11 July 2010
深宵電視劇終於播完，diana唔去知左邊，勁多蛋撻頭行來行去，call機時代進步到手提電話，以後可以12點閂電視，其實係好事﹗
頭先快速上左深圳食左個飯同打左個白鴿轉，佢完成任務，我的任務係陪佢完成任務，都完成左，哈哈
好熱，超勁熱…
錦上路條過境線應該真係幾唔掂，搭咁多次都坐唔夠一半人，最近仲發現要喺大街開個站，提升服務水平，方便乘客，其實咪即係救亡囉
因為返來搭元朗車，所以喺元朗行左陣街先，原本想買鞋，但睇唔啱，轉戰藥房同生果舖，一抽二袋，有洗頭水護髮素、紙巾，仲有我近日最鍾意食的西瓜，細細個d西瓜baby，我可以一個人食一個，或者一個分兩次食，勁開心
佢教我的食法，係篤一個窿倒d vodka入去，雪凍佢
有機會試下…
而家6點幾個天都仲好光，好似三四點咁，向著太陽的方向走去，刺眼無比
停了下來等過馬路，藍色的畫紙上三道有氣勢的白色油彩，徐徐擺動，我問，是雲在飄還是地在轉？
聽晚的大戰，約在骨煲，一邊烚一邊大叫，可以重溫以前十幾個人一齊打邊爐的日子
我擺明支持荷蘭啦，朋友甲已講到明要同我玩作對，打對台
等睇波又未播大結局之前，睇左一齣電影，攞左個奀雞獎講到好巴閉嗰套
加埋套電視劇，又諗番自己，大家都想講，好似日子是以前的好，以前的特別令人懷念，日子好像越過越差，事情好像越做越糟，生活好似越過越多遺憾，未來好像越接近越沒有把握…
為甚麼人生要有這麼多無奈？