15 March 2010
尋日為左爭取時間食飯前去買衫，滿園陽光，沒有享受，呢幾日天氣回暖，放假冇冬眠，兩點幾起左身，距離晚飯約會仲有d時間，將電腦同沙灘椅搬到花園，泡一杯薔薇普洱，清風送爽，再加上time files伴奏，很是寫意﹗
佢提議去食buffet，我真係好日都唔食一次，叫我搵間平靚正，真係企喺度
按佢的要求，要食生蠔，搵到沙田某酒店話「蠔俾你」，$368per head，對一個唔好buffet的人來講，好似貴左d喎…
再者，兩條友加埋一成八舊水，去食日式燒肉食到反肚啦，如果係嗰d buffet級數的刺身壽司，食幾餐都仲得，所以一直以來buffet都唔係我的選擇
不過佢話想食，咁就去啦，其實都research下其他的可行性，無意中又搵到open rice有coupon，75折，嘩，真係差好遠，打電話去confirm今晚有位，用到，咁就book左兩位
我話俾佢聽沙田，佢嫌遠，又話唔識路…結果約埋一齊搭車過去，第一樣攞的野食就係生蠔，即場開蠔的師傅話係愛爾蘭蠔，well，真係冇咩認識
我地坐喺蠔吧附近，一見佢冇乜人排隊就出去拎蠔，我諗我自己食左最少一打啦，佢應該冇食得咁多，我仲食左4個哈根達斯雪糕球，勁開心呀﹗
最後埋單六舊，其實諗深一層，如果係為食蠔，俾多少少，去蠔吧開盡興d，不過，今晚都食得好開心﹗
話說呢個75折優惠有段小插曲，就係我搵到張優惠券，要印佢出來用，我屋企係有printer，但佢長期處於冇墨狀態，頭先試印，的確如我所料…
嗰時已經係5點，book左7點，點樣印張野呢？結果出絕招，拆個墨盒出來，滴d水入個咀度，，再試印，呵呵，又真係俾我印到，嗰一刻真係幾自大﹗