛苦晒你專登揀d我唔得閒的時間，係咪玩野先？

好想bbq，唔該搵人安排一下丫﹗逢親見到紅日同星期六日我都放假

我以為轉左工，就會停止所有夜間活動，但結果冇喎
大前晚宵夜
前晚睇英格蘭
尋晚唱k
結果今日好累，明知會肚痛都硬隊左罐咖啡，先支撐到十小時的辦公室生活

唔同台真係咁唔同？cable個朵真係響咁多﹗
事緣約訪問，某io跟進，佢請示左上頭，另一io call我，招呼周到，未知佢係咪出自真心，主動俾埋手提電話過我：有咩隨時call我啦；有別於以前：有野我call back你
呢個世界真係勢利，個字頭真係好重要架﹗而家就好似泊左個好碼頭，裝備好自己，第日出去遇到咩風浪都淡定d

近日多左用書面語寫blog，只因想清清楚楚思考過後，仔細想想該運用哪個字表達那種情感、意思，希望用略為潤飾過的文筆盡紓己見，所以寫成有條理的書面語文章，同一貫的style都幾唔同，希望冇嚇親你啦

而呢排唔係let there be love，而係it's a crime，應該只有你才會明白所謂何事

我迷上了帽子戲法，其實呢方面的僻好，都唔係最近的事，曾幾何時日日都係咁，但呢個冬天忽然重施故技，仲有過之而無不及
大半年前左右啦，鍾意玩錶，逢出街都行錶行，差唔多次次都有收獲，不論平貴
近呢幾個月行帽子店，但呢類舖頭唔係好多，但見到啱既我都買，不論平貴，但現時收藏的都係冬天款式居多，要多d留意春夏系列，but大熱天時帶帽咪好熱囉…
買左唔戴又唔好啦，諗下work唔work先

********
喺紅螞蟻，見到畸呢的一幕
某個男人同佢條女食飯，一個侍應用托盤拎住杯凍奶茶，唔知做咩，成杯倒左落個男人個身度，成件裇衫都係，好似用奶茶沖涼咁，係人見到都滴晒汗啦，而佢兩個仲好似鵪鶉咁，竟然話唔緊要，咩人來架…
隔離枱個女人反而好憤世疾俗，連忙大大聲話有冇搞錯呀，又指住佢老公：好彩你行開左咋，如果唔係就淋到你
我同你，睇熱鬧
香港人，真係無奇不有

我估你available，sms你：我想食韓燒，你book枱
你打來：唔好啦，我怕出唔到聲
我：咁你諗喇

見面後，你：去食韓燒啦
我：又係你自己話唔食
你：你想食丫嘛
我：咁你唔係怕出唔到聲咩？
你：咁不如去食日本野囉

我really鍾意食日本野，餐餐食都唔係問題，但你o唔ok架？唔使突登就我

近日鮮有的單獨會面

29 March 2007

今日放假的你，在我沒有預備下現身公司門口，但我的表情很冷淡，心情很平淡
我：「為甚麼你不是驅車前來？」
你：「吃甚麼？」
我：「日本菜」
你：「去哪？」
我：「尖沙咀」
你每次都是這樣，不想答的問題就瞎扯到其他話題，我又上當了，還是該說太了解你？深明追問下去也沒意思，隨便你
這段對話很突兀，問題與回覆都是短短的，而你忽然沒有主見，我忽然可以替你做主
對你我而言，近日鮮有的單獨會面，過程反而變得並不重要
簡單的對話，揭示了你對我的忽冷忽熱，毫無辦法，但我不是有心的，對不起
你：「甚麼事？」
我：「沒有」
你：(靜默)
對不起，只是今天的我，不想多言

你：「吃糖水好嗎？」你嘗試找話題
我：「你想吃便吃吧」
你：「去哪？」你是不是想延長約會的壽命？
我：「銅鑼灣」
你會不會認為我敷衍你？又或者是戲弄你？但我絕無此意﹗
你：「哪一間？」
思緒已被煩惱佔據，一字一句就是心裡的說話，無暇再作修飾：「第一次跟你去過那一間。」
我希望你明白，我仍然很珍惜這次你早有預謀，對我而言卻是突然而來的約會；我也珍借你我過去與現在的一切…
只是心情欠佳，無法埋藏，這樣算是宣泄吧
晚上跟他和他分別在電話和msn上談過目前的境況，但不知所為何事，就是不願意向你訴苦
謝謝你嘗試挑起我背上的包伏，不過你還是省點力氣，你是愛莫能助的
又要你吃我的氣，不是第一次了，也算不清是第幾次，對不起

********
然而時候到，該禮貌地放手，再拒絕你
我對你未夠狠，對不起

對不起這句說話，總有一天你會明白的

********
真係好唔慣，林柏特的8號仔波衫被取代，而且只是讓路予表現平平的唐寧
雖然佢曾經都踢過幾場好波，但都唔足以搶去林柏特在我心目中的位置
anyway，我愛人入左波，真係錫晒你
一不離二，舉起兩隻手指，係你話我知咁解的
雖然你入唔到第三球，做嗰個同你約定左會做的慶祝手勢，唔緊要啦，你已經好努力，keep on， carry on
個名有個「特」字既，都係醒目d

update @0500

待機模式

28 March 2007

返到去喇，你特意sms來"check"我返左屋企未
anyway呢d都係風度，有心

真真確確感受到距離，唔係physically距離幾遠，而係d話題已經唔再識搭咀，只管聽，不要問，因為都唔解釋得咁多
anyway，做聽眾都唔錯，當係換個角色囉

原本諗住返屋企訓訓先，結果都係碌左出街，基本上返去放低個袋換套衫又出來，其實某個moment真係幾累幾眼訓，進入左待機模式…
但過左lu，而家又鬼打咁精靈

嘗試解釋你的邏輯思維…
let 龍蝦 be 蟹，抽common factor，有"虫"，所以龍蝦同蟹有關，簡而言之龍蝦=蟹
中國文化中的類比推論：蟹=海鮮=龍蝦，文字解說：蟹係海鮮；龍蝦都係海絴，所以蟹就係等於龍蝦
其實如果係咁，世界萬物歸一，人同電腦都存在喺呢個地球，所以人=電腦
人同樹都要水份生存，所以人=樹
人同狗都係哺乳類動物，所以人=狗
咁我同你都係人，所以我=你