原本個單門雪櫃其實想換好耐，遲遲唔郁手，其中一個原因，係唔想使錢，呢個亦係最重要原因，而且個雪櫃仲好地地用到，無理由扔左佢，送俾人應該都冇人要，貼錢車去俾慈善團體，哈哈，我未至於咁有善心
總之一直都冇迫切性換，直至星期四晚，清理冰格D冰，不小心地人為地整壞左個雪櫃，佢唔再識制冷，無法啦，唔想使錢都唔得，一定要買
星期五lunch去睇過，因為要擺個微波爐喺上面，一定要買部矮得得的，基本上冇咩得揀，呢部之前喺荃灣吉之島睇過，咁啱times square豐澤都有，個價錢牌標$2780
我都冇乜意識去問佢有冇折，因為上次買抽濕機的經驗，我諗我以後都好難再幫襯D大型連鎖店
百老匯仲串，冇賣雪櫃
同事有教協會員卡，賣$1978，平一大截，可惜冇貨
收工前好努力地上網搵，上次賣抽濕機間野試過，可信的，諗住再幫襯，但冇貨
其他又唔知邊間信得過，結果去左yahoo拍賣，好幾間開價$1960-$2020咁上下，免費送貨，有電話打電話，冇電話留言，邊個快覆，有貨，盡快送就幫襯嗰間
結果而家呢間留左電話轉頭就覆有貨，$1980包送貨，佢八點收工前入錢落到單就星期一送貨，仲有半粒鐘，我即刻飊落中銀落訂，五嚿水
星期六打來約送貨，星期一朝早11-1，搞掂，送貨收埋尾數，現兜兜$1480，我俾左$1500免找
今次平左$780
上次仲誇，部抽濕機我喺豐澤睇$23XX，其實我都十五十六，未決定係咪真係買，無聊上網打個型號格下價，送埋貨都仲足足平一千蚊﹗
打去問，講低電話地址，連訂都唔使俾，約好時間送貨，貨到付款，冇成本，冇損失咪試下囉，又真係堅架喎，真係…
原來，大家好多時都使左D冤枉錢
老實講，如果唔係自己衰多手，今次呢二千蚊都可以暫時唔洗住，呢筆錢先最冤枉