17 December 2007
尋晚結果梗係去左飲野啦，8個人，我負責教大家玩渣手指遊戲，真係得呀，大家都話好玩﹗哎，我玩骰仔真係好屎架，連輸唔知幾多板，飲左好多波羅賓治…
你問我有冇飲醉，咁又未至於，只不過係有少少酒意，對d波羅賓治+ chivas in soda+ chivas in綠茶+ 一杯稱聲係朱古力酒的shooter有輕微反應咁囉
印象中好似同某人拖住左，十指緊扣，她指住我地：你兩個做咩拖住？
不過真係好辛苦，訓唔到，囉囉攣，但個人其實係好累，暈暈地，有d頭痛，有d想嘔，但又冇野嘔
本來喺夢鄉門口徘徊緊，差唔多行到入去，俾一個只係見過一次面，自稱求偶期中的女人嘈醒，除了O咀，還有O咀…
朋友家中一邊英超大戰，一邊睇我遊茶馬古道，只不過我愛隊同我愛人都…
哎…
但係我仍然會支持你﹗
真係好想學跳舞，俾人串：舞晒脂肪嗰d呀？
我：no啦，我想學華爾茲嗰類ballroom dance，咁咪可以去下ball咁囉
她：吓，你而家係咪嫌棄我地擘酒先？
真係唔敢唔敢…
某君問：呢隻枚叫咩？
我：唔知喎
某君：原來叫唔知枚
咁就喺度教大家玩呢隻唔知枚，將佢發揚光大啦﹗
人數：四人或以上，理想人數為六至八人用具：骰盅(每人一個)、酒水(大量)、枱(一張)、杯墊(指定接龍起始位置)
1/ 搖骰盅
2/ 搵個人叫「開始」，大家先可以睇，但只可以睇一次，違者，未叫「開始」睇骰罰飲，睇多過一次罰飲
3/ 有三粒一樣的骰的玩家，放隻手指公出枱面指定位置，其他人接龍，原理好似com棉胎，但此遊戲以渣到手指公為準，反應最慢者罰飲
4/ 龍頭的玩家開骰盅，將三粒同款以外的骰的數目加起來，例如d骰係3、3、3、2、5，咁就將2+5=7；單數由下而上，雙數由上而下，根據加出來的數目，數中邊個就邊個罰飲
5/ 曾經開過個盅的玩家才可以再搖，但亦只可以睇一次
6/ 如是者，有三粒同款骰仔的玩家帶起玩接龍，直至冇人有三粒同款的骰仔為止
7/ 值得注意的係唔使等人罰飲完、斟完酒，只要有三粒同款的骰，就隨時隨地都可以放隻手出來kick off接龍
8/ 為左獎勵玩家，如果搖到四粒同款的骰，可以指人飲
9/ 為左與眾同樂，如果搖到五粒同款的骰，除左自己之外，在座的都要罰飲
10/ 如果冇三粒同款的骰而去帶頭接龍，罰飲
11/ 沒有在指定位置帶頭接龍，罰飲
12/ 當冇晒三粒或以上同款的骰，就玩番大話骰，由最後一次龍尾的輸家先叫，但任何人都不可以再睇骰盅
13/ 如果開始左玩大話骰而有人冇依三粒同款 / 四粒同款 / 五粒同款的玩法帶領接龍或指人飲，持骰者罰飲
14/ 玩大話骰直到有輸家，輸家罰飲，遊戲結束
15/ 下一鋪由之前一鋪的大話骰輸家(如只有一名輸家)叫「開始」kick off；如上一鋪大話骰輸家多於一人，新一輪由大話骰贏家叫「開始」kick off