頭先一齊去食左個牛腩麵，有食環署的人來做問卷收集意見，傾左一陣好似唔係好對路，打個眼色就走，到搭車時先諗起，佢好似冇拎過銀包出來俾錢，我問佢係咪真係冇俾錢，佢先一言驚醒，真係好糗…
唔知點解，去嗰度食野，好容易食完就會行左去，已經唔係第一次，之前都係我發現佢想就咁走左去
頭先返來第一件事就係去俾錢，點知間野拉左閘，好彩八掛去睇下，原來仲有人喺度執緊手尾，如何唔係為左嗰十幾蚊碗麵俾人咒罵同點相就好唔抵囉…
1000蚊可以KO幾多target？
唔知做乜鬼，唱左半晚K啫，但個樣勁殘，面色勁差，仲生左幾粒瘡，咁都抗議？
如果，放初四初五初六，篤3日假夾埋就可以放9日，何樂而不為？
今日立春，虎年始於此，對風水命理有點研究的他說我今年有桃花，說是正桃花，這個人極有可能是真命天子
那就拭目以待…
電腦拎左返屋企就玩電腦，今日裝好洗衣機，咁就玩洗衣機，咁啱要洗床單，咁就玩洗床單
討論中女的問題，佢話某甲由內而外都散發出中女的味道，一矢中的
一件衫本身唔令著的人變成中女，只有本身是中女，才著出中女的感覺，亦令件衫無辜地都變埋中女衫…
陳奕迅又加場，加頭場，真賤格﹗
新機落地身痕，所以之前一晚掛住玩電腦，訓得四五個鐘又返工，唱k約會，超勁眼訓，真係有d想放棄，但又好想見下好耐冇見的朋友，感受一下一大班人無壓力無所不談的開懷玩樂氣氛
矛盾之下，自己同自己約定，如果搞手朋友甲打俾我，咁就出去啦
不過朋友乙先一步打俾我，放工去食左個飯，有飛佛小籠包
食食下朋友甲打來，旺角集合，就按原先的約定，食完行左陣先赴約
當然，打埋俾朋友一號，費事佢話冇人約佢啦
原本諗住做灰姑娘，不過，來下一個又一個，集齊一套昔日最佳陣容，都係繼續留喺度聚舊
雖然我冇好似以前咁喪飲，應該話一杯都冇飲，但係爭下咪大叫下，已經好開心
聚在一起，在工作以外，有很多話題
但靜下來的一刻，不聊甚麼，也覺得大家走得很近，近，不是物理時空上的距離，而是價值觀和對事情看法的態度，一個眼神已交待一切
本來星期六出故仔，所以星期五嗰晚要寫稿，寫到凌晨三點，跟住同公司的朋友甲去左路德圍食宵夜，再搭的士返歸
星期六拍野，銀牌決賽，真係一場好好睇好意想不到的波
拍完野出左去食麻辣雞煲，好好味，食到好飽
之後行左一陣街，得到pooh仔護身符一個
佢話原來一早諗住送一份禮物俾我，視乎我鍾意乜野，唔怪得佢即刻爭住去俾錢啦，個護身符只係16個8，蝕晒…
再行左陣返歸，既然故仔延期，完全將腦袋關閉﹗
一早targat係買電腦同洗衣機，既然放假，咁就出左去research
基本上係睇電腦，因為洗衣機來來去去都係嗰幾部，其實都唔係好使揀，見到呢個價錢同個餡，都唔係好使揀，雙核心、4mb ram、320gb hard disk、win7，有齊晒我要的野，7千有找
不過到check機時，個sales攞錯機，攞左部500gb，粒u行T6670，打左張單貴400蚊
點解之前冇發現呢部？
都ok啦，貴幾舊水當買部external hard disk都差唔多
連埋部洗衣機一齊碌卡，碌之前仲突登打番上card centre，唔知做special discount嗰張咭碌爆未…
另外再買左條手鍊，同嗰時喺西藏唔見左嗰條同一style的銀蠟繩，仲買左一件冷衫
唔夠一個晏晝洗左一皮野…
點解冧樓受影響的人叫做災民？
香港呢d咁繁榮先進的地方，災民似乎唔屬於呢個城市
今日簡食日，只係食左麥皮、啤梨同麵包
今日公司出現一個奇景，d人一係拎住一封信，一係拎住計數機
因為，派信，揭曉bonus有幾多的信
頭先食飯再去睇notebook，又再減價，當門檻低到二千幾蚊買到部行win 7 的netbook，要買部六七千的notebook真係有d心理障礙
但netbook的問題係個mon細，喺屋企用都係怪怪，出完故仔再去research下先
一部洗衣機，分期百零蚊，一個月洗衫錢都差唔多，再加上個花園又整好左，又有個屏風，出完故仔係時候去買洗衣機喇…
今朝開會，四月世博月，個schedule真係，人都癲…
呢期興請辭，積極地響應，做緊野喇﹗
我講過唔止一次，當你鍾意一樣野，一個人，你會將缺點看成優點，討厭一樣野，一個人，將優點也看成缺點，主觀情緒主宰一切，沒有客觀可言
這一刻，這個人的缺點仍佔據了我的眼睛，資料夾盛著負面情緒的往事，沒人提就不會想起，何苦自尋煩惱
我現在的生活很簡單，冇去食三千幾蚊一餐的見城，但粉絲食出魚翅的味道；鮮有交換禮物，但沒有驚喜的平淡日子也過得很快
呵呵，都話會再加場啦，加到4月6，真係crazy，17場，唱到尾場冇氣，哈哈哈﹗
哎，賴野，頭先食嗰碗麵有幾條青椒，食左幾條囉，成晚胃氣漲，好辛苦
同埋暈車浪後，仲有d頭痛…
沒有得到過，總是心掛掛，又湧現這些片段…
好像靈魂出竅，那一個我看著這一個我，問這一個我做甚麼？他們沒有談判，但有一份默契，就是現在做的事情沒甚麼意義
那個我說，沒有意義就不要做
這個我說，真的可以說不做就不做嗎？
回到老問題，有些事情不可以不做，因為，這一刻沒有選擇的餘地，有時候，任性也要看機會成本…
當付出和收穫不成正比，你還願意很傻地繼續付出嗎？
用做生意的理論，餐牌不可以加價，用料不變，份量便要調節一下；份量要不變，用料就要將就一下，將貨就價，顯而易明的道理
燃燒青春，浪費時間，夠了﹗
不如的起心肝，係時候做個了結，係時候做番d野
本來諗住走架喇，都已經入左閘，佢話想食雙層芥末魚柳包，咁就出番去食麥記
機會俾左一次又一次，攬上身又唔做，做又懶懶閒，想點？
似曾相識的感覺，彷彿重演一次的對白，已經是第二次了
如果，假如，或者，可能，再任性一次，會不會令事情變得複雜和混亂？
好眼訓，再續…
尋日真係超勁開心，ko睇醫生的目標，偶遇好耐冇見的朋友，勁食好泰國菜，訓勁好的一覺
前日，起身太眼訓，又見星期六日都要返工，所以放自己假，訓左半日，用左大半日整理好《藏遊誌》最後部分，整好埋個網頁，原來，前後已經三個月了
本來都猶豫好唔好睇4月1的尾場，點知睇睇下電視，先發現竟然再加場，而家的尾場係4月4，冇行啦，好大機會飛左做世博，所以轉移目標，睇頭場
諗住跟歌迷會訂飛，但冇得揀日子，真係吹漲，仲要硬食一個燈牌，雖然只係60蚊，都冇理咁樣丫…
會拎燈牌的fans一定有，係唔拎的你屈佢都唔會拎，好質疑呢種吸水手法…
所以，結果要去排隊囉，尾班西鐵，點知出到去已經有條龍，攞24號籌
頭場480，再r緊英文字的飛，睇多場
又唔係想像中咁眼訓，全日出crew拍野，三個好重要的訪問，拍左好多野，所以夜晚狠狠地，要食餐好
朋友一號帶過我去食荃灣嗰檔好好食的泰國野，所以帶番佢去食
兩個人食左好多野，蒜蓉包、冬陰公、青咖喱+白飯、柚子蝦沙律、生菜包，飽到上心口都食唔晒，之後散步，得到一隻虎仔
而另一件事好開心的，就係拍拍下野，好似失蹤左咁潛左水一排的朋友甲打俾我，原來佢見到我拍緊野，相約大門口，咁樣傾左一陣，真開心
前晚冇訓，尋晚返到去沖個涼，幾乎一撻落床就訓著，訓好冧的一覺
上星期某一日，好想食馬仔，放工去就要搵馬仔，荃灣友提供消息，喺南豐有得賣，咁就買左made in hk的馬仔，一包有三件，盛惠十蚊
周日拍完本地聯賽，返屋企執少少行裝，即興四個人返左深圳揼骨，揼骨前仲食左好味的任食鐵板燒
揼完勁好訓，訓左四個零鐘就落返來返工…
同埋渡船街喺香港架﹗
我認識的她寫了一篇文章，怎料在網上轉了幾圈，被人筆伐，更被人起底
哎，呢個咩世界…
哼，我都識筆伐﹗
每次從你擔心的口吻，叫我小心d，都令我感到好sweet好warm
上次虎仔維尼強行被帶走，頭先再去屈人寺帶番虎仔維尼返屋企，而家我地屋企一人有一隻虎仔維尼
頭先又見到烏咀狗，肥嘟嘟四隻腳仔扭下扭下，佢個樣真係好得意架
我自己冇咩好講，不如講下呢排見到的畸呢野
搭車化妝，其實真係神乎奇技，原來，畫下眼線呢d已經係碎料，有日見到有條女喺地鐵上黐假眼睫毛…
狗帶拖狗好正常，已經見過兩次，啱啱識行的細路仔俾阿爸阿媽好似拖狗咁拖住，真o咀
屋企變左茶館，有普洱、玄米茶、烏龍茶、黃金桂花、台灣花茶
電視劇裡面玩killer，呢個遊戲好耐都冇玩過，有少少唔係好記得唔玩
找到志趣相投的朋友確是人生快事，而找到啱晒咀型，唔止啱key啱傾，口味一致，一路食一路傾，又一宗賞心樂事
而志趣相投+啱咀型，真係不得了﹗
他帶我去食麻辣雞煲，四川小店，仲有酸辣粉，吃一口舌頭和咀唇都麻得跳舞，真過癮
下次，一定要再來，我地話不如打包個湯底，返去煮麵…
從第四代香港人到八十後，我感覺被模來模去
自以為是的人將我們這一群歸邊，年齡處於八十後，生於戰後第四代，無錯，我們有一些你們「所指」的特質，不過，這並非事實之全部
我們是新舊交替下的產物，改變下變種而成的一代，洗腦不完全，接觸吸收了一些新事物、新觀點，在之前幾代人眼中，有點不受控，所以八十後是激進
呢個禮拜真係最得閒，由30號放工開始，行街，食飯，放假，總之無所不hea其極
想見的人就見，勁想見的擠都要擠出時間，唔想見的人明明大把時間冇野做都唔俾佢約，唔需要藉口
今日hea喺屋企，一齊食左個車仔麵，各自各辦各自各的事，開番藏遊誌的file，經過大半日，行程離開左珠峰，進入尾聲…
就是過眼雲煙，沒有必要上心，沒有需要動氣，不過呢件事，已記錄在案
尋晚拎住超勁多野返到村口，朋友甲問去唔去食飯，咁就去啦，出番荃灣食泰國野
凍冰冰飲碗冬陰公，勁暖胃，真係超正﹗
09年，比之前一年開心，圓了夢，也算圓滿
三月去左一轉東京做野，不費分毫睇到上野公園滿街櫻花，仲喺櫻花樹下做左個扒，有幾多人有呢個experience呢
十月，獨行西藏，一個人拎住單反的旅程，去過世界之巔個山腳，海拔5200米，經歷很多第一次，新的體會，新的思維
而另一件令我09年勁開心的事，就係搬屋
脫離令人生厭的空間，踏進嚮往已久的新天地，小鎮風情，忘憂寫意
時間，亦令狐狸終於露出尾巴，09年，辨清了邊個係人，邊個係鬼，不過，未為晚也﹗
多謝你陪我過了這一年﹗
至於今日，返左半日工，放左半日假，返屋企換對鞋上左深圳，為食一餐飯，入黑後回來
返到屋企超勁眼訓，訓一覺，三更半夜先起身，整理一下思想
發夢，排大隊買醫生演唱會飛，不過三月尾，唔知人在香港還是人在上海
今朝報左名攞世博記者證
我部電話冇記錯係7月買，到我delete晒3796個sms history，有人覺得好誇張，一來係點解部機可以儲咁多sms，二來係點解有咁多sms
雖然，係有d即睇即delete，但係計番五個月，除番開平均每日廿五個，普普通通啦
再突發放多一日假，呢個假期，咁就放左6日，真爽﹗
之前話過，本來諗住呢個假期去哈爾濱，真係好彩最後搵唔到平機票冇去到，亦好彩約左燒野食，如果唔係去到，咁凍，肯定呆左，一日食八餐都唔掂
將西域的石頭安置好，擺喺土製飾物架上，由左至右，上至下，順序係納木錯的石頭、雅魯藏布江的石頭、珠峰的石頭x2同埋羊湖的石頭，閃閃地好靚﹗
夜晚同佢一齊煮飯仔，終於食晒燒野食剩低的雞翼
佢倚在門框，見到我雞手鴨腳，論論盡盡怕d油彈親個樣，我眼角見到佢在偷笑，跟住若無其事咁摺摺衫袖，拎起鑊剷，冷pro咁講d雞翼應該點煎點煎
幾溫馨丫~
不過，仲有半袋丸同一袋咖喱魷魚…
夜晚再煲薑茶聽日轉冷備用，cross over維他奶，薑汁維他奶勁得呀﹗
早陣子有一個飯局，四個人，兩男兩女，講起呢一刻呢個社會的價值觀，學生嗰輩，唔索k叫out，喺內地，冇第三者叫out，講到一個關於台商包二奶的調查，發現全部都有包二奶，冇包即係out
她跟我說，無論如何都不要讓男朋友到內地公幹，讓男友接觸到這種「價值觀」就不得了，更說無論如何也忍受不了一段有第三者的關係
再談到內地女子的進取程度，身為大家眼中的「第三者」，肆無忌憚、理直氣壯地打俾「正室」，話你老公同我一齊
眼不見為乾淨，本來隻眼開隻眼閉，死忍爛忍的「正室」呢個時候，仍能呃自己別胡思亂想嗎？能夠挑戰這能耐的又有幾人？結果誰勝誰負？
其中一個他說，很多女人都以為自己不能忍，結果，都是忍
如果，這個時空，人與人之間的關係咁混亂，做忍受嗰個好，還是做俾說話人受嗰個好？
做搶野嗰個好，還是做俾人搶野嗰個好？
前日參加錦上路燒烤場發展計劃的朋友甲問有咩入伙禮物需要，諗來諗去都諗唔到，嗰晚沖涼，先醒起應該答佢需要大量現金，哈哈哈
頭先先無意中諗起，其實呢排搵緊一個啱心水夠大的微波爐的連蓋大兜，咩麵咩菜咩丸cup個蓋叮一叮一兜熟，應該話俾佢聽要呢樣…
下次，去宜家搵搵
咁啱去開superstore，睇下有冇機會搵到target，見到一套煲連鑊，係呀，原來我都需要一套煲連鑊，而一套裡面要有一個公仔麵煲嗰d
想搵一套全不锈鋼冇易潔塗層嗰d，要木柄唔要膠柄，但只搵到散件，冇一套，仍然搜羅中…
訓到三點起身，食左少少野，駁左條大水喉洗地，跟住換衫出去剪頭髮
好耐冇試過剪一個好啱心水好滿意的頭，俾錢時寒暄，先發現幫我操刀的唔係一般stylist，而係director，唔怪得啦…
買左一條好啱心水的牛仔褲，仲有啱心水的超，換番上次好啱心水但俾錯左的香薰refill，仲食左好好味好啱心水的馬仔
一張相一段回憶，除了個別的相係搵路過的路人甲影之外，每張相的由來，凝固在那一刻的感覺，瀝瀝在目，82張相，82個小故事
7個火星人+火星狗x1 到訪，除左冇獎、冇答案的「數數跳跳虎」遊戲，仲有尋人遊戲，有人搵到自己，有人認得自己幫我影的相，有人亦記得「大作」有何人操刀，更有人記得跟我拍下這幀合照的情景
近年比較深刻的回憶，原來有這些
近年走得比較接近的人，原來是這些
近年佔據我生活較多的事物，原來是這些
的確不多笑得燦爛，要讓自己開心多d
要繼續去旅行，去多d旅行，令其他牆的photo wall有著落
而土製燒烤爐係成功架﹗
佢自把自為地攞左隱形人件衫來著，竟然啱身
某人認為事有蹊蹺…
都話明係隱形人，佢的身分要幾神秘有幾神秘，假如有一日，即使佢企正喺你面前，你都唔會發現原來佢就係隱形人
馬吊治療期間，cue左bite of today：一條濕滑的司機???
科技的進步，令我輕而易舉地儲番《還看2009-香港》
無意中喺網上見到有得bt，應該，是開心
因為，只有有人睇，有價值的節目，先會有人cap同單撈；但其實，這個結論，很可悲
正正式式完成大樹回顧，繼續執靚間屋，土製飾物架，上層同一個tone，有來自西域的酥油茶碗、銅製香爐、原本諗住用來裝耳環仔的酥油燈杯；聲稱來自喜瑪拉雅山的鹽晶燈；來自海南島的大貝殼；來自雲南的普洱茶餅
下層當cd架，將僅有正版的碟擺出來，扮下野咁啦…
遲d去入番d貨，個架就會滿d囉
頭先出去曬埋d相，兩晚通宵，終於完成我的photo wall，total曬左百幾張相，最終用左82張
自戀得來真係幾靚﹗
原來，西域的藍天同海南的藍天相差無幾
另一土製品有燒烤爐一個，無意中買到硬銷$9.9的圓凳，令呢個燒烤爐的budget更低，架埋隻鑊，只需$55.9，二手爐都買唔到呀﹗
當然，唔少得之前已經添置左的頸巾showcase，雖然，show唔晒…
大除夕出左去行街，夜晚去打左個超級海鮮邊爐，跟住睇左一場戲
絕對唔係大路，一定係另類電影，攞過獎，佢睇得好開心，但我睇到有d r 頭，真係好想知，點解會攞獎？
做完大樹回顧，聽日驗埋屍夜晚就出街，急需一次馬吊治療
約實今個星期日，我屋企第一個大型party，錦上路燒烤場發展計劃第一期可以kick off喇﹗
不過，首先要準備一個燒烤壚，其次要準備各類集體遊戲用品，例如係大富翁、層層疊呢d老套野，聽日放工要去反反城搜羅一下
夜晚繼續幫d指甲油顏色，其實如果d指甲油同洗甲水唔係咁臭，同埋可以再快d乾，油指甲其實都幾好玩
anyway，希望各位讀者支持一下今年有線電視的大事回顧系列，還看2009香港將會喺12月30日晚上九時，財經資訊台播出
你又病了…
發一個短訊息給你，飲杯熱檸樂煲薑會舒服d，想起一些往事，也想起一首歌
the feelings so strong, were lasting for so long…
晚上煲薑茶，飲了一杯，盛了一壺，只是不會有機會拿給你
哼﹗你竟然若無其事咁同我講佢送件底衫俾你「好溫馨」
我記住呢句說話﹗
你成日都話我為食，我諗都係既，尋晚發左個夢去食自助餐，好似美食一條街咁，一檔檔車仔檔任食，好鍾意d鳥燒~
你再三叮囑唔可以一次過食晒包大薯片
其實，諗番嗰日你靜靜雞擺低包大包珍珍薯片喺枱面，其實都幾溫馨咁丫，呵呵呵
好日唔搽指甲油，更遑論買指甲油，頭先一口氣買左三枝，夜晚身痕攞來搽，搽衰左，但發現屋企係冇洗甲水，結果要等佢乾搽番好
當十隻手指唔好亂郁，真係好多野都做唔到…
自從開發左錦上路之後，好多同事都話正，頭先先幫同事甲搵屋，竟然喺惠康附近有間七百呎同我而家呢間一樣價錢，真係好抵，好想去睇下
沒有聖誕節的感覺，沒有年尾的感覺…
月曆上的紅色數目字，暫時，對我沒有意義
屋企有一圈冷未織過，尋日拎番出來，開始織一條頸巾
很多想做的事，佷多約會，但都要等到2010年
講電話陰聲細氣，呵呵呵
要對自己好d，買左幾盒燕窩，呢排朝朝燕窩當早餐，塊面真係好似滑左﹗
哎，唔見左隻豬…
本來得到一個麥嘜豬八達通套，上面有個麥嘜豬吊飾，早知搭地鐵唔攞出來睇啦，咁就跌左，我相信隻豬逃跑左落路軌…
他的生日禮物送出了，他好似一早知道我會送呢樣野俾佢咁，好神奇
本來唔諗住食野，但結果都係趕快食個杯麵先出去
你請我食飯，我送你一張枱回禮，哈哈哈
周六，香港一日遊，錦上路--旺角--灣仔--銅鑼灣--荃灣
去老地方回味一下，景物依舊，只是到訪的人，心情不同了
上一回講到，呢排有好多target，經過一日，唔少已經KO左
KO嗰張唯一一日大特價39蚊的電腦枱
KO一份生日禮物
KO某ADIDAS紀念品
KO京士頓街分舵朝聖之旅
10蚊兩個玻璃樽，好似變魔術一樣，經過兩晚，變成兩個artistic香薰樽，好靚，好鍾意
下一個目標係三個金色咕臣套，同埋將張電視几油成黑色
睇唔到睇唔順眼的野，係一種福氣，今日有兩份福氣
但遇到前言不對後語的人，福氣扣一份…
不過兩正一負，當賺左
好耐冇見，所以夜晚小肥羊，一個名詞當動詞用，省下幾個字，又精又準
今朝做左笨野，就係唔記得解線，搞到要搵我的人搵我唔到，到十一點幾先無意中發現解番
有d人無中生有，有d人惡意攻擊，有d人諗野諗埋一邊，有人雞蛋裡挑骨頭…
有需要怪他嗎？
他自己知自己事，明知唔夠你鬥，唔夠你叻，唔夠你轉數快，亦唔夠你得人歡心，以為打擊你可以自保
呢d人有需要怪他嗎？
還是這句，不招人妒是庸才
忽然有好心涼的感覺
原本有一樣野，俾人偷左，人地花一輪心機改頭換面，不過最後俾另一個人狠狠地一腳踩爛，得物無所用，呵呵呵
最近冇咩寫作情緒，感覺是怪怪的，走在路上，停在街角，有些意念湧上心頭，但晚上雙手放在鍵盤上，卻動也沒動，腦海一片空白
周日同朋友一號去左旺角，食左個好晏好晏的tea-brunch，食完嗰碗麻辣米線都五點幾，提著一杯珍珠奶茶，忽發奇想，搵十六座司機送我地去九龍灣，按原計劃，碌宜家傢私，買左好多垃雜野，返歸
除左睡房同兩個廳，廚厠呢d基本野，其實我有一間衣帽間，一間書房，一間雜物房
丫…唔係，應該係兩間雜物房
尋日終於買到一pack筷子，由上個星期開始搵，原來好少選擇，當然，唔理外表的係周圍都有得賣，但我唔想喺屋企都要拎住一雙大排檔筷子，一雙茶餐廳筷子，或一雙麵檔筷子
結果，其實之前見過呢個款式，不過顏色唔ok，亦都嫌佢貴，頭先再見到，都係決定貴一次啦，仲要有白色，太好了
沒有特別的目的地，所有外遊計劃取消，將電話冧把飛走，難得寧靜
生日蛋糕換成鵝肝，入口甘香融化，超美味；牛柳的肉汁滲進齒縫中，就是滿足的感覺
如今想來，舌頭好像感受到鵝肝軟軟的質感，鼻子嗅到牛脂的香氣…
忽然想起某天在東措的告示版，一名深圳男子與家人失去聯絡二百多天，早陣子有一名香港女子也是在西藏旅遊期間喪命，車子衝進河中，過了一段日子才撈回屍體，如今想來，為甚麼自己一個人，去這麼危險的地方？
不過，幸好安然回來
停工已久的藏遊誌一定要盡快完成﹗
我是羅剎妖女，又如何？
收到他的禮物，收到他最早送來的祝福
擺低一句「多謝」，啱用就攞去啦﹗
除左五天生日周，仲有生日逛購，連續4日，唔同location不停買
尋日一次過買左四對鞋，今日再買多左一對
家中的電話已經set up好，本來想買一set子母機，一部放廳一部放房，但無意中見到m&m's的座枱電話，感覺就好似尋到寶，買番去當係擺設都唔錯，結果變陣，無線電話買單機就ok
屋企個冧把而家只有兩個人知道，你會唔會成為第三、四、五個，咁就要睇下你企喺咩位置
另外，仲買左mp3喇叭，鐵製郵筒錢箱
想起他…
喜歡一個人，他不知道你喜歡他，卻可以在他身旁繞來繞去，若即若離
後來才知道，原來他早就在我的身旁繞來繞去，只是我沒有察覺
如今，不知道過去了沒有，偶爾還有一點想他，不過已沒有機會經常待在他身邊，算不上是遺憾，該算甚麼？
他最近回復單身，是否意味我們之間的可能性或許會出現些變化？
在公司我們是同事，大伙兒出去玩，我們是朋友，只有我們倆時，我們是情人
從沒有得到一個身份，始終，有一點耿耿於懷
算是捱過了嗎？剪完片，算是一個結束，但是另一個開始，沒完沒了…
工作做完，本來應該好渴睡，但反而唔想訓，有好多野想做
呢兩日放工去左行街，頭先出左旺角，尾班西鐵12點紅磡開，所以十一點幾d舖頭仲未閂就要走，有d唔慣，不過都行到腳仔攰，算啦﹗
今日再收到一份生日禮物，係一隻維尼
生日周開始，周六日regular off，mon攞左AL，二三放com off
有甚麼值得你用生換去交換？一份事業、一段愛情，還是一個興趣？
成為工作狂，惹得一身銅臭，繼而慢性自殺，我的確不肖，我會狠狠地批，賺錢沒命享；將自己的生命交在另一個人手上不能自決，冠以偉大的形容詞，愚不可及
又係剪片周，返夜，享受黑夜的寧靜，沉思的空間和氣氛讓人陶醉，想想自己身處這個時空，何去何從
頭先數數日曆，研究緊買月票有冇so，400蚊一個月，每程9個8，搭到41程先叫打個和，第42程開始先叫抵左
不過今個月好多機會返夜，又會放下假，睇來真係冇so
weekend的生日周假期kick off，不過節目仲未決定
大事回顧，好似冇咩好回，不過，咁係一件好事
來緊將會又儲好多com off，一月真係可以再去個旅行，啱啱research過青島同哈爾濱的機票的折頭都幾吸引，青島平d，三折550/flight，但哈爾濱可以睇到冰雪節同滑雪，睇下俄式建築，3.2折，780/flight，深圳飛，西鐵站仲要有一程直通巴一舊水去到深圳機場，超勁方便，超勁吸引
二者首選哈爾濱，一來凍d，二來風情應該都會好極端，好唔同，又可以喪影相，西藏之旅後，真係好enjoy一個人去旅行的無拘束，話飛就飛的任性感覺﹗
不過，要先搞掂《藏遊誌》
但話時話，舊年見到12月有特平三舊水一程的機票，先忽發去西藏的念頭，如果今年或者一月再有三舊水飛得，攞五日假，搭三日火車，住兩晚買下野食兩杯酸奶飛番落來都幾ok
今日帶左兩個小朋友返歸
有一次同朋友一號去行街，佢想買一張BB氈，但係買俾自己用，去D賣BB用品的舖頭睇，D阿姐係咁問買俾B仔定B女，我地兩個雞啄唔斷，真係懶得理佢，見到一件幾OK的BB衫，我話買俾跳跳虎著
阿姐問跳跳虎係係男仔定女仔，朋友一號順口答一句公仔，兩個人大笑起來，阿姐好糗
頭先帶小朋友返屋企時諗番起呢件事，會心微笑，我去睇玩具，睇lego唔係買俾個仔，真係唔需要解釋，蠢人點會明白人心
當你好鍾意一樣野，你會盡量將它留在身邊
頭先訓到兩點幾起身，食d野再睇番尋晚冇睇的劇集，本來要改稿，但個心飄左出去，出左去村口的跳蚤市場睇下買唔買到飛鏢靶，因為想改裝一個飛鏢靶鐘
行得一陣心思思唔夠喉，行埋出西鐵站，無意中見到小朋友，又見到幾個鐘都幾靚，屋企只需要一個掛牆鐘，但拿唔定主意，叫佢過來過目
其實我第一眼係鍾意而家呢個紅色鐘，因為我想買一屋紅白家具擺設紅色嗰個鐘好啱心水，但好衰唔衰又到另一個透明黑針的鐘，好有style，如果有紅針version一定揀左
結果佢扑鎚揀左而家紅色呢個，掏出鈔票，送我一個鐘
真係越睇越靚
有時候揀來揀去都係徒然，最初反映潛意識的決定就是最好，想做就應該做
喜歡一個人，反而不一定留他在身邊
呢排寫少左野，訓覺時間又少左，又唔見得去好多街，時間偷偷溜走，總覺得不夠用
進入倒數一星期，從他手中收了禮物一份又一份，唔知仲有幾多驚喜？
去年十一月這段時間，很多事情發生了
算是彼此陪對方走過了一段低潮日子，回想剛才在嘈雜的酒樓，四目對望，這個時空只有我倆的感覺真棒﹗
每次，在你的瞳孔都找到我的笑容
屋企有d接收盲點，其實未嚐唔係一件好事，落得清靜
本來諗過頭先去元朗買電話，但冇出去，佢建議我去鴨記搵
周六起身喉嚨痛，喇野…
拍完野，趕及尾班船入塔門‧西貢，四仔旅行團
入黑到碼頭，有著草的感覺，碼頭泊幾隻大飛，忽然視線範圍以外有把聲音問係咪去塔門，不過都係等街渡穩陣d…
入到去超勁肚餓，無丸bbq喪食，儲足能量抗冷，跟住拎住兩枝雪條登頂，hea在草地上，不要亂動，否則會和牛糞親吻，原來香港都睇到初楷版銀河，好凍…
訓一陣再去睇日出，又吹風，真係好凍
食個餐蛋麵，再去放風筝，從來都未放過，放手就走，唔需要任何技巧，隻風箏飛到國金咁高，原來係真架
紙鳶線界手，我諗係每個新手都會遇到…
大閘蟹宴終於搞得成，三人行，小學+中學d friend，只有這個combination
食隻蟹，飲杯薑茶，再飲埋杯花雕，病徵立即減半有突，大閘蟹能醫百病﹗
朋友一號來左參觀，得出的結論係「好開心」，不過未執好的野好似反而越執越亂…
佢話個業主仲未執好d手尾，手腳慢…
有時事主都未出聲，當事人都唔介意，塘邊鶴反而最多野講
bite of today=cul唔cul -tivate到？
原來有好多戲迷，成日自己去買飛睇戲，跟住用自己的方法再將套戲解讀一次，心裡寫篇影評
人生在世，隨年月，閱歷增，不同的場合帶上不同武器，穿上不同程度的保護衣，只有在安全的地方才會卸下沉重的裝備，不用再包裝心裡的說話和修飾粗枝大葉的動作
有一日帶左閃令令戒指出來，有人眼望望，打量一下
她善意提醒，「咁的年紀帶隻戒指，會惹人誤會」
耳朵將接收到的聽音幻化成腦電波，訊息傳到腦海中分析，呢句說話在大腦被斬件處理，scanner掃到「咁的年紀」即響起警號，咩意思？「誤會」又會誤會D乜？
總之，在一眾可能性之間，她的意思應該是最簡單的：到了適婚年齡，不要讓一隻戒指令人誤會你已嫁，可能會使人卻步
重要嗎？
最近結緍相簿四處流傳，帶著笑容與祝福，不過身邊也有很多朋友、同事，曾幾何時也是帶著笑容與祝福結了婚，如今卻成了怨懟，後悔不已，何苦呢？
有人曾經用經濟理論去解釋結婚這個行為，用以增加收入、生產力和減低生活成本的一種行為
人一生會遇上很多伙伴，可以分享人生一些點滴，或相知相交，或成為婚姻中的另一半，也許是剛巧在「適婚年齡」這個階段碰到這一刻最理想的一個；後來人生步入另一階段，也很大機會遇到那階段十分理想的伴侶，比較克己壓抑的，叫紅顏知己，稍為放縱一點，大概被稱作婚外情，我想，也許是時間的錯
很難想像愛一個人愛到想跟他一起生活的感覺…
一個小朋友多愛吃糖果雪糕和薯片，如果眼前有源源不絕的供應，他總會飽，即使飽了再吃，也總會吃膩
結果變成冬天有人暖被，病了有人照顧，家務開銷一起分擔的關係，其實只是一個生活拍檔
人之所以是人，喜惡愛憎不盡相同，不要太疏遠，不要太接近，善變的人，要愛情不要家庭
其實個電話未落bid架…
頭先放工終於買左個微波爐返歸，亦買左個掛牆鐘，而尋日亦無意中發現深水步好好食嗰檔魚蛋喺荃灣開左分店，尋晚打邊爐太飽冇食到，頭先食左一串
真討厭，原本我冇預星期六拍野架嘛，去camp好地地，真麻煩
就係唔鍾意聽，唔鍾意見，就聽唔到、見唔到，不會亂我心智，但就唔係個個都擔當得起，真想學做一個目中無人的人
只怪我真係唔夠細故，唔識視而不見，唔識置身事外，亦都唔識擘大眼講大話
人前人後孖公仔，而家竟然話唔係好熟，總有一面是假的，不肖同呢d人類說多一句話
今朝都真係幾凍，著單薄d重溫喺西藏的感覺，哈哈
尋日早走，可能都係心急去對號入座啦，非常極之急步碌去西鐵站，今朝返工，由鎖門一刻已經慢慢行，hea住行，唔使急，唔好快，夏天無謂行到身水身汗，冬天享受一下寒風，越近公司越行得慢
放工去睇電飯煲同微波爐，再去打左個邊爐，好飽好暖，塊面紅卜卜，再散步幫助消化
fancy電話，紅色，喺淘寶搵到
因為一點食飯，平時晏晝放半日com off的話，一點就走得，但今朝突發想安排放假，原定可以做一日的野要一個朝早做晒，結果兩點先走，好肚餓
急急腳走係因為佢擠到時間出來，ko嗰套成三粒鐘的世界末日戲，碌西鐵去奧運站，搭八買搭十開場的飛，未食飯超勁餓，買左豬肉燒賣頂住先，好彩trailer都睇到冇miss到
睇完五點幾，行番去旺角，第一時間篤番串魚蛋，跟住行左落油麻地，趁長龍未開始，食左拉麵，好味道﹗
之後係咁行，周圍行，去廟街的地攤睇下我d西藏野，會唔會喺廟街出現，哈哈，好在只見到一樣，見到個套娃本來想買架，不過執好野安排一下d位置先…
之後慢慢散步，食左件桂花糕，行到去柯士甸站，碌西鐵返歸，超快，半粒鐘only
佢問起尾班西鐵幾點由錦上路碌走，真係考起，曲線地提左我要research下返歸的尾班車時間
超級勁眼訓，因為尋晚又執野，只係訓左四粒鐘就返工，再之前一晚又係訓左四粒鐘就去拍野…
恰左陣，十一點幾醒左再執野
因為尚欠部分物資，有d可買可唔買的傢私傢具未買，有d雜物、垃圾未處理，所以間屋算係八成執好
因為個上網plan有家居電話，所以要買個fancy的電話；另外睇中左一張白色電視几；未裝石油氣；重過7仔生活，除左儲糧仲要配備一個微波爐；另外仲有燒烤爐、可活動簡約電腦枱，希望唔好越諗越多啦…
原訂的bbq因天雨關係取消，尋晚拍完野入左元朗食飯，跟住食糖水，超勁飽，日抖尚可來去自如，但原來夜晚喺元朗會蕩失路…
原訂今晚的大閘蟹宴延期進行，周五concert，周末塔門觀星宿營，趁出故仔之前玩盡佢
尋日去左九龍灣，一次滿足左n個願望
食左全香港最好食的車仔麵，行左三大傢私鋪(本來係四大架，但原b&q執左都唔知)，喺宜家ko左好多野，又食埋足三兩漢堡包
將所有野一次過拎番新居，原來有巴士，咁就碌巴士返去，喺大欖轉車，唔使喺西鐵站行返去咁遠，又唔使行美孚嗰九條街
因為一篇評論行左兩間書局，搵到《四代香港人》，原來係07年的作品，不過今年已經加印到第9版，你話犀唔犀利
尋晚喺新居過夜，因為今朝裝電錶，執下野，hea下…
今朝等中電整電錶，送冷氣，睇晒呢本書
我是第四代人，我不認為我不懂玩這場遊戲，而是我早已太了解這場遊戲，我十分明白遊戲的優勝者可以選擇，失敗者只有被選擇，所以我曾經很努力去玩。然而，當小試甜頭後，拿得好成績，發覺原來不是甚麼一回事，遊戲可以玩，只是覺得沒有甚麼意思
我懂得玩，可以玩下去，但我可以選擇唔玩，就是這樣
書中說第四代沒有個性，實情並非如此，而是知道表露個性沒有好處，個性只是在其他人面前隱藏起來，只有同代同或知心人才看得見；不是沒有喜好，而是環境、強權迫你不要選擇自己喜歡的，與其說了沒用，不如不說，這是另一種消極態度
或許，舉個例子說說
有一個母親，帶一對子女外出吃飯，好像很民主地問二人想吃甚麼，最初，小男生和小女生不虞有詐，一副歡天喜地的樣子告訴媽媽要吃炸薯條、雪糕、炸雞…
母親聽著這些不健康食物的名字，眉頭縮了一下，瞳孔一張，勉強地掛上微笑，問孩子們這些食物有甚麼好處和壞處，孩子吃力地數，跟測驗考試一樣
母親循循善誘地問一句，這些食物有冇益？二人戰戰兢兢小聲地回答：沒有
母親再和藹地問一句，沒有益，食唔食呀？兩把小聲音失望地回答：不吃
久而久之，孩子聽到選擇的問題，就會直接答母親想聽的答案，因為發聲爭取也沒用，反而碰得一身灰
其實這是母親的選擇，只是假裝讓他們選
母親聽到滿意的答案，拍一拍他們的頭，讚乖
第四代人不是沒個性，不是不去爭取，反而是太懂看眉頭眼額，消極抗議，說得漂亮一點，叫忍辱負重吧﹗
另外，好耐冇坐喺大銀幕前，近期大作，不如睇下世界末日戲啦，佢已經應承左，擇番個吉日先…
體會人人皆有，不盡相同，但是否有深度，在乎你用甚麼心情看待
拍照是一個極端要好的例子，有人拍一幀照片，到此一遊，目的是「如實地記錄」一件事情在某特定時空凝固了，還在右下方雕上年月日時分秒
「如實地記錄」之上可以添上幾分姿彩，拍得漂亮一點，與美感扯上一點關係，這樣應該叫「有美感地如實記錄」
再高層次一點，為「有美感地如實記錄」的相片與拍者的思想感情作有機結合。但吊詭在於埋在新細明體裡的作者情懷，讀者心領也未必神會，更何況沒有密鑰的映象，如何為沒有宣之於口的細膩感情解碼呢？
科技進步，拍照容易，分享容易，但看到太多沒有靈魂的照片，不禁為相機的發明者而哀
我不是說要每幀照片都要拖著一個情感標籤，偶爾為之即可，但基本原則，應該要拍得美，即使無話要說，或許有機會讓讀者，有一刻若有所思，也可
有人勤勤懇懇，老老實實地活著；有人要吃好、住好、玩好，不過，你的生命有沒有一個情感標籤？
每年生日我都會安排放假，去旅行，因為去年初去左台灣同海南島，所以生日冇得去旅行嚕，改為短線澳門遊
今年因為要去西藏，亦唔能夠等到十二月先去，所以今年放假同旅行的quota都用左，生日周從簡，咁啱又係weekend，攞多兩日假過到個生日周就ok了
佢建議去廣州，都係一個唔錯的選擇
今年負責大事回顧，明年仲有世博
再update一下間新屋的狀況，有水，有限度供電，天線裝好，但未有冷氣熱水爐，張床星期六送來
所謂有限度供電，其實有一個故仔…
話說我樓上嗰家人已經搬左入來，冇電過左一段好似倩女幽魂咁的生活，後來個師父幫佢地喺隔離間爛屋「借」左d電，所以而家全幢樓都叫「有電」，但只限開一d小型電器，開盞燈問題都不大，但如果要成晚開住個冷氣或者洗衫洗兩個鐘，應該就難d
我好質疑「借」，乜電都可以借架咩？隔離間屋個業主知唔知架？d電費邊個交？
裝天線個師父睇過個電箱，估計15號裝好電錶就真係有電喇
所以樓上個兄台話到時要搞番個亮燈儀式﹗
話搬搬左成半年，搵好屋都搵好三個月，到而家都未住得，初初係有d失望，但既來之則安之，而家我又唔算有咩大損失，況且原本去旅行要納空租半個月，而家慳番啦，未嘗唔係一件好事
我都認同個業主同agent都有問題，有d野講到唔清唔楚，而間屋未搞掂都唔應該咁快放盤，即使放都應該「有經驗」要搞幾耐，好好作出交待，不過我覺得而家又唔差得晒，咁樣諗開心d，所以你都唔使再為呢件事動氣，或戥我不值
你的好意我心領了﹗
天氣轉涼，house warming唔使諗啦，不二選擇一定係燒野食﹗你地d星期六日好好安排下喇﹗
睇過一套戲叫eye wide shut，中譯大開眼戒，晚上，男男女女進入另一個世界尋開心，很超現實
《藏遊誌》陸續貼出來，雖然平日不是多言，也不是經常見面，但總會在very moment，不經意地讓我知道你經常守護在我身邊，謝謝你﹗
忽然覺得，去年地震這天大的事，我去感受過它的威力，從餘震中檢回性命，並將我以往的價值觀推倒重砌；西藏，海拔三千過外，我一個人走過去，又平安走回來，轉過山，轉過湖，以後還有甚麼事情難到我？
惡同大聲唔代表有道理，但有時候大吵大鬧，理虧和怕事的人會息事寧人，所以在某些情景要保持一副理直氣壯的裝備，才不會被人欺負打壓
返來之後都冇時間好好休息，仲係覺得好攰…
尋日返左一日工，今日放自己假，佢陪左我去新屋，帶齊買齊祭祀用品，點起西藏名香
靜靜地，兩個人坐到天黑，舒服得差d訓著
有時候做某些事，是做給某些人看，要讓他們知道，自己的位置在哪裡，算是一個姿態吧﹗
從西藏回來，太多所思所感，先逐少逐少寫一d「大圍」感受、體會、反思，其他細節，容後補上…
我記得出發前不久，收到一位朋友的留言，看後在我腦海裡閃過一些四字詞，包括「不可理喻」、「不知所謂」、「莫名奇妙」
我沒有即時回覆，怎麼說呢，還是自己的老毛病，我總覺得這裡的讀者還是看不懂我的文字，藏在文字裡的意思，或者和我解讀同一個「詞語」的方法不同，總是捉錯用神，如果我即時把這三個四字詞寫在這裡，誤會更深
起初我又不想解釋，不想讓人有「自圓其說」的感覺，但還是覺得，她用到「自小一起長大的朋友」這麼強烈的字眼，也是基於禮貌，應該回覆的
要檢出來的字詞：「原來朋友係咁」，另外還有「九男女camp camp地」一文和飲宴事件
我從來未試過有想去飲宴的感覺，不過今年有兩趟，反而係我好想去的，分別是一個很受人愛戴的舊公司的friend甲和「自小一起長大的朋友」乙，對甲一直很過意不去，對乙也怎會感到好意思
飲宴可以選擇去與不去，工作不可以選做或不做，也不能選哪天做，哪天不做，這句說話，不知大家明白多少
甲的日子之前，旁邊不停有朋友提我、問我去不去，我分明記得這個日子，但我也一早肯定會與工作相撞，我說盡量早d拍完野就出現，結果拍完還是要晚上十點幾新界西，最終我沒出現
乙的日子我之前一直都記得在哪一天，我沒有必要，亦不曾想過要怪「自小一起長大的朋友」沒有早一點或一直在提醒我，不過去到那個月的時候，工作時間表特別亂，亂不只代表實際的排序混亂，還包括因而衍生的思想和記憶的混亂
在一片混亂中訂事情，訂的時候心只想著過關了事，但其實一個矛盾暗地裡產生了也不自知
直到大家都以為是理所當然地當晚一定約在一起，其中一位「自小一起長大的朋友」通知我，那一刻我才知道出了事，在這個地步，只有一個選擇，就是現在的結果，無奈也沒法子
至於另一篇文章的事，倒想結合今趟西藏遊一起說…
逛在八廓街買手信，有很隨便買的，買來隨便送，送左都唔可惜的手信；有些數算過的手信，不能買得太多；有的挑給自己，但總想多買一份
買手信，順便為自己盤點一下自己的友好數目，映出心裡想著甚麼人
逛八廓街，說要順時針走，任何一點都可以是起點，任何一點都可以是終點，玄嗎？
有一天一個人逛，很多人都跟我一起走在同一路上，即使同一起點也好，速度也不一致，有人走快了，有人走快了，就像人生，有些朋友你跟他在生命的某一點相遇，一起走一段路，同一條路映入大家的眼中都不盡相同，感受各異，所以我們是人，我是我，他是他
既能同步，是緣是命；不能同步，也是緣也是命
又如我在拉薩碰見的香港人，我們都在同一個地方出發，走不同的路，坐不同的交通工具，感受不同的體驗，不過，殊途同歸，來到拉薩，碰上了，這是另一種緣份
又比比青藏的公路和鐵路線，走差不多的路，不過汽車與火車速度迴異，但大家大致都能得到相類的體會
很普通的朋友就像在八廓街上碰上的這些人，大家在某一點相遇了，有點緣份，一起走一小段路，不過之後各散東西，十年八載後還記得大家的名字，也算走運
有些朋友之所以成為朋友，因為大家都有一個共同的目標是利益、是喜好，是甚麼也好，沒有這一點東西，究竟會是怎樣的關係，很難說清
如果是「自小一起長大的朋友」，應該如青藏線，一同分享、體會、理解一路上的苦與樂，只是有人走得快，有人走得快，但也可能說是每個階段大家的頓悟各異，但還是目標一致，同途也同歸
可能我走快了，也可能是我跟不上大家的步伐，我不想周旋在工作的怨氣中，為甚麼每次碰面的話題都是為工作訴苦，就像一個申訴大會，「自小一起長大的朋友」就只有這些？
有一次某甲說到人大了的隔膜、禁忌，其實只是自我審查
至於「原來朋友係咁」，註明用輕挑、串串供的語氣表述，口語化一點，說成「呢d咪friend囉」
哎，就係咁簡單…
所以現在再解釋當時三個四字詞如何出現，應該比較容易理解
「不可理喻」：乜我的說話咁不可理喻咩…(理喻=>理解)
「不知所謂」：真不知，所謂何事
「莫名奇妙」：就係唔知點解會有以上兩個情況出現
這是我的文字遊戲
這次，也有一點「言者無心，聽者有意」，就是「對號入座」，自己拎左張飛坐埋來的感覺
***********************
另外，簡單記下幾點，容後解說
~一個人，在陌生的旅途上，感受到人與人之間的隔膜反而越小
~真的很怕死，每趟飛機就覺得生命懸半空，與死亡很接近
~要試試解釋緣份，好好分析這幾天曾經睡不著的日子想過的臉孔和感動的事
~在最接近太陽的地方，有很多第一次
the trip is counting down and i am departing to the everest now!
the driver will pick me up at 0840, going to 羊湖 and 日客則. the soul is tomolo's visit of the everest and stay there for a night, likely in a temple with the hightest altitude. the third day will go back to 日客則. another day os at least 7 hour travel will take me back to lasa
i have booked the ticket on 25 oct, fly 成都, stay there for a night, likely in the airport again, because 起飞时间 is 2040, arrived at 2235 and fly 深圳at 26 oct 0800
fri搞掂故仔，搞掂短故，四點幾離開公司，一支箭颷左上深圳
晚餐食鐵板燒，舊幾水人仔，真係超級抵，跟住搵左間好舒服的酒店訓覺，自從宿營之後都冇左高床軟枕，再加上本身攰攰地，超勁好訓
訓醒今朝食左d野，碌左60蚊的士去南航，諗住搞機票，點知搞唔掂，激死…
話說我只係唱左五舊水港紙，加埋我本身d人仔，打八折洗得番四舊幾，間房三百幾，又買左d dvd，淨番百二蚊，坐喺的士上，冇盡頭的公路，唔知喺邊的目的地，每跳一次錶，感覺就係d錢係咁跌落地，鈔票生出對翼係咁飛走，只知袋裡越來越少錢，好驚唔夠錢落車…
結果，哂左六十蚊，但又訂唔到機票，激死人喇﹗
原來嗰座大廈離地鐵無雷公咁遠，為左慳錢，我決定搭巴士，去到竹子林再轉地鐵去少年宮書城碌一陣，去完書城再碌地鐵+巴士返皇崗，因為我要返錦上路，皇崗有大巴
一個人喺深圳搭巴士，當係預習一個人喺拉薩碌公車吧﹗
沒有責任、不用管別人的想法最好，放工我會將個腦收埋，閂機，叉電，放假，同樣道理
如果唔係要接收某些電話，我一定閂機兩星期，秘密號碼淨係do re me先知道，而家大計被破壞晒啦﹗
hea遊西藏今晚多一點眉目，因為價錢(人仔1250+稅50)，因為執野，都係揀星期二13號08起飛，所以星期一要出發，喺廣州過一晚，06要check in，窮遊西藏，likely喺機場過
不過點樣碌去廣州機場仲係一個謎…
酒店搵左喺吉日附近一間今年先開的新酒店，睇d相已經揀定呢間係不二之選﹗
計劃一日只有一個行程，重點係hea，慢動作relax，第一日淨係travel都去晒d時間，熟習一下酒店附近的路，周圍八下d local tour或者拼車團，第二日去大昭寺，買定飛，第三日去布宮，第四日去拉薩河附近踩單車，第五日即日來回桑耶寺又或者可能有機會喺寺住一晚，第六日or第七日可以去納木錯同珠峰了
聽日有時間要去睇下d睡袋，如果可以買到一個高度計就好，有網友介紹去鴨記搵
收到一個message，今日好眼訓，遲d先講番我的諗法
某日上到公司5樓一某部門，無意中見到一間房喪播咸片，應該係有線成人台，經常有人喺嗰間房出出入入，真係滴汗…
點解返工可以睇咸片？興趣定係工作需要？
無論係何者都好變態，如果係為工作需要而睇，被迫睇，會唔會睇到性冷感？
頭先朋友甲打來，想出讓某歌手的演唱會飛，莫講話我真係冇興趣，即使係有興趣，都好冇誠意囉，一係一早約我去睇，而即係幫你梗張飛啫…
又學識左，原來朋友係咁用的
仲要被人譴責我唔開msn，咩事呀？
出故仔連訓都冇得訓，真係冇咁閒開msn，so naive
有活動都唔叫我，連通知都唔通知一句，再學識原來朋友係咁
呢排睇到太多野，睇到最人性、最勢利、最醜惡的咀臉
很想一個人，離開這個是非之地…
收到他的問候，想起很多關於他的往事，只想嘆氣…
曾經合唱過一曲，好像觸動了敏感的神經
怎麼會開始對你有了感覺
深陷朋友戀人之間的危險
我只覺得，夭折了的愛，沒有埋葬的園地
廣州-拉薩機票又降價了，人仔1380，睇來臨近出發日會再平d，下周中要開始食紅景天了﹗
鼻塞塞，唔知係因為轉天氣，定係作病，如果係後者就麻煩了，感冒唔能夠去高原地方，所以聽日返去寫稿前要去睇醫生，確認一下，有病就快d醫，免得自己辛苦
ot左成個禮拜，平時遲返嗰少少，咩都蝕番轉頭，仲要蝕突啦…
今日中秋節都要返去拍野，將思念藏在月色中，讓抬頭賞月的他接收吧
前日落大雨，黃色暴雨警告，不過心情仍然好靚，落住超勁大雨都一齊食左餐飯，好開心
一件小事，令我再有衝勁捱下去…
頭先諗起上星期廣州之旅，喺深圳轉火車，和諧號，空調軟座，仍然坐到我腰骨酸軟；月台上泊著另一列，忘了是往肇慶還是韶關的列車，硬座，一排座位坐三個人，接踵摩肩，沒有冷氣，窗是往上推那種，只能半開
超勁熱的天氣，企喺月台都會流汗，那一刻我在想這種車怎樣坐？係咪人坐？
但車廂分明擠滿人，擠滿一張張笑逐顏開的臉龐
我們這輩生長在物質豐腴社會的一代，享受慣，走不了回頭路，捱不了苦，得到越多，越不能失去，相反他們本身得到不多，也不欠甚麼，沒那麼計較，這是另一種單純、知足的幸福
他說，我成日都會諗如果冇左你會點？
只係諗唔到，他會將這種諗法告訴我，倒有點甜絲絲~
今日有個同事返工期間整親條腰，好彩佢冇事
再提醒他第日做野要小心啲，打份工真係唔使咁賣命，身體有咩冬瓜豆腐，即使係餓親個肚都跟你一世
做故仔之嘛，我又唔係新界隻牛，齋勤力係冇用的，食腦最緊要，用最少時間最少資源，最唔辛苦的方法做到同一樣的效果，咁先係精明
畫面凝固在馬路的兩岸，這一次，碰面不相認
頭先入左錦上路，見到中電工人掘地，距離有電的日子又近一點吧…
本來想攞番i-pod條電腦線，見到一大堆紙箱，真係唔記得放左喺邊個裡面，結果冇搵
亦諗過拎兩套衫走，唔使著來著去都係嗰套，但又唔想拎，所以又冇左件事
原來公眾假期收解碼器檔野唔開，所以無謂拎住四圍錄，算數
碌西鐵返沙田，訊號故障罰企，O 晒咀…
訂左張墊褥俾梳化，12號先有貨，不過好可能唔喺香港，呵呵呵
無意中睇到佢的日記，我的名字，我的小事以歪歪斜斜的字體，寫在簿中的單行線上
為我的事喜，為我的事憂…
希望以後寫在本子上，關於我的，都是開心的事
每次都係咁，總要抉擇，總要取捨…
點揀好呢？
任性一次，還是理智一次？
我的priority當然是任性，豁出去，甚麼也不管，如果這個機會錯失了，甘心嗎？等到下一次嗎？
尋日開始左長工時周，夜間同事開始發現我的蹤影…
基本上由上隻故仔已經開始，但今次呢隻故仔確切執行，平日如常返工，放七點就收七點，只有剪片周和剪片前一周才容許自己有限度超時工作
生活是屬於我的，工作永沒有做完，一定要畫一條底線，退一步，只會有人得吋進尺
經濟學學懂了機會成本，為了做某件事，就得犧牲另一件事，即使某件事多不情願也好，你要做，就得放棄別的事情，所以，周六得犧牲了參與一位中學朋友的婚宴
生保床訓唔著，未夠九點就起身，從廣州出發的火車上，撐著頭，即使坐姿如何不正確也要睡一覺，趕在拍攝訪問前養多一點精神，讓沒電的電池能叉多少叉多少…
離開廣播道，著車長在九龍塘讓我們下車，回家去
很久都沒有在這個車站候車，也猜不到會在這樣的情況下碰見這個人
我沒有認出他的背影，他回眸一刻，我甚至沒有一下就認得是他，累還是沒心裝載，沒有要解釋的理由，被瞪著的我下意識「嗨」一句
基於禮貌，也可能是唯一的話題，我問他昨天晚上有沒有去飲宴，眼前這個人，熟識的聲線，陌生的感覺，簡短的回應，我沒有想猜他跟我碰面的心情的意圖，再下一句，輪到他說，中秋可能到朋友甲的家，我答「我應該沒有空」
對話就此完結
我話俾佢聽呢件事，佢覺得我嗰句唔得閒可能俾人錯覺我唔想同人講野，但這是事實，我10號出故仔，之前嗰個weekend點可能唔使寫稿？中秋就在weekend，這是條件反射的答案，沒有隱念意思
如今，說也說不清
不過，有說清的需要嗎？
我同佢閒聊，為「第一次重遇」做了若干假設，一年多來，我認定自己見也沒所謂，不見也沒所謂，直至今日傍晚
我曾經諗過，係咪有咁多巧恰，這些聚會有他冇我，有我冇他，是不是有些人刻意安排了甚麼…
而家「終於」當重遇了，點講好呢…
其實冇咩必要我真係唔係好想見到他，共對亦無言的無奈，可免則免，我也恨自己無情，看著他沒有勾起半點回憶，開心的沒有，不開心的也沒有，甚至連一個舊同事也不如，沒有關心他一下的意識
夜晚沖完涼，如常blog，憶述這段小故事
憶起那一年那一天，巴士車廂中，不知從何而來的情緒，我黑著臉，但心裡卻想著他，從玻璃窗中偷看著倒映中的他…
故事在巴士車廂開始，今天，無意中看到車窗中倒映的自己，我記起這一幕，這個故事也在巴士車廂中結束，以後不再翻出來品味，畫上句號，完美與否，已經再沒有關係了
終於等到搬屋，不過仲未入伙，朋友甲話，算係a step forward
其實之前都執得七七八八，但執下執下仲好多濕碎野，今朝執到四點幾先訓，所以今日成日都好眼訓…
幫我監場搬屋的他見到我房裡面張凳凳背爛左，叫我唔好搬，我話拎落樓下掉左佢，俾d阿婆阿伯執來擺喺巴士站旁邊等巴士，都好過益個業主
我不滿的係佢應承左會整的廚房冇件事，話換個冷氣都冇件事，冇口齒唔守信用，違反承諾真係想唱衰佢，佢仲唔知衰，我問佢會唔會俾番幾日免租期我搬屋，唔俾咪唔俾囉，講到好似我唔著咁，有d傢俬原本諗住唔搬，我問佢要唔要，而家去shopping咩，已經唔使錢送俾你，嫌三嫌四嘈冤巴閉，索性所有野都搬走，唔要掉左佢落樓下俾d阿婆阿伯執左去賣都唔留低益佢
尋日去左旺角research，好耐冇食過雪糕，經過哈根達斯，order一杯happy3，可以揀三款味的雪糕，仍然是我最愛的raspberry，仲有belgian chocolate 同strawberry cheesecake，3個迷你雪糕球+曲奇+果仁碎，so滿足﹗
搬屋前同他喺樓下飲茶，好搞笑，搬屋公司個領隊好似一個同事，感覺怪怪…
架車唔夠位坐，所以我地兩個自己搭車過去
兩個衣櫃、加大雙人床+床褥、高身書枱、鞋櫃、雪櫃、玻璃餐枱連椅、拍死馬電視機、小型電視几，再加大量雜物，紙箱、紅白藍、大小膠箱、麻雀枱、圓凳、散件電器、喼......報價1500，只係加番行大欖來回隧道費，我企喺度睇住佢搬都覺熱，冷氣未裝好，喺屋裡面指指點點分配物件擺位都出晒汗，見佢4個人搬得咁辛苦咁pro，俾左二千銀免找
跟住返番去交鎖匙，真係同個業主講多句都無謂，攞完按金喺樓下間酒樓打邊爐，食到好飽呀﹗
拖住個喼，抽住個手袋，帶埋部腦，紅色跑車送我返大圍阿媽屋企開始宿營生活
有d人你唔想同佢，多講一句野，多見一面都無明火起﹗
正所謂哀莫大於心死，其實，我真的沒有甚麼特別感覺，好像事不關己的等閒事一宗，沒有害怕，沒有怒，沒有不值，也沒有所謂
從未有如此強烈感覺
繼續執野，進入最後倒數階段
呼一口氣將家居放棄，遺忘你，搬出這天地，妄想悲哀會飄離，獨自活著我鼓起勇氣…
星期5的飯局取消，所以繼續執野…
10個紙箱已經用左8個，6個紅白藍亦用左4個，我一早都話唔夠用架啦…
星期6拍野，行街食飯，晚餐只有一味餸，就係為左食呢一味
麻辣魚，d汁撈飯真係勁正，食到身水身汗，但真係好好味，乜都抵番
食完再行左陣，哎，著錯鞋，行到對腳勁痛…
等夠鐘，朋友甲喺某樓上酒吧搞生日會
你問我係咪好想去，其實唔係，因為唔係好想飲，但更加唔想的就係返屋企，對住一屋紙箱紅白藍，兩害取其輕，所以去左飲野
本來只係唱歌，唔知點解又係跌落喪飲的圈套，其實我都唔記得係咪真係飲左好多，不過有一段記憶失蹤，咁就肯定係飲貓左…
只係記得我喺麥記等佢，咬左佢個包一啖，但唔知點解佢會來接我，記得在車上強行要自己唔好訓覺，因為佢訓左我要認路，記得係我俾錢搭車，沖涼時好似劏左一次…
今日成日都唔舒服，訓唔夠，頭痛頭暈肚漲漲，成日都想劏
明明記得尋日已經將銀包裡面的錢洗晒，頭先諗住去拑錢，發現銀包裡有張500蚊，打俾佢問，佢有冇陪我拑過錢，佢堅稱話冇，真奇怪
後來，睇番銀包的提款記錄單(我習慣會拎)，又真係喺銀包裡面喎，20號凌晨三點幾原來我拑過錢，哦…
真係完全唔記得有件咁的事
頭先去左飲茶，好餓，但唔想食野，感覺真係古怪
夜晚繼續執野
耳仔又敏感，身體向我發出警號，即係抵抗低左，要多加注意
星期5晚出左去飲野，返到屋企樓下已經係朝早六點，想嘔…
沒有宿醉，好口渴，口渴到九點幾起左身，狂灌一罐冰凍zero，再訓過
本來想打邊爐，但真係唔餓，結果bbq
星期日又訓到晏晝四點，既然一日食一餐，就食打邊爐一餐，馬拉松式打邊爐，由六點食到十一點幾，超勁飽
結果，星期一感覺就係食濟左，感覺係好唔想食野但又肚餓，又眼訓，晏晝又放自己假，醫醫心理病
每次，午睡的時間特別過得快…
六點前會掛八號風球，就趕在六點前出去，未食午飯，咖喱魚蛋、牛雜、椰汁充飢，行街，不過都唔係好想睇野
有d舖頭落半閘，我話想行都冇得行，佢話係都要走入去，我再附和加鹽加醋，入去叫佢拎晒d鞋出來逐對試
8號風球下，佢批評d人服務態度差，我話d sales心諗你地班契弟8號風球放假來行街，我就冇得走來服侍你地睇你地行街，心情邊會靚
行到咁上下都係決定去食飯，費事陣間想食都冇得食，食完佢冇車走，咁就揀左間韓食店，order左一個石頭飯同一客豆腐辣湯
食完，散水
星期二又轉故題，叫得逞還是沉冤得雪好呢？
尋日將status改左：光芒和鋒芒都不會褪，繼續清高，仍然自負
說話係講俾自己聽又好，講俾人聽都好，自己聽完哈一聲，人地聽完哼一聲，目的已達到了﹗
有d人成日假online，明明在線但又唔應人，無禮；有d人就假offline，暗暗地，偷偷地窺看打探你的一切，無賴﹗
睇番8號風球的新聞，又係尖沙咀追風，水浸唔去上環，改去大澳而已，無聊
不招人妒是傭才應該加上註解，就是光芒勿露
訓唔著，唔知同放工飲嗰杯come buy大杯珍珠奶茶少甜有冇關係呢…
擺喺枱面的《沿著青藏鐵路》終於咪完，睇到本書甩皮甩骨
換上中國旅遊出版社的《拉薩》，精裝書，160頁，應該會好快咪完
習慣每日一則，早幾日佢冇send message俾我，原來佢記得架，我係咁意話早排有幾日冇收到，佢強調只有一晚冇send
係，只有一晚
呢排少左出街，一來時間唔夾，同埋搬屋，想慳多d錢，應慳盡慳
好耐都冇食過小肥羊喇…
啱啱發現廣州飛拉薩機票11/10號起有半價，好抵﹗唔知再遲d仲會唔會平d呢，嘻嘻
周二早上忽然有崩潰的感覺，三十幾度高溫，太陽殘眼殘到對眼差d掰唔大，行左出荃灣海濱冷靜一下，呼吸一下，的確好左一d
周三，又墮進情緒低谷，早上決定放自己一日假，醫一醫心靈的傷口
一覺訓到晏晝三點幾，發左個夢
起身食左少少野，去行街﹗
無稽的香港人﹗
頭先行街時聽到兩個中女討論今日係090909的事，咩999長長久久，一定要挾持男友一齊食飯，咩一生人只有一次999，再下一次到等90年之後，冇咁長命…
頂…
每一日都係咁特別，過左就冇，難道你可以返番去04年4月4號嗎？040404咪又係得一日，為呢d無聊野紀念慶祝，甚至揀呢日來結婚的人真係超低能
2 September 2009
入左錦田一轉，bad news…
鎖匙未到手，水，未有；電，未整，現階段推斷，9月中前一定搬唔到入去，現址租約好似去到9月25號，well…
不過，唔知點解，又唔係真係太憂心，亦未感到太煩，只係有少少空歡喜一場
五點零離開錦田，入左元朗，本來只係諗住飲杯野，但見到壽司店，即刻挾持同行的他入去食個tea+dinner，食完返歸，超勁眼訓，如果唔係落雨d雨撇濕我隻腳，我諗我唔知醒
但睇番鐘，都只係訓左個零鐘，不過唔知點解，每次咁樣快叉都好見效，好過訓成晚﹗
1 September 2009
將facebook和msn的status一次過改為「不招人妒是庸才」
意思顯而易見，不用解釋
星期六暢快地訓一覺，晏晝出左去行街+食飯，呵呵呵，多左隻介指仔，閃閃令
星期日賓士房車喺樓下接送，喺荃灣搵地方食飯，兜到暈車浪…
食完飯攞車，眼前出現一部白色maserati，真係想尖叫﹗
之後一踩就入到黃金海岸camping site，不過都只係一間三房大廳有海景的residential appartment，經典老套的集體遊戲，晚飯係pizza+炸雞，都唔係好記得d時間係點樣過去，只係記得三點之後先去訓
星期一朝早有老麥早餐催促我起身，唔夠訓，好呆…
眾人的電話不停響起，在車上，在沙灘，喋喋不休是工作細節的交待，關於工作的話題縈繞大氣中，很壓迫
放假，就應該放假
原本只係想hea下，不過好似比未去個camp之前仲攰，真係始料不及
24 August 2009
繼續拍我隻肥仔故，聽日剪片，但頭先夜晚仲拍緊，仲要係拍part 1用來開頭嗰場「戲」，到而家一粒字都仲未寫過
有時，真係覺得好似拍戲，搵一d唔收錢，又講到「觀眾」想聽的對白，仲要任「模」，超難…
不過，咁樣仲係新聞嗎？
等拍野時又講肥的話題，我話出發前食左吞拿魚包，見到蒜蓉多士好香，就買多左一件，同事甲話：肥死你﹗
我：有幾肥呀？肥有咩問題？我呢d骨架，肥極有個普啦…
同事乙：你有人認購左未先？認購左就肥d都冇所謂
隨即引起一場關於「盤」的討論
呢個年代，即使落左訂都可以撻訂，買左都可以退貨、可以賣，所以有冇被認購都唔係d咩保障
大家講到某人放緊盤，又講到百三萬的盤唔好一百萬走去賣
又提到某君見到好盤就咬住唔放，好搞笑
同事乙一句彈埋來：你都搵左個荀盤啦﹗
吓？
同事乙兜：你錦田間屋呀﹗
19 August 2009
出crew之前唔係有好多時間，做野又唔係好夠時間，正正食飯時間，四野無人，靜靜地，又想思考，見幾日都冇寫過一粒字，記錄一下感覺
食過牛腩米後，搭小巴返工，越接近公司，越覺得有一道負能量的磁場吸我埋去，分明想逃避，卻要向深淵走
尋晚簡單地就屋裡的共有物資作出分配，如果真係月尾搞好水電，1號攞鎖匙，2號搬得喇﹗
不如真係買過張床啦，橫掂都訓得唔舒服，唔使搬咁多野嘛…
每樣物件都附帶著一種感覺，一段情感，一段經歷
有些人會將舊愛相關的物件全部棄掉，將恨意投射在一張梳發上…
不過對我而言，只是一件物件，它是電視，就是電視，他曾經留在這裡的氣味，隨年月揮發得一乾二淨，不留痕跡
哈哈，也不錯﹗
屬於我的過去，我不會輕易將它刪掉，只是被打入冷宮罷了
「你揀定未？」
我只係覺得，有時候，人就係唔想做抉擇，不想負起責任，然後所衍生的後果，不想面對
18 August 2009
愛與不愛，完全反映受重視的程度
沒有客觀的事，只有主觀的心
試過牽腸掛肚，現在感到沒所謂，想也不想想，just shut down my brain when time is up
it is expiring
17 August 2009
星期三放左一日假，歇一歇…
喉嚨痛，流鼻水，星期五返工前去左睇醫生，食左藥成日都暈暈地，呆滯，放工返去煲落粥，食左兩塊麵包就訓
星期六藥力未褪，繼續訓，訓下醒下
星期日出crew拍野，來緊的schedule簡略成4個項目，出故仔，搬屋，出故仔，去旅行，that's all
d鼻塞好似有d翻發的跡象，又啪藥…
嗰晚忽然興起，唱左《至少還有你》
13 August 2009
情緒低落症原來會傳染、復發，病徵係負能量偏高，唉聲嘆氣…
一邊食冬瓜盅，一邊討論新居的布置，一定會搞的係燈罩，裝番盞靚靚有特色的燈，哈哈，原來街市見到嗰d紅燈罩係紅A出品，仲有白色，不過唔知邊度有得賣
佢放假，所以尋晚一齊飲左兩杯，一坐低酒都未叫就查牌，不過一早起身出crew+ot，真係超勁攰，眼勁乾
沒有進展的工作，未飄埋來的case，今日放自己一日假抖抖氣，調整一下心理狀態
佢談到出路的問題，似乎前無去路，有一種生不逢時死不甘的感覺，談到這裡，很沉重…
下雨天，一切也像若有所失
逛街，說再見時仍然有點失落的感覺，不得已也要回家去
喉嚨痛，鼻塞塞，可能係感冒…
2 August 2009
忘憂，放假做放假的事，人為自己而活，唔好俾不相干或控制唔到的事煩住自己
訓醒食完野，目標係入錦田一帶research，諗過入元朗轉車，後來都係決定搭西鐵，只係隨手send個sms俾佢，起碼都有人知我去左邊
佢打番來，聽到背景聲佢都喺西鐵，佢請纓陪我行下，約左喺錦上路等
原來錦上路有個跳蚤市場，我真係好out…
等佢時睇左一陣，跟住向村裡面行，行左一陣唔知自己行左去邊，搵地圖又搵唔到，佢話返去行跳蚤市場，經過某條村有塊大banner賣紅磗屋的廣告，好似幾得意，咁又去行下
行完八掛四圍睇，睇到一間全新的村屋，喺門口裝下裝下，好搞笑﹗
又係八掛，見到馬路蹤影，無意中行到錦田公路，行行下行埋去吉慶圍
行到差唔多天黑，跟住返番去跳蚤市場，買左火山石，食過牛奶樂雪條，佢買左件衫仔，仲送佢靚靚背囊
最搞笑係佢睇衫時個老闆話：叫你太太幫你拼下
呵呵呵
雖然今日酷熱天氣警告，俾蚊咬左兩啖，但幾個鐘好悠閒好開心，咁先有放假的感覺
電視劇的威力，令人跟著虛構人物的情感或喜或悲，令人重溫愛情剛剛萌芽幻得幻失的感覺，再嚐熱戀的味道
24 July 2009
又好耐都冇寫過野，真係冇乜mood，亦冇咩靈感…
營營役役，啱啱做完故仔，想放假又放唔到，根本冇停，我唔係機械人﹗
早幾日夢中我地三個一齊去到一個地方，一個貌似r烏的女人係咁挑逗佢，後來仲雙腿一夾，佢就跌入個r烏的懷抱，r烏起勢咀佢，睇到我兩個呆左…
另一個夢發夢搵case，哎，你話工作壓力有幾大呢…
尋日終於可以放左半day，好耐都冇試過咁想返屋企的感覺，同你食一個簡單的午餐，嘻嘻
其實話簡單，又簡單唔晒，落車去左鍋貼舖買鍋貼，再去波仔叮菜，因為屋企冇微波爐，要喺舖頭叮埋，再去左買雲吞麵，本來想買d煎三寶炸雲吞，但食開嗰檔仲未有得賣，有諗過買炸兩，但係樓下間粥店，算罷啦…
返去仲極速撈埋個麻辣粉皮，結果，食唔晒，哈哈﹗
討論到前途的問題、轉工的問題，好heavy…
5 July 2009
星期三嗰日的囉囉攣，原來，同不祥之事有關
事件在星期四開估，就係隻故仔要提早一個星期出…
部電話真係極之有問題，講講下會斷線，真係唔換唔得喇
原本的target係e63，但dream機n97出現左，價錢差天同地，前者千零蚊有交易，後者五千幾仲要訂機冇現貨，早幾日睇到5730出左，都可以係一個選擇，某日做開野經過薯仔台，原價三千幾的電話可以千八蚊出機，即刻叮一聲
今日放假，的起心肝去買電話，第一部問的就係5730，但竟然冇現貨，無奈要放棄啦，而且1880出機價要中銀咭先做到，我張咭仲未到手…
咁回歸到最原本的選擇，e63都冇貨，有冇搞錯？最近荃灣有，咁就去左荃灣
個sales都幾好人幾好傾，志同道合，用機習慣同喜歡都好一致，佢仲做埋電話教室添﹗
部機真係超勁抵，1180機價+500預繳-我部廢柴機trade in嗰600，即係實質上部野580蚊有交易
不過trade部機有段小插曲，就係插咭位個蓋仔唔見左，要hold住，買完機去隔離賣電腦個商場配番個蓋，不過初初問左兩間都冇，第一間仲話有都好貴，因為當配番個殼，第二間個老闆都幾好人，我問佢知唔知邊度有得配，佢話直行轉右有間叫xx的舖頭專幫人整電話，可能有拆左出來的舊殼有機會搵到，嗰個老細睇一眼就叫隔離個伙計喺一袋野裡面搵左一個n76的鬼殼出來，拆左粒蓋裝落我部電話度，收左30蚊
咁都ok啦，因為我有番個蓋就可以trade番600蚊，我以為呢部野唔值錢架喇
跟住係咁意睇下去唔去配con，咁就返去玩電話，玩左成晚
呢幾日其實有好多事發生
尋日出crew本來諗住跟booking唔使9點幾返到去，點知老細打來追稿…
不過好彩，唔係拍到太夜，夜晚仲可以同佢食到飯，本來諗住去食麻辣水餃嗰d野，但冇位，結果去左cocoduck，剧扒好似太濟，結果叫左沙律、薯條、墨西哥牛柳配薄餅，好豐富﹗
夜晚收到一個特別消息，四出打電話同msn徵詢意見，後來約左朋友甲喺荃灣食糖水，本來約喺樓下，等佢架小巴經過，但結果佢架小巴竟然冇經過，自到
我早到，扭左一隻扭蛋豬，係一隻豬公仔，呢排對豬有d情意結
芒果棉花冰，好好味好清新，喺香港都搵到台灣的味道，雖然唔可以直接比較，但即時諗起永康街的刨冰
今日訓得馬馬地，又係好早就醒左，訓下醒下…
佢返工，趁返工前有少少時間，佢過左來同我飲茶茶，真開心﹗
16 June 2009
呢幾日有d情緒，冇咩值得開心，冇咩值得唔開心，冇咩值得煩，冇咩值得唔煩…
很怕遇到呢種狀態，唔知自己做緊乜
一年前的今天，6月15號，如常以玩樂支撐生活
近一年來戒掉以酒精灌溉生活，可能，唔再需要擺姿態，也為健康好好著想
然而，這一年過了很多一個人的周末和假期
還記得最初搬出來自己住，再加上返夜，盡情地享受獨處的空間和無拘束，生活很隨意，也有一分自由自在的感覺
或者，因為不規則的返工時間，順理成章和理直氣壯地避開了一些不想面對，無從躲、無從避的人和事，找到一線喘氣的空隙
不知就裡，後來，忽然喪失了獨處的能力，離群恐懼，身邊少一個人，就好像心裡少了一塊，唔會一個人自己去食飯的怪病，由回復早出晚歸的生活開始
有一些關口，有一些障礙，其實是人自己慢慢築起的…
作息不同，最初很不習慣，試過周末一個人冇地方去，冇人陪，攬住d公仔喊
慢慢地，慢慢地試下一個人走出去行下
轉捩點是那次拿出相機去牛下影相，思考的活動，relax的活動，應該是一個人
近月開始了跑步的習慣，最記得有一次跑完，坐喺場邊冥想，看草，看雲，看雀，看螞蟻搬家，不要是是非非打擾
兩個人的時候想一個人，兩個人的時候也想兩個人，問題不是一個人或兩個人的，總之，一個人也好，兩個人也好，生活，是一個學習的過程，心態的調適
至於近日的情緒，哎，唔知自己做緊乜，為咩呢？
試著回顧自己找答案，結果，發牢騷…
尋日突發想食菠蘿，想買時冇得賣，有得買時時機唔啱，結果冇買到，冇得食
頭先晏晝攞左假，飲完茶返到樓下突然醒起睇下有冇菠蘿賣，去睇下又竟然攞到喎，買左一個返去，自己開，鹽水浸
有人怕麻煩，買超市預先pack好的菠蘿鮮果包，喺呢個情況，我自係唔係好怕麻煩的人，原個菠蘿買返去自己開，開得核突，技術不精，基本上有半個都俾我大刀大刀切走左，不過我覺得個過程都好好玩
8 June 2009
六四廿周年當晚去左湊熱鬧，我再三強調我只是湊熱鬧，揹左部450D出去影下相，塞唔到入球場，但塞左去球場外的鐵絲網，希望冇計到我的人頭
我唔係好明點解做呢行就有平反六四的使命？
我唔會唔支持平反，但我一定唔會係嗰d企出來大叫平反口號的人，如果唔係可以影幾張相+gathering，大熱天時，大汗叠細汗，人迫人，我真係唔會咁無聊去集會
我唔係話香港中央台做得啱，但點解會宣揚平反六四價值的才是好傳媒？唔為六四出聲的人要被批評？
離開公司碌去搭小巴，但等左好耐先有車，而且第一架車仲上唔到
之後去左食足三兩漢堡包餐，食完都9點，跟住碌入維園，之後返番荃灣食糖水，竟然搵到棉花冰﹗
星期六，今年第一次落水，晨吉咁早起身，仲早過返工…
約左8點喺樓下，8點半喺旺角，9點喺西貢，但某甲遲到，所以8點8先出到旺角，等埋朋友甲，9點1先喺旺角出發，結果咪遲左好多囉
夠曬夠熱，真係最啱落水﹗
目的地=浪茄，玩意=香蕉船+游水+訓身沙灘排球
唔知係唔夠訓定係肚餓，有d暈船浪，尤其泊低左隻船之後，坐一陣就覺得暈，周身唔舒服，坐又唔係企又唔係，落水浸住會好d，所以成日都攬住條「棉條」喺水裡面浮下浮下
上番岸見到陸地的感覺真好，再食杯雪糕車雪糕更好，佢地去唱k，我決定散水並取道旺角返歸，最討厭的小巴+塞車，再暈多兩錢…
返到屋企坐喺度，都仲有喺個海度浪下浪下的感覺，沖個涼食左d野，都冇咩搞過，9點零就走左去覺覺豬，訓喺床度都係浪下浪下，訓到今日晏晝1點
晏晝食左d野，hea左陣，好攰，兩隻手臂勁酸，我諗係因為成日要keep住一個浮的狀態，對手放喺條「棉條」上面所致…
不過後來都係決定去剪頭髮，咁就出左去，做埋color，又搞左幾粒鐘，好攰…
呢個6月一日紅日都冇，又要返extra day，真係幾難捱…
