25 July 2009
早幾日同佢飲野，為左小事喊起上來，今朝返工，落左車行返公司期間諗番起呢件事，眼淚流得不值，真係好傻﹗
記憶不知從哪時起，如潮退，暫時洗刷掉某一刻的歷史；如潮湧，將腦海中飄浮的碎片送回岸邊眼前
忽然憶起他講過的說話：成日都唔開心，諗野諗埋一邊，冇晒樂觀的優點
他喜歡我的原因，是我樂觀的性格，帶給他正能量，是我的感染力，令他歡笑，令他溫暖，像一個小太陽照亮著他，是快樂小天使守護著他
趕緊檢回遺失了的我…
另外，仲有樣野想講
呢排睇到facebook，有好強烈的感覺，以前曾經稱兄道弟，叫你好姊妹，挽著你手的人，一個屈尾十就變成…
點講好呢，陌路人，聲都唔聲
我冇同佢嗌交，冇利益衝突，只係，惜日枉信花言巧語，又或者真係我太天真太傻，唔識分交心與客套話
他講得啱，我冇好認真去睇一個人
7月尾，搬屋大計有望實現
深深不憤下續左的租約將於9月底屆滿，忽然諗通一樣野，其實日日返工做野咁辛苦，都係想有個安樂窩，飲飲食食唔使得好多，早排煮頹野食，涼拌粉皮都食得好開心，所以真係要住好d，搵得唔多，但係慳都唔應該慳住
好想搵一間村屋，唔使好大，細細地，有個花園仔或者有個露台仔，或者天台仔都得，放工放假坐喺度hea，乜都唔做，點枝香薰香，沖壺花茶，聽蟬鳴，聽鳥叫，冥想…
日日都有度假的感覺
成間屋都係得我一個人，鐘意點decorate都得，可能將牆身油成橙色，或者紅色又或者鮮黃色，會攤喺個廳的地下，唔使對住唔屬於我的雜物，無啦啦聽到唔想聽的歌聲劇集聲，唔會想睇電視的時候睇唔到，明明鐘意唔睇都開住個畸寶新聞台都俾人轉鬼左，朝早要避開8點到8點4呢段時間起身，唔知幾時想煮飯仔個廚房冇得用，唔知d熱水幾時俾人飲晒冇人煲番正遇著肚餓想食杯麵，吸塵抹地洗厠所責任自負，人地唔做唔使忟，唔會再呢喺房對住四面牆
至於上網的問題，真係唔想俾生意net屈機拿做，睇下薯仔台嗰個流動寬頻得唔得先