16 July 2010
一行6人，撐著眼，捱眼訓，約在朝早9點幾的太子，一齊搭車去番禺，目的地係水上樂園
困在旅遊巴內，訓唔到，企唔到，唔知做乜好，勁辛苦，坐到腰痛…
落車已經係三個幾鐘頭之後，食川菜，但馬馬地，之後發現如果3點先入場，俾多70蚊都只係玩多兩粒鐘左右，唔係好抵，天氣熱，又怕排隊，最後決定去揼骨，之後先施施然搭車去買飛，玩夜場
仍是老問題，點解要俾錢嚇自己？
入口附近最近的係sir滑梯，睇見到覺得恐怖，幾層樓高，黃色7秒sir到落去，黃色都係8秒咋…
等緊玩時feel到心跳加速，同喺跳樓等跌落去都相差無幾
身都未濕唔好玩咁邀，諗住玩藍色，但差唔多排到時竟然閂左，局住玩另外兩條，但感覺好似橙色應該冇咁恐怖，咁就玩橙色，除衫就行，但係離心力勁到呢，我真係全程唔敢開眼，sir完左都唔知完左
但最令我唔開心的事係，sir完滑梯落來唔見左對original拖鞋，俾人偷左﹗
但朋友甲對拖鞋同我一齊放同一格都冇事，好明顯揀野來偷，我要強烈譴責，鬧爆大陸班cheap呢﹗
total 7個玩晒，爬喺度sir落去喺條滑梯企上去個窿時，真係有d跳樓的感覺，個窿黑馬馬，咩都睇唔到架；而嗰條好激嗰條滑道，我地揀左3個人一齊坐，一開始時有機關送你一程，好似垃圾房d垃圾，操作員press個掣就跌落去，有一陣慘叫…
其實，真係好好玩，而其實最簡單的sir滑梯係最得人驚﹗
夜晚人隊決定去食蛇，其實我有d唔想，一來呢種生物個樣非常唔討好，雖然係咁，但生牛牛要劏佢來食，硬係唔知點咁
又攰又肚餓，唔理喵埋眼食…
返到去即訓，訓到今日12點退房，所謂的房，其實祈福新村的度假屋，唔好期望有咩設施，純粹有3間房，有幾張訓得人的床，可以用的廁所兩個
食個飯又揼個骨，啱啱趕到4點半的車返來，喺深圳灣跳車
原來我個電話shot shot地，baby兩日都搵唔到我，佢話我連sms都唔覆好驚我有事，又諗我會唔會唔見左個電話
其實我都覺得奇怪，佢冇理由message都冇個，我個電話明明收爆晒，真係唔知點解收唔到喎…
返來聽番，好多個留言…
回程途中，見到兩架運豬車，係咪運落來就唔知，每隻豬的耳仔都釘住一個牌，佢地好明顯係送去俾人開餐，其實佢地知唔知呢？
在車上見識世界，這段路，是最後一段「豬生」，一條不歸路
同尋晚d蛇一樣，佢地一出世的命運就係俾人食，佢地又知唔知呢？
返到屋企擺低d野都差唔多8點，唔知點解好想食麥記，咁就走出去食麥甩咯餐，食完行街，行到十一點左右先返歸