15 June 2006
剛才在中學同學的留言板報告一下自己的狀況，覺得講的野，都適合0係呢度同你分享：
自從回歸記者行列，0係而家的公司工作，我勁耐冇浦過頭
0係呢間公司，原來不經不覺，做左半年有多，只有頭兩個月返normal，即係返9-19，之後由2月起都係返夜，返15-25，只係因為上個月開始改shift，夜更係返1330-2330
呢d返工時間，同埋on shift星期六、日可能要返工，我浦唔到頭，大家都唔會怪我既
返夜其實好0岩我，我呢d，根本唔可以早起身
同埋返夜，準時返工，準時放工
不過呢個星期差d啦，自從湖北宜昌港人車禍後，ot左幾晚，不過以前真係好鮮有
不過大部分時間都係返10粒鐘，有放工時間，比起好多從商的，返工返到沒完沒了，好得多
人好搞笑，以前讀緊書時，越讀越唔鐘意自己0個科，話第日唔做記者，結果又去左tvb做intern同parttime，一路做一路鬧，甚至得罪唔少當時的老細，心諗我唔會做番呢行，得罪得起
之後返過地產公司office工，1仔的後勤支援，先發現原來我係做唔到坐定定0係office的工，諗返做記者，周圍去周圍跑，真係幾好，而家做左半年，應該呢行，原本以為自己唔鐘意的工作，先係最適合自己，真係諷刺﹗
做野，搵好多錢緊要定係開心的工作環境緊要？我一定揀後者
不過，工作始終都係為三餐一宿
如果能同時滿足到生活，又唔會令自己迷失，真係難得
雖然好多同事話做得唔開心，公司好多畸呢人畸呢事，出面d人又唔識唔欣賞我地個台，好失落；但係我話晒做做過幾間大公司，更畸呢的人和事我都見過，呢度0個d，都唔算得係咩
雖然最近間中都有為呢d野唔開心，不過呻完就冇事，下次學精d就得囉
可能同我一齊返夜班同事比較好，0岩咀形，所以都可以搵到開心的地方
而我自問我的能力，0係呢度能夠勝任，冇咩壓力，唔使巴結人、唔使奉承人，呢度d人，有時係畸呢，但唔會鬧人囉，至少我做左半年，未俾人鬧過，唔使受氣。
有時會覺得自己與某d人觀點與角度唔同，而覺得受委屈
有時自己對新聞有所堅持，睇見公司資源不及兩個大台，覺得不受重視；然而當你得到所謂「資源」面對的壓力，又是不足為外人道…
呢度人工係比兩個大台低少少，但如果用呢少少錢，換到的，係唔使做遺背自己的事，唔使做令自己辛苦的事，咁又值得喎
細台有細台好，大台大記者做的野，因為我在細台，所以我都有份參與，例如係wto、尖沙咀槍戰、田二少辭職、偉景樓爆炸、孫公俾人圍、深水埗引爆戰時炸彈等，都係本地的breaking news，既然放心俾我處理，我自然有我的能力
經常出去做野，見到的係人地d exprienced reporters，我同佢地做一樣的野，睇返大家寫出來的故仔，都唔係相差得太遠，甚至做得比佢地好(例如係偉景樓爆炸的故仔)感覺都幾自豪
上次打風連續兩日做ob，即係現場報道，心諗如果在tvb，都唔知幾耐先等到呢個機會，又或者要討得邊個歡心先有呢個機會