去總壇朝聖+攞禮物

13 March 2009

尋日真係攰到爆，尋晚早左少少訓，所以今日好精靈
如常返工放工，冇咩特別忙，但又有d野做咁啦，晏晝收到adidas的sms，vip獨有的60周年禮物，又唔講係咩喎，要出去總壇換，咁放工又冇乜別野搞，咪碌出去攞禮物同行下囉
今日對鞋有d緊，其實唔係好適宜著住來行好耐街，但又好奇怪，好幾次著呢對鞋，都會無啦啦戚起條筋想去行街
第一站尖沙咀總壇，快速esearch一次，不過今次冇乜野睇得上眼，咁換左禮物就走，原來係一張coupon，折後滿800蚊可以減100蚊，仲要3月31號到期，好似欠左d誠意，頭先睇過d野唔係太啱買，如果邊位朋友仔有野想買，有機會用到張coupon就出聲啦，我係vip，買三間有8折，original有9折，折後滿800蚊再減100…

喺尖沙咀行左一陣，都冇咩特別野想睇，唔知點解，冇乜購買肉
跟住搭港鐵去左太子，諗住行一陣，無意中經過一檔叫阿升麵線的物體，大腸麵線，好吸引，叫左一碗細碗，盛惠12個大洋，以後掃街又多一個選擇，食食下興起，一邊睇野一邊碌，去左尚書房搵拉薩旅遊書，但唔係好啱心水，跟住碌埋落山東街飲珍珠奶茶同食沙嗲牛丸，好味﹗

夜晚又上唔到網，好煩呀﹗
都唔知係我部腦的問題，定係個network的問題…

尋日無意中見左佢一面，一排冇見，佢份人又假左

茲收到一份手信

11 March 2009

想去拉薩並不是因為最近常看到西藏新聞而身痕，只是這個地方，越看越著迷，總想了解多一點
看過薯伯伯的blog，他在拉薩開了一間咖啡店，原來最近一期壹周刊，介紹四男女的荒唐事，其中一人是薯伯伯
他們這種生活，我相信很多人都想過，只是沒有付諸實行，以我為例，一個人打算去旅行的話，會擔心會不會很悶，會不會很危險，不是説與憂患意識說再見，但是有時候是否過慮呢？是否想得太多呢？
昨天跟他聊起，去拉薩，他說我是一個「耗氧量大的人」，拉薩的氧氣不夠我吸，會暈，不舒服…
我說，車停在5008米的東達山丫口稍事休息，抖抖氣，雖未至於追逐，停下來呷杯熱水，走到雪堆邊玩雪，節奏基本上與在港嬉戲無異
他想一想，拉薩海拔三千幾，應該沒問題
我說到有個香港人(就是說薯伯伯)在拉薩開了一間咖啡店謀生，他說外國人一定很喜歡，即時生出生意頭腦，不如在拉薩賣蛋撻，他說，這樣都可以在那兒生活，也是一個不錯的選擇

談到本台本節目早前一個講淫褻及不雅諮詢的報道，我地簡稱佢叫淫賤故，不過，大家唔好有任何幻想，新聞探討，合家歡時段出街，畫面遮到矇查查，我的感覺係我都唔知自己睇緊d乜，連喺foxy search出來的檔案名稱都要遮晒，因為好繪影繪聲咁形容性交場面，例如人獸、射爆之類，好淫褻，所以要得番av二字，呢個就係做電視的限制
我講笑咁講，如果成日做愛嗰d人，出街都要打格仔，又或者唔出得街，咁係咪唔使返工？
朋友甲話不如用d啪啪紙包住個身，包到矇查查咁出街
哈哈哈，真係好好笑﹗

上次有幾張巨型啪啪紙，好好玩，尋日諗來諗去都唔記得巨型啪啪紙喺邊度來，同邊個玩過，只係記得係仔
啱啱終於無意中諗起，係同住葵涌邨的朋友乙玩，因為有箱野自美國ship過來，暫存喺我屋企，同佢一齊拆箱，巨型啪啪紙就係包住箱裡面的野
點解無啦啦講淫賤故呢，事緣係收到一份手信，係一個木製煙灰缸，煙灰缸的裝飾，學術的講法，係一具已勃起的男性生殖器官，粗俗的講法，係一條扯起左的賓周，其他的講法，亦可以形容為陽具、腸、條野…
我諗，如果貼張相出來，會唔會構成不雅呢？個blog使唔使加警告字句？又或者包膠袋？
其實，只係一件工藝品啫

至於點解要形容係「一份手信」，重點在於「份」，禮物包裡面除左煙灰缸，仲有移民來香港的虎仔同豬仔

下一站拉薩

10 March 2009

我決定了﹗
高原的藍，雪域的白，令人著迷；天路的蜿蜒，寺廟的壯觀，令人嘆為觀止
這幾天很努力地research，拎住本拉薩攻略不停咪
香港冇機直飛西寧，所以都係深圳出發最好，深航全日一班，唯一一班，1230飛，唔使趕頭趕命，單程正價盛惠rmb2010，發現在兩大網站訂購長年有七折，即係rmb1410+rmb50稅，回程如果都係揀喺西寧走的話，機票六折rmb1210+rmb50稅，晏晝1755喺西寧飛，如果唔delay的話返到深圳2230；而廣州飛平幾百，盛惠rmb980+rmb50稅，但0805飛，唔通要之前一晚喺廣州機場露宿？
不過回程有得揀的話，未必搭番青藏鐵路，喺拉薩飛番成都，又去小食城食下野都唔錯，機票永遠都冇折，實牙實齒rmb1500+rmb50稅，可以揀川航或國航，咁就梗係國航坐得舒服d啦﹗不過如果飛廣州又唔同講法，有時間喺重慶機場四粒鐘轉機，拉薩返廣州間中有平機票，都係rmb740連稅，抵﹗
如果喺拉薩返成都，朝早11點，一個鐘頭內有5班機，搭唔到，趕唔切都唔緊要，1555仲有一班，但如果之後要駁機返深圳或返香港就晏d囉，所以喺成都hea番兩日都唔錯
又或者趕時間，拉薩貢嘎飛廣州白雲機場直飛都得，CZ3464 1450飛，1930到步，rmb1630至rmb1750另加rmb50稅
至於重點的青藏鐵路，如果唔怕辛苦，budget travel坐硬座坐25小時22分，只係盛惠rmb226，但想攤抖下，硬卧下舖都係rmb523
最理想的行程係深圳-->西寧，買定火車飛，閒閒地hea番三日，係遠就遠左少少，但咁轉折飛到青海，點都要join番個local tour遊一遊青海湖啦
跟住un廿零個鐘火車，一邊影相一邊hea，同陌生人吹下水，應該都幾得意
去到拉薩已經係夜晚9點幾，即刻返酒店大覺訓

如果唔喺西寧hea，嗰朝搭飛機嗰晚2023即刻上火車，第二晚就到拉薩
如果搭廣州火車，中午上火車，隔一日夜晚到，多一日，牛兩日幾，點都要買軟卧，rmb810至rmb1450，但呢個價不如搭飛機，慳時間
然而，咁咪搭唔到青藏鐵路囉…
西寧始發N917火車停德令哈(0250)、格爾木(0713)、沱沱河(1222)、安多(1550)、那曲(1733)、當雄(1927)，2150到拉薩起碼喺西藏多兩個站，望多兩眼丫…
廣州的T264/T265 1307開，停長沙(2003)、武昌(2325)、鄭州(0414，日出都睇唔到)、西安(1000)、蘭洲(1630，日落又未到喎)、西寧(1938)、格爾木(0622，都仲係差少少先日出)、那曲(1647)、尾站2100到拉薩

諗諗下，即使一個人去都唔係好咩丫，都係交通，喺拉薩搵薯伯伯做當地聯絡辦，唔知佢肯唔肯呢…
適應左高原地方，join番個信譽良好的local tour去林芝呀、羊八井、納木錯、珠峰…
太多possibility，諗起就興奮﹗

連續兩天晚上，那個時候經過便利店，就看見一個中年男人吃杯麵，兩天晚上是兩個不同牌子，不同味道的杯麵，我相信，他不是因為喜歡吃杯麵…
當一個人只為了生存，一個杯麵，為的是裹腹，甚麼營養價值已拋諸腦後，甚或沒有本事去想吃哪些有益，吃哪些長肉
在微冷的晚上，呷一口熱的味精湯，吃兩口油炸即食麵，我不會認為他吃得津津有味，只有咀嚼出生活的無奈

離家出走

07 March 2009

驚天大消息，兩年前的《尋龍記》繼有io睇之後，網上仲有得bt，真係神奇﹗
異地風情，諗番成個過程真係好開心
又係要準備出trip的日子，今次去東京，又係我們仨，經歷一次生關死劫後，又再一次令我們仨走得更近，發揮合作無間的默契

好想去旅行，忽然有個念頭，不如聽日就出發啦，訂到飛去邊就去邊啦，上海同北京的機會最大，大城市，危險極有個譜掛…
本來有考慮過青島or大連，out bud
亦諗過呼和浩特，但曾經去過呼和浩特的朋友甲話一個女仔去會危險，所以打消了念頭
另一個好想去的地方係拉薩，但頭先新聞先話有香港人俾人逗，又臨近314一周年，算罷啦…
一直好想坐火車去旅行，一定要坐一次青藏鐵路
有一次又無意中講開，基本上我鍾意的旅遊點都係喺北面，去凍d的地方，當然，有一日向南面走，衝出北半球又係另一件事

有幾浪漫呀…

06 March 2009

一段台港未了緣正式告一段落…

北海道機票1500蚊，停台北，可以順便喺台灣玩番轉，喺食拉麵浸溫泉前去夜市食番塊炸雞扒先，諗起就真係好想即刻飛，不過，坐華航，真係叫人三思而後行
台中港龍機票850蚊，如果星期六飛，亦可以去會一會佢…
係咪好驚喜呢？

今日係第幾日呀？
身處北緯22度，東經114度，幾時先等到？

我嚷著要手信，你說，隨心隨緣，隨你喜歡買，我扭計，咁咪即係隨你不喜歡就不買，你說要留一點空間，咁樣先夠浪漫
我真係即刻笑左出來，浪漫？呢個形容詞從來都唔襯你喎﹗

請各位留意今個星期六晚八點半《時事寬頻》

終於…

02 March 2009

無意中開日曆睇，原來，今日係三月一號
感覺好奇怪，轉眼間又三月，但明明一月同二月過得好慢…

繼上個星期癲喪log帶，投入了兩日自閉寫稿的日子
今次有d唔同的感覺，冇好混亂的思想，跳躍式思想模式冇復發，其實係一件好事
夜晚九點幾寫完稿，無聊聊，搵左朋友甲去葵芳食野，慢慢散步返歸
辛苦一輪，以哈根達斯比利時朱古力雪糕獎勵自己
沖涼之前，玩左一次手語3g

終於…
太好了﹗

自戀

28 February 2009

最近，有一點自戀

收到一條手繩，色彩斑斕，戴在左手腕上
他說他也有一條一模一樣的，他說是緣份，他戲言既然這麼有緣，不如結婚吧
再聊到我倆很多一拍即合的地方，這一回說到去旅行，很想去俄羅斯，就是喜歡言語不通，讓舊建築任意謀殺記億卡，大家共同的目標，找個天氣冷下雪的日子，浪跡莫斯科，漫遊聖彼德堡

下月日本訪行，伙拍曾經與我出生入死的他們，就是我們仨，他對於這個人腳安排羡慕不已：真係未出發先興奮

share一張紙巾的溫馨

27 February 2009

尋晚本來可以正常走，但為左今日晏晝同個官做訪問，結果睇番好多資料，睇下有d咩line to take，set問題，估佢點答點樣追問…
其實我好鍾意今次呢隻故仔，所以一直都好想有個官喺呢隻故仔裡面take part，因為會完整好多，總叫得償所願
雖然做呢隻故仔期間要做埋新年故，又要搞日本d research，有時都幾煩，但拍的過程好開心好得意，因為會去到一d同平時好唔同的場合，唔係淨係拍d純粹因為拍feature而突登約的場合，簡單d講即係daily野，撞番d行家，亦拍左場演唱會，平時又點會拍呢
做隻台灣故冇去台灣，但題材處理上都可以接受到，而要表達的訊息都ok，有意義有探討性，所以今次多左d個人情感

請留意3月7日晚上八點半，有線財經資訊台《時事寬頻》，有台中市長胡志強、海基會副董事長兼秘書長高孔廉、兩代光華新聞文化中心主任江素惠(前任)、路平(現任)等，為大家剖析一段「台港未了緣」

註：某一日要寫outline，幫呢隻故仔改左個名，叫「台港探戈」，就係貪「探戈」的節奏、音樂、舞步的特色，有好多想像空間，又可以用tango的音樂貫串故仔，諗住係一條絕世好橋
不過，editor話正正因為探戈有太多想像空間，太多解讀，故仔又講政治議題，敏感…
作罷了

講番正題…
尋晚結果冇正常走，初初諗住搞一陣咪唔去食飯囉，點知越搞越晏，後來朋友甲打來話去飲野，本來冇應承實，但做完要做的野，十一點幾，佢又差唔多放工，咪出去吹下水，輕鬆一陣囉
喺尖沙咀地鐵站集合，未食野，掃街，掃街必定要有炸大腸、燒賣、牛雜、魚蛋，齊晒﹗
食完拎左張紙巾俾佢抹咀，佢話掰開一人一半，我話唔使咁慳，佢竟然話：乜你唔覺得兩個人share一張紙巾好溫馨咩？
溫馨，呢個答案真係出乎意料
三杯stella，可能因為冇食飯，飲左一杯已經有少少酒意，最後四點左右散水

一來唔夠訓啦，二來飲左酒，今朝起身真係唔舒服，飲酒後遺症，暈暈地啦，好多胃氣，肚漲，腰痛，又勁想飲有氣、凍、甜野，最好就梗係可樂啦，拎左罐可樂邊行邊飲
哎，自己攞來
今晚仲有局，喺諾士佛book左個場，超勁多人，應該好high
聽日要交part 1，後日交part 2，仲繼續緊將聲音幻化成新細明體的戰鬥，所以今晚的party正如之前同發起人講，窄d喇…


最近兩次見到他，他都話我瘦左
嘻嘻
其實少左出去喪飲，個人冇咁腫，咪好似瘦左囉
又或者變番長頭髮，視覺效果啫，不如頒番個最佳視覺效果獎俾我啦﹗

而頭先有個重大發現，兩個io，一個問：你係咪做嗰個茶馬古道？另一話：睇過你茶馬古道隻故仔，真係好驚訝﹗

越忙越想你

26 February 2009

這幾天忙於將聲音幻化成新細明體，時間表只有睡覺、吃飯和工作，分明沒有安排想念你的日程，卻沒有令我減少對你的思念
忙著，反而提醒了自己，嘗試以工作去暫時忘記你

意料之外你抽空打電話給我，聽到你的聲音，太好了﹗
倒數你回來的日子，等著你回來…

承受思念

24 February 2009

今天很累，很想掉下所有事情，任意地睡一覺

凌晨二時收到他自地球另一角落傳來的sms，大家都很累，早點休息吧﹗
趁他這幾天不在，讓工作填滿時分秒的空隙，可能少一分孤清

情感歷史課

21 February 2009

歷史檔案處承襲了英國檔案處的傳統，曾經何等機密的檔案，陳封三十年後，都有重見天日的一天

剛才出席了一場燒烤聚會，太久沒見嗎？工作累了嗎？還是我沒有投入，有一種莫名的疏離感
跟他在電話中聊起，可能大家仍未知道怎樣處理某些話題，所以採取不提不問不觸不碰的態度，我也可能想得太多
我認為，不是這樣，沒有話題是敏感的，沒有題材是禁忌的

每個人都有一段歷史，分門別類，有奮鬥史、旅遊史、感情史
他說，他不喜歡上歷史課
我想，我有時候也是一個很喜歡翻歷史書的人

我有一個想法，或者從秘密日記中找些文章，跟大家分享一下

緣份老虎機

19 February 2009

拉一下角子老虎機，牽動配對機率，十萬八千種可能性之間，結果只有中獎與不中獎
闖進情感九宮格，窺看男女萬花筒，點與線上的偶遇，爆出花火
如果將角子老虎機的水果數字或字母，換上男男女女，投一注還是投兩注？一拉，旋轉輪盤，她與他落在同一線上，算是中獎還是不中獎？
你與我都曾經試過，中了細獎，掉出承諾噹噹作響，再押下去，卻賠了本
渴望拉中jackpot嗎？很想，但害怕一下子耗盡運氣，下一個更好，下一台更大的獎金便與我無緣
我還是喜歡配對的過程，永遠不知道結果，期待帶來幻想的天馬行空，也不用擔心結果強差人意

人與人之間有些組合所產生的化學作用，能夠扭轉乾坤，每逢有他的出現，事情就好像會順利一點
謝謝你﹗

心裡被一個人霸佔著

18 February 2009

好心做壞事，搞出一場誤會，唔好意思﹗

呢兩日寫作情緒很好，心裡很多想法，腦海裡組織新細明體的細胞又活躍起來
不過眼訓，留多d時間休息實際d
我發覺呢幾日訓多左，亦冇好似之前咁訓得唔好，塊面都好似滑左，充滿光澤同彈性，哈哈哈

能見就見多幾面吧
雖然我經常說，不要將自己的開心不開心，建築於另一個人身上，但有時候，真的控制不了，你會不自覺為一個人開心不開心擔心憂心
簡單如一字如一句，又如一個表情，就像暗號，引爆你的七情六慾
俘虜了另一個人的心，幸福不幸福，說不定，不過心裡被一個人霸佔著，至少感覺良好一番，幸福就是說穿了
少理一點世俗眼光吧

嚐一口你留給我的味道

17 February 2009

今日，情緒忽然高漲，心情勁靚，同尋日有強烈對比

思念是一種很玄的東西，如影隨行
無聲又無息出沒在心底
轉眼…
吞沒我在寂寞裡
我無力抗拒，特別是夜裡
想你到，沒法呼吸
恨不能立即朝你狂奔去，大聲的告訴你

思念一個人，想到哭，想到窒息
原來真的會這樣
想你，翻出跟你相關的事與物，你買給我薩琪瑪，咬一口，讓甜味在嘴巴裡迴盪
不過，我不敢再多吃一口，因為，害怕下一次更想你的時候，沒有機會再嚐你留給我的味道

新look上場，換上新裝束，醒來，就是新開始，哈哈，昨晚歇斯底里的感覺被拋諸腦後
有d人一句說話，勝過其他塘邊鶴講十句
係，就係你呢一句，就係覺得呢句說話由你把口講出來，特別有意義，心花怒放，頭上閃出光環，自己感覺良好一番，人都高左兩寸
晚餐選定小肥羊，大吃大喝，係另一件令我心情靚爆的事
好開心，其實做人好簡單啫，見下想見的人，食下想食的野，仲有咩求呢？不過，我知道，事事順心順意，是莫大的福份﹗

乜爭野玩開心d咩？

令我極之後悔的一件事

15 February 2009

雖然我講過，不做後悔的事，但最近，的確為一件事，感到非常極之後悔，不過，好彩，呢件事有得返轉頭，尚算有得補救…
呢件事，就係剪頭髮
話說舊年七月五日，工作過後，因為一點情緒，悶悶不樂
當我覺得無聊，又冇人陪的時候，我就決定去髮型屋整頭，因為每次一整都要搞半日，消磨好多時間，所以嗰日一樣，去左髮型屋
夏天，覺得頭髮好褸幽，又熱，不過唔係好諗到點處理，髮型師問，我話由佢話事，佢再三問我長短有冇要求，我話冇所謂，「我想轉look，任得你剪」
既然係咁，佢決定剪短，亦要變得徹底d，剪一個bob頭
有d人睇唔慣個bob頭，不過我冇咩所謂，因為我細個都係剪呢個髮型，但過左唔係好耐，d頭髮一長少少，就遇到問題，因為我本身d頭髮巒巒地
又某一日，放工，去做左負離子，一直都相安無事…
再過幾個月，就有問題了，短頭髮日日都咁款，冇變化，又開始覺得悶，身痕，想駁髮，問完又有d猶豫
半長不短的頭髮，又變得好褸幽，而且生左一截黑頭髮出來，上個星期日，無聊聊，又決定去搞搞佢
不過，今次真係超後悔，為左唔好剪後得太短，一方面係為留長，另一方面係為左有一定長度紮到辮，加上我巒底的髮質，天氣潮濕，吹完一陣又塔晒，好似鬆獅d毛…
今次真係好大決心，要去駁髮，起碼可以keep兩三個月，起碼煩少好多野，其他的野，兩三個月之後先再算
不過，咁樣搞搞個頭又要成千銀…
頭髮的長短，style，只要俾d錢，想返轉頭還是可以返轉頭，要幾長有幾長，唔使後悔
哎，以後唔好再貪得意去髮型屋﹗
情人節，諗起《雙失情人節》的旋律，因為近幾次唱k都搵番呢首歌唱
我和他冇約定要見面，因為工作的安排，說不定，約好了見唔到反而會失望，隨緣…
最終都係見唔到，整天都等電話，直至凌晨一時許，等到了

不要讓自己受苦﹗

13 February 2009

仍然係好唔開心，頭先講講下又忍唔住，喊左出來
靜靜地，諗起，又想喊…

為這些問題煩惱其實是很笨的事，既然控制不了，解決不了算是罪過嗎？
最大不了，最差的景況就是脫離這個現實
換一個思維模式，可以嗎？

記住：不要讓自己受苦

give me a long break, please

12 February 2009

好簡單寫幾隻字

呢排唔開心，尤甚呢幾日，遇到好多野，都唔順心，唔順意，又係受考驗的時間
心裡有不舒服的感覺，喊，暫時舒緩一下情緒，停下來，一個人，眼腫消退過後，又是嘆氣…

你個friend

08 February 2009

將msn的個人訊息改成give me a break
人最可怕，就是會將事和情變成習慣，然後，慢慢厭惡，很想很想抖抖氣
你以為明白我在說甚麼，不過，我猜你所想的，你大概想歪了

我一直希望在這個園地暢所欲言，讓網絡空間的新細明體留在虛幻世界，不過，有人花盡心思，將它搬弄到飯桌上，掛在唇邊，留在耳邊，落在腦海，進化成一些情緒
所以，事情還是說得隱隱晦晦，比較好一點

今日，某甲以「你個friend」形容某乙，意下如何？真想搞清楚
有一次，我平淡地講述一件事，其中一句講到：某丙咁啱喺將軍澳車我個friend出來
聽者如獲悉驚天最新消息，追問這個「我個friend」她認不認識
又有好一段日子，留意到一些半生不熟的人，會以「我個friend」、「你個friend」來形容另一半，在這個社會學習的過程，我認知到這是一個暗號，一個潮語，「我個friend」或「你個friend」代表男或女朋友的意思
這個對某乙的稱號，也該用同一方式解讀嗎？

城市人的疏離，對人與人之間的不信任，結果，為很多平凡事情都加上密碼，搞得神神秘秘

情緒低落症又發作

07 February 2009

好幾天沒有寫文章，因為，真的很累，尤其心境

我觀察自己過去一年，又較之前一年少了笑容，變得不開心了；再回顧多一點，前年又比再之前一年不開心
究竟，是我越大越貪心，不知足，所以，總是不開心？
為其麼快樂跟年紀與生活體驗成反比？這是定律嗎？我會看破嗎？

新春前，某一天晚上電視在播《行運超人》，憶起戲中一句對白：一個人一生中，總有幾個鐘時運低，渾渾噩噩，好彩就喺屋企訓覺過左去，唔好彩無啦啦行出街，可能就咁飛來橫禍
我認為這句話，應該有幾個變調
一個人一生中，總有一d日子唔順意，很容易感到氣餒，好彩就冇咩重大事件要處理蒙混過去，唔好彩做小小野都惹人非議，揹大黑鍋
一個人一生中，總有d日子唔開心，鬱鬱不歡，好彩的有d朋友陪下分擔下，唔好彩的一個人呢埋鑽牛角尖，一個睇唔開做傻事

我現在的心情，怎麼說呢…
想哭，找一個膊頭依偎，鑽進一雙臂彎，對，應該是這樣

突發活動玩足廿四個鐘

02 February 2009

星期六，終於搞埋ES，零九年+己丑年第一隻故仔
原本諗住做完ES，天黑前返屋企訓，所以一身超hea裝束，連褸都冇帶
被召去拜年，我見我都搵飯食，又唔係好遠，咁就應承左，已經覺得lai野，走嗰時一定凍
本來，諗住參加星期日東涌至大澳的行山影相活動，但係朋友甲打來，call齊一眾放假人馬飲野，衡量過好玩指數，當然係去飲野放棄第二朝去行山啦
突然之間，星期六晚上多了兩場節目

目的地又係阿士厘道，集合時間十點半，飲飲飲，玩到個場得番我地一枱客，散水，清晨五點左右，一行四人穿過九龍公園攞車，寒風亂竄，凍爆…
本來只係諗住坐朋友乙的車去旺角轉小巴返歸，忽然間有人身痕話食雞粥，咁就入左大圍，但唔知檔野係未開檔定係閂左門，總之就食唔到啦，但唔心息，老遠入到去都要食d野，咁就飲早茶，但檔野味道真係好唔掂，可能喺七仔叮燒賣仲好食
朋友乙話車我地返去，上左車，唔記得邊個又身痕，話去揼骨，想做就做，想去就去，咁就一車車左入落馬洲，泊低架車就去搭黃巴，直踩骨場
好累，喺大廳坐左陣，揼左陣，上房再揼，訓到晏晝三點半，散水返歸
我地正討論之前一晚飲到斜晒的朋友甲講過今日燒野食，都唔知佢講堅定講流，不過反正我地過左關都要搵野食，朋友乙又話有d想食燒雞翼，咁就不如直接去燒野食啦
過左關，攞番架車，又一車車左去小欖某燒烤場
一連串突發活動，玩足廿四小時

本來諗住聽日返工，都係放假攤抖下好d，嘻嘻

做咩搣我面豬登…

31 January 2009

新年故結果搞到年終無休，灰爆﹗
呢兩日都勁眼訓，狀態唔好，眼腫面腫，頭先俾佢話我塊面肥左，仲要搣我面豬登…
晏晝食左個老麥餐，跟住，就冇再食過野，其實我有諗過出去食完野先再返來做，但仲差少少，不如做完先，結果，肚餓轉數真係慢d，都係一路做一路嗌肚餓，好肚餓呀﹗

今朝發左個夢，夢境清晰得令人毛管戙
話說外星生物入侵地球，就好似係《魔戒》裡面的強獸人咁款，戰鬥力強勁，而且兇悍無比，人類面臨種族大滅絕…
為免人類絕種，唔同國籍、唔同語言、唔同種族的好少數人，要被移送去一個地方
唔知基於咩原因，我被揀中左
我被安排同一個大約五歲的妹共處，我負責照顧佢，佢要成為我生存的精神支柱
兩個人，坐左入一個立方體木箱裡面，上蓋是開著的，木箱外面仲有好多層，有數唔到咁多個的木箱，餞別時其他人就一層一層幫我地閂蓋
直至某一刻，有一位小姐拎住一叠紙條，要我地簽名，寫上來原地、目的地等，我唔想簽，但佢話我揀中左，一定要填
來原地同目的地都唔知點填，我亦唔知自己身處何方，佢叫我填福岡，究竟我幾時去左日本？
之後陸續有識同唔識的人再幫我地閂蓋，慢慢地，慢慢地，視野由一百八十度變成兩條線…
後來，防空警號響起，我眼前出現了數之不盡的強獸人正要攻佔整遍山頭的畫面
係，要徹退﹗
我地個箱就向前行，去到一個唔知咩地方，我走左出來，要同識得的人影相留個紀念，影左一大輪，開始俾人趕返我入箱，我最後要同他影相，他又唔係好願，仲拎住嗰部大大個cable logo的beta機影野，我嗰一刻諗，影完點feed？出唔出到？邊個會睇？
後來，他都係冇同我影相…
真係要返番入箱，怱忙之際，我偷偷地拎左一本簿，幾枝筆，我真係想記低喺箱裡面每日的感覺，果重見天日，一定要記低嗰一刻的心情

焦慮、無奈、惶恐、不安、恐懼，怎樣形容夢中的情緒才好呢？
千祈唔好問我結果有冇事，人類有冇滅絕，箱裡面黑唔黑，食d咩，點樣去厠所…
只是，一場夢

合資格逗利是人士

29 January 2009

有冇試過有種感覺，就係個腦轉得太快，手、腳、眼等唔協調，work唔到
好多時寫稿時就有遇到呢種情況，腦好快就諗篇稿點寫，仲要係跳躍式思想，左想一段，右想一段，但每一段並不連貫，拼唔埋，不過第一段未完成思考程序，第二段的處理程式又啟動了，結果第一段未在腦海裡save或趕唔切打出來，結果，段野唔記得左，遺失左，白花心機氣力
應該要練習慢慢諗，將d野分開諗，諗完要save的習慣

我係合資格人士，即係合資格逗利是人士
頭先收到一句「祝福」，就係快d結婚
我諗佢真係非常極之唔了解我，結婚對於我來講，似咀咒多於祝福
anyway，佢都係出於關心

夜晚寫稿，十點半左右散水，打俾朋友甲諗住睇下佢喺唔喺荃灣收工一齊食野，打左兩次都冇人聽諗住放棄，又咁啱走左架小巴，正打算去買麥記hea食…
佢打番來，咁就碌左幾條街等佢放工，最後去左霸王山莊飲上海夜茶
小籠包、蘿蔔絲酥餅、雞絲粉皮、海哲青瓜、炸奶皇包、炒年糕、齋鵝、鳳爪、墨魚餅、桂花小丸子、豆沙鍋餅，絕對唔似一餐宵夜﹗
陪佢等埋車，返到去凌晨兩點

一年之計在於打邊爐

27 January 2009

很多人，多得像成千上萬的螞蟻，密密麻麻，擁擁擁，原來，蟻民是這樣意思

前天因為工作，罰企睇演唱會，出席慶功宴，甚至可以大吃大喝，後來仲同大眾偶像做訪問，零距離接觸，唔知幾多人恨都恨唔到，但對我來講，一場工作，一個普通人
不喜歡就是不喜歡

星期五晚放工食團年飯，盡情食，食得好飽，雖然很累，但滿足開懷
今年，終於告別團年飯食幾餐，開年飯又食幾餐的日子，感覺良好
我曾經嘗試提出唔去我認為是多餘的飯局，換來一張黑臉，冇得揀，去到，我換上一張黑臉，這算是條件交換吧
人到，黑臉亦到
我亦曾經祈盼新年要返工，不用多說，道理也冠冕堂皇，可以避免不必要的應酬
有些人事和關係，總附帶著一條突兀的尾巴，切斷尾巴，可能生出一張嘴，一條腿或三頭和六臂，倒要花氣力再左切又右割，不如一早從根源著手，整頓人事和關係，一乾二淨
哈哈，真諷刺﹗
不用應酬的日子，理應不再渴望上班，偏偏工作排山倒海…

年三十，留守維園，買了葡撻慰勞眾人
年初一，朝早差唔多八點先返到屋企
由日出訓到日落，接著是一場即興新春打邊爐

眼淚開關掣

24 January 2009

呢幾日唔開心，一言難盡…
事情發生之後，我又再是不發一言，之後一天仍耿耿於懷
尋日，我搵佢食飯，不過經過一日貧撲之後，好攰，頭痛，後來先知佢病左，陪佢去搵醫生睇，跟住搵地方食野，真係冇咩心情冇咩胃口，食過我同佢最靜局的一餐飯
晚飯途中他打來搵我去飲野，心情馬馬抖抖氣都唔錯，一口答應了，他說渣架新落地的賓士房車來接我
他到步，一個電話，中斷了兩道看著電視劇的視線，我話走了，算是一種姿態吧
佢問：而家話走就走呀？
我答：有咩問題

好耐都冇試過想將杯酒一飲而盡的感覺，尋晚，就係想哼杯
我將事情很簡單咁講左一次，眼淚不由自主地掉下來，心情，也不算太平靜
係，EQ應該高d，就算嬲都唔應該嬲在臉上，最多嬲在骨子裡
輸了…

有些說話，聽了看了，就像開關掣，淚如泉湧
有時候介意就是介意

夢見他

20 January 2009

尋晚發左個夢夢見他，記得好清晰，他堅持要搵嗰間cafe，好奇怪，奇怪在點解無啦啦會夢見他
頭先吹開水，將個夢境講俾朋友甲聽，佢話我掛住他，又真係冇喎，無啦啦做咩掛住他？

上個禮拜去行山，結果對腳變成義肢，今個禮拜輪到對手變成義肢…
帶對義肢出crew超級唔方便，完全拎唔到重物，拎隻腳架由門口行出口，如果拎多兩步都真係頂唔順
隻手擦損的地方濕水仲係好痛，膝頭哥瘀左，我諗少則幾日，多則幾個禮拜先好番

哈哈，今朝收到一份禮物，竟然係一樽cream soda zero

吊吊揈

18 January 2009

今日終於去左攀岩，一個一直都想試好耐的活動，目的地係飛鵝山天鷹石

吊在半空，唔上唔落，又唔係好夠力向上爬，進不得，退不得，沒有既訂路線，要自己搵路，找目標，頂硬上，很特別，唔知點形容

有一次爬的時候，對腳要攝入石罅度借力，然後一步步向上推進，結果，淨係拎左隻腳出來時，隻鞋卡住左，真係幾糗…

又另一回，又吊在半空中，只有右腳腳尖踏住傾斜的石面，兩手用指力爪住頭頂一條石罅，我分明冇力咁樣引體上升，左腳要向上移動，但找不到落腳點，教練指示路線，但我人短腳不夠長，換來另一指示是：用自己的方法，就只有一點，那一步，我會形容似係將全身的力集中在腳趾公外側一點，然後撐起個人令自己推進

幾番嘗試，見到自己隻腳攰到不由自主地震…

真係好攰，我會形容對手攰過拎住枝腳架行七一遊行全程，對腳都好攰，好似又行多左一次山

留下來，或者跟你走

18 January 2009

放假起身都不能放低工作，尋晚同台灣的某甲傾左陣，台灣人的看法，又了解多一點，中午，為新年故打電話，暫定了一些事情，諗起要食野他來電…
啱啱放工的他都未食飯，自動獻身陪我食飯，本來話買上來俾我食，後來又話近近地，葵涌邨算數
早幾日走左入優之良品碌，見到d馬仔隨便講左一句好耐都冇食過，他就趁我未到之前走左去超級市場買馬仔
一件小事，就是一番心意，一點窩心和一絲甜味

夜晚睇左《海角七號》，可能期望太高，景，好似仲可以再靚d，不過拍攝手法，每格菲林都好似一張相
故事，不深刻，沒有共鳴，亦唔係好明點解之前d人話咁好睇，似乎過譽了，但係d歌的確不錯，然而，仍記得一句對白，算是僅有的印象
留下來，或者跟你走

四分一甜味人生

17 January 2009

忽然有很深的感慨

昨晚差不多要睡的時候，仍希望追回一點時間，在網路上鍥而不捨，一時多，很累，蜷伏被窩中，正要倒頭大睡…
一個來電，撒野與迷糊之間，為了某甲，又跑了出去
某甲從口袋中拿出一件小雕刻，愛不釋手，掛起孩子握著波板糖的笑容
我們從哪一刻起遺失了率真？

從感覺種出感情，結出甜酸苦辣，原來，只有四分一是甜的
該喜還是該悲？
如果，如果人生有三分一時間用作睡覺，其實，其實有四分一時間是甜，應該不錯

失落感突然來襲

16 January 2009

呢幾日都夜返，真係冇乜心情blog…
tue放工返左屋企，原本都諗住頹食，不過他打來，提早左放工又未開飯，咁就近近地碌左落荃灣食頹野，我早到，間米線要等位，邊等位邊等他，他又真係好合時，來到就入得
食完碌左陣，純綷行下幫助消化，順便安排下「行程」

wed夜晚去上堂，好好彩抽中的攀岩課程理論堂，不過喺大球場老遠上…
上完碌番落cwb，食好耐冇食過的峰壽司
呢次真係要強力讉責﹗我order左碗麵豉湯，見個侍應從遠處拎過來，拎到我旁邊，唔知點解有不安的感覺，心諗佢會唔會倒瀉，佢真係成碗熱湯倒落我度，真係唔知叫好彩定唔好彩，倒左落我件褸度，好彩咪係有淥親囉，唔好彩就係件褸污糟晒
不過尋晚心情靚，如果唔係一定搞爆佢間野

今日心情認真馬馬，成日都好忟憎，唔開心，同埋有失落的感覺…

極地探險

13 January 2009

尋日去左行山，約左十點半喺鑽石山食早餐，鬧鐘響左但未想起身，他趁返工前morning call，再三叮囑我要帶帽、頸巾、手套、藥、暖包、朱古力，仲要著夠衫，結果出到去，俾人笑：我地而家唔係去雪地露營，我都覺得一身裝束似極地探險…
不過都係一句啦，帶多左最多都係拎，上到山帶唔夠想買都冇，我知他都係擔心我冷親
十二點左右，正式喺五塊田山腳底啟程
assignment：釣魚翁郊遊徑
全程6.6公里，全程需時三粒鐘
不過，一路行，一路影，結果行左五粒鐘先行到去終點大廟

之前一日同大o組爸組媽等打邊爐，傾開，有人話個釣魚翁山要爬上去，意思係四腳爬爬咁爬上去，當時仲唔係好信
行到咁上下，見到一座好尖的山，山上有一線禿路，我指住個山：嘩，嗰d路係咪人行架？
同行某甲：我地一陣要行上去
語氣認真得似講笑…
越行越近，真係要上嗰個山，行到山腳，個山幾乎成70度，條路唔係慢慢s形上，而係打直扮上去
吓？
結果半行半爬上到山頂，中途抖左抖，身形略胖的某乙要將行裝交俾某丙拎，上到山，好有大地在我腳下的感覺，feel so good﹗
不過…
落山的路喺另一邊不遠處，某丙去睇過，一路搖頭一路話好危險
落山，基本上係一邊sir一邊坐喺度向下移動，天氣乾燥，沙石特別鬆散，成日都踢左d石仔落山，企番喺度望一望，隔離就係懸崖峭壁，忽然有d畏高
結果慢慢地落到去，行到鞋都爛埋﹗
山下有一塊牌，寫住「懸崖危險，切勿前進」，落到來先話俾人知有鬼用咩…
行行下醒起某丁，因為原本都叫佢行山，但佢返工所以冇來，打俾佢，諗住叫佢放工去荃灣間小肥羊搵位打邊爐，但由於時間關係，佢已經返左屋企，咁就改地點，去佢屋企附近打邊爐
說時遲，那時快，朋友甲打來，話搞入伙邊爐，所以決定打完邊爐入去坐下，免得成日俾人話我好難約，結果坐到十一點幾，由朋友乙車我返歸
不過，連串活動搞到我錯過左晏晝kick off的唱k活動
下次丫，下次早d寫定invitation card﹗
呢幾日天氣凍，訓之前用風筒極凁吹暖張被，冬眠，勁好訓
so crazy，連續四日打邊爐，頭先終於食左成個月都冇食過的小肥羊﹗

我都以為自己去左台灣

10 January 2009

原來又好幾日冇留言…
冇事lu﹗tue放工同佢去食飯慶祝，揀左荃灣一間酒樓食小菜，近收工嘛…
忽然，wed同thu講左勁多普通話，尋日仲去左一個台灣旅遊展銷會，好似台灣美食博覽咁，好耐都冇去過d咁開心的assigmnent，之前仲去左一個早餐會，見到勁多行家，好耐都冇出過來同大家吹水
大會送左一盒太陽餅，拎左返公司同大家分享，有人問：邊個去左台灣？
哈哈，喺壇野嗰時又講晒普通話，又多台灣人，我都以為自己去左台灣，同行cam man都話忽然有衝動想去台灣旅行

今朝返去開左馬拉松式會議，晏晝放com off碌左返屋企，凍凍地，好好訓…
夜晚同他食飯，初初有諗過近近地食樓下的小肥牛，但又想食成個月未食過的小肥羊，咁就出去，但勁多人，等廿幾張枱，咁就梗係放棄，諗住去豬骨煲，但冇位，但連派飛都冇人招呼，都係決定去第二度
凍冰冰唔想周圍碌，無意中見到紫荊任食火鍋，咁就過去，不過，食到一肚氣，灰到爆﹗
同他食飯結果搞成咁，真係有d唔開心

遲到好過冇到

07 January 2009

尋晚去左燒野食，食食食，冇乜人的燒烤場，好有私人空間，感覺良好
燒完吹水傾計，我諗新界唔止再低一兩度囉，一離開個火少少，或者個火稍為冇咁旺就好凍

有d野不能掌握，但又不敢面對，講到不經意流下眼淚…
十二點幾散水，朋友甲陪我等車，望住幽暗而且車流疏落的公路，寒風來襲，打起冷陣…
我很討厭望住遠方，引頸以待等車，一架唔係，兩架唔係，第三架可能都唔係的感覺，等一陣就覺得好忟

係，真係等左好耐﹗
算啦，遲到好過冇到，哎…

i am available

05 January 2009

傾左一陣間電話，只覺得自己廢話連篇
全日無聊聊，睇左兩套戲，closer，中譯《誘心人》，仲有明珠台的Madagascar，《荒失失奇兵》第一集

將face book的status改做available，available呢個字可以俾人好多聯想
我得閒，所以i am available
我撐你，所以i am available
我可以俾你溝，所以i am available
msn status之一，i am available

自我感覺唔夠良好

04 January 2009

今日其實有d唔開心…

尋晚晏晝出左去傾野，傾完即係放工，他約左他傾男人野，問我去唔去，可能他只係多口問一句，都未必估得到我真係「踩場」
唔使猜猜猜、哼哼哼，吹水，講下無聊野，天馬行空，特別開心
十二點幾散水返歸，凍冰冰，有d酒意，訓得特別好

太多野諗，不知朝哪方走

晏晝約左小學同學飲茶，席間有人概歎係咪年紀大左，聚會都揀飲茶，我只奇怪約兩點半呢d時間，吊吊揈
飲完散水，難得去到沙田，行我最鍾意的宜家傢私，但激爆多人，破壞晒行宜家應有的輕鬆，結果喺一堆床單附近同朋友甲傾電話，諗落都幾搞笑
想換床褥，送貨來問題，點處置舊床褥？諗到呢度，卻步了…
見到紅色好靚的羅馬簾，特色擺設，減價籐籃，對話亦講到雜亂無章的家居，哎，都唔知會住多幾耐，冇動力去執靚佢
忽然諗番起嗰次同阿媽行深水步，由搭車講起，兩架車，佢會注意邊架平d，雖然最終冇因為邊架平邊架貴而搭某一架；買野，佢真係為需要，今日，一個人穿梭於熱鬧的商場裡，反思自己一直以來的消費模式，真有點不顧後果，想買就買，重災區係衫、鞋、扭蛋、毛公仔，結果造成今日的混亂家居
鞋，一對腳，我真係唔知自己有幾多對鞋
衫，adidas、波衫、大褸，心裡冇數
至於扭蛋，亦唔知有幾多套，幾多款有重覆，而毛公仔，即使係跳跳虎，亦都唔好問我有幾多隻…
我曾經話過，鍾意一樣野的人，你唔好問佢有幾多呢樣物品，因為佢唔會計較自己有幾多，只會不停添置，總之就係好多同好多
曾經希望有一日可以買野唔睇價錢，想買就買
不過其實，我而家都已經好幸福，想要的野基本上都可以得到，都唔算係斤斤計較咁買野
已經好一段時間，對買買買，漫無目的的行街失去興趣
我以前會嚷著去街，睇下有咩要買，有咩可以買，不過而家反而變得目標為本
成個商場，我只係想行屈人寺同supermarket，今日，忽然間覺得自己都唔係真係咁鍾意行街，忽然，諗起朋友甲的簡單生活，我應該開始邁向過簡單生活

一直都想重回四川，採訪也好，甚麼也好，一周年的故題仍在腦海之中…
尋晚講開，如果有機會組個團送d物資過去又好，咩都好，總之有咩要幫就幫一把
當日從四川回來，做完故仔後很想攞晒d大假補假去做義工，一位朋友勸止，佢話我搬又唔得抬又唔得，基本急救都唔識，普通話異常普通，可以幫到d咩？無謂製造麻煩，所以，念頭先打消左
所以，忽然間想學急救，最少，都叫識少少，想幫都有得幫(當然冇人要幫就最好啦﹗)
又想考輔警，對呢個社會，有些少貢獻，起碼，自我感覺良好一點

哎，好唔開心…
已經唔記得幾多年之前，喺show happy寫od，後來秘密日記無意中俾人發現了，感覺就好似喺彌敦道裸跑，狠狠地殺左呢個日記，喺另一個網站另闢天地，已好一段日子
不過，近日事情有變
唔知點解我的專屬diary link開唔到個網站，一開就link左去一個唔知咩人的blog，開番網頁的首頁，諗住login番，又係link番去嗰個唔知咩人的blog，喺yahoo同goggle search，所有用呢個網頁的人的網站，另包括網站附屬的forum、相簿，統統link晒去嗰個唔知咩人的blog
平日我習慣每一段時間就將d文章email一次俾自己存底，但最近兩篇因為未做呢個動作，消失了…
將心聲翻譯成新細明體，放下一件心事、一段回憶
不過，網站消失了，我會形容事件就好似碌左兩盒碌影帶，而家碌影帶唔見左，對一般人來講，係兩盒不相干的錄影帶，但對我來講，係人生的篇章，心路歷程的變化，十分珍貴
我忘記了寫了甚麼，忘記了交待了哪些思想和感覺，好像有幾天的自己也消失了
現在，患得患失…

一碗粥的啟示：小病是福

01 January 2009

有人話想睇《葉問》，我簡單地稱呼呢套野做打交戲，我話訂飛，有人猶豫，可能驚我唔鍾意睇掛，仲出現左一句奇異對白…
有人：都係唔好喇，我怕你睇完鍾意打功夫又話要去學…
吓？

經過彌敦道獅子銀行外的恆指電子報版，一個念頭忽然閃過，會唔會有行家影恆指收市，尤其是d報紙，最鐘意影d人作為水牌前景，咁啱撞正大跌市，攝左我兩個入鏡，仲要做埋蘋果頭版張開版相，都咪話唔賴野…

前晚訓唔著，可能日抖訓得太多啦，個腦太無聊冇做過野得閒得濟冇停過係咁諗野，成日叫自己唔好諗快d訓，不過個腦都係唔聽使
諗諗下肚餓，諗番成日食過d咩，粥，跟住諗起關粥事的事
再跟住，打左一個sms，內容如下：
「訓唔著，特別多野諗
又係腸胃炎，要食粥的日子，諗起你」
凌晨時分，冇期待回覆，只係即興想打個message，就send一個message，想被我諗起的人知我諗起佢，僅此而已
不過，晏晝諗番send sms呢件事，真係怪收件人太冇禮貌，夜馬馬唔回，朝早或晏晝都應該回一個訊息，問候一下送件人「有冇事？」或者「好番未？」
不過，全部都冇
回想起來，自上次瘦肉粥事件，原來已經五個月，我應該一早知道，最少應該喺五個月前知道呢個人唔識問候病人，唔識關心病人，上次又疴又燒，同事見你話食清淡d都問一聲啦，呢個人都冇問過我好番未，反而驚死你唔死，叫你去食黃油蟹

某次酒聚講起，他說只要我出聲要食粥，他至少發起在場五子，一人煲一款，煲五種唔同口味的粥俾我食
又諗番起嗰大碗來自新界大西北的瑤柱豬骨粥，真想偷笑﹗
一早都話小病是福啦，又看清人情世故多一點

今年皮褸大熱，有人次次去某B字頭的連鎖潮服店都睇嗰件皮褸，我知佢好好好鍾意，不過件褸原價四千蚊找番五蚊，咁x貴，雖然最近減價到二千七百幾，我仍然都係覺得唔值，我叫佢試，或者試完覺得唔襯，咪唔使恨囉，佢又唔肯，怕一試就愛不惜手，總之就對件褸念念不忘
有時行開連鎖店或特色小店，有人都指住各式和各色皮褸話襯我style，話我著皮褸會好睇，勁說叫我買番件，講到我心郁郁想睇下，不過幾千銀買件衫，一季著得幾多次？著得幾多季？
當大家以為事情正膠著的時候…
有人唔知喺邊度睇報紙，剪左張廣告出來，某皮衣店開倉，佢勁期待，仲一早拑定錢諗住實有斬獲，諗落都幾搞笑
平常心啦，開倉執旬野，真係睇彩數
結果，有人想掃貨掃唔到，諗住去觀戰的我意外覓得心頭好，旬﹗
有人形容我試嗰件衫嗰時，一見我個樣就知我好鍾意件衫，由心裡面流露出來，跟住發現件衫只係550蚊，有人話我對眼就好似發光咁
哈哈，有冇咁誇呀…

零八年的除夕，出去食左餐飯，冇countdown，避開人潮返左歸，好攰好眼訓，返到去即訓，日曆上橫跨一年，實際上應該係半個鐘，聽左個電話，繼續，訓
零九年，仲未諗到乜野願望
需要嗎？
我意思係，有需要在新一年許願嗎？許願望還是訂目標？目標，甚麼時候都可以訂，要等到新一年才肯訂下新目標，是躲懶還是找藉口，大家心裡有數
anyway，happy new year

來自新界大西北的瑤柱排骨粥來探病

31 December 2008

尋日渾身不自在，放左咁耐假返工真係好唔習慣，連腸胃都抗議，腸胃炎，我會形容係「捱到放工」，跟住去左睇醫生
講開睇醫生，我發覺呢幾年都冇一個醫生睇得好，而且又搬屋，d醫生都轉來轉去，病到九彩更加唔會碌去老遠搵細個睇開的屋邨醫生，況且又唔係特別睇得好…
不過尋晚嗰個醫生第一次睇佢，佢問症都好仔細，雖然診所好多人，但唔係求求其快d睇完收工嗰d，所以唔怪得咁多人睇佢，結果等左成粒鐘先睇完
腸胃炎，要食粥同埋飲多d水
睇完去食左碗粥，係呀，你冇睇錯，係我一個人去食左碗粥，病，唔通唔食野咩，所以一個人都要去食，病，唔通仲去打邊爐咩，所以唯有去食粥
另外，因為怕肚餓，買定一袋白麵包以備不時之需
因為要睇醫生，冇去試鞋
朋友甲話我著短boot會好睇，但朋友乙話短boot可能著得今季，過多排著會好娘，兩個意見都會仔細考慮﹗

病，尋晚返到去即刻沖涼，臨訓前sms老細請定病假，未夠十點就訓，訓到點幾肚餓餓醒左，都話袋白麵包有用啦﹗
食完，凍凍地，碌下碌下又訓過…

病假日，訓到中午時分，有來自新界大西北的瑤柱排骨粥來探病，喺我刷牙之際，來自新界大西北的瑤柱排骨粥已經煲翻熱，一大湯碗，冒著煙、熱辣辣的粥，就放喺梳化旁邊的枱仔上面，對於我來講真係超大碗，我食野咁慢，又怕食熱野，結果食左成個鐘先食完
刷牙嗰時仲聽到叮鈴單冷咁聲，以為打爛野，原來，咁都俾佢搵到全個食具盒裡面，唯一一支瓷匙羮
食完，又訓，哈哈哈﹗

病，都病得咁開心同幸福~

搵日去睇打交戲

29 December 2008

朋友甲失戀，不停呻悶，其實搵著我約人，真係搵錯人，我負責出席架嘛…
初初以為活動告吹，碌左去行街買衫，期間朋友乙力挽狂瀾，電話的來來往往發現朋友丙同我身處同一商場，集合再衝刺，趕在2030前離開，多快好省出絕招，同款唔同色買幾件
assignment=唱k
時間=2100
location=油麻地

竟然咁樣嘢嘢烏都召集左8男女出來，唱到兩點幾返歸，佢地繼續，可能放假訓得太多，亦習慣左三四點先訓，鬼打咁精神…
個個都話要睇打交戲，咁搵日去睇啦﹗

佢冇講，我冇問

28 December 2008

丫，有d野唔知係咪整定，尋日明明講到戲伴有傢私送來，睇僵屍戲的事諗住要擇過第二日，頭先未起身，佢打來，又話不如去睇戲，睇完先返去等傢私，咁咪即刻上網check下幾點有飛，下一場係1520，但我又未食飯，好似趕左d，就諗住食個飯，行一陣就算，去到葵芳，佢都係覺得應該睇戲，咁就買左飛，因為我話想睇的僵屍戲
well…
如果未睇的話，算罷啦，當佢係僵屍戲，佢真係突破晒d僵屍戲，絕對冇血淋淋嗰d殺人吸血場面，so？僵屍的舖敍意義何在？當佢係愛情片，男女主角嗰段所謂，情，真係…
冇feel囉﹗
我覺得用朋友甲同朋友乙的愛情故事做藍本，一定會好睇好多囉
anyway，thx佢同我睇僵屍戲

睇完再行左陣，冇deadline冇趕住走，佢冇講，我冇問，行完食烏冬，或者佢已經唔理屋企件傢私lu
跟住去左食左好味的sukiyaki，特別註明唔係吉野家嗰d，因為有人食過之後呻笨，猛烈批評該店加價又減料，成鍋都係淋吱吱的烏冬+大白飯一碗，以為d客係傻的喪隊烏冬白飯，食飽就唔記得d牛肉

事隔數天，朋友甲msn過來，it's over
最近呢兩個愛情故事，都係certified告終，怒氣沖沖仲諗住將原本諗住送俾她的頸鍊掉左佢，傷心傷身傷財，多無謂

唔知點解，眼眉調
當佢眼眉時，我輕描淡寫咁話佢唔夠訓，眼攰，冷科學地分析，可能係肌肉不自主抽搐
佢見到鴻福堂，咩都唔理一枝箭衝入去，以為買d咩咁緊要，原來係去濕茶，既然自嘲話又咸又濕，要去減d咸濕，咁大條道理，枝涼茶抵請啦，哈哈

手語3G

27 December 2008

有冇玩過手語3G?!
哈哈，有一日你會明我講緊乜

竟然，俾我搵到my friend tigger and pooh的網上版，雖然係國語版，但都好得意，今日成日基本上都係黐住個電腦不停煲呢套3D動畫
如果有興趣，又唔介意係國語，可以去呢個網站睇下http://space.tv.cctv.com/act/platform/view/page/composePage.jsp?pageId=PAGE1216798657093676

24號，平安夜，攞左年假，清假，訓到黃斯八晏，出去食左餐飯，好耐都冇食過咖喱，而咖喱最好的朋友就係薯仔，淨係食薯仔都食飽晒…
冇特別request要搞party，如果想出席party都有著落，有d朋友都問去唔去某個party咁啦，但係唔知係咪呢兩年玩厭左呢，只想去private party，唔係好想豪飲亦唔想同人迫，又唔想有陌生人，況且想去玩幾時都可以，做呢行個個彈性假期，call局唔使擇日，聖誕作為去玩的藉口，呢個意義，對我來講已經消失
不過，作為假期，當然無任歡迎﹗
尋日，聖誕節正日，大半日時間都係訓覺，後來…
總之過得開開心心啦﹗

今日喺屋企hea，假期，得番兩日
原訂聽日去睇僵屍戲，不過行程有變，戲伴要留喺屋企等傢私送來，改期，聽日無啦啦無聊聊…

my friends tigger and pooh

24 December 2008

上個？再上個星期六？晨吉咁早收到一個電話，morning call，朋友甲叫我起身開電視睇小熊維尼，嗰刻當然冇咁做啦，頭先無意中記番起呢件事，喺公司部超級錄影機開番來睇，原來係全新一輯3D小熊維尼動畫，超級拯救隊，好得意呀﹗

yes, it's complicated!

23 December 2008

好想睇彊屍戲，不過應該唔會聖誕節睇，安排一下吧…

尋晚出左去飲野，結果，唔夠訓，痱滋惡化，激痛
唔記得講開d乜野，講到配音，我又攞番一個搞笑經歷出來講，大家討論到興高采烈，每次都可以帶來無比歡笑，萬試萬靈，哈哈﹗

朋友甲身處零度以下的青島，哎，佢就好啦，可以過一個白色聖誕，同埋青島本來係我今次大假的目標外遊地點，做晒research，不過，冇去就冇去啦
另一個research的目標係哈爾濱，結果，都係冇去，頭先睇報紙，發現廿蚊可以換購黑龍江的旅遊書，放工即刻碌左去荃灣地鐵站，換左，讓眼睛去旅行

最近聽左兩個朋友的愛情故事，分析各種可能性…
facebook上的relationship status，有single，有in a relationship，有engaged，有married，有in an open relationship，不能分類時仲可以揀it's complicated
yes, it's complicated!

令我收歛任性的一個人

22 December 2008

前晚，正打算訓的時候，朋友甲msn過來話要傾心事，一傾，傾左傾左幾個鐘，嗰晚五點幾先點先訓，結果，第二日咪冬眠囉
尋晚訓唔著，兩點幾彈上床，碌來碌去，典床典蓆，明明講左早抖，他忽然來電…
原來，他恰左陣，乍醒左都訓唔著，傾左一陣
結果，訓覺時間完全被擾亂，晏晝兩點幾起身，食左少少野，又想訓，繼續冬眠，到五點幾成六點先起身換衫返屋企做冬
今年壓力大減，唔使再食幾餐做冬飯、團年飯、開年飯，曾經，真係有苦說不出…
食完原本諗住入新界大西北搵佢，等車的時候喺車站旁邊的7仔望左兩眼，曾經是我們回憶的yellow tail紅酒，閃過一個念頭…
其實今日係佢正日生日，今日過冬，我又知佢呢幾日事忙，所以提前同佢慶祝，但係頭先真係好想見佢，生日都唔見一面，總係覺得怪怪，諗住食完飯，老遠都碌入大西北搵佢，見到枝紅酒，就想俾d驚喜佢，咁就去左超市，正猶疑應該揀提拉米素蛋糕定係朱古力黑森林蛋糕，腦海裡仲盤算揀完蛋糕就要去攞蠟燭仔、膠叉同紅酒，好讓他有一個意外驚喜
不過…
說時遲，那時快，電話響起來，佢打來，佢忙緊的事仲忙緊，見面，應該沒可能，見唔到，我由躊躇滿志的喜悅掉進深淵…
蛋糕，放下，低下頭，向巴士站邁進，快步走，回家去…
前往車站的路途很短，卻很漫長，等車的時間很短，卻得難熬，我的淚不由自主地掉下來
不過，沒有辦法，不可以這樣任性，這一回，要學懂接受和忍耐，要讓佢覺得我懂事，才最重要
返到屋企hea左陣，差唔多十二點朋友乙打來，尖沙咀飲野，反正冬眠左兩日，喺屋企都訓唔著，出去吹陣水，未嘗不可，一點前赴約
原來他們已經坐左一段時間
full pint of hoegaarden x 2，原來，他有心事…
專屬的lady's night，thx﹗

不過，痱滋仍很痛，希望有人呵番，諗起一首歌：講一聲凍凍你會和我抱擁，嘩一聲痛痛你會長開我的笑容…

我的零八大事回顧

21 December 2008

他：表面唔重要，在心中咪得囉…
睇完個sms，忽然有d眼濕濕
搞邊科？

2008年只剩十日，假期亦臨近結束，是時候大事回顧

戀事方面，今年有三個男人在身邊出現
一個共處八年，我覺得他不能照顧我，回頭想，也不是一段稱得上互相扶持的關係，一件事，契機還是導火線，不曉得，總之大家到此為止
某周末沒有外出，待在家中悶得發瘋，如果他在身邊就好了，念頭一閃即逝，理性告訴我，不要因為怕悶而走回頭路，解悶的玩意有很多，重點在於結構性根本問題沒有解決，機會不會無盡，無謂浪費時間

兩個無聊的人，很容易走在一起
剛開始的時候有很多探索面，不過他飄飄忽忽，我也沒有多走一步，事忙，又有一些言語的誤會，就這樣算了
也沒有甚麼特別深刻

旁人總覺得他對我特別好，我倆也確實很投緣，無聊事、大道理，無所不談
我曾經跟他說，他的出現，好像找到另一個自己
有時候想，命運讓我跟他擠在同一列車上，最初，我坐在窗邊看外面的風光，他站在一旁看相同的風光，有人上車，有人下車，身旁的位置空了出來，機緣巧合，他坐在我的旁邊，從外面的風光聊起…
他曾經跟我說，早有預感會跟我在一起
再加上一些特別經歷與回憶，事情，應該仍有下文…

外遊方面，年初去過東京吃吃吃和夾公仔，三月去台灣看大選，被電視直播揭發身處綠營競選總部，七月，海南島之旅惹得一個腸胃炎和一肚子氣

工作方面，參與了好幾個大project，零八選舉年，台灣大選和立法會選舉都成為工作重點，因此在寶島上南北穿梭十天，另外還有突發的五一二四川地震採訪，有了新體會

我和他都是束縛不來的人馬座

20 December 2008

早幾晚訓得唔好，連續咁多晚冇覺好訓，預左尋晚會訓得好，為免俾人嘈醒，就梗係閂電話訓覺啦
兩點開番電話，他即刻打來，他投訴話我唔開電話，問我係咪避開他，又點會呢，我知他都係講笑啫…
本來book左黃埔x屋聽晚同同樣都係人馬座的他慶祝生日，但他事忙，改今晚食，又要安排地方，趕左d囉，後來揀左葵芳間A1，他提議的，即管打去，都仲book到位喎，就敲定食自助餐
先喺我屋企會合，吹左一陣水，化左個簡妝，六點半先施施然碌過去，經過巴士站有車就上左車，初初諗住如果要等車或者搭唔到埋站班車就行過去
間餐廳超級開揚，如果識的人經過一定見到，隔離枱都係d奇奇怪怪的人，左邊兩個女人，成日話唔食邊樣唔抵，食邊樣蝕；右邊一對男女，不停喪食，冇停過，仲要碟碟都係飽肚野，真係佩服
一係十年都唔食一次buffet，一個月內竟然食左兩次，兩次都係為生日而食，真奇怪

呢個假期，過左兩個重要的生日，食左兩餐重要的生日飯，所以一早將呢個假期命名為生日假期，的確點題貼切﹗

食完行左陣，越行他就越冇嚟精神，食野時都好地地，問佢咩事係咪攰係咪唔舒服又話唔係，走嗰時幫他搵車搭，後來他決定喺葵興地鐵站搭嗰架車，咁就一齊行過去，去到地鐵站他問我搭咩車返去，既然喺地鐵站就梗係行返去啦，咁他再陪我行返去，我就陪他等埋車先上去

他話我有一種香味，聞到成個醒神晒，其實嗰幾次係我咁啱搽左某品牌的香水，他話好鍾意呢種香味
well…
有一次同他去飲野，他話好開心，因為之前嗰晚屋企換左沐浴露，無意中發現屋企有我的香味，甚有驚喜
咁梗係問他係咩沐浴露啦，如果係咁正，我都要即刻去入貨
尋晚突然諗番起呢件事，突登去搵呢隻沐浴露，幫枝野開封時滿有期待，不過，d味有好大偏差囉，咁會唔會沖涼時遇到熱水有唔同化學作用d味又唔同呢？雖然，理論上應該未至於咁神奇，但都要試一試，突登轉用新沐浴露，但係…
強差人意呀﹗

頭先拎左兩種香味同他對質，他仍然堅持兩種味好似，真係吹漲…

多謝你的關心+擔心

19 December 2008

太好了，我報名嗰個攀岩課程被取錄左
不過之前同佢講過報名呢件事，因為個course係康文署資助課程，太多人的話要抽籤，佢竟然話希望我抽唔到
吓？
佢話危險呀，口吻十足阿媽，又話呢家野學識左就心雄，越玩越危險，等於玩命；又話攀石要用d指力爪住d石罅，笑我隻手仔咁細，成隻小朋友手，冇力
點呀？我而家只係上一級課程，即係bb班，要上理論堂又要實習，又有教練跟，有咩事佢仲驚過你啦，之後要再上好多堂、玩一段時間，攞埋一堆沙紙先可以自己攞架餐去爬山崖架…
anyway，多謝你關心+擔心我的安危

他又再殺我一個措手不及

18 December 2008

本來已經碌左上床，仲用風筒吹暖左張被準備訓，但個腦不停咁諗野，攬住虎仔叫自己放鬆，但都係控制唔到，過左好一陣，都係決定起身，開電腦，將大腦活動放在部落格

星期六日過後，又再出街碌，頭先起身先喺屋企整左blueberry muffin當係中午餐+下午茶，然後出左旺角，諗住喺約會前行一陣，買聖誕禮物
但他又再殺我一個措手不及，既然他到左，就去會合他，反正禮物幾時買都得
一個向南走，一個向北走，最後，我和他在窩打老道上海街交界，果欄外相遇，沿著上海街，睇嗰d砂煲冷餐，幾得意，無意中俾我發現我買開嗰款muffin紙杯十蚊有一大筒，老闆娘話有50隻，我平時買一pack都係十蚊，但得十個囉，呢個世界有人可以謀取咁大的暴利，竟然，我係俾人謀嗰個…
晚飯前散步廟街，今日的目標係煲仔飯，分別揀左臘腸滑雞煲、牛肉排骨煲、炒蜆同蠔仔餅，但係大失所望，他的牛肉排骨煲燶底，我個臘腸滑雞煲就冇飯焦，炒蜆好似食沙咁，蠔仔餅食炸粉，灰到爆﹗
食完周圍行，繼續闖蕩廟街，再去左裕華同永安，係呀，我冇講錯，係國貨公司裕華，同埋師奶百貨公司永安
我話他好似阿伯，又笑他第日會好似廟街d阿伯咁，圍埋一齊睇熱鬧，睇人揀野、搭爹，幫d檔口充撐場面
他：第日退左休06-16喺呢個公園hea
我：點解係收16？
他：因為18要訓覺…
我：點解18要訓覺？
他：因為第二朝又要開06，呢個公園
哈哈哈~
後來，他推說平日見得太多潮物，睇下d舊野、娘野調劑下

另外，令我訓唔著的原因，就係臨近年尾，又係大事回顧的時候，今年特別事多，可以分好幾個主題來回顧一番
雖然唔係好鍾意古x基，但林夕幫佢填嗰首《愛得太遲》，語重心長，有空，大家聽聽吧

我跟他，曾經歷生死

17 December 2008

我跟他，曾經歷生死
死神來訪一刻，我們沒有手牽手，沒有背靠背，只是瞌著雙眼；死神告別一剎，我們沒有相擁，沒有流淚，仍是瞌著雙眼
命運讓我倆遇上，緊扣在一起，甚至令兩個生命連成一線

待續…

做我的決定

16 December 2008

曾經有諗過閂電話，msn變成離線模式，從此消失兩個星期，結果冇咁做
亦都有諗過換另一個number，好像換另一個身份，只有幾個人可以得到呢個冧把，假期，就只聽呢幾個來電，不過覺得咁樣好多餘，真係想唔聽人電話，明明打來都可以唔聽

尋晚深夜，重播《十四歲的媽媽》第一集，第一次播時冇睇，一邊洗碗一邊睇
為甚麼，為甚麼未婚懷孕就有問題？為甚麼十四歲做媽媽就有問題？
為甚麼，為甚麼世間有很多所謂價值觀和道德標準？誰訂下對與錯的規條？為甚麼要依循它？

很無奈…

有時傾計講開，公司的規舉，簡單如extra day同com off的安排，社會的制度，複雜如普選，一個人不滿、不同意，一眾人也不滿、不同意，但都改變唔到所謂既成的事實，有人在制度下吃虧，有人順從制度，有人硬食制度，有人利用制度的漏洞攞著數
哎，一個咩世界？明知佢有問題都改變唔到…

早排為了她的事搵過朋友甲訴苦，現在重新檢視我自己，原來那件事沒有困擾我

曾經跟他討論過生仔的問題
如果，唔係有d錢，仲要為口奔馳，生出來要諗辦法養，又俾唔到d乜野佢；又或者就算有錢，忙得不可開交，根本冇時間，生出來俾錢等人湊，寵壞晒乞人憎；又或者原來自己身體唔好，明病暗病遺傳病，生出來一個藥煲要佢受苦…
何必？
生仔，諗到唔使諗，我又冇耐性又冇愛心，見到d細路就忟，想整喊佢多過想氹佢笑，見佢喊就想一巴聲埋去…
再者，見到她生完都成半年，仲未修到身，點先keep得番以前咁？
我：生個仔真係害一個女人一生﹗
他：咁生個女丫~
玩野呀？

哎，一世人，有幾多個決定真係自己心底裡的想法？
做d乜野，總會有人加把咀，俾意見…

冇覺好訓的假期

14 December 2008

剛好八天，假期過了一半
幾天以來沒有睡好，仍是很累，第八天，終於待在家中，想睡的時候就睡，想爬起床來就爬起來
中午，他的工作較預期中順利，更提早完成，相約吃下午茶，即是我的早午餐
炸雲吞x鮮蝦脆瓜餃x鳳爪排骨飯x馬拉糕x山竹牛肉=唔夠飽，再叫左煎蘿蔔糕同沙薑雞腳趾
食完野返屋企，訓，醒左陣，又訓…
尋日睇左醫生，但冇食藥，今日食藥，發現d藥一日食三次，每隔六個鐘食一次，三六一十八，但我發現我一日都冇十八個鐘頭活動，咁點算？

有人話：男人長情花心，女人絕情專一
你點睇？

刻意安排的偶遇

11 December 2008

下午，跟她在星巴克吃下午茶，不好咖啡的我，唯有選僅有的非咖啡類飲品，沒有太多選擇，挑了一杯碎朱古力忌廉，未吃午飯的我，唯有找點東西填肚，沒有太多選擇，挑了一件磨菇芝士饀餅
悠閒心情，她說我容光煥發

飲完四圍碌，一邊睇衫一邊吹水，朗豪坊、聯合、花園街
我話下期face其中一篇會寫「無線裁員，女記者花園街買平衫」，跟住配d相就係她喺花園街拎住d衫對住塊鏡拼，仲有張圖係放大左的價錢牌，59蚊，然後就cap左好多張她的做扒照，標返邊件衫喺花園街買，幾多錢
總之短短幾個鐘，傾左實在太多野，無聊聊，走左入屈xx研究condom，哈哈~

她走左之後繼續行左陣，既然他在旺角，後來都刻意安排左一次偶遇

因為，我喜歡

10 December 2008

他有一份文本需要整理，趁放假有空，兩口子在家裡，對著電腦埋頭苦幹…
完成了這件事，餓透了，累透了，一起去吃晚飯，最後選定打邊爐，因為，我喜歡
對我來說，電腦排版、打字這些工作都很沉悶，也很累人，他做校對時也流露出疲態，但完成後，看見他打電話跟朋友分享這件事時，他喜悅的神色由雙目溢出，一切，也是值得的

馬交精華遊

09 December 2008

生日天，只係訓左幾個鐘，唔係好想起身…
差唔多到最後一刻先confirm唔會留喺香港，生日旅行係馬交精華遊，因為言語上的誤會，買左一點九的船飛，入左閘佢吓一聲，問我做咩買搭九咁晏，嗰刻真係糗糗地，佢嚇我要等粒幾鐘，係咁笑我，不過後來坐左陣，上左一點的船
第一站去攞房，都唔知點解，只係一個porter隨行，都唔係帶左好多野啫，但個袋重爆，放低d野跟住去左一個叫三盞燈的地方，食佢極力推介的魚湯粉、緬甸撈麵，我就揀左個咖喱牛腩薄餅，share
食完去搵的士搭，截來截去都截唔到車，一個十字路口，四個角都截勻都mission fail，已經諗住去搭巴士，但又冇散子，正想去唱散子時佢見到一架的士，架車停喺我前面，我行過去開門，說時遲，那時快，一個阿伯亦都伸手出來，上到車，佢話我啱啱快阿伯一個馬鼻，笑我同阿伯爭的士，不過佢都補飛講番句話我咁做冇錯，哈哈
去左大三巴附近周圍錄，佢好想行嗰幾條買古董賣夜冷的街，但閂晒門，古古怪怪…
行行下見到幾個細路迎面行過來，一人拎住一個發泡膠杯，好奇望多兩眼，原來佢地食緊雪糕，唔覺唔覺行到去一檔家庭式士多，佢話就係嗰係頭先d細路食的椰子雪糕，所以買左一杯試試
其實最初對於佢只係用一個發泡膠杯同膠杯蓋cup住放喺雪櫃的雪糕冇咩好感，毫無賣相可言，我甚至諗食完會唔會肚痛，再加上杯雪糕又冇牌子，硬倔倔，已經冇晒期待，但食落真係好好食，好特別，連平時唔食雪糕的佢都食，真係好得
天氣凍，雪糕亦凍，硬倔倔的雪糕好耐都融唔到，冇變軟，所以每一口都要花點力氣去撩，但係力度又要就住就住，如果撩斷左枝匙羹就冇得食，一人一口，出奇地，咁又令到d雪糕又好食d

行到天黑，篤左串牛雜，跟住又諗住截的士，但都係截唔到車，結果搭巴士返酒店
返到房去厠所，點知…
塞左，係咁湧d水上來，雖然冇滿瀉，但壇野好滿，根本冇可能再去厠所，仲咕嚕咕嚕好似交響樂咁，真係唔知會唔會瀉，本來諗住換房，但間房唔係幾ok，同時間原本間房個厠所又整好，咪諗住唔換囉，但佢去完厠所又來料，無奈之下都係要換房
唔知點解，梗係覺得d野有d唔順利，差d差d咁，唔通連個天都唔鍾意我地來澳門？
攤抖左一陣，一人夾左一舊水喺酒店附屬的賭廳搏殺，結果，咪輸晒囉…
未肚餓，出左酒吧街飲酒，full pint of hoegaarden
酒同舖頭都ok，只係欠缺左d氣氛，所以決定轉場
周圍碌，但周圍都靜英英，我suggest去食野，結果返番去市中心，佢話想食魚皮爽，咁就去試下
嗰碟魚皮爽，其實叫涼伴魚皮，賣相核突到爆，好似d蛇仔，但係口感同味道真係一流，好食到震﹗
間野包伙食，員工們一人一兜去裝餸，唔知嗰盤係咩加薯仔，但個樣好似好好食，我多口問嗰兩個伙記，佢竟然叫我地去夾兩舊試下，咁我就派佢去來左兩舊，原來係燘燒餓，好好味
呢餐真係有驚喜
食飽都唔想再飲，由市中心散步返歸，都遠遠地，但都ok舒服，返到去睇tv，亞視播緊一套介紹日本av的資訊節目，女主持問：你由幾多歲開始發現自己鍾意做愛呢？
吓？

生日天翌日，唔想起身，但點半要交房冇辦法
check out左搭的士去星際食buffet lunch，噢，好飽…
未想返歸住，拎住d野又唔係好想周圍行，我話想搵個地方靚靚地，靜靜地可以hea下，咁就去左澳督府出面個人工湖個海濱公園

木板一塊接一塊，引領我們走到海心中央，我脫下鞋子，躺下來…
天空只有連綿不斷的藍，冬日陽光暖暖地灑在臉上，恬靜的海灣，一條龍舟沒有順著波浪流動，健兒們使勁地練習，點綴凝固了的畫面
很享受這一刻

喺附近再行左陣，買完野飲就搭車去碼頭返歸，五點船
唔知點解個海好大浪，佢同我都有d暈的感覺，好彩有包檸汁薑咬下，一路聽住歌分散注意力，後來訓著左，但突然間嘭一聲，架船chok左一下，引擎都停埋，佢同我都醒左，佢即刻捉住我，船上一陣嘩然，嗰刻淨係諗隻船究竟撞到d乜野？會唔會沉船？
用幾十字形容的過程，原本只係一兩秒之間的事…
跟住我地開始講笑，會唔會一落船幾個台楝晒機做live同扑咪，咁咪全香港都直播我地落船，全世界都知我地過澳門？
最後當然有驚無險啦，亦冇live事件

一起走過香港站與中環站之間的施華洛世奇水晶國度，閃閃光華映入眼簾

曾經好努力咁諗，究竟舊年生日做過咩，淨係記得喺尖沙咀某高級壽司店食晚飯，小師傅仲因為我生日突登分配一隻特大牡丹蝦俾我，其他真係忘記得一乾二淨，睇番個blog先知，原來係去左海洋公園玩
雖然行程偶有阻滯，但反而增加是次馬交精華遊的獨特程度，不會忘記今年生日

生日周

07 December 2008

星期六，慶幸突發故題並冇影響我太多，為期十六日的生日休假如期正式kick off
適逢天氣轉冷，是日冬眠
傍晚，豪華賓士接送，目的地係小欖某大型燒烤場，生日周活動mission no#2=bbq
他著我如果朋友喝了酒，一罐也好兩罐也好，就千祈千祈唔好坐佢地車，幾熟都係咁話，危險喎，又十分關心我會唔會玩到好夜，或者玩到斜晒，影響聽日的活動…
唔會，總之就唔會啦﹗
全日第一餐，再加上凍，圍住個火起勢燒，起勢食

他問我問題出喺邊，我話係結構性問題
哎，唔係唔想講，而係事情並唔係三言兩語講得完，或者咁講啦，係興趣、生活態度、價值觀各走極端，好複雜

正如生日蛋糕的事，雖然可能你覺得我係好無聊，但總之就係想要一個生日蛋糕啦，我講認真，有人當我信口雌黃
連續好幾年，生日蛋糕都係同朋友食，同同事食，其實個生日蛋糕食唔食都冇所謂架，只係一個咁親密的人都唔了解你，已經唔係咩心思，連講到出口的要求都做唔到，朋友們同事們都係自動自覺捧出生日蛋糕，係有冇heart的問題，重唔重視的問題，既然連朋友都不如，連同事都不如，點會唔心淡心死呢？
多謝你地今晚的堤拉米素生日蛋糕﹗

同他去過嗰間舖頭不下一次，次次都睇某一排d吊咀，他都醒水知我鍾意其中一個，所以啱啱早幾日預先收到嗰個吊咀做生日禮物
回想起來，咁多年都未試過喺佢手上收到一份咁樣的小禮物，得到的辯解係驚買左我唔鍾意，哎，而家問題就係要你用時間同心機去揀呀
我曾經好期待會佢會幫我搵到遺漏左的小熊維尼跳跳虎扭蛋，結果，一係我自己上網bid，一係行玩具舖搵番，甚至試過係同事幫我搵到，最worst係佢唱錢俾我喺扭蛋舖喪扭，哎，既然都係要俾咁多錢喪扭，佢預先扭左的心意同效果咪差好遠囉…

大事幫不上忙，小事添煩添亂，走到這一步，還有甚麼可說？
或者這樣說吧，喜歡一個人的時候，甚至將他的缺點看成優點；不喜歡一個人，即使眾人眼中的優點也會看成缺點
就是不喜歡，這樣說簡單一點嗎？

被問到愛情觀的問題，太虛無…
也許我先天存在缺憾，我不相信人與人之間長久的關係，走一段路，我就會問：以後跟這個人在一起？十年？二十年？三十年？我退縮，不希望這就是結局
朋友結婚，同事結婚，受訪者結婚的場合也出席了好幾趟，有人激動落淚，但從沒一刻勾起我對婚姻的憧憬，曾經有朋友、家人問我結婚的事，我總想逃避，我想有一天即使答應了結婚，我也極有可能是一個逃婚新娘

至於另一個問題，唔係唔答，唔係隱暪，而係真係唔知點答，我仲未諗到一條唔破壞我倆間默契的line to take

許諾

04 December 2008

晚上繼續小肥羊，沒有預料他回歸到那個話題上
他不斷問我知不知道，要我許諾
我只想笑

生日周，預先慶祝，我最喜歡打邊爐和bbq，ko mission no#1
一直都很想買一個吊咀，剛才，預先得到一份生日禮物

一個咕臣千五蚊

03 December 2008

2006年12月8日，我貼了一張相出來，好想得到一個三葉咕臣，當日冇將佢從原宿帶番來，一直耿耿於懷，遍尋不果，成為一個遺憾
早幾日收到一張邀請咭，京士頓街分舵裝修後重開，買滿千五蚊就送一個"limited edition adidas cushion"，憑咭買original仲可以有八折，好少可
本來尋晚放工去朝聖，但去食食飯冇啦，今日一定要去，點都要去，途中已經諗千五蚊買d咩，因為如果唔買限量特別版要買好多，但入秋以來我都冇入過貨，而且八折真係可遇不可求…
但如果冇晒個cushion點算？
新裝修，感覺好似細左，樓下放晒限量i trefoil hong kong的t恤，首先快速research一趟，收窄範圍，搵左幾個目標逐個試，好快揀左兩對鞋，跟住睇番一件衛衣，心目中想要黑色，但冇，紅色同白色，最終揀左紅色，因為以上貨品有折，最後揀多左頂帽湊夠數
sms向他報喜，我話「啱啱用左千五蚊買番兩年前的遺憾」
他覺得我瘋狂，覺得我傻，但得到呢個咕臣我真係好狠勁怒喪爆激開心
我買野不嬲都唔係好講理由，但今次呢個咕臣太特別了，就當係今年的生日禮物

我地之間好多無奈

02 December 2008

今朝真係二十個唔願意起身，結果咪懶床囉…
如果佢兩個唔係約我食飯，我會出銅鑼灣分舵，真係勁耐冇出過去朝聖，唔係收到封信都唔知而家買滿千五蚊可以得到一個限量版咕臣，咁就梗係要快d出手啦﹗
三個人，本來諗住去某間酒樓食小菜，係咁行，行行下唔對路，他叫住我兩個，好似行過龍，行番轉頭先發現間野…
搬左？
貼左張搬遷啟示出來，搬左去元朗，叫人請移玉步到元朗幫襯
吓？
跟住去左稻香，但勁少選擇…
是但啦，純粹三丁友聚首一堂講下笑講下是非

返屋企途中喺電話討論左一陣，唔知點解，我唔係嬲佢，只係覺得我地之間好多無奈，我亦唔想好任性、一d都唔體諒咁堅持，因為我知道我堅持佢會就我，但佢會唔開心，又或者佢勉強迎合我，結果唔係我想像咁樣，大家都唔開心，所以即使痛苦d，都要事前搵到一個共識，但未搵到，真係好痛苦，嗰刻真係喊左出來，但我估佢唔知
啱啱返到屋企，相熟的他來電，但電話另一端係只有一面之緣的他，叫我出去尖沙咀唱k，真係啱啱返到去，同埋今日勁殘，所以冇出喇，下次先啦

一年一度的生日休假將會於本周六kick off
早兩日執屋，將各地收集得來的紀念品、手信收好，無聊，影左幾張相

不如玩個配對遊戲丫，name番以上23樣野
撒哈拉沙漠的沙 / 西藏綠松石 / 加拿大銀匙 / 泰啤罐人手製篤篤模型 / 龍貓磁石 / 香格里拉牦牛骨電話繩 / 麗江東巴文風鈴 / 三藩市玻璃彩繪 / 海南島貝殼 / 茶馬古道馬鈴 / 中式圖章 / 日本祈福公仔 / 曼谷跳蚤市場火柴 / 周莊水鄉繡花鞋 / 首爾賭場籌碼匙扣 / 麗江東巴文化妝袋 / 鹽井鹽結晶 / 哥斯達黎加木繪 / 富士山火山石 / 香格里拉古城繡花鞋

呷醋又唔認…

30 November 2008

星期六，預早將電話較做震機模式，全情投入冬眠狀態

他晏晝打來，又話苦悶又話煩惱，重點係話想去飲野，朋友有難，當然撐到底﹗
晚上，先返屋企食個飯，特別order要食臘腸，食左一大碗飯，跟住出去九龍塘join番他，吹水講笑，企喺沙福道街頭，寒風來襲，衣衫單薄的他雙手插袋，也要為我擋風，thx﹗
幾條友無聊聊，渣左架車落佐敦食糖水，因為架車，惹來勁多途人注視，well，我唔會怪佢地大驚小怪…
午夜過後，駱克道謝斐道一帶遊走，最後揀左一間modern feel的bar坐低，都係貪佢有梳化，開左枝紅酒，慢慢飲，密密傾
三點半左右，間野打烊轉場，再戰蘭桂坊，一杯hoegaarden，一籃子薯條，配以芥辣和茄汁

一條薯條，未沾上任何調味醬時，可以隨便幻想配上茄汁如何酸甜交錯，配上芝士醬如何香口惹味，配上芥辣如何複雜刺激…
不過，當決定招惹哪一種調味醬，則沒有回頭的餘地，也別奢望一下子投進兩種味道的懷抱，試想沾染了茄汁的薯條，栽進芥辣醬中，不能混和的淡黃色與紅色，既破壞了每種醬料本身的獨特性，也令彼此變得不倫不類
一條薯條，只屬於一種味道，再嚐另一種味道，該爪來另一條薯條吧
如果，只吃剩一條薯條，該安份地選定一種味道

五點幾，蘭桂坊d酒吧都閂門，他還意猶未盡，再戰赫德道，一杯stella，一輪看不見的初升旭日，配以馬路邊數隻鴿子
七點幾，落左旺角搵酒樓飲早茶，食飽大家都謝晒…
返到去8點半，訓得一陣間又碌出去拍野，勁唔想起身
但起身就覺得賴野，勁流鼻水，都唔知係咪尋晚吹親，定係接觸到d病患者惹到d菌，總之就唔舒服啦，把聲仲要沙沙地，又有d喉嚨痛、頭痛同肌肉痛

返到樓下，佢打來，為左嗰件事傾左一陣，所以冇即刻碌上去
我問佢係咪呷醋，佢唔認，我問佢係咪介意，佢支吾以對，只係話控制唔到
我聽得出佢的無奈
我同佢講，如果佢表個態，成件事都容易處理好多，不過佢話自己冇資格要求d乜野
哎，冤孽…

眼淚不由自主地掉下來

29 November 2008

昨天晚上再戰小肥羊，再被俘虜成為小肥人，閒逛，後來去喝東西
離開，二時多…

今日冷了許多，睡前有點事情要辦，所以只睡了四小時，以為賴床病會發作，出奇地，今日精神還可以
下午到中大跟professer聊聊天，早了一點，在火車站外的小廣場坐了一會兒，忽然覺得自己太營疫
一對小兄妹圍著草地跑圈，互相追逐，自得其樂，人大了，反而自尋煩惱，不易滿足，臉上罕有掛上笑臉，喉嚨難以擠出笑聲
為甚麼？
冷風來襲，從衣領滲進肌膚，感到絲絲寒意，但很享受這種思考的感覺，以抽離一點的角度檢視自己

他著我不必自責，但想到事情跟我的牽連，眼淚不由自主地掉下來

今天，終日看著電話，這種感覺得差
但沒有辦法，我不想為他增添麻煩，不過我肯定，有事，有空，他一定會找我

進入最後十天倒數﹗

27 November 2008

進入最後十天倒數﹗

很開心，從心底裡笑出來
只因，只因他說我喜歡打邊爐，明天晚上跟我打邊爐去

今年沒有預先order的生日禮物，但跟往年一樣，期待一個生日蛋糕

心情好靚的廿四小時

25 November 2008

尋晚bbq，真係好鍾意燒野食，七個半鐘，喪燒…
集合時間：晚上七點
集合地點：兆康西鐵站
朋友甲笑我：你識唔識搭西鐵呀？去兆康搭屯門方向呀，唔好搭錯南昌方向呀
吓？
朋友甲本來想反口，要我自到燒烤場，搭極奇複雜的輕鐵，我要佢一定一定要按原訂計劃喺西鐵站接我，搭左一個站輕鐵，去到目的地，個場，好一個爛gag名：炭世界
五男女，輪流科水買啤酒，不過都唔係飲左好多，喪吹水
燒到兩點幾散水，夜馬馬，靜英英，好彩散水時有人陪我搭車，不過我諗就算日抖喺度碌都會蕩失路
哈哈，又一次西北大開發之旅

周一放假，補假又少一日，突發想放假的機會又少一次…
頭先食飯時講錯野，咬到個咀唇，哎，過兩日可能會生出大痱滋
頭先仲做左一樣糗野，就係走落街買野，買完上返去發現竟然唔記帶鎖匙，真係好彩有帶電話，有得求救…
喺樓下碌左成九個字，搵朋友仔傾下電話打發時間

雖然唔係做左d咩好特別的事，但尋日晏晝放工等燒野食嗰一刻開始，一路心情好靚好開心

謝謝你特意從大西北跑出來

22 November 2008

今天的心情又再很複雜

早上，放假的你來電，閒聊半小時，說說笑，笑笑說
後來還特意從大西北跑出來，突發跟我吃一頓午餐
哎，早知你無聊聊打發午後的時間，反正沒事幹，應該拿半天com off陪你…

下午，又為了那件事打電話給他，接駁鈴聲是《三十日》
心情隨著一字一詞往下沉，想哭的感覺忽然來襲
我，穿鑿附會；我，對號入座
我甚至一廂情願地認為他挑這首歌，自把自為地認定他憑歌訴說跟我分開這段日子的心情和對我的思念
突然代入了《三十日》歌譜中的主人翁，鼻很酸，心很痛
他是不是這樣？
不過，以我認識的他，真沒那麼多情和浪漫，憑歌寄意…
還是自己想得太多

今天晚上原本有一場約會，是昨天在msn上決定的，這樣算是不了了之嗎？

茲收到金字塔下的夕陽

20 November 2008

哎，事情有變…
原計劃的生日旅行，告吹了，最初為此耿耿於懷，後來機緣巧恰下，又有新安排，並已經計劃妥當，不過，最近特別多事，看來，旅行真的要告吹，再次失望的感覺得差﹗

是日補假，這是昨晚的突發決定，因為今天有些要事，非辦不可
晚上，吃一份自製三文治，並將夏天收起，換上冬天

借你肩膊讓你倚傍

18 November 2008

昨今兩天有很複雜的感覺，趁感覺仍新鮮，娓娓道來

我想起他，甚至惱他
這是一段八年情，巧恰地，離與合的紀念日都安排在八年前後的同一天
憶不起一句動人的說話，腦海裡檢回數段吵得激烈的片段
翻箱倒篋，在我的文件中找到六篇文章，原來，那時候，愛的感覺是這樣的，原來，他曾經說：『這個世界不會剩下你一人，至少，你還有我，你要相信我，我一定不會撇下你。』
原來，我已經忘記了

幸福悄悄地走到身旁，也會悄悄地離開
不是珍惜與不珍惜的問題，當配額耗盡，沒有一方給汽車加油，最遠也只能走到這裡

喔噢，一則短訊將我從沉思裡揪出來
「…醫生說機會很微，應該會離開。」我為一個素未謀面的她，落下一滴眼淚

死神悄悄地走到身邊，準備悄悄地將生命帶走
不是堅強與不堅強的問題，油盡燈枯，科技已經將人類的生命拉長再拉長，與其以科技延續在生者的痛苦，不如放手

爭取僅餘下的時間，伴在她左右吧﹗
如果你打算大哭一場，借你肩膊讓你倚傍

心頭湧起痛苦的感覺

17 November 2008

她問我，應不應該給他一個機會
這個問題叫我怎樣回答？
當日，她選擇抽身離去，說他這樣不好，那樣不好，我問她，如果他改掉這樣，改掉那樣，你還會給他機會嗎？我著她仔細想，她究竟是不喜歡他，還是不喜歡這樣和那樣
她猶豫，沒有回答

今天，她再將這個話題搬出來
其實她心裡已經有一個決定，她說若生日那天他找她，就給他機會，她只是尋求我的認同，甚至，希望我代她傳話吧

逛街回來，計劃晚餐，選擇一是千層粉，選擇二是三文治
你：唔好搞咁多野，三文治啦
我：哈，你錯喇，三文治仲多野搞，洗菜切蕃茄煎蛋炒咸牛肉，好多野搞又好多野洗，反而焗千層粉洗乾淨晒d野煮個汁，一層層鋪左佢焗完就食得
你：咁你幾時煮俾我食啫？
吓？

感情，也許最無情
那一點點的感覺，握不住，爪不穩，虛無縹緲，說來便來，說走便走，不留情面

說到這裡，忽然，嗚咽哽候，心頭湧起痛苦的感覺

心痛

16 November 2008

他生病了，陪他看醫生，凝視他呆滯的模樣，生出心痛的感覺
兩個曾經肩並肩的人，因為一句說話，越走越遠；兩顆曾經毫不相干的心，因為一點感覺，越貼越近
世事總有很多事情無法解釋，無法掌握

你口中說看開了，事實並不是如此
你骨子裡很害怕失去，這是我的感應告訴我

下周天氣轉冷，真開心﹗

給他最大的支持和鼓勵

14 November 2008

她的事情其實跟我一點關係也沒有，但他願意告訴我，我樂意傾聽

我發現，或者該說我再次肯定，我是一個不懂關心別人的人，或者該說，我是一個不懂表達關懷的人，只著他多休息，養足精神照顧她
或許默默地守候，不要他操心，是給他最大的支持和鼓勵

送上祝福

13 November 2008

工作已全速在正軌上前進，今天，可以晚一點回
午後起來，發現電話有一個未讀訊息，原來，他今晨四時許傳來短訊，希望不是太遲，送一個回覆
他回電，說趕著去醫院
下午，仍輕鬆地說說笑，笑笑說
晚上，他再來電，語氣變得極沉重…

生命從來都是既脆弱，又頑強

我想，他沒有再打來，應該是好消息
謹此送上祝福

朋友甲自動獻身事件

12 November 2008

坐立不安，囉囉攣的感覺，很差﹗

下午，碰見他
他：我好番喇，可以燒野食﹗
始於數月前的約定，因為他生病了，一拖再拖，如今終於可以付諸實行了
我：好野，幾時燒？
他：問下他先
他從房間把他揪出來，經極速協商，一致認同將我的故後BBQ活動訂於本月二十三日，召集各路人馬，行動﹗

昨天，哎，又打來…
尋晚同朋友甲討論過呢件事，朋友甲忍唔住，一枝藥膏使唔使講十年呀
頭先朋友甲問：藥膏男有冇打俾你
吓？
繼電車男、活塞男之後，岩蠶異相兵團以後多左個藥膏男
哎…
朋友甲問，使唔使借佢過橋，如果咁啱得咁橋藥膏男打來，朋友甲話代我聽電話
我問：你用咩身分幫我聽電話呀？難道你認係我條仔…
哈哈哈

繼續剪片夜，晚餐選定麥記，嚐嚐和風芥末雙層魚柳包，特別註明要多醬，回去前在書局逛一圈，又發現了一本書，書目是《四川大地震》中華書局出品，跟《唐山大地震》放在一起，封面設計同出一轍，似乎要告訴人家這是一系列叢書
哎，為甚麼會出現「大地震系列」？
真希望這套書兩本止步

靜靜地守候著我

10 November 2008

人就是善忘，教訓，過一段時間就忘記了
早幾天，因為工作無了期，也因為沒有他相伴，我形容自己很慘
因為四川所見所聞，數月前，我戒掉「慘」這個形容詞
忽然，憶起這件事，警惕自己不要輕易言慘

最近香港新聞教育基金出版了《四川地震‧香港記者反思錄》，在公司的茶水間看過宣傳海報，剛才在書局閒逛，沒有特定目標，也沒有意識這本書靜靜地守候著我，翻一翻，先睹為快，著力找一本比較完好的，在收銀台前排隊
心肝曾經被掏空，差不多每次看見關於四川地震的書也不能忍手，像找到一小片砌圖

讀這本書時，不斷憶起曾經在部落格的留言，剛才重讀五月的文章，著自己不要忘記血的教訓，不要輕言放棄，更不要揹著遺憾的擔子

5月13日 立即就要啟程，前路未明，細節待議，充滿未知之數
5月20日 你相信奇蹟嗎？
5月21日 還可以為裂了心肝的他和她做些甚麼？
5月23日 讀自己的稿件，眼淚掉下來了
5月26日 我為你們的堅強和勇敢致萬二分敬意，也希望你們悲傷過後積極生活
5月27日 我說：他有一句說話我感到很深刻，就是他說死一個也足夠我的心裂開
當時重覆這番說話，我也很激動，我的心也快裂開
5月28日 每回問到她的兒子，就像向她心裡刺一刀，喚起她的哀痛和對兒子的思念，我，確實有點於心不忍，但卻沒有辦法，我只能以眼淚告訴她我的矛盾和無奈
5月29日 我們這一代將不會忘記5‧12這個日子

用甚麼身份現身？

09 November 2008

尋晚深夜兩點九喺公司散水，的士，返去即刻沖涼，三點半訓
冇特別較鬧鐘，訓醒左，冇留意時間，再攤抖左一陣，起身時係十一點半
跟住返去繼續寫稿，同part 2的下半部分搏鬥

四點，沒有計劃下突發即興同他去食下午茶，不想離開，不想回去，想東想西，總之就極度心散啦
返到去差唔多六點，繼續寫左陣
他的神秘聯誼活動最後揭盅，原來係燒野食，仲要send張相來引我，好衰呀﹗
我話想食雞翼，其實都只係講下…
他轉個頭打來，問我過唔過來
吓？
結果，奇奇怪怪地，又不知帶著甚麼身份，背負甚麼目光，現身這場bbq活動，地點是小欖某海邊燒烤場
後來他行開左，遙遠拎住隻豬仔公仔養下養下
原來喺我地個爐的十一點方向有幾部夾公仔機，經過他一輪血拼，夾唔到虎仔，唯有夾隻豬仔，他說夾返來比用錢買有誠意

燒烤場超級大風，好凍…
十一點左右散水，喺門口搭小巴走，絕大部分時間都係時速一百，加上急速入彎，車廂擺動，又有d離心力，令人好不安，高速下眼睛產生幻覺，地下的虛線變成實線，窗外景象模糊，落車，終於舒一口氣﹗
返到去，繼續寫稿

為一天注入歡笑能量

08 ember 2008

這幾天寫稿，進入最後衝刺階段…
不過換在公司寫稿，進度奇慢，還是喜歡在家閉關煉丹的感覺，趕快煉完仙丹，趕快做自己的事，吃喝又好，玩樂又好

昨天晚上又收到怪客男電話，又問我隻手好番未，枝藥膏work唔work，我都係費鬼事理佢，he~he~冚~冚~寫緊稿架嘛…

他連續兩天放假，刻意早起跟我聊聊天，為一天注入歡笑能量
最近很心散，精神不能集中

又唔捨得鬧你…

05 November 2008

原來前日、尋日的故事，仲未完…

傍晚，來電顯示係一個長途電話，因為之前有d野同身處內地的某甲傾緊，我以為係某甲，急急拎起電話聽，點知…
又係嗰個男人，哎…
佢問我有冇試過佢枝藥膏，我話冇，我話醫生開左藥膏搽俾我緊，一個療程要keep住搽，諗住萬一個療程唔work先試佢枝野，佢就勁話佢枝藥膏好得，好多artist皮膚有問題都有用，有d朋友仲一打打咁買返去外國
吓？
其實喺刻我log帶，我都唔係好想講，佢問我係咪做梗野，咁梗係啦，同埋真係丫嘛，點知佢轉數都幾快，問睇左佢d帶未，我話睇左，佢話「請你食飯啦，唔好出咁多」
講番俾朋友甲聽，朋友甲話有d野，我心諗，邊句先係重點呀？
跟住又問個故仔可唔可以做番個copy俾佢，朋友甲又嚇我，話佢已經鋪定唔同藉口約我
唔好搵呢d咁的野講笑啦…
後來我話做野要收線，哎，硬係凝住仲會有d野

哎，掃興畸呢野唔好講喇…

因為我而闖的禍，為他帶來煩惱和嘆氣，他說，我任性
他發現了…
最近發生了很多麻煩驚險事，回想起來，都是他遷就我的結果，他說不會再讓我放任下去，「要控制一下你的任性」
我問：你有冇嬲我？或者想鬧我？
他一邊遙頭，一邊嘆氣，一邊說：又唔捨得鬧你…
所以，晚上幽暗燈光下的剧扒由我請客

本來，這篇文章叫「任性闖的禍」
不過，嘻嘻…

乜呢d事難到你咩？

04 November 2008

繼續昨天的故事…

十二點幾，電話響起，根據來電顯示，係嗰個男人，我冇聽，佢留言，叫我打番俾佢，我當然冇理啦
再過左陣又打來，仍然係冇聽
響兩下留埋言都唔聽，見到面又喪話忙，出開來碌既，呢d common language get到啦
sms向朋友甲求助，反而俾人寸，「乜呢d事難到你咩？」
咦…
第三次打來，硬著頭皮聽電話，佢問我係咪好忙，老虎蟹都話勁忙忙到爆開會嗰d啦，佢話喺屯門公路落緊來，到左打俾我
結果，佢再打俾我，問我去邊度食飯，我話一陣同d同事有d野搞，只係出去接收左支藥膏
朋友甲對呢件事十分好奇，所以打俾朋友甲簡單匯報一下
我同朋友甲講，我真係寧願係我多心，佢只係好心同熱情，咁樣諗會舒服d
呢件事就此告一段落

乜而家興用藥膏溝女咩？

03 November 2008

畸呢遭遇，一定要用廣東話口語講先夠傳神…

話說今日訪問一個男人，由另一位受訪者介紹，事前沒有見過面，總之心裡已經作最壞打算，就算有幾三尖八角都要局拍
呢個人合作程度，我會形容，還可以啦，我從來冇帶有任何期望同驚嘉，但佢望住人的眼神，令人覺得好奇怪，唔知同行的camman feel唔feel到，或者咁講，至少令我覺得好奇怪，甚至有d唔舒服的感覺
坐低飲野，稍事休息，佢發現我左手肘有一撻紅左，問我咩事，我話皮膚敏感，佢就急住話要介紹一種藥膏俾我
去到呢個人屋企，臨走，叫我一定要參觀佢個厠所，係咪畸呢？
不過，最畸呢的事仲未發生…

夜晚，朋友甲突發相約食飯，但為免左騰又騰，喺荃灣食打冷，兩個人只叫左幾味餸，滷水三併、蠔仔粥、蒜蓉蒸粉絲同埋半隻貴妃雞，不過都食唔晒，嗰碟雞仲要食左一半，一半由朋友甲打包返屋企
席間，同朋友甲討論過呢個男人話介紹支藥膏俾我
他：咁佢後尾有冇俾支藥膏你？
我：冇，真係好彩冇咋，如果嗰刻佢喺屋企夾硬塞支藥膏俾我，都唔知接好定唔接好
他：(賤笑)跟住佢同你講，佢d椰菜花都係搽呢枝野咋…
吓？
不過，呢個都唔係重點

再晏d返到屋企，正在電話中討論而家d人冇秩序，唔排隊，有電話入，一個86字頭的長途電話，因為間中我都會有d朋友、屋企人喺大陸有活動，雖然唔知咩人唔知咩事，但都聽啦
一拎起電話，表明身份，就係嗰個男人，佢話，頭先鏡頭對住佢，我又訪問佢，搞到佢勁緊張，講野又口疾疾，唔記得拎枝藥膏俾我
吓？
跟住問做記者好唔好玩，做左幾耐，話覺得我應該幾好傾，第日要介紹我去食深圳一檔好好食的粥
點呀…
我又唔想好似煞有介事咁，又或者做完訪問，麻煩完搞完一大輪之後好似打完齋唔要和尚咁，應酬下招呼下傾兩句囉，呢d人真係唔會離題，講講下又講番枝藥膏，其實我已經話我睇左醫生有藥膏俾我搽，佢勁話佢枝藥膏好得
我：咦，咁你send個名俾我我自己去買丫
佢：全香港得元朗一間藥房有得賣咋
我：哦，我都好多朋友住元朗架喎
其實講到呢度，唔係客套話，事實上我已經喺地下畫左一條線，不過我諗你同我get到的message都係一樣，唔係一枝藥膏囉…
跟住又問我住邊，哎，真係激想收線，心裡諗緊話有電話入，定係有d其他事搞要收線好呢，哎，我發覺我真係唔係好識講大話，佢問我聽日會喺邊度做野，我話，聽日會喺公司，聽日渣車拎枝藥膏過來俾你啦，「荃灣cable我識去」
佢：你幾點食飯架
我：一點到兩點啦，normal lunch hour(唔通話我唔食飯咩…)
佢：咁我lunch前打俾你啦
我：好呀(唔通話唔好咩…)
佢：睇下喺荃灣附近邊度食飯
唔係化…

乜而家興用藥膏溝女咩？上次係痱滋藥膏，今次…
同頭先同我食飯的朋友甲講呢件事， 俾人笑囉，「試下d唔同口味囉，有benz有波子喎…」
我心諗，都要食得落至得架…

呢件事，聽日會繼續發展，腦海裡已經盤算緊plan A, plan B同plan C，點樣耍左佢呀…
聽日再同各位交代

頭頂生出一個小肥羊標誌

02 November 2008

周五下午，因工作之便，在荃灣海旁看日落，由一團刺睇的光芒逐漸凝聚成雲海中的咸蛋黃，徐徐向海心沉下去…

萬聖節，很怕到處去，很怕嘈雜，沒有興趣招惹陌生人，沒有計劃到各大慶祝聖地，所以放工後的節目，等於小肥羊打邊爐和閒逛
很久很久沒有吃小肥羊，做小肥人，必點有我的飛佛午餐肉、肥羊粉、菜心苗、魚皮餃、脆骨腩、凍豆腐、黑椒牛根丸，不用看見點菜單，也清楚了解各樣配料的分布形勢，嘻嘻
離開小肥羊，頭頂生出一個小肥羊標誌，成為小肥人四圍碌，很搞笑
一男一女手執雪糕，我一睇看出是雪糕車出品，嚷著要吃雪糕
無意生出打機的念頭，買了一盒超級食鬼遊戲回家，不用腦，有多好

百貨公司的counter，有各式格樣的萬聖節裝飾、道具，一個八至十歲，穿校服的男生拿起一款鎖鏈鉛球道具不停揮舞，他在旁也手舞足蹈地研究一款差不多模樣的鎖鏈匕首
我：哎，我以為d細路曳先拎住d野亂咁fing，估唔到你咁大個人都係咁
他偷笑
離開百貨公司，他說：你頭先你話嗰個細路嗰時，睇唔睇到個阿媽面色一變
我：真係冇留意喎
他：我幾驚佢同你開拖
我：超，我怕佢呀，我會話「乜而家話你個仔咩」
他：佢會話「我個仔係點都關你咩事」
我：哈，嗰個你個仔呀，同你都唔似樣，都唔知係咪你親生

散步，又去到尷尬的時間，店舖關門大吉，仍不想回去，結果，還是去酒吧坐坐
沒有預計要扮鬼扮馬，也沒有打算與嘩鬼同遊，酒吧裡，原來想法相同的大有人在，各自玩樂，跟平常周末沒有兩樣，妝容異相的侍應生反而奇奇怪怪，直至搞氣氛的巫婆和吸血僵屍出現，才引起一陣小哄動
那一刻的我在想，這天晚上，最不打算去慶節，結果還在慶節，真是始料不及

中午起來，在樓下吃了一碗粥，回去就想睡，醒來，又再睡
明天，又要工作…
請留意財經資訊台，11月15日晚上八時半《時事寬頻》「又多一關」
根據現在的時間表，做完這篇報道，今年收爐了，annual leave鐵定在12月6-21號及12月24號，又是一年一度的生日假期，亦將會安排一趟生日旅行，目的地、行程、旅伴，待議…

唔好偷食呀~

31 October 2008

他的發達大計，由一個「百家箱」說起：一個變兩個，兩個變三個，再做到一間舖，然後上市
吓？

我要投訴﹗
吹不響的銀雞，kai wan xiao？
我：你隻雞呢，我唔知係我唔識吹定係隻雞有問題，吹唔響
他：(賤笑)我知
我：(瞪眼)吓？你點知？
他：因為我試過
我：咁你又送俾我？
他：本來都係諗住送俾你架嘛，但吹過邊度有得換…
我：你又唔話我俾我聽吹唔到
他：好彩你話吹唔到咋，你話俾我聽吹到我就驚﹗
我：又話吹雞可以搵到你…
他：就係唔想你搵嘛﹗
哈哈哈﹗

午後越洋收到一個來電，他大概不知道我當時身在黃巴士上，凝重的語調，以為他有甚麼要事，卻欲言又止…
入夜後回來，網絡由中國移動轉成SMC-Voda，回電去
他說到中午發生了一件詭異事件，關於他跟朋友甲的對話，他說朋友甲說話刺骨
原來的討論關於在街上巧遇朋友
朋友甲：(以凌厲的睇神注視他)係囉，我都成日撞到d friend，唔好偷食呀~
他心感不妙，沉默
被守著的秘密，原來，它自己也抵不住

自從物價飛漲，超市不停瘋狂加價，我的飲食習慣反而變得健康
my飛佛午餐肉、杯麵、薯片、汽水等一籃子垃圾食物，遠矣，遠矣…
剛才逛超市，只買了豬骨，回家煲湯去
又是花膠猴頭菇，滋補嘛﹗

良好嗜好

29 October 2008

拼命喝酒，通宵玩樂，用最奇怪的坐姿看電視、玩電腦，放任生活需要付出代價，早陣子很容易暈眩，最近頸痛難當，今早吃了藥，腳步浮浮，很迷，不能走直線
昨天早上去看醫生，兩種止痛藥，作為二等消費者，吃進肚子的東西還是看看來歷比較好，在yahoo search鍵入兩種藥物的名稱，其中一種消炎止痛藥的副作用是胃潰瘍，難怪護士小姐叮囑我服這種藥時要跟胃藥一併吞下，我問可不可以不吃胃藥，她說最好還是一起服；另一種特強止痛藥副作用是便秘、昏睡
哎，為了醫一種病可能得到另一種病
哎，二十來歲，怎樣捱？

最近強迫自己早睡，沒有特別事，起碼預留八小時睡眠時間，習慣了，十一、二時就開始甚麼也不想做，很喜歡蜷伏在被窩裡的感覺，或許，沒有甚麼事令我提起勁，撐著倦眼也要堅持
重拾睡覺這嗜好

頓悟

28 October 2008

已經有一段時間沒有打邊爐，上一次是兩個星期前，對於我而言，真的是一段長時間
他說長了痱滋，不能陪我打邊爐
自從他送我痱滋藥膏，經常生痱滋的我好像免疫了一樣，也像得了護身符，逐邪逐鬼，幸免於痱滋之難

偶爾，有這種感覺
練武之人受傷後能夠運功療傷，以真元護體，內功隨年月增長，功力大增…
忽然有頓悟的感覺，心理質素不知不覺間提升了一個層次
醒來，就想通了這件事，不再讓這件事困擾我，不再為這件事介懷
不再陷進泥沼中的進退兩難，現在，反而在泥沼旁邊的草堆，回望駐足嬉戲的季候鳥，難得，一身污泥，拍一拍就歸於塵土，不用沾上煩惱

硬著頭皮

27 October 2008

桌面背景換成圍網中的日出，像看到希望就在伸手可觸的不遠處，感覺良好

剛才為了拍一個鏡頭，跑到小山丘上，太陽熱辣辣，陡峭山坡，兩手空空的我也喘不過氣來，真佩服兩位同事拿著數十磅的器材，滴著汗水，敬業樂業

為了不做後悔的事，硬著頭皮，堅持現在的決定是最好
不回頭，不重走那條路
我很了解自己，欠缺恆心，沒有毅力，希望藉著攀登改變一點點，報名去吧﹗

昨晚睡得非常不好，頸痛不堪
十二時許她來電，告訴我不會跟我一起去北海道
差不多三時，他來電，告訴我正在回家途中
今早脖子好像跟我脫離關係一樣，我得側身用臂力撐起身軀才能離開被窩，很痛…
回家前原想找醫生看看，忘了星期天下午，休息
哎，甚麼醫者父母心，仁心仁術，難道病魔星期天休息，星期天就不會生病？
痛不堪言，找來一顆必理痛，不治標，不治本，又可以怎樣？

晚上，在D drive翻箱倒篋，重建《四川大地震》，不日發表

承受不起的痛

26 October 2008

頸患又再困擾我…
由昨晚準備睡那一刻，頸痛難當，頭部每一個動作都觸碰頸椎某處，帶來不同程度的痛楚，一整天了，哎…

這幾天很累，特別本周尾段，即使今天假期，昨晚也太累要早睡，醒來難得地精神飽滿
因為明天要工作，沒有到處去，免得剛充滿的電池轉眼耗盡

這兩天心情好了一點

跟你一起吃飯很開心

24 October 2008

好像一場游擊戰，原訂吃中菜，修訂吃麵食，結果吃日式手打烏冬
今天，沉默了一點…
一個男人跟你說，跟你一起吃飯很開心，你會想甚麼？
心裡不禁問，你跟哪人吃飯感到不快？

他忽然生意腦袋大爆炸，積極得很，很搞笑

真搞不清楚這是失蹤事件還是失憶事件，剛才經過vcd店，介紹他看一齣電影，很深刻，因為某甲的推介才刻意去找這齣舊電影，還記得是清貨減價品，但該vcd在家中不翼而飛…
哈哈，轉個頭，在最不可能存放vcd地方，找到了一堆cd和vcd，原來在這兒﹗

開朗小豬有了新target

23 October 2008

早幾天忽然覺得頸背疼痛不堪，今天稍稍好一點，向左看沒有事，向右看仍痛楚難當
本來今天晚上可以去看醫生，但結果沒有去

今天發生了三件事，原來，在黑暗中前進，不經不覺走過這一段，隱約看見隧道的出口
最新的目標是年底出走，假期訂在6-22號，想去哪裡就哪裡，想做甚麼就做甚麼，呼吸自由的空氣、沉著思考、記錄人生…

星期一晚失約了，真超出我預期
回到家中洗澡換衣服，趟下來，只打算稍事休息，結果睡著了

星期二，最期待能夠巧遇你，卻緣慳一面

剛才他說我今天開朗了，嘻嘻

心態調整期

19 October 2008

生活模式的轉變，令今個周末多出很多時間
總需要一點適應的時間，心態調整過後，相信一切都不外如是

他問我為甚麼叫「豬仔」，讓你隨便猜猜

幾乎與他失去聯絡

19 October 2008

早上，大昏迷中乍醒…
下午應邀參加小學校友日，在簽到紙上填上畢業年份，第一次感到年齡的尷尬
人面全非，景物也不再依舊，以前敞大的禮堂、操場像縮了水，以黃色漆油勾勒出邊界的跳飛機也消失了，至於交叉位，亦成為集體回憶

今天，幾乎與他失去聯絡
有一點點想他，但沒有法子，只能在腦海裡安排一場約會
跟他沒有任何心理準備地相遇，怎樣說才好呢…
三個月以來，最終竟然是我打電話給他，只談要解決的事情，沒有離題
晚上回家吃飯，離開前，猶豫找他喝杯東西或吃糖水，與其共對亦無言，何必相見？

昨天遺漏了，就是忘記分享昨天早上的日出照，清晨0530從公司出發，在啟德舊機場的圍網，露出一線曙光，令人神往

兩個人的世界時間過得特別快

18 October 2008

星期四，繼續陷入情緒低谷，msn和電話中的對話也無法令我釋懷，感覺太複雜了
晚上，失眠…

星期五，放工後見他一面
跟他在一起的日子，就像進入另一個世界，不需要理會旁人，有一種感覺，猶如天與地之間只剩下我倆，暫忘煩惱，時間也過得特別快

利用3G科技參觀他的家一趟，四個字的評語：雜亂無章

不要某甲某乙加意見

16 October 2008

今天，有一段令人深思、矛盾，但舒懷的對話

有些事情出現的軌跡很相似，很合理
為甚麼做一件事，需要理會旁人認同與否？為甚麼要你的approval？我不要某甲某乙加意見
我就是想堅持，我行我素

其中一句話是這樣的：
「不過呢排真係覺得生活唔知做乜，死左都唔可惜，頭先架車時速一百飛返去，自殺我又唔敢，如果炒車死左就唔使煩」

我就是這種人，沒勇氣、沒決心去做一件事，就想其他方法，令我想要的事情發生，就是我口中的「我負責出席」
其實很多時候是我想做某件事，想見某些人，想玩某些玩意，著沒所謂的朋友做召集人，集齊人馬，安排妥當，然後出席，其實他說得對，我從中作梗，我是始作俑者，令事情順著我的意思發生
說到底，就是不願意付出

他說到她，我問，為甚麼要告訴我？
他說，只是想我知道
我說，這是否意味甚麼？
他說：沒有特別意思，我認為需要向你交代，這是尊重你
我說：就算我想多了吧

連續兩天晚上都睡得不好，牢騷過後，僅餘的五個多小時，希望是香甜一點…

頭頂一片烏雲

15 October 2008

思考，可以朝好一方面想，也可以朝壞一方面想，廢話…
難道不快會傳染嗎？
我也很討厭這個愁眉不展的自己

你也歎氣了…

我們的expiry date訂在哪天？

14 October 2008

星期一病發作，呆滯、心情欠佳

你的聲音卻令我笑逐顏開，我又想，究竟有甚麼東西暗中牽引我倆？
全世界67億人口，13億生長在中國國土，當中七百萬住在香港，無數人各走各路，偏偏從哪一天起你和我在那一剎相遇了，並肩走過一段路，孕育出一絲情愫
我就像乘坐一列火車，展開人生遊歷，你在某一站上車了，結伴暢玩，你我都不知道誰先下車，何時下車，分道揚鑣那刻有多不捨…
你常常跟我說，兩個人的認識，有莫大緣份，我相信，我深信
俗語說：百世修來同船渡，千世修來共枕眠

你和我之間，修了幾多年？
我們的expiry date又訂在哪天？

你拉著我拔足狂奔

12 October 2008

星期五，按原定計劃跟他吃晚飯，只是地點略有偏差
飯後，掃蕩夾公仔機，收穫，還過得去吧
不知道是有心還是無意的問題，我矇混過關…

星期六，行程突然有變
清新生啤配以泰式小食，喝著玩著，吃著笑著，酒吧街裡感覺良好

接近午夜時分，我嚷著到廿四小時超市看看，就在門前，你跟兩個坐在超市外面的男人對望，你說感應到那兩個人想打我們主意，就拉著我拔足狂奔

吃火鍋、揼骨、喝酒，一個周末就這樣過去了
我們在皇崗分手，一個人踏上歸途，感覺患得患失，為甚麼開心的時間過得這麼快，為甚麼又即將面對一周的工作
進入香港境內，人如潮湧，候車期間回頭盼望你的身影，你自遠方慢慢走近，沒有約定的偶遇，讓我掛上笑容

家中四堵牆，沒有生氣，還是睡吧…

咀刁刁想食好野

10 October 2008

平日龍精虎猛，口甜舌滑，忽然變成沒精打采，沉默寡言，怎不叫人擔心呢？
雖然不是赴傷上陣，但是抱恙露面，足夠了
上海菜的粗枝大葉也變得柔情似水…

散步到西鐵站，快點吃藥，多喝水，早睡覺，心裡的叮嚀，希望你收到

看今期《飲食男女》介紹拉麵，忽然覺得舌頭特別滋潤，肚子空空如也，很想嚐一碗美味拉麵﹗
自年初從東京回來以後，沒有在香港吃過一碗拉麵

昨天見過他一面，心情好了許多
洗衣機、攪伴機和渣汁機仍是不厭的話題

星期六去吃好東西﹗

今天的節目是，哭

08 October 20008

最近，哭得比較多，今天，哭得更厲害

眼淚，代表了甚麼？
為甚麼人會流淚？

仰臥在床上，兩行眼淚無聲地掉下來，左一行，右一行，順著臉龐流到耳窩，沾濕了髮線；左邊臉貼著枕頭，眼淚不自主地從眼角滲出，越過鼻樑，迅速地滑下，與另一行淚線匯流，在枕邊化開…

拿起電話，打算回覆一個sms，還沒有把字詞輸入妥當，眼前模糊了一片，我拿起紙巾拭乾雙眼；再拿起電話，讀一個sms，複雜感覺湧上心頭，淚珠兒大顆大顆掉在地上，來不及接著它

這是我憶述剛才的眼淚如何奪眶而出
我真的很不開心…

我不想令你覺得我以眼淚要脅你，輕描淡寫，只說希望你著緊我，但我感到你認為我在撒野
哎，我無話可說

他昨晚說，這樣很可惜
我曾經說過，沒有可惜的感覺，今天也沒有變，不過，聽過他這樣說，我反問自己，是不是很不留情面

媽媽一直以為我和他很快就要結婚，大概沒有甚麼變卦，也沒聽說我和他有甚麼問題
有一天她著我約他回家吃飯，我拒絕了，飯後，她說原想向他追問何時跟我結婚，我卻告訴她我和他分開了，她錯愕的表情，還歷歷在目
她告訴我她為了我和他的事，失眠，做惡夢
讓她擔心，對不起…

我跟他說，我沒有就我和他的事不開心，她反而比我更耿耿於懷
他無言
事後，我又反問自己，是不是很絕情

我不開心，我哭，因為媽媽
她著我帶眼識人，她著我不要搭上有婦之夫，她著我找個好男人，她也著我帶新男朋友讓她過目，遙遠看一眼也好，看一幀照片也好…
由衷說話，給我無比壓力
她的一字一句，都用我感到最不舒服的方式說出來…
這份關心，令我慚愧，從來沒有珍而重之
她著我今天假期沒有甚麼節目，回家吃飯，我也沒有答應，寧願選擇在家中哭…

嗚呼哽在喉嚨，這種感覺，你明白嗎？

我就是知道你願意跟我一起瘋﹗

06 October 2008

星期四，盛裝一身，大家一眼就看出我放工後有活動，今回是演唱會
放工即時跳上的士，第一站是青衣機鐵站，再接駁機鐵，目的地是博覽館
很瘋狂的粉絲，右邊有一個抹了濃烈香味的女子，拿著閃燈牌不停尖叫不停跳，完全natural high，還激動得將大會奉送的熒火棒弄破，身上沾了熒光液體；後方是一個散發臭狐氣味的男子，不斷發出沙啞的叫聲，雙腿跳動時碰到我的椅背，哎，真痛苦…
由於趕著前往會場，沒有時間吃飯，直至演唱會完結，返回家門樓下的小食店才吃了點東西，又趕著洗澡睡覺

星期五，冗長的會議減慢了全天的節奏
晚上，沒有胃口，跟他吃麻辣小食，周圍逛，買了一對耳環，再去喝酒聊天relax一下，沒有留意甚麼時候離開

星期六，醒來是三時許，賴在床上…
後來做了點家務，弄了兩盒朱古力曲奇餅，消磨時間，等待晚間的約會
他突發提早完成工作，可以早點跟我會合，原計劃是唱k，新加插的行程是逛街，哈哈
他又做了魔鬼，不斷慫恿我購物、花費、揮霍
走，直至店子關門，按原計劃，唱k，order了一客火鍋船，我也帶了點曲奇讓他嚐嚐，大家都吃得很滋味﹗

今日，星期日，醒來又是下午，消失了大半天，沒有做過甚麼，數小時又蒸發了
不管雨有多大的傍晚，兩個人，仍然堅持到新界大西北bbq，我就是知道你願意跟我一起瘋﹗
渾身都是肉汁和炭火混和的燒烤味道，乘西鐵回家時，倍感尷尬…

很多話想跟你說…

無意中走到便利店，雜誌架上出現了一本書，《偷看舊情人的網絡誌》，想起一段往事
曾經偷偷讀你的博客，從你在虛擬空間開出的一扇窗，分享你的喜怒哀樂，不過自知無權過問，想留言，卻害怕你知道
有時候，刻意長時間在網絡世界上流連，期待跟你相遇的一分鐘，也許你會跟我問一句好…

忽然失憶

02 October 2008

最近記憶力嚴重衰退，很奇怪，忽然會忘記一直想著的事情
早前買了一本450D攝影書，找了很久，不知道放了在哪裡，如何把它找出來？

剛才終於KO了原本應該上個月中完成的任務，就是買耳環，原來，要買一對稱心，又可以長戴的耳環並不是一件易事
另一項任務是KO了無印尼龍袋一個

很想學綿羊仔…

一句說話，一滴眼淚

01 October 2008

她的說話對我的情緒影響甚大
跟她在電話上簡短討論了不足五分鐘，我哭了，後來sms告訴他她又跟我說那件事，想起她的一字一句，眼淚禁不住，慶幸沒有哭腫眼睛

星期一早上，他已預告晚上有飯聚，時間地點待定…
活動最終相約在一家中式酒樓，對於我這個芝士怪，一味芝士大蝦燴伊麵簡直令我愛不釋手，甚麼花膠和象拔蚌都要讓路
之後去了唐二樓某茶館，hea，但很多時間都注視對面窗口，兩名只戴bra走來走去的女子，相信極大可能很有機會是一間疑似邪惡場

星期二，今天，出門口前才突然知道下午又有突發即興特別活動安排，既然今晨四時多才睡的他也力抗睡魔，雖然補假珍貴，但當然要奉陪到底
首先約在樓下飲早茶，無意中一償豉椒排骨飯的心癮，大戰地點當然選址我家中﹗
他相約家人吃飯，趕在晚飯前返回新界大西北，送他去巴士站後，大隊無奈地解散了…

最近，寫作興致大減
又卡在這個位置…

周年bbq活動

29 September 2008

星期六的假期，待在家中也不一定等於一個人過，嘻嘻
聊到關於她跟我的對話，我又哭了…
也聊到凌晨時分他喝醉酒，派對過後意識迷糊，胡言亂語，不停電話轟炸女友，很搞笑
傍晚的下午茶，有樓下小食檔的煎釀三寶和超市的蜂蜜綠茶、提子汁，然後各散東西

晚上在樓下集合，向青山灣出發，周年bbq活動，不認識的人，視之不存在，算作搭枱也好，路過也好，不減雅興
新話題聽不懂，不能插咀；舊話題聽膩了，一笑置之
不過雨中bbq，奇奇怪怪，抱著背包，撐起傘子，還得護著火苗，石凳完全濕透，褲管濕了一半，坐不得，站不得…
雨一直下，狠狠地下，我們說笑，會不會已經發出暴雨警告訊號，cable通宵更經過扑咪，一問之下全是行家，稿應該是這樣寫的：

{lvo}
雖然凌晨時分雨愈
來愈大，但在青山
灣沙灘，一班燒烤
發燒友不管雨勢，
冒雨燒烤。
xxx報道。
{take sot}

{upsd}
你把遮擔好d啦
我個背脊濕晒喇

{vo}
人多遮少
唔想濕身的就要諗諗計

呢十幾名燒烤愛好者
兩三個、兩三個一組咁
瑟縮喺同一把遮底下

有人繼續猜枚
有人用相機影低呢個難忘經歷

為左防止大雨整熄個火
佢地仲拎起發泡膠板擋住雨水

有人趁個火「有瓦遮頭」
爭取時間
繼續燒野食

{vo}
大雨滂沱
沙灘的街燈亦都熄晒
但佢地都冇打算離開

{bite}
咁好難得架嘛
聽日大家都放假
同埋個個都喺唔同公司做
返唔同的更
集齊到咁多人出來真係好難得

{vo}
原來佢地係一班新聞從業員
來自本地唔同新聞機構
部分係記者
部分係攝影師和後勤製作人員
更加有電視台既主播

{扒}
其實佢地並唔係唔想離開架
佢地原本提議帶埋剩番的飲品同一大袋食物
包括雞翼、腸仔、豬扒等
到住喺對面屋苑的朋友的屋企度
一邊觀賞英超賽事
一邊繼續聚會
但嗰位在場的朋友諸多推搪
所以一眾人等就要咁狼狽咁燒野食
{signoff}

周日，起來已是下午四時半，吃了昨天吃不到的蛋撻，跟他sms，打發了好幾個小時
她來電，又再討論起他，真的很困擾，又哭了…
早知不將這件事告訴她

哎，我想，今年的生日旅行應該要落空了…

不適合我的派對

27 September 2008

我沒有出席今天晚上的派對，只是不適當的人，不應在不適當的地方出現而已

下午，仍為兩隻雞翼感到滿足；晚上，卻對她的追問感到很困擾，等車途中，差不多哭了出來，感覺很複雜，難以三言兩語講得明明白白，心裡就是很不舒服，不想說出因由…
原想吃朱古力批調節情緒，但原來那間麥記很早已經關門大吉，輾轉到便利店，挑了一杯哈根達斯的比利時朱古力雪糕

你也要好好照顧自己

26 September 2008

你生病了，又發燒…
你常常說我不錫身，你也要好好照顧自己﹗

她問我有沒有說話跟她說，沒有，就是沒有
唉，可以說甚麼呢？

再嚐雞公煲

25 September 2008

天色陰沉沉，很累…
早上起來，閃過一下不想上班的念頭，但拱了過去，行屍走肉回到公司，繼續大海撈針的資料搜集工程
下午，被他引誘、被他教唆，說到底，是因為心野，所以決定突發放半天假，逃回家中，躺在床上，摟著跳跳虎
六時左右，啟程向佐敦出發，目的地是闊別了兩個月的雞公煲
惹味牛煲和辣味雞煲，叫人不能停手，更不能停口，再配以木耳、菇、寬粉和他最愛的油麥菜，真滿足﹗
吃罷，滿頭大汗，到永安閒逛cool down和促進消化，研究花茶，喜歡黃金桂花的香氣
原想到旺角買耳環，但他說累，他也不願撇下我一個人，所以擇日再算

黑格比帶給我們的回憶

24 September 2008

今天，打風…
八級風暴中的晚餐，有小食拼盤、焗飯和天使麵，後來還配以朱古力批一個

商場空空如也，減價中的adidas波鞋、櫥窗裡的手袋、超級市場的酒架、家品店的雙人大床，讓我們倆悠閒地看了兩個小時
經過大水窪，你說揹我過去，風大雨大，我倆仍是肩並肩，謝謝你撐起傘子陪我等的士，不會忘記黑格比帶給我們的回憶

這樣一個男人

23 September 2008

其實他是一個好人，起碼心腸不壞

有一次經過路口，一個男人推著手拖車，滿載貨物，行人路跟馬路有一小級台階，腳傷還沒有痊癒的他毫不猶豫上前幫忙一把
我在旁邊看著看著，跟這樣一個男人在一起，感覺很優越

又有一次，跟他一起看見一個乞兒，雙腿沒了，他也沒有想甚麼，拿出零錢包，轉身攤開雙手，零錢包空了
我也在旁邊看著看著，想這樣一個男人，他會怎樣呵護他的女人？

很想吃日式牛肉火鍋，不論是shabu shabu還是sukiyaki，闊別了很久很久…
上一次吃shabu shabu是在東京，已經是今年初一月的事，沒有記錯地點的話，應該是在新宿
其實如果買到麻醬和酸汁，再到city super挑數盒特級肥牛，三五知己在家吃shabu shabu真是賞心樂事
不在日本的日子，唯有等待入冬後吉野家推出的平價，但也算像樣的sukiyaki