liverpool's night

28 July 2007

未夠4點半已經錄左入大球場，但想坐的球員通道外已經俾人霸晒，如果真係坐嗰d位，純粹為睇影相簽名，其實係睇唔到波，因為角度好差
因為要一次過霸六個位，朋友仔都係想睇波的，所以都係坐最接近350蚊飛的位置，感覺上抵d
第一場南華vs富咸，算罷啦，咪耐唔耐有人叫兩句south china，志不在此
第二場利物浦對樸次茅夫，真係以為自己現場睇緊英超，節奏明快，樸次茅夫絕無欺場，只係利物浦缺態
但大球場拍馬都追唔上anfield啦，冇人帶頭搞氣氛，連玩人浪咁簡單都成日斷，唔夠齊心唔係著晒利記主場波衫，嗰d打扮到花碌碌的粉絲更加欠奉，不過已經係近年大球場氣氛最好的一次，係又叫唔係又叫，見到kuyt扭波大叫，見到torres尖叫，見到gerrard喪叫﹗
馬菲泰萊喺面前開角球，四方八面報以噓聲，我同朋友仔講：佢心諗我都係踢波啫，唔使噓我掛，真叫人無奈
torres下半場終於處子登場，可惜冇乜幾腳波踢，唔係好睇到佢真功夫
gerrard 80分鐘都未出，全場大叫gerrard gerrard，千呼萬喚中亮相大球場，真係後悔冇做一張we want gerrard的旗幟
最後射12碼分勝負，唔知點解我預感torres射唔入，果然不幸言中，最終落敗
汲取過上次的經驗，今次賴死都唔肯走住，睇埋頒獎，利記球員跑圈，做體能，跟住先經球員通道閃，佢地好多個都除衫拋俾球迷，gerrard啦，kuyt啦，riise啦，finnan啦，reina啦，agger仲送埋對波鉢仔俾前排球迷，可惜係我冇運中獎，但唔知點解gerrard好cool個樣有d唔耐煩，可能天氣太熱，佢又啱啱傷瘉啦，反而kuyt傻更更，成日都笑住口，好過癮﹗
之後搵番老樸景點影相，好多都飲到wing wing地，行到過去時俾其中一個捉住我隻手，拖住我行左幾步，真係俾佢嚇一嚇…
之後都係唔甘心，搵番拎到gerrard件衫個女仔，同佢影左張相，摸過件衫，係黑色嗰件練習衫，好濕，仲好臭，充滿住謝拉特的男人味…
咁樣從天而降得到gerrard件衫，用盡佢一生的運氣，我就寧願留番d運氣來中六合彩金多寶
老樸球迷由看台「巡遊」出球場外，勁good feel，周圍搵佢地影相，利記球迷與老樸球迷喺場外對唱，超，頭先喺裡面又唔唱，班紅軍球迷會d人成隻鵪鶉咁，但再一次證明足球不分語言種族年齡與性別
無關痛癢的獎盃，輸掉了也不可惜，但這一夜是屬於利物浦的

百潔布壽司

27 July 2007

尋晚又遊cwb，當然又係為左當地的壽司店子
有一種壽司叫玉子，所謂玉子，其實係蛋，做法係混入一d材料和調味料，煎或燒成一大舊野(其實我唔係好知實際的烹調方式)，切細後同d飯包埋一齊，就係玉子壽司
唔知點解，我真係覺得嗰舊未切細既野好似百潔布，哈哈哈﹗
食完去adidas參觀，嗰件polo裇真係連disply都冇左喇，我諗係太靚的關係，沽清，但係反而睇中一件i love hong kong，design不俗，但係原本為左搵利物浦鞋，但冇喎，失望而回，weekend要去總壇睇下
今晚睇波，成個星期都浦cwb

早上出去拍野，晏晝com off，當然要返屋企變身，一陣出去睇波
如果唔係為左幫nano叉電，原本都唔打算開電腦
傾開原來星期二當晚好多我相識的人都有去睇波，但點解我一個都撞唔到呢？
如果今晚撞到，大家講講波經啦﹗

小肥人

26 July 2007

上深圳冇食小肥羊，朋友仔一句香港都有啦，結果試其他店子，咪賴野囉…
原來嗰日係大暑，仲嚷著要食麻辣火鍋，變態﹗
為左了卻小肥羊的心願，晚上做左小肥人，勁食，我8點幾到左，他未到，我咪攞飛仔先跟住行街街，喺門口她拍我，估唔到咁都會撞到女主播喎，好耐冇見
呢幾日怒上網，明明唔係對住電腦，搭車等人都要拎住部新落地的N76勁上網，一句到尾，身痕囉，終於成為3豬的行列，大家可以video call我

來緊8月有她的生日會，藉生日之名，召集眾友好聚首一堂，飲呀﹗
希望到12月我生日時，呢個優良傳統會延續下去

仲有，頭先喺中環hsbc做完野，浦左陣圖書館，買左打超群蛋撻上去探班，但熱鬧不再…

圖片說明：成班利記走左出來睇老樸對富咸；賽事進行中；離開大球場所見的people mountain people sea

不過影漏左一張相，就係喺大球場外，一名外藉男子拎住一張紙皮，上面寫住中文字：我要球票，用作收藏，並且見到佢手上已經有一叠波飛，亦有唔少人俾d飛尾佢
朋友仔話，我要鈔票，用作收藏，照版煮碗，睇下有冇人俾錢你…

由星期五開始的超級holiday

25 July 2007

幾日都冇碌上來，趁啱啱沖完涼，又未想訓住，即刻報告番由星期五開始喪玩的超級holiday

星期五晚去左書展碌，之前講過
星期六訓到點幾，跟住煲強劍，再盛裝出左cwb食飯，師父話遲d 11樓都開埋，我心裡十五十六，最怕佢發大來做之後水準下降
其實當晚都有好多好多選擇，但食到好似真係冇野好食，問師父我地仲有d咩未食，師父都要搵搵睇睇，哈哈，我都話食晒佢d魚啦﹗
食完諗住相約星期日游水的事，但電話講講下，即興游乾水，地點係我屋企，咪喺cwb飛的返去囉，十一點零開枱，打左十二圈，已經係朝早七點幾，落樓下飲左個茶，朋友仔話要上訴，所以再打四圈，打完十點半左右，朋友仔話辛苦過返工，仲要ot，好搞笑
我地打麻雀學英文，self-touch、white board、red centre、fortune、seventy thousands、bird、five bamboos、nine holes…
一句self-touch，笑到肚痛﹗
食左一舖十三么、一舖小三元、我十二章有人包 我自摸，仲要兩舖咁多
打完訓，訓到六點零掛，其實都冇留意時間，跟住去左葵芳唱k，又唱到十一點幾
星期一雖然返工，但都係玩樂心情，情緒高漲，話說約左舊公司d friend放工上深圳揼骨
上到去第一站去左打邊爐，但間野唔得呀，勁少野食揀，一早去小肥羊咪好囉，穩穩陣陣，結果食晒第一round order的野食，去左一間菜館再食過，食完都十一點幾
左揀右揀，去左其中一間最大型的按摩場，俾人摔完腳，揀左香薰推油，味道揀左薰衣草，三鐘的時間不知不覺間過去，席間討論過結婚的問題
訓，怒訓，真係好累，訓到十二點，飲左個茶先各自各搭直通巴返歸，碌到落來打俾少爺仔，跟住返左屋企沖涼換衫，先出去睇利物浦
其實為左今晚睇利記，再加上咁啱揼骨，所以是日com off
一個人由葵興碌到cwb，但由地鐵站碌到大球場，個個都三五成群，又或者拖男帶女，我卻只得我自己一個，真係二十級古怪
去到第一場已經開左波，相約好的朋友仔因為事忙，所以成七點先到，大半場波都係我自己一個人睇，四十級古怪
足球可以將人的距離拉近，坐我隔離位的兄台也是獨行，自備了薯片啤酒，好似招呼左朋友到自己屋企咁，拎薯片問我要唔要，又同周圍的人大講波經，大家又好受地熱烈討論，明明係陌生人，但傾落又似識左好耐，有講不完的話題和默契，成件事都六十級古怪
其實意不在睇波，志在睇靚仔球星，希望親睹gerrard和torres一眼
第一場波下半場成班利物浦走左出來睇波，謝拉特、古治同巴布仲坐左喺d photo d凳度睇波，真係好搞笑，而torres係咁拎住部金色電話煲粥，高樂治真係好高好瘦架﹗
老實講，兩場波都唔係特別好睇，天氣熱，但都唔係搞笑到踢踢下全部人走左出場邊飲水，咁都得？真係一百級古怪﹗
睇完後事忙的朋友仔又返公司繼續趕report，謝謝他百忙都來同我睇波﹗
所以散場後由另一位朋友仔陪我喺老麥食左個麥旋風同芒果特飲，他食左個雞腿包餐，真係好大食﹗
睇波途中他打俾我，他喺屋企睇電視直播，問我係咪喺大球場，好彩佢只係估到，而唔係喺電視機見到我

至於包廂的事，忘記佢啦，其實如果他張羅到波飛俾我，我會毫不客氣，但係同他的屋企人、他屋企人的生意朋友一齊喺嗰間廂房度出現，真係好奇怪囉，無論他如何介紹我，甚至講到明我係普通朋友，我覺得同場的人都唔會只相信我和他只係普通朋友囉，真係唔知如何自處，你叫我唔好介意和唔理會別人的目光，我又做不到，所以而家咁樣都唔錯丫

仲有，明知道冇可能、不切實際既野，唔好再諗喇

書展獨行

21 July 2007

晚上去左書展，hall 1絕對冇驚喜，因為係商務三聯等幾大平日喺街都可以行到的書局，書展只係變成減價版，所以快快遊走完去左grand hall，走馬看花，因為沒有一檔吸引到我停低睇睇，碌完碌番出會場外食飯，跟住再到hall 7同hall 2繼續
書展一個人，初初好抗拒，問過得閒的朋友仔，但他說沒有興趣，問到有興趣的朋友仔，但她約左人，所以都係繼續一個人的活動…
晚後喺hall 7忽然見到一個熟悉的身影，我再三確定冇認錯人先拍一拍他，他大喊對大陸館好失望，冇料到
其實我覺得今年係成個書展都冇料到，唔係淨只一個hall咁簡單，今年冇乜主題，亦冇咩特色的書，再加上我本身都唔係一個文化人，更遑論一條書蟲，所以絕少駐足打書釘，全晚唯一仔細揭過的書，係一本星座書，原來人馬座愛浪漫的性格與悶棍的金牛座談戀愛，甚為格格不入；愛無拘無束的人馬座與佔有慾極強的天蠍座談戀愛，也水火不容。作者話一齊唔係唔得，而係可能要付出更多努力，要互相遷就和包容，甚至為對方改變更多
不過，書看過就算…
突發有人陪，行埋餘下半個展館，又講起他工作上遇到的畸呢人和畸呢事
雖然書少睇，但都買左唔少，當然每年都係狂掃三個足球雜誌檔口的足球書
真係唔知點解，我自問平日都買唔少，唔知點解總係有d愈期書我係冇，要補買，又有d新書、特刊，所以年年都總會喺嗰三檔野放低銀兩，搬走一d書，今年也不例外
仲因為稍後即將要就茶馬古道計劃單一招標，所以特別多浦內地書檔，也特別去雲南個檔口睇下有冇書可能啱用，搵到一本，但甩皮甩骨，冇新的，真係買唔落手；搵到田壯壯隻《德拉姆》，話說HMV網上個catalog顯示係65蚊，錢唔係問題，但冇貨要訂，需時五至十日，而家搵到，仲要係35蚊咋，都算係意外收穫
以往一年去兩三次，今年睇來唔使了

其實都冇諗住放工會出來碌，亦冇預計會撞到熟人，哎，唔應該著得咁爛dat dat，一d都唔型，破壞晒形象

倒數紅軍壓境的日子

20 July 2007

抵港：22號
住宿：灣仔君悅
行程：22號--旺角場開操；
25號--小西灣運動場的青少年足球活動；
25號--朗豪坊簽名會；
26號--老尖A記總壇活動

紅軍壓境，必備隊長gerrard，不過近日亦迷上torres，真係好靚仔﹗
其實我甚少因為一個球星靚仔而著迷，唔知點解，用朋友仔的述語，今次真係「俾鬼迷」
不過，咁唔代表我會因而離棄林柏特、謝拉特、祖高爾、洛賓，而係愛多一個啫
有空參觀下金童的網頁http://www.fernando9torres.com/inicio.php，同我一齊在空氣中認識一下他

另外，就係唔爭氣的英格蘭人，世界排名由第8跌到12，真令人痛心﹗
不過英格蘭球迷就係咁，一邊鬧，一邊撐，一邊希望佢地生生性性、符符碌碌

心藥

19 July 2007

茶與古樂，都沒法令我寧神養氣、心無旁騖
不過死士相伴，行動已經kick off，又好似冇咁慘了，俗語謂：心病還需心藥醫

及時出現的和食死士

18 July 2007

只有一個人過的日子，已經超過360小時，我唔知極限可以去到邊，我都唔想挑戰極限…
另外，禁食日本野同樣超過360小時，和食癮發作，幸好有同好日本美食的死士及時出現，打算捨命陪君子，我當然絕對唔會待薄自己，同你啦﹗但請準備好閣下的信用咭，不論尊貴與否，不過我講明架，唔係迫到埋牆角我都唔會使出我的秘密黑咭﹗
行動暗號：廣德一門見城
行動時限：一星期
行動目標：遇魚食魚，見飯食飯，有酒飲酒

不過同和食死士採取聯合行動之前，晚上又做左獨孤杯麵個friend…

鬥氣

17 July 2007

晚上怒msn，仍然停留在中學生成日掛住上網同人chat的階段，遇到自稱俾鬼迷的朋友仔，真係好搞笑﹗
幫佢度橋冧女，特別想記低以下一段對話：
他：其實點先可以test下佢想點
我：直接去問佢
他：其實都要問，但點問冇咁奇怪
我：如果，我係話如果，如果我話我鍾意你，你信唔信
他：你俾人咁問過呀
我：我當時答：如果，我係話如果，如果我話我好冧你，我驚你信
但後補一句，我覺得你女友maybe唔會好似我咁答囉
橋仲有好多，例如倒數、講大話蛋糕、with love畫像、sms攻勢、搞爛gag、youtube，希望你揀到一條啱用又work既，另外，多謝你讚我一句creative﹗
喂，唔好介意喎，你又會話我將d對話post上網，其實只有你先知我講緊你啫，唔使咁驚喎，等我威一陣，扮下戀愛專家啦

哎…
戀愛專家咪得個扮囉…

另一個msn中的他說：眼前既野，唔值得記起，先會成日記住以前
唔知係咪言者無心，聽者有意呢，好似有d弦外之意，好似警醒我些甚麼…

頭先又喺葵涌邨撞到舊公司的她，她叫我去一齊食飯，我話唔去，再過左陣他打來，問我行到邊，問我上唔上去坐一陣，都係唔好喇，我要學習「享受一個人」嘛
to 尋晚聽我傾訴過的你：你咪話我鬥氣囉…

因為上次開會話以後返工時間定在0900-0930之間，今朝要早d起身，本來一定0930前返到，但落車落雨，仲係好鬼大雨嗰隻，冇法，一係避雨，一係冒雨行返去，後來諗起老麥有遮，咪上去囉，點知借完落返來勁好太陽唔落雨添，吹漲…
今日繼續研究茶馬古道單一招標計劃，叫做聯絡上一個好熟路的學者，但係咪去拉薩都仲未知，但都要盡快落實，因為d谷花茶，即係普洱秋茶會喺9月開始收割，而入秋後西藏可能太凍去唔到了

我能一個人活多少天？

16 July 2007

今日第一個節目係整曲奇餅，最普通的home made牛油曲奇，材料有牛油、蛋黃、砂糖、麵粉、搞拌機、焗爐、錫紙、雪櫃、大兜，只係將d野搞埋一碟，雪凍整型放入焗爐焗即成，消磨了個多小時

第二個節目係去她的畢業禮場地外同她影相，成件事都好搞笑，去到竟然俾他截糊，我的意思係未見到她首先被他發現他：點解你喺度出現？我：我來搵她他：你來就係為左搵她？唔好講住，影相先﹗她：你做咩搶左佢…我：一齊影相啦﹗留左唔夠十五分鐘，計埋車程，節目二一粒鐘有找

第三個節目係重溫die hard，片長132分鐘，十幾廿年前的作品，d造型好老套﹗有聲稱未睇die hard4.0既某甲問我係咪想睇，我聲稱冇mood，其實係我唔想同佢睇啫…時間真係真係過得好慢好慢，點解放假會搞成咁？

頭先同他傾了短暫的電話，我高呼好慘，講到我眼濕濕，係呀，我喊，喺msn上我都係咁話俾朋友仔知她認為我要學識「享受」一個人的時候，如果她所言甚是，我諗我一定有排學，我習慣了、依賴了時刻地、隨時地都有人、有朋友圍在我的身邊她問我遇上騙徒的事，她說一個單身女子喺街好易遇到嗰d所謂「星探」的確不錯，基本上我絕少一個人喺條街度碌，所以我話尋日的遭遇是一件新奇事呢個就係我第四個節目，同msn上的朋友仔討論放假一個人點算，我用慘去形容，朋友仔不明所以，說現今社會有太多娛樂，又認為如果日日都同人一齊，自己就唔屬於自己，亦有朋友仔說好enjoy一個人，完全唔明我所講有咩咁慘我未試過連續兩個weekend放假都自己一個人過，你明唔明？朋友仔問我做咩唔搵朋友仔出去玩，我答唔出，心裡反問點解d朋友仔唔搵我去玩？係咪我平時玩得太繁忙，朋友仔都以為我又忙住玩，所以冇搵我？他說我都唔係一個人架，起碼我唔開心，會周圍搵人一輪咀呻一輪，我會主動搵朋友仔傾訴，起碼識得搵人幫，唔會鑽牛角尖先啦，咁又係﹗

不過一個人就會胡思亂想，又會想著以前以前上個星期六，啱啱開始一個人的假期，最初用「悠閒的心情」去形容當天的自己，不過當晚已抵不住寂寞，叫左朋友仔去唱k之後一天在家中沉迷在幻想的世界裡尋日，一個人碌出街，條街個個都三五成群，得我一個喺條街度碌，斯人獨憔悴，遇到騙徒，買飛又差d白行一趟，我又諗起上次上海的冒險旅程，他說我太論盡，究竟我幾時遺失了自己照顧自己的基本能力？使唔使考番個基準試？如果有一日上天跟我開玩笑，沒有朋友仔、沒有他、沒有你在身邊，我能一個人活多少天？

期待你能夠應承我，無論我身處何方，無論你我身邊的人是誰也好，只要你sense到我可能或許有機會有少少唔開心，你都問候我一句，讓我知道呢個世界唔係得番我一個，還有人記得我，反之亦然

p.s. 相中的成品有兩個窿，唔係因為燶左，而係俾我食左，食完先記得要影相，以茲記錄

充滿奇遇的一天

15 July 2007

呢兩個星期的日子過得好慢，week end的朝早，突然札醒望到個鐘11點半有多，心諗：死喇，遲大到
梗係醒晒啦，但又即刻清醒番：唔係喎，今日放假喎

差唔多四點起身，碌左出cwb，展開充滿奇遇的一天…
唔肯定係咪真係有廂房招呼，既然仲有飛，咪去買飛囉，如果到時有人招呼，d飛請人睇又好，賣俾人都好，諗番真係好彩冇去訓街
由地鐵站山長水遠碌到大球場，臨買飛嗰一刻先知唔收咭，一百級滴汗﹗職員指指售票處外的匯豐機，但我冇匯豐account嘛，嗰刻有諗過喺信用咭press幾百蚊出來，但唔記得信用咭的密碼，我問邊度有中銀機，個職員話要出番銅鑼灣，well，O咀都唔可以形容當時的心情，感覺就好似卡通片的主角，被一個一千噸重的法碼壓住，我變成紙咁薄，一陣風吹來就將我吹走…
一係買一係唔買，買就要出去press錢，都要碌番出去，想搭的士，sorry，冇車喎，你有錢都冇用，局行，因為嗰時已經五點半，售票處6點執笠，飛，始終買左，酷熱天氣下完全溶化，好在真正可以離開大球場時見到城巴5B，搭左三個站出番cwb
未食飯，一個人，成身汗臭，無謂去食高級日本野，低級的無謂食啦，所以食好耐都冇食過的kfc，餐個薯蓉可以轉鬆餅，特別聲明要雞胸，啜一大啖冰凍糖漿汽水，對於滴汗滴到傻的我，都好滿足﹗
離開kfc，喺史嘜通睇電話，N76，係我要KO的目標﹗

向sogo方向碌，俾一個唔知係師奶定自由行的女人拍一拍我膊頭，我以為佢識得我，但唔係丫，以為佢問路，佢都唔係，二十級疑惑…
女人：有冇嚇親你？
我：咁又冇
女人：你著呢件衫好靚，你平時著咩碼衫？
我：(更加疑惑)
女人：我覺得你個膊好靚，好啱著我地公司d套裝衫
我：(繼續疑惑)
女人：我其實係做出口成衣批發，要搵人試衫版，你有冇時間，阻你五分鐘左右，度下尺吋，留低電話，第日可以搵你幫下手，我覺得你真係好啱
我：我約左朋友喎…(其實我講大話，我冇約人，心諗呢條友係咪騙徒…)
女人：五分鐘架咋，我公司就喺怡和街對面之嘛(而喺同一時間，個女人喺佢個LV手袋裡面拎左一張貿易公司的咭片出來)

我心諗，乜我個樣似易呃咩？作為記者，呢單可能係一宗街頭騙案的新聞材料，我又唔係嗰d無知婦儒，又唔係嗰d貪慕虛榮的妹妹仔，上去睇一睇也無妨
地址係怡和街麥記隔離座大廈，水牌冇間公司的層數和名，有可疑﹗
搞呢搞路，話試衫要影相版俾客睇，講到呢度，終於去到戲肉，話影相要有形象，要化妝set頭，佢地同樓下一間美容院相熟，join左嗰度member每次影相上去化妝set頭唔使錢，嗰間美容院有facial做有減肥套餐。擾攘左一輪，我話我唔會join，佢游說我話呢份part time係一個好好的經驗，可以見識下，又學到著衫品味之類我話我又唔係好堅持要做呢份part time，那個女人就話要同公司商量下，咁我就走左落到去，再經過銅鑼灣地帶外，基本上就係剛才被截停的位置，另一個又係分唔到佢係師奶定係自由行的女人截停我，話我膊位好靚，我沒有理會離開再行左唔係好遠，都未行到body shop門口，另一個都係分唔到係師奶定自由行的女人再截停我，話我著呢件衫著得好好睇，問我平時著開咩碼衫，我也沒有理會離開
點解d騙徒周街都係？而個個都係得一段對白？所以最後選擇做良好市民，晚上寫左封email去防止罪案科備案

奇遇過後，碌左去sogo，giftland大減價，帶左禮物虎返屋企，跟住喺adidas睇中左一件polo恤，但冇size，過去京士頓街大d嗰間，佢有一件，但污糟左，所以都係冇買到，噢…
食完個kfc餐一路到而家，都只係食左一杯豆腐雪糕、三小包芥辣荳同飲左一罐coke light lemon，不如食個杯麵囉﹗

想睇die hard4.0，點解我問親個個都睇左？
不過唔夠大富翁邪，搞邊科呢？出左副回歸十周年限量版…

說時遲，那時快

14 July 2007

靜左幾日，本來諗住星期三有聚會，但突發流左，所以對尋晚原本的食晚飯都不抱樂觀態度，但又唔想夜晚做獨孤精，所以諗住lunch後兩點零，少爺仔得閒少少，打俾佢睇下係咪仲一齊食飯，說時遲，那時快，定係真係同佢心靈相通，佢就打俾我

再因為之後她和她的來電，全晚行程有變

首先係以拎野俾case之名，碌出旺角，順便早少少放工，首先去join番他，他正在g2000試西裝，他揀左兩件恤衫，問我意見，感覺怪怪…

我諗起嗰時我個superviser阿姐形容他：鍾意你嗰個男仔

真係O晒咀…

其實只因大家都差唔多時期入來，大家都鍾意睇波，有計傾，又傾得埋，引來無聊苦悶的阿姐胡思亂想
而啱啱離開公司門口，就撞到他，傾左兩句啦，他就正啦，連去兩個旅行，雖然都唔係d咩好特別的地方，但有得去玩去食去買就開心啦﹗
祝他玩得開心d啦﹗

well，插敍完畢

之後她join番正在行街中的我和他，跟住去食飯+食糖水，第一站係雞公煲，第二站係發記

唔辣真係冇咁好食架，而個豬肋骨煲初初食真係好怪，但食食下d味又幾過癮，飲左兩杯，但真係飲得唔多囉

食完糖水上去老地方唱k，有兩張新面孔，最想唱嗰d其實都唔係好新的新歌例如下次下次、千歲、始終有你，但都冇囉，所以又係金曲重溫…

甚麼叫絕望，抬起眼望望，如今我在你面前呈堂隨便收看

咪扮野啦，咪扮搵話題啦，我一早講左我回歸免疫，仲有，即使唔係免疫，只係咁啱撞到我的同事甲，就唔代表會撞到同事甲的同事，即係我總之撞到他唔等於會撞到我啦﹗

因為之前懶得執袋，所以d相仲喺個袋度，既然見到她，咪俾她睇睇囉，我叫她想要既就拎，她表妹話咁樣她可能會拎晒，結果她揀左四張，都唔算好貪心唱k唔飲酒既話，以前鍾意shirley tempo，但而家多數揀蔘蜜和菊蜜，尋晚首先是凍菊蜜，然後是凍蔘蜜，再之後先啤酒，狂飲左一輪之後未夠四點閃左，恰一陣又返工去，所以成日喺度遊魂…

忽然想搵人去沙灘玩，但忽然諗起有鯊魚，沙灘都掛晒紅旗

又諗番起上次去沙灘他話好驚有鯊魚，他解釋細個去沙灘游水，游完返去睇電視話個沙灘有鯊魚，諗番好驚，所以驚鯊魚，但我地聽落，爆笑到…

上次講過去武當搵張三豐既事，而家行程有變，武林發展綠皮書的諮詢工作無限期擱置，取而代之的係「茶馬古道」文娛計劃單一招標

某日我問：其實我去做咩？

同事甲回應：出鏡

我：咁咪繼上次做減肥model之後，做旅遊artist

同事乙：係呀，你紅左喇，升格左，要搵番個經理人

睇資料期間睇到茶馬古道的風貌，行程穿越雲南、四川、西藏三個省，又係一處唔係做野既話我唔會考慮去的地方，但如果咁樣有得去一轉拉薩，又真係唔錯喎﹗做番集故仔又點話呢﹗

頭先見到舒夫真高和某人向同一方向走了，難道…

賦予飲品的標記

12 July 2007

我會為飲品刻上標記，盒裝提子汁告訴他我暗戀他，朱古力奶如熱戀般甜蜜，菊蜜說我對傳聞中的男主角沒有感覺，樽裝水問他何時才向我表白，利賓納想知道真命天子是誰？凍檸水想表達我對他的思念，可樂教我可樂不要皺眉…
唯有我絕少放進口中的咖啡，沒有被我賦予任何情感，未知是禍是福
這一百幾十字，就算是冬瓜盅的下集吧﹗

尋晚煮公仔麵，但原來屋企竟然冇公仔麵的好朋友午餐肉，所以頭先放工突登去入貨

喜歡玩水上活動、陽光與海灘的話，記住留意今個星期的《時事寬頻》滑水水、水上電單車車、香焦船船…

頭先又講起熊貓台，真係將魚樂無窮的精神發揚光大，好一條熊貓頻道，不如改名叫熊樂無窮啦﹗
朋友甲可以隨口up得出：人人都渣住枝蘇格蘭場非工業用國際線路自動溶雪十六嘩佬風油軚垂直升降連鐳射彩色洗衣乾衣氣墊毛筆一枝
忘記了交代x福佳的特徵，就係放臭屁聲響足一世紀
佢老豆話會帶福佳去睇醫生架﹗

為官之道

11 July 2007

沙田爸爸謀殺女兒的家庭暴力案和前三越百貨重建地盤的工業意外，令我看到一位勤奮務實的局長
星期日，他說：大人之間的拗撓，唔應該牽連細蚊仔，d細路係無辜的，並促請社署跟進
今日，他說：要求勞工處即時展開深入調查，明天起全面巡查全港天秤
立即出現回應，反應快，唔似得某d官咁話未了解好事件唔講住，希望用時間淡化事件，張建宗呢種做法，有姿勢有實際，俾人感覺他關注事件，正面面對而不是逃避，而他的出現，有畫面，有bite用，滿足晒傳媒的要求，更討傳媒和公眾歡心
跑daily時遇過張建宗好多次，友善主動，從不與傳媒為敵，每次出來都有所準備，預左俾行家扑咪，扑咪前搵io來溝通好，想問咩問題，唔係為聽下有冇敏感問題答唔答，而係了解下手頭上有冇呢d資料，冇的話，即刻打上office叫同事搵都搵出來，喺扑咪嗰十零分鐘滿足大家，讓大家好交差，冇資料，老實講出來，做唔切，唔係唔講，後補，又有時的確冇野好講，就同行家講手頭上得d乜乜乜資料，如果大家想知都可以講，唔會嫌麻煩。扑咪前等齊人，不論大小，問大家準備好未先開始，答問題亦沒有大細超，答晒後加一句：仲有冇要補充？清唔清楚？
做官做到佢咁，真係難得﹗
初掌勞工及福利局，遇正多事之秋，涉足與民生息息相關的勞工與福利政策，希望實幹的高官繼續他一貫的作風，希望他是香港之福

如果考AO成功，跟到呢位局長，真係三生有幸﹗

強烈對比的有廣播處長朱培慶，偷食斷正，之前儲落的友情牌，一舖清袋都唔夠…
大家熱烈討論，相信他都係初次偷食，所以先咁驚惶失惜，成件事簡直係一個笑話，唯有讚佢一句：太過老實
做官做到佢咁，真係折墮﹗

冬瓜盅載著的記憶

10 July 2007

每一種食物都附帶著一種情感，一個茶餐、一碗西瓜涼粉、一碟腸粉、一杯西瓜汁、一杯粟米粒、一杯咖啡、一碗通心粉、幾粒m&m's朱古力，你怎樣將它們串連在一起，為它們找到共通處，堆砌出完美的故事？
還記得不同顏色的m&m's的priority嗎？還記得楊枝甘露要走西米嗎？
剛才無意中又喺葵涌邨撞到舊公司d friend，同佢地一齊食飯，去左酒樓食隔離的中式小菜套餐，冇留意酒樓而家叫咩名，只記得當日返夜時成日去同一個位置，未易手之前的酒樓叫海明，以前必定有do、re、me、fa、so，必叫冬瓜盅，嗰d嘻嘻哈哈的日子遠去了
冬瓜盅載著的記憶，只有留在湯碗裡，吃進肚裡，留在味蕾上，埋在心裡，涼了，就不是原來的味道
大眼睛哥哥說我總是想著以前，活像一個老人家，我淡淡然說我念舊，改不了

法國脆香雞翼味、香酥雞腿、鮮味蝦味、香燒辣蟹味、德克薩斯燒烤味、墨西哥雞汁蕃茄，全都是薯片的新口味；至於八香珍姑，係百力滋的新口味

放工原本被麥當勞召喚過去，呢排真係好鍾意食至尊漢堡餐，但因為實在太唔健康，理性的雙腿制止了饞嘴的舌頭，但還是去惠康買了同樣不健康的芝士圈，一返到屋企即刻食左一包

小琳死了，我也想哭了…

沉迷在幻想的世界

9 July 2007

考AO，即係政府主任，係現代科舉，可謂將中國古代荼毒仕子的制度發揚光大，由小學入學試、中學會考、a level、cre同aore兩份公務員考試，考晒，仲要殿試，即係interview
之前考過兩次，去唔到殿試階段，今年又有，再接再厲吧﹗
哎，同朋友仔傾開，唔怕生壞命，最怕揀錯科，千祈千祈唔好讀journalism，做記者冇人尊重，日曬雨淋，呢d都唔緊要，人工奀先至係重點

患上了絕症，不讓愛侶知道，甚至用結婚去騙她死心
情節老套，由小南的大姐患上直腸癌去世那一刻，我估到了故事的結局
不過估唔估到都冇影響，眼淚還是掉下來，哭，因為承諾的一句《生日快樂》

兩日都留在家中，唔去街，唔約人，冇人約，總有原因
記得有一次星期日傍晚佢打來話一齊食飯，我話佢又唔早d打來，但其實當時心裡的回應是早d打來都冇用，星期日呢d日子呢d時間點會冇人約呢
坐在電腦面對，不斷看blog和od中寫過關於你的段落，原來多不勝數，我又沉迷在幻想的世界…

有一次唔記得講開d咩，我形容舊公司係adidas，只因同樣堅信impossible is nothing

自動刪除

8 July 2007

今日bor喺屋企，肆無忌憚咁訓覺、食薯片，真係好爽
唯一一餐「正餐」係我最愛既合味道香辣海鮮杯麵，悠閒的心情，食杯麵都是幸福的﹗
勁煲電視劇，今次係學警出更，連煲6集，每集8個字，即係4粒鐘左右啦
晚上她突發動議去飲野，我和議，call人，但反應不佳，大家都諗住放棄，後來我動議去唱k，她和議，諗住其他人唔去我地兩個都照去，後來有他和他撐，但勁O咀囉，唱左兩個鐘，2點3俾人趕走，但cheap到搭1cut歌，她和他唔順氣，同職員理論，大拿拿補番兩個字俾我地，真係唔該晒﹗
返到去仲未想訓，所以msn同blog囉…
其實我真係冇預計今晚會飲酒，真係飲唔到，唔知點解，越來越唔鐘意飲啤酒，唔好誤會，同與某人的承諾無關
係，被他狠狠批評不守承諾在先，我係有d介意，有d唔開心，喂，如果唔係我自首，我唔出聲，你鬼知呀？我都係尊重你先同你講啫，使唔使咁大反應喎，who are you？而家諗諗下覺得有d唔公平，協議係我唔飲啤酒你唔喺我面前食煙，點解要我戒啤酒，但你只係喺我面前先唔食煙，哼，你咪當我小器囉，隨得你點諗﹗哎，而家諗落都仲有少少嬲…
但我份人就係咁，而家嬲，但過左消左啖氣又冇事，唔開心的事，在我腦海裡有自動刪除系統，過一段時間自動delete
不過我未嬲完，仲唔知嬲到幾時喎，而大家都知我嬲一個人可以幾變態，喺呢件事未擺平之前，我都唔會睬你，no sms no msn no email no call no answer

她引述他所說：你一係同佢有路，一係就好憎佢，如果唔係唔會見到面唔出聲
其實仲有另一個possibility，就係嬲緊呢個人

另外，理論期間睇第9台，我隻故仔仲碌緊，由朝碌到晚都唔止

你收唔收到？

7 July 2007

雖然已接近破曉時份，頭先仍然眼訓到爆炸，但沖過涼，又想抒發一下內心的感受，實際點是為記億找個歸宿，騰出空間讓我發白日夢
與工作相關的十個鐘，不提也罷，只知很多人都患人厭惡返工症候群
特別少少在於出去食飯時撞到她，其實前兩日去食飯時都喺荃灣廣場撞到她，她呢排喺cable tv tower出job，口頭承諾下星期一齊食飯
今日特別著左one piece的裙、高跟鞋，因為今晚約左人食飯，而晏晝又出crew，著靚少少囉
本來諗住返屋企換個衫，跟住先出去打邊爐，跟住再去join番他去大球場訓街，但結果冇返到屋企，所以冇去訓街
因為著住對三寸高跟鞋快步行，又企，對腳痛痛地，返到去發現有少少腫

今日的重點，在於晚上的打邊爐宵夜活動，wind帶，由29號講到3號，cue左好多個bite
我同你「打眼色和心靈感應」，你收唔收到？
繼見習編輯後，又有見習總監，真係鑊鑊新鮮鑊鑊爆笑﹗

還是沒有見到他，他也沒有打俾我，what's up？
她比我想像中平靜，希望她不是扮若無其事…
繼續最愛的raspberry雪糕，其實我覺得旺角tst同cwb好應該有通宵雪糕舖，等我隨時想食雪糕都可以食到

quentin tarantino是一個吸引的名字相關的電影，近作要數《玩命‧飛車‧殺人狂》好似對聯，佢個friend robert rodriguez有套《索女‧喪屍‧機關槍》《kill bill》、《sin city》唔係個個都受，但鐘意既話你會好愛，呢類戲，呢類導演就係咁兩套對聯戲未睇，《die hard 4.0》都未睇，雖然買番die hard 1-3重溫，但都係冇時間…

將上過3樓的人與3樓的飲品畫上等號

6 July 2007

再次呼籲，記緊記緊今個星期六睇cable第8台，晚上8點半(首播)或晚上11點半(重播)的時事寬頻，我隻故仔出街呀，好幾個禮拜先一隅，請多多支持﹗
你更加一定一定要睇啦，唔只要俾意見，睇完要問書﹗

really crazy，day 1剪片，兩點幾成三點走；day 2，朝十一半返，剪到凌晨四點；day 3，朝十一返，剪到早上六點幾，係即係今朝差唔多七點先離開公司返歸，本來諗住只訓得兩個鐘，唔訓上下網碌下聽下歌，但真係頂唔順，兩個鐘都照殺，十點又碌到返去做ES，真係斜左…
話說用到喺graphic執到嗰盒帶，同事問time code，見到帶盒面一堆數字，就讀左出來：517107
同事搵來搵去都搵唔到，我話：5個鐘頭17分…
同事：冇5個鐘架喎
我：唔係喎，1個鐘頭71分鐘…跟住發覺唔對路，邊有70幾分鐘
同事搶去帶盒睇：妖﹗7月5號呀
睇真d，係喎，5/7/07，嗰"/ "寫得咁衰，勁似一字，俾人陰到…
多謝連返9日工，又正感冒發燒中的剪片硬食，硬剪到天光，三晚以來都OT，滿足我呢個嫌尖執著小記者的要求，辛苦了﹗
老實講，雖然隻故仔我自己做，log帶、剪片怒對硬對，但都冇話睇厭喎，好好睇

連續三日都總有一餐係麥記至尊漢堡餐之後，今日lunch食好d，和民星期四午餐，三文魚生飯，有沙律、麵豉湯、飲品，食晒所有野﹗
次次同同樣好日本野的他去食日本野，他都話我一食日本野就好大食，嘻嘻，係呀，我認呀
尋晚三點幾同某君傾電話，知道了事情的大部分，有空再聽埋下集
另外，終於知道了嗰日上3樓飲野嗰個係邊個，估錯了，俾他講中，我冇留意他，蜂蜜綠茶在我心裡面代表另一個人，他問如果係oreo奶昔會諗起邊個，我的腦海裡嘗試迅速地將同我上過3樓的人與3樓的飲品畫上等號，呢個遊戲都幾好玩

利記後日賣飛，頭先同朋友仔商量係咪去訓街，策略點樣，但今晚已經有人訓緊，如果放工再去，即使訓街都未必有飛賣，又有d想縮沙
有人建議使橫手，搵體育組d人幫手，但我同嗰d人唔熟喎，首先要混熟先…
上次講過可能因他之名有靚飛，再厚顏問他係咪當真，佢話飛可能冇，而家反而可能係廂房
咁正？帶埋我去得唔得？咁應該用咩身份去呢？但會唔會有d唔知咩人，好尷尬架…
大球場既廂房我未去過呀，馬場就去過，喺嗰度真係感覺優越d、上等d，一句到尾：好good feel

晚上繼續呆滯，但食左最想食的午餐肉同公仔麵，好滿足，訓覺，他call問去唔去唱k，心野了，又想去玩，應承左，但後來只因有飛機人，所以流左，有好有唔好啦，既然醒左，online，update下個blog
今次我唔係去玩唔update，唔係去玩而「早歸」，今次真係做野架﹗
遊網期間發生小插曲，朋友仔透過msn send左條link過來，咪開來睇囉，點知隨即好多人問我咩事：我冇delete你呀，我見到你online，你見唔見到我online？
因為眾人都收到一個message，內容係咁的：U have deleted me! Look here http://www.msn4you.info

綜合眾人的口供和經歷，一致認為我係俾人整蠱囉﹗
所以再見到近似既網頁或link，毋需理會

原本諗住閂機，但睇番電話，有一個兩個鐘前的sms，sorry，而家先睇到
鮮有打英文的我，打了一個英文sms，時間係0244，我覺得用英文講，中point d
Anyway no need to be sad, just
think it reliefs your burden
releases u from prolong
unhappiness Add oil ! sleep la

我撐你﹗
引用我最愛的let there be love：Just remember Ill be by your side，後加一句：always
記住頭先我同你講過，愛自己多d，如果連自己都不愛，不是很可悲嗎？
唔係自私唔係自我，而係呢個世界，冇話邊個冇左邊個唔得，但如果冇左自我，仲有意義嗎？沒有人沒有事比自己更重要

有d野

3 July 2007

假期的朋友聚會冇我份，1點帶住老麥至尊漢堡餐碌到返公司，執下d手尾寫稿等剪片，晚上一個人去食雲南米線，寂寞得很，孤獨得很…
凌晨兩點九走，門口竟然冇的士，記得同事曾經講過橋底曾經有好多人被劏死牛，所以唔係好敢行過去，好在等左一陣都有的士

有d野，唔諗唔代表冇發生過，唔認唔代表唔係事實，況且有d野，呃到人，呃唔到自己﹗
待續…

問心嗰句

2 July 2007

七一，回歸十周年，尤其係從事新聞行業，七一，只代表上班，不過因為出故仔免疫了，喺屋企訓到三點，因為他打來先起身
內容談及明日的gathering，但我去唔到啦，講講下變左突發打牌+打機活動，緊急召集他、他、他，本來都講到興高采列，但轉眼間又突發地流左…
今日，cwb有遊行又有回歸盃，tst晚上有煙花，所以係禁區，非請勿進，所以去左旺角食野，食食下他打來，問原本的打牌活動點，又突發復活
晚上八點，地點係我屋企，開枱，連打8圈，跟住一行五人落左樓下食粉麵宵夜，個個踢拖落去，勁camping feel，我嚷著要眾好友搞個camp，likely係九月，食完再打左四圈，佢地散水，我執左陣屋先沖涼洗頭再online
如果去camp或者一班人，我要再玩true or dare，又或者玩「問心嗰句」

朋友甲永遠帶給我們歡樂，是日金句又係一籮籮
我地幫朋友甲個仔改左個好名，跟佢姓x，叫x福佳，呢期最hit﹗
三番起糊，朋友甲諗住無花平糊自摸，轉個頭佢打爛花，爆出一句：好在回頭是岸
朋友乙摸爛花，話中「梅毒」，意思即係話模左一隻「梅」既爛花，朋友甲話：咁要搽藥膏，又或者食藥。我問：咦，你咁有經驗？

今朝發左個夢…
一大班人喺山頭唔知搞d咩，有條金色既蛇游出來，喺某甲身邊，我為左引開條蛇既注意，將手上金色的手厄拋去遠處，條蛇真係跟住追喎
又唔知點啦，他見到，捉住條蛇，拎番隻手厄俾我，但我話唔要，因為條蛇掂過
他就話我係「怕蛇豬」

拿出你我的信心來

1 July 2007

放假起身第一件事如常開電腦，他msn我，問我知唔知關於某君的事，真係唔知喎…
搞呢搞路，四點幾先出門口返公司寫稿，途中打俾某君，但某君不欲多言，冇再追問落去
雖然開住msn寫稿，但難以兼顧，還是犧牲了msn上的好友，唔好意思
事隔兩日啫，嫌尖少爺仔遇到煩惱，hey﹗take it easy﹗

冇得揀的時候又怨，有得揀又怕自己揀錯，係，人就係咁犯賤、咁矛盾
人生有好多野，你鍾意好容易，但要得到就唔係咁易，既然有咁既機會，係咪應該好好掌握呢？我認為當每一次機會都是最後一次，未嘗唔係一個好方法，雖然好似好消極好悲觀，但總會迫到自己珍惜一些東西，到頭來可能係豁達的想法
既然係鍾意，如果錯過左今次機會，不一定有下一次，那麼日後你窮一生後悔，卻為時已晚
為甚麼要怕輸？為甚麼未開始就斷定自己未能應付？這既是鼓勵你的說話，也是我引以為鑑的金石良言，互勉之
拿出你我的信心來，事情總會克服的﹗

同嫌尖少爺仔講電話，miss了他的call，他差d打爆我個電話…

回想尋晚老闆娘的說話，問番嫌疑人，佢話佢冇上過去喎，咁可能係另一個friend
尋晚她問她識唔識我呢個friend，我話唔識，但呢個人如果唔係嫌疑人，係另一個嫌疑他的話，那個他她是認識的

仲有，他下月向日本出發，我要一袋來自日本的祝福，j league同adidas，唔該

突發聯誼事件

30 June 2007

尋晚好開心，係呢個月繼camp後另一令我開懷事件
晏晝五點零六點，他喺msn hi我，講講下突發約我食飯，當然奉倍﹗
喺他極力推介下去左旺角女人街街尾附近既重慶雞公煲，簡體字、大陸feel，他話好好feel，灣仔嗰間仲大陸feel喎
他：勁想返大陸但又冇得返，去下呢d過下癮
我：你好鍾意返大陸咩
他：係男人都鍾意返大陸架啦
我：吓？返去做雞公？
他：嗰d叫龜公，或者叫雞蟲，我返大陸唔係嗰d，唔係搵嗰d，第日會唔會我唔敢包，但而家冇咁既需要
我：你唔使同我解釋喎…
雞公煲，要大煲、中辣，冇男朋友的我，冇女朋的他，沒有包袱，一於啤啤佢，賀量地四個多月，返加拿大浦左個幾月，去旅行hea過既他，搵到一份啱嫌尖少爺仔心水既工，同埋預祝他生日快樂
既然你咁愛理不理，咩飲唔飲啤酒，咩食唔食煙既協議，咪算數囉
anyway言歸正傳，呢煲雞公真係好得，仲有3-10蚊既火鍋配料放喺雪櫃自己攞，埋單有人同你計數，他問我想食咩，二話不說：午餐肉，我真係好鍾意食午餐肉架﹗
他：我份人係咁，食開嗰味就係嗰味
我：所以咪雞公煲囉
只有我兩個先明白既對白，哈哈哈﹗
一枝大啤可以斟兩杯，因為個杯好巨型，未食又飲，邊食邊飲，有時無聊冇野做又哼杯，未夠9點坐低就係咁飲，不經不覺，沒有預謀下陪他過左十二點，踏正生日正日，再為生日哼杯，不過birthday kiss就no way，我極之相信他都受唔起﹗
但我諗他也未必預計今年生日第一個見既人係我，第一個喺正日親口講生日快樂既人係我
第二場同舊公司d friend唱k，初初冇預計有突發食飯，更加冇諗過咁晏先落去，連夜更嗰d到左我都未到…
其實我都好想唱k，但一首歌都冇唱過，繼續飲，好想飲，但理智制止我飲落去，因為我唔可以再發癲，又怕會訓到不醒人事，第二日仲要寫稿，早走左

lunch都剧扒，幾浮誇
不過好可惜，煎到塊牛扒外面好正，d汁亦好good，唯一而又最重要既係件牛扒太熟了，如果係靚d既扒，5成熟，一定勁good﹗
返歸途中談及涉及校服的校規，講到女同學突登唔著底衫戴七彩爸爸，引來大笑

剛才馬拉松式會議中證實一個消息，就係我會向武當山出發，同張三豐研究一下武林秘笈，做番個普選武林盟主可行性研究，諗下點樣做武林發展綠皮書既諮詢
同事疑惑會唔會唔俾女生上武當山，某甲反應好快咁話：周芷若都上過武當山
某乙：咁隻故仔點involve記者？
我：咁等我勾引d道士
全場怒笑﹗

寫稿寫到十一點左右，中間睇電視、同他傾計
如果你問咁樣朝十晚十一係咪好辛苦，其實又唔算既，只係公司始終都係公司，唔同喺屋企寫稿上網可以楝高隻腳咁好free
如果一秒鐘4個字，寫24分故，即係要寫5760粒字
寫完半篇稿，都仲有心情、閒情逸緻打blog，一定會俾某人批評變態
以前發的作家夢，每日寫幾百字糊口的心願尚未達標，但每日blog，有固定讀者一眾，謝謝你﹗
寫稿，玩文字堆砌遊戲，都算是執筆搵食，廣義來講都算達成了心願，有機會一定要向狹義心願進發﹗

未食飯，因為時間吻合，本來想搵舊公司d friend宵夜，但我搵既人太遲覆我喇，閃淨小貓三四仔，嗰一刻又唔係真係好肚餓，諗住告吹
但碌出公司門口打俾她，突發出左三樓食宵
一坐低老闆娘話：你個friend頭先來過
我：邊個呀？
老闆娘：嗰個男仔，好鍾意飲蜂蜜緣茶嗰個
我：哦…
老闆娘：佢自己一個，仲以為約左你地

以前成日去五樓，不過有一次冇意中誤打誤撞來過三樓，就鍾意左呢度，所以次次一大班人，中學d friend又好，舊公司d friend都好，總之一大班人既話就會碌上來，飛個輪，老闆娘就會留定張枱俾我，通常都係左手邊張梳化+床
不過如果少人，或者同曖昧一號去飲野，一定唔會嚟呢度，費事啦…
when you say nothing at all，情歌王子曾經唱過呢首歌俾我聽
她檢視我的nano，她都話好鍾意呢首歌，所以為左謝過她今晚陪我宵夜，部屋的音樂都換成when you say nothing at all
低b架﹗兩條友食宵，四碟小食三碟食唔晒，一人一杯野飲，盛惠2xx，都幾誇張

********
無意中睇到林忌既blog http://plastichk.blogspot.com/2007/05/blog-post_26.html，有d觀點真係覺得惺惺相惜，其中一段係咁的：

根據中華人民共和國的憲法，立法原意是由立法者去解釋，而非由法官去解釋；所以「創立」的「原意」，應根據原作者的意思－－這就和人大釋法一樣，是香港的憲法－－基本法的基礎，絕對不能亦不得動搖

就是pin point了我的想法，我的用語由我的字典解釋，所以你唔明話，毋須深究，有需要我自然會話你知

尋找乙方的故事

28 June 2007

返工一個人，放工一個人，晚上也一個人，冇搵朋友仔
繼續一個人的生活中…

除了當事人，沒有人知道何時開始了，也沒有人知道何時結束了
但是當事人也不知道會否死灰復燃

我個乙方喺邊？

早幾天柏翹帶住小翹同小琳去fiona墳前
熱戀中的戀人突然離世，在世的會呼天搶地，心裡永遠為已離世的預留一個vip位置，雖然遺憾，但這份愛會直到永遠
你是不是這樣想不打緊，至少我是這樣想
或許這是令一個人一生一世愛著另一個人的其中一種方法

我應該用陰雲不散，還是陰魂不散去形容而家的心情好呢？

語無倫次

27 June 2007

中午12點33分，收到一個sms，唔知點解情緒突然激動起來，迅速回覆了一個sms，但真係忍唔住，喺公司，自己個位度喊左出來…
狠心將這個sms delete，也同時delete寄件紀錄，因為怕下次見到又會喊
lunch食左一個好好味的蕃茄豬扒飯+煎雙蛋+一罐可樂，對比起我尋晚一筒wise蕃茄薯片+半排三角朱古力+一碗菜的「晚餐」，呢餐真係健康好多
而正確來講，我今晚都冇食飯，離開公司前又咬三角朱古力…

今日放工遲左走，如常搭車返歸，如常坐喺車廂右邊第二排或第三排靠窗的座位，今日同平日不同的是早左兩個站落車
搭巴士返歸，為的係避免叫落車這個動作，所有人聽來都覺得二十級古怪，明明小巴可以去到樓下近d都唔搭…
去到萬寧俾她叫住，話佢地喺椰林閣食飯，叫我過去坐坐，但二十級心不在焉…
他：點解喺呢度出現？
我：落雨，我落車個站行返去要淋雨，咪喺度落車行下囉
他：呢個理由咁唔合邏輯，呢度行條大斜路返去咪仲遠
佢：佢好似做左d咩虧心事咁，咁緊張既…
他：你唔食飯？
我：唔想食，都唔肚餓
他：定係你約左人食？
我：(無言…)
他：咁去萬寧做咩？
我：買遮
他：萬寧有遮賣咩？你樓下都有萬寧架，咁奇怪，喺度買完野又要拎遠d
我：(笑…)
她：你係咪趕住走呀？使唔使走先？
我：唔係呀
他：咁如果唔係俾她捉左入來，你行完萬寧會行咩呢？
我：行惠康囉，買野煲湯
他：下面間惠康唔係大d咩
我：唔係，呢間大好多
我：唔去買喇
她：唔係呀，問你有冇廿蚊散子咋
語無倫次的對話大概喺呢度結束，佢地叫我上去坐坐，都係唔好喇…
落番去樓下間惠康，冇瘦肉賣喎，所以煲湯不成，anyway算啦，話明老火湯起碼要煲三個鐘啦，本來八點零煲係perfect架，不過而家如果九點幾先開始煲咪十二點幾先有得飲，搞呢搞路又要洗碗隨時兩點先有得訓，下次先啦

節目預告

26 June 2007

首先預告下月7號星期六，晚上八點半財經資訊台《時事寬頻‧單車搵路行》
嘔心瀝血的大作首播在即﹗
另外仲會在當晚十一點及翌日凌晨三點半、早上七點、下午三點重播

遇到問題讀者，不過呢位讀者亦都好神心，翻看前文，先行謝過
你問一年同一個月係咩意思？覺得我分明trap人引導人將結婚的事連埋一起，令人諗埋一邊，well…
當日的一年前遇到考驗，遇到試探；當日的一個月後出故仔
事情就是這麼簡單，你諗多左了

某甲叫我去http://news.bbc.co.uk/2/hi/middle_east/6518185.stm畫隻龜，我認為幫助不大，沒有理會
某甲：你第日都有機會俾人綁架，雖然微乎其微
我：如果我俾人綁架有人會救我

早兩日收到一個message，要求眾人走在事實最前線，30號同1號都要候命，不過轉個頭老細又同我講我免疫，專心搞故仔
噢，忽然有d失望，因為如果有得出去跑番兩日一定好好玩好開心，又可以見到以前成日見的行家，又話唔定會撞到舊公司d friend呢，但而家冇行lu…
而同事甲話要帶埋史力加對耳仔聽老細講野，同事乙回應話開會時一齊帶住史力加對耳仔，一邊左搖右擺一邊問老細講咩，老細擦一擦眼睛，一臉疑惑
我：咦，老細你係咪有幻覺？
一句說話引來全枱大笑

終於集齊營友的相片，thx

雨

25 June 2007

讀者問：既然你要試探某人，點解唔留到最後一分鐘先開估？
我：尋日，6月23日，有特別的意義…

今日出去拍野，但未出發先落雨，冒雨行左兩個街口返公司
我用「行」，係，就算落雨，我都係從容不迫咁行返去
我問：出crew先來落雨，唔通連個天都唔鍾意我？只不過我冇將雙手枕喺腦後，望住個天…

回程途中，看見元朗的晚霞、荃灣的紅霞，不過亦都有一個累透了和黑面的霞霞…
我返工，你返假，唯有晚上先見
呢兩日又再勁shop，尋日喺一間舖頭一口氣買左衫x5，另外仲喺另一間舖頭買左衫x1；今日又買左短褲x1、onepiece裙x1
一個星期七日都有新衫著

事情又是這樣的…

24 June 2007

今日晏晝出crew拍野，返公司途中，原來與某人同坐一架小巴
「紐約街頭有落」不為意這是熟悉的聲音，到某人下車時，才發現這個熟悉的身影
烈日當空中拍攝，曬到呆、熱到呆…
返屋企換套衫洗個面又出去，所以我成日都話，放假累過返工
食完飯喺街度碌來碌去，喺旺角街頭，突然一個黑影特意擋住我前進的去路，抬頭一看，是另一個熟悉的某君
忽然脈搏亂跳，就像差點被揭發做了甚麼虧心事的感覺…

我幫你把脈：你既脈象顯示，你需要買一個gucci袋，然後送俾身邊的人來搭災

人馬座是另有兩大特點....
(1) 永不認輸...(2) 總懂得保護自己....
你的所言甚是﹗
因人馬座之名，所以我話如果我要爭野玩，我一定會爭贏；有時又要特登做d別人不做的事，只因好勝
亦因人馬座之名，如果我唔在乎的人和事，我會對佢透明，甚至寧願得罪人，都不做違己交病的事

********
習慣喺呢度浦的人應該知道，我喜歡quote我曾經講過、聽過的金句或對話
事情的由來，而家應該作出一個交待…

早喺5月18號，我已經寫左一篇沒有發表的blog，內文如下：
尋日篇blog，題目係《我結婚喇》，雖不至於引起軒然大波，但也如我所料，引起眾讀者嘩然由尋晚至今，我一直估邊會第一個向我求證呢件事，結果估錯左，anyway，多謝所有關心過我的朋友
我話我唔會喺個blog度講大話，但大家有冇留心，我的用詞係：「我唔會喺個blog度講大話」，而唔係直接話你聽係真定係假
我的確沒有講大話，下個月結婚之說，的確曾經講過出口

事情又是這樣的…
因為同事要做隻故仔，講下d醫生會唔會亂開d藥俾唔需要減肥的人，要放蛇睇減肥醫生，情商我幫忙，同事們就事件討論得興高采烈，一同編作了一個故事
同事甲：你話你要結婚，要快d減到磅，等個醫生開d勁d的藥…熟悉我的人都知道，我一向都唔主張放蛇、偷拍，記者扮鬼扮馬，講大話trap人，總係覺得唔係咁好今次隻故仔唔係我落手落腳做，勉強過到自己嗰關，我同自己講，我只係去做model啫﹗
不過睇幾次醫生，我都盡量唔講d迫醫生幫我勁減肥的說話，我只會話：我想減肥；你可以最多幫我減到幾多之類似乎較為中性的說話，仍然有所收獲結婚，係陪我入去的同事突然爆出來，佢話：佢下個月結婚喇，有冇d藥可以減得快d醫生問：下個月幾時呀我迫於無奈都要推說：下個月尾所以發生了下個月結婚事件，我真係冇估到回響咁大…
而既然如此，亦將錯就錯，藉呢個機會，試探他的反應
不過可能要試探的他根本亦很了解我，知道我絕對不甘於結婚放棄花花世界，更遑論閃電結婚

多次被盤問都唔肯講，難道你不覺得事有蹊蹺咩？
我曾經回應他一句：個blog唔係招呼你
我諗你而家應該明白我當時的意思，我係話嗰篇blog，係招呼他的
如今真相大白，如果你心裡覺得有不舒暢的感覺，我留低一句對不起，請自取

blog，會繼續紀實；我，繼續招呼所有讀者
遇有與上述情況相似的事件，我承諾我會表明事件背景，大家毋需再作不必要的誤會與揣測
不過跳躍式思考和寫作方法，仍然繼續

我明白了﹗

23 June 2007

重看電話的sms history，「我明白了﹗」閃過腦海、眼前的就是這四個字
我悶悶不樂，唔開心，點樣先可以開心d？
朋友話呢個要問我自己，心情低水，又係只可以自救，我何嘗不明白呢？
應該忘記的人，何時才忘記？
應該淡忘的事，何時才淡忘？
應該放下的偏執，何時才放下？
人馬座哥哥上次勸我學習唔好咁執著，如果我真的做得到，就不會弄至如斯田地，苦了自己，苦了身邊的人
人馬座的我憤世疾俗，很多事都看不過眼，很想用自己的力量改變一些事情，有時又自視過高，所以當事與願違時，倍感挫敗
人馬座的我感染力強，圍著我的朋友，因我而喜，因我而憂
朋友說我能令party的氣氛更高漲，過山車更刺激
讀書時曾為了他黑面，大伙兒因我靜默了，笑臉收歛了
然而我今天卻因一個他，將自己趕入傷心小狹谷，還有人為我傷心嗎？
說到這兒，眼泛淚光…

恭喜你﹗
如果你所言是守得雲開，希望你有用剩的，分d俾我…

無言以對

22 June 2007

一向係夜貓，突然要五點幾起身，七點碌到返公司，結果咪成日喺度遊魂，一上車就訓…
明天也如是，灰﹗

既然用同一方法考驗過我、試探過我，唔好再用同一方法再考驗我、再試探我，好不好？

我說想去布吉旅行玩水，被你喝止
我說想學攀石同潛水，都俾你潑冷水…
心情欠佳，有甚麼人甚麼事可以令我展露歡顏？唔該快d浦面﹗

與沒有預計會碰到的人相遇上，閒談幾句
要等的人終於等到了，但無言以對

多麼想用說話留住你…
心中想說：一生之中，都只愛你
我，每日也想著你，靠在這街中等你，遙遠張望，隨你悲喜，視線人浪中找你
行近，我又怕驚動你，我又怕心難死…

滿足

21 June 2007

今日引來一陣大笑的，有某甲引述一段屬於一個外國人的小故事
外國人要申請三粒星的身份證，俾入境處的職員串：你身上都冇流住中國人的血
外國人不服氣：你點知我冇輸過中國人既血？
唔知呢，而家記低呢件事，又好似唔係真係咁好笑…

頭先收到兩位營友的相，thx，繼續post相…

放工又碌左去九龍灣，食嗰檔令胃腩極之滿足的車仔麵：伊麵底+咖喱魷魚+魚蛋+白菜仔+牛柏葉，多辣汁，當然唔少得一枝細可樂，勁good﹗
有次唔記得同邊個講開，佢話間野係佢個friend阿媽開，嗰檔野發到豬頭，因為真係二十個推介﹗
之後仲要來個楊枝甘撈布甸，真係滿足到暈 (ps呢個係冇西米version)

朋友x話好鍾意睇我個blog，又話我個blog好好睇，每晚訓前都習慣睇睇我update左未，開一開我個blog先訓，幾乎成了他的習慣
多謝

向塘福出發

20 June 2007

原本約左12點東涌地鐵站，有人遲到，行程延誤左個幾鐘
一邊食lunch一邊等，跟住去百佳買野，再搭大嶼山的士，向塘福出發

宿營地點係遠離繁囂的大嶼山南部，將電話放埋一邊，唔等電話唔打電話，relax，冇壓力，的確忘記了很多事，包括工作、生活瑣事，同埋你

攬住水泡出海玩，沙幼，可惜水唔夠清，但都唔緊要，天公造美，藍天白雲，已經好靚，仲要good在個沙灘勁少人，勁good feel
石灘的石頭長滿各式奇怪新鮮的生物，有一樣叫青口，即係平時食嗰d，雖則佢地只係青口baby，但真係好核突，一堆野，個殼滑san san，我高呼：我以後都唔食青口﹗
我執到一個幾靚的貝殼
他說：要刻番個名，常在我心…
可惜最後冇拎到走

搭的士去水口摸蜆，個司機黑面囉，但無損我地的心情
而最搞笑係喺的士上，只係離遠望到個沙灘，她已經高呼：好多蜆呀﹗
一望無際的沙灘上布滿生命的痕跡，好多螺仔、寄居蟹、魚仔，真係好唔忍心踩落去，但真係無從可避
決定去camp時，她嚷著要[掘蜆」，當日笑她，因為一般人用的術語係「摸蜆」
不過喺冇架餐之下，無所不用其極，用手、用樹枝、用石頭、用大蜆殼、用拖鞋等「武器」掘開沙堆，d蜆真係要掘出來
他：你對拖鞋係adidas架，咁樣掘會唔會爛
我掘到兩隻好大的蜆，仲俾其中一隻巨無霸嚇一嚇…
話說掘到有d硬野，咪用手攞囉，點知隻巨蜆咇水、又突出佢白色的肉，露野，我差d掂到佢，真係俾佢嚇親，大叫左出來，結果梗係bbq時燒左佢來食，報仇﹗
佢地想搶我隻巨蜆，仲叫我拎番張相對下d紋係咪一樣，O咀…

返去等沖涼時打左一陣牌，sorry，我自首，飲左幾啖啤酒，下次俾番你喺我面前食煙囉

她：我有個friend好靚仔架
佢：靚仔？
她兩個friend晚上帶左一大袋蜆過來，燒蜆，等隻蜆開口時加蒜蓉，亦可以加d辣椒仔，好好味，好鮮甜，不過真係好狠多蜆，我都未試過一次食咁多蜆
她：我個friend得唔得呀
我：幾得喎
一邊燒一邊飲，佢地飲啤酒、vodka coke，我飲vodka+橙汁，當然仲有black label+綠茶，唔記得飲左幾多，同佢哼杯，佢夾硬加我料
她已經斜左，走左入去訓，我都入去房攤左陣，唔知點樣同她講開，話想出去行下，講講下話去沙灘，我同她都尖叫起來，捉住眾人要落沙灘
喺馬路度彈起、訓街、訓沙灘、打側手翻，最多都係連打兩個，因為晏晝掘蜆，手臂激累…
d沙好軟好舒服，天上好多星星，我和她點星星，幫d星星起名
好耐冇見過星空，尤其係香港的星空，印象比較深的一次係，係好多年前上鳯凰山睇口出時的夜空
嗰一刻完全忘憂忘我，如今想來，如果嗰刻旁邊的人是你，好明顯會有另一種feel
不在意時分針走到哪裡，享受那個不用牽掛任何事的時空，我又高呼：呢個沙灘係我架﹗我要買左呢個沙灘﹗

第二日的行程首站去左沙灘玩水，其實用浸水來形容，應該比較貼切
之後碌落梅窩食野、踩單車，好熱…
去過瀑布，喺沙灘旁邊經過，周圍碌，搭6點的慢船離開，出番中環，雪糕車又召喚我…
搭船過tst，喺五枝旗杆外繼續自由行
的士到廟街食飯，個人開始變得呆濟，無聲出，反應慢，最後小巴返歸
好狠累﹗

玩意不外如是，也千遍一律，沒有太多新意，但每次同唔同人玩都有唔同感覺
不過咁多個離島，我都係最鍾意長洲，回憶、笑聲一籮籮，我相信我總有一日會搬入去住

車，好彩我suggest離開間渡假屋時影合照咋，嗰張係我地兩日一夜唯一一張合照
九男女變成七男女，因為有兩粒人甩底，原本話入來bbq的她亦放飛機
原本諗住入camp前一晚整曲奇餅，但出街玩得太晏，冇左件事，下次啦，總有機會的
另外，如果覺得我講野做野過份左，玩大左，sorry，希望你唔好介意
相片散落在眾人的相機之中，收晒再post多d相同大家share

行動

18 June 2007

我係蠶蟲
明白的人，自然會明白；唔明的人，毋須深究

今日mission failed，哎…
有著有唔著囉，hea過左，但要再拍多個weekend囉

行動目標：去camp
行動地點：大嶼山塘福
行動日期：公元2007年6月18日至19日
行動細節：bbq、吹水、游水、玩沙、打牌、hea、講鬼故，同埋玩即興
行動人物：最少有九男女
行動代號：向塘福出發

出發前，執左一大袋野，去兩日camp啫，好似誇左少少…

********
K先生：可否阻你十八秒鐘看看信？實在沒有用，情願不怕面紅，頑強地進攻，爭取你認同，才年年月月晚晚朝朝密密寄信明知我們隔著個太空，仍然將愛慕天天入進信封，抬頭望星空發夢，仍然自信，等到遠處你為我寫那一封人人都怕難、怕倦、怕撲空，全球得我未死心，沒有放鬆…

當年今日

17 June 2007

當年今日，「又在地鐵站玩個心情機，我又選了開心指數10」
不過事隔一年的今天，好似冇一年前咁開心
人大了，就變得不知足嗎？人大了，快樂轉眼即逝嗎？

當年今日，也經歷過一段唔易過的日子，正如尋日所講，因為一個人而心情大起大落，也為工作與生活的不如意事皺眉頭
事情就好像一個循環，又像大富翁，回到起點，再走一回，總要經歷一些起跌，去到某些位置，遇到考驗，硬著頭皮都要捱過去，某年某月某日，冷不防遇上賞心悅目的事，嚐到生活的甜味，感到日子不曾枉過，少少拼勁燃起鬥志，又再勇往直前，衝衝衝…

也許，應以當年今日所言：快樂的人，永都是最吸引的
與你互勉之

對白

16 June 2007

黃家熙出殯的哀樂，隨著辦公室中央空調系統，傳到每一個角落心情重了最高榮譽葬禮，誰人渴望得到？誰人渴望參與？「浩氣長存」四字，真係唔係人人都受得起，唔係個個都想受得起

你的喜怒哀樂全受他影響，點解你唔可以灑脫d？
電視劇的對白，好似係講俾我聽咁

諗住約我放工即刻去浦，唔俾我返屋企換衫的話，唔該早d出聲，係呀，正如你所講，我返工係爛dat dat，出街去玩先做番我自己

********
他farewell嗰晚cue漏左一個bite：我幫唔到你喎

一個令人尖叫的消息

15 June 2007

回歸盃的戲碼係咪好吸引？平心而論，其實唔係，但有得睇好過冇得睇，過往如果可以的話，有咩訪港「勁旅」，我都會去湊湊熱鬧
真係估唔到會咁快賣晒d飛喎電話中講開，你問我會唔會去睇回歸盃，因為你極大機會因工作之名去，喺大球場一帶出現但好可惜囉，我嗰個禮拜出故仔，一定忙於寫稿或後期製作中…
另一個令人尖叫的消息，就係你極大可能因你的友好之名獲得利物浦的靚飛，希望你唔係氹下我架啦

呢排update個blog的次數驟降，原因係成日出左去玩前晚喺cwb食飯，因為上次上海之旅後講過，要試埋香港嗰間南翔小籠包，well，真係極之不外如是，好失望﹗

隔離枱嗰兩個女人都唔知咩人來架，好狠大食，食左好多野，張枱擺都擺唔晒，我同同行的friend事後嘗試數番佢地食過d咩，湯年糕、唔知咩菜、肴肉、炸蝦波波、小籠包、酸辣湯一窩，仲有砂窩雞，同埋唔記得既起碼有兩三樣，另外，仲有酒釀丸子、高力豆沙

碌左一陣返歸，真係啱啱返到去，就收到電話，問去唔去飲咖啡，咁我梗係去啦，連衫都唔換住

轉個頭他都打來，問我係咪出去

他：飲咖啡啫，使唔使著高跟鞋？

我：我冇換衫啫

他：你都幾犀利，唔使訓架喎

我：就算唔碌出來，夜晚都係訓唔著，呢排晚上失眠

沒有認真或唔認真地合作過的「舊同事」而家變成了玩腳，唔覺意地留意到他又係著嗰件間條衫

，引來眾人的小起哄

忽然做左「主席」，究竟我幾時話要開記者招待會呢？

上回講過如果改改問問題的技巧，我可能會答左d本來唔會答的野，高級記者出手，well，中招了﹗

繼續講落去，只會講多錯多…
唔好再研究邊個受得起，邊個受唔起

得到高級記者的咭片，睇來我都要喺我的咭片上加上「低級」二字，以顯示我對高級記者的尊敬
再次被迫供關於結婚的事，我還是三緘其口
如果你認為我真係如你所講「copy其他人的blog搞到而家唔知點收科」，又或者「為左增加讀者或閱讀趣味」呢兩個不知所謂的理由而無言以對，如果你真係咁諗我，我只會覺得你好膚淺囉
被批評寫出來又唔講清楚又長篇大論，我當時我回應了一句，如果你記得我當時講咩，我已間接揭示了答案

因為前晚出左去飲野，所以尋晚訓得少，好累拍攝途中落大雨，真係邪…

進度稍為超出預期，所以可以早少少走，啱啱返到屋企樓下，收到他的電話，問去唔去飲野，當然應承啦，返去快叉左兩個鐘就自己醒左，咪online左一陣睇左一集學警，miss左幾晚了

三猛男喺我屋企樓下等我

他：去邊？

我：阿邊個話去tst阿士厘道一間bar

他：咩bar？

我：amazing bar

引來一陣大笑，well，嗰間bar真係叫amazing bar﹗

引述他的wording：本來冇意義的飲野活動，突然變得有意義

突發的farewell，有十五六粒人

由房玩到出大廳，周圍坐，拎住杯酒談談心，我杯係screwdriver，唔係橙汁咁簡單
得到一位哥哥，那番說話，我唔會忘記，聽到我熱淚盈眶，多謝你﹗

今日大部分時間都被不知所措的感覺佔據，白日夢遊，我d解藥喺邊？

玩樂後遺症

12 June 2007

玩樂後遺症又發作，但今次病徵有異…除左頭痛、頭暈，忽然新加失眠，仲有差d俾車撞﹗
事情應該由上月尾講起，因為工作，連續12日返工，直至啱啱過去的星期五，因為weekend落雨，先至叫stop一stop，真係好抑鬱，亦好行屍走肉，失去意識，淨係想去玩

所以星期五一放工，即刻call人去玩，但反應馬馬地，返到去睇tv、msn，msn上的他亦問有冇節目，不過都係冇下文，好在最終都有人撐，喺樓下bar pacific飲杯野都好過冇丫﹗

呢排飲野，你地有冇發覺我唔飲啤酒呢？

他應承唔喺我面前食煙，我應承他唔飲啤酒

嘻嘻，所以轉行飲cocktail、紅酒和繼續chivas

星期六晨早6點幾乍醒，唔係好訓得番，結果碌碌下訓到12點幾，出左去剪頭髮，跟住去左食飯，食日本野again

喺始創撞到一名舊公司同事

之後去左朗豪坊碌，喺嗰條好長的電梯度，我同個friend上，迎面撞到中學個friend落，響佢全朵我同身邊的friend講，我頭先咁響佢全朵，佢會唔會好尷尬呢？但諗深一層，識佢咁耐，都係叫佢全名，而佢d花名，大庭廣眾叫出來，佢應該極之有可能仲尷尬再行左一陣，被響全朵個friend call我，所以原本諗住返屋企的行程取消了，突發去左飲野
一見面佢打開個袋，係好多個如下圖所示的細公仔，佢話頭先無聊夾的，第一次一夾就夾到5隻，我揀左三隻，佢仲送埋佢隻豬俾我添﹗傾傾下，原來咁就三粒鐘，真大鑊，因為最遲五個鐘頭後要起身返工…

唔同款的飲品，大家共用一枝飲管「傳飲」，再次玩番喺中學high tea時代開始的習慣，一人一啖，傳完一round杯野往往得番一半，越好飲嗰杯越淨得少，個個都話想試真d，飲管上沾滿眾人的口水，大家親密得唔計較，平日又以兄弟姊妹相認，我係七妹，有大姊、二佬、鬼二姐、三姐、四哥、五兄、六姊、八妹、表哥、阿姨、娘親、阿姨個仔

如今回想起來還瀝瀝在目

因為黃雨，星期日，即係尋日原本的外景拍攝突發取消左，繼續訓，但都係訓得唔好
晚上有gathering，傳聞有超過四十人，但出席名單係高度機密咁神秘，大家都唔知邊個會到出去前行左一陣街，因為費事拎野，所以忍手冇shop，本來係早d上去打牌，可惜突腳…

行左出去講電話，俾人話我似迎賓，O晒咀

飲紅酒，都唔知俾人哼左幾多杯，咁又未至於話醉，不過係有d high high地囉，個人放d、relax d

晚上的gathering勁似擺酒囉，召集人仲要拎住張名單剔名，睇下邊個到左未，真係差在唔使做人情咋…

5圍枱，真係好crazy，有一圍嗰d人係我完全唔識，另外有d真係估唔到佢會到的人都有到喎，召集人的號召力真係好狠犀利

影左張比大約一年前嗰次更加people mountain people sea的大合照

實在太多人的關係，明明見到，只係一枱之隔的他，都要打電話同他講電話，真係好好笑

飲宴後去左上次好多人(包括我)發癲嗰間野bar飲野，飲到三點左右啦，閃左

********
你說：我而家眼裡面充滿憤怒
我形容你用一雙憤怒的眼睛看世界
我同快樂小天使失散左，幾時先重新學識用一雙快樂的眼睛看世界？

因為你一句說話，令我的心情跌落谷底
點解次次都係咁？
我幾時先學識唔好想得太多，想得太遠呢…
你又可唔可以順下我意？

我食慾不振、失眠，總覺得有點奇怪和不祥的感覺
見到野唔想食，無啦啦諗起打邊爐，試下睇下會唔會有幫助
正所謂開心打邊爐，唔開心都打邊爐，頭先打邊爐，又做小肥人，怒食

我受得起

8 June 2007

剛才簡單review過個blog，cue左上個月一個bite：我受得起
最好用來回應尋晚個bite

同你講開，又攞林柏特來講笑，一日至衰都係你啦，搞到我無啦啦有個仔
你迫我check番，well，林柏特係喺3月16號出世，就來三個月大架喇，一齊幫佢搞個生日會丫，橫掂冇擺滿月酒，人唔到禮都要到喎…
不過英格蘭嗰個lampard亦都就來生日喇，本月21號就29歲牛日
講開又講，嗰晚的對話唔止講過林柏特，亦由林柏特講到改名的問題，林肯、林則徐、林寶堅尼、林雨、林丙(病的諧音)、林花、林草、林吱吱、林bag bag…
大笑一輪
你同我再recall番林柏特d細佬妹叫咩名，你又忽發奇想：喂，既然有林丙，應該要有林甲、林乙啦
我O晒咀囉…
我：其實林甲、林乙同林丙係三胞始來架
你又話：你大鑊喇，林柏特而家先三個月大，有排你生﹗
再次O咀…
而今日你仲諗到一個仲毒的名呀：林鏹水
我：咁係咪應該有個林紅油呢？

今日再聽番mika，覺得有點俗氣…

頭先返歸途中見到他們一行四人去食晚飯，有講有笑，睇落都幾開心，以前我都係其中一份子，不過既然過去了，閒時懷緬下，亦令冷漠的臉龐掛上笑面
你話我份人樂觀又好，善忘又好，我只記得好的一面，開心的一刻
既然人記憶有限，有無限的喜怒哀樂要記住的話，以有涯隨無涯，殆矣﹗
選擇性地記一半，喜樂可以留低

我可能都有戀物僻，一見到新出或未見過未試過的百力滋同薯片，都一定要試一試，今日被呢包香草芝士薯片吸引住

同人唔同命

7 June 2007

好一句「同人唔同命」，成為bite of today，可以一同競逐bite of the month

yrcru jcmvh nn zxab hqi ohvf rmmr anmt p zxab rtm nk mnr vio wfyr rsp zxai tmmc jwjc hqi janl tqm rmmr nini mgln mnmbc zxab HIGH HIGHgpd zxab hjwg q km zxab tgdi rmmr oyg zxab irm jka onf janl rmmr yrsu hoami rtq jlln rsp zxal
打左呢段摩斯密碼般的文字，其實係倉頡碼，而家睇來，如果唔打番出來，連我都唔知自己打過d咩…
不過大意係講尋晚飲野的事

事情由尋晚7點幾講起…
尋日出外景，我要特別註明係「外景」，因為真係差唔多曬足全日，5點左右喺垃圾會做完個訪問
甲：跟住有咩搞？
我：收啦，今日咁辛苦
甲：咁正
我：你唔想收呀？你想繼續開工我有野俾你影架
乙：嘩，幾時做左娘娘，咁識玩手段？
我：大家都辛苦嘛
講真，我自己都想抖抖，連返左n咁多日，原本仲預期唔知再返多n咁多日喎，有得閃有得抖仲唔攝位咩…
因為早左收皮，所以早左返屋企，她7點幾打俾我，問今晚去玩好唔好，二話不說，搞埋少少手尾諗住去訓
但都未訓著，他打來，約左十點零tst
吓？時間地點都唔清唔楚，即係點？
結果去左阿士厘道6樓，上兩次上去都飲到斜晒嗰度，所以我問去邊間，你地話我飲醉酒嗰間囉
尋晚只限snowball，一共order左4杯

而由尋晚延續到今日的件事，由嗰碟wasabi魷魚開始…
我話唔夠勁，拎多左枝wasabi來，你地落，跟住食完後悔，話太重手，我試試，但食完面不改容，呢d枝裝wasabi勁極有限啦，都冇咩料到啫
佢：你咁食得辣，四川人來架？
我：我係日本人啫
如果呢d都頂唔順，咁生磨嗰d咪食到你地彈起？
後來淨左三分一兜，我就咁but來食，後來又話要我喊，但我喊唔出喎，唔記得邊個喇，叫我隊左嗰兩大匙wasabi魷魚
anyway，食左，但唔覺意索左一下，辣氣攻心，颷晒眼淚，她見到，以為我唔開心，將錯就錯，喊到喇，配合大家，大家又配合
我諗她以為我喊到震晒，但其實我係笑到震﹗
之後發生了打人事件，講到呢度，大家都知事情的由來，砌番個故仔，知道咩事啦
「我地唱d丫﹗」她說，又係一句可以競逐bite of the month的說話

今日仲得知一個好消息，就係隻故仔遲兩個星期先出街，之前她問18、19號得唔得閒去camp，真係灰啫，嗰兩日原本係勁繁忙剪片的其中兩日，但而家延遲，19號係公眾假期，本身都係放假，攞18號假，就可以同你地去camp，諗起就開心番晒
約左你地去食飯，你話去酒樓，我都有諗過有d咩腳，嘩，真係估唔到有咁多喎﹗

今日見番某人，好多日冇見過佢，其實有好多野想同佢講，但都冇機會，不過見到面，毋需多言，一個眼神，就已經足夠啦﹗

他：嘩，黑左咁多？乜元朗好曬咩？
他追看我個blog真係追得好貼，多謝晒喎﹗

星期一至五晚唔可以miss既，繼溏心風暴，而家有學警出更
我真係有個friend做PTU架，成日自己吹虛自己好型…

尋晚又被問到那個問題，一如以往，唔答
或者你鑽研下你的問問題技巧，可能有機會迫使我答左d本來唔答的野

講開 lat 親，上次俾壞人的煙頭 lat 親嗰度仲未好番，早兩日著裙出街右腳上有一塊焦

向元朗出發

5 June 2007

因為某人，最近經常向元朗出發，而今日，因為工作，又向元朗出發
去程訓著左，真係失儀，回程墮進沉思，好耐都冇試過諗野諗得咁入神

今晚煲足三個鐘的老火湯，係松茸雜菌螺片鯊魚骨煲瘦肉，真係好飲到震，你冇口福了﹗
不過莫名奇妙而來的若有所失感覺，不知用甚麼原因解釋…

bite of today

4 June 2007

msn暱稱的解說，換了「無緣做灰姑娘」，語帶雙關…

尋晚去左母校的35周年晚宴，我指的母校，係我渡過了七年美妙難忘光陰的中學母校我以我讀中大，身為中大的一份子為榮，但對中大卻冇嗰份感情話說回母校的晚宴，筵開45席，我地班一圍，隔離班一圍，我指的我地班，係form 4到form 7都同一班的文科班好友，而隔離班，就係指混雜form 4、5既d、e班的science班，你明唔明兩班的分別？到場之前，我問：你估有幾多mi-ss阿sir講得出我全名？甚至我未到場已經有老師嚷著問我喺邊，到唔到，真係榮幸萬分，我這個令老師又愛又恨的學生，唔使hints，唔使諗，真係咁令人印象深刻

尋晚金句一籮籮，大家來投個票睇下邊句係尋日既bite of today

選擇一：
兩件new york cheese cake同兩件藍梅cheese cake都到左，8個人，4件餅，份屬好友，大家分甘同味waiter放低幾枝叉，朋友甲話：我冇叉用waiter回應一句：唔好咁講啦，每個人都有佢的長處笑到碌地…

選擇二：
我打俾朋友甲：你出唔出來飲野呀？
朋友甲：睇下點啦，一陣話你知
我：咁即係咩意思呀？食飯又唔出來，飲野都唔出來？識左你成廿年喇，哎，朋友呀…
朋友甲：咁絕交囉
我：你同我絕交？你擺番兩圍，兼且登報宣布我地絕交囉
朋友甲：都絕交囉，使乜咁做
我：要話俾全部人知丫嘛，如果大家唔知你同我絕交，d聚會又叫你又叫我見到就尷尬啦
朋友甲：我唔介意喎，你介意你擺囉
我：係呀，我係介意，但而家係你主動話要同我絕交，梗係你擺啦，而且我係你合法朋友，我要分你一半歡樂

選擇三：
男朋友甲摸摸男朋友乙，男朋友甲話：你睇下你，好凸
男朋友乙：呢d係男人的特徵
眾人大笑，並檢視其他男朋友有冇男人的特徵
男朋友丙挺起腰板，好自豪咁話：我有呀
男朋友甲：我梗係有啦
男朋友甲乙丙都指住男朋友丁：咦，你冇男人的特徵﹗
眾人又大笑

選擇四：
一行七人玩大富翁，朋友乙第一圈都未行完就入左獄，一直都擇唔到孖骰，所以3 round後先可以出獄，但我地買左好多地lu，佢出番來嗰時仲有半圈未行完
不過佢行左冇幾耐，都未買過野，又事入獄，d地已經俾我同朋友丙買得七七八八
我地d屋都幾壯觀，朋友乙高呼：我要坐監﹗都買唔到野，淨係俾錢
朋友甲形容：佢係自由行，來行下洗下錢住下酒店
而朋友乙玩完全程，一樣野都買唔到，但最先破產既竟然唔係佢

********
原本舊公司d friend suggest尋晚去飲野，我話今日返工所以建議過第二日，但最後流左
而結果尋晚都係出左去飲野，玩樂一定要付出代價，不過，我願意

喺攝氏33度的蒸籠蒸左1 day，好熱好狠熱，好累好狠累﹗
番去沖左個涼就飛的落tst食晚上嗰餐應酬飯…
眾人影相，但我一d都唔enjoy囉
兩晚都有飯局，但兩者感覺完全不同，前者笑料百出，其實仲有一個關於全家都係橙的笑話，但我唔講粗口，聽過就算了，對比起今晚，感覺怪怪

109磅的記者

2 June 2007

過左咁耐都唔記得講，上次活動唔見左隻耳環，哎，冇啦，我諗搵得番的機會微乎其微
嗰對耳環好特別架，我好鍾意，但設計獨特，花少少心思，可以一分為二，唯有係咁樣延續佢的生命吧

今日走在事實最前線個台裡的人均議論紛紛：邊個係嗰個109磅的記者？
那個109磅的記者，走到事實的裡面

嘻嘻，許願樹從來都冇失靈，嗰日你問我係咪想睇側田？我話係，仲係極想睇嗰隻，但ot，多謝，心領了﹗

記得5月23日放工前睇三色台main cast，其中一段vo大意如下：余若海質疑李國章指 I'll remember this，you will pay，即係我會記住，你要付出代價呢句說話，講到街知巷聞，要申請專利，即係暗示李國章曾經講過呢番說話。李國章即時回應話，係咪以後講笑都要加上哈哈哈？
我同另一個同事聽到都即時大笑左出來，大家都話，佢錄vo嗰時有冇忍唔住笑？如果係live忍笑咪忍得好辛苦？

每次聽到甲方和乙方，用很理性冷漠的書面語合約條款，講出心裡感性窩心的承諾，都看得我熱淚盈眶
甲說：甲方永遠都唔會忘記乙方，就算任何一方死亡，仍然繼續生效
乙說：乙方向甲方承諾，乙方會一直愛護甲方，無論甲方將來遇到任何困難，開心或唔開心，乙方都會守喺甲方身邊，此承諾為一生一世

請等等，我溏心風暴緊的日子完結了
不過而家亦請等等，我英格蘭緊

心如鹿撞

1 June 2007

今晨夢見他，心如鹿撞今日要去馬會做訪問，夢中某馬會高層的媽媽被電子零件黨之類的人騙財，喺馬會開記者會，話說老細知我地喺現場，既然係走在事實最前線，當然抽我個camman去幫手先，所以喺現場撞到他

你msn的顯示名字透露了你的去向，你不在香港你身處濟南，星期一起駐廣州兩個月，有一段日子都見唔到lu
聞說行家話駐廣州=駐神州忽然而來的羨慕感覺，如山洪暴發
做記者的好處，可以去好多一般人平常人閒雜人無聊人去唔到的地方，可以走在事實最前線，甚至是走在事實上面，又或者走到事實的裡面，看到比別人多、比別人深、比別人廣，不過可能更黑暗和無奈的事實係咪真係我做得唔夠好，點解次次都冇我份，以為輪到我的時候又唔係我，一次係咁兩次又係咁係咪我太膚淺，只為滿足自己的體驗、滿足自己的眼界而從事呢個行業？呢種想法，俾人睇穿左…

以前曾經斬釘截鐵咁話唔做記者，我只鍾意寫作，報導只係基於事實，唔可以「作文」，所以我唔鍾意說起來不顧後果，毫無保留，只顯得我幼嫩和任性professor喝止我，因為幾篇人物專訪的功課，評語指寫得不錯，她對我寄望甚殷，認為我難得有寫文章的良好手腕，若融入新聞寫作，加以利用，有一定的發揮空間；而空有手腕沒有內涵，反而浪費了手腕和一腔熱誠，做記者的體驗能豐富閱歷和眼界，對創作裨益不少結果兜兜轉轉，畢業至今仲係留在記者行業，朝三暮四…同近日的我一樣，著住高跟鞋，gut高腳看別人的好，看別人的風光，自己偏偏冇腳踏實地，貪圖逸樂

發左個夢，我當然唔會天真到以為會撞到他，離開馬會兩點幾，碌番落銅鑼灣，食想食左好耐的麥記
今日係麥樂雞日，好耐冇食過，亦係為左新加坡蜜糖芥辣醬而去，但係售罄，真係灰，但都食左個9件的麥樂雞餐
晚餐諗住再接再勵，只係冇我想要的醬，所以先冇食，如果唔係一日兩餐麥樂雞，都幾crazy

剛才同她傾電話，話題仍然都係講緊上星期六的活動日，那份高漲情緒，延續到今日，星期四，即係活動日後的第五日
係咪因為值得開心的事太少呢？
回歸特輯進行得如火如荼，大家回想十年以來有咩開心事，諗唔到，乜呢十年真係咁唔開心，全部都死人冧樓？
搞成咁，係邊個的錯？
早幾日聽到一個人講，話聽到《始終有你》一曲就打冷震，點解？患上記者職業病，對政府野都要批判一番？
其實旋律唔錯丫，歌詞都填得好有意思，我認為係一首好歌喎，大家可以在政府網站合法下載：http://www.gov.hk/en/theme/10/videos/full.mp3

細個唱choir，早前講過，頭先睇片，回歸當日香港兒童合唱團冒雨演唱，勾起我小時候好恨加入香港兒童合唱團的遺憾…

呢幾個禮拜將會好crazy，返左4日工，聽晚剪片，實要ot，星期6繼續剪，星期日出crew，星期一話要幫手喎，又剪通宵？但我星期二都出crew喎，到下個weekend都要出crew，無間斷工作，我預告我諗我又會抑鬱…

原來那人不是你

31 May 2007

最近仲遺失了安全感，如有捨獲，俾番我丫﹗而每次我病都會勁口渴，哎，唔病得唔得呀？
今朝晨早起身已經酷熱天氣警告，三色台新聞話：今朝天氣好熱，喺街度行一陣都出晒汗噢，真係滴汗…d friend形容我係一舊冰，唔係因為我cool，雖然我有時都係，而係我唔熱得，好怕熱，夏天一出街我就話自己就來溶
我成日都話因為我冬天出世，所以怕熱唔怕凍話說天文台研究緊空氣質素太差的日子，就應「留在家中上班」，咁咪即係放假囉同樣的理念，酷熱天氣真係會令人窒息，不如酷熱天氣警告下都唔使返工啦，以免僱員在酷熱的天氣下發忟爭，熱到呆左，影響僱員的心身發展；同樣道理，寒冷天氣警告下，都應該宣布唔使返工，以免僱員在寒冷天氣下打冷震，凍到呆左，影響僱員的心身發展

********
他：你爛玩d
我：係咩？
他：我講錯咩？
我：咁又冇…
他：sat night 啦
我：唔好啦，我sun要返工
他：fri night
我：fri 會好少少，但我夜晚剪片，應該放1點
他：車，咁唔使預你啦
我：唔好啦

得出的結論同開場白一樣，我爛玩d
同他講開，原來我走左三個月喇，不過一見番眾人，又好似仲成日一齊日見夜見咁親切
或者呢個時候，就係做唔做到朋友的最佳考驗

噢，原來我只獲配上一句「好友」，原來你唔愛我，點解你愛佢唔愛我？

********
今日仲做左一件傻事，行左去嗰條路，向路的這一端遠處望過去另一邊的路口，冇留意花了幾多時間
突然見到一個身型、裝束都跟你激似的身形閃過，著住三吋高跟鞋的我都一口氣跑去路口，發現，原來那人不是你
那一刻的感覺好奇怪，又唔係想像中咁失望，而最後再等多左一陣，結果都係冇等落去
therefore for you，for me，for both of us，no surprise today…

放低一句謝謝，得閒番來攞

30 May 2007

活動後遺症仲未消散，日抖眼訓，夜晚失眠，連續三晚都訓得唔好，仲有d精神錯亂，以為今日係星期四
嘗試從各人的口述歷史，搵番遺失了的記憶，但仲未有咩眉目
anyway，麻煩到你的，得罪過你的，激嬲過你的，同我放盡咁飲過的，放低一句謝謝，請得閒番來攞

他：乜你好鍾意食雞翼咩？
我：你又知？
他：你自己講既
我唔明，究竟我幾時講過俾他聽？他播片，片段的尾聲，一把女聲大叫「我要食雞翼」
我除左笑都唔知做咩好了，合理地懷疑嗰把聲係我來既
原因一：我真係鍾意食雞翼
原因二：飲烈酒後斜左我會大叫 (編按：烈酒之中我飲得最多的都係chivas啫)
話說曾經有一次喺銅鑼灣街頭大叫：呢條街係我架﹗

又零食當正餐，返到屋企咬左一包大熱浪，跟住先食好美味自家製的波菜鮮茄咸牛肉千層粉

今晚要做灰姑娘

許願樹

29 May 2007

31號有側田concert，其實，而家先話想睇，係咪已經太遲呢…

忽然間覺得呢度好似許願樹，想要的野，想做的事喺度講下，跟住過一排又會成真
嘻嘻

多謝默默撐我的你

第一至八件事

28 May 2007

呢個weekend發生了很多事，玩左幾場，見到好多人，好多感覺想記下

第一件事，再去食嗰檔車仔麵，加一枝細可樂，勁good﹗

第二件事，得到一個平安包baby電話繩，同我預期的，係喺塔頂的九分平安膠包，成個拳頭咁大架，好大出入
做咩唔收買郭嘉明唔覺意跌個九分包俾你俾我，又或者等佢散場後做執包阿伯，又或者靜雞雞爬上個塔頂睇下有冇漏網之包，哈哈哈
我：我個包呢？
你：冇呀，都冇派嗰d包
我：咁買嗰d呢？
你：(支吾以對…)冇得賣 (編按：明明睇走在事實最前線嗰個台話仿真包15蚊一個，千五蚊一座包山，又有平安包散子包同平安包扇…)
轉個頭你喺個袋度唔知點樣摷左呢條電話繩出來，thx
他：我講左兩日都冇，唔公平呀…
哈哈，因為他呢句說話，忽然覺得自己高左，d優越感湧晒出來，冇九分包都一樣咁開心，一樣咁冧﹗
而其實除左個包，我仲想要整包師傅cup個包的印仔，唔知有冇機會搵到呢，個印仔really好過癮，但我唔要原子印架，係咪好貪心？

第三件事，我要搵出真兇﹗
事緣飲過你嗰杯酒，又同佢共用過一個杯，搶過他杯酒飲，又唔知有冇人飲過我個杯，定係同某甲哄得太埋，我發覺開始病病地…

第四件事，你同我都用同樣依依不捨的眼神對望了兩秒，俾晒位你啦，要講的，你唔講，要問的，你又唔問，以為你會打俾我，結果都係冇，所以我都係唔打俾你了

第五件事，今晚件衫，正確d來講俗語係一件連身裙，學名叫trench coat，被comment「好有趙薇的影子」，引來一陣大笑
阿哥，呢d叫design呀…

第六件事，我想講電燈膽都有分烏絲膽同慳電膽，而watt數唔同，反映個電燈膽有幾光，照明能力有幾大，只係統稱一句電燈膽唔夠precise

第七件事，之前有一次你online，我叫你，你唔理我，所以今晚你又online，我都係唔叫你了

第八件事，留意到你同我有相同的小動作和習慣，但係咪你抄我架？

尋晚的party，俾人串囉：今晚好似係我farewell喎，你點解仲high過我？
well…
我講過，唔係每樣野都要搵原因解釋
可以隊的野有好多，例如有水、凍蔘蜜、nothing、當然仲有酒啦；可以令人醉的野亦有好多，例如醉人的夜景、醉人的情話、醉人的歌曲，當然仲有飲醉人的酒
問：想飲咩？
我：不如開番枝紅酒
但結果都係冇，chivas直落，不過話時話，你有冇飲左一jar水？
唔使多番強調我貓左，我冇貓，只係斜左啫，真係好斜，亦都唔知由邊一刻開始突然斜左，有一段記憶遺失了，某個時空消失左，事後我知自己癲左
左腳膝頭哥同右邊大脾都瘀左一dat，我諗都係失憶期間做左d[火羅]野
坐我隔離嗰個壞人，用煙頭lat我隻腳，i'll remember this，you will pay﹗

今朝唔知點解，十點幾醒左，雖然繼續碌，但好暈，頭痛胃痛腰酸背痛，同埋作病，真係作死﹗
晚上的飲宴，再一次說明唔係咁容易一次過滿足晒所有人，趕時間的微言此起彼落
俾著我，不論中定西式的近似擺酒活動我都唔揀，分批屋企人、朋友、同事，各自各book間廂房又好，book個燒烤場又好，book間日本料理都好，book間私房菜都唔錯，book間bar亦得，請個三星廚返屋企煮番餐，咁先至真真正正聚聚，感受下喜悅，少d人又易d服侍，又唔使驚d親友驚有d三唔識七的人搭枱，又唔使驚招呼唔到
記得細個嗰時勁唔鍾意去飲，基本上嗰d唔係好親嗰d親戚，可以唔去的，我都唔去，寧願自己喺屋企咬杯麵
再次強調，蒸魚，如果要我主動夾來食，只有佢的面珠燈；仲有，我唔食橙架，橙汁另計

邊個打來唔出聲？

26 May 2007

你直覺認為佢係你識既，咪即管估下囉，反正你同我都識的人，話多唔多，話少都唔少

因為遲來的farewell活動，又食小肥羊，五日內食第二次，crazy
食上癮…

自從宣布結婚後，每日都收到一個沒有來電顯示的「私人號碼」，一係lunch hour，一係放工，唔出聲，我喂幾下嗰個人就收線
有一次我唔出聲，佢都唔收線，直到我出聲，嗰個人先收線
又試過佢唔出聲，我又唔出聲，我收線，佢又打番過來
嗰個人打來的目的，好似一定要聽到我把聲，我凝住係我識得的人
究竟係邊個？

唔知點解，總係覺得你有睇緊我個blog，你用行動默默回應緊我的言論，除了用這個原因解釋，還可以用甚麼破解這一連串謎團般的巧恰？

搶包山

25 May 2007

本來諗住入長洲睇搶包山，結果都係冇
俾十萬個理由自己，因為天氣熱、遠、多人、冇船、聽日要返工、冇位、冇人陪…
其實，點解要呢d理由？唔係每件事都要justified先做得
喺屋企開住冷氣睇，搶包山，都係不外如是，也許我係嘗試安慰自己

睇到佢個blog，好似俾佢兜口兜面打一拳咁痛和突然…

一年了﹗
仲有一個月…

我唔會離棄利物浦

24 May 2007

期待多時的歐聯決賽，終於都完左，返到屋企，仲未眼訓
唔知幾耐之前已經約定，日子越近越期待，今個星期初返工，每日都對呢場決賽望穿秋水…
今日的心情心態都係等睇波feel，未放工已經約左一齊食飯，跟住唱k直落睇波玩天光
放工突登返屋企換左利物浦波衫，呢件冇熨字，因為我成隊都鍾意，睇波都算去浦，所以仲換埋去浦專用的紫色con
想記下的事有很多，包括零碎的對話和事情

電話響起，他企喺視線範圍的牆角，望住他，但講電話

兩個人，十杯凍蔘蜜，係用來玩骰盅，每次三分一板至半板，crazy…

甲問我：「你下個月結婚咩？」
乙搭咀：「點解xx冇宣布既？」
我只用睇波去迴避，仲未係時間向大家交待

她搵我部電話搵他的電話號碼，我隨口就up得出，他面子真大，眾友好之中，我會記得佢number的只有幾個人，他係少數中的其中一個

他：「一陣過來搵你」
我初初以為他會剷到我地間k房搵我，真係突然心跳不知所措，但結果都係冇

今日著左利物浦件波衫出去，嗌到聲都沙晒，雖然輸波，但我唔會離棄佢，亦唔會怪責謝拉特，正如我唔會離棄林柏特一樣