05 February 2008
happy weekend回歸了，fri=玩，sat=玩，sun=玩
尋日又訓到黃斯八晏，因為添置左新lcd電視，為左一set色差線，同埋今年第一餐團年飯，出左深水埗，同時做左一件幸福的事，嘻嘻，咪就係天寒地凍買左包炒栗子暖手囉
av文盲的朋友甲連色差線係咩都未搞清楚，噢…
繼非常極之超級恐怖的做冬飯後，緊接而來係非常極之超級厭惡的團年飯，之後仲有非常極之超級麻煩的開年飯，哎…
食完去左勁hea的年宵行左個圈，再去左唱k，again
其實就算唔係出去玩，我返到去都唔會訓啦，sun night通常都訓唔著，咪又係喺屋企hea下hea下上網吹水睇波睇tv
上篇blog講到reiew過舊年同期的blog，前晚發左個夢，真係咁q，又係同結婚有關…
夢中我著住婚紗和xxx在婚姻登記處，人物有xxx和xxx阿媽
我不停打電話，但要搵的人搵來搵去都搵唔到，心裡焦急的感覺，真係講唔出口，喊左出來
後來我同xxx講我唔結婚，我唔會同佢結婚，佢阿媽用一雙充滿恨意的眼神望住我
在夢裡，我是一個逃婚新娘
年年過年年年過，但年年都係十分難過，非常極之超級唔鍾意過年
舊年大好個理由，以返工避年，今年的詭計幻滅了…
過年d朋友仔總係好似唔係咁易約，我又唔鍾意過年成班唔係好熟的親戚屈喺屋企，總要搵二十個理由避開，結果細個嗰時就呢喺房中自閉黑面，而家就在家中閉關上網冬眠煲碟
為左唔好悶親自己，都應該好好籌備一下，未雨綢繆，準備定大量vcd、dvd，為自己計劃一下萬一如果可能喺屋企可以做的事項
現備有的新碟如下：
1/兄弟
2/野‧良犬
3/色戒
另打算掃貨的新碟如下：
1/東京鐵搭
2/little children
3/神探
補購珍藏的碟如下：
1/Death Proof
2/Planet Terror
朋友甲msn我，用詞係「應下我好bor…」
頭頂生出二十個問號，佢幾時叫我，我幾時有唔應佢呀？
或者可能好大機會係個web msn，因為有時個server shot shot地，搞到我有時明明堅online都變左假online
哎，喺公司要將就下，因為只得呢兩個代用web msn可以運作到，其他的server都block晒
收唔收到你的message，send message俾你你睇唔睇到，就要睇下嗰日大家的造化，不過我真係好鍾意msn架﹗
今日最精彩、引起最熱烈討論，真係莫過於黃sir個記者會，睇住公司的live feed，佢d bite真係啜核﹗
啜核之最：係你個老友，識左好耐，大家一齊睇，或者佢話好正，你問俾個copy我得唔得，你係可以的，咁樣唔犯法
放工返屋企再食團年飯，等左好耐車，好煩厭好忟好浮躁，原因未明
冇留意等左幾耐，但腦海略過很多想法，勾起一些感覺，進入了思考模式…
曾幾何時很享受等車、搭車的過程，因為可以跟他一起，每每也想待久一點就最好，車走得再慢一點就最好，總覺得相聚太短
然而人大了，閱歷多了，這些期盼和自我陶醉彷彿變得幼稚和沒有必要
曾在愛海中遇溺、獲救，再遇溺、再獲救，漸漸不害怕它泛起的浪花，也學懂駕馭可預見的潮夕，甚至嘗試在波濤中尋找刺激，說得動聽一點叫收放自如
正如一首我很喜愛的歌曲，並曾在這裡跟你們分享——《粵語殘片》中的一句歌詞：每戀一次，震憾總逐漸變得越淺
就是跟抹香水的原理一樣，久而久之鼻子變得麻木，需要抹更濃的香水