心照

28 September 2006

又要馬兒好，又要馬兒不吃草，這是甚麼道理？

十蚊買餸錢，要煮九大簋
正所謂巧婦難為無米炊，這樣強人所難的事情，誰想出來？
既然一把尚方寶劍壓落來，難道我有選擇嗎？
你想煮一雞三味，都要買隻多肉地的，骨慘慘，真係俾客人lun骨咩？
倒自己米的事，我唔做
同埋我唔係大把錢去買肥雞喎，既然budget有限，都要格個價，計番條數，邊隻雞又肥大又肉厚又平又正，你想買，都要有人賣俾你至得架
你個字頭唔夠響，廚師又唔出名，同人討價還價，係有d難度﹗

不過十蚊budget，夾硬來我都諗到九味既：
1)清炒芽菜
2)清蒸豆腐
3)芽菜炒豆腐
4)豆腐炒芽菜
5)芽菜釀豆腐
6)豆腐釀芽菜
7)酢炸豆腐
8)干燒豆腐
9)豆腐蓉煮芽菜

我已經好努力在有限材料中煮最多的餸菜，食客受唔受，心照囉﹗

尋人啟示

27 September

有d野，係我一手破壞，後悔和可惜，也於事無補
大家心裡都有一條刺，就算將它拔掉，都會留低個窿
你問我情願reset系統還原，清除所有污點與美好回憶，由零開始重置；還是維持現狀，任由病毒不知在何時發作？
事已至此，哎…

靈魂出走了，軀殼在街上遊蕩，沒有意識沒有思想
目光，是呆滯的；動作，是生硬的；反應，是遲緩的
尋人：三魂七魄，回家好嗎？
我許諾，但你已不相信我
我還可以用甚麼方法哄你返回我的身邊？請指教

日復日，重覆而乏味
尋物：不知何時遺失了衝勁與魄力，無色無味無嗅，如有拾獲，請通知我，薄酬
找回失物又如何？躲懶和散漫，可能已進佔了原來位置，沒有地方安置你了…

眼訓致死

26 September 2006

今日廿五號，回想起，今個月真係好繁忙
工作已經應接不暇，還有各式各樣的私人事務有待處理，唯有擠出睡眠的時間，將要做的事情逐點處理
每日訓少於四個鐘的生活，睇怕仲要維持最少半個月
會唔會眼訓致死？

前幾日個friend行街，佢同我講見到某某藝人，我心諗其實，明星都係人啫，唔使大驚小怪
正如記者都係人，做個扒啫，企喺度睇下，我咪當你好奇見識下囉，唔使影我相嘛…
唔好以為在鏡頭前出沒，在電視機見到的人就異於常人啦，成熟d啦，唔好咁無知啦，香港人﹗

頭先放工食左個為工作而食既飯，美食在前，但腦海塞滿待辦事務，中央處理器失靈，暫時喪失思考和運算功能…
不斷玩d唔使用腦的小遊戲，算是麻醉自己又好，算是輕鬆一下又好

離開tst途中，看見地上的磚塊，想起小時候無聊的小遊戲
廿幾歲人，在街上玩幾歲細路都未必玩的遊戲，唔准踩界，一定要行直條形的磗，玩自訂遊戲規則，只有一個人的遊戲
小孩子的世界真是簡單，咁樣都可以玩一大餐，自得其樂
人大了，就遺失自製歡樂的能力？
童真被迫下馬，換上老練偽善的一面，你甘心嗎？

當日要搵到let there be love，先可以取代bohemian rhapsody，幾時再搵到另一首新經典？
呢一刻，EPL精華中…

拜託

25 September 2006

就林生尋晚的表現，唔了解成件事的人，冇目擊整個過程的人，會以為佢吐氣揚眉，但我覺得，實情唔係囉
係，佢係好運，不過呢點都係值得人佩服的地方﹗
但係謝生都仲係頹勢中，你的不死精神去左邊？

我而家開始明白，知道咁多野，其實好危險，真係唔係咁好
但知道總好過唔知道，費事做「背」精﹗

如果你知道了，得個知就夠了
千祈唔好開咪宣揚，千祈唔好大聲或細聲同人講，千祈唔好用任何方法明示或暗示講俾其他人聽，千祈唔好嘗試以語言或文字或動作等各式各樣方法讓第三者知道這件事
拜託﹗
但如果你係知d唔知d的，想求證的話，請你自己問我，唔好問第三者，你問我我會答你，i promise，橫掂答你一個問題，又唔使錢的
而唔知道呢件事的，無謂知啦，知道又唔係有錢分，況且你都唔知自己唔知d咩，忘記呢段廢話吧﹗

連續兩日食上海野，其實酸辣湯同落左好多醋的碗仔翅有咩分別？其實酸辣湯同碗仔翅係咪親戚來架？

迷你倉

21 September 2006

衝呀衝，衝得太多、太勁、太密，好快會被衝散，精神難以集中，效率漸漸下降
簡而言之是應接不暇；較為活潑、形象化的說法是消化不良；也可以打個譬如：腦袋當機

那件事，前日的對話，仍然縈繞我的思緒
你應該知道規舉，呢度講呢度散，只管看，不要問，我想講的，自然會自爆
總之是傻事一樁，為甚麼這樣傻？

有幸做了大眾耳朵，多謝你們對我的信任，將秘而不宣的事物、情感告訴我
哈哈，會唔會用迷你倉來形容，比較貼切呢？

********
人大了，對不同事物的接受程度不同了，正確點說是更易接受不同的事
細個的時候，食飯堅持要食餐廳，at least要埋單要有個waiter行過來埋單嗰d，所以以前係大排檔、茶餐廳止步，d野污糟不在話下，品流複雜
更加試過入到茶餐廳，覺得太污糟，即刻反胃嘔左出來
係咪好誇張？
但係而家覺得大排檔都幾有風味既，茶餐廳，也有乾淨的…
如果大家食飯有人提議，我都唔會反對的，不過，可以避免的話，都會避一避既

而關於食肆，細個時仲有一個傻誤會
平時去餐廳、酒樓、酒店，都有waiter拎張單過來埋單，但m記呢類快餐店冇架嘛
細個時傻到以為去m記、肯德基(現稱KFC)、大家樂呢類食肆唔使錢，去排隊就可以攞野食，所以成日都咁多人
直至有一次見到阿爸拎張500蚊紙出來買麥記，先知原來係咁…
真係講出來都俾人笑﹗

奇怪

19 September 2006

因為做野，可以在啟用日率先搭到昂平360纜車，其實，都係不外如是啫﹗
我搭過，一定唔會再俾錢去搭囉，但如果未去過未搭過，都係值得去一次的，話晒都係香港景點

好奇怪的感覺，好奇怪的心情
我會形容：都幾好笑喎﹗

好辛苦呀，夜晚10點半先走，好累，但都開心的，都值得的
well，點解要揀中我？點解要揀埋佢？
你係真係俾時間我諗清諗楚至好

小勝1-0

18 September 2006

我係心情唔好，唔好嘈我唔好煩我啦，我唔出聲我唔講野，自然有原因
有d野我唔講，最主要的原因都係怕麻煩，我都話我講出來，或者俾你知道，你一定會多野講，完全係我意料之內，只不過係我想逃避啫
結果，都係避無可避…
而有d話題真係唔想同你討論，我知一講就會鬧交，哎，點解咁經唔起考驗？係我的問題定係你的問題？
又講到聲淚俱下，我諗係雙方的問題，雙方的責任

尋日在旺角浮游期間，竟然在旺角兜口兜面撞到你，surprise？
頭先在你沒有心理準備下見面，但都唔使咁大反應呀？

車仔和阿仙奴都小勝1-0，終於唔使做燈神
杜生，你球車身窩利好勁，射多次得唔得呀？
艾生，你真係好符碌，我都話奇蹟係有可能發生架啦
謝生，你都唔使咁灰心，其實只要你唔係車仔的敵人時，我都會全力支持你﹗
林生，你專心d得唔得呀？唔好淨係掛住湊女…

搬屋活動即將kick off，現招募義工，你會唔會幫我手呀？

掟粉擦

17 September 2006

頭先諗番起一個以前玩過的遊戲，就係掟粉擦
哈哈，你有冇玩過呢？你會唔會覺得，來自名校的所謂高材生，玩埋d咁既野，令人側目呢…
其實，我本身就唔係一個乖學生，miss阿sir都覺得我係一個又麻煩但又叻的學生，基本上係冇我乎﹗
小學的時候，已經會捉d昆蟲整下睇佢唔順眼，教數學的阿嬸；一方面做風紀，另一方面做埋晒d假公濟私的野，例如明明打左鐘，開大閘俾遲到的friend入學校；又帶d女同學入男厠見識；至於帶頭整蠱人呢d，小兒科啦，無謂講
中學時，放學同d朋友仔留喺學校唔捨得走，試過喺課室個黑板畫個鏢杷，在各個課室拎晒d粉擦過來，玩掟粉擦，真係好好玩，雖然眼界馬馬，但都係至在做d害唔到人的壞事，幾開心丫﹗
至於上堂串下d miss阿sir，簡直係家常便飯，上堂食飲野訓覺聽歌傾計，隨心所欲
尤其係高form時，更加冇王管，online夜訓，第二朝訓晏左，索性小息後先返，神不知鬼不覺
其實，呢d叫曠課，渣正來做趕出校都有份
但我又唔係讀唔到書，仲要讀得幾叻咁啦，我覺得d miss阿sir係俾我吹漲的
不過我諗都係d男仔勁d，在課室裝個迷你籃球架，打小型籃球，跳到好似地震咁…

講開地震，星期4香港地震呀，但我feel唔到囉
但有大學生話，感到地震好似有飛彈射中幢樓，我想問，你試過俾飛彈射中幢樓的感覺咩？

最近密切留意住新版、真實版金枝慾孽的事態發展﹗

天大的面子

16 September 2006

有關搬屋計劃的事，暫時叫settle左，待訂定有關細節，再向各位公布
見得多pr同io，講野d口吻都學左佢地，呢d係咪職業病呢？

真係有天大的面子﹗
台灣老遠的倒扁頭巾，空運到港，我分到一條
早前晚間飲野活動，玩層層叠的創舉，好在一早影左相，因為轉眼間就俾人摧毀左﹗

仍然是眼訓中度日，感覺係辛苦，好辛苦，同埋辛苦死人﹗
所以而家每日進補葡萄適和可樂，唔知咁樣可以維持幾耐…

原來下星期五的晚飯活動係同佢兩個做生日，唔知我生日時，有冇人幫我慶祝呢？邊個同我慶祝呢？
原本以為冇行的生日旅行，而家又重燃希望，所以如果你打算同我做生日，早d單聲喎﹗

久違了

12 September 2006

過去upset左成個星期，謝謝你的犠牲小我，完成大我，令我展露久違了的笑容﹗

另外，趁一個星期之始，勉勵下自己啦：
悟以往之不諫，之來者之可追
係咪今是而昨非，暫時還未適宜下定論
總之讓今天的我，打倒昨天的我，我要做番快樂小天使﹗

搬屋大計，進行中，loading…

道不同不相為謀

11 September 2006

今日身體抱恙，忽冷忽熱，手軟腳軟、頭痛胃痛，但還是強撐去睇足球展，頂硬上去你屋企食飯，扮冇事出席晚間飲野活動
你叫我唔好去飲野，怕我頂唔喎，怕我辛苦喎，咁又要我去你屋企食飯…
其實我都有諗過，會唔會在街上暈倒呢，如果暈左又會點呢？
最終都係冇事，安然返左屋企打blog

呢排我最愛的林生真係好唔得，上次以為佢返來啦，原來只係假像…
其實my飛佛的謝生都唔好得去邊…
well，歐聯分組賽今個星期又開了，點搞？

正所謂道不同不相為謀，我覺得唔同你講野的決定係絕對正確的，根本溝通唔到，講你都唔明，都唔知你想點…
你講的理由，在我而言根本唔係理由，既然大家觀點與角度唔同，價值觀唔同，都係維持而家咁樣比較好，以前的一切一切，都係錯覺，今後還是少說話為妙﹗
話時話，係我唔同你講野，導致你唔同我講野，定係你唔同我講野，令到我唔同你講野，我而家都仲未搞清楚
但呢d都唔重要lu

呢隻稱聲係碧咸隻腳的倒模，曾經送左俾碧咸放在屋企，有錢人住的屋，一定好大間﹗

有意思

10 September 2006

今日再睇到《情歌》的MV
楔子有這樣一句：我們需要水，亦都需要愛

又要趁機穿鑿附會一番

水，是生命的泉源，沒有水，樹木和皮膚都會枯乾；愛，是靈魂的支柱，沒有愛，眼神和思維變得呆滯。
所有情感都是愛的演繹：
喜，因為所愛的人一個微笑，喜上心頭；
怒，就是所愛的事未能如願，怒不可遏；
哀，莫過於愛人愛犬離我而去，還是節哀較為實際；
樂，簡單得如與愛人共進晚餐，樂在其中回味無窮。
你為愛人而生，還是為被愛而活？

返來囉﹗
我本來就係咁串架啦，咪少見多怪﹗
我份人，雖然有d人覺得我傻奸奸，好搞笑，但其實我係一個好悶的人，只會同熟落的人玩，只會和朋友的朋友玩，唔會主動識其他人
所以，朋友往往就係嗰幾個
有冇你份？心照啦﹗
well，真係好surprise，簡短的對話，但已很有意思﹗

搭地鐵時見到一個小學同學，其實我同佢一d都唔熟，見到佢推住架bb車，真係唔知冤孽定係福氣…

蜂蜜蛋糕

9 September 2006

之前上去廣州，都冇post過d相上來，突然間記得，補番數

呢排好燥底，頭先等車都等到好忟好嬲，唔知點解，情緒很容易被牽動
呢排勁做follow up故，正如我所願，幾好丫
但係咪做follow up自己故，就一定要做扒？我連續幾日都有扒，會唔會俾人搏上鏡的感覺？

哎，尋日失策啦，我日日都有帶相機，係尋日冇帶
因為做野，入左平時絕對唔會去的打鼓嶺，一張相都冇…

你飛左啦，尋日問過你，話12點零飛，本來諗住sms你一帆風順，各樣野都順順利利啦，話晒都係陌生的地方、講唔同的語言
你d普通話普唔普通架？
總之都係一句，祝你好運啦，希望你有機會睇到呢個message，或者有人睇過後話你知啦，費事打俾身處異地的你啦
不過話時話，記得買手信喎，我要蜂蜜蛋糕

萬千重負

7 September 2006

發生開水喉事件，係咪意料之外呢？
但現在回想起，甘泉矜貴，胡亂浪費，多麼不值﹗

頃刻間萬千重負在一身的感覺，很委屈

於事無補

6 September 2006

頭先俾人串啦：乜阿霞d故仔都會咁簡單，仲要一分搞掂，今日真係冇野囉…
吹漲﹗

今日異常浮躁，見人就想破口大罵，留多一分鐘，對多呢d人一秒鐘，本已不高的EQ只會急、狂、勁瀉
深呼吸一口氣，用所餘無幾的理智勸自己冷靜
因為當日勸過你，別為無謂人動氣，耿耿於懷也於事無補，既傷了心神，賠掉十億個腦細胞寶貴性命，多麼不值
為了一啖氣，唔想被冠以「有口話人冇口話自己」的罪名…
hey man，take it easy﹗
我話冇事，就係冇事；我係呻過，呻完咪冇事囉，總之就算呢刻有事，訓醒後又好一個烈女﹗
我心情唔好，只係因為眼訓，我次次都係咁講
眼訓、精神唔好、狀態欠奉，最好用作解釋任何事，因為大家會將你視作神志不清的人，唔同你計較﹗

原來我地都會派人去台灣架，有你同佢囉
頭先你欲言又止，原來係為左呢件事，祝你好運啦﹗

你有事煩，希望能幫你一把啦
謹送上祝福與慰問，加油﹗
大家咁話

絕無僅有

5 September 2006

頭先去做gym，做左d(火羅)野，不過遇到一個好人，嘻嘻
無意中游到HMV舊址，my飛佛的adidas開左喇﹗
如果你有同我傾過msn，一定見過我all day i dream about soccer個暱稱
我的a記收藏，絕對不亞於england和跳跳虎，我唔敢講話有好多，絕對唔夠開一間專門店，不過有少少咁啦，你自己諗下有幾多啦﹗
其實又游到a記，我都知大獲架喇，因為又有新出品，今次係city系列的延續版，晨咁早就睇中左的i love london外套，終於見到真身了，當然要據為己有啦，就咁盛惠600個大洋
老實說，對我來講，買野，根本唔需要理由，不需要明目，我知道這種消費模式，絕對un-sustainable啦﹗
點解用un-？話說我地拍野，拍完要「奄帶」咁就唔會洗左有用的野，但當餅帶可以reuse，就要「un-奄」佢
「un-奄」呢個term，係我發明的，嘻嘻，但俾人串囉，un-返工、un-剪片…結果所有有「不」的意思，就用un-取代

半個月前已預先kick off的farewell活動，隨著走的走，離開的離開，暫時叫告一段落
最正都係people mountain people sea，最豪的係骨煲象拔蚌，最激的係骰盅之王爭霸戰，最冷清都算是今後的辦公室…
啱咀形的人，所剩無幾，已承受不起再少任何一個絕無僅有的你﹗

今次破例登出人山人海照，此舉也是絕無僅有，下不違例﹗

誠意

4 September 2006

係，有d野，我又點會唔知呢，但始終都係想你親口同我講，呢d或者就係叫誠意啦

真係覺得自己好燈神feel，睇邊場波，支持邊隊死邊隊，尋晚飯局飲野，miss 左england EURO2008的qualifier，不過都帶埋謝生出去，精神上支持一下
我深愛的england大勝5-0，而第二最愛的netherland都小勝1-0，唔通我真係唔可以睇波…

放假的日子，縈繞著被窩，你覺得很浪費，但我覺得，這就是簡單的幸福
一天吃一頓飯，對我而言，其實不是甚麼奇怪的事
而一天吃五六七頓飯，更加是平常不過﹗

********
「比上不足，比下有餘」最好用作形容這一刻的我
要付出多一點點，向前走一步，我覺得冇需要；但收歛一點光芒，向後退一步，又非我所願
結果站在這兒，原地踏步，雖然未至於進退兩難，但兩頭唔到岸，欠了點安全感

受唔起﹗

2 September 2006

對，我是以貌取人
正所謂人靠衣裝，佛靠金裝，包裝就是對自己、對別人的尊重
連這基本的條件也做不到，有資格要求些甚麼嗎？
在你眼中，可能我歪理連篇，但我認為，我信奉的一套，總有我的道理，也總有人欣賞，犯不著你來替我粗心
謝謝你似是而非的意見，受唔起﹗

穿鑿附會

1 September 2006

看見那個她，真是無言以對。
她勝出了？不；我勝出了？也不是；兩敗俱傷？亦算不上。

他嘗試找話題，他為甚麼這樣做，他有甚麼目的？究竟他在想甚麼呢？這些疑問，在我心頭浮現，但我不打算找出答案。
他也許想勾起我對他的一點興趣，但他的所作所為，只換來我的冷淡對待‧
我不理睬他，其實與她無關，你不要誤會和胡思亂想，甚至是穿鑿附會。

抉擇，從來都不是一件易事。
為了某些人、某些事，墮進患得患失的感覺，值得嗎？
讓這些事、這些情，佔去所有思想空間，甘心嗎？

連續數天都夢見你，這又代表甚麼呢？
********

佢病左，唔知佢有冇事呢？
今日個個都打鑼搵佢，可能係我傻，以為佢touchwood出左咩事…
同事、朋友等，聚會停不了，很累
我真係好唔想見到你，做咩迫我？係咪我認輸，你就會放過我？如果係咁，我輸囉﹗
哈，係你唔放過我，定係我自己唔放過自己呢？做埋晒d違己交病的事…
我真係覺得我自己好大方，好有禮貌，好得體
即使十萬個不願意，亦亮一亮相，結果搞到連晚飯都冇食，真係唔知自己為咩…

sorry，心神嚴重透支，請願諒我今日狀態唔好
well，有時唔係真係成日都咁好彩的，我知道，單係好似今日，差d出事啦，我知道了

你唔明我講咩？唔緊要
要明的，自然會明；唔明的，係因為沒有明的必要