29 August 2009
望住搬屋的目標，咁又捱完一隻故仔，八月又過去…
早幾日發左一個夢，夢裡他喺我樓下等我返屋企，離遠見到他，我調頭就走，好唔想見到他
尋日聽左一番說話，又講中死穴，改忍嗚咽
話說某日我阿媽打俾我叫我返去食飯，但真係好忙唔得閒，趕緊故仔冇心情，又某晚佢再打俾我，我返夜，嗰刻喺公司，我聽到的語氣係：做咩weekend唔係放假喺公司？
哎，你故我想的咩…
負面的情緒，低落的心情，我只感到一份不體諒
weekend的晚上寫緊稿，再收到電話…
當思緒被中斷，不適當的時間做著不想做的工作，心情很懷很複雜，我知道這是一句關心的問候，卻引發想撒野的感覺
很不想拱下去，但也要捱下去；很辛苦，但可以任性地放下工作嗎？
一個人對著四堵牆，算是甚麼也好，那一刻沒有選擇，認命地做，麻木了自己
現在寫下這感覺，仍然很委屈
尋日件事係咁樣發生的
食飯的時候我阿媽打俾我，問我係返緊日抖定返夜，返日抖，食緊飯，簡短地回答了
佢又問我搬屋的事，我講過買樓，只係隨便講一句，佢叫我搬返去可以慳錢
咁多年唔通自己咩性格自己唔知咩，有時返工攰到七彩，又唔係做得開心過人，耐唔耐返去一晚食飯問三問四都覺得好煩，如果日日對住，又夜返嗰d，日問夜問咪仲煩到人都癲，搬左出來之後改善左的關係，如果搬番返去又會破壞晒
其實住呢個問題真係幾煩，呢大半年我真係覺得，其實我真係鍾意獨居多d，而搵屋期間好多野諗，買層樓揹住一世，真係唔想咁樣，日日返工都會經過間地產，又會見到好多貼出來的招租廣告，一個豆腐潤咁大的套房租二千幾至三千幾不等，香港地大家搵幾多錢人工？為左住的問題，唔理買又好租又好，去左人工兩三成閒閒地，好多人成世都為住的問題而煩，做香港人真係慘﹗
高地價令業主為層樓捱餐懞，再將負擔層層下達，轉介俾租客，最無良係做套房的，今次搵屋真係發現套房的數目以幾何級數咁上升，因為一個普通的兩房單位，企企理理一般可租到五千幾，但如果將佢間成套房，一開三，每間閒閒地租到二千五，咁就變成七千五，個個月差兩千銀，真係禾味過禾味龍
再加上而家的樓市向豪宅發展，根本就冇俾平民百姓的屋，細價盤需求更甚，我的印象係普遍香港人住的面積越住越細，生活倒退…
對社會生了一份感性憐惜和不滿
好好彩，搵到而家呢間屋，呢件事真係令我好開心
雖然，我認為住屋開支佔不合理地多的比例，生於香港地，唯有認命囉…
阿媽又以令我感到被埋怨的語氣話我租到入錦田咁遠，哎，又要花一番唇舌解釋…
幾乎每次同人講我將會搬入錦田，都會被投以很古怪的目光，我有兩間房，一個花園，空氣清新，有空間，喺我的心目中，呢d先係住人的地方，唔係住喺天橋邊，唔係住喺工廠邊
我再三重申，由門口鎖門開始計，十分鐘，仲要係hea住行嗰隻已經行到去錦上路西鐵站，搭一個站6分鐘出到荃灣，香港有幾多人屋企可以hea住行十分鐘行到港鐵站？而且西鐵去到尖沙咀，南昌轉東涌線可以過海，香港站即係中環
我真係唔想再為嗰d無知地仲以為錦田係鄉下的人而解譯﹗
我的確有點煩躁，旁邊的某甲都講得好白，差在冇講到出口話我不孝
佢話我忙時我媽打俾我，結果阻到我，佢都唔知、唔想，問題係我，我自己沒有選擇地為工作而煩，是我自己控制不了情緒，對工作的態度睇唔開；而要驚動到佢打俾我，係因為我打得俾佢太少，佢太少見我
佢問我一個禮拜有冇返去食一次飯，冇
佢再問，一個月返一次？一年十二個月，咁咪見得十二次？咁又唔只…
佢話當我一個月返去兩次，即係一年見到二十四次…
我陷入反思與悔疚，強忍嗚咽
佢再當頭棒喝多一下：你係佢個女，唔係朋友，一年見廿四次
我要檢討的地方還有很多﹗
記住2009年8月27號中午，聽過這番說話；2009年的8月29號凌晨寫過這篇文章
很討厭做唔到講過一定做的事，所以我不敢作甚麼承諾，盡量返去食飯啦，由呢個星期開始，尤其趁未趕故仔的時間