24 September 2007
各位親愛的讀者，我返來喇﹗
至於點解而家先onblog，其實呢，實情係呢，因為我部腦嬲左我，嫌我太耐唔同佢玩，冷落左佢，所以佢自殺，我22號晚一返到來，諗住同佢玩，聚下舊，但佢唔理我，叫極佢都唔起身，昏迷左，餵佢食急救cd都起唔到身，真大鑊，初初諗住同佢扣喉，但我又唔想冇晒部腦同我的記憶，所以翌日即係23號都係帶佢睇醫生，要入院留醫，佢可能太掛住我，燒壞腦，燒壞左個硬盤，well，我請醫生用盡一切可能保住我同佢的記憶，佢真係唔可以失憶架﹗anyway期待佢星期三出院啦﹗
報告近況，故事應該由21號晚講起…
21號晏晝，拍完最後一個扒，同西藏新聞辦的官員食飯，飲當地特產「雪花」牌室溫啤酒，不停被敬酒…
之後稍為收拾一下行裝，又碌左落酒店樓下間網吧online，想見到的人結果還是沒有出現
本來諗住唔訓，打機又好online又好，玩通宵，但結果太眼訓，訓著左，本來要清晨5點半出發，隔離房同事5點23分拍我門搬行李落樓，我先知醒，真係大檸樂﹗結果極速刷牙洗面換衫pack喼，5點30分將行李推入lift
我諗我訓左兩個零鐘啦…
125公里的路，行左差唔多三個鐘，又凍又餓又眼訓，真係收買人命﹗
刺眼的日出喚醒我，影左兩張相，然後眼前出現的，是一片連綿不斷雪山，除左靚，真係唔知用咩形容詞好
陪伴我們六天的兩名司機送行，並為我們掛上白絹，是他們藏民的祝福，多謝﹗
可是令人著迷的藏刀唔能夠帶離西藏，寄倉都唔得，成為一小遺憾，結果兩把小刀送左俾兩個司機
9點半由全球海拔最高的邦達機場啟程前往四川成都，機程約一小時，沿途雲海和雪山真係好靚好靚同好靚
由成都返深圳的航班係晏晝4點半，所以中間的時間碌左出去成都的市中心食野同自由活動，ko左raspberry雪糕、A記奧運系列同足球書
約兩個鐘後，皇崗過關時大小行李共12件，四個人，每人獲分配三件，我有一個喼同兩個背囊
走在事實最前線的專車喺落馬洲接我地，返公司途中完全雞啄唔斷，極度精靈並處於精神嚴重亢奮狀態，我地可能已經患上低山症
喺公司執左陣野先返屋企，好多人搵，好多人要搵，不停喪講電話，各類活動又可以預埋我喇唔該
放低個喼又急不及待碌出街，第一時間去7仔chur番支我飛佛的有汽利賓納，下一站係tst，d拖羅同秋季限定的秋刀魚同大油甘魚等緊我呀，跟住慢慢碌落旺角，ko埋好耐冇食過的魚蛋，好感動呀﹗
終於可以搣甩d lafuma，做番自己，重投adidas懷抱
尋日帶左部腦去睇醫生，hea左陣就北上尋歡，日食一餐的係某麻辣雞煲邊爐，但風味不及雞公煲
意外地間尋歡骨場竟然有epl播喎，睇完曼聯對車仔先上房，連chur左三個鐘，well，未想訓，又有d唔夠喉，加多一個鐘丫唔該﹗
技師話我嬌小玲瓏，你咪就係大舊衰囉，哈哈哈﹗
今朝ko埋蝦餃燒賣同煎釀三寶，feel so good
某日我仍然喺雲南，往梅里雪山進發途中，喜歡即興的他打俾我
他：一齊食飯囉
我：好呀
他：咁我過來搵你丫﹗
我：好呀，我喺雲南呀
~哈哈哈~
我講俾同車的同事聽，大家都笑到斜晒
同事：佢係咪好少搵你，唔知你上左來？
我：唔係，佢知架，只係佢係咁，一諗起想搵我食飯就搵我之嘛
本來諗住每日都可以寫低一d感覺，結果都係冇時間，太累了，連訓覺的時間都唔夠，還是返來先慢慢逐格重播，請密切留意不日update的相集和回憶錄
至於上網，真係奢侈，酒店的商務中心晨早閂門，有d更加連酒店都不如，上網？死左條心啦﹗網吧又唔係度度都有，所以一搵到網吧，即使唔識打內地的輸入法，打唔到中文只打英文，都留低幾隻字，這是我可以做的
特意要向睇唔慣我寫英文的讀者撒冧…
另外旅程中突發online並與你相遇，令我倍感親切，感謝你為身處異域的我送上祝福與關懷，所以為特別的你，準備了手信