有冇人可以賣d恆心俾我？

22 June 2009

當面對堅持或放棄的選擇時，我住往是選了放棄那個
究竟是目標遙不可達，還是我真的太軟弱？

生命中第三個男人

20 June 2009

尋日聽到一個故事，覺得好有意思…

有一日，一個女人離奇地死了，暴屍街上，全身赤裸，有些人經過，看兩眼便走了
有一個男人，看了於心不忍，不忍她死後赤條條沒尊嚴地任他人指指點點，脫下身上一件衣服，讓她敝體，然後，走了…
過了一會兒，另外一個男人經過，烈日當空，不忍她死後也要受太陽曝曬之苦，出了九牛二虎之力，把她移到一條巷子裡後走了…
又過了好一會兒，再有一個男人無意中走到巷子裡，不忍她死無葬身之地，揹著她到附近的草叢，找來一個鏟子，花了半天挖一個洞，將她埋葬了，汗珠兒仍留在額上，他拍拍身上的灰塵離開了…

甚麼是緣份？
相見與相知，兩個人雖然走過同一段路，但未必能夠廝守半生
有些人在你的生命中出現，點綴浮生路，不過，他不是你的真命天子，他可能是路過的第一個男人，又可能是路過的第二個男人
他們都願意為你付出，付出一點兒，但最多只有這樣，像乘火車，在途中下了車，沒有一起走到終點
也許只有愛，才能解釋為甚麼第三個男人願意在她身上花盡一切力氣
無疑，找到生命中第三個男人，是一件很幸運和幸福的事

又有另一個故事…

有一日，一個男人離奇地死了，暴屍街上，全身赤裸，有些人經過，看兩眼便走了
有一個女人，看了於心不忍，不忍她死後赤條條沒尊嚴地任他人指指點點，脫下身上一件衣服，讓他敝體，然後，走了…
過了一會兒，另外一個女人經過，烈日當空，不忍他死後也要受太陽曝曬之苦，出了九牛二虎之力，把他移到一條巷子裡後走了…
又過了好一會兒，再有一個女人無意中走到巷子裡，不忍他死無葬身之地，找來一台手推車，連拉夾拖，把他送到附近的草叢，再找來一個鏟子，花了半天挖一個洞，將他埋葬了，汗珠兒仍留在額上，她印印汗，拍拍身上的灰塵離開了…

我做過第一個女人，第二個女人，哪一天我會成為第三個女人？
相信我不會是你的第三個女人，至少，這一刻我敢肯定
而當我的第三個男人出現的時候，我願意被他埋在愛情的墳墓嗎？

如果有一天，你很喜歡，甚至很愛一個人，但他也離你而去，可能，你不能成為他生命裡的第三個女人
放手吧﹗

互勉之

一個人的問題

16 June 2009

呢幾日有d情緒，冇咩值得開心，冇咩值得唔開心，冇咩值得煩，冇咩值得唔煩…
很怕遇到呢種狀態，唔知自己做緊乜

一年前的今天，6月15號，如常以玩樂支撐生活
近一年來戒掉以酒精灌溉生活，可能，唔再需要擺姿態，也為健康好好著想
然而，這一年過了很多一個人的周末和假期
還記得最初搬出來自己住，再加上返夜，盡情地享受獨處的空間和無拘束，生活很隨意，也有一分自由自在的感覺
或者，因為不規則的返工時間，順理成章和理直氣壯地避開了一些不想面對，無從躲、無從避的人和事，找到一線喘氣的空隙
不知就裡，後來，忽然喪失了獨處的能力，離群恐懼，身邊少一個人，就好像心裡少了一塊，唔會一個人自己去食飯的怪病，由回復早出晚歸的生活開始

有一些關口，有一些障礙，其實是人自己慢慢築起的…
作息不同，最初很不習慣，試過周末一個人冇地方去，冇人陪，攬住d公仔喊
慢慢地，慢慢地試下一個人走出去行下
轉捩點是那次拿出相機去牛下影相，思考的活動，relax的活動，應該是一個人
近月開始了跑步的習慣，最記得有一次跑完，坐喺場邊冥想，看草，看雲，看雀，看螞蟻搬家，不要是是非非打擾
兩個人的時候想一個人，兩個人的時候也想兩個人，問題不是一個人或兩個人的，總之，一個人也好，兩個人也好，生活，是一個學習的過程，心態的調適

至於近日的情緒，哎，唔知自己做緊乜，為咩呢？
試著回顧自己找答案，結果，發牢騷…

尋日突發想食菠蘿，想買時冇得賣，有得買時時機唔啱，結果冇買到，冇得食
頭先晏晝攞左假，飲完茶返到樓下突然醒起睇下有冇菠蘿賣，去睇下又竟然攞到喎，買左一個返去，自己開，鹽水浸
有人怕麻煩，買超市預先pack好的菠蘿鮮果包，喺呢個情況，我自係唔係好怕麻煩的人，原個菠蘿買返去自己開，開得核突，技術不精，基本上有半個都俾我大刀大刀切走左，不過我覺得個過程都好好玩

罷市

12 June 2009

唔想update，唔想人知道我的內心世界…

keep住一個浮的狀態

8 June 2009

六四廿周年當晚去左湊熱鬧，我再三強調我只是湊熱鬧，揹左部450D出去影下相，塞唔到入球場，但塞左去球場外的鐵絲網，希望冇計到我的人頭
我唔係好明點解做呢行就有平反六四的使命？
我唔會唔支持平反，但我一定唔會係嗰d企出來大叫平反口號的人，如果唔係可以影幾張相+gathering，大熱天時，大汗叠細汗，人迫人，我真係唔會咁無聊去集會
我唔係話香港中央台做得啱，但點解會宣揚平反六四價值的才是好傳媒？唔為六四出聲的人要被批評？
離開公司碌去搭小巴，但等左好耐先有車，而且第一架車仲上唔到
之後去左食足三兩漢堡包餐，食完都9點，跟住碌入維園，之後返番荃灣食糖水，竟然搵到棉花冰﹗

星期六，今年第一次落水，晨吉咁早起身，仲早過返工…
約左8點喺樓下，8點半喺旺角，9點喺西貢，但某甲遲到，所以8點8先出到旺角，等埋朋友甲，9點1先喺旺角出發，結果咪遲左好多囉
夠曬夠熱，真係最啱落水﹗
目的地=浪茄，玩意=香蕉船+游水+訓身沙灘排球
唔知係唔夠訓定係肚餓，有d暈船浪，尤其泊低左隻船之後，坐一陣就覺得暈，周身唔舒服，坐又唔係企又唔係，落水浸住會好d，所以成日都攬住條「棉條」喺水裡面浮下浮下
上番岸見到陸地的感覺真好，再食杯雪糕車雪糕更好，佢地去唱k，我決定散水並取道旺角返歸，最討厭的小巴+塞車，再暈多兩錢…
返到屋企坐喺度，都仲有喺個海度浪下浪下的感覺，沖個涼食左d野，都冇咩搞過，9點零就走左去覺覺豬，訓喺床度都係浪下浪下，訓到今日晏晝1點

晏晝食左d野，hea左陣，好攰，兩隻手臂勁酸，我諗係因為成日要keep住一個浮的狀態，對手放喺條「棉條」上面所致…
不過後來都係決定去剪頭髮，咁就出左去，做埋color，又搞左幾粒鐘，好攰…
呢個6月一日紅日都冇，又要返extra day，真係幾難捱…

長期處於被呵護狀態

3 June 2009

尋晚訓得唔好，晏晝放左com off，只喺樓下頹食鍋貼x5，返左去hea下，訓左陣
之後六點幾煮野食，攤抖下，順便整過個鹽包
話說尋晚整嗰個d布有d問題，焗完(火農)左，仲碎埋，一粒粒甩出來，咁就攞左條毛布縫過另一個袋
9點左右出左去跑步，今次跑左4k，初初以為有風跑落應該ok，但空氣都係唔好，好濕，跑兩個圈已經大汗叠細汗，跑完再做左廿下sit up，d汗真係一粒粒滴出來…
返歸，因為用毛巾個袋大左，買多左包海鹽，繼續做鹽包，睇tv

當一個人長期處於被呵護狀態，會失去自理能力

為左見你一面

2 June 2009

呢幾日頸痛，好辛苦…
今朝發左個夢，夢見搬屋，不過我冇落手落腳搬，唔知點解，亦唔知點樣，某甲幫我搞掂晒，所有野搬晒執好晒，不過唔知點解，我唔係好appreciate，可能覺得佢多管閒事啦
後來發現間屋有d問題，唔知點解對門閂唔實，總係有條罅，個窗勁大風，位於荃灣的舊樓天台屋嗰類，有個透明的篷，不過落雨d水流晒落地下，濕晒，而夜晚到咁上下就會有人叫訓覺細聲d，好奇怪…
總之第一晚住已經住得唔開心，唔知點解個業主好有米，將d租屋野俾晒佢個仔搞，佢個仔又好易話為，聽閒隔離街有d屋都係佢老豆，我同佢做咩唔租嗰邊嗰d新d，又叫佢去搵太子爺換屋，跟住就醒左

有冇試過為左見一個人一面，老遠搭幾轉車，可能只係食餐飯咁樣？
頭先其實我返緊屋企，佢打來，本來都係諗住各自各返歸，不過又唔係好想一個人去食野，又唔想煮，亦唔想食頹野，打番俾佢問佢一唔一齊食飯，佢初初都話唔食，收線後又即刻打番來，咁就約左一齊食飯
遊車河，由荃灣公司搭左車返屋企，返上樓擺低d野，換個袋，換件衫，咁又走左去等車
哎，真係好憎等車，尤其等小巴，唔知幾時有車，又唔知幾時有位，等左兩架都冇位上唔到，佢話「堅持到底就是最後勝利」，同埋佢都未到，咁咪繼續等囉，點知第三架都冇位，個人真係好忟，站頭有個電話，我即刻打去諗住投訴，點知冇人聽，聽日一定要搵個區議員投訴下
我話俾佢知第三架都上唔到，佢叫我打的，其實第4架都差唔多到，等埋最後呢部，再上唔到即刻打的，好快入到去
哈哈，咁就俾我等到第4部車上到，都唔知叫好彩定唔好彩
如果打的，嗰程的士錢夠叫一碟燒鵝﹗
食飯吹水，深井的燒鵝+蒜蓉蒸茄子+金銀蛋莧菜，再來支哈啤，好味﹗
十點半先散水

返到樓下例牌行下超市，有時就係咁，明知冇野買，都想行個圈，見到d海鹽，諗起揼骨場d鹽包，忽發奇想，整個鹽包敷下條頸，所以返到去好忙，手縫鹽包一個，我諗用左一個鐘左右啦，之後放入焗爐焗熱佢，如果太熱用條熱毛巾包住敷喺條頸，好舒服架﹗

大邊定細邊？

1 June

跑完3.9k，頭先去左行街等佢放工，只係行左聯合已經好攰…
唔知點解喺市區都會俾蚊咬，屈記同萬記都冇無比滴，結果買左曼秀倫敦薄荷膏，諗住行多陣，佢已經打俾我話到左，即刻搭左兩個地鐵站去會合佢
仍然係行，都行左好多個街口搵野食，無意中發現巴蜀烤全魚，咁就決定一試，揀左香麻辣味烤全魚，兩粒辣椒中辣，兩個人，order左大邊加配菜，再來多枝純生
大邊、細邊，咁都笑左成晚，哈哈哈
真係好好味，唔食得辣的人真係食少好多美食﹗
我係咁不d麻辣汁撈飯，好好味，真係飯都食多兩碗
佢話有98分，超勁好味，但唔可以成日食，不過一定會再食

食完再行左陣，買左條手鍊仔，跟住返歸，我話去搭地鐵，去到葵芳又走左落車，行左陣先真正返歸，兩條腿好攰…

自願做一個慰安婦

31 May 2009

頭先睇左《南京﹗南京﹗》，有人睇到喊，不過我冇乜野
很多枝枝節節，不過有一幕好淒美，日軍要借100名婦女做慰安婦，一片靜默中，小江第一個舉起手，「拉貝先生，我去」，另一名女生走出來，小江握著她的手，然後是close up舉起了的手…
對我來說，沒有甚麼民族大義，但是有人性的光輝，電影前部分舖敍小江唔肯剪頭髮，話戰後會重操故業的一幕，我已經預視有些故事會在這個角色上發生，即使被世俗視為最卑賤的妓女，卻擁有很多人都沒有的情操
電影的威力，讓人反思，我即時切身處地，墮進那個時空的南京，難民營的教堂裡，一個女人堆中，不一定是第一個，但我想我也會舉手走出來，與其做一個要犧牲他人而活，也不知道可以活多久的人，不如不活，活著，就要做一點有意義的事，與其每日活在被強暴的惶恐之中，到頭來也極有可能成為一名慰安婦，結果也是痛苦，不如勇敢一點站出來，即使這是一個迫不得已的抉擇，但畢竟是自己的選擇，這個決定，是犧牲也好，是認命也好，讓痛與苦不至於承受得不明不白
另外，還有視人命如草介的心寒…

想起他…
喜歡愛生命的他，即使是蚊蟲蟻蠅，都盡量放牠一條生路

男女攻防戰‧不設防

30 May 2009

某一日返工途中，諗到男女的感情世界，也許，這是我的愛情觀

當你喜歡上一個人，花盡心思，極力討好另一半，並以最佳的狀態出現，目標：攻佔他的心
到最後，甚至承諾窮一生守護這個人，但當得到這個人後，你會害怕失去他，歇力維繫一段關係，最終目標：守住他的人
一場男女攻防戰，總有一方，總有一天站出來防守，守著人和被守著的人，有苦自己知，最終鬧至鬱鬱不歡，成為怨懟…
夠了﹗我寧願，不設防
如果有一天，喜歡上一個人，趁仍留著一絲愛意跟他分手，應該很浪漫﹗讓美麗的他活在心砍裡，閒時回味，可能，或者，我們的故事有機會譜下去…
幻想的世界，讓劇情隨我所想自導自演下去

所以，我喜歡省略號，我的文章，通常都沒有句號﹗

同燒一爐炭

27 May 2009

好真係好憎搭小巴，基本上陸上的交通工具，除左火車地鐵，我搭車會暈車浪，小巴尤甚，不過，今日唔係講暈車浪，係講下落車
我樓下好多紅色小巴經過，分別由灣仔、紅磡、旺角、佐敦道、觀塘、黃大仙、彩虹等開往荃灣的，可想而知我可以有幾多車搭，不過，有d車只去到千色店，我知道邊d，唔會上，只會揀去福來邨嗰d，問題，今朝又發生
有d小巴站頭其實唔係喺福來邨，有d喺川龍街，有喺海霸街，亦有喺萬景峰
問題係架車楝個牌出來，大大隻字福來邨，收得我5蚊，就有責任送到我去目的地，但好多時就係架車得番一兩個人，佢唔想兜過去，咁就喺半路掉低我，叫我坐第二架車
今朝，就係被迫喺川龍街落車，仲好似益左我咁話唔收我錢，賤人，諗諗下我記得呢個司機已經唔係第一次遇到，我唔會黑心要佢出咩意外，只係祝佢渣車冇客，上落客超速次次斷正抄牌咁啫﹗
落車位畸畸呢呢，行去搭公司車又好遠，截第二架車又係要行一大段路，結果每次遇到呢d情況，我都係行返去，今朝已經唔熱，但都行到出晒汗，仲好彩冇落雨，我冇帶遮，落雨都咪話唔大鑊，因為嗰大段路都係冇瓦遮頭

夜晚燒野食，又係朋友甲屋企附近個燒烤場
朋友甲諗住通爽d坐出面，但燒燒下落雨，真係吹漲…
搬晒d野入帳篷，搵人搬埋個爐，不過好快又停雨
個帳篷底熱好多，出晒汗…
越夜越少人燒，個火又越燒越細，少左d煙燻，搞到我餵蚊，我諗我太少去大西北，d蚊覺得我新鮮好味道，我又唔適應大西北d蚊，好似特別痕…

同打一把傘

26 May 2009

星期四，唔知點解一d都唔覺得係星期四，要寫隻sot俾星期五、六出隻故仔用，我記得有呢件事，不過唔為意咁迫切…
lunch前就搞掂呢壇野，晏晝繼續research故題
fri又係開會，一個朝早就不知不覺間消失左，食個飯，上下網，咁就一日
放工去左荃灣行左個圈，去睇d地產舖，不過都冇咩好野，行左一陣就散水，煮左好好味的麻辣粉

sat落雨，但為左下月初的夏水禮去買泳衣，入左沙田，因為一田大減價，當然用好抵的價錢買到心水，再行左陣，買左一大pack湯料，再行左陣，買左d豬骨返去煲湯
sun繼續落雨，單車活動取消，改為竹戰，打左四圈咋
大隊去食飯，發起人之前問我一唔一齊食，真係唔知，因為真係唔知朋友甲有咩安排，係咪去飲野，所以都係晏晝好晝先知
被取笑啦，講電話就陰聲細氣，轉個頭語氣唔同晒，呵呵呵
結果就係去左飲野，pints of hoegaarden+椒鹽雞中翼+泰式豬頸肉+炸魚蛋
mon繼續放假，訓醒去左飲茶，仍然是下雨天，在他的傘下仰頭看他一眼，他沒有作聲，喜歡他沉思的樣子
夜晚飲湯當飯食

雨灑在落地玻璃窗外的馬路，從小到大，從疏到密，街燈映出雨水的線條，車頭燈照亮黑漆漆的路面，水窪上舞動中的水點清晰可見，很浪漫的節奏，看得我著迷…
他在一旁睡熟了

濕身晚餐

21 May 2009

今日對兩條腿開始來料…
話說尋日body check放假，訓到黃斯八晏，check前check後順便行左陣街，但真係熱到爆炸，行左一陣已經周身臭汗，仲要加埋滿滿一碗大腸麵線，加辣，我已經醒水架喇，走左入7仔買枝野飲，所以楝喺7仔裡裡食，有冷氣，但都仲係好熱﹗
所以食完決定散水返歸，返到去見橫掂成身濕笠笠，不如去跑步，咁就換左套衫去左葵芳運動場，未行到去都滴晒汗，場內大大個電子溫度計顯示係29度，跑左9大個圈，即係3.6k，流汗都流到人乾
跑到第6-7個圈時，曾經諗咁熱做咩來跑步呢，坐喺度都出汗，會唔會跑跑下暈低或者中暑？

可能尋日訓得太晏啦，尋晚訓唔著，碌下碌下
不過可能做過運動，個人又比較精靈，嘻嘻﹗
夜晚入左深井食飯，不過喺公司散水出發時落勁大雨，淨係喺公司門口上的士，一小步的距離，由簷篷滴落來的水加埋雨水，都已經搞到我濕晒身…
傾計吹水，指定動作，普通晚飯小菜，咁都食左成四粒鐘

另外，徵求5月20號的《都市日報》一份
因為有篇文，用我個名出版左，但我冇寫過篇咁的稿…
其實係我提供左本周六即將出街的《亞洲新世代‧日本》的master tape copy同埋字幕俾地上最強的PR，佢用佢的方法自己RE-WRITE過，所以如果「起承轉合」有問題、寫錯字，我唔負責。特此聲明﹗

仲有，我今日嘔左篇《信報》稿出來，明明個頭寫得幾好丫，不過俾人cut左，為左令原文有機會面世，喺呢度貼番出來，吹呀？如果今個sat睇《信報》時，記得喺文章前加番以下呢個小段落：

「三月份正進入倒數，這幾天冷鋒殺到，日本東京街頭只有六、七度，寒風中的櫻花倍添淒美，《時事寬頻之亞洲新世代系列‧日本》的採訪在這裡開始。」

繼續‧文字旅行

19 May 2009

終於完成環藏遊，不過，research仍是要繼續，今次由西寧出發，坐火車，啱啱完成西寧至格爾木90幾頁的行程，現準備由格爾木去拉薩，第一站將會係玉珠峰

晏晝為左開會的事網上博物館遊
我真係一個好唔鍾意行博物館的人，我覺得，如果去一個陌生的地方，連這個地方的片面也未掌握，大街小巷，睇都睇唔晒，生牛牛的野唔睇，做咩去睇d陳年死物？
加上各個奇形怪狀的網站，呢次research真係苦差…
不過講開d博物館，大陸有d人搞民間博物館，展館就係自己屋企，我諗我都可以喺屋企開個博物館，常設展館有跳跳虎館、adidas館、波衫(基本上是英格蘭)館、扭蛋館，最近別注西藏旅遊博覽，哈哈哈

我發現youtube出現我隻故仔，用我個名search竟然有result﹗

為生活找點激情﹗

17 May 2009

平淡的一星期，忘了星期三還是星期四晚上，放工去運動場跑左幾個圈，每日都懶洋洋…

離開左藏北，去完林芝，重訪昌都了
今日有d唔開心，唔知點解

夢囈中聽了一隻舊碟，有些歌詞想節錄出來

恨你沒有問情由便放我走
隨便碰上哪個她都比我更有趣吸引
辦喜酒當天至失跡不好，人家都只會怪是我不好
還是當你一位損友，沒寄望沒強求
一直等一種感覺

對，就是想為生活找點激情﹗
又聽回另一首舊歌

情侶數字我屈指一算大概知
奇怪卻是每戀一次，震憾總逐漸變得越淺
現時大了，那種心跳難重演

戀愛就像看鬼片，偶爾嚇個正著，拍案稱奇，但下回再看，已沒新鮮感
所以一齣鬼片，只能看一次，今次看了恐怖，下次看就不恐怖，要找更恐怖的看
然而，驚嚇情節，萬變不離其中，在乎編劇布局是否精緻，導演手法是否出眾

戀愛又像玩跳樓機，今次坐在三十呎高空上，不知下一秒還是下一刻free fall，那份不安的期待，很刺激，但第二次坐在同一位置上，已有心理準備三秒後直墮地面，少了樂趣

齋火鍋+串燒齋

12 May 2009

有一句說話，叫做「將自己快樂建築在別人痛苦身上」，要不得
四川大地震的遺址建成公園和博物館景點，人們紛紛到遺址看看，到博物館逛逛，不知道他們的心態是怎樣，但即時在我腦海浮現的，就是「將自己的幸福建立在別人痛苦身上」
為甚麼要靠別人的災難和痛苦警醒自己身在福中？
明天，5‧12一周年，下午兩點二十八分有默哀活動
傷痛要記著，常掛在咀邊並沒有用，真正在心中，赴諸行動才更重要
哎，又有電視台打著救災和紀念，明晚要搞大型演藝活動，爭收視…

夜晚去左澳門豬骨煲打邊爐，除左佢知我鍾意食雞翼，特別幫我order左的燒雞翼，我自己揀的芝士牛丸同墨魚滑油炸鬼，其他的全齋宴，真罕有
兩個人真係叫唔到好多野，燒菜心、韮菜、南瓜、蒜子、冬菇、腐皮卷、生菜同油麥菜，結果又係食唔晒啦，d芝士牛丸、墨魚滑油炸鬼同生菜都食唔晒，由我打包拎返屋企

頭先收到一個包裹，係一份好有意思的禮物
台中市長胡志強的回禮，送我一本他的書《淚光奇蹟‧陪伴曉玲的病床手記》
慶幸他還記得我
作為一個喜歡寫作的人，很希望自己的作品有朝一日能夠出版
不過，如果有機會好像林靜宜般，由衷喜歡他的故事，由衷覺得這件事具有意義，然後執筆替他寫一個動人的故事，也不錯

梅頭仔

10 May 2009

呢兩日繼續剪片，尋朝早起，去左跑步，係，你冇睇錯，中午時分，返工之前去左運動場跑左兩個圈，行左幾個圈，因為太熱，運動場個電子顯示屏show出來係29度，烈日當空，真係會中暑，所以係咁意，當係適應下
點解忽然間咁有興緻，其實，係發現左海關請人，今次請海關督察，所以要開始練體能
不過我想講，跑完cool down，坐左喺運動場旁邊的地下，喺樹蔭底睇住d雀仔飛來飛去，吱吱叫，好悠閒，好relax
呢幾日訓得馬馬地，加上剪片寫稿，或多或少都辛苦同精神緊張，所以梅頭仔又走番出來…

尋晚剪完片出左尖沙咀飲野，四點零返歸
其實只係飲左兩杯，但唔知點解好暈好迷，今朝仲有d頭痛
最後一日剪片，係咪我要求高呢，由寫稿到剪片，一日都未搞掂，一直都好怕隻野唔夠片，唔好睇又或者唔夠point
頭先剪完過帶，真係有d好感動的感覺，多謝剪片，多謝攝影﹗

好想飲胡椒豬肚湯…

臨近5‧12感思

08 May 2009

剪片，今日返晏，所以喺屋企整食野，所以有機會靜靜地坐喺電視前面
睇到畸寶的地震一周年故仔，又諗起好多野…

他們仍然很堅強，堅強得令人很敬佩、很感動
心頭又泛起很複雜的感覺，那一刻，曾經感受生命受到威脅；那一刹，曾經激動落淚；那一秒，曾經浪漫地想放下所有東西…
不過，我想反問的是，各台這一系列的紀念式報道，不但牽動我的情緒，令哭斷心靈的衰號在我耳邊重播，同時，也掀起受災者剛剛靜止下來的漣漪，迫他們憶起痛入心扉的悸動
在這個洋紫荊之都，我們真正關心他們，還是，爭收視？炫偽善？

也許，他們只需要默默的祝福

今日，只係第二日咋…

07 May 2009

又好幾日冇blog野…
星期日繼續放假，拎晒d野返屋企，但係都唔寫稿呀
hea到晏晝佢放工，初初我話食冬瓜盅，佢話唔食酒樓，跟住我踢番個波俾佢諗，諗下諗下話去食魚皮上面間酒樓食，咪即係冬瓜盅囉…
搞事﹗
過左陣又話想食魚下巴，一時一樣…
其實我都叠埋心水入深井，但講開樓下架小巴好多人怕上唔到，我話落荃灣join番佢，但落到去結果，去左食雲南野
哈哈，真搞野﹗
連續三日充分休息，星期一病出奇地冇發作，寫稿，又寫到一點…

剪片周由星期二開始，齋剪都剪到星期六，下周一復工dubbing，仲有短版、改片、報紙稿一干事項，一直去到節目出街先叫告一段落
今日，只係第二日咋…
帶埋西藏書，cap片過音樂時，可以繼續魂遊西藏，啱啱去完珠峰，亦去埋絨布冰川，仲有亞東、樟木，跟住就去阿里喇﹗
一路剪片，憶起好多在日回憶，冷天氣、畸呢人、好拍檔，仲有炸雞寶﹗

各位請留意5月23日星期六晚8點半，有線財經資訊台《時事寬頻之亞洲新世代系列--日本》
哎，個名水蛇春咁長，有寶咩…

大家見到年頭的promo，知道cable有壇亞洲新世代，走訪亞洲六國家，有人質疑：使咁多錢係咪堅去架？
到真正拍完返來的promo出左街，大家覺得：嘩，乜咁有錢去咁多地方﹗
出左第一集，六個國家大晒冷，得到的反應繼續係：嘩，cable真係好有錢﹗
哎…
搞笑在有日有人問我，我地壇special係咪有特約？嗰刻真係考起，而家我明點解人地咁問喇，我諗我可以答佢，咪就係時事寬頻特約囉，哈哈哈﹗
尋晚收到的消息，6月6號星期6有船河，應該去掛…

牛下‧車仔麵‧攝影之旅

03 May 2009

尋日出左去，本來的目的，除左係食飯，仲有係買電話
見過e63的真身，忽然間鐘意左，諗住去買啦，點知去到發現，加左價？
真係好過分，之前幾日睇過，客戶價980+預繳，趁住五一黃金周，d人放假出來買野就加價，竟然要1280+預繳，好似兩大超市咁，心有不甘，所以唔買，結果去左買衫
為左襯新嗰幾條鍊，突登搵白色衫來買

佛誕假期，謝絕寫稿﹗
訓醒食完野hea左陣，諗起下邨的車仔麵，本來上個星期都諗過去食，冇去到，來緊呢個禮拜又剪片，都冇可能去到，橫掂放假過去了左個心願啦，順便帶部機出去影下相囉
影完仲未肚餓，喺附近兩個商場行街，但冇收穫…
其實我好怕行大型商場，舖頭千篇一律，冇新意，連鎖店野唔啱我，所以都係行過就算
行兩大書局，繼續搵西藏書睇，飾物店、宜家傢俬、market place，竟然，俾我搵到好想買好耐的寬粉，即係用來整酸辣粉嗰d粉，亦同小肥羊d肥羊粉差唔多嗰d
原來，咁都行到9點幾，肚餓lu，行返去食車仔麵
食完散水，返到樓下又行超市，我的飛佛可樂大減價，一pack8罐裝，前所未有咁平，17.9，唔理咁多即刻托左兩pack返去，仲要送一支1.25l的coke light，真係好抵﹗03