一片肅穆

30 July 2006

尋日其實真係好累，因為之前嗰晚，即係fri去左飲野，玩到三點幾，又天光先訓，所以激累
後來仲要得知一個消息，就係打算叫我去甘肅做山區小朋友上學的feature，我聽到呢個消息，真係又驚又喜，開心有得去，愁係好多uncertainty，又要諗story ideas，又要諗自己要點樣在山區生活4-5日，個腦極高速運轉
不過結果唔使煩，因為班機太早，佢地搵唔切hr買保險，唔去
突然個腦可以停止運作，真係覺得chur得太盡

呢個時候，你話唔見左個銀包，點解咁灰？
臨走時你叫我去唱k，其實初初真係好唔想去架，d人我又唔識，係咪食蟻獸來架…
結果都係出左去，我真係好眼訓，但樣激殘…
但其實我都唔想唱歌，兩支chivas勁吸引，玩骰盅，我都係呃酒飲，贏同輸都飲，佢地溝綠茶，都溝得好淡，我自行加酒，正﹗
不過可能真係飲大左，定係好耐冇試過飲咁多，坐喺度好地地，一行兩步就覺得high上腦，可能血液運行，帶動埋d酒精運行，行唔到直線啦，在街上狂叫大叫啦
你同我一齊返去，我真係咩都唔記得，可能真係貓左啦…
我訓著左，訓到返工前先起身，連涼都冇沖，衫都冇換
我奇怪一樣野就係明明返到去未開床，你點解可以整開張梳化床呢？
你話你叫我起身，我企埋一邊，跟住你開左張床，我又撻返落床，冇反應冇知覺，我又完全唔記得呢d事，好奇怪，你有冇呃我架？
嘩，起身個頭勁痛，真係好難頂，去到單assignment又要等個camman喎，坐喺度個頭又痛，又眼訓，幾辛苦
後來呢單流左啦，去左東區醫院

今日的故事，這兒才開始

初步了解過件事，係有個人攀石，跌左落懸崖死左，影唔到個body
未咁正面接觸死亡，仲諗住去幫手扑咪，扑下d家屬，後來諗返，呢個諗法好天真
去到join番個camman，大家都未知在警崗度個女人，係咪家屬，因為佢咩事都冇，同個madam講野，俾資料，但突然間佢由冇野到有野，madam好冷淡咁話俾佢知佢老公死左，佢的面容、神情、情緒等各樣野，係720度轉變

那個畫面，永遠都烙在我的心深處。
她從冷靜到呼叫；從理性到崩潰。
她聲淚俱下、呼天搶地、聲嘶力竭、歇斯底里、淚如泉湧、抱頭痛哭、死去活來…
我的字典裡，可以形容她的詞語，如數家珍般搬到面前。
她正是沒有時間去思、去想，就要接過這個殘酷的消息，我除了心酸，還有心酸。
急症室只有兩把女聲，嚎哭中的她和冷淡冷漠的女警員頗不耐煩的說話：「你先別這樣傷心，冷靜一點，你還有很多事要做…」
這樣的情境，怎可以不傷心，怎可以不激動？請你指教﹗
這個她是否面對這些「死亡消息」已感到麻木？有血有肉的家屬，以淚洗臉的家屬，對穿制服的她而言，是甚麼？
空氣凝固了，呆待看病的他和她也向二人行注目禮，全場一片肅穆。
因為工作，攝記們都要拍下這個震攝人心的畫面，我身處其中，照像機快門閃動和鎂光燈的聲音，伴奏著我這個第一次，令我心情凝重的第一次。
我不忍看著她，我想上前扶她一把，但她與我素未謀面。
我想正眼看她，看她傷心的瞳孔裡，有沒有新聞故事。
每杪都是填滿了難過，心頭陣陣發緊。我感到臉龐和眼睛，有灼熱的感覺，我的確很想哭。淚珠兒跑到眼眶，我將他們趕回去…
返回公司的車程，好像特別遙遠。
編輯問有沒有upsound，著我跟進了解一下。
這一刻，我感到這個她也是冷血的，我想她大概沒有親身經歷這教人苦思的一幕。
還要upsound，很涼薄。
原來新聞片段經已剪接完畢，選了那個突變的鏡頭，再一次回顧這一幕，心裡很不舒服，心頭很痛，像被尖刀刺進來一樣。
而跟進這報導的兩名同事，也沉默起來。
看畢新聞片，我找那位編輯，問她是否必須那個upsound，我告訴她這個畫面太震撼，看了很不舒服，她竟然說這就是想要的東西。這種視生命如無物的態度，真令人髮指﹗
在眾人面前，我強忍淚水。
每逢整點，都有這則報導，我每每也刻意迴避那個刺進我心窩的鏡頭。
吃飯時看見身旁的家庭，又想起她和他的家庭，她和他從此永訣，本來乾澀的眼睛忽然間感到滋潤，鼻子很酸…
平日晝夜聒耳的我，不容空氣留白的我，靜了下來。
吃晚飯時身邊只有一個他，我刻意逃避他的視線，也嘗試找別的話題，讓自己暫時忘記這件事，不要在他面前哭起來。

那種感覺，真不能用言語筆墨去形容，只有親歷其境，才能明白我的感受。
陌生的她迎接摯愛的死亡，已為我帶來這鼓衝擊，我真不敢想像，不幸地，事件發生在我身上，我可能暈倒了。
我希望我和我身邊的人，從來也不需要面對這個殘酷的消息。
那個片段，倒該讓想自殺的人看看。你死掉了，你的家人就是這樣，你忍心嗎？
生命，有甚麼比活著還更重要？
愁恨，如何跟性命在天秤上斤斤計較？

天災中的人

29 July 2006

因為做中學的讀書報告，讀過這一部鉅著——《唐山大地震》
今天是唐山大地震三十周年，將這篇一度成為表揚作品的陳年舊作，公諸於世，獻醜了…

天災中的人

《唐山大地震》讓我脫離時空的束縳，回到一九七六年七月二十八日凌晨三時四十二分五十三點八秒，我彷彿感覺到大地震動，我猶如看到樓房倒塌的情景，我似乎聽到聲嘶力竭的呼喊。大自然的蹂躪，將一座百萬人口的工業重鎮夷為平地，只遺下一堆堆瓦礫，一堆堆傷員和一堆堆屍體。無辜的死難者，幾乎在毫無準備之下被推向死亡，他們是否早就注定是大毀滅中的犧牲者？無情的大自然﹗上演了一場前所未有的惡作劇——地震，一夜間摧毀了一片充滿情感的樂土，奪走了唐山的靈魂，並以壓倒勝的姿態步離唐山，遺留下淒婉的抽泣，無奈的面孔，滄然的目光……

唐山，自「七‧二八」蒙難當日開始，就籠罩著一陣死亡的氣氛。大自然的一聲號令，唐山市各大大小小的樓房隨即應聲而下，繼牆殘壁、亂瓦碎石從天而降，活埋成千上萬的生靈。這是人力所能抗嗎？灰塵在空中飛舞，頹垣敗瓦中滲出微弱的氣息。呼喊、掙扎，然後悄寂無聲，二十四萬二千七百六十九人大概就是這樣賠上了寶貴的生命。生命就是這麼脆弱和渺少嗎？

一個名叫豐承渤的姑娘，在大毀滅中被死死地纏著，動彈不得，拯救人員眼看著她被痛苦折磨至死。堅強的意志力使她支持了一天一夜，她顯然是充滿求生的慾望，然而上蒼並沒有給她機會。天﹗她究竟犯了甚麼滔天大罪，非要把她折磨至死不可？僅僅二十歲的姑娘，最後在拯救人員的眼淚中離開了。那些拯救人員，永遠也不會忘記目送生命消逝這一刻，他們心裡，將烙下一個不能磨滅的陰影。

一個七歲的孩子，在沒有麻醉情況下清創。醫護人員將孩子的頭皮掀開，用鹽水沖洗，然後用刷子刷，每碰一碰，孩子就抽搐一下。孩子母親在旁安慰，可憐又十分懂事的孩子咬著牙，忍著痛，沒有哭。這次清創的經歷，對於孩子和那些醫護人員來說，都是一個難忘的經歷。清創的劇痛將深深地刻在他們的心靈的深處，猶如一把刀，不知何時何地，會狠狠地向他們的心刺一下，痛﹗心頭陣陣發緊。

大毀滅當中，受傷的人多不勝數。割破了的傷口，一段日子以後就會癒合，或許留下一道疤痕。可是事情不是來得如此簡單，傷口不但帶來皮肉之痛，亦帶來心靈上的創傷，一個永不磨滅的創傷。每每有意或無意地觸碰它的時候，都會喚起恐懼的感覺，而這感覺是時久不散的。假如豐承渤姑娘和那個孩子仍然在世的話，被壓和清創滋味將永遠地纏著他們，消極地想，死亡倒也是一種解脫的方法。至於目擊者，偶爾想起這恐怖的經歷，便會手冒虛汗，內心顫動，泛起一陣不安的感覺。

我想，「害怕」是人的本能。

我亦想，「惻隱」也是人的本能。

那麼，人們在危難時守望相助的精神也是人本能。

有一條方舟﹐在大地震的餘波上飄浮著，在震後漩渦中打轉，一條這樣的方舟，就是一群劫後餘生的人的家。一個臨時的家，溫暖，而且有血有肉。男女老少，一共二十一口人，風雨同舟，互助互勉，從不計較吃同一個鍋裡的稀飯，睡同一塊木皮地鋪，這大概就是憂患與共。

四十次列車上的八百多名乘客，一同面對地震，一同撲火，捐獻自己口袋裡的食物，「排隊吹氣」生火，照顧病人、老人和嬰兒等，不分彼此，完完全體現了守望相助的精神。

唐山賓館倒塌，五十一名異國人被埋在瓦礫當中，唐山市外事辦公室科長李寶昌奮力地搶救外賓，甚至忘記了自己鮮血直流的雙腳。傷勢較輕的異國人在獲救後自組拯救隊伍，搶救那些素昧平生的人。傷勢較重或較虛弱的傷者則互相支撐，用手勢說話，互相安慰，這就是忘我，無私和互相扶持的精神的見證。

為甚麼？為甚麼在危難時人們才能守望相助？方舟上的二十一口人，在廢墟上各自回自己的財產後，漸漸築起一道道私心的圍牆，有人不想捐獻，有人不滿自己吃少，吃得稀，方舟大戶，結果瓦解了。四十次列車上的人的互助互愛，在日常生活是常見嗎？無私的奉獻又是可行的嗎？沒有報酬的工作有人擔當嗎？唐山賓館的廢墟上，不同國籍的人，衝破語言的障礙，打破宗教信仰的界限，秉棄膚色的歧異，互相關懷、呵護、安慰。平日又能做到嗎？二十世紀的現代人，與「守望相助」如同陌路，究竟人類的美德在哪裡？用心良苦的大自然，讓人在大地震中重新領略，重新發揚這美德。但，這代價是否太大呢？畢竟是用二十四萬二千七百六十九人的性命換回來的。大自然的懲罰，實在太嚴厲了，太嚴厲了﹗

十六萬四千八百五十一名傷員，憑著幸運之神的眷顧、努力的爭扎與及其本身的堅強的意志和強烈的求生慾望，大毀滅中倖免一死。然而有些人在大地震面前卻變得精神失常，最後被顫抖、驚慓、惶恐吞噬了。精神病人呢？他們比任何正人都表現得更正常：平靜地坐在廢墟旁邊。鎮定地接受這場大自然的浩劫，面對鮮血和淚水的洗禮，究竟不正常的是那群精神病人還是那些扼殺自己生命的人呢？正常人眼中的異常人其實又是那麼正常﹗

大難當前，人們根本沒有間去思、去想、去躲、去避，然而所做的一切卻是最本能最理性的，並充份地表現了人真實的一面，最赤裸裸的一面。在大自然面前，人的生命和力量顯然是脆弱和渺少的。大自然的風吹草動，對於人來說，都是那麼的權威，也許只能輕歎一句：吃不消﹗時至今日，人尚沒有能力與大自然抗衡。對於不能被征服的自然災害，人該用一個怎樣的心去面對？我想，與其坐以待斃，不如積極地面對。大毀滅後的嗟怨也是無補於事，不如新振作，努力建設﹗

唐山、唐山人就是這樣康復過來。

一笑置之

28 July 2006

心情起伏，猶如坐上過山車。
我嘗試學習淡然面對突如其來，能夠令我不知所措、無所適從的事情，但我辦不到。
是我不夠世故，閱歷不足，還是我根本沒有潛質，成為這一類人呢？
既然如此，我是否應該放開雙手，不要堅持「一笑置之」？
然而，我已學懂放開雙手嗎？

不能用漢字或英文字母形容的心情，換了片假文和日耳曼語，有沒有分別？
事實是複雜的思緒，不知如何整理分類；混亂、悲喜交雜的感覺，不知從何說起。
帶著沉甸甸的心窩與步伐，戰戰兢兢地，在鋼線上，低著頭，向前走。
目標，不明朗；前路，看不見；同途人，碰不上。更遑論有一個熱心的他，上前扶一把…
即使這個他在身旁掠過，又如何？
文字也不能清楚交代，金字塔一般的謎團，又怎能以三言兩語，簡易說明之？
讓我活埋在費煞思量當中，只要有心人說句：隨便，就足夠了。

滿足

27 July 2006

特別的日子，已經夠特別，唔使用特別的方式渡過，都經已很有意義
吃平凡的快餐店，吃平日也經常光顧的峰壽司，一共食左17碟，最愛的峰蝦，食左3碟
逛任何時間任何日子也人來人往的cwb，過了簡單的一天，卻很滿足
買左shu uemura櫻花卸妝油，大樽，450ml
在city super買左幾包薯片同泰版可口可樂，只因有雲老個樣
明治隻牛油+鹽的薯片，好好味，食完睇番張單，原來盛惠15大元一包
頭先煲湯，係咪奇聞呢？
其實煲湯都唔難的，只係去百佳買湯包，返去洗乾淨d野，放入熱水煲幾個鐘，加d鹽吊下味，就ok啦
頭先煲的係素翅螺頭煲雞，我仲自行加左d真翅裙添，係咪好豪呢，嘻嘻
好鮮甜，正﹗

********
約你地兩個食飯，終於約得成了，暫定星期一去fat angelo's食lunch，好掛住佢個好以埋面咁大，外面脆，裡面軟的包包
當然，更掛住的係你兩個啦，原來已經超過半年冇見，時間過得真係快﹗(p.s.網上嗰d唔計)
你兩個呀，有天大的面子，我放假都會早起身應約﹗

********
有一個兩難的抉擇，尋日終於面對了，希望一直的憂慮都係杞人憂天，我又要以我的豁達阿q精神自勉

********
新一季EPL又就開鑼，819，現已進入直路倒數階段，新球季新開始，當然要準備新波衫，arsenal同manu唔使諗啦，今年的行動目標只有chelsea同liverpool，你識做啦﹗
target 1：lampard身上的三間車仔主場球衣，我諗我著童裝中碼或大碼啦，因為我已經有lampard的波衫，最好熨番no. 26 terry
target 2：gerrard身上，都係三間利記主場球衣，利記又回歸三間，真係一個明智的決定﹗利記呢，唔使字都得，因為我已經有gerrard4號仔英格蘭作客衫，但如果有埋8號利記，又唔駒喎﹗我咁細粒，都係童裝size就ok了
唔使驚唔識搵，唔認得，我連相都post埋出來喇，唔好咋咋弟…

眼濕濕

25 July 2006

搭車時諗起你，數數手指，原來已經六年了，忽然間覺得很感動，眼濕濕
時間原來唔經唔覺地過去，我轉變了，你也轉變了，但你仍然在我身邊，包容我忍耐我，真的百感交雜
寫到第57個字，終於按捺不住，眼淚逃跑了
無數關於你的畫面湧上心頭，以一秒8格的速度，在我面前、眼底裡、腦海裡閃過

經過連日來努力，電腦已經搞掂，早前買左新相機，可以用影像記錄精彩時刻、無聊時刻
8日前，7月16日，夜晚去左峰壽司食晚飯，兩個人，食左十幾碟，最愛峰蝦壽司

眼訓，個腦function唔到，冇野想講，下回再續

和好如初

20 July 2006

我冇事lu
今日，好多人都讚我靚，我只回應一句：心情靚人梗係靚啦﹗
之前覺得唔開心，如果咁樣，有令到你擔心，或者我黑起塊面，令你覺得唔舒服，唔好意思﹗
總之我而家冇野啦，又做番快樂小天使

之前煩緊的事，解決了
講得明白一點，係處理好同某人的關係，我地已經和好如初，放下心頭大石，擱下一個擔子，當然豁然開朗啦
另外，早前死亡經歷的陰影已消除了

其實呢個好消息，都係幾日前的事，但因為電腦進行緊急維修工程，未搞掂，上唔到網，延至而家先公布

講下點解會同佢冇事啦
我呢份人呢，好奇怪的
一係莫不關心，好冷淡，唔喜歡的人和事，一點也不在乎
為甚麼總是對佢么喝、事事過問，都是著緊關於佢的一切一切…
就是甚麼「愛之深、責之切」的道理
誤會，是因為誤將這份情切，視作挑剔、批判
另外，關心的說話，又被誤以為嘮叨與監管
我感到不快的是，一向的默契，突然蕩然無存
好意善意，全被扭曲
哎…
然而，早幾天，忽然間見番面，覺得「叮」一聲，唔知點解，突然開竅了，也許就是昇華到另一境界

********
呢幾晚搞機，一路開住個national geographic channel睇，真係好引人入勝
佢有個teaser講d過山車，真係好正，雖然我真係好貪玩，但睇落真係好激架，接近90度直衝上半空，再差唔多又係90度，邊旋轉邊衝落街，真係好刺激，隔住鏡頭睇都覺得個心會離一離，唔知真係坐上去，有冇自殺的感覺呢…

********
最近電腦失靈了，正確來說，是我令到它失靈
事緣部腦裝左太多無謂的東西，令整體轉數急速下降，所以呢，早兩天打算趁放假，format左佢囉
點知，更大的問題就出現了
因為我部腦都買左2年了，2年對科技發展來講，實在是一段非常長的時間，我et recovery碟，仲係cd年代，而呢d，有經歷過dvd年代，但現在流行的做法，是內置在電腦內，只要press一個掣就可以
另一個大問題，是套光碟係windows xp home edition sp1，呢個野呢有漏洞，一connect上網就俾d毒炸，好大問題，唔知點算，裝左norton都要update架，咁都係要上網，呆左囉
哎，而家都唔知點算
冇上網兩日，覺得自己更加自閉
我真係完全中晒網毒啦，見唔到d虛擬世界相聚一刻的老友，感覺好空虛，好失落，唔知佢地見唔到我呢個常客，感覺如何呢？
現在是公元2006年7月19日，時間係gmt+8 155020，地點係宇宙銀河系太陽系地球亞洲中國香港特別行政區九龍何文田佛光街房署總部地下的黑色座位上，執起紙筆無聊地寫長篇大論的人物是公元1982年12月7日出生的我，呢個我較早前只有不足六小時的睡眠

應酬

21 July 2006

即使十萬個不願意，嗰餐飯都係要去食
我真係好唔慣，去唔慣呢d場合，強擠出笑容、扮合群、裝享受…
呢d叫應酬
我看上去，嗰班人，真係覺得係gathering，可能佢地真係係d咁假的人，又或者佢地真係咁熟啦
我呢d，喜怒形於色的簡單的人，很容易被人看穿，唔適合出席呢d場合
不次呢d咁既活動，唔好叫我啦﹗

********
你係咪唔開心呀？我見你個樣好牛咁
頭先搭電梯，短短的路程，都要瞌一瞌，可能你太累啦
但如果你真係唔開心，出聲喎，屈埋屈埋變抑鬱，你當係紓發內心感受又好，當係呻又好，當我八掛想知都好，如果你想搵人share，可以搵我架
係，平時我把口係口沒遮攔，但我知邊d講得，邊d唔講得，我識分的
訴說心中情呢類，唔使講都知唔講得啦，隻字不漏
正如你之前講過的秘密，亦收埋在夾萬裡，冇向任何人透露半句，請放心﹗

********
聽晚夜晚有節目，好期待，一個月都冇咩幾多日可以玩，唯有放工同d同事前同事飲飲食食，補番數
星期三的紀念日，我預早mark左放假，去邊玩好呢？你安排左咩節目呢？
其實你係咪真係放假而家都未知…
唔會要我自己一個人過掛？反大面都有份﹗
哎，好耐都冇收過花了
其實，我鐘意的，唔係d花本身，而係喜歡收到別人艷羨的目光、妒忌的眼光，就是這份虛榮感，才是花束和收送花束的真正意義

未出發先興奮

21 July 2006

我就係一個好搞笑的人，未去旅行未去玩，往往都會在腦海裡，將旅行和玩樂的情境預演一次，令自己未出發先興奮
頭先見到電視劇裡d人，在沙灘上拋下波玩下咁，突然間都想去沙灘玩一轉，即刻約人啦，反應都幾踴躍，去邊個沙灘玩未定，具體玩d咩，會唔會玩個個都話好玩，但我未玩過的wakeboard，定係玩其他唔新奇但刺激好玩的水上活動如香蕉船、水上電單車等，定係會滑浪(以今次的陣容，機會好微)，都未定，但一諗起有得去玩就好開心﹗
但係由一個唔識游水的人，發起去沙灘玩，都係好搞笑啦﹗

你可能會問我，我咁貪玩，點解唔學游水呢？
我唔係唔想學呀，但我真係怕
細個時我住村屋，屋企門口有個大缸，個缸點來，唔記得，亦唔知點解個缸裝會滿水，我好細個之嘛，個缸同我差唔多高
我咁貪玩，當然去玩水啦，掟石仔入去個缸入面，掟晒冇得玩，諗住去個缸到執番，點知呢，一探頭，頭重尾輕，成個人倒豎衝直插缸底…
點樣救番我上來，我唔知道，呢一段空白左，可能我暈左啦
從此之後好怕洗頭、洗面，因為d水會走入個鼻，我諗係嗰次個鼻吸左d水，唔舒服左好耐，同埋有陰影
有一陣子唔會用浴缸沖涼，因為怕
大個左，因為貪玩多，克服了一大潭的水，唔怕了
但仍未學識的，就係在水上在水裡唔用個鼻呼吸
其實我識踢水，可以潛入水底游一啖氣，咁樣就識得用意識控制住，忍住唔用個鼻呼吸
但如果將個頭伸出水面，就好似失控咁，又係用番個鼻呼吸，旁邊的人踢起水花，又吸晒入個鼻
好笨…
我有學過架，學唔到，就係學唔到，有d野，要自己領悟，要自己克服

********
其實今日放假，好應該去書展，但一來懶，晏起身，二來係部腦仲未搞掂，三來係夜晚應承左阿媽返去食飯，去得兩個鐘到，費事啦
唔知點解呢，忽然間好想食燒鵝，聽日如果仲有呢個想去，睇下晚飯有冇機會滿足下呢個簡單願望

書展，其實我都唔係買書睇，我係買書儲，我都話我好奇怪架啦，嘻嘻
一個唔睇書的人，年年都去書展，仲要去幾次喎
一個唔睇書的人，又會在書展買好多書架喎，但買番去的書，係唔會睇的，只係想儲
其實係咩心態呢？
不過，如果買的係畫冊、足球書，我係真係會認真地「躪」左佢

我發作家夢的事，已經講過幾次
而家寫緊第二本書，但進度極唔理想，好慢呀﹗

以前在中學，學文成績理想，甚得老師歡心，閒時會賦詩作對、寫些感性文章；曾經在徵文比賽、讀書報告比賽中，得過一些虛銜；而中學畢業前，完成了首部小說《無名字的書》。
同時，亦是社團的辯論隊長；校際演講比賽中，也僥倖地得到好評如「才思敏捷」，得過亞軍獎狀，勉強稱得上口才了得。
同儕冠以「才女」之名，因而沾沾自喜﹗
這就是我。

肩並肩

17 July 2006
人與人之間的關係，的確十分奧妙。你付出十分，不一定收回十分。
但你從別人身上，佔一分便宜，別人往往會雙倍奉還…

剛才做了一個夢，是關於他的。
我和這個他，這一刻是不是朋友，不曉得。
但夢裡，他主動致電我，談起近況，原來，我跟他有無數的話題，有很多說話想跟他分享。我與他，在潛意識的世界裡，冰釋前嫌。

然而夢醒了，我和他的關係，仍是沒有進展，對這假象，一點快慰以後，又掉進沉思苦思無奈窘困懊惱莫名虛無的感覺。

朋友，甚麼是朋友？
感情，是否那麼經不起考驗？
默契，也是難以通過挑戰嗎？

這個夢告訴我，我還是對他朝思暮想，失去這個朋友，很可惜。
這個他，令我一直所持以豁然的態度，面對這些人際關係，背道而馳…
為甚麼？

為甚麼跟他鬧番，我已經記不清楚，也不想刻意想起。但依稀記得，都是緣於一些無聊誤會。
我和他都是不擅解釋，喜歡「心照」的人，可能因為這樣，嫌隙加深。
我和他都是愛面子的人，可能因為這樣，雙方都不願意踏出第一步。

希望他也有看這個部落，想想幼稚但開心的往事，也許，大家都會覺得，因為小誤會而破壞了彼此的關係，多麼不值得。


********
頭先從某人口中得知你的去向，哎，真係好失望，失望係因為唔係你親口同我講囉
你解釋，但我覺得係藉口囉，哎，曾經肩並肩的戰友喎，friend喎…
送首歌俾你啦：

跌到極麻木　只好相信
又再爬得起　就會有轉機

你知歌名既

********
0314 UPDATE
唔好意思，誤會左你，頭先同佢傾開計，原來係佢建議你咁做，諗深一層，都係有道理的
我唔會爆響口的，但係呢件事，睇怕聽日都通天啦…
喇，搵番個機會，自己宣布，第二個又好似我咁誤會你都唔好啦﹗
留低一句sorry喺度，希望你收到啦﹗

自閉

16 July 2006

繼續自閉
其實咁樣係自己同自己玩遊戲，定係同別人玩遊戲？
定係自己同自己過唔去，定係同別人過唔去？
我真係唔識答，正如剛才對住份GST的文件，腦海裡心底裡掌心裡肚子裡骨子裡，都係無數的問號

頭先返工，搭小巴，因為小巴上冇人，我一定要叫落車
其實我真係好憎搭小巴，架車dirty不在話下，司機又冇禮貌又開得快，我咁怕死…
同埋d乘客咁污wear，感覺唔好
最大問題係要自己叫落車，我已經唔like搭小巴，對佢的路線梗係唔識啦，鬼知邊度落得咩…
同埋大聲叫落車，好煩好尷尬，又唔知個司機聽唔聽到喎，總之就唔知點啦
我d friend個個都知我呢樣野，同我出街盡量都唔揀搭小巴，搭小巴佢地都會叫落車，或者我會叫佢地叫落車，我自己一定唔會出聲
但都試過因為呢樣野，俾佢地整蠱啦，佢地班衰人，詐訓唔叫落車，我叫佢地起身，又話得啦得啦，其實係想我叫落車，但我都係冇叫囉，結果過左個站，去到好遠之後先有得落返，自己攞來搞﹗
因為返工做野，搭小巴係快d，咪搭小巴囉，但我都盡量唔叫落車，等人叫，去到最後一刻，真係冇人叫先叫
如果係平時我自己一個迫於無奈，無可奈何，揀無可揀的情況下要搭小巴，我亦都係唔會叫落車，只會在有人叫落車，又近我的目的地的地方跳車，寧願行遠少少
我係咪好怪呢？

意甲打假波事件，暫時叫塵埃落定，佢地上唔上訴，第日先算啦，就算上訴，得值的機會都唔大
打假波又俾人揭發，咁低，吸引力同可觀性真係有限﹗
始終都係EPL新奇有趣、刺激好玩、驚心動魄、欲罷不能…

哎，好灰，頭先篇野寫好左大半，但突然間ie short左，自己閂左，成篇野冇晒，重新打過
電腦科技，仍然有信唔過的地方
但我還是喜愛狠狠地拍打鍵盤的感覺，看著word文件塞滿無數整齊大小劃一的字體，很有滿足感﹗
不過，科技的發展，使我很久也沒有拿起紙筆，如今，只記得中文字的倉頡碼，執筆忘字

胡思亂想

15 July 2006

唔好意思，本來話今日去你的farewell晚間飲野活動，我仲應承左阿邊個，幫手集齊夜更的同事，點知呢，我冇左件事，真係萬二分對不起﹗
請你願諒我，實在太sleepy
當佢打俾我，我先醒起呢件事，但嗰一刻我約左個friend上我左屋企，我都冇可能掉低個friend走出來，就算我出來，坐一陣你地都閃啦，算罷啦，有緣再聚，希望下次見你，臉上多d笑容
另外，我亦要同阿邊個講番聲唔好意思
你地又係既，見我嗱嗱臨走，問都唔問一句，咁就由得我走左去…
哈，如果我話我遞左信，就來走，你係咪又係聲都唔聲，問都唔問一句呢？

講開笑，我都好似好耐冇開心開懷投入享受發自內心自然地笑了
成日都覺得自己笑得勉強，笑完都覺得自己好假，你會唔會都有同感呢？

well，我的老毛病又發作了，又胡思亂想
其實我可能有妄想症或患上思覺失調，定係患上抑鬱症呢？
我又覺得身邊的人想害我，講我壞話(雖然我唔介意)，有人想剷除我，個個都唔鐘意我…
總覺得周圍有些奇怪的目光，像森林裡的魔鬼或幽靈，以一雙雙藍色的眼睛，瞪著我、凝望我、注意我、監視我
好唔想見人，又想自閉，將自己收埋，就唔會俾人害
他或她的說話，一舉手一投足，總覺得有另一重意思…

現在將事情寫出來，暫時冷靜下來、暫時抽離想像國度，以「第三者」的身份看這件事
的確有點問題

揣摩自己和揣摩別人，也一樣困難

暫時放下煩惱，忘卻現實，投入遊戲機的天地，下回再談

浮躁小魔怪

14 July 2006

今日天氣好熱呀，好辛苦
頭先搭架101出中環，架車都唔知做咩，冷氣壞左就唔好喺街行啦﹗俾你講中左，真係好似做高溫瑜珈，坐喺度咩都唔做，只係聽歌，但都滴晒汗，我強調係，係滴汗，並唔係一般流汗咁簡單，仲有頭暈、眼矇矇的感覺，我諗再stay耐d，我會反白眼、休克、暈倒、不醒人事、失去知覺…
因為太熱了，個人都function唔到，潛意識失靈，快樂小天使，變成浮躁小魔怪﹗

夜晚食大快活，一間我以前一定唔會去的快餐店
不過自佢改image後，又有個招牌至耍家的咖哩豬扒飯，我都將佢列入同大家樂同grade，揀到冇野好揀，都可以去
頭先當然都係食佢個招牌飯，+4蚊有葡萄適，+2蚊有雲呢雪糕，我全部都換晒

放工又去左ok同7 shopping
放咁晏，唔去呢度仲可以去邊買野呢？我諗嗰d阿姐都知我係熟客仔
其中一個成日去買野的原因，係要儲貼紙，今日開始送part 3的麥嘜貼貼，頭先入去ok兜左個圈，咁又擺低錢，拎走的係一小袋野，同兩個貼紙仔

啱啱睇天文台，來緊7日都落雨，正﹗
哈哈，忽然間變左求雨娃娃﹗

今日想share另一首歌，係我最愛的oasis / don't believe the truth / let there be love

Who kicked a hole in the sky so the heavens would cry over me?
Who stole the soul from the sun in a world come undone at the seams?
Let there be love…

I hope the weather is calm as you sail up your heavenly stream
Suspended clear in the sky are the words that we sing in our dreams
Let there be love…

Come on Baby Blue
Shake up your tired eyes
The world is waiting for you
May all your dreaming fill the empty sky
But if it makes you happy
Keep on clapping
Just remember I'll be by your side
And if you dont let go its gonna pass you by

我鐘意呢首歌，所以用佢做接駁鈴聲，大家打俾我都可以聽到
本地樂壇，根本出產不到呢d咁有feel，成隻碟都有主題、有意識，要tell you something的音樂
歌詞，不是隨便塞滿音符的中文字或英文字，而是一篇詩歌
要在香港找，近作只有陳奕迅 / Life Continues / 落花流水合我心意
好耐都冇聽過本地歌手的歌，如今，只聽醫生青一人，其他的，算罷啦
唔使錢單撈都真係咪哂時間﹗

瘀事

13 July 2006

噢，我之前用開個od又發左癲，又要為d日記搬屋，都好煩呀﹗
搵左一個site，d人話信譽唔錯，聽住先啦…
d日記越儲越多，要幫佢地搬屋，真係好大工程
頭先去做gym，真係覺得自己好健康﹗
不過頭先做左樣白野，就係呢，tst間gym要自己帶鎖，呢個唔係問題，但我白痴在鎖左條鎖匙在個locker裡面，結果要叫人剪鎖，好戇居…
講開d低能野，尋日同個friend傾計，佢勁少online架，問我有冇其他人的msn，咁我send俾佢啦，佢問我，阿邊個個msn係堅定流，因為佢次次online，呢個「阿邊個」就會問佢boy? girl? how old? job?
佢同我聽到，當然覺得好古怪啦，阿邊個平時都唔係咁的人
我咪叫佢，下次見到「阿邊個」咪話自己係女囉…
後來講左一輪，我問佢：你add左個email address，係@msn.com定係@hotmail.com架？
佢先恍然大悟，原來add錯左，一個美麗的誤會
好好笑，好低能﹗
今日天氣真係好熱，好難頂，企喺度等車都會滴汗
其實我真係唔知點解我會咁怕熱，我成日同d friend講，我冬天出世，所以怕熱掛，亦可能因為相同的原因，我真係好鐘意冬天架﹗
今日放假，避過一劫，唔使咁熱出去跑
今日放假，避過二劫，好似好多單大野
今日放假，避過三劫，可以大覺訓到日上三竿，其實，三竿已經係小兒科，我通常係會訓到日落黃昏﹗
希望聽日唔好咁熱啦，我會溶架﹗仲會滴汗…
大熱天時，最好返公司，舒舒服服，但邊有咁旬丫﹗

利賓納

12 July 2006

返夜一向由我check assignment，之後將返工的人名貼在白板上之前，其實都係5月同6月的事，返夜的有do re me fa so，陣容鼎盛，大家又玩得，成日都有do re me fa一齊返工，食飯時熱熱鬧鬧，好開心
但係呢，走下一個，走下又第二個，而家得番do re me，食飯都話要分兩輪食，好冷清，心情唔好，倍感失落
唔知走走下，會唔會有第三個呢，第三個會係邊個呢…

********
頭先遊網，睇到一個bloc，有這樣一段：

地點：茶餐廳內；時間：午膳；人物：茶餐廳伙計（伙）、豬屎（屎）

伙：「餐飲要咩呀？」

屎：「凍利賓納丫唔該。」

伙：「即係凍檸賓啦…」

屎：「唔係，係凍利賓納…」

伙：「即係凍利賓納走檸檬啦…」

屎：「唔係，利賓納係無檸檬架，我要凍利賓納。」

伙：「咁即係凍檸賓走檸檬啦！」

屎：「如果我想飲可樂，落order 時會唔會話要凍檸樂走檸檬呀？咪係講要可樂！」

伙：「咁你要咩野賓呀？」

屎：「凍利賓納！！」

伙：「頂！咪即係凍檸賓囉！您落order 話要凍利賓納，就即係話要凍檸賓架啦！」

屎：「頂！咁我落 orber要杯凍茶，你會唔會比杯凍檸茶我呀？究竟你知唔知利賓納係點架？」

伙：「咁即係點呀，凍檸賓定係凍檸賓走檸呀？」

屎：「總之我要凍利賓納，利賓納就無檸檬架啦！你唔識就叫其他人泥同我寫！」

伙：「癡線架~~~~」邊行邊鬧

亦在網上睇到一篇報道

黑加侖子減產
利賓納仔仔要收山？
【明報專訊】全球暖化威脅英國黑加侖子的存亡，孩童至愛飲品利賓納隨時停產。利賓納生產商葛蘭素史克為此急請科學家研究，培育出適合在英國日趨和暖的冬天裏繁殖的新品種黑加侖子，兩款新品種將於明年推出。不過科學家仍難保證英國日後的黑加侖子「貨源充足」。
製作利賓納的黑加侖子，有 95％是英國種殖的。但隨著二氧化碳排放增加令冬天暖和，黑加侖子的產量日少。由於因霜凍有助令黑加侖子灌木冬眠至春天，倘這情況不出現它便會過早發芽，令產量下降和成熟期不一。假如黑加侖子絕跡英國，可能要從俄羅斯和波羅的海入口。但葛蘭素史克堅持選用國內的黑加侖子製利賓納。「我們絕不倚靠外國入口，因難以保證它的味道和維他命 C含量。」

well，我有幾鐘意飲利賓納，你知架啦，早幾年出方便裝，可以隨時隨地飲到，真係偉大發明
頭先個人在茶餐廳的遭遇，我都試過好幾次，呆左囉，我同人講，人地當我笑…
同我相熟的你，一定聽過我講細個d百厭野，屋企有濃縮橙汁、利賓納等飲品，我會好似食枇杷膏咁，一匙匙攞來食，你一定有話過我變態
哎呀，如果佢真係停產就大鑊
我開心唔開心，都會飲利賓納，佢己經成為一個習慣，冇左佢，忽然間會覺得人生少左d野，周身唔聚財
正如我另一個習慣，唔開心就會飲可樂

高調

11 July 2006

諗到一個比喻，形容採訪的工作

一群少不更事，又為食的小孩子，圍住一個慈祥的老人家，嚷著要糖果
老人家從口袋中掏出糖果，心想以這些快將變壞的廉價糖果，打發這些麻煩的孩子，但又能在他們面前留一個好印象，滿足地離開
小孩子也以為得到的糖果是寶，滿足地離開
最初大家都以為各取所需
老人家在回家途中，爪爪口袋，發現那些快將變壞的廉價糖果仍在口袋中，他才醒覺剛才派給孩子的是高級朱古力，發現「捉蟲」了
其中一個孩子取得朱古力，已急不及待，怎料，是苦的，將高級朱古力吐在地上
其他孩子見狀，當然沒有吃，一臉失望的表情
其中一人提議，將朱古力賣給街邊的士多老闆，換點喜愛的糖果也好，換冰淇淋也好
老闆見到是酒店的高級朱古力，每個小朋友送了一個大波板糖和一客三色冰淇淋
小朋友和老闆都很滿足

********
我做過high profile的人，做過潛人，叫咩都試過
但係呢，只要有人唔鐘意你，你高調與否，都可以成為談論對象
在一班唔係咁熟的人當中，我而家會做中調人，唔可以太潛，因為會冇人理，但唔可以太高調，因為會惹人反感，亦會冇人理
不過在friend面前我又係咇呢巴啦，好嘈﹗

********
係咪同你有d誤會呢，我聽到一d傳聞，well…
誤會有好多類型，例如係誤以為對方唔妥自己、誤以為對方鐘意自己、誤以為對方想「扇」自己或對自己構成威脅，總之誤以為對方一些東西…
簡單d來講，就係有心病
俾著以前，我一定唔理三七廿一，會即刻搵你去食飯或飲野，三口六面問清楚
係誤會又好，係事實又好，得個知丫
試過咁樣，有人兜口兜面話：「係呀，係真架，我唔妥你」
我即刻變臉，從此冇同呢個人講野
亦試過因為咁，有人直接了當話「係呀，我係鐘意你」
不過我冇俾機會呢個他，最後佢接受唔到，連朋友都做唔成
亦試過透過對話，消除了誤會，經過此事後大家更了解對方，成為更深交的好友

好像失敗多，成功少
其實講真，同你真係唔係咁熟喎，我唔知你會咩反應，如果你話你真係唔妥我，我仲要成日對住你架喎，點算，搞到我好似好難相處咁…
所以暫時都係不了了之算了

攞唔到譫養費，都要攞番個名份

10 July 2006

尋日去左你個farewell party，哎呀，我真係好眼訓︳之前成晚都冇訓過，訓唔著，唔知點解，但唔係掛住你喎﹗我諗係訓之前食左幾粒有espresso的朱古力，都係d咖啡作怪，結果聽左成晚歌，越來越愛oasis﹗結果日抖咪lai晒野啦，勁眼訓，好在係返公司，唔係好繁忙，但係呢，冇訓過，成身都緊晒，好想有人幫我揼下骨
雖然尋晚係你的party，你係主角，但cue到的bite，是日金句唔係屬於你喎
係咩？咪就係「攞唔到譫養費，都要攞番個名份」啦﹗
知之為知之，不知為不知，正如你地所講，唔會駁番料俾人喎﹗
well，其實真係實在好眼訓，個人都唔係好清醒，日日啪一支葡萄適都係好夠，所以呢，初段比較牛豆豆，到後段唱下歌，d眼訓鬼走左，先醒番d，猜下枚，呃酒飲，嘻
原來佢係女中豪傑，真係呢，未見識過都唔知，好勁﹗
唱到5點9，天又光晒先走，真係好癲呀，今晚又睇波，希望聽日1500返公司聽答問大會啦，一來唔使出去跑，天氣咁熱，單單都係去d大酒店記者會或專訪就話啫；二來可以著靚靚返工，因為佢話我著裙好靚，叫我著裙喎；三來呢，其實最緊要的係聽呢d野，可以恰眼訓，嘻，唔好報寸呀﹗
好在，返埋聽日，放2日假，最多又昏迷架啫

講開報寸，我懷疑某人向阿邊個講過d野，我有怨氣都知，好以得幾個人知之喎…
係咪你，係咪你呀？係就人少少認左佢啦，老老實實同我講，我會願諒你，但如果俾我自已揭發的，你估下有咩後果囉﹗

頭先你話我知車仔件衫有得訂喇，衫+字+章盛惠700幾
哎呀，今季好多隊都換衫，邊買得咁多件呀，我諗我只會買我最愛的車仔，最多咪買埋利物仔囉，但只限主場，熨字呀，我諗no喇，熨得來不如買多件衫作客啦﹗
其餘的，留番季中或季尾先買來儲

世界盃決賽正進行如火如荼﹗

今日搬左屋，原來我唔覺唔覺，都有好多雜物
希望快d適應新居啦
哈哈，你明唔明我講咩呀？又係嗰句啦：知之為知之，不知為不知

好眼訓呀﹗
但都會捱埋落去，我覺得自己好crazy囉﹗
過埋今晚，我諗我三日內都訓唔到8個鐘，同放一日假，訓12個鐘以上，差好遠

頭先諗左一條橋，傾掂數先公開啦
不過可以講的另一條橋，之前諗落的，就可以講的
話說harbor city有句宣傳slogan「一個海港，只有一個海港城」
我幫佢諗左佢做expansion的宣傳slogan：「海港兩面，都有海港城」
唔好抄我呀，你幫我做見證，呢句說話係我諗的﹗
佢曾經話我都幾creative，好多諗頭，多謝多謝，不過咁又講得冇錯喎﹗

場波好悶，1-1，會唔會打加時呢？

哎，言之無物，唔講喇﹗

噢，法國輸左，真係好邪囉，自進入淘汰賽階段，有現場睇邊場，捧嗰隊死嗰隊…
好呆﹗
我對法國同意大利都冇咩特別偏好，但因為過去一屆英超，對henry改觀好多，睇車仔，睇makelele同gallas，原來不知不覺間，已默默地支持緊法國
加上意大利成日踢悶波，有靚仔都爭唔落
哎，見到makelele喊，真係好心酸…

今日都係你的farewell party
呢排好多呢類的活動，係，有得一齊玩係開心，但係百感交雜，同d人friend左，又要分開，又要識過第二d「新成員」，互相摸索一輪，熟落了，又離開了，像是一個沒完沒了的循環
老實說，分開了，反而忘記了對方的缺點，記得的，都係開心難忘的回億、美好的一面
同相見好，同住難有異曲同工之妙
其實，好多心裡面覺得同佢好friend，最深交的朋友，竟然有部分係不在身邊的人，在地球某一角落的他和她
知己，是君子之交，不需要多說話
咁會唔會有小人之交呢？不曉得﹗
你個飯局我去唔到呀，你唔會介意的，我相信，大家都識左咁耐啦，數數手指，原來已經十個年頭，但當年一齊打波的日子，一齊挖苦某些人，好似係尋日發生的事
記唔記得，「俾個五我」、「俾個十我」？呢d係我地的語言
祝你在日本同新加坡有愉快的生活，記得得閒睇下我個bloc，on多d line啦，同埋手信呀﹗
本來你地話出去飲野吹下水加睇波，我放工後join，但打俾你地，結果決定上我屋企打牌加睇波
阿邊個勁衰囉，問一人分配到幾大喎，我屋企係咁細架啦，點丫？我個電視都係細呀，咁點丫？唔好睇囉，結果你咪又係在軟臥訓左…
但係咁耐冇見，仍不改寸人的本色
打牌，好耐都冇打過，你過左去，又少隻腳…
等你返來打牌呀﹗

呻

7 July 2006

我唔開心，你見到嗎？你知道嗎？
現在講得咁白，我唔開心呀，希望得到被關心的感覺，希望得到你一句溫暖的問候
你也許會問我因咩事唔開心
哎…
我唔會喺呢度講，你問我先答你，希望你俾個機會我呻下啦，唔使喺度自言自語

我今日見到自己，覺得呢個人好飄忽、好情緒化、心情大起大落
為好少事好開心，大笑一餐
但眨眼間又變臉，靜得嚇呆人
還有時扮作若無其事
搞甚麼？

預訂左的playlord恤衫到手了，不要問我做咩抽住袋男裝恤衫成日，無可奉告﹗

心情好複雜，思緒好混亂，好多野想講，但心情唔好，都係唔講喇

********
靈魂被抽乾，冷冰冰的我如封存在凝固了的空氣中
螢光幕的激烈打鬥，投射在兩個沒有轉動的瞳孔上
雙腿往泥土陷進去，長出樹根…
還未能掀開臉上的愁雲慘霧，倒不如活埋在混濁的大氣

凡事都有兩面

6 July 2006

原本諗住返去訓覺，跟住起身睇波，沖完涼又唔眼訓喇，結果又係遊網…

今日撞到你地眼中好討厭的他，他主動同我打招呼，面帶笑容
雖然我唔識睇穿人心，但一個簡單的招呼，真心定假意，惡意定善意，都尚可明辨
之後仍有機會同他接觸，他做野都幾認真，可能他有時d語氣唔係咁好，未必咁有禮貌，其實好多人都係咁架啦，而情緒化呢d野，好多人都會，我有你都有，不是他的專利
他會唔會俾人針對？
你地話他鐘意攬d野上身，你的角度咁諗，他可能真係出於好意，全情投入，也未可知
我忽然間諗，他真係你地眼中咁差咩？
其實我都冇真正接觸過他，唔係話唔信你地呀，但如果就憑佢地的片面之詞，就認定他真係咁差，會唔會唔公平呢？
我盡量都唔做嗰d是非製造者，但如果參與其中，我覺得我唔可以獨善其身…

睇到呢度，如果講中左你，或者講左d野你唔啱聽，你首先唔好嬲住，睇埋落去

我只係想客觀地分析事件的正與反，分析呢個他
他得罪過你甚麼，我不知道，我沒有經歷過，所以未能同你感同身受
如果我冇同你有同一遭遇，而我又表現得同你感同身受，我會覺得自己好假，你都會覺得我好假
基本上我對他，他對我係好green，一張白紙
你地在我的腦海裡，替他填上黑色、灰色等不光彩的色調，令我一度對他的印象負面
現在，醒覺了，又變回一張白紙，只有我自己才能為這張紙，填上顏色
正如你，原本也是一張白紙，我自行在上邊塗鴉

我以前也曾經成為別人談論的對象，別人也為我畫上不討人歡心的色彩
結果我要花兩倍的氣力，糾正別人對我的誤解
所以，我告訴自己，如果聽到別人的壞話，我不要自己成為那些只聽不問，未了解真相卻以為自己明瞭一切的無知的人
壞話，聽過就算，我仍會嘗試接觸、了解這個人，有需要時，不對勁時，小心一點就夠了

當時人總覺得自己沒有問題，但是經常被人談論，始終反映了一些東西
慶幸，有說真心話的朋友，指出我的不是
原來，我太嘈、我太串、我成日黑面、我成日傻笑、我感覺太大家姐，好似咩都要話事
哈，原來係咁，改，我有改善，收歛一點，但大原則不變
嘈？其實我都有文靜的一面…
串，改了，我會單打別人，不過通常只有熟落的朋友，才會有資格受我呢套，可能唔識我的人，看在眼裡，將沒有惡意的事，看成壞事
黑面，只不過是喜怒全形於色，只看到事情的一部分，並不是事實之全部
大家姐，點講好呢，大家姐會照顧人，可以自己照顧自己，呢一方面，有冇諗過呢？凡事都有兩面﹗
而係咪真係咩都要話事？我最討厭d優柔寡斷、咩都話冇所謂的人，你唔決定，咪我做丑人，我做決定囉，定左又唔鐘意，又要挑剔，咪即係有所謂囉，又唔早出聲，真係難服侍…

當一個人討厭你，可以將你的缺點無限放大，同時將你的優點看成缺點
正如你喜歡一個人，他的缺點都是優點，缺點，都有可愛的地方
道理同出一徹

你地同他的過節，我不想多問，不過你講，我會當聽故事，聽了就算，唔會影響到我
他被人批評得體無完膚，我相信，他也有某程度上的問題
我諗，只係我未睇清楚
有幸有得揀的話，我真係希望可以獨善其身
我同你地玩開，當然唔希望因為呢個人，影響我地之間的感情，但如果他真係咁衰，你地都唔想我同你地一樣，俾他「扇」鑊甘啦，所以尚算清白之身，保持一個良好或中性的關係，才是上策
我唔想得罪任何一方，你明唔明呀？

********
唔經唔覺又3點了，係開波的時間
聽日大鑊了﹗

中毒

5 July 2006

頭先同d同事，其實好多都係舊同事，飲野睇波
佢地都讚間cafe得喎，可以再去
但後來去左打邊爐，連玩兩個地方，真係爽﹗
哎，好邪囉，支持邊隊死邊隊，本來諗住英格蘭同荷蘭相繼出線，即係離開左條線，咪支持下隊我又識識地，曾經都係至愛之一的主辦國德國，畫晒花面貓捧場，已經踢到加時，但守唔到最後一分鐘，加時臨完場時俾意大利一分鐘內連入兩球，真係呆晒…
頭先落車時落雨，好在沿路都有瓦遮頭，都黑唔晒﹗
其實返到去，都係清晨六點左右，就算係平時，好多時都未訓
之後都係要黐埋部腦度，online，雖然d人閃晒，但我好想開下部腦，無聊野睇一餐，其實都冇咩特別野，但都要寫下od寫下bloc
well，所以你會發現，今日個bloc的update時間，係5號早上8點幾，但其實我由4號晏晝兩點左右起左身，直到而家都冇訓過了，上網啦，行街啦，玩啦，食野啦，講野啦，睇波啦，好忙呀，不過，全部都唔傷神的
總之好似中左網毒咁，唔上網唔開心，唔上網唔舒服，成日心掛掛
只要有少少時間，出街前明明得15分鐘，都要開下電腦，睇下咩人喺網上，只係夠時間同人講一句hi同我出街喇，我係都要上下網，係咪好無聊呢…
哎呀，我係咪自閉症呢？係咪思覺失調呢？係咪太過寂寞孤單呢？成日都對住個bloc自言自語無病呻吟自吹自擂吟詩作對風花說月賣弄文采…

頭先喺間cafe玩隻鱷魚牙醫，玩到natural high，好搞笑，其他人都覺得我好搞笑
我的格言，係醫生青其中一首歌的歌詞：認真地玩，更好玩
我平時呢，嘻嘻哈哈，最認真莫過於玩，玩呢，我就最貪玩，玩的時候，我會全情投入，玩得夠放，我又玩得開心，同我一齊玩的人，亦會受我感染，既然有氣氛，亦會玩得更開心
成日都會有人話，見到我，唔使玩已經覺得樣野好好玩，見到我，就算唔玩樣野，但見到我咁開心都已經好開心
有時d過山車、海盜船，明明玩過幾十次，驚極有限，但我都會盡情地大叫大嗌，咁先好玩架嘛，咁先可以感受固中真正的樂趣﹗
哈哈，你可以話我傻，我直認不諱

********
你呢番說話我會記住，我會檢討一下，係咪我有問題
我唔係嗰d意見接受，態度照舊的人，你知架﹗
首先我會分析一下，你講出呢句說話的原因、動機、背景、心情指數
我會再衡量下，我做呢件事之前，係咪真係深思熟慮，定係意氣用事
再研究一下自己聽過你呢番話後情緒上的變化
老實說，心裡係有d酸溜溜
老實說，如果唔係覺得自己理虧，根本唔會有呢種感覺
我諗，你應該講得啱
下一步，我會仔細思考一下，點樣作出改善
你知我架，我一定會積極地面對的﹗
放心，不會有下一次﹗

********
哎呀，我搵唔到我要嗰件德國衫呀，德國主場係有，但係得成人版，我真著唔到囉，咁無謂賣件衫擺丫
因為都係addidas出品，我買過AC的落場版，大人細碼
託賴，件衫紅黑直間，襯d賴屎褲或短褲，一身oversize打扮，都還可以
但係呢，德國件主場衫，白色架，又長lai lai，勁似睡袍，冇行啦，放棄啦…
不過，睇完波，輸左喎，最多都係得個季軍，慳番啦﹗

單眼皮

4 July 2006

曾經有一個朋友話我，成日將自己收埋，佢建議我可以講多d自己野俾人聽，講多d自己心裡面的感覺、背景等，等人可以了解下我多d
其實我真係有聽佢呢個建議，如果唔係我都唔會喺度寫bloc
但係，我都係只係去到寫bloc，如果要我兜口兜面同你講心事，真係好奇怪呀，我唔慣…
而呢度講的，好多都係我的往事、我的價值觀、待人接物的態度，有心人識得喺度睇就夠啦﹗
有d野，唔使講得咁白
同埋寫出來呢，可以盡量將自己抽離，好似我寫小說咁，當係寫人地的故事，冷靜d，一邊寫可以一邊分析件事，又可以比較有條理地講故事
因為如果講出來，我可能思緒好混亂，聽我講故事的你，要即場感受我d跳躍式思考和表達方式，可能都會幾辛苦﹗
同埋可能當時好激動，或者講到百感交雜，喊左出來，你可能會誤會我唔想講，又或者唔想我諗d唔開心的事、唔想我喊，叫我唔好講落去，咁咪唔詳盡囉，講得唔暢快
而經歷過一次，朋友都唔會再叫我講呢d會令我喊的事…

今日得來的回覆，聽晚的睇波團，只係得幾個人去，真係有少少唔開心，原來我的號召力咁差…
初初仲好樂觀，以為好多人去，打電話去d cafe問包場，而家唔使煩啦，得幾丁友
哎，以後唔約人呀，又要煩又要剩，吃力不討好﹗

其實你覺得我係點架呢？乜我唔係好串好cool架咩？點解行街時咁多人搵我問路？我似係地膽咩？我似係樂於助人咩？我似係親切友善咩？真係好古怪
講真啦，有時真係會覺得好唔耐煩，我會回應一句「搭的士啦﹗」打發個人走，我真係試過架，俾個friend話我，咁樣係咪真係好衰呀？你聽到之後，會唔會對我扣晒分？

如果你有留意我，你有冇發現我係單眼皮架呢？
試過因為咁，俾人誤會係日本妹同韓國妹，感覺好搞笑
有一次係咁樣的：
女人街係其中一個遊客觀光的熱點，有一次我閒日喺旺角行街，經過女人街，睇到有d擺設幾過癮，咪停低睇下囉
當時係夏天，我一身的裝束呢，係短裙仔加k2粉紫色deep v背心，髮型係留海one length，染左一頭半啡不金，我唔覺得自己特別似日本妹囉…
我揀d野啦，個阿姐sell野啦，我如常地扮聽唔到啦，佢話幾多錢，啱就計平d，我一樣係冇反應繼續自己睇野，佢同隔離個阿姐好大聲咁講：「呢個日本妹來架，講野佢都唔識聽」
我心裡暗笑，但我當然冇理佢啦，我亦冇反駁或者即刻開聲寸佢，算啦
其他的都係有人指指點點，同隔離個人細細聲話，丫嗰個係咪日本妹？定係韓國妹呢？但佢隔離d人係香港人來架喎
點解我似日本妹、韓國妹，又會搵我問路…
哈哈哈哈﹗
你問我鐘唔鐘意單眼皮呀，冇咩所謂喎，既然天生係咁，咪就係咁囉，不過有時唔夠訓會變成雙眼皮
但有時都會覺得，單眼皮好似唔夠雙眼皮精靈，有諗過割雙眼皮架，但又好似好危險，割得核突咪大鑊…
記得曾經有相士贈過我兩句，話我對眼呢，桃花眼，好在係單眼皮，異性緣好，而呢d桃花又會幫到我，反而如果我雙眼皮的話呢，水汪汪過頭，桃花太多，有孽緣，犯桃花劫…
哈哈，咁都得﹗
咁我諗番，桃唔桃花眼我真係唔識分，但係呢又真係我自細在男仔堆中長大，咁係咪就係有異性緣？好似自己穿鑿附會…
我在家中係大家姐，有三個細佬，一個細我三年，另外兩個係孖仔，細我8年
個個friend都問我，我爸媽已經有一仔一女，湊夠一個好字啦，係咪意外得到佢兩個架…
我鬼知咩，我又唔係呢埋喺我媽床下底…
anyway，屋企6個人，三個細佬，阿爸都係男人
我同我媽的關係，一向都唔好，識我的人都知架啦，如果你唔知，第日得閒再講你聽
咁我爸得我一個女，錫我都好正常，咁邊個錫我，我黐邊個都好正常啫
我細個同我最大個細佬同房，上下隔床，夜晚唔捨得訓，會成日同佢傾計，試過用由紙杯製的「通話器」同佢細聲講大聲笑，因為掛住傾計唔訓，俾阿媽滕條燜豬肉，更加試過唔少
我同呢個細佬，經歷過好多野
因為嗰兩個細佬相差得遠，太細，阿媽要睇住佢地
我同細佬返學，以前住村屋，行一段路先返到學，會經過其他村屋
住村屋養狗好正常，好多時d狗好惡架，不過我養的好乖，但有關我隻狗的事，第日再講
佢得小學一年班，我小學四年班，以前學校邊有locker架，d書又鬼死咁重，我同佢兩個，一人揹住一個大書包返學放學，仲要俾狗追，諗起就覺得慘，不斷問自己，點解其他人唔使經歷呢d，但我同佢就要？
大個後更加發覺，阿爸阿媽好縱兩個細細佬
係可能年代唔同，唔可以再打打鬧鬧，但我同佢都只係差8年啫，真係相差咁遠？
佢兩個而家已經中四，升中五了，但都仲好細路仔，好唔懂事，成個bb咁，我真係睇唔過眼
以前同住時，我會鬧佢地，話佢地唔明事理，用好刻薄的說話同佢地講野，例如係「你咪唔好讀書囉，如果唔係，個個都讀書咁叻，邊有人去擔泥，邊有人去掘路，邊有人去做地盤，邊有人洗厠所…」
佢地會醒覺一陣，但唔使好耐又會打回原形，都係唔識為自己打算，唔識為關心佢的人打算
而佢兩個細個時，我要幫手餵奶，幫佢地換尿片；阿媽去買餸，我要在屋企睇住佢地
，我覺得我連阿媽嗰份都做埋，所以你問我鐘唔鐘意小朋友？哈，咪玩啦，人地的細路，喺街見到d細路，玩一陣咪得囉，但我真係冇愛心，我會玩到佢喊，喊就俾返人，其實都幾冇良心…
玩人地的細路已經係咁，同埋我細細個已經歷過湊仔呢d痛苦，你話我會鐘意細路，咪玩啦﹗
其實我唔鐘意佢兩個的，細細個開始已經係咁
尤其係d同學仔朋友仔不論約我去玩定係去圖書館做功課，我都係要好唔好意思地推卻，但心裡好想去…
同學們都仲細，未必明白我的苦衷，只係覺得我好奇怪，次次約我都唔去，漸漸地漸漸地，失去了一些朋友
呢d經歷，冇感受過的你，你明唔明？
我幾乎可以話係一個冇童年的細路
而讀小學時，因為我要練歌同做prefect，要早返或遲走，佢都要同我一齊早返同遲走，其實佢夾在中間，都好慘，下有兩個細佬，我知阿爸唔錫佢，其實佢都好辛苦
人地d小朋友，佢d同學仔，日日都有阿爸阿媽接返學接放學，佢冇，我諗佢有唔開心，有因為咁自卑過，但又可以點呢？
其實好多老師都話過，佢本性叻過我，但佢比較懶散，多次囑咐爸媽多d栽培佢，佢會叻過我(PS：我已經好叻的了，唔使溫書都已經在學校裡名列前茅，不過只限中英數，因為呢d係靠領悟，唔使讀，而要讀的社科健，人地考100分，我得90幾架咋，因為讀就識，唔讀唔識，而我呢，就係唔讀囉，憑記憶﹗)
哎，佢地邊有時間呢，阿爸係d大男人的人，阿媽又要睇住兩隻豆丁
佢讀到form 5冇讀，讀唔上，出來做左一陣野，而家讀返ive，邊讀邊做parttime
老實講，我地兩個由細到大，都係俾人忽略，尤其係佢，冇學壞，仍然咁孝順都已經偷笑，仲有邊個會奢望佢有咩突出的成就？
如果嗰時d老師講的係真，係咪好可惜呢？佢記唔記得佢曾經有咁高的評價呢？佢又點諗呢？不曉得
哎，講屋企的事，係我的死穴，每次都會講到喊…
不過我喊，唔代表我唔想提或唔面對，而係覺得好感慨，好感觸，好可惜
總之百感交雜﹗
家族中，我只有一個表哥和一個表姐，但佢兩個好細個已經移民，我都冇得同佢地玩
既然佢地不在身邊，我自然地成為「大表姐」，大家覺得我大家姐的性格，同呢個背景，有莫大關係
我的表弟比表妹多，所以又係在男仔堆裡玩
老實說，我細個玩的，係搖控車、lego、bb彈槍、用雞毛掃同滕條扮大俠武劍等
我係有幾個毛公仔，我記得我好細個時生日，收過一隻高過我的傻豹，但後來唔知去左邊，可能我唔同佢地玩，佢離家出走
barbie，我未玩過架，你會唔會覺得好奇怪呢？
試過去同學仔的屋企，一個女同學來的，我地都視對方為好朋友，佢拎佢珍而重之的barbie俾我玩，我一拎起就係扯佢d頭髮，狠狠地除佢d衫，除晒佢d衫，同佢玩一字馬，又同佢玩拱橋，仲要將佢d手手腳腳反方向屈過去，我當場整喊左呢個好朋友
點解我咁樣對個barbie？男生的野性掛…
男孩子的你，你有冇曾經咁對待過barbie？
我一直都讀男女校，朋友裡有男有女，但我覺得最friend的，都係男生
d女同學覺得好奇怪，呢個女仔係咪發姣，成日黐埋d男仔度，其實好多女仔都唔鐘意我，而我呢，既然佢地唔鐘意我，我梗係唔同佢地玩啦，久而久之，男仔friend越來越多，更多女仔唔鐘意我，其實係一個惡性循環
讀書時我咁多話柄，呢個都係原因之一
當然我同d男仔玩得咁埋咁friend，亦鬧出唔少誹聞，咪就係拜d無聊女仔所賜囉…
講真啦，我冇野架，我同佢地friend咋，咁佢地有冇野呀，我唔知呀，我唔會刻意去find out，如果係鐘意我，咪同我表白囉，我自然會話俾你知，我想同你拍拖定做好朋友、做紅顏知己
呢d緋聞的case真係數都數唔晒，我成日都俾人傳，你話我係咪好靚？咁我又唔係最靚，靚到dum一聲嗰d囉，但我始終有我吸引人的地方
當然有試過有人表白，我最後同左佢一齊，有人我拒絕左，做得番朋友的又有，做唔番朋友的都有
講真啦，因為咁同佢做唔成friend，我都覺得幾可惜，佢呢，做朋友真係一流，但無奈，我真係對佢冇feel嘛，咁佢又睇唔開，我都冇辦法﹗我搵返佢，開解佢，佢又覺得有機會，咁無謂誤會啦…
我唔會好似其他女仔咁，同個男仔friend d，或者有個男仔主動同佢講下笑，搵埋佢一齊去玩，就諗人地係咪鐘意自己，哎呀，咁樣真係好煩，咁多野諗，邊會樣樣事都咁複雜？做人簡單d唔好咩？
不過除左女仔，我都識得有d男仔都係咁架，真係大鑊…
男同女，唔一定要發展成情侶關係，係真架，係得架，做到朋友，大家互相關心、互相扶持，唔一定係想同你上床或者要同你過世嗰種感情

其實我唔知係咪每個人，都會經歷性別角色的疑惑
我曾經覺得自己成日同男仔玩，淨係識同男仔玩，我會唔會係男仔來架？
我會唔會唔鐘意男仔，我會唔會係lesbian？
後來，證實我係鐘意男仔，係異性戀者，不過性格較為男性化，所以呢，大個左，學做社會教化中的女性，著下裙、化下妝，玩多d「女性」的玩意，接受d女性化顏色的衣服等
其實我真係唔鐘意d粉色架，你見到我返工d衫，粉紅、粉紫咁lady，其實我好唔like呢d色架，不過，我天生麗質，著咩色都咁靚，返工，咪當制服咁著囉，咩顏色我唔care

聽左我講咁多，有冇了解左我呢？
我同你印象中，會唔會好大出入？

********
哎呀，唔知點解又唔想訓
自從病好之後就係咁了，夜晚唔想訓，放假訓一陣就自己彈起身，但刷個牙，食d野，轉個頭又覺得好累，好眼訓
哎呀，係咪有病呢？

一式兩件

3 July 2006

剛才又瘋狂購物，買了很多東西，但因為沒有現貨，付了款，所以帶回家的只有少部分
我又發揮快速揮霍的本性，同款的襯衣、半截裙，同款不同顏色，不加思索：「兩種顏色，要我的size」
家中同款不同顏色，有一式兩件，或一式多件的，除了襯衣、裙、T恤、西褲、牛仔褲、鞋…
數得出的，都出現過
衣櫃裡排出不同顏色的陣容，仿佛是一間小型店舖
陪伴我購物的朋友，總覺得我奇怪，我卻認為沒有問題
你覺得呢？
剛才走進各店舖，售貨員似乎意識到我會大肆花錢，熱情招待，心情極徍，我也非常受落
現在還欠德國主場童裝球衣，但恐怕要在四強決戰前找到，也不是太易，明天去看看﹗

********
你會唔會覺得我嘈喧巴閉呢？
最近覺得有某人好似唔鐘意我，可能我呢d咁熱情的人，唔係個個都受得住啦，但我又深信，同我夾到，又或者buy我呢套的人，我可以同佢做好好、好好好要好的朋友
如果你唔鐘意咪算囉，我自問唔係要討好所有人，做d咩世界女，我又唔係要同所有人做朋友，做唔成朋友的，咪做個過客囉，大家知道大家係邊個咪算囉，見唔到你我就會忘記你，我相信你都係一樣
我唔會覺得可惜，而你既然揀左係咁，我諗你都唔會覺得可惜既
但我仍然會keep住呢個character，繼續同頂得我順的人交朋友，識我熟我的人，會好清楚知道我係一個點的人，我真誠、直率、不造作、不記仇、爽朗，但有時係癲癲得得，有d任性咁啦，了解我的，會知道這是沒有惡意
我將我最真實的一面和盤托出，不論優點和缺點，都赤裸裸地展露於人前，如果你認為咁都唔能夠得你歡心，我都講過啦，算罷啦，我仍有好友一堆，多你一個唔多，少你一個都唔少
不過，如果你想同我講番野，同我做番朋友的，我呢一刻係welcome的，不過我又唔係嗰d呼之即來，揮之即去嗰d喎，我都好有性格架﹗
老實說，我都唔記得點解你唔理我lu，何時開始？咩事係導火線？唔記得了，正如我所講，我唔記仇，唔記得就算，我不會深究點解，我可以特意翻日記，找出所為何事，但我不會這樣做
哈哈，你記住就係你小器﹗
算啦，既然你都唔理我，我諗你都懶得睇我呢個bloc，我都係廢人講廢話…

********
哎呀，原本應承左她打電話俾他，我唔記得左呀，唔好意思，我聽日會搵下佢，幫你同我自己串下佢﹗
今日開始吹雞call人去睇波，希望大家撐下我啦，俾俾面，唔好搞到我約人，好冇號召力咁，我會好sad架，咁我下次就唔會再做呢個渣雞人架喇﹗
而家問左幾個人，都幾順利，希望多d人加入啦，大班人開心d
喂，呢個責任交左俾你，你聽日幫我在公司叫多d人去喎﹗
唔，聽日要去做下gym先，俾左錢唔去，好唔抵架嘛…
但又應承左返屋企食飯，又要去搵件德國衫仔，但起身可能已經三四點，點算呢？d時間好似好唔見使呀…
早d起身？咪玩啦，放假都要辛苦自己？真係冇可能啦﹗
之前好多人都問過我，我自己一個人住，唔悶架咩？講真唔，一個人住真係好free，幾點返屋企，做d咩，睇電視、上網玩到幾點、返唔返屋企食，使唔使留飯留餸，唔會俾人哦，真係爽
我在屋企好多野做架，好似而家咁，狂上網寫bloc，真係好多野想寫低，放工返到屋企，睇波睇tv，唔係好多時間寫，寫得唔夠暢快
online又有好多想見的人想同佢傾計，咁又用左d時間
執下野、試下衫襯下聽日返工或去街的衫、聽下歌仔，上網搵下自己野，幫人搵下野，又搞一排
有時又整下野食，雖然款式簡單，又唔算特別好食，但都要時間架，食完又要洗…
屋企幾十隻跳跳虎，我的愛人來架嘛，要同佢地傾下計，談下心
而且佢地仲係小朋友來架咋，又要同佢地玩，有時開冷氣開得太凍，又要幫佢地著衫，佢地d衫仔污糟左，又要幫佢地換衫洗衫，一個人照顧40幾隻大大小小的虎仔，仲有佢個friend winnie the pooh呢，哎呀，真係好忙…
其實之前買左好多碟、堆積左好多足球畫報，真係唔得閒睇，winning 10都擱在一旁，真係好浪費呀，點算？
既然係咁忙，有唔夠用的時間，點會悶呢？
不過，你講得啱，如果病時，就唔想得自己一個拱，好慘架，連煲水都要自己來，叫左外賣都要自己爬去開門，總之要自己照顧自己
病得嚴重d，暈左死左都冇人知…
不過，我由細到大都好獨立，一年都唔會病好多次既，呢d小兒科，難唔到我

死

2 July 2006

每逢生病，都感都生命受到威脅。
老實說，我是一個怕死的人，有一回塞車，旁邊是一個運送石油氣的大缸，因為擠在馬路動彈不得，仔細看到運氣車每一個細節，LPG易燃物品、如遇危險致電999、藍色字，綠色三間ECO易高石油氣標誌、不准吸煙…
看到這兒，立即留意到附近車輛上的人，殘舊的輕型貨車輕上，不耐煩的司機單臂椅在車窗，一邊吞雲吐霧，然後順手將煙頭往外拋，剛巧掉在石油氣缸旁…
一聲巨響，氣缸的碎片往我的方向，以肉眼不能明辨的時速，向我撲過來；同一時間車鍊逐一爆炸，一條長長的火龍看不見盡頭，所有人只有乾急，他握著她的手、她按著淌血額頭哭了、他沒有理會割破了的手臂，替暈倒了的小朋友進行心外壓…
遠處傳來救護車的警號，我真的不能再撐下去…
一場意外，在我腦海中發生了。
死亡很接近，自我意識很薄弱，往事以不能形容的速度，在腦海、在眼前，不斷flash back…
跟他吵架的情景、跟她破口大罵、跟他們玩樂時笑料百出，跟相知相交的他電話中渡過無數個深宵…
我死去了，你會不會為我哭？你會不會到我的喪禮？你會不會惦掛我這個人？
憶起《活著多好》：

遊玩時開心一點不必掛念我，來好好給我活著就似最初。仍然在呼吸都應該要慶賀，如果想哭，可試試對嘉賓滿座，說個笑話，紀念我…

不過就此死去，我很不甘心，很多事物還沒有試過，如果我肯定，只有數小時的性命，我會在彌敦道瘋狂地裸跑；不諳泳術的我，跳進維多利亞港，可能忽然會學懂游泳，也未可知…
又或者隨便在街上搶去一架名貴跑車，直往政府總部或禮賓府衝進去，人家可能以為是恐怖襲擊。
也希望闖過國金二期的防線，從88層高的大樓一躍而下，一嚐跳樓的感覺。
亦可能參加狂野性派對，來個10P遊戲。
既是死之將至，一口氣豁出去，做平時沒有可能做的事，做世俗眼光不容的事。
人，總有心野的一面。
生命還未到終結，還是要做個循規蹈矩的人。

********
今天，忽然覺得不需要走，我也明白，有些事、有些感覺，只是一時意氣。
今天，英格蘭敗走世界盃。感性上覺得很失望，但理智上，她是罪有應得。自世界盃開鑼，沒有組織沒有氣勢沒有霸氣沒有拼勁，憑丁點的運氣，走到八強，當幸運之神不再眷顧，結果一命烏呼﹗
英格蘭是一隊奇怪的球隊，遇弱逾弱，遇強也不見得會逾強，經常踢出驚險，叫人心驚膽顫。很多球迷，但踢不出甚麼好足球；很多球星，但各自為政，格格不入。
每屆賽事，不論歐洲國家盃還是世界盃，每隔兩年，都會被捧成熱門爭標分子，然而每每叫人失望，不過球迷失望過後，很快又會忘記傷痛，繼續支持她。
每項賽事，出局了，四年後又一條好漢…
不過，大家似乎都習慣了英格蘭，每兩年出局一次，真諷刺﹗

********
我要送一首歌給自己：《願我可以學會放低你》。
甚麼意思？歌名已說得很明白。
難得你主動致電，我卻對你喝罵，你沒有反駁，卻沒有繼續說下去，我想，這回大大破壞了我在你心目中的印象。
既然沒有可能，唯有放手…
既是無奈的決定，也是果斷的決定。

我的最愛

1 July 2006

哈哈，終於完全康復了，第一件事就是食雪糕、食薯片和飲汽水，我的最愛呀，終於可以親親你們﹗
晚上回家，又將耳筒塞著耳朵，不讓耳根清靜半刻，較了random mode，第一首聽的歌是舊歌寓言，之後是Bohemian Rhapsody，一首更舊的老歌，但是經典之作，我沒有記錯的話，這首歌比我還要老
每次銬貝mp3檔案到隨身聽，總會預留空間給這首愛歌，將它放在playlist的最末段
這首歌給我很多思考空間，一首歌是一個故事，這個故事，跟《小王子》有點相似，不同時間看，有不同的體會和領悟
歌，我也很喜歡唱歌，記得兒時是學校合唱團的成員，唱過：
《爸爸愛媽媽》讓我來跟你說一個小故事…
《小黑妞》小黑妞，拾西瓜，一拾拾了個大甜瓜…
《噢﹗布烈奈利》噢，布烈奈利，噢，布烈奈利，你家住在哪裡…
《Mary Ann》Mary Ann oh Mary Ann oh she's the girl for me…
《Mango Walk》Me breda de a tell me that u go mango walk…
日夕苦練的得獎歌曲，雖然事隔多年，仍然朗朗上口
以往冬天，只有八至九度，早上八時上課，一群三、四年級的小學生，七時半已回到三樓音樂室，一邊擦著雙手、擦著眼睛，一邊口震震地唱出每粒音符，如今，仍然瀝瀝在目
********
你終於走了，祝你有更美好的明天
既是好朋友，很多事也不用明言，不宣心照
********
剛才又收到他的電話，剛下車，在便利店閒逛購物時，傳來M-I的鈴聲
也許他怕我看到來電顯示，拒絕接聽他的電話，電話屏幕顯示的是私人號碼
老實說，我根本沒有打算避開他，大方一點可以嗎？大家都活了這麼多年，男女關係相信也處理不少，拿出一點風度，可以嗎？
如果我不想再跟你接觸，我會主動直接簡單爽快明白地跟你說清楚，不要做這些令人反感幼稚無聊膚淺低俗的小動作吧﹗
其實誰對誰錯？不喜歡的，只想跟他做朋友的，卻錯愛於我；朝思暮想的，卻忽冷忽熱，摸不清他的心意，怎麼辦？
********
公仔箱裡，日耳曼兵團對著網窩，狠狠地抽射，誰勝誰負？
開估了，目標一致，一鼓作氣和佔主場之利的德國人，勝出了晉級了
明天仍是工作天，英格蘭卻11時開波，怎樣支持我的愛隊呢？真叫人愁、煩、呆…
********
他說他會升職，加薪百分之三十幾
對比起我，前景模糊，停滯不前，不知所措…