7 June 2006
今日公司有人做左隻故仔，大陸有個bb有三隻手，引起我和某人一段討論：
我：哎呀，個bb好慘
某人：佢做咩？
我：佢有三隻手
某人：其實有三隻手又點啫，點解一定要切左佢？
我：佢咁唔同，個小朋友成長過程會好自卑，如果你個仔有三隻手，你會點丫？
某人：但如果隻手係正常，有三隻手六個頭都冇問題架
我：都話佢會俾其他小朋友笑佢
某人：叫佢唔使理嗰d人囉，我會俾佢自己揀切唔切隻手
我：如果佢話，「我唔鐘意d人笑我係怪物，但我又覺得有三隻手好型」，咁你點呢
某人：咪俾佢自己揀囉
我：咁要等到幾時佢先可以決定到？咁佢一路都會俾其他人笑佢，佢咪活在呢個陰影囉
某人：咁教佢咪得囉
我：你覺得係咪咁易教得佢明呢？咁佢見到其他小朋友，其他小朋友會笑佢，哎呀，怪物呀，佢有三隻手架…
某人：我會話俾佢知，你唔係怪物，其他人先係怪物，兩隻手的先係怪物，教佢唔使理其他人囉
我：咁佢可能會話，我唔係怪物，爸爸得兩隻手係怪物，媽媽都係得兩隻手，媽媽都係怪物，其他小朋友都係得兩隻手，全部都係怪物
某人：係呀，如果佢咁講我會話爸爸都係怪物
(略)
雖然有時多數人認為正確的事，並一定真係永遠正確，正如二戰前希特勒的霸權當時得到大多數國民支持，但結果還是被推翻，證實是錯的
然而在社會教化的過程中，在迷罔的羔羊中做異類和證明自己是正確，的確需要無比勇氣和毅力
不過別人認同了，這件事又成了「多數人認為對的事」，這樣很迷失嗎？
有時候可以選擇係好事，但如果錯過了做最佳決定的機會，又點算呢？
好似個bb咁，佢咁細個，如果呢個階段切左佢第三隻手，唔理隻手正常與否，我只知道佢咁細個，生命力、康復進度都應該會比佢大個後切除理想
而且趁佢細個切左，佢唔使面對其他人「怪物」的指控，怨爸爸媽媽沒有在他懂事前幫佢解決呢件事，及早切除何嘗唔係一件好事？
就算呢一刻診斷佢第三隻手係正常，難保佢逐漸長大，有一日隻手缺養壞死都係要切除？到時先切，會唔會仲危險呢？
作為爸爸媽媽，這樣的決定也不為孩子做，配嗎？
怕的是孩子有一天怨你奪去他其中一隻手？怕孩子怪你唔俾佢揀？
記得一個故事，上帝話會帶一個人上天堂，只要他們在禾田裡摘到的稻，長過上帝手上的就可以，不過他們在禾田裡只可以一直向前行，不可以向後望，而且只可以摘一次
結果冇一個人摘到比上帝上的稻，因為大家都以為前面的稻會比現在見到的長，以為將來的會更好，但其實最好的，最長的稻就在面前，一開始的那一段
結果大家行到最尾，一次又一次浪費選擇機會，最後令自己無可選擇地選了最尾段，並非禾田最長的稻，做了並非最好的決定
該做決定時，就要果斷