25 April 2006
有冇試過手執一樣野，但心裡諗住另一樣野？
明明手上拎住個火龍果，偏偏目不轉睛地(目及)住隔離抽提子
已經將荷蘭件新主場橙衣試上身，又對掛喺display件心口有紅白藍三色斜間的白色作客衫念念不忘
人係咪就係咁呢？係咪個個都係咁呢？
最近遇到呢d「得一想二」的情況比較頻密，真係覺得好煩，又覺得自己好優柔寡斷
做了一個決定後，總會問自己：有冇揀錯？
然而已經揀左，錯左又可以點？
其實，我以前唔係咁的…
做記者，返工的時間，有一半用左來等和同行家吹水
頭先聽到個汽水機愛情論，大意+本人的elaboration：
話說汽水機裡面有個mechanism，會自行將唔同幣值的銀仔分類，令五蚊銀會掉進五蚊銀的窿，五毫子掉進五毫子的窿
情況就好似世間上的男女，有唔同性格，唔同喜惡，某d人會同某d人夾到，大家跌埋落同一個窿，開開心心喺埋一齊；距離唔係咁遠的，但咀形有d似，咪做到朋友囉：差少少的，咪做萍水相逢的hi-bye friend；唔同channel的，有緣咪個普通同事、唔打招呼的鄰居，又或者搭枱的甲乙丙；緣份差d的，可能眼超超，互相不禮貌地問候過；餘下的，各自活在永不相遇的平衡線上，唔使多講啦
我好相信緣份，又或者咁講，緣份可以用來解釋好多野，所以我話我信緣份
你覺得同我熟唔熟到好啦，我add左你，你又睇我個blog，都係一種緣份
有時我d跳躍式思考與寫作方式，令讀者，即係你呀，可能有d辛苦，希望唔會為你帶來太大不便
以前發過作家夢，希望每日將所感寫幾百字，賺點稿費，剛好夠三餐一宿，手頭有點緊拙也沒所謂
但現在夢醒了一半，不願抽身，偶爾仍幻想住在快要清拆被迫遷的廉價唐樓，家裡不修邊幅，原稿紙到處飛揚，隨手拈來的是一篇舊作
平日罕有訪客，一日有朋自遠方來，心裡緊張起來，生怕把稀客嚇倒…
故事的前部分沒有在現實裡發生，但早前有兩位人兄，在我沒有準備下到訪我的獨居，兌現了故事的後半部，真係失禮