頭頂有個小肥羊logo碌下碌下

26 April 2009

尋朝起身周身唔妥，唔舒服，囉囉攣，牛下牛下，暈下暈下，成日打冷震，如果唔係開會我諗我會唔返，不過lunch後又好似冇乜野
佢竟然提議去燒野食，正合我心意，但講講下又話燒野食又係多肉少菜，唔健康，又怕熱，諗諗下又諗起打邊爐，又可以食蔬菜又有冷氣，老地方等…
食完行左陣，某潮服店睇衫睇袋，幾個姐姐討論，好大陣小肥羊味呀，仲問我地係咪啱啱食過小肥羊，哈哈哈
我問：乜我個頭頂有個小肥羊logo碌下碌下咩？
再行左陣買左杯珍珠奶茶飲，散水

星期六，訓覺好好休息，訓到三點，跟住食少少野，唔知點解又天黑，九點幾又好眼訓走左去訓，嘻嘻

小妹妹vs老屎忽

24 April 2009

我以前覺得luncheon係最變態的assignment，食飯時間睇住人食自己冇得食，以前去得多，成日睇住人食，今次輪到我坐低食，俾人睇住食，哈哈哈
不過去到現場即刻感覺怪怪，好唔自然…
環顧四周都係老屎忽，我就好似含住波板糖的小妹妹
坐低食飯，食過就夠了，如果有得揀，我做睇人食嗰個好d

繼續遊魂…
夜晚煲左蕃茄薯仔椰菜湯，勁鮮甜，好味﹗

向南走，向北走

23 April 2009

話咁快又星期三，d帶真係要睇架喇…
因為食飯前睇過飲食男女介紹牛下，忽然間想食全香港最好食的車仔麵、煎釀三寶，同同事講開，不過佢連續幾日都唔得閒，如果唔係我諗真係會約佢放工一齊食
車仔麵隱起，所以lunch即刻食左公司出面大排檔的車仔麵頂住檔先
放左4日假，全日渾噩噩，放工入左深井食飯，其實嗰d時間已經晏架啦，點解架小巴仲係咁多人？好彩有人落車，如果唔係可能上唔到…
小菜三味，唔知點解好想食苦瓜，所以揀左苦瓜炒鵝腸，仲有我的飛佛，唔係周圍有得食的沙律蝦，佢揀左缽酒焗魚下巴
即時生出謎團，咩係缽酒？乜野係魚下巴？
不過我諗佢仲未發現我唔係好鍾意食魚，但佢又出奇咁鍾意食魚…
佢話缽酒係紅酒d friend，魚下巴，碟野來到先知，原來係肥美的魚鮫，至於係咩魚，不得而知
本來諗住食埋芒果糯米卷，但實在太飽…

入到深井，唔係食燒鵝，又冇食糖水，真係第一次
食完佢陪我等車，平時佢喺樓下搭蟻巴士，通常都係我目送佢上車，蟻巴士開走，tele住車上的佢，直至佢消失於視線範圍
今次調番轉，我上左車，佢一路tele追fo吊住我，我架車經過佢面前，立即quick zoom埋來，再來一個pan shoot，直至看不見我為止
其實深井呢個location都ok，啱啱喺中間，一個向南走，一個向北走

不如，你換過另一種方式愛我啦﹗

22 April 2009

幾日都冇寫野，雖然好眼訓，不過攤得越耐的記憶就越容易被沖淡…

上星期五原本都係諗住放工返去食頹野跟住訓覺，但她打來搵我食飯，見第二日又放假，所以咪應承左囉
哎，又講到令人好煩的話題…
尤其是我真係二十個攰，真係想靜靜地食餐飯，見個面，唔好問我咁多野得唔得？我想講自然會講

星期六，全日喺屋企喪訓，晏晝起身食左南瓜粥，之後攤抖下攤攤下訓著左，又訓到七點幾，睇電視、睇書
星期日又係繼續訓，好似訓極都訓唔夠，傍晚出左去行街
如果個人攰，尤其趕故仔嗰排，我會勁想食麥記、kfc、薯片一類不健康食物，可能炸呢炸路，高卡高熱量，補身體或潛意識不足，所以夜晚搵左麥記食，足三兩漢堡包+麥樂雞，好飽好滿足

星期一放假，出左去交收虎仔同pooh仔，屋企又多左兩個小朋友
跟住喺銅鑼灣喪行，勁鐘意行宜家傢俬，買左隻碗裝下無聊野
夜晚佢約左我食飯，去左食泰國野，跟住去左尖沙咀飲野，9大杯冰凍啤酒﹗

講到可能係職業病，真係唔鐘意講電話，問人問題、聽人講野…
又講到令佢覺得耿耿於懷的女子

今日係4月21日，一個曾經與我有關的日子，曾經，我說是曾經
曾經得到埋怨，說慶祝生日的活動都是我想去的地方，想食的東西，冇問過佢鍾唔鍾意
唔鍾意一早又唔出聲？最討厭事後孔明的說法
我諗過好唔好打個sms講句生日快樂，不過我一向冇呢個習慣，再講，短訊交情亦唔輪到佢，如果講一句說話都要退化到筆劃輸入法，好似好冇誠意，不如不講
而且，忽然小器過來，我生日都冇收到對等的一句生日快樂，人點對你你點對人啫
結果還是沒有講，沒有打

回顧這幾天的金句，值得記低的有以下兩句：
有就唔至在，冇就唔差在
不如，你換過另一種方式愛我啦﹗

突發生日派對

17 April 2009

今日狀態好差，喺公司見到佢，好唔想俾佢見到呢個爛撻撻的殘樣…
放工即閃，本來諗住返去食頹野早d訓，返去前經過超市行個圈，朋友甲打來，突發約在將軍澳的飯局，基本上如果唔係真係返工做野，佢地的局我一定出席，除非冇人通知我啦，所以晚上7點23分收到電話，一個鐘頭後就到達會場
碌左去千色店隔離的小巴站去下邨，再轉另一程小巴直入坑口港鐵站，gathering地點係今日生日的朋友乙的舖頭，對住個餐牌喪叫，好似唔使錢咁，結果咪食唔晒囉
群眾壓力令朋友乙早d收工散水跟我地走，出左旺角，5樓cafe，一個布甸蛋糕都玩十年
我相信有默契就會心照不宣，留低一句生日快樂，朋友乙會收到的

另外，講到下星期的約會，如果，有人通知我時間地點，有唔出席的理由嗎？

平心而論，鐵板雞扒、雞翼同比薩都好好味，必食推介；飯我冇試過，唔評論；卡邦尼意粉基本上唔會出錯，所以都係好味；至於嗰d奄列同薯角，當時運高見佢唔到啦

溫馨二人世界

16 April 2009

尋日晏晝放假，勁眼訓，返到去見到張床就想訓…
hea到六點左右，出左佐敦，因為想食好耐都冇食過的雞公煲，但未肚餓，喺廟街碌，我地都買到玩具，講價還價必備計數機，篤下篤下加插幾個英文生字，佢成功殺價三分一，跟住到我去買玩具，佢提我要講價，我話睇下人地開幾多先啦，計數機一篤，18蚊隻鈪，哎，佢賺得幾多丫，真係無謂講，俾佢賺啦，跟住開開心心食飯去
套餐名稱叫溫馨二人世界餐，我想問，有幾溫馨呀？
因為唔係太餓，所以食一個煲算數，雞煲同牛煲，好難抉擇，講味道，兩個有唔同特色，好難直接比較，不過d雞易d爛得入味，同d辣好夾，牛煲d腩都夾，但要睇下佢燘得夠唔夠腍，所以雞煲相對更穩陣，但係牛煲裡面配料多d，除左有牛腩，仲有牛栢葉、牛丸等，好似多d野食開心d
揀唔到，我話摘公字決定，結果摘到雞煲，又有d心思思，佢最後order左牛煲
食完再喺廟街散步，我地再去睇玩具，又揀到心頭好，simple english繼續講價，佢的玩具平左40蚊，我的玩具平左15蚊，仲係佢送添﹗
再行左一陣搭車返歸，又係搞埋d無聊野，又冇得訓8個鐘…

不過，尋晚訓得唔好，今朝繼續眼訓
頭先晏晝出左去台中-香港個論壇，因為上次訪問過市長，佢再來香港，燒番隻碟俾佢，打聲招呼，等佢記得我都好丫
以為呢d合會見到好多行家，係就好多行家，不過十個有十個都唔識，咪就只係識公司嗰幾個同事囉，諗住可以聚下舊吹下水，點知有喎，真係灰
記者會完散水都六點九，本來諗住去cwb朝聖，但一出grand hyatt先知落大雨，兜路行入會展落再穿過中環廣場，正猶豫前路，佢打來suggest我搭小巴返到樓下，但喺天橋度(目及)到勁多人等小巴，冇行啦，咁佢suggest我搭地鐵返葵芳，行街掃街，如果走的時候落雨的話的返屋企
去到葵芳第一時間碌左上三聯書店，又去睇西藏旅遊書，但其實嗰度嗰幾本俾我刨晒架喇，都ok啱用，但已經買左一大箱，唔再買喇，同埋梗係覺得成舊水一本書，好貴好唔抵買
睇完書掃街，食左串牛雜同魚蛋，繼續行又去番賣手鍊嗰間舖，又買多左一條手鍊
散水，原來又冇落雨了

頭先朋友甲問我係咪堅去西藏，我話係，不過今次告別遊埠歎世界，想用budget trip的形式去，買勁平機票，住平青年旅舍，撩d洋妞洋仔拼團玩，唔計劃去邊…
不過，大前提係research定晒，每個景點有d認識，到時即興想去邊就去邊，所以嗰一大箱旅遊書可以大派用場
不過其實除左西藏書，仲買左稻城亞丁、哈爾濱、雲南，好似稻城同亞丁呢d地方，山卡拉咁遠，坐完飛機都唔知要坐幾多個鐘先去到，睇相靚到爆炸，不過睇完當自己去左就算嚕﹗

佢打算反口，唔同我去食小肥牛，offer改為小肥羊或燒野食，我話如果返工的話就小肥羊，放假多d時間先燒野食囉
不過諗番好似有次放工都去燒野食，想食嗰時邊有計架，嘻嘻

以任性的頭銜而自豪

14 April 2009

四日假期的最後一日，早起…
鬧鐘預較在9點，預左自己懶床15分鐘，即係實際預9點3起身，但結果都係喪訓，好眼訓，真係有掙扎過好唔好放飛機，後來訓到搭10，但其實我應該要10點出門口，食少少野加埋搭車，真係差唔多
結果，趕唔切咪冇食野，頭髮蓬鬆地碌入馬鞍山，節目係打羽毛球

桑拿場，坐喺度睇人打都出汗，拎起個拍之後d汗不停咁流，滴汗…
打波只係前菜，之後有一連串即興餘興節目：
節目1：飲茶@馬鞍山屋邨酒樓
節目2：搭巴士+搭的士-->way to mega box
節目3：唱k@ CEO
節目4：搭巴士-->way to坑口
節目5：探班@某商場
節目6：打邊爐x 1蚊雞@坑口某集團酒樓
節目7：搭的士-->way to旺角
節目8：食宵夜@旺角某上海店
笑話x爛gag連篇，最畸呢係4個對將軍澳完全唔熟路的人喺某大商場搵野食，感覺似探險，竟然有因為野食sold out而閂門唔做生意的餐廳，又有大大隻字宣傳緊火鍋68蚊任砌但閂左門的酒樓
早知有咁多餘興節目，帶頂帽啦…

拍拖不是請客食飯，所以我話唔使你請
仍然以任性的頭銜而自豪，感覺非常良好﹗

一個人去深圳書城探險

13 April 2009

星期六又訓左大半日，夜晚去飲左餐滿月酒，我真係發覺自己唔係好sociable的人，當一班人時又想靜靜地，自己一個又怕悶，無凌兩可…
晏晝起身忽發奇想，要好好為西藏之旅準備，食完野碌上去深圳書城
第一次一個人返大陸，真係有d奇奇怪怪的感覺，喺facebook留言：如果我失蹤左，記住話俾差人聽我星期日下晝去左深圳少年宮書城
行程由屋企出發，去後面街搭46x去到大圍站，跟住等去落馬洲的港鐵，再轉深圳地鐵，4號線，由總站福田口岸站去到另一個總站少年宮，基本上一出地鐵站轉彎行兩步就係書城，冇去其他地方，邊有咁易有危險…
可能係星期日晏晝，超勁多人，第一時間去旅遊書嗰排，見到本本都想買，初步仔細地research之後喺kfc食野，再去睇攝影書，首選同西藏有關的攝影書，其次係其他教DSLR天書
之後返番去旅遊書架，攞下一本攞下又一本，廿零卅蚊一本，真係好狠地買，推住架車仔裝到成車書，好似最貴嗰本都係68蚊
我知繼續喺嗰幾排書架游走會出事，所以執到咁上下行遠d計計數，睇下夠唔夠錢俾，雖然d書係平，但都要巡例檢視下係咪本本都值得買，同埋有冇甩漏、皺角等
埋單計數，第1 round d攝影書買左130蚊，第2 round買左560蚊，三大袋，買滿500蚊可以做會員，買凸啦
去搭深圳地鐵散水已經9點3，勁多人過關，我又拎住幾袋野，好重，好走難feel…
如果佢知道我自己一個走上去，一定會哦哦，好擔心嗰種，一定叫我唔好去，又話唔知遇到d咩人嗰d，話危險咁囉，但叫佢陪我去又推三推四，排期啦，唔知等到幾時
所以趁呢幾日佢乜都唔知理唔到管唔到，先斬後奏lu~

你和我要暫時斷絕來往

11 April 2009

上星期五返來，啱啱好一個星期，但從日本回來之後，都沒有好好整理思想

仍然好攰，今日訓左成日，訓到兩點左右起身，食完野，上左陣網，網上重溫港台節目《青海藍天》，為拉薩旅行research，睇左兩集忽然好眼訓，又攤左喺床訓覺，無拘束的生活，真正的休息

有冇試過訓覺訓得好「深」？
有時太攰訓著左，訓得好冧，好清醒地知道自己訓著，知道自己訓得好冧
訓得好「深」係另一種，深層睡眠，明明只係訓左好短時間，但覺得好似訓左好耐，完全失去知覺，訓死左，來有叉足電的感覺，簡單來講係好短但非常高質素的睡眠
如果訓一覺好「深」真係好開心，

尋日他陪我食lunch，我之前一晚提議去飲茶，佢話唔好，咁就suggest沙嗲王，近校巴方便返公司，但朝早佢又話都係飲茶茶開心d，就去左新開的酒樓試菜，佢知我鍾意食菜苗餃，預先order左，仲要打孖上，真開心﹗
食食下野唔知點樣又講開，佢問我係咪真係去拉薩旅行，我話係，佢話我捱唔住，又唔係嗰d宗教狂熱，會嗌悶，又話我一個人咁論盡，有咩事冇人理
我真係好想自己去一次長途旅行，世界有三極，南極北極唔會去到，咪去第三極囉
佢即刻笑，拉薩邊係第三極，第三極係珠穆朗瑪峰，你去到望到個冰山角落仔就當自己去左？
係呀，我真係咁諗架
如果喺當地有腳拼團，或者有local tour咪去珠峰大本營，咁會唔會近d呀？
《青海藍天》裡面講到有一個香港女仔去到青藏高原做環保教育，我問，如果是我，我做不做到？我又想，去那邊流浪，然後嫁個牧民，跟他放牧去，又如何？
佢再三強調佢唔會陪我去，叫我唔好迫佢
我真係由頭到尾都冇諗過要佢陪我去，我真係想一個人去，當然，最後有朋友仔join，我都無任歡迎

四天假期，真係要好好抖抖，盡量唔安排任何事俾自己做，自閉唔出街都冇咩所謂，最怕條街多人同人迫
呢幾日佢有野做要自閉，所以同佢暫時斷絕來往

想起就要，要到就有

08 April 2009

我為人比較沒耐性，想起就要，要到就有
頭先上上下網，諗起桂花糕，諗起就要食，冇得賣，即刻上網search食譜，落樓下超市買片糖、冰糖同魚膠粉，即整
未整過，唔知整得好唔好食，咁啱同佢sms開，話佢聽呢件事，佢覺得匪夷所思，佢話呢d甜點應該有橋妙，唔係咁易整，冇所謂丫，試下之嘛，成功的話下次整俾你試下﹗
呢個世界最好食的糖，唔係咩品牌的精緻糖果，而係片糖
無錯，係片糖，煲糖水用的片糖，記得細個時阿媽煮湯丸，用片糖加薑做個糖水底，我會偷片糖食
頭先煮桂花糖，用刀哼一小角嚐嚐，尋回兒時回憶

喺東京嗰時，每日必去的係酒店樓下的lawson便利店，買飲品、買早餐、買小食
某一天晚上，因為為食，見到熱櫃裡面的雞寶，買左一包，真係好好味﹗
之後雞寶就成為我地的叉電小食
lawson有一款蘋果乳酪，包裝上有青蘋果和紅蘋果，係咪真係有兩款果肉或果汁，不得而知，不過真係好好味，健康過食雪糕
返到來香港喺電視見到人奶公司有新乳酪廣告，無意中喺超市逛，發現新產品竟然有蘋果味，同喺東京食過的味道，雖然有少少唔同，但已經好滿足﹗

約定你復活節後小肥牛﹗
另外，朋友甲介紹我買一部自私洗衣機，好似幾得意
因為用片糖煮，所以比較黃，同埋比街外食多桂花同甜少少，part 2應該放少1/3砂糖，下次試下唔加凍水，加凍綠茶，有少少清新茶味，應該都唔錯

小朋友的新玩具

07 April 2009

我們一早講好，一定要開開心心，不要吵吵鬧鬧過日子，我同佢好好分析成件事，佢認係佢唔啱
其實，第二朝訓醒，我已經冇嬲
尋日趁感覺和記憶仲新鮮，返左公司寫稿，不過，再投入工作之前，一定要放假抖抖，所以是日休假

電話響聲夾雜著雨點擊落窗戶的聲音，我從熟睡中醒來…
勉強掙扎起來，吃了一盅七件，滿足地回家去
摟著維尼和跳跳跳虎，角色扮演，無聊沒意思的遊戲，消磨了一個下午
趕在六時之前到超級人龍店，嚐他期待已久的白灼爽魚皮，還有失落已久的沙拉蝦，滿肚長肥地離開，在附近商場散散步
沒有特定的shopping目標，看過小指環，難得89元買得稱心如意，然後一致的審美眼光，瞄中了一對耳環，沒有理會價錢
無意中走到大減價中的手錶店，圓的方的膠的鋼的，花多眼亂，他一直想買一隻新手錶，偶然間看到一隻不錯的，眼看手沒動。我多口問一問價錢，平得令人咋舌，著他試試看，他也很雀躍地試，在鏡子前左盼右顧
他沒有戴過這種款式的手錶，說看來有點不慣
我以為他嫌貴，我說送他，他卻拿出信用咭，刷一刷，買下了
再逛了一會，走到銀器店
不知道甚麼原因，對銀首飾情有獨鍾，不過很怕那位售貨員小姐，太熱情…
我只是好奇端起一隻貝殼介指看看，她忙於介紹，甚麼獨一無二的天然貝殼，每隻的花紋都不同，還將店裡所有貝殼介指都堆到我的面前，塞在我的食指、中指和無名指上，哎…
後來看手厄，又強行將這隻厄那隻厄戴在我的手上，有被強姦的感覺…
最後，我挑了一條蠟繩銀手鍊，因為跟我原來的手厄、手繩很相配
離開的時候我跟他說，我真的不喜歡那隻介指，也很怕這種過分熱情的售貨員，我比較喜歡一個人靜靜地看，如果剛才是我一個人，我一定會掉頭就走，留待下一次另一個店員才看
回家途中，玩弄著小指環，停下來等過馬路，雙眼沒有離開過新買的銀鍊，他說我像一個小朋友，買了新玩具便急不及待拆出來玩玩，哈哈

考驗還是通過了

06 April 2009

八日東京艱苦之旅終於完結，我諗一年內我都唔會再去日本，我想講的，係工作的毀滅性很大，可以將興趣、愛好完全粉碎
點解日本人咁萌塞？完全唔識轉彎？又非常冇禮貌、野蠻…
呢次採訪，見盡日本人最差的一面

去旅行時，行幾條街最後發現想搵的頹食店就喺隔離，餓住個肚排成個鐘頭隊先有得食，雞同鴨講，仍然充滿樂趣
但換上另一種心情，沒有時間找哪間店子好吃，只想找到有位置，快快吃完便算，工作太辛苦，也想獎勵自己吃好一點，謝絕頹食

這是一次考驗，我想，考驗還是通過了
有好幾回很想哭，強忍著淚水，深呼吸，將怨氣吞下
回到香港，竟然也是以一段晦氣說話開始，回到公司，暫時停了下來
又另一句說話，我只覺得很委屈，哭，眼淚失控地湧出來
長篇大論的sms，我希望你了解整件事多一點，明白我的想法多一點，我沒有亂發脾氣，這一次，的確是你理虧
我們之間，好像多了一種感覺，又接近了一點

前日朋友甲預告尋晚有邊爐局，不過最終告吹，所以晚餐換來串燒、煎釀三寶和雪糕
尋日成日喺屋企訓，訓醒食d野，攰又再訓，訓醒喺電腦前hea下，總之一覺得眼訓就碌上床，幾好feel
頭先返左去寫稿，因為，我想聽日放假~

i am still here, tiring tokyo

01 April 2009

suddenly, i dont think i love tokyo as much as i used to be
hate dealing with 16 bit animals, slow and rigid, not only one, many of them surrounding us

exhausted.......
sleep late, wake up before sun rise, cold rainy days with running nose
lawson rice dum or sandwish only, for breakfast
traffic jam, headward little, hate keep waiting, wasting all the time on red lights

i am here, in fasinating tokyo

27 March 2009

here in tokyo, slept only 4 hour last night, then back to office, meeting the crew members
4 hour and something in flight brings us to fasinating tokyo. when we are at 15XXm up in the sky before landing, our plane free-fall for meters, serveral times, so scaring.........
i asked, will i die here???
and then another 2 hour in airport bus heading shinjuku

tiring in travel and no mood in looking around
loving cool weather, but rains sometimes
typing besides the window, cars drifting away. it is time to sleep, here in presso inn shinjuku, local time 2252

出走櫻花滿開的東京

27 March 2009

一年一度日本遊，竟然，係為工作…
我們仨又集合，0630公司等，未來呢8日，我地又要過甘苦與共的日子，3/4返來

舊年口快快預告今年會睇櫻花，原來，咁就成真
在東京八天，將會見到櫻花滿開

pooh仔同虎仔又移民喇

24 March 2009

尋日攤抖到五點幾，朋友甲收工過來，佢話要飲涼茶，真係唔知間涼茶舖閂左嘛，睇下電視hea下，七點零左右落去搵野食，帶con時手都震…
首先去萬零買左佢話用晒的lotion，真係忍唔住，太餓，所以買左杯薯條同一盒朱古力，好快食完杯薯條，跟住去左串燒檔，豬頸肉、雞肉、牛丸、墨魚丸、珍寶腸同鴨胸，勁好味﹗
食完去左飲野，飲到四點幾先返歸，沖埋涼，其實冇乜點訓過…

今朝係有d唔想起身，無奈冇攞假，的士返去
唔夠訓，個人都係瘟瘟鄧鄧，又有假，又唔係太多野做，所以都係晏晝放假，食左好豐富的午餐，勁飽，食完，訓，訓得好冧，起身先知電話都嘈我唔醒，嘻嘻
傍晚，去左行街，又有一隻pooh仔同一隻虎仔移民來左我屋企喇

仲有四日，向東京出發，櫻花滿開，希望一切順順利利
點解個個都覺得去東京好悠好好玩？真係要做架…
仲有而家d yen咁貴，飯錢仍然係HKD$250一日，每日大約有3000yen食早午晚三餐，咪成日都以為好旬至得架…

攤抖一下

22 March 2009

有d野好似整定…
雖然諗諗下有d唔係好甘心的感覺，但係有一樣野叫牽一髮動全身，多一事不如少一事，如果因為咁搞到兩頭唔到岸，仲煩

星期五，心情仍然很壞…
晚上，在網路上找解決問題的方法，期待著一點起色

星期六，扮老虎、青蛙、狐狸，大家都覺得好搞笑﹗
又麻煩到朋友甲，今次係幫我book酒店，其實可以一齊搞番檔book酒店的野賺下分，抽下佣，唔錯
傍晚，入左青山灣燒野食，十一點幾散水
天氣潮濕，成日都好似無來精神，好攰，所以今日都係喺繼續屋企攤抖下

負能量超標

20 March 2009

今天很累，收到很多負面消息…
每次都問，為甚麼考驗我？

他送我的神秘禮物

19 March 2009

好神奇，收到神秘禮物，係一包維尼虎仔餅餅，究竟係邊個為我送上驚喜呢？

今朝勁唔想起身，攰到爆﹗
頭先喺公司仲肚仔痛，哎，食得太多食濟左，返工前仲有兩聲咳，千祈一定唔可以病…
新鍊當然要即刻戴，但原來都幾重手下
繼續癲喪上網，今次係check東京的酒店，去旅行搵酒店充滿樂趣，第一次check酒店覺得咁煩，所以，我的性格係唔可以將興趣當成工作，否則連興趣也變成苦差
出發日期訂左27號，3號返，早機去，晏機返，因為1700機，我唔覺得呢個算夜機囉，我諗都係住sunshine city機會最大

今日有很特別的感覺，唔知點解呢…
曾經以為唔見左的450D攝影書，原來，原來收埋左喺床下底，終於無意中搵番，都話啦，唔搵佢時就會無啦啦走返出來
不過星期六約左bbq啦，如果唔係約d朋友仔上去揼骨+書城喪買都係一個唔錯的選擇

以前我和他分別返normal同返夜，成日都唔會見到，所以我張枱面就變成交換零食、禮物的場所，留一個message，著他過來攞驚喜，他也會回禮，又時又送上驚喜
我猜，會不會是他…
但今次沒有如以往般，留言，所以我猜不是他
原來，是另一個他

整定

18 March 2009

唔經唔覺，咁就兩年，人與事，好多野好似都係整定…

夜晚食左兩餐，好搞笑
本來佢諗住帶我去食清酒煮蜆，不過尖沙咀分店竟然冇，d壽司又普通，食左第一round，我提議轉場，佢和議，去滿江紅睇過餐牌，可以備用，再行左陣，忽然諗起食韓國野，佢都覺得ok，咁就由尖沙咀碌左落旺角，韓燒，好味，但又食到好飽﹗
食完喺朗豪坊頂樓碌落來，都睇左好耐，雖然有少少頭痛、眼訓、累，但好開心

食得是福

17 March 2009

星期日，訓得兩個鐘走去行山，8點喺葵興站會合朋友甲，然後去西頁集合地點，今次行程係大浪西，麥理浩徑
一行十一人，行得勁快，我又掛住影相，成日都要人等…
行完九男女突發即興去左燒野食，叫咩野戰燒烤樂園，118一位，野食喺燒烤場來講算多，最驚喜係有原條未掰的粟米任攞，不過攞隻碟、轉野飲、錫紙等，同一眾燒烤場一樣，加錢﹗
朋友乙口才好，同老細講價，叫佢送打麻雀，老細就範，慳番50蚊，不過如果要俾錢，我諗佢地唔會打

尋晚勁攰勁好訓，因為冇攞假，所以今日都係返工
他放假，傾左陣電話，有一回講到食飯，他成日話我淨係識食，成日都掛住食，為食，我話食飯係一件開心的事，冇壓力，純粹享受
點講好呢，一日廿四小時，除左訓左覺嗰幾個鐘，嗰幾個鐘基本上都係冇知覺，冇意識，其他的時間，絕大部分用左返工，總有一些麻煩不順意的事或難題，即使看報紙，也有機會引發不同的負面情緒…
唯獨食飯只係為左食，冇目的，食鍾意的野，食想食的野，無牽無掛，幾開心，而且日日辛苦返工賺錢，都係為兩餐，咪就係食
講呢番說話時好大感觸，亦有少少激動

頭先目睹一件事，覺得人類自找煩惱
事緣係三位同事討論出trip的事，因為簽證的問題，出發日期成疑，因為出發日期成疑，人手安排遇到一些難題，同事甲有一舊烏雲喺頭頂…
領事館嗰邊的人被埋怨動作慢，以致visa遲遲未批，另一個國度裡的受訪者可能又要改期遷就訪問
其實，沒有簽證的問題，三位同事都不用煩，領事也不用怕慢動作，受訪者也可以多一兩天自由活動，歸根究底，大家為甚麼要煩呢？因為同事甲要做這個「報道」，同事甲為甚麼要「報道」？觀眾有話過想睇呢個國度的新鮮事嗎？真係不得而知
忽然間在腦海裡浮出一個四字成語，叫始作俑者

重點係你千里迢迢過來搵我嘛

15 March 2009

尋晚約左朋友甲同朋友乙食飯，但佢地收晏，所以出旺角行左陣街等佢地，但去到太子附近塞車，咁就落左車，喺太子附近碌，見到adidas雪糕車

又經過大腸麵線，又唔知等佢地等到幾時，食一碗先
但唔知點解，食完突然間好唔舒服，飇晒冷汗嗰隻，仲有d暈暈地，我真係以為自己會喺旺角街頭暈左…
因為覺得唔舒服時喺花園街，咁就頂硬上都碌左上去新世紀，但半路都差d頂唔順，喺天橋上面坐低左，但又唔敢坐太耐，真係怕坐低起唔番身，所以都係碌左上去麥記，起碼人多，有咩事都有人知，又諗如果真係頂唔順叫朋友甲同朋友乙上來搵我都知道去邊搵
坐左陣，好左d，咁就行番落去，諗住落返去油麻地佐敦一帶等佢地，不過都係周身唔聚財…
只係喺行人專用區附近，諗住睇陣野，但佢地已經打來，location等，咁就搭港鐵落佐敦，永安後面的大排檔
坐喺近門口，冷風吹來，真係好凍呀
雖然今日大家都放假，朋友甲烏眉恰睡，食完吹左一陣水散水，佢地送我去搭小巴，返到去肚仔痛，慘…

今日喪睡，凍左，冬眠狀態又啟動，訓到點幾，肚仔痛到醒左…
sms報告病況，佢出左去有自己野搞，傾左陣，又繼續訓過，晏晝自己喺屋企整蛋牛治，足料，好味﹗
後來佢打來話一齊食飯，唔知食咩好，佢話叫我出銅鑼灣，其實我冇所謂，但原來佢講笑，佢話：你唔舒服唔通仲要你出來咩
嘻嘻
佢話過來搵我，我問佢食咩，佢話：都係食煎釀三寶同嗱渣麵，我吓一聲，佢話：重點唔係食d乜，係我千里迢迢過來搵你
本來諗住去葵芳食魚皮，但超勁爆多人，結果上左樓上酒樓，有冬瓜盅，好開心，本來諗住叫乳鴿同沙拉骨，但落order姐姐話兩個人一係送半隻雞一係送兩隻鮑魚，我地揀左雞，所以連乳鴿都冇叫
冬瓜盅勁好味，真開心﹗
有時就係咁，唔算係d乜野大病，見到想見的人，有人關心下，d病就自然好

食完慢慢散步返歸，聽朝去行山，但係而家訓唔著…
約左7點鐘葵興港鐵站，諗諗下覺得好古怪，明明只係需要9點鐘去到西貢，但咩要約到7點咁早？

去總壇朝聖+攞禮物

13 March 2009

尋日真係攰到爆，尋晚早左少少訓，所以今日好精靈
如常返工放工，冇咩特別忙，但又有d野做咁啦，晏晝收到adidas的sms，vip獨有的60周年禮物，又唔講係咩喎，要出去總壇換，咁放工又冇乜別野搞，咪碌出去攞禮物同行下囉
今日對鞋有d緊，其實唔係好適宜著住來行好耐街，但又好奇怪，好幾次著呢對鞋，都會無啦啦戚起條筋想去行街
第一站尖沙咀總壇，快速esearch一次，不過今次冇乜野睇得上眼，咁換左禮物就走，原來係一張coupon，折後滿800蚊可以減100蚊，仲要3月31號到期，好似欠左d誠意，頭先睇過d野唔係太啱買，如果邊位朋友仔有野想買，有機會用到張coupon就出聲啦，我係vip，買三間有8折，original有9折，折後滿800蚊再減100…

喺尖沙咀行左一陣，都冇咩特別野想睇，唔知點解，冇乜購買肉
跟住搭港鐵去左太子，諗住行一陣，無意中經過一檔叫阿升麵線的物體，大腸麵線，好吸引，叫左一碗細碗，盛惠12個大洋，以後掃街又多一個選擇，食食下興起，一邊睇野一邊碌，去左尚書房搵拉薩旅遊書，但唔係好啱心水，跟住碌埋落山東街飲珍珠奶茶同食沙嗲牛丸，好味﹗

夜晚又上唔到網，好煩呀﹗
都唔知係我部腦的問題，定係個network的問題…

尋日無意中見左佢一面，一排冇見，佢份人又假左

茲收到一份手信

11 March 2009

想去拉薩並不是因為最近常看到西藏新聞而身痕，只是這個地方，越看越著迷，總想了解多一點
看過薯伯伯的blog，他在拉薩開了一間咖啡店，原來最近一期壹周刊，介紹四男女的荒唐事，其中一人是薯伯伯
他們這種生活，我相信很多人都想過，只是沒有付諸實行，以我為例，一個人打算去旅行的話，會擔心會不會很悶，會不會很危險，不是説與憂患意識說再見，但是有時候是否過慮呢？是否想得太多呢？
昨天跟他聊起，去拉薩，他說我是一個「耗氧量大的人」，拉薩的氧氣不夠我吸，會暈，不舒服…
我說，車停在5008米的東達山丫口稍事休息，抖抖氣，雖未至於追逐，停下來呷杯熱水，走到雪堆邊玩雪，節奏基本上與在港嬉戲無異
他想一想，拉薩海拔三千幾，應該沒問題
我說到有個香港人(就是說薯伯伯)在拉薩開了一間咖啡店謀生，他說外國人一定很喜歡，即時生出生意頭腦，不如在拉薩賣蛋撻，他說，這樣都可以在那兒生活，也是一個不錯的選擇

談到本台本節目早前一個講淫褻及不雅諮詢的報道，我地簡稱佢叫淫賤故，不過，大家唔好有任何幻想，新聞探討，合家歡時段出街，畫面遮到矇查查，我的感覺係我都唔知自己睇緊d乜，連喺foxy search出來的檔案名稱都要遮晒，因為好繪影繪聲咁形容性交場面，例如人獸、射爆之類，好淫褻，所以要得番av二字，呢個就係做電視的限制
我講笑咁講，如果成日做愛嗰d人，出街都要打格仔，又或者唔出得街，咁係咪唔使返工？
朋友甲話不如用d啪啪紙包住個身，包到矇查查咁出街
哈哈哈，真係好好笑﹗

上次有幾張巨型啪啪紙，好好玩，尋日諗來諗去都唔記得巨型啪啪紙喺邊度來，同邊個玩過，只係記得係仔
啱啱終於無意中諗起，係同住葵涌邨的朋友乙玩，因為有箱野自美國ship過來，暫存喺我屋企，同佢一齊拆箱，巨型啪啪紙就係包住箱裡面的野
點解無啦啦講淫賤故呢，事緣係收到一份手信，係一個木製煙灰缸，煙灰缸的裝飾，學術的講法，係一具已勃起的男性生殖器官，粗俗的講法，係一條扯起左的賓周，其他的講法，亦可以形容為陽具、腸、條野…
我諗，如果貼張相出來，會唔會構成不雅呢？個blog使唔使加警告字句？又或者包膠袋？
其實，只係一件工藝品啫

至於點解要形容係「一份手信」，重點在於「份」，禮物包裡面除左煙灰缸，仲有移民來香港的虎仔同豬仔

下一站拉薩

10 March 2009

我決定了﹗
高原的藍，雪域的白，令人著迷；天路的蜿蜒，寺廟的壯觀，令人嘆為觀止
這幾天很努力地research，拎住本拉薩攻略不停咪
香港冇機直飛西寧，所以都係深圳出發最好，深航全日一班，唯一一班，1230飛，唔使趕頭趕命，單程正價盛惠rmb2010，發現在兩大網站訂購長年有七折，即係rmb1410+rmb50稅，回程如果都係揀喺西寧走的話，機票六折rmb1210+rmb50稅，晏晝1755喺西寧飛，如果唔delay的話返到深圳2230；而廣州飛平幾百，盛惠rmb980+rmb50稅，但0805飛，唔通要之前一晚喺廣州機場露宿？
不過回程有得揀的話，未必搭番青藏鐵路，喺拉薩飛番成都，又去小食城食下野都唔錯，機票永遠都冇折，實牙實齒rmb1500+rmb50稅，可以揀川航或國航，咁就梗係國航坐得舒服d啦﹗不過如果飛廣州又唔同講法，有時間喺重慶機場四粒鐘轉機，拉薩返廣州間中有平機票，都係rmb740連稅，抵﹗
如果喺拉薩返成都，朝早11點，一個鐘頭內有5班機，搭唔到，趕唔切都唔緊要，1555仲有一班，但如果之後要駁機返深圳或返香港就晏d囉，所以喺成都hea番兩日都唔錯
又或者趕時間，拉薩貢嘎飛廣州白雲機場直飛都得，CZ3464 1450飛，1930到步，rmb1630至rmb1750另加rmb50稅
至於重點的青藏鐵路，如果唔怕辛苦，budget travel坐硬座坐25小時22分，只係盛惠rmb226，但想攤抖下，硬卧下舖都係rmb523
最理想的行程係深圳-->西寧，買定火車飛，閒閒地hea番三日，係遠就遠左少少，但咁轉折飛到青海，點都要join番個local tour遊一遊青海湖啦
跟住un廿零個鐘火車，一邊影相一邊hea，同陌生人吹下水，應該都幾得意
去到拉薩已經係夜晚9點幾，即刻返酒店大覺訓

如果唔喺西寧hea，嗰朝搭飛機嗰晚2023即刻上火車，第二晚就到拉薩
如果搭廣州火車，中午上火車，隔一日夜晚到，多一日，牛兩日幾，點都要買軟卧，rmb810至rmb1450，但呢個價不如搭飛機，慳時間
然而，咁咪搭唔到青藏鐵路囉…
西寧始發N917火車停德令哈(0250)、格爾木(0713)、沱沱河(1222)、安多(1550)、那曲(1733)、當雄(1927)，2150到拉薩起碼喺西藏多兩個站，望多兩眼丫…
廣州的T264/T265 1307開，停長沙(2003)、武昌(2325)、鄭州(0414，日出都睇唔到)、西安(1000)、蘭洲(1630，日落又未到喎)、西寧(1938)、格爾木(0622，都仲係差少少先日出)、那曲(1647)、尾站2100到拉薩

諗諗下，即使一個人去都唔係好咩丫，都係交通，喺拉薩搵薯伯伯做當地聯絡辦，唔知佢肯唔肯呢…
適應左高原地方，join番個信譽良好的local tour去林芝呀、羊八井、納木錯、珠峰…
太多possibility，諗起就興奮﹗

連續兩天晚上，那個時候經過便利店，就看見一個中年男人吃杯麵，兩天晚上是兩個不同牌子，不同味道的杯麵，我相信，他不是因為喜歡吃杯麵…
當一個人只為了生存，一個杯麵，為的是裹腹，甚麼營養價值已拋諸腦後，甚或沒有本事去想吃哪些有益，吃哪些長肉
在微冷的晚上，呷一口熱的味精湯，吃兩口油炸即食麵，我不會認為他吃得津津有味，只有咀嚼出生活的無奈