如果

四季可以安排得極為黯淡
如果太陽願意
人生可以安排得極為寂寞
如果愛情願意
我可以永不再出現
如果你願意
除了對妳的思念
親愛的朋友 我一無長物
然而 如果妳願意
我將立即使思念枯萎 斷落
如果妳願意 我將
把每一粒種子都掘起
把每一條河流都切斷
讓荒蕪乾涸延伸到無窮遠
今生今世 永不再將想起
除了 除了在有些個
因落淚而濕潤的夜裡
如果妳願意

我‧自己

這個世代的孩子，要贏在起跑線，未進小學已十八般武藝，是個精通多國語言的老人精；不懂彈鋼琴被視為異類，樂器學得越刁鑽越好，小提琴長笛是普通貨色，豎琴色士風夠出眾嗎？
更甚者，未出娘胎，已修煉古典音樂，受詩詞歌賦薰陶
童真擱一旁，最好未學會走路已成為小博士一名

回想我自己，沒有被栽培，唯一勉強能夠駕馭的樂器是牧童笛，幸好，天生嗓子尚算甜美，參加過合唱團，好幾個年頭代表學校到處比賽，與「音樂天份」四個大字沾上了邊；罰抄時順道鍛鍊書法，跟畫風一樣，甚具未經雕琢的個人風格
每周課外活動可威風，跟弟弟在花園模仿原始人生活，藏起鐵罐偷幾根火柴和一把米，真實版煮飯仔；分不清抬拳道與柔道，二十有六，才在成人游泳初班出現
似乎最正路的經歷，是從跌跌碰碰中，在客廳裡學會了騎單車
再大一點，跟幾個朋友球來球往，大概日子有功，熟能生巧，進了排球校隊
沒有學壞的膽量和本錢，沒有坐過褓姆車，沒有督促我溫習的私人導師，會考之前未上過補習班，就連做人處世，也不知道是甚麼回事，所以，我記得小學二年級班主任在成績表給我的合群評價是丙，懶理朋輩指指點點，這就是我的童年和青年時代
家中各人跟英語是絕緣體，憑點點小聰明，能操一口僅遜於native speaker的英語；沒有認真學過普通話，現在卻靠翹舌頭糊口

走到這裡，如果，當日被悉心栽培，今日的我是怎樣？

歌詞

不能握的手
從此匿名的朋友
其實我的執著
依然執著
卻決心和你不再聯絡
不能握的手
卻比愛人更長久
當所有如果都沒有如果
只有失去的擁有
最永久

聽起來夭心夭肺，那一天才會能夠淡然面對？

非戰之罪

某一天忽然醒悟，原來不被選擇，不一定是我做得不夠好，當拿出天秤斤斤計較，不管是過去一記小過，還是圈子裡的一個人，都隨時成為致命死穴
當結果是非戰之罪，下次也只有枉然，認命吧！

禁忌

朋友遇上那種叫人窒息的三角關係，藏不住愁容
從戲劇性的偶遇開始，似乎注定要談一段傷感的戀愛，叫人心如刀割的痛，每每在毫無準備，卸下武裝那刻，來襲

選擇從來都不容易，不比被選擇傷感
人越大，思想的束縛反而越多，總有數之不盡的包袱...
家人壓力也好，世俗眼光、階級觀念也罷，都比不上一個心魔
這個心魔，也許是小時候的夢想，也許是追不到的初戀情人，總想真命天子以某種條件呈現，結果，就像麥田的故事
心魔也有可能是舊情人，相愛時沒好好珍惜，分手一段時間才發現對方的好，甚麼「沒理由找個比之前差」的話兒，說穿了，就是未忘情，只有自討苦吃
忌之

當情感跨越某個關口，自然地昇華到另一階段，像家人一樣，他做了甚麼不對，說過甚麼不是，最終也不會跟他計較，甚至沒有尷尬的話題，那算是放下吧

逆進化

上周天氣熱得令人煩躁，非躲進攝氏度二十左右的爽涼空間不可，高呼冷氣機是人類最偉大發明
香港這個小城市，位於亞熱帶，理論上居於這片土地的人類，早應適應這種又濕又熱的天氣，也許，只是我天生不屬於這個地方，才沒有這種耐熱基因？
不過，好幾次出遊，冰冷的國度，室內廿五度暖氣長開，他們抵不了冷，這是人類逆進化嗎？

我又想起，窮地方沒有肥人，一個社會的人被圈養得肚滿長肥，絕對是繁榮進步的指標
然而，當一街都是胖個子，人們反而喜歡上骨瘦如柴，皮包骨的體態，所以，大家一窩蜂去纖體
人類文明發展到這個地步，也許只能嘆一句無奈

幻想空間

這麼多年以來，學乖了，對很多事情都不抱太大期望，以免需要承受太多失望
平常心看待，萬一事情未能盡如人意，的確，不會太失落，不過，喜悅程度也打了折扣
其實，我挺討厭這種老練...

真相不一定要掀開，某些事情或許仍能以美好的面貌呈現，真相大白，反而不是一件好事
正如上菜館吃飯，餐具布置何其精緻，廚房始終藏著桌子背後的醜東西，優雅地用餐時不想像殺魚殺雞何等血肉模糊，食物如何消化掉變成大便掉進馬桶
要或對一切瑕疵氣吞聲，要或讓金玉緊緊包住敗絮，你還有一點點空間，幻想

不相往還

2007年某天blog寫過這樣一段：
其中一本日記夾著一封信，他在外國讀書時，趁我生日時寫給我的信，記得是較準正日生日當天寄到我家，如今想來，整件事都很窩心

誰？誰在我某年生日，那麼有心思地寄我一封生日信？

幾乎斷絕來往一個月，生活很平淡、規律，也帶點自閉
唯一一次電話對話，我刻意選擇了最冷漠的調子，帶點己所不欲

老實說，偏執已被放下，事情必需這樣發展下去嗎？一直以來這麼互相了解和信任的兩個人，就此告一段落，不相往還
如果，硬要說真感覺，我覺得很可惜，這陣子，也少了笑容
為甚麼？值得麼？

沒有多認識幾多個他在外國讀書，我的確很害怕，害怕某天有空找到那封信，才發現那個有心人是既互相牽連，又互相冷落的他

販賣尊嚴

有朋友從來不會對路邊的乞丐滋長出半點憐憫之心，一副口吻質疑有手有腳為何不自力更生，為完善社會保障卻不得要領而抱不平
雖不算甚麼道理，難以稱上曉以大義，未有道出我的想法，是明買明賣
我們每天販賣時間，配以學識才華換取生活，但求安逸，有人或附上幾分膽色與姿色，博取榮華
那位仁兄仁姐不是甚麼可人兒，也許付不出勞力，墨水欠奉，造藝免問，生性怯懦，最值錢就是點點尊嚴，拿到街頭販賣，不標價，惜緣者隨意打賞，溫飽卻是奢望

我們覺得自尊無價，有人甚至花一切力氣去捍衛面子，揮金無數讓自已貼金顯貴，對路邊被放下的身段，視為甚麼？

啊！我忽然醒悟了，不應該怪責朋友，正如時裝店開門做生意，不買者不罪，顧客沒有遭白眼的道理，只是朋支對這宗買賣不感興趣，但願他不會到小販管理隊投訴

換

某天看雜誌，節錄一段金句，大意如下：
對於「吃飯」和「睡覺」，演譯的語氣，反映身分的差異
老婆通常聽到：吃飯！睡覺！
男人約會女人說：吃吃飯，睡睡覺。
抱著情人說：吃飯飯~睡覺覺~
老闆吼：吃甚麼飯，睡甚麼覺？
最近覺得，做甚麼事情得付出一個代價，得拿甚麼交換，這個道理越經過時日驗證，越證明恆久不變

古語云，百世修來同船渡，千世修來共枕眠
也是一場等價交換

先不論前世修來，遇上這個人，邂逅，十指緊扣的甜蜜，換來一紙婚書與承諾，再換來朝夕相對，抱怨卻與時日俱增，需付出萬二分忍耐，最後肯定儲夠點數，換一個老來相依的伴侶嗎？

情花毒

覺得心痛那一刻，我才知道這麼深深地愛著
不小心憶起他無聲無息，悄悄地離開那一幕，快窒息了，淚水都禁不住
這就是情花毒發作，叫人好難過…

難道要兩個人互相傷害，讓那點痛苦，證明我們還愛著;讓兩行淚痕，告訴你我不願意分開

男人‧女人‧孩子

最近看兩齣電視劇，兩位女主角未婚懷孕，一個獨力撫養孩子，心裡默默思念那個男人；另一個走進手術室墮胎，手術最終沒有做，結局有待劇情發展
很不公平，高潮完結那一刻起，男人即使不是轉身就走，置身事外，他能陪那個女人承受些甚麼？女人對懷孕的恐懼，男人懂嗎？吃了避孕藥怕失效，帶了避孕套也害怕有意外，不怕一萬，最怕萬一，有一種藥叫緊急避孕藥，即俗稱「事後丸」，不過這種藥對身體不好，很多副作用只有女人自己承受；若錯失黃金48小時，萬一懷孕了，唯一的方法是人工流產，對身心的傷害也只有女人自己知；若然把孩子生下來，懷胎十月的也是女人，供書教學，這樣就是女人一輩子了…

男人靠一個孩子霸佔一個女人，這是他們「識諗」嗎？
這種觀念，我曾經聽過兩個男人說過，他說最近發現很多年輕貌美打扮入時的女子，都拖著一個孩子，他認為那些男人手法高明，找到條件好的女人，生一個孩子，那個女人跑不掉
另一個他說，一對戀人，女方沒有結婚打算，男方並不是無計可施，他可以為自己製造機會，令女方懷上，自然乖乖下嫁

的確，在我經常逛街那個商場，很多年輕媽媽店主
是命運還是港女拜金…
忽然想起一齣舊電影：《性工作者2：我不賣身 我賣子宮》

你願意拿甚麼交換1億？

上周五全民為超級六合彩瘋狂，本想寫這篇文章，今續

1億元的橫財，該怎樣花？成為上周熱烈討論的話題
先討論1億，是1之後8個零，數學上的表述是這樣，100,000,000，記者們很貼心，計算出如果一位領最低工資時薪$28的打工仔，要工作357萬個小時才可累積到1億收入，即不眠不休工作超過400年；另一位記者告知，某旅行社環遊世界旅行團盛惠55萬一位，1億元就可以請180位親朋好友一起環遊世界，或者建500所希望小學，又或者買萬七部iphone…
跟同事閒聊，說著存100萬已是天大難事，10個100萬是1000萬，10個1000萬才1億，1億，是一個一輩子都難以觸摸的數字

中了六合彩頭獎該怎花，這個問題想過無限次，以前，買了彩票美夢就開始，許諾想吃甚麼，就立即飛過去云云，十元八塊買一個希冀，開心一個下午或半個夜晚，自己哄自己，開彩了，美夢落空，從幻想回到現實世界，也不會太過失落，這是香港人對六合彩的迷思，樂於自欺欺人
甚至連做夢也中六合彩，馬會致電領獎…
不過，最近對六合彩的冀盼彷彿遠去，那種做白日夢的快感越來越少

周五那天，忙完過後到投注站湊熱鬧，我反而想，如果我得到1億，我會失去甚麼？
我忽然閃過一個念頭，是不是有甚麼主宰，偷聽大家的心底話，願意拿怎麼樣的東西出來交換這1億彩金，盤算過後，願意放棄最多、最過分的那個人，就能夠拿到獎金
如果是這樣，缺錢的人會認為事業、健康、愛情、友誼、親情，還是生命太多太奢侈，得捨棄一部分或全部，換取那1億元？
也許大家對生活不太滿足，間中有點怨言，餘下的一切是僅有的美好，但堅決要把它奪走，確實帶點不願意
既然沒有東西可以交換，還是別妄想那1億

我會成為你最牽掛的一個女子

又好一陣子沒有更新，我只能說，最近多事…

女主角踏著高跟鞋，月色與她內心的矛盾形成強烈對比，她將會遇見待在家門附近等她的那個男人，盤算著誰先開口，第一句說是甚麼
結果，她發現那個男人坐在一角，抱著手機裡的合照，偷偷啜泣
她裝著沒看見，鞋跟與地板規律的節拍在那個男人面前停了下來，他抬頭，二人卻沒有對望，她轉身就走，他也只好悄悄地隨著影子邁出沉重的每一步…

最近讓自己追劇，在電視劇一樣的愛情故事裡捉迷藏，我試著問自己，究竟我要怎麼樣的愛情
忽然，有一天，算是頓悟嗎？心裡有一把聲音在呼喚，我不應該再沉溺在縱容我任意妄為的國度裡，我要找到一個讓我自願收歛任性的他

熟耳的舊曲子在腦海播放著，歌詞是這樣的：
明知愛這種男孩子，也許只能如此，但我會成為你最牽掛的一個女子，朝朝暮暮讓你猜想如何馴服我，若果親手抱住，或許不必如此…

流淚的男人

誰說女人的眼淚具殺傷力，這個世界上，有不怕女人眼淚的男人
不過，當一個男人在女人面前掉眼淚，哪有受得了的女人？

我想，男人要武裝起來，擺出一副強悍的模樣，原來要把眼淚留起來，留到最後關頭，作最厲害的秘密武器

16個年頭

部落格剛發了一千貼，自我陶醉在文字堆裡，原來已好幾個年頭

時間讓事情發酵，最經典的莫過於過兒與姑姑互相守候16年後，終成眷屬的故事
現實裡的16年，過得不快不慢，但這樣就過去了，16年前認識的人，今天，餘下幾人還有聯絡，餘下幾人保持關係，餘下幾人互相送暖？
苦心經營還是緣份安排，沒有必要查個究竟，彼此心裡藏著對方，不是一件很美好的事嗎？

剋星

前天發夢，人在西藏，桑耶寺附近的小鎮，到處找明信片
昨天晚上的夢，人在內蒙，在額濟納看胡陽樹
可能，想去旅行想到發瘋，才連續兩夜夢裡周遊

星期五收到東瀛遊的傳媒考察團邀請，下周三至六到北海道和大阪
請示了，報名了，算是落實吧，放工給他打一個訊息，他說我令他擔心，約了昨天見面，詳談

還沒有清醒過來就收到他的短訊息，梳洗一下，在尖沙咀會合，開蓬跑車直駒數碼港，陽光下吃一份all day breakfast
不要電話，不要錢包，所有隨身物品放車上，散步海邊，踐踏草地，兩手消遙，步伐潚灑，不過很熱
後來我們決定找另一個寧靜的海邊，每次到南區，第一個必定經過深水灣，有咪標，就停這裡
他換上拖鞋，我脫下波鞋，踏沙去…
遇到數名老外在拍寫真，女模特忽然脫下上裝，在水中抱著頭，躍動
幾個阿叔、青年目不轉睛，免費版肉圃團，不用3D

在小碼頭吹吹海風，看小魚擺動身軀，遠處有人滑水，仍是身無一物，不用記掛時光流逝
返回鬧市途中，我告訴他巧合的事情，他說自己也許是剋星，還戲言一起到九龍城踩場，或許，加兩雙筷﹗

今天，兩個男人異口同聲，叫我別去日本，心裡有一陣甜

心病

約會與赴會，我為自己定下了準則，有三個人的約會，只要不是約在同一時間，必定赴約；有一些人搞活動，吃飯也好，喝酒也好，盡可能支持支持；那兩個人有機會現身的聚會，必定敬而遠之
心裡有毛病的人，見面就病發，何苦？

我不要全世界喜歡我，所以我明白，了解，別人有權不喜歡我，沒有任何理由也沒所謂，只要讓我知道就好，彼此不僭越對方的界線，活在不同的領土，相安無事
想起曾經有一段時間，墮進是是非非旋渦之中，頗困擾
如今，彷彿又回復到那種人事紛亂的狀態，可幸是心情沒有多受影響，算是找到緩急小法子
有病的是他，算是我慈悲，為他好，不再見面，免得他病發

早陣子出席了一個應酬聚會，屬非去不可那種，我的確沒有滿場飛，充當穿花蝴蝶的技倆，只一個人怪怪地站一旁，眼光不知放哪裡，嘴巴不知往哪裡對頻道，跟不存在沒有大分別，置身這樣的場合，頗痛苦…

對，我本身就不是一個可敬可親的人，若有人認為這是罪名，就隨便讓我扛起這罪名，我喜歡，又如何？
我就是這樣，哪管無關痛癢的目光或指點

單身

這個多月以來，每天兩小時的車程都捧著平板電腦，從荒野歴險片段，眼睛敖遊西伯利亞與撒哈拉沙漠，換成兩隻手指頭忙碌，鍵入內心每一句說話，昨天忽然開始沉迷虛擬的遊戲，結果，錯過了久候的某人，來電
原來他本想相約我去看<單身男女>，他口中適當的時候，做適當的事，還有一堆聽了似懂非懂，難以解讀的說話，令人困惑不解
不是早已告一段落嗎?

單身是一種客觀的狀態，也是主觀的感覺，所以，我是單身
找不到命中註定在一起的那個人，很多人都像我，一個人過生活

說三道四

沒有嘗試過的東西，你從來都不會知道自己的接受程度；沒有行動過的事情，你永遠都不可能了解自己的底線與能耐
對，我現在確確切切地經歴過，就有資格說三道四
你拿我沒輒

上班日，下班時間是下午七時，一路順利，八時回到家中，休想慢條斯理下廚，因為，五藏之神已沿途在廟內咆吼
絕大部分的情況是，約了友人在外邊，以各國美食堵住胃口
偶爾，假期雅興大發，廚房頓成實驗室
跟小時候很不一樣，放假才有機會到外面用餐

搶錢

這次出行，似乎與我想像中有點距離
一個喜歡慢遊，自由自在，隨意逛，隨意拍，不要計劃；一個喜歡衣來張手，飯來張口，不用自己打點麻煩

只有三天，時間太短，車程太長，一切都要斤斤計較，好好計劃
深圳->成都=2hr
成都->市中心=45hr
成都->峨眉=3hr
峨眉(山腳)->雷洞坪車站(山頂)=1.5hr
最後一天坐車坐到人都癲，坐車上山、落山、出成都、去機場、坐飛機…

而令人覺得最唔抵，係好似搶錢咁搶
景區門票150，付費時叫你俾155，天呀，5蚊保費應該係自願購買﹗我們買了旅遊保險，堅持只買門票
登山車90來回
登頂索道，即係纜車，最過份，車程約3分鐘，上行收65，下行收55，貴到呆…
而明明俾左景區門票，但進寺要另收費，報國寺8，伏虎寺6
山上一份香燭30，山下車站一把香只要2蚊﹗

可能因為病，唔夠訓，興致減半，再加上御用攝影師坐鎮，真不想獻醜，相機都塞在包包裡
現在回想起來，浪費了大好風光

迷霧、仙境，雖然被搶錢，仍覺得值得一去
可能因為太趕，沒機會影夠本，逛回本，才覺得被搶得特別兇

早陣子煲劇，想記下這首新詩

《一棵開花的樹 》

如何讓你遇見我
在這最美麗的時刻　為這
我已在佛前　求了五百年
求祂讓我們結一段塵緣

佛於是把我化作一棵樹
長在你必經的路旁
陽光下慎重地開滿了花
朵朵都是我前世的盼望

當你走近　請你細聽
那顫抖的葉是我等待的熱情
而當你終於無視地走過
在你身後落了一地的
朋友啊　那不是花瓣
是我凋零的心

蜀山行

病了，反而睡多了；病了，人消瘦了
可是直到放假，出行，仍甩不走病魔，未知是禍是福

深夜，從淺睡中醒來，提著行李，披星戴月，比預定時間早了一小時抵達深圳機場，還沒有開燈的機場怎樣也稱不上繁忙，按時作息，也許算是另一種福氣吧！
7時45起飛，到達成都是10時左右，朝著長途大巴站走，沒仔細找哪路線比較合適，反正應該沒差太遠，到市中心再打車
先到酒店卸下行李，房間確實難以令人滿意，再換一間也相差無幾，不過，只住一天，也懶得計較傷雅興

選了一家裝潢令人較安心的酒家，吃一頓川菜，然後在附近的佛具街逛，沒有收穫，回房間稍事休息，再到步行到錦里，無意中發現書仔介紹的名店韓包子，有少少餓就買一個試下，竟然，放入微波爐加熱…
錦里同其他地方的老街都冇咩大分別，唔知點解冇乜興致影相，掃街，再去食麻辣火鍋
返去簡單執下野，沖涼訓覺，因為第二朝要早起，去峨眉

朝早9點鬧鐘未響就醒左，冇燈，覺得怪怪，問過櫃枱原來係停電，真係吹脹…
點解check in前唔話俾我地知？
喺樓下食左個早餐，成都擔擔麵，跟住就坐的士去新南門車站，搵售票處搵左一陣，搵到，又唔知賣唔賣峨眉車飛
售票員話立即要上車，搞到好似好趕
到上車前先發現去峨眉車站唔係報國寺，先發現淡季只去峨眉車站不去報國寺
擺行李後先發現架車冇位，要等下一架
下班車就知道，要先上車霸位，好眼訓，幾乎全程車都訓覺
到峨眉車站轉的士去酒店，check in，我地都覺得比成都住得好，仲只係138/night，好多老外都住，氣氛好好，放低行李都差唔多兩點，諗住換衫上山，但問過姐姐話我地趕唔切，咁就換個行程，喺樓下食野再去報國寺同伏虎寺

步行距離，先到check point影相，再慢慢行去報國寺，冇咩指示，但唔算難搵，門票8蚊
之後行一段長d的路，仲有一條好長的樓梯去伏虎寺，全山最大寺院，不過好冷清，門票6蚊
沿途一片春天氣息，空氣超好，很悠閒，我形容是氧氣治療，唔使食藥都覺得好番好多，行完落山返酒店坐左陣，再搭的士出去市中心的好吃街
落雨，買左兩把透明遮，不過好吃街冇乜人，最後揀左一間最多人幫襯的舖頭食，叫左涼粉、串燒、擔擔麵、炒野菜
有阿婆賣花，就收左一支花；有哥哥仔唱歌，就點唱收到一首歌
食完返去沖涼訓覺，第二日行程結束

由於姐姐話去金頂行程，基本上要預6個鐘來回，所以我地決定搭7點頭班車上山，5點半起身，執行李，check out，跟住去買飛，買兩個饅頭當早餐
好彩上到第一班車，因為一個鐘一班，又唔知佢會唔會開多班上埋其他人
上到車繼續訓，落車買飛要落車影相，都幾先進
不過唔見左件毛毛熊衫，坐隔離個阿姐話頭先站頭有人問邊個留低左件衫，但明明我冇拎落車，成件事都好奇怪…
沿路都見到路結冰，樹上雪掛，滿心歡喜
落車一片清涼，即刻著番羽絨褸、頸巾、手套
行一段路，超滑，買左15蚊一對的鞋套，其實係一對著喺鞋出面的襪，樹上的冰雪跌落來，dup到個頭痛痛地，我地決定開遮，原來唔落雨把遮都係有用的
沿路其實好想影相，但佢叫我唔好影住，冇mood啦…
行到去纜車站買飛，成百人塞入架纜車，感覺都幾恐怖，好怕超載
落左纜車仲要行一段路先到金頂，不過行行下佢跌親，我真係唔識反應，呆左…
喺金頂行左個圈，許左個願，都唔係留左好耐，11點幾就走，行番落去搭纜車，再行番去車站，啱啱搭到12點的車落山
落到山點幾，又趕到2點出成都的班車，喺車站買左d乾糧就上車，離開峨眉
結果用左3個鐘先出到成都，本來諗住即刻飛的入機場，不過上到的士問過，20分鐘左右可到機場，就決定去一轉佛具街，最後喪拼
跟住截的士，但冇車，有個司機開價80，咁就俾佢賺啦
去到機場有d餓，入左閘搵野食，但得一間餐廳同一間coffee shop，一個套餐成70蚊，d野又唔係好啱食，結果去左coffee shop
上左機等左成粒鐘先起飛，訓覺，唔知點解會冇飛機餐，好彩食左野…
返到深圳搭過境巴，初初問過錦上路尾班車係11點半，咪以為有車囉，但原來又冇，咁搭到皇崗自己轉皇巴士返歸
如果早少少仲搭到皇崗錦上路車架…
唯一選擇，的士返歸，結束3日行程

任性

我常覺得沒人真正了解我，別人口中的我是任性，我回一句多謝
潛台詞是不要遺憾，常掛嘴邊的另一說法，是「不做後悔的事」，任性的理由十分理性

也許，只碰到包容、放縱我任意妄為的他他他，還未遇上令我由衷收歛任性那個人
我繼續任性下去

一廂情願

討厭那種自以為扛下無數苦衷，委屈滿臉的樣子
還有，一廂情願，怎樣為人設想，這樣那樣顧全大局，其實，不知所謂
我深信，沒有一個決定，比自己下的好
對，也許這想法也是我的一廂情願，管不了！

周四將重訪那個我覺得很特別的地方，一廂情願地認為，我在那兒分割了我的人生
心裡有一個一廂情願的約定，以後不管踏足地球哪個角落，都給他寫明信片
即將寄出的一張，打算寫幾句任性話，不署名
因為我們約會，見面，對話，不喊對方名字
也許，他猜不出我是誰，也許，有一天他心領，神會這默契，在世界另一角落，回我風光一霎，明媚與否不重要

唱歌來問候你

半年前一個夢，曾經亂人心智，庸人自擾的事情成為歷史，重過簡單寧靜生活
朋友就朋友，也可以窩心和感動

記下電視劇裡的民謠：

啊朋友們
請你聽呀聽呀聽呀
我唱歌來問候你
有什麼事情
請啊請啊請啊
我能夠來幫助你
在春天夏天並呀並呀並呀秋天和嚴冬
我定呀定呀定呀
令呀令呀令呀
你心呀心呀心歡暢

不安於份

人總有憜性，一旦適應了，很難，就是不願意離開目前的狀態，你我都曾經歴過這份矛盾與掙扎
這幾天跟朋友討論事件，好與壞，從容地數著數著，腦電波換成聲波，在大氣中解散集合，經過一輪簡單處理分析，好了，尚且相安無事，運作正常，但再轉化成行為，難了

安份守己製造了某些人喜歡的和諧
若結了婚的男女，每天想著換個伴侶，這個世界可真精彩！
不安於份的人，沒所謂，言行一致即可

告一段落

拒絕了情人節一起去看演唱會的人，沒有在意那天是white day，赴約去
赴約人後來醒悟了，也許，沒有接收眼前那份情意

人家本想跟你一起打一場比賽，約你到球場，第一次你沒有現身，人家以為你在猶豫甚麼，怕甚麼，一個月後整裝待發再次邀約…

第二次你不知就裡來到球場，人家或許滿心歡喜，以為你接受這場比賽，怎料人家發球你卻不接

發酵過後，真相漸漸浮現，也許約會人決定慢慢地，悄悄地走遠…

這是獨處的一星期，時間過得很慢
本來周末約了他一起吃晚飯，但他來電告知左腳受傷了，我無謂要他負傷赴約，著他回家休息
很淡然，沒有那種心痛或著緊的激動，我知道一切終於告一段落

走運

還沒有走出那場令人很傷心的戀愛，所以決定再從頭到尾，回顧一次
他說，那場戀愛談多久，就需要用多久去恢復

愛只有簡單筆劃，卻比想像複雜...

上星期很驚險，時間過得很慢，不怕餘震不怕海嘯，只怕無色無味的輻射來襲，一堆名字仍與災區緊緊繫在一起
那天，盤算過自已要出發的可能性，真的，差點換了角色，踏著瓦礫採訪去
所有人都說我走運，也許吧
當機會曾經擺在眼前，如今的結果，教人若有所失，很矛盾...不過，千萬也不要想下一次，這種用人命換回來的體驗，最好永遠不要出現

advanced level

煲一齣電視劇，隨著劇情變化，談一場很傷心的戀愛…
心很痛

想起一個人，那個初戀遇上我，可能曾狠狠地被我傷了一場的傻小子
對，似乎初戀才會這麼傻，義無反顧，死心塌地

從未玩機動遊戲，眼前第一次出現一座巨型齒輪，或轉或搖，帶著戰戰兢兢的心情，期待…
也許在旁有人指指點點， 說這擺動很嚇人，說這巨輪很無聊，但就是不管，不親自試一次，不甘心，即使離場時臉色發青，口吐白沫，總之， 就是要試，最少一次

最初，各樣機動遊戲同樣新鮮，由旋轉木馬、咖啡杯，到滑浪飛船，算是挑戰自己嗎？漸漸地，嫌過山車、海盜船也刺激不夠，要坐上跳樓機、G force
假以時日，也學懂當跳樓機升到最高點時，不閉雙目，從容盤算三、二、一，享受往下降的衝力，即使是G force的離心力，也不嚇破膽

對，就是沒有心理準備，才夠震撼；未經歷挫敗，更毫不猶豫，鍥而不捨，有一股橫衝直撞的傻勁
對，現在玩advanced level，收歛和保護自己

男生和女生

7 March 2011

男生一直鼓勵女生找他，問句好，某天，女生鼓起勇起，撥一個電話，那個他沒有接
過了幾天，女生再拿起聽筒，等了良久，他接了，對方不在香港，話沒有盡說，只著他回來再聊
他終於回電了，女生說約會他，吃便飯或喝東西
沒有說定的約會，算是排上日程表嗎？

女生將這件事告訴男生，每隔一段時間，男生都會問問進度，二人時而一笑置之
做了該做的事情，女生算是放下心事，解了心結，卻沒有期待這個約會

某一天，男生又提起他
話題講到母親為結婚一事施壓，女生說從來都沒有認定那個人是他，也沒有準備好
男生說他笨
女生最初沒有把潛台詞解讀過來，後來，還是猜到了

緣份遊戲

6 March 2011

音符在眼前舞動，思念是一種很玄的東西…

車子拖著尾巴由左至右，從右到左穿梭，往往來來，十字路中心有一個人，嘆一口氣
納喊嗎？綴泣嗎？這個人需要做和可以做的事情都已經做過，車就是不停下來，錯不在他

有種緣份遊戲，玩不得

額上是友達，唇上是戀人

28 February 2011

看電視劇，最初，男女主角是友達以上，戀人未滿
某一天，男主角吻在女主角額上，說是友達，接著，吻到唇上，說是戀人

熟悉的情節，只是，對白沒有唸出來…

但最錯是女主角是冏人

彼此註定要了解

4 February 2011

長篇大論的個人感受，換來更多眼淚
相愛但無言的沉默，叫心痛，看進他雙眼，只發現我們太多無奈，我只想哭…

年廿九回家團年，飯後，鼓起勇氣做了一件事，卻不得要令
我告訴他，事情發展總有軌跡，但最近發生的事情，總以最出人意表的姿態出現
年三十、年初一都返工，沒有過年的感覺

彼此註定要了解的兩個人，一起過了幾個重要節日

緣份任務

31 January 2011

我們是互相扶持，互相信任，不需要相處共對，卻相愛著的那種關係
他的說話，我聽來特別順耳

埋怨，也要算一算資格

29 January 2011

朋友說早上，午間，下午，整天花了大半時間看戲，演戲，聽假說話，腦袋轉動挑出潛台詞，也要將情感好好掩藏，修飾從嘴巴吐出的每一字
那個很優雅的世界，其實並不存在
晚上釋放那個我，希望沒有負擔地說說理想，講講心事
在商業的四維空間，任何東西都可以換成一個價值，妥協，變賣，點滴情感又算得上甚麼？

認同這遊戲規則，選擇這種生活，本來就沒有埋怨的資格

這是一個比喻

26 January 2011

有一份工你而家做緊，做得幾開心，但擺到明係夕陽行對，冇前途，冇出路，人工普普通通
有一日你發現另一份工，睇落有前景，甚至大有可為，但一定好多波折，仲好可能會做得唔開心
工就見左，又唔知人地請唔請，決定權在對方、甚至對方老細手上，好像等候發落…
但弊在而家個老細知道左你去見工，唔多唔少有啲心病…

這種刻意保持的距離，叫心痛

22 January 2011

如題，不欲多言

陰差陽錯

20 January 2011

我們原來有一個約定，原來這個約定本身，在我倆的不知情，還是大意之下訂了一個有效日期
這陣子，我們總是陰差陽錯…
那番說話縈繞心頭，當日沒有一下子解讀過來的訊息，發酵過後，叫人後悔，叫人心痛

歸宿

14 January 2010

由決定去台灣，2011年過左13日有多，都冇寫低經歷、感受，但反而是這段日子，發生了最多事情…
平安夜沒有節目，放工去買一份禮物，說好了，25號見面交換禮物，boxing day才拆
在facebook留一個言，25號早上就飛了

過程不會忘記，所以，不用在這裡仔細記錄、描述，這是屬於我們的記憶，永藏於心中的感覺
寄和收一張明信片，我這樣寫：

很不一樣的旅程，一絕的體驗
不用言明，信天意
一切盡在不言中

31號的節目，在工作中度過，也不算太差
1號第一次用普通話做live，順利完成，處於精神極度亢奮狀態，約左佢出來，本來想去同樣亢奮的地方，結果，回家去
聊天，幾乎直到日出…
茶餐廳充飢，出左深水埗，後來在佐敦食一客麻辣魚，逛來逛去，氣氛很差
向左走，向右走，我自己去左荃灣行街，十二點幾先返
3號繼續放假，同放假返來的朋友食左個cova all you can eat，討論如何work out our advanced level…
食完去旺角曬相，但一出地面就收到電話，order左d相，就碌左好多個站，陪佢食一餐飯，行一陣，佢在沉思中返回工作，我繼續行，在jusco傳一段supportive photo story
4號放工去攞相，一個人去食壽司，但味道不再依舊，耳環又買唔到，回家去，煲了肉碎粥，讓早餐有著落
5號，電話響起，索取supportive感覺的人來電，不能分身，約會，只能去一個，最後選了k11的露天酒吧，回去之後，想過去老地方見一個面，被勸止，算數

現在看回那段短訊，心裡仍有一點不舒服的感覺…

6號，來電的人反問我做咩唔打俾佢，我話留番個機會俾佢做主動，不過，那晚沒有約會
7號，輪到我做主動，我話好想去俄羅斯，就去左俄羅斯餐廳，之後搵機舖，但沒有想打的機，原來幾個中學同學在尖沙咀的另一端
尾班車之前，坐西鐵回去

8號，永遠記住這天，每一句對白

9號，如常上班，下午拎住腳架仆親，初初以為無事，仲行得，不過都將事件向需要知道的人報告，佢幫我搵左一個閂9號的鐵打佬，但因為應承左阿媽返去食飯，結果都係冇去睇
回家巴士途中，一則短訊，一個來電，改變了事情的發展…
勉強撐著回去食飯，裝成若無其事，走嗰時幾乎著唔番隻鞋，的士到威爾斯睇醫生，人生有7小時就留左喺嗰度
返到去已是冷冷的清晨，未落妝，未除con就訓左
9點幾醒來，傳一則短訊，還是起來吧

轉工沒有放大假，反而，因為拗柴換來這種休假，真係可笑﹗
動彈不得，外邊超凍，不想從暖暖的被窩中爬出來，即使沙發也化身成躺椅，圍著咕臣和暖爐，抱著電話不停短訊，或抱著電腦，讓眼睛不要空虛

剛才找一個醫生覆診，再放兩日假，周日，一切應該回復原貌
至於流過的眼淚，怎樣找個歸宿？

阿媽話我好出力去街

22 December 2010

去唔去街，其實好睇mood，尤其我呢啲咁率性而為的人，需要絕對完美的伙伴配合，否則，不如不去，又或者在路上感性一番，摧毀興緻

這個星期，又再忙於約會，兩晚深夜阿媽搵我，都咁啱在街上，佢話我好出力去街
周一放假，踩單車後同朋友一號去左行街，食左個麻辣米線一個不想回家的人，深夜，擕同一枝藍色香檳到訪，聊天，喝酒，睡著了，拿一張被

早晨，車子停一旁，在五支旗桿外話別

晚上，吃一頓家常菜
周三，天氣轉冷，晚上約了火鍋，好像很多事情都不太順利，怪怪的

本來約去旺角，但落雨，再去奧海城，打去骨煲冇位，時間好似好難磨，到有位又要經過好難的後巷坐後面店…

越食越凍，食完散水，本來都諗住返去，不過佢知道我第二朝早要去深山中，怕我凍，就話去買暖包，最後兜左一個大圈落尖沙咀一間seven買，真係好warm

佢送我返去，落車時車上的溫度計顯示只有4.5度，在星空下講再見

感覺患得患失
周四，因為想買張梳化床，所以就去左深水埗，既然去到深水埗，就去鴨寮街睇下個charger，諗住打俾佢問下部機的型號，但佢又冇聽電話，初頭都諗住算數，繼續買我買的野，經過睇下暖爐咁啱佢又打來，咁就約在尖沙咀，冷冰冰，抱著一樽暖暖的薑蜜，但暖爐就揀唔到

離開海港城，我suggest搭船，結果去左中環，行左一大個圈，由碼頭行去立法會，沿住一路名店，行左去環球，再上番天橋去碼頭搭尾班船返到尖咀，行左去1881，終於都去過，跟住我帶佢去掃街，食土耳其烤卷，再喺7仔飲一支花旗蔘和一包麥堤莎，返歸
星期五返晏，結果差唔多兩點先走，仲要call唔到車，截街車，3號仔返去，但個的士司機竟然合埋眼，真係好驚﹗
星期六去考試，位置在青衣，唔識路，去程在機鐵站搭的士，回程見到荃灣巴士，咁就返荃灣

朋友問我考完試得唔得閒去cwb，我話ok，不過佢又未走得，咁我就喺荃灣行街，喪買衫，買左超多…

拎住好多野，但好有shopping mood，又要買地氈，無意中又買埋個暖爐，勁多野，佢又未到，咁我就決定喺戲院附近等佢，都等左好耐

帶左佢去眾安街嗰間泰國野，周圍行，行到上如心酒店41樓，點解個staff話：先先小姐要返房訓喇，基於保安理由呢層會閂

真係好好笑，我地兩個都大笑﹗之後行左出海邊，在公園仔打千秋，海邊坐石頭，後來買埋野飲同雪糕，佢送我返去，幫我拎d野入去，我冇特別留佢，佢話走嗰時，怪怪的…

我有諗過打番俾佢，係咪走左好遠，但最後都冇打

但過左一陣佢再打俾我，問我訓未，佢又唔想返屋企，咁佢又過左來，開左瑪莎支果汁cocktail，後來準備左d毛巾俾佢沖涼、整好張羽絨被俾佢
周日我都係返晏，兩點到銅鑼灣，之前一天晚上說好了，一起吃早餐，3幹線的路上，陽光普照，但兩個holiday mood的人都要返工…

佢俾我的選擇，中或西，我說西，english breakfast，想來想去，最後去海港城，dan ryan

我話，如果第二次佢唔想返屋企要蓋下我張跳跳虎被，講個暗號，個暗號是「環遊世界」

食完，佢問我搭地鐵要幾耐，睇睇錶，給我的感覺，我就是可以多被霸佔半小時，哈哈，有點奇怪…

在公司無聊時研究機票，越南要三千幾，晏機去早機返，我覺得好過份﹗放工返左屋企打邊爐，隨意講一句，佢又話來接我，初初去左沙田，本來諗住喺sky platform坐低飲杯野，但full左，灰左…

買少少野飲佢車我返去，但去到分岔路時，每次都行錯路，佢話自己不在狀態

本來要搵佢張金色八達通，但搵唔到，研究行程，佢好快訓著左，咁又幫佢蓋被
但兩點幾收到一個電話，想起很多事情，思想混亂，哭了出來

周一早上，聽到一首好好聽好啱feel的歌，佢話覺得我有d唔同，我沒有說清，只推說架了眼鏡，看著地上「中環」小字，坐船去

但落船先知道出事，原來去左中環，但我公司喺灣仔呀…

放工返屋企，好似好耐都冇做呢個動作

夜晚在電話對話中，訂了台北機票
尋日成日都好忙，忙於處理酒店事宜，真係好難訂一間有兩張床的房，後來多得同事的幫忙，終於訂到一間大家都認為好值推介的酒店大後日出發﹗

這個冬天，他會記著我

星期三，離開西鐵站就聽到藍色多瑙河，越近屋企越大聲，原來，雪糕車泊左喺村口，大家不約而同，慢慢散步過來，齊集在雪榚車前，小孩子臉上掛著期待的笑臉，大人排起隊來，感覺很溫馨
星期四放工入左屯門燒野食，打邊爐同燒野食都係我飛佛，兩者都有一個共通點，都是大夥人圍在一起，把生的食物弄熟，然後送進口中，等待的過程，是吹水好時機
好在前同事車我返元朗，然後我自己轉車，否則只可以兜大圈
但係尋朝起身就覺得lai野，可能係食濟左啦，勁唔舒服，在會展發呆…
晏晝食粥，感覺好d
人潮流動，時而泊一輛黑亮開蓬車，時而黃色保時捷駛過，人來人往，一片琉璃瓦分隔熱鬧與寧靜，他與我伴以四件精緻甜點，喜歡周五的華燈
午夜場，買飛都玩一輪，不過睇完都唔知套戲叫咩名，超搞笑﹗
周六即係今日，返工，訓得唔好，全日頸痛，頭唔可以擰向左多過30度…
夜晚去左食泰國野，行街，送他溫暖外套，至少，這個冬天他會記著我
早上準備返工，真係忍受唔到冇電視睇、冇電視聽
頭先都係唔服氣，再將d線拆晒重新駁過，發現個放大器唔著燈，仲要熄埋燈confirm多次，真係冇著燈，仲諗緊點解會壞，要整好麻煩，但驟眼間睇到個電掣冇著…
原來，呢幾日冇電視睇，唔係天線吹歪左，而係唔覺意熄左個放大器，哎，真笨…

我的專屬星空

8 December 2010

最近，喜歡看星
2010年第341日，被帶到漆黑一片的地方，銀河忽然出現眼前
今年生日，收到一個星空

生日蛋糕換成魚生飯，甜筒充當蠟燭
不，他拿起桌子上的無火蠟燭，趕在秒針在12月7日走完最後一圈前，著我許願，然後手動開關，配合我把蠟燭吹熄

這天，見到想見的人，做了想做的事
我相信無聲勝有聲，繼續，浪漫到一起惹絕症

浪漫到一起惹絕症

6 December 2010

上周忙於約會，晚上不想睡，早上不想起，周日，訓三數小時便在太陽底下踩單車，很瘋狂，很舒服﹗
返屋企沖涼洗頭，又訓幾個鐘出左去，先約左朋友一號食雪糕，再打邊爐

11月31號，先出去灣仔簽名，食個飯去紅磡打封信簽個名，六點前攞張cheque走，全日心情都勁靚，呢份生日禮物真有意思﹗
12月1日，換一個工作環境，灣仔商業區出沒
星期五，佢message我，大概約了放工後見面，沒有訂下節目或目的地
佢忙緊冇咁快走得，所以我決定用最慢的方法過海等佢，行去碼頭搭船，再去總壇朝聖，咁又進貢了…
著左高跟鞋，真係唔係好想行，但左眼隻con唔舒服，晏晝喺公司除左，喺尖沙咀好幾次差d跌親，都係決定行去搵眼鏡舖去配番，250一盒都冇法
去左亞士厘道食野，食完行左轉hmv就攞車，佢問我去邊，西九海濱長廊唔識去，青馬觀景台，大家諗的野都一樣，不過入錯線，一條路踩左入東涌，結果向迪士尼方去開

對著沒有人的公路，很想尖叫﹗
這個地方讓人思考，白天熱鬧繁華，晚上，帶點沉鬱…
泊在迪士尼消防局外，機械卡卡作響，頭頂多出一片天，彷彿就要拉著獵戶座的腰帶
隨意讓音樂飄揚，喜歡這個晚上
脫下高跟鞋，找一個角度，能夠以最舒服的角度欣賞星宿，坐在馬路邊上，躺在雙黃線旁
我說，做些平時不會做的事情
大家都認同，尚欠兩杯飲品、兩個咕臣

他問了三個問題，一個帶點措手不及，一個說了真話，另一個盡在不言中

有沒有星空已不再重要

24 November 2010

總喜歡胡思亂想，不隨便停下來
今日走過紅隧，西隧，長青隧道，香港仔隧道，遊遍港九新界，足跡跨越南北版圖，在落馬洲瞭望台與海洋公園之間徘徊
小時候看完《大白鯊》，走海底隧道就會怕鯊魚撞爛管道，今天經過深山中的隧道，竟然害怕像災難片，隧道塌下來，土地裂開，蔓延，再逼近...

離開辦公室，睡覺之前，有數小時可以精彩、享受、冥想
大家應該知道，吃飯和充飢，是兩回事
下午暈車，本來想吃得清新一點，想著找一個地方，有海風和雪糕
還沒有開口提意見，他說外邊有點涼，說話只有吞進肚子裡…
忙了一天的他決定關閉腦袋，只說出兩個條件，不過海，不去尖沙咀，一道難題放在我眼前，我想了想，黃金海岸，車就往三號幹線的方向開
小碼頭配上豪華遊艇，加上燈飾點綴，等於閒適景致，百看不厭，肩膊輕鬆了，點幾道小菜，呷一口薑奶茶，隨便聊，聊隨便，進入靜音模式也可，難得寫意，有沒有星空已不再重要

我問他上次為甚麼哭，他說忘了，令人半信半疑

入夜後，脫下眼鏡，沒有對準焦點的燈火特別漂亮
另外，這首歌叫從今開始
音符在車箱中，躍動，眼簾一開一合，映像投射到腦海，浮現一個mv

happy weekend

22 November 2010

周六悠悠閒，訓到自然醒，食下野執下屋出去跳蚤市場行個圈已經天黑
尋寶，用15蚊買左一隻靚碟，擺喺飯枱用來裝生果，另外買左一個迷你衣帽架掛起晒我d袋
個架好似砌積木，又消磨不少分秒
泡一壺茶，電腦旁邊，手上訊息，又一個晚上

星期日約左朋友一號食晚飯，起身整好雙層芝士特厚漢堡，超好味
跟住出左鴨記，本來諗住買防潮箱，但好大盒呀，唔係好想拎住咁大舊野迫港鐵，幾舊水一個防潮箱搭舊幾兩舊水返去又好唔抵，所以都係決定唔買住，第日搵朋友幫手…
咁就周圍行，買好多唔係shopping list上的野，去鴨記真係好尋寶feel，亦無意尋到一個我都幾like的電話殼
返去諗住試下set單車個車頭燈，但點知個電筒壞左，住在鄉郊唔可能屋企冇支電筒，咁就趕在跳蚤市場8點閂檔前出去買，順道join番朋友一號
坐左陣出去食pizza+燒雞+薯皮，勁豐富，仲又食又拎
返去坐左陣，吹無聊水泡一壺茶，十點幾出左去食糖水

早幾日買左兩隻杯，雖然唔係好貴，講真應該可以界定為cheap野，但我就好鍾意，成日都想拎住佢飲野

梗係覺得個枕頭唔係太舒服，西鐵轉車時有一間賣雪豆枕頭的舖頭，特價後都唔算超平，算啦，如果真係舒服都值的…

另外，笑話一則，留言話去左鴨記，朋友甲問鴨記喺邊，朋友乙回覆雞記隔離，真係好難唔笑﹗

仲有一件事，仲未決定點解決
就係我好想去旅行，一個目的地，兩個方案，不過opportunity cost都很高…

舌頭周遊列國

21 November 2010

無時無即都想去旅行，肉體未能離開這片土地，讓舌頭周遊列國，星期一去了上海、潮州，星期二再出走上海，星期三去新疆，星期四去日本和越南，星期五再去日本
還有一個方法，就是拿著旅遊書，讓焦點對準異域風光，就是眼睛去旅行

情節的發展有點超現實，難以令人置信，沒有劇本，遭遇卻像編劇筆下般峰迴路轉…
我會繼續走下去，看個究竟
問題的答案，原來會因應由誰提出而有所不同，我明白了，要檢討的人的確是我
讓事情這樣發生，令我有點耿耿於懷，過份敏感，算在我頭上吧﹗

軌跡

18 November 2010

事態發展總有一條既定軌跡，走了一大段直路，車到了路口就拐一下，試試闖另一片天，怎料，卻走進窮巷苦無退路…
我們不是普通路過的旁觀者，很難客觀地領路
報章頭條，將黃蘊瑤炒車那電光火石一剎，大家在電視螢光幕都沒能力看得清的一刻，以圖片凝固了；文字繪形繪聲地形容，讀這則報道，淚水湧了出來
再從網站找出足本片段看一次，那一幕也如同輾過我的心
黃蘊瑤站上頒獎台，賽後那個訪問，我也難掩激動，又哭了
我正缺乏這份鬥志

真心話

16 November 2010

執左幾日屋，其實，原本都冇諗過要咁樣執，本來只係想從儲物室深處的箱子的深處找出一本簿子，後來，覺得要format一下家裡的東西
讀起一字一句，想起很多往事，還帶一點點感慨…
人越大，越少人對我講真話，究竟係我要檢討，定係唔講真話的人需要反省？
周末去過李氏超市巡視業務，監察如何為股東爭取最大利益，我想買的野，價錢都比大家以為貴過人的日式超市吉之島同city super要貴，太過份﹗

忙於約會

14 November 2010

成個星期都好忙，忙於約會
今日放假，都唔得閒得去邊，訓醒忽然想食鮮製漢堡，咁就出左超市買野，整左個漢堡包食完先出街
超市選擇甚少，買左免治牛肉，最簡單方便，返去加少少黑椒同鹽吊味，煎熟，成為免治牛扒
麵包準備好，今次揀左意大利包，方形好似枕頭嗰隻，中間打橫切開，舖兩塊emmental cheese，將免治牛扒放在芝士上，芝士就會融化，再加兩片蕃茄，簡單惹味的漢堡就ready for serve
平時煮飯仔通常都會平過出街食，感覺健康d清淡d，但咁樣整個漢堡包，絕對貴過出去食，但可以揀自己鍾意的配枓，我超鍾意芝士，一個包落左三塊，而牛肉份量可以自己控制，我整左超厚身勁豐富的「牛扒」
當然，仲可以揀鍾意的牛肉，食得豪d下次去city super買件和牛攪成肉碎再煎成免治牛扒都仲可以
食完出左沙田宜家，尋晚開始執屋，又買左一堆書，同埋之前搬返來的書都要搵地方安置，咁就決定買多個書架
朋友甲曾經自動請纓話如果我要買傢私佢會幫我搬，我都曾經講過如果我需要強勁臂彎會搵佢，不過頭先覺得，只係一個書架咁小事，我真係自己搞得掂，咁就冇call佢
將d野上晒架，好眼訓…

踩鋼線

12 November 2010

這些歌詞配上這些音符，衝擊思緒
怎麼會開始對你有了感覺，又深怕朋友默契轉身不見，矛盾著猶豫不決，沒準備，跨越愛的界線…
經歷這幾個年頭，沒有感到自己變得強大，老練，換來滿身傷痕，心頭隱隱作痛
懂得玩這個遊戲反而不是好事，步步為營，處處提防，少了率性而為的傻勁

為甚麼一段肉帛相見的關係變成這樣

5 November 2010

某一年某一月某一日，認識了這個人，叫同氣連枝，叫肝膽相照，叫心照不宣
又有一年有一月有一天，結伴出走，算是私奔嗎？算是越獄嗎？算是靈魂出竅嗎？
跟這個人彼此信任，可以脫下衣服肉帛相見，是坦蕩蕩那種，光著身子
後來，慢慢發現這個人，距離越來越遠，沒有一個理由，找不到答案
我該一早醒悟，跟這個人的密切關係，只是我單方面，天真的想法

載欣載奔

3 November 2010

今日超開心，感覺不能言喻，幾乎行步路都想彈彈下
放工即刻去買左兩對鞋賀賀佢﹗

交換假期

2 November 2010

換一天假期，今日在家中，工時留待周六補回…
睡，不停地睡，睡到後來不想睡
我向來不喜歡吃外賣，說成拿一個發泡膠盒不環保，坐在被日光暖暖地照著的茶座，氣氛悠閒，不過很快我就後悔了，因為我成為了蚊飯…
回去，點起藏香，感覺鬆弛，最好，倚在躺椅上

人在與心在，究竟邊樣重要d？

我有說話未曾講

1 November 2010

那條蠟繩銀鍊子沒有戴在腕上一段時間，早幾天收拾家中雜物時再發現它，將小扣對準小環，一次又一次，沒有戴好…
想起那一次，往尖沙咀的路上，我同樣很吃力地戴上這條鍊，結果，他很輕易地為我效勞

轉涼，周末家中披一件晨褸，架起烏蠅眼鏡，拖鞋任意地敲打地板，悠悠閒
夕陽時分，換一身打扮，與朋友甲一起吃一窩麻辣雞，滋美十分
一口氣買了大批秋裝，更成為了會員，全程只15分鐘左右，真有點crazy

秋天的夕陽特別美，不過也特別短，得好好把握
你這剎那在何方？

肥美大閘蟹能醫百病

27 October 2010

尋日唔舒服，頭痛頭暈作嘔…
夜晚都唔係好想食野，人肉速遞呵護，窩心十足，今早醒來，好左好多
轉涼，要搵番冬天衫出來著，不過始終仲有d間歇性頭暈，夜晚隊兩隻大閘蟹，又好d喎，病氣全消
收到他的電話，他說，天氣轉冷就想起我，忽然間warm了
我們之間沒有事情可以計較，沒有事情需要計較

地下鐵再遇他

25 October 2010

呢排真係唔知搞乜鬼，十點零十一點自然醒，放假當然繼訓…
求其食左個撈面出去，因為要去工廠區個showroom睇野，只開2-6，睇完落左旺角，行街的話真係好耐冇踏足呢個地方，只係因為想搵一個銀吊咀，咁啱旺角有間consignment shop，咁先過去
順道去花墟行左個圈，一路都想種番兩盤，揀左兩盤茉莉同兩盤海星，勁重…
荃灣線轉西鐵，似乎除了這樣沒有其他選擇
地下鐵再遇他，不過，沒有特別的感覺
夜晚梗係覺得患得患失，佢打來，初初都冇乜野，講左兩句淡淡然收左線
之後佢再打來，好似知道我想出去，但又怕我聽日要早起，支支吾吾
我話，不如出去飲杯野，其實，大家都有這個想法
點解之前冇發現呢支鏡呢？比價性很高，聽日要去會一會佢…

執屋

24 October 2010

又一個星期，好像忙著甚麼，其實沒有忙著甚麼
尋晚放工去左飲野，一杯紅酒竟然上晒腦…
飲完去左打邊爐，超開心﹗
半個月冇執屋，飲完早茶洗衫吸塵拖地，搞左半個晏晝
跟住出左元朗搵層架，其實都睇唔啱心水，求其買左一個返來頂住檔先
頭先幫襯街邊無牌小販，小販係一個賣菜阿婆，我橫掂都要買菜，當係做善事幫阿婆自力更生

南生圍路上加速

18 October 2010

自然醒的時間竟然係十一點幾，點解？
繼續訓左陣，點幾起身食左d野，就出去買wd-40，但竟然冇得賣，只買到第二隻牌子，洗完衫換好衫，再帶單車出去打氣，睇一眼地圖，就沿著河邊，往南生圍的方向踩
沿著錦田河，朝元朗方向，會找到高埔路，踩到盡頭就接上南生圍路，看來很容易
怎枓，高埔路的盡頭是沒路，有一個小斜坡，有一段高架橋橫跨錦田河，總之，就是此路不通，怎辦…
我最後決定抬起單車走上斜坡，翻過兩個鐵欄，然後，找到一段隧道，是我平常踩往元朗經過那條隧道，原來反方向就能找到南生圍路的入口
這條路很長，河畔而建
一邊踩一邊拍，又來到盡頭時，已差不多入黑，抄一段小路，隨便拍幾張算了，甚麼小渡頭，蘆葦林，根本沒看見過，找天再來吧
回去，天色漸暗，入黑，還未回到家中，只好不斷加速
返去沖個涼，出去燒野食，過了簡單、開心、滿足的一天

鐵軌往事

17 October 2010

重陽節，自我懂事以來，有選擇權後，我從來沒有再參與拜祭的活動
的確，回鄉祭祖，是一件很花時間和費神的事，家中各人多年也沒有回去，某些日子，多燒一柱香行了
早前居於深圳的兩位老人家住醫院，好不容易到了一星期大家都放假的這一天，就回去看看兩個老頭，結果混進回鄉掃墓人潮
記得小時候，火車還有一個名字，叫九廣鐵路，道明跨越兩地，家住沙田，數著唸著車站名字，原來，我們一早已走出課堂上通識，過了大埔墟之後，就會看到稻田，牛兒在窗前掠過，總惹起我們這群小孩哇啦哇啦叫起來
而最開心和最期待的，就是回程火車，通常在午後過關，羅湖月台上就熱鬧起來…
熙來攘往，耳朵調較了一個頻道，只收聽到雞脾汽水的叫賣聲，心裡熱烈盼望得到一份精美下午茶！
我這份心願往往只有一半得償，我和弟弟，每人一隻滷水大雞脾，時而用白色無耳膠袋包著，時而用奶茶色雞皮紙袋裹著，不過汽水就免問
但不知道從哪天起，這些伴著鐵軌的影像已經成為往事…

沙甸魚自白

16 October 2010

搭西鐵，早上特別熱鬧，應該企喺邊等先保證上到車，好似買大細，一係中一係唔中…
很討厭這個感覺，更討厭發明返工的人
鐵馬在地上奔馳，人類捧著平板電腦，注視著螢光幕，不過心靈素質比一百年前改善了多少？靈魂又自由了多少？如何量化快樂了多少？
當日發明沙甸魚罐頭的人，把死魚和茄醬塞進小罐裡，沒想過有一日把活人也被塞進鐵車箱中，由機械路軌和齒輪運走
這幾天，對「仰人鼻息」特別有深的體會，偶爾碰到滴著汗水的手臂，哎，很難受…

銅鑼灣街頭被巧遇

15 October 2010

一個東一個西，沒有力氣去印證地球是圓，順路走，我們從來沒有遇上
今天繞了一大圈，繞到海港對岸，他打電話過來，說感應我已經放工，原來他也人在銅鑼灣，怪自己不夠專心還是太過專心，沒有留意熟悉的臉孔
他說，喜歡這種不經意的單方面巧遇
我說，我是被巧遇的一個，享受不到他那自我感覺良好的心情
忽然詩意起來，記住銅鑼灣這個地方…

差唔多，到了食大閘蟹的時候了﹗

地下情

14 October 2010

一年前的今天，人在西藏，一年後的今天，懷念那時光…

人群中眉來眼去，傳送一個腦電波，接收一個眼神，潛台詞再加上特殊加密系統，旁人解讀不來
時刻自製快樂，地下情就是多了這分樂趣

還是喜歡走偏門，不做鳳尾

簡單的笑

很想得到一樣野，當得到的時候，那種喜悅，真是難以形容﹗

快樂，本來就是一件很簡單的事情，只是壓迫的生活、無形的信條令她離都市人越來越遠，我們活在繁華，不懂知足，更不懂安貧樂道，越追逐更多，越失去率真與歡樂，似乎越樸實的人們掛著笑臉的時間才越多

下午，回復童真，幾個杯、數塊木頭，大家都笑了

記著這種簡單的笑

界乎朋友、親人與戀人之間

9 October 2010

有一種朋友不用經常見，但見面時很舒服，大家不發一聲絕對沒有尷尬不安，昨天晚上，約會這麼一個朋友

算一算，我們應該界定為識於微時，中一那年
他第一句問，我們有沒有十年沒見？
感性和理性都不想承認或證實「十年沒見」這四個字，他仍是我眼中當年的那個他，我仍是當年他眼中的這個我，感覺親近，感覺信任，沒有時差

小燭臺、布沙發，大提琴伴著甜美歌聲，時而抱著咕臣，時而讓酒精刺激舌頭
這一天晚上，開懷和輕鬆的感覺，難以形容

這種狀態，就是知己

得罪都係咁話

1 October 2010

雖然好眼訓，但感覺趁仍新鮮，趕快記下
last day係3號星期日，不過趁今日人齊，又可以同同事甲一齊賀賀佢，決定今日以散水餅招呼眾人
真係唔知邊個發明要食散水餅，應予以讉責，做壞晒規矩
茶水間看人生百態，識你唔識你的人，交情與咀臉，又上一課專題研習
按兵不動的，一係冷大牌，唔當面邀請唔食，一係真係有d廉恥，唔好意思去湊熱鬧；特別寒暄的，通常是萍水相逢但唔係好熟；有d分明攞著數，明明唔知你係邊個，尚未能將你的名子跟相貌配對，但都俾足面你幫你消化高卡西餅
不一會兒，鳥獸散…
當然，也有例外
影相，亦似做場戲，又似例行工事，忽然覺得自己好假
講真的，會再見的人，不用拍這幀相片，不打算相見，拍了照也只掉一旁，多此一舉
希望我沒有要求影相的人，理解
約了大家聚會，已有相眾之期，拍照，有點像儀式…

如何留得住高潮

30 September 2010

執起手機，從通訊錄中找出那個令我醒來仍有一點心動的名字，突然緊張起來…
放下，再拿起，好幾次，最後一次，甚麼也管不了，按一下撥號鍵，竟然，接到留言信箱，真反高潮

一個越洋電話將我帶回現實…
唔知點解，囉囉攣，有d唔係好自然的感覺

夢裡延續的情緣

29 September 2010

算是我懦弱，算是我退縮，沒有勇氣面對和承認的一點點感覺，沉澱過後，原來，仍在心底打轉
午夜夢迴，潛意識裡，幻想變成現實世界，靠在他身邊，依在他肩膀，十二分貼心，二十分心動

陪步，算啦，一早都預左…

慶幸曾經傷心過

28 September 2010

考體能，竟是一場心理戰
有人全副架生，sporty look似足運動健將，著埋馬拉松戰衣、東亞運製服，好似用一身裝扮話俾人知佢運動好掂
不過，跑過唔夠我跑，又有人第一round已經被篩，原來咁都要虛張聲勢，真無聊…
又有弱質纖纖，太陽底下怕曬黑，擦一臉防曬，臉白反光的人，與朋友高談闊論，誇口自己做了幾多下situp，最後跑嗰800米原來蟻欄咁慢
雖然攰攰地，但都未至於行街都冇力，所以去左喪行，兩條腿咁攰，都係行街累事
物極必反，竟然訓唔著，今朝晨吉咁早醒左
她說剛分了手，心情極差，不停問朋友是不是仍在發夢，分手的事是假的…
如果，有一日試過因為終於可以離開一個男人而有重生的感覺，差點要開香檳，應該慶幸，自己曾經都試過傷心
夜晚決定食自家改良炮製的越食三文治，勁好味
如果山邊沒有圍欄和燈柱，換一輛四驅跑這迂迴山路，深山中，也能矇騙自己一時三刻
獅子山的山落，我想像中的美

夢想，靠鈔票經營

27 September 2010

dream car dream house，所謂夢想，都靠鈔票經營，貼鈔票粉飾，日日為口奔馳，活在赤貧線上，沒有整理生活的空間，甚麼也免問
可能，要記者拿卑賤的薪金，活在貧窮線邊緣，刻苦地過活，才不泯滅人性，時刻關顧弱勢，對壓在自己之上的強權、資本家懷著一顆批判的心，掙扎著發亮
對，上左岸的編輯監製，炒股炒樓，每次提弱勢社群、貧富懸殊的故仔，都話做過冇新point
十年前的窮人和今天的窮人，有分別不就是新聞？沒分別才更是新聞﹗
今日去考懲教主任，考紀律部隊，一直都是我的目標，但又不甘於未試過其他新鮮事，又怕體能差，拖到今時今日…
大學畢業、中英文一級成績，入職$30,450，做10年記者，都冇可能追到呢個水平
地球有三極，去南極要10萬，北極平極都要6,7萬，我去左最平的世界屋脊，屋脊的邊上，1萬有找
這幾年來，做一個小記者，實現夢想的資金，儲一年去一次旅行就一舖清袋，的確，不能長此下去
小時候閃過一個念頭，希望有一日做到好似鏗鏘集嗰d報道，潛意識使然，如今算是完成了兒時夢想，這個夢想也得付出，就是付出了跑輸大市的薪金換取
上個月終於決定了，離開，這是我做得最長的一份工，做了3年半，要好好準備青年時代的夢想
拎起體能測試的評分表，5個項目，每個最少攞1分，total攞到15分先叫合格
初初以為situp做得唔錯，40下有4分，但可能真係緊張，成批人第一組考，真係覺得唔係好ready，結果做得33下，仲要係做到自己停左喺度，第34下起唔到…
出來睇番，好彩33-37下都係3分，做到最低要求，但真係好怯，驚之後嗰d都表現唔好
shuttle run冇報時，唔知自己跑咩成績，以最住守計2分，好彩執豆袋做到目標的19下，又有4分，跳高練就練過，但未度過，3次試跳，第一次被foul，第二次跳得38cm，我記得目標要跳到39cm攞4分，好彩最後一跳有41cm，都係穩拿4分
最後一個test係800米，一路都係我比較淆底同弱雞的項目，試過自己time跑4分02左右，跑番呢個成績就4分，不過我未試過烈日當空下跑，好怕失準
不過好彩我嗰組有個勁人，跑得勁快，帶住成組人跑，我一路keep住跑第二或第三，但個勁人放我地成半個圈，勁誇張…
考完簽番個成績，原來我total攞20分，距離pass多左一大截，而最意外係800米竟然攞5分，即係少過3分59跑完，呢個成績我從來都未跑過﹗
考完勁開心，出左cwb行街，先獎自己喺分舵揀禮物，喪行，跟住再食杯乳酪，又喪行…
唔知點解，抑鬱同亢奮，都好想食高卡野，頭先食左薯片同西多，勁滿足

拍青瓜遇上羅漢果

26 September 0201

尋日帶埋跑鞋返工，本來諗住放工去跑步，但結果冇去，俾baby引左去食豐富晚餐，又食到勁飽，但d野都係食唔晒…
呢幾日都訓得馬馬地，成日自己無啦啦醒左，明明今日放假，竟然十一點幾自然醒，蝕晒呀﹗
碌下碌下再訓到點幾，肚仔餓起身，出左去行左一陣，返來前佢話去阿叉舖頭買辣椒粉，又去超市買低鹽豉油，佢整拍青瓜，真係同喺街食的味道勁似，仲買埋羅漢果，一個原來可以煲一大煲，搞到雪櫃好似賣羅漢果水…

抉擇

25 September 2010

人是生來做抉擇，還是抉擇主宰生命？
做了決定，即將要執行，當然，我可以選擇執行或不執行，但順順利利的話，的確是影響一生的決定
愛惡好憎，追求喜歡的事物
人人手執的電話一模一樣，幹嘛？
我曾經也是追潮流的人，要有當季波衫，新款all star，挽一個porter或agnes b潮袋，握一部潮手機和遊戲機…
不過，當很盲目追求過後，有一天會醒覺，我需要這部電話，還是這部遊戲機更需要一個主人，其實是生產潮袋的廠家最需要我這個顧客
資本家成為資本家，因為他們很懂得周旋在將別人的資本轉化為自己資本的遊戲，時而癲倒是非，明明他需要你，說成你需要它，又再引用李氏超市兩父子的廣告，明明是他搶你錢，但他搶少幾蚊，就說成你賺了，一樣道理

勾引嫦娥笑呵呵

24 September 2010

中秋夜，拍完野獎自己食一碗自助乳酪
排隊攞一碗乳酪，然後好似夾糖咁，自己加料，跟住拎去磅，15蚊100gram，相比起90幾蚊仲未加一的哈根達斯，好抵食架喇
夜晚返去做節，又食又拎，如果拎碗湯走，換來安心貼心，何不為之？
一出西鐵站就見到漫天孔明燈，越飄越遠，幻化點點繁星，周圍都點起燈籠和燭光，真係好靚﹗
我都急不及待返去，以燈火點綴欄柵，掛起小白兔燈籠，勾引嫦娥笑呵呵
今日又拍野，好叉眼訓…
放工去左買跑鞋，跟住搵標準運動場跑圈time時間，大坡地重建，一係去天水圍一係去葵芳，一樣要轉車，天水圍打埋算盤都叫"同區"，而好彩輕鐵都唔係咁難搭
兩個圈=800米=4分1秒84，算係幾唔錯喇…
趕快拉個筋就俾電視劇的力場吸左返去，明天再續

我揀D，all of the above

22 September 2010

打風落雨，大家都躲在家裡，夜行免問，跑步千萬別想，點燈籠就要望天打掛…
某日差d買左一個木製角架放在客廳冷氣機底下，好在嫌遠嫌冇得免費送貨冇買，後來反覆思量，應該買番宜家嗰個，同書架夾番
如果唔係落雨，頭先已經碌左去沙田買…
人為甚麼需要朋友？分享喜悅，遊樂玩伴，扶持解窘，倚偎分憂…
即是說，沒有危難、不需要人幫忙，一個人也可以自得其樂的時候，朋友，有沒有也沒所謂
他說
離開的時候，你會選擇A)切燒豬；B)開香檳；C)燒炮仗

奶黃月+小白兔

20 September 2010

前所未有的強烈感覺，就係要得到一隻白色小白兔燈籠
唔鍾意食各式中式應節食品的我，自從試過半島迷你奶黃月，每年中秋都心思思想食
今年好多舖頭都出奶皇月，但點都要將個quota留番俾半島…
尋日朋友送我一個迷你奶黃月，好晏食完晚飯就買埋隻白兔仔返歸，中秋節來喇﹗
朋友甲過左來揼骨宿營，晏晝訓到黃斯八晏，一齊出左元朗食壽司，行左陣，打風超熱…
返歸前，去監察一下李氏超市有冇借d意靜雞雞加價
紅色嗰間超市，8罐裝可樂又創新低價，16.4一pack，不過屋企仲有好多貨…
整左滷水雞翼，晚餐仲有義美蜂蜜蛋糕，好味道﹗

潛夢

18 September 2010

前晚潛夢潛到level 2，發夢某事成真，然後在另一夢裡，問剛才的夢是真還是假
而嗰覺真係好似訓左好耐，原來，套電影真係有根據架﹗
放工去左行街，買左好多野，兩個bag一件衫一條褲，仲有一盒龜啫喱做宵夜
situp一分鐘做40下，真係退步好多…
點解，唔可以揀同上亞厘畢道做朋友，一定要喜歡佢？

jog in starry night

16 September 2010

做樓市故仔，其實我都係一個買唔到樓的小市民、八十後
我都好現實，市區住得起都無謂要自己捱，搬到去鄉郊
當日大家鬧董建華，鬧到體無完膚，甚至有時是人身攻擊
歷史證明了，相比曾蔭權，原來，董建華似乎是真心想為香港好，想為香港做一番建設；但曾蔭權也很坦白，因為佢想做好佢份工，不求做得特別好，受八方稱許，但不要做錯，公務員心態，不揹鑊，不做不錯，所以新建樹免問…
特首唔係一份工，循規蹈矩冇用，要有領袖的思維，懂得砸爛和創造規矩
最近電視劇又發揮力場，就算要去跑步，都要趕在9點半前返歸，上次搭訕想搵個跑伴，嗰個女人都話要返去睇電視
但我感到我這個陌生人帶點唐突，這個都市自命開放開明，卻容不下搭一句訕
其實，7點放工，7點半返到去，咪咪麼麼都可以8點前出到河邊，拉筋熱身，再跑半粒鐘至九個字，再cool down都夠時間，返去先頹食
只要唔係走左去欄街又或者去喪食，點會冇時間做運動呢？

秋天

15 September 2010

兩個下雨天之後，換來爽涼天氣，秋天來了
大家可能覺得烈日當空，攝氏度三十有多，似乎仍是夏天，但仔細一點留意客觀天氣和主觀感受的變化，秋天真的來了
從小讀書就知道秋高氣爽，言簡意賅，高是氣壓高，天氣報告常聽見的高壓脊，兩者是連體嬰；氣爽，就是濕度漸低，感覺乾爽
如果明確和科學一點，應該說是月曆上小字寫著秋分那天之後，就是秋天，那天白天和夜晚一樣長，那天以後，夜晚會一天比一天較白天長，直到冬至，全年夜晚最長的一天，然後白天慢慢變長，到了春分，白天又和夜晚一樣長
細意體會，你會發現這幾天白天烈日當空時或熱像盛夏，但一早一晚，吹起一陣風，有些涼意
大雨同時洗刷大氣，晚上皓月、雲霞、星宿分明
腳步繞著河邊，月色星空下喘喘氣，深呼吸，感覺幸福

免仔燈籠

14 September 2010

下星期中秋節，周圍都賣燈籠熒光捧
忽然間，想得到一個免仔燈籠，約一班好友一齊玩
好很熱，晏晝自己放自己假，本來諗住出去行街，但結果都係呢喺屋企執屋
朋友過左來坐，食左個飯，本來諗住去出面嗰間私房菜，點知佢星期一唔開，大排檔又怕污糟，又唔係好想食酒樓，咁就去左投注站隔離間餐廳
食飯前，先去買六合彩，原來之前張飛中左，廿蚊…

介乎好彩與唔好彩之間

12 September 2010

閃電好勁嗰晚，電視收得唔好，屋企收唔到手提，冇試過fix line有冇問題，但好在仲上到網，如果唔係就與世隔絕…
諗過影閃電，但實在太大雨，開門已經撇雨，攞部機仔喺廠房個窗影，但影左幾張都影唔到就放棄
其實，係我唔識影，定係唔啱方向角度，不得而知
閃完第二朝起身，某台死左冇得睇，我初初以為吹冧左我條天線，但後來發現另一個台睇到，後來問番，原來部分新界西人都睇唔到多行不義嗰個台，咁即係多行不義嗰個台俾人擘啦
星期六日落勁大雨，咁啱我要拍野，真係唔知好彩定唔好彩…
好彩在唔係出去玩時落雨，唔好彩就係weekend要返工
抉擇，諗緊好唔好買過張梳化，買多個衣櫃，不過仲未諗得掂應該點樣處置舊嗰張好好訓但唔好坐的梳化，同埋新衣櫃應該放邊度好，究竟將間房變成一個真正衣帽間，定係放睡房出面，仲未度得掂，因為張書枱實在太牙乍，又多野，唔知收去邊
頭先發現一個好靚仔的燒烤爐，鐵水桶+網，我諗我都可以土製一個
外賣薄餅店竟然將大批mark到49蚊一個，我唔信佢會蝕住賣，咁即係話原價128-138一個的比薩，係牟取暴利啦
頭先order左一個49蚊都有得賺的大批，自取，沿路都勁香

讓座

9 September 2010

經常搭鐵路，車廂眾生相，醜陋的多，厭惡也多
鐵路要載客量大，坐位有限，企位多過坐，看見老人家蹣跚上車，詐傻、扮訓、視而不見多的是
我都係企的多，坐的少，有時見到d人坐喺度，面前一大個老婆婆楝喺面前，都唔讓座，究竟咩心態？我有時真係想叫佢起身俾阿婆坐，唔通佢唔會老，佢阿爸阿媽唔老，除非佢永世唔使迫地鐵、迫巴士，又永世都喺頭站上車，如果唔係，真係有報應，第日老左咪使旨意有人讓位俾佢坐
當係為自己積陰德，亦當係為別人的父母行個方便，希望有日我父母需要一個座位時有人讓座

addicted to

8 September 2010

眼和手好像不能閒著，坐車，等車，就不其然拿出手機，查訊息，查短訊，但分別剛從辦公室離開，沒有新訊息；短訊會發出響聲，沒有響，究竟查甚麼？？
以前電話沒有上網功能，短訊逐個收費的年代，坐車，候車，等朋友，都是呆望車站，以車廂眾生相打發時間，最多不過就是拿起聽筒喋喋不休
又以前，沒有手機的年代，靠窗坐，看流動的風光已是樂趣
現在，沒帶手機在身就渾身不自在，手機不能上網就很煩躁…
但想深一層，我根本連日理萬機也沾不上邊，為甚麼將那小傢伙操控我的空間與情感？早幾天還以不能接收手機訊號而高興，真無聊

長髮

7 September 2010

出海那天將頭髮放下來，原來已長得那麼長
兩年前剪短了髮，一年前駁了髮，每次坐在髮型屋，再三叮囑髮型師，我要留長，不要剪太多，今天，算是有一些成果
一個決定，要兩年來彌補
曬黑了，手手腳腳好似幼一點，配上長髮，算是換左look

訓到自然醒

6 September 2010

游水、沙灘排球、數字球，各樣野加加埋埋就等於超勁攰
訓到第一次自然醒係一點半左右，繼續攤下訓著左，到真正自然醒係三點幾差唔多四點
尋日食過的野好似未落隔，全日都唔係好想食野，起身只食左麥皮，跟住狂排版，天黑出左去行一陣
有一陣間有短暫肚餓的感覺，咁就食左個出爐蛋撻，買左盒叉燒包返去，咁就食叉燒包，飲自己榨青蘋果汁
哎，今年冇得去旅行了，追秋計劃要等下一個秋天…

沒有手機訊號的幸福

5 September 2010

今日再遇到令人百思不得其解的事
就係點解腰纏愛瑪仕皮帶，手挽愛瑪仕皮包的有錢人要同我呢啲腳踩愛迪達斯的窮人，一齊迫港鐵？
如果是跟我一樣的平凡普通人，為甚麼要追逐這些與身份不相稱的名牌奢侈品
那個手袋，是車廂內某某數個月的收入，甚至是一些基層蟻民一年辛勞
今朝鬧鐘6點9喺度呱呱叫，外面落緊雨，又眼訓，又要熬車，真係諗過射波，好唔好繼續躲在舒服被舖和爽意空調之間，呼呼大睡…
最後，還是撐著眼睛起來，因為，可能是今年唯一一次夏水
剛好1個半小時，從鎖門到喺西貢碼頭落車
陰天，太陽在雲端以外，若隱若現一團光影，間中下起微雨，正因為咁樣，大家戒心少左，乾煎，回航時大家的臉珠都是紅噹噹，微微灼傷
有點暈船，泡在海裡比較舒服一點
手機放一旁，不用擔心它會鬥事，因為沒有訊號，不問時間，感覺自己很幸福
隨意坐，隨意睡，挑你喜歡的方法，將皮肉身驅放在甲板之上，靈魂，就任由她浪蕩，寫意忘憂；好友相伴，閒聊，讓笑聲填滿空氣，靜下來，聽海聽沙聽風聽雲，空氣也不寂寞
全日都維時住一個飽的狀態，上船前食左早餐，游左一陣水大笑一輪又食，海鮮自助餐
回程大家研究有乜好下場，有人建議出番「旺角市中心」，講講下又話去「旺角郊野公園」同「旺角動物園」
最後坐著朋友的玩具車，塞車塞到element，行左個圈又落番佐敦食飯，6個人食6人餐，結果又食到捧住個腩，超勁攰，我自行碌去西鐵站返歸，佢地再拼尖東，擺明要同d啤酒、芝華士同黑牌過唔去
返到去放低野，諗住喺梳化攤下，咁就訓著左，醒來，或許身上仲帶著些微海洋的氣息，都係沖涼洗頭洗衫

現代商業化社會自我保護失調症

4 September 2010

政府呢期勁吸引，請AO、EO，仲有影視娛樂事務主任，都係我杯茶，不過後者pay得奀d啫…
只係好cheap的宜家門口地氈，點解咁都有人偷？
其實我唔係好肯定係咪真係俾人偷，但係某日洗完2張地氈放喺圍欄度諗住晾乾佢，但某一日返屋企就發現少左一張
奇就奇在貴嗰張仲喺度，平嗰張唔見左
我諗過會唔會被風吹走，呢個可能性真係唔大，地氈都幾重架
雨很大，聽日有今年首個夏水禮，其實，今次唔係第一次，只係之前我去唔到，其實，我都落過水，只係冇落過船
希望聽日個天生生性性啦，最好出恆太陽啦
可恨扮無知，扮面矇的人，躲在虛假的臉譜後
算是我妒忌吧，我就是缺乏喜怒不形於色的技能，更不懂沉住氣，也許該說患上「現代商業化社會自我保護失調症」，超吃虧
又唔係有親，算唔上友好，咀型又唔夾，做咩要我充撐場面，陪慶生？
何苦委屈自己，說出討好的說話
我說，去西藏旅遊是「缺氧治療」，開墾心靈

魔咒

3 September 2010

換了tibet bible，排版精美，突登買兩本雜誌儲印花都不為過
話會狂風暴雨，搞到我著左幾日雨鞋，但又冇落雨
可能我好彩啦，一返到去放低個袋就落狗屎，唔通雨鞋有魔咒？
之前失眠了兩晚，settled，所以尋晚放工去左食壽司慶祝，仲有好味cheese cake

不戰而勝同不勞而獲一樣咁開心

1 September 2010

這樣算是贏嗎？也許算是成功從她手中搶過來
但想深一層，其實，我並沒有主動做過甚麼，應該說我甚麼也沒有做，根本犯不著搶這個小動作，不費吹灰之力，就乖乖從她的身邊飄到我的手上，對，就是這樣﹗
此事關乎社稷安危，我唔准
一眾大戶和機構投資者快d接order做野，沽貨，沽到見底為止﹗
anyway今日超開心，飲兩杯賀賀佢﹗

不能僭越的界線

31 August 2010

有些決定不能做，有些界線不能僭越
事情維持現狀，總有它的原因
轉變，可能變好，但亦可能變差，變好當然皆大歡喜，但變差的後果，將不可挽回，怎樣承受這種風險？
大家都有一點好感，有點享受，帶點幻想，沒有承諾，毋需負擔，要突破這種狀態嗎？
將情感濃度提高一點，多了一點管束，少了一點秘密，多了一點真相，少了一點空間，受得了嗎？
如果踏前一步，換來你生命中最多不過兩年、兩個月或兩星期，倒不如卻步
維持在這個水平，還是最好

fall in love in belgium

30 August 2010

唔需要買雜誌，勁少買雜誌，揭多過睇，真無謂﹗
今次都係為左特定原因，就係想換tibet bible
揭到其中一頁，係賣飛佛haagen dazs的廣告，新甜品love in belgium，聽個名已經想食，專頁係咁樣介紹：「經典朱古力雪糕與比利時朱古力雪糕相擁，熱朱古力心太軟蛋糕內蘊濃醇朱古力醬，配以冧酒松露朱古力，帶來一場無法拒絕的朱古力盛宴。」
朋友甲歐洲行返來，又起行在即，大家都得閒，就約食晚，我話想食雪糕多d，所以食咩都係其次
take order時講左要等15min，眼看雪糕一啖一啖被送進口，我嗰份仲未到，又期待又心急
朋友甲話食完3球雪糕好有罪惡感…
食雪糕為了開懷，何需介懷？
晏晝因為要出去拎野，冇得訓到自然醒，行左一陣等埋朋友一號，食埋野就返歸，去左我屋企附近間野揼骨，超書夫﹗
研究內蒙行，追秋去…

my tiramisu

29 August 2010

好耐冇食過amaroni's tiramisu，尋晚明明係book唔到枱，但食晒maincourse，侍應拎個甜品menu來，我隨口講左一句，話原本提議去amaroni都係想食tiramisu
忽然大家二話不說，有一個默契，閃過一個念頭，就係睇下樓下有冇位，tiramisu沽清未，先頭部隊去探路，all clear，咁就拉大隊落去食甜品
我要換u travel嗰本tibet bible

dress in black, we are sad

27 August 2010

那首哀樂，每一個音符都震入心扉
那刻寧靜，反而令人陷入深沉的不安
每次，奏起哀樂、默哀、下半旗都令人很痛心，每次，都希望不要再有下一次

今天換上全身黑衣，鞋和袋都換上黑色的
車廂和辦公室都少了色彩，但大家多了一份情感的連結

放逐

25 August 2010

朋友甲問去西藏的野，搞到我心思思又想去多次
搭火車去，hea在青年旅舍或廉價酒店，將驅殼放逐到海拔三千以外的地方，正確的說法是吸收天地正氣，讓靈魂充電
目的地的選擇還有內蒙的星空下和新疆天山腳下
朋友乙問我，去西藏用左幾多錢，其實我冇認真咁計過，約一萬掛，其實我都幾肯定應該係一萬以內，佢問我點解揀返大陸，如果都係一萬左右的預算，可以去歐洲
我話，歐洲人比較文明，保育意識也比較強，古堡皇宮或自然景色，不會一下子沒了，但大陸就好唔同，一個晚上可以剷平一條街，斬去一個森林，腳步要同發展鬥快
的確因為咁樣，我想去內蒙+蒙古同新疆多過去俄羅斯
來回交通三千，包括去廣州機場、由深圳機場返港交通同埋坐拉薩機場的機場大巴；酒店x12晚，平均120一晚，其實可以住得再budget一d；長途租車交通係當地最貴消費，800去珠峰，納木錯500，其實正常去納木錯可以平d因為同車只有三人，又租左較貴的越野車；坐公車去桑耶寺來回90；唔多在市內搭車，但預算就係每程10for的士，5-8for三輪車；食野可平可貴，但食左幾餐免費晚餐，自費最貴嗰餐60；門票珠峰280布宮100大昭寺85，札什倫布寺55，納木錯120；買野簽香油豐儉由人
哎，針窿仲有d痛，喉嚨仔開始痛，我唔想病呀…

殤

24 August 2010

司機逃走，車上還有15人，最後7死8傷
為甚麼要悲劇收場？
中午從網上的即時新聞睇到標題，康泰旅行團在菲律賓被挾持，匪夷所思的感覺，同當日聽到客機撞世貿相差無幾
noon cast播出的應該係ap的source，我喺度諗緊，派邊個去當地…
miss左main cast頭條，但半個cast都係菲律賓，當地情況一定很差
後來我訓著左，9點幾起身出去搵食，朋友甲打電話過來，update住馬尼拉的情況，因為佢睇住畸寶直播，講到槍聲和車門掛屍，都直播出晒街，睇到佢驚心動魄，差點要哭出來
電影睇得多，大家都知道，電影裡被挾持的人質被殺死也好，也是假的，所以看了也沒有多大的感覺，但這一場「戲」是真的，說得難聽一點，變態的電視台，將一幕槍手挾持人質與警察對恃的流血衝突真人騷，直播俾一班變態的觀眾睇
雖然我冇睇，有需要直播嗎？
主播像足球評述，某甲球員如何施射，盡其所能形容所見畫面，再即時上網或在通訊社翻資料，讀數據
直播外電的source，是這樣嗎？
還有抽水，提早播的晚間新聞
M16的彈匣，20發或30發，究竟佢有幾多子彈？
車裡拿著槍的，不是打機啊﹗這是現實，如何對著有血有肉的活人亂槍掃射？
對，四字詞不能亂用，但這一回，真的是亂槍掃射，這個四字詞，最好以後別用﹗
醫生說子彈在腦裡，如果那一刻的車廂裡，應該鑽哪兒？
菲律賓的龜縮特種部隊，不，是特種龜縮部隊，拿鐵鎚打車窗，砸車門，這算是甚麼居心？
唔知間車廠使唔使問ap買番條raw片，用來做廣告，sell佢架車幾「堅固」
車廂掛上窗簾，外面卻在開槍，如何確保不射人質？
行動失敗死了人質，指揮那個打份報告，捱罵吃灰，如何嚴重最多也不過是革職，但靈魂與驅殼被強行用子彈分離之後，是沒法還原的
我要求菲律賓政府交待，警察有冇殺死人質
這個時候，大家都很排外，我很討厭菲律賓
至於我，晏晝諗來諗去，都係去睇醫生，打過破傷風針，食左抗生素、消腫止痛藥，隻手已經唔腫了，傷口亦埋口順利

my inception

22 August 2010

睇左inception，究竟有幾難明？
我諗套戲最令人覺得神乎其技，在於個結局，大家都有自己的解讀方法，再拎出來討論時，就好驚訝點解會咁既呢，點解大家諗的野會唔同
對大家的衝擊咁大，都怪我地平時睇的野太linear、straight forward，訊息接收得清清楚楚，少了其他可能性
mocha糯米糍如果趁熱食，朱古力是軟蕊的，呢個亦都係佢咁難猜的原因之一
因為食唔晒，我放左入雪櫃，原來雪凍左之後，個蕊係脆皮，勁正

如果將關注折現

20 August 2010

斌仔搬屋的故事早幾日已經吸引我，尋日見到assignment mark左做細圍故，但鏡頭所見，齊晒台，仲有好多pho-tog，似乎細圍就係唔預電台？
西鐵車廂裡，原本各自發夢，斌仔的新聞，令所有人的視線都集中在電視機上，如果這份關注折現五成，變成真正關心的行動，他今天不用被搬到鏡頭前，說出放下尊嚴的說話…
夜晚玩煮飯仔，先去買意大利米等材料，意大利大餐，有risotto同磨菇湯，超好味﹗
勉強都可以叫海鮮意大利飯，因為有鮮帶子、吞拿魚同蟹柳，其實一下冇醒起，地鐵站間吸血鬼超市有拆左的蟹肉賣，聲稱泊來品來佬貨，如果唔係的話就更加海鮮
不過唔好調轉，唔可以叫意大利海鮮飯，因為係海鮮+意大利飯，而不是意大利海鮮+飯
食飽無事做，又想食甜品，身痕，正嘗試mocha糯米糍
不過，失敗呀﹗猜唔到圓碌碌，立黐黐，猜到岩岩蠶蠶，好醜樣…
哎，又恐襲，點做最徍後備？
之前講過會補回的雪糕車相
唔係用現成的罐頭湯或雞湯，自己煮左個蕃茄湯，勁鮮甜；炒洋蔥勁香，聞都知道好味
製成品，絕對見得人，放心食用﹗

一碟軟飯拖鞋上

18 August 2010

舊年大陸有個小朋友的志願係做貪官，吹水講開，應該有d細路立志做風水師，理想係做挖窿師父，最受歡迎的菜式，唔係咩珍饈百味，而係軟飯，最好仲要係軟飯拖鞋上
電視劇中的對白，係「只有窮死人，冇餓死人」
又係從電視中得知，以前幾乎日日放學一齊打波的「波友」認為樣靚會多d機會去整容，仲睜著眼睛沾沾自喜，真係匪夷所思…
哼﹗呢個社會，越來越接近笑貧不笑娼
夜晚打邊爐吹水大會，真係超開心，飛滋漸褪，不過反而颷左兩粒瘡
最近，公司附近經常泊一輛雪糕車，播著勾人魂魄的藍色多瑙河，幸好，我仲把持得住
其實不知不覺間，雪糕車呢個老朋友，已經轉變…
以前，雪糕車唔係寫住雪糕車，而係寫住「富豪雪糕」，而以前「mister softee」已經換上「mobile softee」
我最初以為公司門外的係冒牌貨，但後來喺其他地方的雪糕車，都發現相同的轉變
斷估應該唔係一架車走天涯，原來，也許，是屬於我們的集體回憶已經在消逝…
某天晚上，經過旺角的雪糕車，我特意走上前看一眼，白色油漆下還有「富豪雪糕」的痕跡若隱若現，但色彩鮮明的是「雪糕車」三個大字
稍後，補回相片

飯後感

14 August 2010

人如果餓了，反應會遲頓，思緒不能集中，腦袋的思考工作停頓，肚子咕嚕咕嚕…
你可以用意志控制情感，但肚餓難熬，首先口腔會不由自主地變得特別滋潤，然後可能是胃痛，嚴重一點腸抽筋甚至暈倒
每天上班，期待放飯，有一小時到外邊呼吸自由的空氣，放工急不及待赴約，也是大吃一頓
辛苦賺來的鈔票，每天都為五臟廟奉獻
不論用腦思考，為了吃；不論體力消耗，也要吃
我這麼堅信這一套，沒有吃好，跟話不投機的人吃飯，我問自己為甚麼，偶爾吃飯變成了苦差
人際網絡錯綜複雜，心中所想，不能宣之於口或凝之於色
明明帶點討厭和芥蒂，卻要坐在一起，同枱食飯，還自己一個空間是更好的選擇嗎？

once upon a summer time

13 August 2010

某年仲夏，幾個友人，一間渡假屋，歡度數十小時
今年要encore，日子訂好，房間亦訂好，同一個沙灘，藍天白雲、掘大蜆和bbq，原來，已經係三年前的事
不過訓馬路狂呼，踩單車喪滴汗，都好似唔係好耐之前發生的事
有一次做義工先知道，原來鬼節唔係七月十四，正日應該係十五，盂蘭也好，中元也好，燒街衣背後有一段淒楚感人的故事，一點也不恐怖
害怕，只因無知；禁忌，只因誤解
我返夜你就返normal，到我返normal你就返夜，係咪玩野先？
生左粒飛滋，唔知打邊爐醫唔醫到呢，定係馬吊治療比較有效？
咀巴，最大的功用是吃和講，我兩者兼擅，當然可以又吃又講；不想吃時，講；不想講時，吃
但是不能吃不能講時，又不能避，還有一個選擇，就是沉默
不過最可悲是沉默也不能自主，被迫吐出應酬的說話，只能怪錯選了位置…

no. 2

12 August 2010

早幾日仲埋怨通往西鐵站條路，冇人清理雜草，言猶在耳，前兩晚返屋企時，見到超毒的金腳帶，本港二號毒蛇
今早返工時，草青味道撲鼻而來，原來，剪了草
夜晚食左好味牛肉烏冬，不過仲未安排到時間睇inception，係咪應該搵過第二個人陪睇呢…
希望今個weekend好天啦，單車攝影先可以出動

遇上榨汁機

11 August 2010

有人很怕遇上榨汁機，不過我頭先就搬左一部返屋企，再加一袋甘荀，真係好重…
自家製甘荀汁，飲左一大杯，泡製了一小樽，350ml，明天早餐
忽然間有d掛住amaroni's tiramisu
搵日啦，搵日去買番個返來一齊食